ئەڤرۆ نیوز،زنار تۆڤی:
ئەڤرۆ رۆژا ئەینی 29 کانینا دویێ تیرۆپشکا قوناغا بەری دوماهیا جاما شاهێ ئیسپانیا هاتە راکێشان و تێدا چار یانە ماینە و د ئەنجامدا یانەیا بەرشەلۆنا دێ یاریێ دگەل یانەیا سلتافیگۆ کەت و یانا ڤالنسیا ژی دێ دگەل یانەیە سیڤیلیا یاریێ کەت و دڤێ قوناغێ دا یاری دێ ب رەنگێ هاتنوچوونێ هێتەکرن و سەرکەفتیێ هەردو یاریان دێ گەهنە یاریێ دوماهیێ ژ جامێ شاهێ ئیسپانیا.
ئەڤرۆ نیوز،زنار تۆڤی:
جۆ بایدن جێگرێ سەرۆکێ ئەمریکا دیارکر،ئەو شەرێ ئەمریکا ل دژی داعشێ بەرپاکری بوویە ئەگەرێ هندێ کو داعش دەڤەرەکا زۆر ژ دەست بدەت،ل دۆماهیا ئەڤ سالە دێ سەرکەفتنێن مەزن بدەستڤە ئینین.
د چارچووڤێ پشتەڤانیکرنا سیاسەتا دەرڤە یا وەلاتێ خۆ جۆ بایدن دبێژیت،مە سەرکەفتنێن مەزن ل شەرێ دژی داعشێ بدەستخستینە.
هەروەسا دیمۆکراتێن کۆنگرێسی ژی پستەڤانیا سەرۆکێ وەلاتێ خۆ دکەن و بەحسێ هندێ دکەن کو وەلاتێ وان پشتەڤانیەکا مەزن ل رزگارکرنا روومادی ئەنجامدایە ل عێراقێ و هەروەسا بۆ رزگارکرنا رەققا سووریێ ژی دێ ئەنجامدەن.
بایدنی گۆتیەژی ئەم شیاینە 40% وان دەڤەرێن دبن کۆنترولا داعشێ رزگار بکەین.
ئه‌ڤرۆ نیۆز، قائید میرۆ
به‌رپرسه‌كێ وه‌زاره‌تا ئه‌وقاف و كاروبارێن ئاینی ئاشكراكر، وه‌زاره‌ت دێ بڕیاره‌كێ ده‌ربكه‌ت و گوره‌ی بڕیارێ هه‌ر وه‌لاتیه‌كێ گه‌شتا عومرێ دكه‌ت پێدڤیه گوژمه‌كێ پاره‌ی بۆ پێشمه‌رگه‌ی ژى بمه‌زێخیت.
كامه‌ران ئه‌حمه‌د، رێڤه‌به‌رێ په‌یوه‌ندیێن حه‌ج و عومرێ ب ئه‌ڤرۆ نیۆز راگه‌هاند” نوكه وه‌زاره‌تا ئه‌وقافێ مژولی ده‌ركرنا بڕیاره‌كێ یه لدۆر وه‌لاتیێن هه‌رێما كوردستانێ یێن گه‌شتا عومرێ دكه‌ن و گوره‌ی بڕیارێ هه‌ر وه‌لاتیه‌كێ هه‌رێمێ گه‌شتا عومرێ بكه‌ت، پێدڤیه گوژمه‌كێ پاره بۆ سندۆقا هاریكاریا پێشمه‌رگه‌ی بمه‌زێخیت.
كامه‌رانی گۆتژی” ئه‌ڤ بڕیارا ئه‌وقافێ پشتی نه‌ڕازیبوونا خه‌لكێ هه‌رێما كوردستانێ دهێت، كو دڤێ قه‌یرانێ دا خه‌لكه‌ك هه‌یه گه‌شتا عومرێ دكه‌ت و ره‌وشا دارایی وان وه‌لاتیان یاباشه و دڤێت هاریكاریا پێشمه‌رگه‌ی بكه‌ن.
ئه‌ڤرۆ نیۆز، قائید میرۆ
به‌رپرسێ میحوه‌رێ رۆژئاڤایێ كه‌ركووكێ ئاشكراكر، فڕۆكه‌یێن هه‌ڤپه‌یمانان تونێلێن داعش كرینه ئارمانج و هژماره‌ك چه‌كدارێن داعش هاتینه كوشتن و برینداركرن.
دكتۆر كه‌مال كه‌ركووكی، به‌رپرسێ میحوه‌رێ رۆژئاڤایێ كوردستانێ ب ئه‌ڤرۆ نیۆز راگه‌هاند” پشتی ده‌ستكه‌فتنا زانیاریێن هه‌والگه‌ری ژلایێ هێزێن پێشمه‌رگه‌ی، ئه‌ڤرۆ بۆ سێ جارا فڕۆكه‌یێن هه‌ڤپه‌یمانان چه‌ند تونێله‌كێن چه‌كدارێن داعش ل رۆژئاڤایێ كه‌ركووكێ بوردۆمانكرن و زیانێن مه‌زن گه‌هاندن تیرۆرستێن داعش.
كه‌ركووكی دیاركر، دده‌مێ بوردۆمانێ چه‌كدارێن داعش دناڤا تونێلانبووینه و گوره‌ی زانیاریێن مه شه‌ش چه‌كدار هاتینه كوشتن و هژماره‌كا زێده‌ترژی برینداربووینه
به‌روارى بالا ، زنار توڤى:
ژبه‌ر به‌فرو و سر و سه‌رمایێ و جه‌مدیدنا هه‌ر تشته‌كێ ته‌ر ل ده‌ڤه‌را به‌روارى بالا ئه‌ڤه چوار رۆژه ده‌واما قوتابخانان و هنده‌ك فه‌رمانگه‌هێن میرى هاتیه راگرتن و قوتابى نكارن بچنه قوتابخانان.
دڤى واریدا ناسر محه‌مه‌د رێڤه‌به‌رێ په‌روه‌ردا ئامێدیێ بۆ ئه‌ڤرۆ نیوز گۆت : ( هه‌ر ده‌ڤه‌ره‌كا كو پله‌یا گه‌رمایێ بگه‌هیته 10- ل ژێر سفرێ رێڤه‌به‌رێن قوتابخانان دكارن ده‌واما قوتابخانان رابگرن و نه‌چنه ده‌وامێ هه‌تاكو جاره‌ك دن پله‌یێن گه‌رمایێ بلند دبن ڤه )
زێده‌تر گۆت : ( ئه‌ڤ بریاره بتنێ بو قوتابخانه‌یێن بنه‌ره‌تى و باخچێن زاروكانه و قوتابخانه‌یێن ئاماده‌یى دكارن ده‌واما خوه بكه‌ن )
ل گوره‌ى زانیاریێن ئه‌ڤرۆ دوهى پله‌یێن گه‌رمایێ ل ده‌ڤه‌را به‌روارى بالا گه‌هشتبوویه 13 بو 15 پله‌یان ل ژێر سفرێ.
ئه‌ڤرۆ نیۆز، ئه‌یاد به‌رواری
مامۆستایه‌ك ل قوتابخانا مهاباد ل تاخێ گه‌لی، كو د خانیه‌كێ ب كرێ دابوو ل وی تاخی، ژبه‌ر گیرۆبوونا مووچان، خودانێ خانی ژ خانی ده‌ركر و نوكه چوویه د كاڤله‌كی ڤه.
قه‌یس حسێن ئیبراهیم بۆ (ئه‌ڤرۆنیۆز) گوت” ئه‌ز مامۆستایێ وه‌رزشێ مه ل قوتابخانا مهاباد ل تاخێ گه‌لی، ب سه‌ر په‌روه‌ردا شنگالێ مه و ئاوارێ شنگالێ مه، هه‌ر ل تاخێ گه‌لی من خانیه‌ك ب 450 هزار دیناران كرێ كربوو”.
قه‌سی گوت ژی” خێزانا من ژ چار كه‌سان پێك دهێت، كۆره‌كێ من قوتابیێ شه‌شێ ئاماده‌یی یه و ئێك ژی ل زانكۆیا كه‌ركووكێ دخوینیت، ژبه‌ركو مووچێ من وه‌كو هه‌موو فه‌رمانبه‌ران گیرۆبوو، خودانێ خانی داخوازا چۆلكرنا خانیێ وی ژ من كر و ئه‌ز ژی یێ هاتیمه ڤی كاڤلی ل قاتێ بنی یێ باله‌خانه‌كێ ل زركا و خودانێ باله‌خانێ بێ به‌رامبه‌ر ئه‌ز یێ حه‌واندیم”.
گوت ژی”ئه‌ڤه 20 رۆژه ئه‌ز یێ هاتیمه د ڤی كاڤلی ڤه و ڕۆژانه ب تاكسیێ ژ زركا دچمه تاخێ گه‌لی ل ده‌واما خوه ل قوتابخانێ و ل ڤان ڕۆژان دێ ده‌ست ب مامه‌لا ڤه‌گوهاستنا خوه‌كه‌م بۆ قوتابخانه‌كا نێزیك”.
ئه‌ڤرو نیوز ، نه‌وزاد زاده هلۆرى:
ئه‌ندامه‌كێ په‌رله‌مانێ كوردستانێ دوێ باوه‌ریێ دایه هه‌تا كو به‌غدا ل دوڤ داخوازیێن كوردان بهێت پێدڤى یه كورد نه‌هێلن ئاڤ بگه‌هیته باشوور و ناڤه‌راستا عیراقێ.
عه‌باس غه‌زالى میرخان ئه‌ندامێ په‌رله‌مانێ كوردستانێ لسه‌ر فراكسونا زه‌ر دياركر كو ل دوو سالێن بورى دا دوو هێرش بو سه‌ر هه‌رێما كوردستانێ دا هاتینه ئه‌و ژى داعش كو ب توندى ژلایێ هێزێن پێشمه‌رگه‌ى ڤه هاتیه شكاندن ، یا دن ژى برینا بودجه و موچه‌یێ فه‌رمانبه‌رێن هه‌رێمێ و پێشمه‌رگه‌یان بوویه ژلایێ به‌غداڤه و ئه‌ڤ شه‌ره كوردستان توشى قه‌یرانان كریه و به‌غدا ده‌ست ب سه‌ر بودجه و موچه‌یى َهه‌رێمێ دا گرتیه.
به‌حس لسه‌ر وێ یه‌كێ ژى كر بو نه‌چاركرنا به‌غدا پێدڤى یه هه‌رێما كوردستانێ فشارێ بێخیته سه‌ر ئه‌و ژى ب رێیا ئاڤا سكرێ ده‌ربه‌ندیخان دوكان كو ل هه‌ڤیا 4 هێڤه لێدانا خه‌نده‌كان بو گوهرینا ئاراسته‌یا ئاڤا روباران داكو نه‌گه‌هیته ناڤه‌راستا و باشوور هه‌تا وى ده‌مى كو به‌غدا داخوازا هه‌رێمێ بجه بینیت ژبه‌ركو ژلایێ تێگه‌هشتنێ و پێكڤه ژیانێ و كاركرن ب ده‌ستوور و براتیێ و په‌یره‌وكرنا دیموكراسێ به‌غدا ب زمانه‌كێ نه‌خوش تێدگه‌هیت ، و ئه‌م ژى دكارین بنه‌چارى ڤێ یه‌كێ بكه‌ین و ئه‌م دێ ڤێ كه‌ین هه‌تاكو به‌غدا پارێن گه‌نمێ ( 2014 ) و ( 2015 ) و بودجه و موچه‌یێ پێشمه‌رگه و هه‌رێما كوردستانێ بو فرێبكه‌ت و ئه‌م ژى ئاڤێ بو وان نابه‌رده‌ین.
ئه‌ڤرۆ نیوز ، نه‌وزاد زاده هلۆرى:
ل گوره‌ى پرۆژه‌یێ پێشنیاره‌كریێ هێزێن پێشمه‌رگه‌ى چوو كوژمێن موچه‌یان بو وان ناهێنه پاشكه‌فتن و فه‌رمانبه‌رێن پله ئێك ژى دێ ئێك لسه‌ر چوارێ یا موچه‌یێن وان هێته‌دان ، و راوێژكاره‌كێ حكومه‌تا هه‌رێمى ژى ل وێ باوه‌رێ یه كو سیسته‌مێ نویێ موچه‌ى دادگه‌ریه‌كا زور تێدا هه‌یه.
لگوره‌ى پروژێ پێشنیاركرى ل بارا پاشكه‌فتنا موچه‌یێ هه‌یڤانه‌یا فه‌رمانبه‌ران كو شاره‌زا و بسپورێن وارێ ئابوورى كو ماموستایێن زانكویێ دارژتیه و ئاراسته‌یێ لیژنا داهات و خه‌رجیان یا حكومه‌تا هه‌رێما كوردستانێ هاتیه‌كرن هێزێن پێشمه‌رگه‌ى چوو كوژمێن موچه‌یان بو ناهێنه پاشكه‌فتن و موچه‌یێن هێزێن نافخوه و هێزێن ئاسایشى ژى دێ ل گوره‌ى پله‌یێن وه‌زیفی دێ موچه‌یێن وان هێنه پاشكه‌فتن كو ژ 5% ده‌ستپێ دكه‌ت هه‌تاكو دگه‌هیته 20% ، و ل بارا پله‌دارێن وه‌زاره‌تا نافخوه و هێزێن ئاسایشێ ئه‌و دى َوه‌كو فه‌رمانبه‌رێن مه‌ده‌نى موچه‌یێن وان پاشكه‌ڤیت.
ده‌رباره‌ى موچه‌یێ فه‌رمانبه‌رێن پله‌یێن تایبه‌ت بى ( b) دێ 70% ژ سه‌رجه‌مێ گشتیێ موچه‌یێن وان پاشكه‌ڤیت.
وه‌زاره‌ت و ئه‌ندامێن په‌رله‌مانى و سه‌روكێ دیوانا سه‌روكاتیان ئه‌وێن كو پله‌یا A ب خوڤه دگرن دێ 75% ژ موچه‌یێ وان پاشكه‌ڤیت.
ده‌رباره‌ى موچه‌یێن پله‌یێن نزم ( 8.10.9) دێ كێمترین موچه بۆ وان پاشكه‌ڤیت، و بو ڤى َمه‌ره‌مێ ژى سێ پێشنیار هاتینه‌كرن ، ئه‌و فه‌رمانبه‌رێن موچه‌یێن وان 300 هزار دینار كێمتره چوو كوژمه‌كێ پاره‌ێ وان پاشكه‌ڤیت، و پێشنیارا دوویێ و سێیێ ئه‌وه كو فه‌رمانبه‌رێن موچه‌یێ وان ژ 400 هزار دینار یان ژى 500 هزا دیناره دێ موچه‌یێ ژى پاشكه‌ڤیت..
پێشنیاره‌كا دن ئه‌وه كو ئه‌و فه‌رمانبه‌رێن موچه‌یێ وان ژ ملیون دیناران كێمتره 20% یا موچه‌یێ وان پاشكه‌ڤیت، كو ئه‌و ژى پله‌یێن ( 5.6.7) بخوڤه دگریت.
ل گه‌ل پاشكه‌ڤتنا موچه‌یێ فه‌رمانبه‌ران بریار هاتیه‌دان كو ئه‌و فه‌رمانبه‌رێن ده‌رماله‌یێن نه ژ هه‌ژى وه‌ردگرن بهێنه برین ، و ل گه‌ل ژێوه‌رگرتنا ناڤ و نیشانێن وه‌زیفیێن فه‌رمانبه‌رێن نه‌قانونى .
ل گوره‌ى ئاماره‌كا حكومه‌تا هه‌رێما كوردستانێ سه‌رجه‌مى َموچه‌خورێن حكومه‌تا هه‌رێما كوردستانێ ( 1401215 )فه‌رمانبه‌رن و ژ وێ رێژه‌یێ ( 466719 ) هزار فه‌رمانبه‌رێن هه‌میشه‌یى و سه‌ربازینه.
هژمارا فه‌رمانبه‌رێن سه‌ربازى ژى ( 348221 ) هزار فه‌رمانبه‌رێن كو دكه‌تن48% فه‌رمانبه‌رێن هه‌میشه‌ی ، و یا فه‌رمانبه‌رێن مه‌ده‌نى ( 387141 ) ژى دكه‌ته 52%.
هه‌ر ل گوره‌ى ئاماره‌كا حكومه‌تا هه‌رێمێ ( 32 ) هزار فه‌رمانبه‌رێن گرێبه‌ست و ( 428873 ) هزار فه‌رمانبه‌رێن چاڤدێری و بیمه‌یا جڤاكى و كه‌س و كارێن شه‌هیدان و ( 229972 ) هزار فه‌رمانبه‌رێن خانه‌نشینێن هه‌میشه‌یى هه‌نه.
سه‌رجه‌مێ گشتیێ هه‌یڤانه‌یا موچه‌یێ فه‌رمانبه‌رێن هه‌رێما كوردستانێ ( 765 ) ملیار دیناره ، و ژ وێ رێژه‌یێ ژى ( 671 ) ملیار دینار بو فه‌رمانبه‌رێن هه‌میشه‌یێن مه‌ده‌نى و سه‌ربازى نه.
ده‌رباه‌رى موچه‌یێن خانه‌نشینان هه‌یڤانه ( 109 ) ملیار دیناره كو دگه‌هیته 16% ژ موچه‌یێ گشتى ، و گرێبه‌ست ژى ( 16 ) ملیار دیناره و ئه‌و ژى دگه‌هیته 2% ژ موچه‌یێ گشتى ، و چاڤدێرى و بێمه‌یا جڤاكى و كه‌س و كارێن شه‌هیدان ژى ( 69 ) ملیار دیناره كو ئه‌و ژى دكه‌تن 8%ژ سه‌رجه‌مێ گشتیى َموچه‌یى.
ل گه‌ل پێشنیاركرنا پاشكه‌ڤتنا موچه‌یێن فه‌رمانبه‌ران پێشنیار هاتیه‌كرن ل گه‌ل زێده‌بوونا داهاتیێ حكومه‌تێ و بلندبونا بهایێ په‌ترولێ دێ رێژه‌یا پاشكه‌ڤتنا موچه‌یێ فه‌رمانبه‌ران هێـته كێمكرن.
ئاراس قادر راوێژكارێ كارگێرى و دارایی ل ئه‌نجومه‌نا وه‌زیران ئاماژه ب وێ یه‌كێ كر كو حه‌فتیا بهێت ئه‌نجومه‌نا وه‌زیران دێ بریارێ لسه‌ر پێشنیاركرنا پاشكه‌ڤتنا موچه‌ی ده‌ت و دوڤدا دێ هێته ڤه‌گوهاستن بو وه‌زاره‌تا دارایى ب مه‌ره‌ما دیاركرنا رێژه‌یا پاشكه‌ڤتنێ.
ئاراس قادر گۆت ژى : ( ژبلى پاشكه‌ڤتنا موچه‌یێ فه‌رمانبه‌ران بریار ژى هاتیه‌دان كو لیژنه‌ك ل پارێزگه‌هان ژى بهێته پێكئینان ب مه‌ره‌ما دانانا بهایى لسه‌ر كه‌لوپه‌لێن خوارنێ و پێدڤیێن وه‌لاتیان )
ئه‌ڤرۆ نیوز، له‌زگین جۆقى
ب ئاماده‌بوونا گێرد موله‌ر وه‌زیرێ گه‌شه‌پێدانا ئابوورێ ئه‌لمانیا و فرهاد ئه‌تروشى پارێزگارێ دهۆكێ و د. نزار عصمت ته‌یب رێڤه‌به‌رێ گشتیێ ساخله‌میا پارێزگه‌ها دهۆكێ، ئه‌ڤرۆ 28/1/2016 پرۆژێ به‌رفره‌هكرن و نوژه‌نكرنا نه‌خۆشخانا گۆلان ل قه‌زا سێمێلێ هاته ڤه‌كرن.
د. نزار عصمت ته‌یب رێڤه‌به‌رێ گشتیى ساخله‌میا پارێزگه‌ها دهۆكێ دیاركركو ئێكه‌مین جاره ل قه‌زا سێمێلێ پێشوازیا هاوارهاتنێ هه‌روه‌سا بۆ جارا ئێكێ یه هۆلێن نشته‌گه‌ریان وهاوارهاتنێ بۆ خزمه‌تكرنا وه‌لاتیان ل سێمێلى هاتنه ڤه‌كرن وچه‌ندین داخوازیێن دى ژ وه‌زیرێ گه‌شه‌پێدانا ئه‌لمانیا هاتنه كرن بۆ هندى زێده‌تر پشته‌ڤانیێ ل گه‌شه‌پێدانا ژێر خانه‌یا ساخله‌میێ بكه‌ت و حوكمه‌تا ئه‌لمانیا چه‌ندین پرژۆه‌یێن ساخله‌میێ ل دهۆكێ ئه‌نجامداینه وبه‌رده‌ام پشته‌ڤانیى و هه‌ڤكاریا ساخله‌میێ دكه‌ت.
ئه‌ڤرۆ نيوز:
رێڤه‌به‌ریا گشتى یا په‌روه‌ردا پارێزگه‌ها دهوكێ رونكرنه‌كێ سه‌باره‌ت وان بریارێن هاتینه دان ده‌رباره‌ى ده‌واما ماموستایان به‌لاڤدكه‌ت ئه‌ڤه ژى ده‌قێ وێ یه :
پشتى وێ كومبونا ئێكه‌تیا ماموستایێن كوردستانێ لقێ دهوك ورێڤه‌به‌ریا گشتى یا په‌روه‌ردا پارێزگه‌ها دهوكێ ل روژا چوارشه‌مبى رێكه‌فتى 27/1/2016 دگه‌ل هه‌مى رێڤه‌به‌رێن په‌روه‌ردێن قه‌زایێن سه‌ر ب پارێزگه‌ها دهوكێ ڤه ئه‌نجام داى وچه‌ندین بریار هاتینه وه‌رگرتن سه‌باره‌ت چه‌وانیا ده‌وامكرنا ماموستایان ودیسان فه‌رمانبه‌ران ژبه‌ر وان كاودانێن نوكه كوردستان تێدا ده‌رباز دبیت نه‌خاسمه قه‌یرانا دارایى وگیروبونا مووچه‌ى ئه‌ڤ بریاره هاتنه دان :
1. ماموستایێن ده‌وامێ ل سه‌نته‌رى باژیرى دكه‌ن وهاتن وچوونێ نه‌كه‌ن بو جهێن ژده‌رڤه‌ى ئاكنجى كرنا خو ( روژه‌ك بو ببیته بێنڤه‌دان ) ب مه‌رجه‌كى به‌هره‌یێن وى یێن وانه‌گوتنێ بهێنه دابه‌شكرن لسه‌ر روژێن دى یێن حه‌فتیێ ورێڤه‌به‌رێن قوتابخانا هاتینه راسپاردن كو خشته‌یه‌كێ رێك وپێك ئاماده‌بكه‌ن وروژا بێنه‌ڤه‌دانێ بو هه‌ر ماموستایه‌كێ بهێته دیاركرن وچێ كارتێكرنێ ل ده‌واما قوتابیان نه‌كه‌ت .
2. ماموستایێن ده‌وامێ ژده‌رڤه‌ى جهێ ئاكنجىكرنا خو دكه‌ت وهاتن وچوونێ روژانه بو جهێ ده‌واما خودكه‌ن ( 2 روژ ) بو ببنه بێنڤه‌دان ب مه‌رجه‌كى به‌هره‌یێن وان یێن وانه گوتنێ بهێنه دابه‌شكرن لسه‌ر روژێن حه‌فتیێ ورێڤه‌به‌رێن قوتابخانا هاتینه راسپاردن كو خشته‌یه‌كێ رێك وپێك ئاماده‌بكه‌ن وروژا بێنه‌ڤه‌دانێ بو هه‌ر ماموستایه‌كێ بهێته دیاركرن وچێ كارتێكرنێ ل ده‌واما قوتابیان نه‌كه‌ت .
3. ده‌واما فه‌رمانبه‌ران ل رێڤه‌به‌ریا گشتى یا په‌روه‌ردا پارێزگه‌ها دهوكێ ب هه‌مى رێڤه‌به‌ریێن سه‌ر ب رێڤه‌به‌ریا گشتى ڤه ( ده‌م ژمێره‌ك ) هاته كێمكرن وده‌وام تا ده‌م ژمێر 02:00 پشتى نیڤرو بیت .
ل دوماهیێ جاره‌كا دى دووپات دكه‌ین كو ده‌رگه‌هێن قوتابخانا ب چێ ره‌نگه‌كى ناهێنه گرتن وروژانه ده‌وام دێ هێته كرن وئه‌ڤ بریاره دده‌مكى نه وهه‌ر وه‌خته‌كێ كاودانان ئاسایى بون ده‌واما ماموستایان ژى دێ وه‌كى جاران ئاسایى هێته كرن .
رێڤه‌به‌ریا گشتى یا په‌روه‌ردا پارێزگه‌ها دهوكێ
28/1/2016
نيشاندان