ئەڤرۆ نیوز:
سەرۆک وەزیرێن تورکیا ئەحمەد داوود ئوگلۆ راگەھاند کو چەکدارێن YPG سەربازێن روسیانە و بۆ وان شەری دکەن و ژ بەر ھندێ ژی مە چەندین ناڤەندێن وان ل عەزازێ بۆمبەباران کریە و ھەکە وان بڤێت بەر ب عەزازێ ڤە بچن دێ ب توندی بەرسڤا وان دەین و سالح موسلم ژی راگەھاند کو ئەو گوە نادەنە گەفێن تورکیا.
ئەحمەد داوود ئوگلۆ سەرۆک وەزیرێن تورکیا دوھی د پرێس کۆنفرانسەکێ دا ل ئەنقەرە سەبارەت ب ھێرشێن وان ل سەر بنگەھێن YPG ئاخڤی و دیار کر کو YPG ھێزەکا سەربخوە نینە و ل گۆر بەرژەوەندیێن ھندەک ھێزان بزاڤێ دکەن و وان دڤێت ل سەر سنۆرێ مە مەترسیێ بۆ مە دروست بکەن و ژ بەر ھندێ ژی چەند رۆژێن بۆری ھێزێن مە یێن سەربازی ل رەخ عەزازێ بنگەھێن وان بۆمبەباران کرن و نھا ئەو نەشێن زێدەتر بەر ب پێشڤە بچن و گۆت: (من دڤێت بێژم کو YPG ھێزەکا کوردی نینە، ئەو ھێزەکا سووری ژی نینن و ژ بۆ بەرژەوەندیێن کوردێن سووریایێ ژی خەباتێ ناکەن، ئەو ھێزەکن سەر ب رێکخراوا تیرۆرستی یا PKK نە و نھا ژی ل گۆر بەرژەوەندیێن روسیایێ کار دکەن و دخوازن ببنە مەترسی ل سەر ئاسایشا تورکیا و ژ بەر ھندێ ژی ئەم ب مافێ خوە یێ رەوا دبینین کو بنگەھێن وان بومبەباران بکەین دا ئەو مەترسیێ بۆ مە دروست نەکەن).
سەرۆک وەزیرێن تورکیا ب رەنگەکێ توند ھێرشی سەرۆکێ پارتیا کۆماریا گەل ژی کر و راگەھاند کو ئەو نزانن کا چ دکەن، مەترسیەکا گەلەک مەزن ل سەر تورکیا ھەیە و گەلەک ھێز بزاڤێ دکەن تورکیا بەر ب شەرەکی ناڤخوەیی ڤە ببەن و ژ بەر ھندێ ژی دڤێت ھەموو پارتێن سیاسی یێن تورکیا پشتەڤانیێ ل سیاسەتا مە ل سووریێ بکەن.
ل ئالیێ دی دەولەت باخچەلی سەرۆکێ پارتیا بزاڤا نەتەوەپەرست یا تورکیا ژی سەبارەت ب ھێرشێن تورکیا بۆ سەر بنگەھێن YPG دیار کر کو YPG وەک ھێزا ئەردی یا ئەمریکایە و سەربازێن وی وەلاتی نە و ژ بەر ھندێ ژی ئەڤرۆکە مەترسیەکا گەلەک مەزن ل سەر ئاسایشا نیشتمانی یا تورکیا ھەیە و گۆت: (دڤێت بارێ نەئاسایی بھێتە راگەھاندن و تورکیا ب ھەموو رەنگەکێ خوە بۆ ھەر رەوشەکا نەخواستی بەرھەڤ کەت، چونکو ئەمریکا و روسیا ئەڤرۆکە ب رەنگەکێ جدی دوژمناتیا تورکیا دکەن و ھەر دو ژی ھاریکاریا YPG دکەن).
نووترين نووچه
- نێچیرڤان بارزانی دوپاتیێ ل بهێزكرنا پێكڤەژیانا ئاشتییانە د ناڤبەرا هەموو پێكهاتەیاندا دكەت
- د. شێرزاد زەكەریا: توركیا و پەكەكێ بۆ ئاشتیێ پێدڤی ب هاریكاریا سەرۆك بارزانی هەیە
- باسكێ سەدری: پشكدارییێ د وێ حوكمەتەكێ دا ناكەین یا کو چارچۆڤەیێ هەماهەنگیێ تێدا بیت
- سەرۆك بارزانی و سەرۆكێ باسكێ (غەد) یێ سووری رەوشا سیاسی و ئەمنی یا دەڤەرێ گەنگەشەكر
- نێچیرڤان بارزانی و بالیۆزێ بریتانیایێ پەیوەندیێن دوقۆلی گەنگەشەكرن
- مەسرور بارزانی: گرنگە حوكمەتەكا ب هێز و ئێكگرتی و خزمەتگوزار بهێتە پێكئینان
- سەرۆكێ حوكمەتا هەرێمێ دوپاتیێ ل دابینكرنا مافێن كوردێن سووریێ دكەت
- د. ڤیان سەبری: هەكە بەغدا پێگیری رێككەفتنا ل گەل هەرێمێ ببیت، ئێدی گرفتا مووچەی دروست نابیت
- هەولێر و بەغدا ل دۆر هنارتنا پەترۆلا هەرێما كوردستانێ رێككەفتن
- بافل تالەبانی ل بەغدا بزاڤێن مەسرور بارزانی سەبارەت پڕۆژەیێ (هەژمارا من) بلند هەلسەنگاندن
سهرهكى نوچێن گرنگ
سیروان بارزانی مزگينيه‌كێ رادگه‌هينيت
ئەڤرۆ نیوز:
سەرپەرشتیارێ میحوەرێ مەخموور ـ گوێر یێ ھێزا پێشمەرگێ کوردستانێ راگەھاند، دەڤەرێن کوردستانێ یێن دەرڤەی ئیدارا ھەرێما کوردستانێ پشتی شکەستن و ھەڕفینا سوپایێ عیراقێ ل وان دەڤەران و داگیرکاریا توندرەوێن داعش، نوکە ل میحوەرێ مەخموور ـ گوێر چو ئاخا کوردستانێ نەمایە ل بن دەستێ تیرۆرستێن داعش.
سیروان بارزانی دیار کر کو ھاتنا ھێزێن عیراقی بۆ سنوورێ مەخموو چو مەترسی بۆ سەر ھەرێما کوردستانێ نابیت، چونکو گەرەنتی بۆ ڤەگەڕیانا وان یا وەرگرتی و بۆ ئاژانسا ئەنادۆل گۆت: (جھێ وێ ھێزێ ل دەڤەرێ نینە و ئەو دێ بەر ب مووسل ڤە چن و ب چو رەنگەکی نەشێن ب زۆری ل وێ دەڤەرێ بمینن).
سیروان بارزانی ئاشکرا ژی کر کو پێشمەرگە دێ پشکداریێ د ئۆپەراسیۆنا رزگارکرنا مووسل دا کەت، لێ نوکە یا دیار نینە، کا دێ ل کیژ میحوەری و ب چ رێژەکێ پشکداریێ د وی شەری دا کەت.
ئه‌ڤرۆ ئه‌ڤ وه‌زاره‌ت و ده‌سته دێ مووچه‌ى وه‌رگرن
ئه‌ڤرۆ نيوز:
وه‌زاره‌تا دارايى و ئابوورى ل حوكمه‌تا هه‌رێما كوردستانێ خشتێ به‌لاڤكرنا مووچێ هه‌يڤا كانوونا دويێ يا سالا 2016ێ راگه‌هاند.
ب گۆره‌ى وێ راگه‌هاندنا وه‌زاره‌تا دارايى، بڕياره ئه‌ڤرۆ رۆژا چارشه‌مبى رێكه‌فتى 17ى شوباتا 2016ێ دێ مووچێ هه‌يڤا كانوونا دويێ يا سالا 2016ێ يێ وه‌زاره‌تا كاروبارێن شه‌هيد و ئه‌نفالكريان، مووچێ شه‌هيد و ئه‌نفال و زيندانيێن سياسى، ده‌سته‌يا مافێ مرۆڤى، ده‌سته‌يا ژينگه‌هێ، ده‌سته‌يا وه‌به‌رهێنانێ، ده‌سته‌يا گشتى يا ده‌ڤه‌رێن كوردستانى يێن ده‌رڤه‌ى ئيدارا هه‌رێمێ و كۆميسيۆنا بلندا سه‌ربه‌خۆيا هه‌لبژارتنان هێته به‌لاڤكرن.
قوباد تاله‌بانى: ب مه‌رج دێ ل گه‌ل به‌غدا رێككه‌ڤين
ئه‌ڤرۆ نيوز:
قوباد تاله‌بانى جێگرێ سه‌رۆكێ حوكمه‌تا هه‌رێما كوردستانێ راگه‌هاند: ئه‌گه‌ر به‌غدا هه‌موو مووچێ موچه‌خورێن هه‌رێما كوردستانێ دابين بكه‌ت ب هێزێن پێشمه‌رگه‌ى ڤه، ئه‌م ژى ب سناهى دشێن ل گه‌ل رێككه‌ڤين.
حه‌يده‌ر عه‌بادى، سه‌رۆك وه‌زيرێن عيراقێ د ديداره‌كێ دا ل گه‌ل كه‌نالێ عيراقيه، مه‌رجه‌ك بۆ هنارتنا مووچێ فه‌رمانبه‌رێن هه‌رێمێ دانابوو و راگه‌هاندبوو: ئه‌گه‌ر حوكمه‌تا هه‌رێمێ هه‌موو نه‌فتا خوه راده‌ستى حوكمه‌تا ناوه‌ند بكه‌ت، ئه‌و د به‌رهه‌ڤن مووچێ فه‌رمانبه‌رێن هه‌رێما كوردستانێ دابين بكه‌ن.
ژڤانێ پێشكێشكرنا خواندنا ماسته‌ر و دكتورایێ هاته ئاشكراكرن
ئه‌ڤرۆ نیوز:
د كومبوونا ئه‌ڤرۆ یا وه‌زاره‌تا خواندنا بلند دا، بریار هاته دان خواندنا ماسته‌ر و دكتورایێ ل هه‌یڤا نه‌ه یا ئه‌ڤ ساله 2016 – 2017 بهێته ڤه‌كرن و ب سیسته‌مێ پارالێل.
عه‌باس ئه‌كره‌م په‌یڤدارێ وه‌زاره‌تا خواندنا بلند دیاركر پشتى ئه‌ڤرۆ بریارا ڤه‌كرنا خواندنا ماسته‌ر و دكتورایێ هاتیه دان، لژنه‌یه‌ك هاتیه راسپاردن ب مه‌ره‌ما ده‌ستنیشانكرنا كرێیا خواندنا پارالێل و تاقیكرنا شیانێن زمانێ ئینگلیزى و چه‌ند رێنمایێن دى یێن تایبه‌ت ب خواندنا بلند ڤه.
رێككه‌فتنا ده‌وحه دێ نه‌فتێ گه‌هینته سه‌ر 40 دولاران دا
ئه‌ڤرۆ نیوز:
پشتى كو دوهى وه‌زیرێن نه‌فتێن چار ده‌وله‌تێن مه‌زن یێن به‌رهه‌مئینانا نه‌فتێ ل ده‌وحه یا پایته‌ختێ قه‌ته‌ر ل سه‌ر زێده‌نه‌كرنا ئاستێ به‌رهه‌مئیانا نه‌فتێ رێككه‌فتن، دهێته پێشبینیكرن به‌رمیلا نه‌فتێ بگه‌هته سه‌ر 40 دولاران دا.
ل دووڤ رێككه‌فتنا د ناڤبه‌را وه‌زیرێن نه‌فتێن رووسیا و قه‌ته‌ر و عه‌ره‌بستانا سعودى و فه‌نزویلا دا، ئه‌ڤ ده‌وله‌ته دێ ئاستێ به‌رهه‌مئینانا نه‌فتا خوه ل ئاستێ هه‌یڤا چوویى راگرن و باوه‌ریا بسپورێن ئابوورى، ئه‌ڤ راگرتنا ئاستێ به‌رهه‌م ئینانا نه‌فتێ، دێ رێگریێ ل زێده‌تر ژ ئه‌رزانبوونا نه‌فتێ د بازارێن جیهانێ دا كه‌ت و ره‌نگه ل سه‌ر 40 دولاران دا بمینیت.
هه‌ڤده‌م پشتى ڤێ رێككه‌فتێ هه‌ر ئه‌ڤرۆ بهایێ ئێك به‌رمیلا نه‌فتا برنت بۆ سه‌ر 35 دولاران دا بلند بوو.
ڤيديۆ: بكوژێ ژنا هۆله‌ندى ل دهۆك هاته ده‌سته‌سه‌ركرن
ئه‌ڤرۆ نيوز:
رێڤه‌به‌ريا پۆليسێن پارێزگه‌ها دهۆكێ راگه‌هاند كو پشتى تاوانباره‌كى هه‌ڤژينا خوه يا 25 سالى هه‌لگرا ره‌گه‌زنناما هۆله‌ندى ل سه‌نته‌رێ قه‌زا پێرسيڤێ يا سه‌ر ب ناحيا ده‌ركارێ ڤه كوشتى، پۆليس شيان تاوانبارى ده‌سته‌سه‌ربكه‌ن و د ڤه‌كۆلينێ دا دانپێدان ب تاوانا خوه كر كو خودانێ دو كچ و دو كوڕايه.
هێلا رێبه‌ر دێ هێته گرتن
ئه‌ڤرۆ نيوز:
وەزارەتا ڤەگوھاستن و گەھاندنا حوکمەتا ھەرێما کوردستانێ راگەھاند، ھەموو کۆمپانیێن ئەنتەرنێتێ بھایێ کارتێن خوە کێمکرینە و ب تنێ رێبەر بەرەف گرتنێ دچیت، چونکو بھایێ خوە کێم نەکریە، ھەروەسا دیار کر، وەزارەتێ پشکنین بۆ ھەموو کارتێن ئەنتەرنێتێ کریە و بھایێ وان کێمکریە، بەرۆڤاژی دێ ھێنە سزادان.
ئومێد محەمەد، پەیڤدارێ وەزارەتا گەھاندنێ ل ھەرێما کوردستانێ بۆ رۆژناما ئەڤرۆ گۆت” پشتی بڕیارا کێمکرنا بھایێ کارتێن ئینتەرنێتێ ھاتیە دان، وەزارەتێ دووڤچوون بۆ ڤێ کێمکرنێ کریە و ل دەستپێکا ڤێ ھەیڤێ وەرە ھەموو کۆمپانیێن بیاڤێ ئەنتەرنێتێ بھایێ کارتێن خوە کێمکرینە، راستە وەلاتیان گازندە ل کارتێن adsl ھەنە و دبێژن بھایێ وان ئەرزانبوویە ژ 60 ھزارا بۆیە 49 ھزار دینار، بەلێ لەزاتی و گێگا ھاتینە کێمکرن.
ناڤبری زێدەتر گۆت: وەزارەتێ بڕیاردا ئێکسەر پشکنین بۆ بھێتەکرن و ل دیوانا وەزارەتێ ب ئامیرێ پێشکەفتی ھاتیە پشکنین دەرکەفتیە راستە ل سەر کارتێ نڤیسیە 3 گیگا ب 49 ھزاران، بەلێ کۆمپانیا بەری سێ ھەیڤا چاپکرینە و بڕیار بوو بێخیتە بازاڕی، بلا بکارھێنەر پشتڕاستبن کارتێن سێ گێگا ئەی دی ئێس ئیل پێنج گێگا تێدانە، کۆمپانیێن دی ھەموویان بھایێ خوە دابەزاندیە ب تنێ رێبەر نەبیت، ئەو ژی ئەگەرێ ئەرزانەکرنا کارتێن رێبەر بۆ ڤێ چەندێ ڤەدگڕیت، پشکدار زۆر کێم ماینە و رەنگە بھێتە گرتن.
ئومێدی گۆت ژی “وەزارەت چاڤدێریا کۆمپانیا دکەت و ھەر کۆمپانیەکا سەرپێچیێ بکەت دێ ھێتە سزادان، نابیت کۆمپانیا بکارھینەرێن خوە سەرداببەن و ب ناڤێن جۆدا، دەربارەی کۆمپانیا پەیوەندیکرنا تەلەفۆنی ژی مە وەکی وەزارەت چو دەستھەلات ب سەر کۆمپانیێن ئاسیا سێل و کۆڕەک تیلیکۆم و زێن دا نینە، ژ بەر کو راستەوخۆ ژ لایێ بەغداڤە گرێبەست دگەل ھاتیەکرن، ب تنێ بەغدا دشێت داخوازا کێمکرنا بھای لێ بکەت، بەلێ وەکی دەستپێشخەری بەری چەند رۆژان ئاسیا سێل بڕیار دا ھندەک ژ بھایێ خوە کێم بکەم و ھیڤیدارین رەوشا ئابووریا وەلاتیان ل بەرچاڤ بگرن.
باژێرڤانیێن دھۆک ب چه‌ند پارچێن ئه‌ردى يا قه‌رداره؟
ئەڤرۆ نیوز:
رێڤەبەرێ باژێرڤانیێن پارێزگەھا دھۆکێ راگەھاند، بەرھەڤی بۆ بەلاڤەکرنا پارچێن ئەردی ل پارێزگەھا دھۆکێ ھاتیەکرن و ب تنێ دێ چاڤەرێی بریارا ئەنجوومەنێ وەزیران بن. ئاشکراکر کو ل سالا بۆری شیان ھەموو خەلکی قەربوو یێن دیندارێن حوکمەتێ رازی بکەن.
ئەندازیار ھەڤال حسێن رێڤەبەرێ باژێرڤانیێن پارێزگەھا دھۆکێ بۆ رۆژناما ئەڤرۆ گۆت: ھەر چار پارێزگەھان بەرھەڤی کرینە بۆ بەلاڤکرنا پارچێن ئەردی و ب تنێ ھەکە بریار ژ ئەنجوومەنێ وەزیران دەرکەڤن و یا ب مە ڤە گرێدایی دێ کەین، نەخشە د بەرھەڤن وەک ماستەر پلان و ھەتا ئەم دبینە خودانێن پارچێن ئەردی دڤێت پرۆسە ژ ھندەک قۆناغان دەربازببیت، دیسان پێدڤی ب وەزارەتا چاندنێ ھەیە دا ئەردی بینیتە سەر ناڤێ مە و دیسا وەزارەتا دارایی ودیسا ل وەزارەتا باژێرڤانیێ ب ھەفکاری ل گەل رێڤەبەریا نەخشەدانانێ مژوولین و کار دکەین بۆ چێکرنا نەخشان.
ئەندازیار ھەڤال حسێن ھێشتا ژی گۆت: ھەتا نوکە کەسێن رازیبوون ل سەر وەرگرتنا ئەردی ھەی پتر ژ 21 ھزار ناڤانە بۆ تەرخانکرنا پارچێن ئەردی و ل گەل کەسێن قەرەبووکرنێ ئانکو نوکە ئەم ب 23 ھزار پارچێن ئەردی دەیندارین، ھەمبەر شاشی یا حوکمەتێ و بەلاڤەکرنا پارچێن ئەردی و ھزرکرن ل سەر چێکرنا شووقان کو کێمتر ئەرد بھێتە بەلاڤەکرن.
ناڤبری زێدەتر گۆت: دبینم ل سەر بەلاڤەکرنا پارچێن ئەردی دێ ڤەکۆلینان کەت و ل دووڤ دا دێ بریارێ ل سەر دەت، خەلکێ دھۆکێ و دەردوران شووقێن کێم دەرامەتان ھاتینە ئاڤاکرن و دیسان بۆچوون بەر ب وێ چەندێ دچوون کو ئاڤاکرنا ستوونی ھەبیت و پتر مفا د وێ چەندێ دایە، ئەڤە تشتەکێ سەرەکەفتیە و ھەکە حوکمەت بشێت شووقان چێکەت و بدەتە فەرمانبەران دێ چێتر بیت ژ بەلاڤەکرنا پارچێن ئەردی، دیسا ئەڤە ب قست بیت دێ باشتربیت، دیسان پێشتر ئەرد زیان ڤێ کەفتیان ل سەر مە بوو و ھاتنە قەرەبووکرن و شیاین خودانێن ئەردێ فرۆکخانێ ھەموویان رازی بکەین.
ھەمبەر زێدەبوونا باژێرڤانیان ل سنورێ پارێزگەھا دھۆکێ، رێڤەبەرێ باژێرڤانیێن پارێزگەھا دھۆکێ، گۆت: باژێرڤانیا (کەلات) ھاتیە زێدەکرن و ھەتا نوکە ستاف وەک فەرمانبەر بۆ نەھاتینە دامەزراندن ل قەزا ئاکرێ، دیسان کار ل سەر ڤەکرنا دو باژێرڤانیێن دی دھێتەکرن ل ھەر دو بریفکان تەنشت بێگوڤا و بریفکا دھۆکێ، ب ڤەکرنا ڤان باژێرڤانیان دێ بنە 49 باژێرڤانی ل پارێزگەھا دھۆکێ.
ئەندازیار ھڤال ئەو چەندە ژی ئاشکراکر، دێ پارچێن ئەردی یێن حوکمەتێ ھەبن بفرۆشن، لێ ھێشتا مە بەرھەڤ نەکرینە و دێ ئەو چەندە ژی ھەبن.
پەرلەمانتارەک: قانوونا لەشکریا ب زووری ھەرێما کوردستانێ ژی ڤەدگریت
ئەڤرۆ نیوز:
ئەندامەکێ لژنا ئاسایش و بەرگریێ ل جڤاتا نوونەرێن عیراقێ دیار کر کو پرۆژە قانوونا خزمەتا لەشکریا ب زۆری ھەکەر ژ لایێ پەرلەمانێ عیراقێ ڤە بھێتە پەسەندکرن، ھەرێما کوردستانێ ژی دێ ڤەگریت، بڕیاردەرێ لژنا ناڤبری ژی رەت دکەت ئەو قانوونە ھەرێمێ ڤەگریت و دبێژیت: ئەو قانوونە ھەرێمێ ڤەناگریت، چونکو ھەرێما کوردستانێ پاسەوانێن ھەرێمێ یێن ھەین.
ئەسکەندەر وەتوت، ئەندامەکێ لژنا ئاسایش و بەرگریێ ل جڤاتا نوونەرێن عیراقێ ئاشکرا کر، حوکمەتا عیراقێ د چەند رۆژێن بھێن دا دێ دەنگی ل سەر پرۆژە قانوونا لەشکریا ب زۆری دەت و ھنێریتە جڤاتا نوونەران، دا کو دانوستاندن ل سەر بھێتە کرن و بھێتە پەسەندکرن و بۆ خەندان گۆت :”پتریا پەرلەمانتاران د گەل وێ پرۆژە قانوونێ نە و دێ ل سەر رێککەڤن، لەو ئەز پێشبینی دکەم بھێتە پەسەندکرن”.
وەتوت خویا ژی کر، ھەکەر ئەو پرۆژە قانوونە ھاتە پەسەندکرن، ھەموو تاکێن گەلێن عیراقێ ب ھەرێما کوردستانێ ژی ڤە دێ ڤەگریت و گۆت: “ھەتا نوکە نەھاتینە دیار کرن، کانێ ئەو قانوونە دێ چ ژییان ڤەگریت”.
د ڤی واری دا، شاخەوان عەبدوللا، بڕیاردەرێ لژنا ئاسایش و بەرگریێ ل جڤاتا نوونەرێن عیراقێ ل سەر فراکسیۆنا پارتی ئاماژە ب وێ چەندێ کر کو ئەو پرۆژە قانوونە د گەل دەستوورێ عیراقێ یا ھەڤدژە و ھەرێما کوردستانێ ناگریت، چونکو ھەرێمێ پاسەوانێن ھەرێما کوردستانێ یێن ھەین و گۆت: “ل دووڤ ماددەکێ دەستوورێ ھەردەمی یێ عیراقێ، ھەرێما کوردستانێ مافێ ھەی، بۆ بەرەڤانیکرن ژ خوە ھێزەکا سەربازی دروست بکەت، نوکە ژی ھێزا پێشمەرگەی و پاسەوانێن ھەرێمێ یێن ھەین، لەو قانوونا لەشکریا ب زۆری ب چ رەنگان ھەرێما کوردستانێ ڤەناگریت”.
نيشاندان
WP Facebook Auto Publish Powered By : XYZScripts.com