ئەڤرۆ نيوز:
پەرلەمانتارەکێ کورد راگەھاند ئەڤ رەوشا نوکە عیراق تێدا دبۆریت تنێ ب رێککەفتنێ ل گەل موقتەدا سەدر دێ چارە بیت ب مەرجەکی ئەمریکا و ئیران و مەرجەعێ شیعان فشارێ ل سەر بکەن، ئاشکرا ژی کر کو ئەمریکا دڤێت ھەتا ھەلبژارتنێن سەرۆکاتیا ئەمریکا، گوھۆڕینێن سیاسی دعیراقێ دا نەھێنە کرن.
فەرھاد قادر پەرلەمانتارێ کورد زێدەتر گۆت” ئەڤ رەوشا سیاسی ل عیراقێ تنێ ئێک چارەسەری ھەیە، ئەوژی رێککەفتنە ل گەل موقتەدا سەدری، چونکی کونترۆلا خوەپیشاندەران نوکە یا ددەستێ وی دا”.
گۆت ژی” بێ رێککەفتن ل گەل سەدری، ئەنجامێن چو کۆمبوونان مفا بۆ نابیت و پێدڤیە ئەمریکا و ئیران و مەرجەعێ بلند یێ شیعان رۆلێ خوە ببینن بۆ فشارخستنێ ل سەر سەدری”.
موقتەدا سەدری د گۆتارا خوە یا تەلەڤزیۆنی دا، گۆت” ھەتاکو دو ھەیڤێن دی چو چالاکیێن سیاسی ناکەت و دیداران ل گەل کەسایەتیێن سیاسی ناکەت، کارێ فراکسیۆنا سەدری ژی د پەرلەمانێ عیراقێ دا ھەلاویست”.
وی پەرلەمانتارێ کورد خویاکر” موقتەدا سەدر دڤێت حوکمەتەکا رزگاریا نیشتمانی و بارێ نەئاسایی رابگەھینیت بۆ وێ چەندێ ھەلبژارتنێن پێشوەخت بھێنە ئەنجامدان و نوکە موقتەدا یێ بوویە کەسایەتیەکێ کاریگەر ل عیراقێ، لەوما ئەنجامدانا ھەلبژارتنێن پێشوەخت دمفایێ وی و رەوتێ وی دایە و ب ڤێ چەندێ ژێ دێ دەستھەلاتێ ژ حزبا دەعوە وەرگریت”.