ئەڤرۆ نیوز، نەوزاد زادە ھلۆری:
بریکارێ بەرێ یێ وەزارەتا دارایی و ئابووری یا حکومەتا ھەرێما کوردستانێ لسەر دوسیا درۆستکرنا گومرکا حاجی ئومەران بو جارا دوویێ ل دادگەھێ بەرھەڤبوو و وەسا بریارە کو سوبەھی چوارشەمبی سێیەمین رونشتنا دادگەھێ لسەر دوسیا ناڤبری بھێتە ئەنجامدان و ب کەفالەتا 25 ملیون دیناران ھاتیە ئازادکرن.
ژێدەرەکێ ژ دەستەیا دەستپاکی یا ھەرێما کوردستانێ بۆ وشە دیاکر کۆ رەشید تاھر بریکارێ بەرێ یێ وەزارەتا دارایی و ئابووری یا حکومەتا ھەرێما کوردستانێ لسەر پرسا درۆستکرنا کومەلگەھا گومرکا حاجی ئومەران دێ ھێتە دادگەھکرن و سوبەھی سێشەمبی دێ رونشتنا داگەھێ بو دوسیا ناڤبری ھێتە ئەنجامدان.
ل گورەی زانیاریێن وشە بریکارێ وەزارەتا دارایی یا حکومەتا ھەرێما کوردستانێ کوژمێ دیارکریێ پارەی بو پرۆژەی ب کوژمەکێ زێدە خەملاندیە و دڤەکولینێ دا دەرکەفتیە کو ئەو بودجا بو درۆستکرنا ئاڤاھیێ گومرکا حاجی ئومەران درۆستکری زێدەتر ژ وێ یا کو د واقعی دا ئاڤاھی پێ ھاتیە درۆستکرن.
ژێدەرێ دەستپاکیێ زێدەتر گوت پروسەیا دادگەھکرنا وی یا بەردەوامە و دێ ب رژدی کار لسەر ھێتەکرن.
دڤی واریدا وشە پەیوەندی ب حاکم ئەحمەد ئەنوەر سەرۆکێ دەستەیا دەستپاکیێ یا ھەرێما کوردستانێ کر و ناڤبری گۆت د قوناغا نھادا ب باشی نزانین چوو ئاخفتنان لسەر ڤێ دوسیێ و دوسیێن دن بکەین ژبەرکو ئەڤ یەک کارتێکرنێ لسەر دەرئەنجامێن ڤەکولینێ دھێلیت.
جھێ ئاماژەکرنێ یە کو رەشید تاھر 15 سالان بریکارێ وەزارەتا دارایی و ئابووری یا حکومەتا ھەرێما کوردستانێ بوو.

ئه‌ڤرۆ نيوز:

سه‌ركرداتيا پارتى ديموكراتى كوردستان رۆژا پێنجشه‌مبى دێ كۆمبوونه‌كا گرنگ ب ئاماده‌بوونا مه‌سعود بارزانى سه‌رۆكێ وێ حزبێ ئه‌نجام ده‌ت و پرۆسا چاكسازيان و ژماره‌كا گورانكاريان ژى ئێخيته‌ به‌ر دانوستاندنێ.

ئەڤرۆ نيوز:
سکرتێرێ ئەنجومەنێ پارێزگەھا دھۆکێ دیار کر کو رۆژا چارشەمبیا بھێت رێکەفتی 4/5/2016 دەمژمێر 10 سپێدێ دێ رێڤەبەرێن پەیوەندیدار ب پلێتێن ئاھێن خوارنێ ل ئەنجومەنی بەرھەڤبن و ل دۆر ئاریشێن گرێدایی پلێتێن ئاھێن خوارنێ دانوستاندن و گەنگەشێ کەن.
عەبدولسەمەد تێلی کۆچەر سکرتێرێ ئەنجومەنێ پارێزگەھا دھۆکێ بۆ رۆژناما ئەڤرۆ خویا کر ژ بۆ بەرژەوەندیا گشتی و راوستیان ل سەر ئاریشێن گرێدای ب (پلێتێن ئاھێن خوارنێ ڤە) وەک ئەنجومەنێ پارێزگەھا دھۆکێ ب پێدڤی دیت رێڤەبەرێ رێکخستنا ئاھێن خوارنێ، رێڤەبەرێ گشتی یێ ئاھێن خوارنێ، رێڤەبەرێ کۆمپانیا گشتی یا دان و دکاکا، رێڤەبەرێ کۆمپانیا گشتی یا بازرگانی یا دانەوێلا و رێڤەبەریا کۆچ و کۆچبەران گازی بکەتە ئەنجومەنی و گۆت “دێ گەنگەشێ و دانوستاندن ل گەل ھێتەکرن ژبۆ دیتنا رێکێن گونجای بۆ نەھێلانا ئاریشێن گرێدایی پلێتێن ئاھێن خوارنێ”.
عەبدولسەمەد تێلی کۆچەر سکرتێرێ ئەنجومەنێ پارێزگەھا دھۆکێ گۆت ژی “ل ھەمان کۆمبوون دێ دانوستاندن ل دۆر بابەتێ پێشنیارا ناحیکرنا گوندێ (ئاسھێ) و کۆمەلگەھا (خانکێ) و پێداچوون ب بریارا پەسەندکرنا گوندێ (خەلانە) کو ببیتە ناحیە ھێتەکرن”.

ئه‌ڤرۆ نيوز:
بەری 24 سالان ئێکەم تەلەڤزیون ب ناڤێ خەبات کو نوکە بوویە دھۆک تیڤی ل باژێرێ دھۆکێ ھاتە دامەزراندن و ھەتا ئەڤرۆ د خزمەتا خەلکێ پارێزگەھا دھۆکێ دا یە و ب ڤێ ھەلکەفتێ د برۆسکەکا پیرۆزباھیێ دا نڤیسینگەھا جێگرێ سەرۆکێ پارتی دیمۆکراتی کوردستان 24 سالیا دامەزراندنا دھۆک تیڤی ل تەڤایا کارمەندان پیرۆزکریە.
د برۆسکا جێگرێ سەرۆکێ پارتی دیمۆکراتی کوردستان دا ھاتیە دھۆک تیڤی شانازیا وێ یەکێ ھەیە کو ئێکەم کەنالێ تەلەڤزیۆنی یێ پارتیا مەیە، ھەر د دەستپێکا دەست کارکرنێ دا و ھەتا نوکە ب جان و ورەیەکا پێشمەرگانە خزمەتا کوردستان و گەلێ مە و رێبازا پیرۆزا بارزانی دکەت ئەڤجا جھێ دەستخۆشی و رێزگرتنێ یە و ھیڤیا سەرکەفتنێن زێدەتر بۆ ھەوە دخوازین ل سەر رێبازا پیرۆز یا پارتی و بارزانیێ نەمر د خزمەتا خەلک و نەتەوەیا مە دا.
عەدنان یوسف، رێڤەبەرێ دھۆک تیڤی بۆ رۆژناما ئەڤرۆ گۆت: “ژ بەر قەیرانا دارایی و ئەو کاودانێن ب سەر مللەتێ مە دا ھاتین مە لبەر نینە ئەڤرۆ چو رێورەسمان ب ڤێ ھەلکەفتێ ب گێرین بتنێ پیرۆزباھیێ ل ھەموو بینەرێن دھۆک تیڤی دکەم و دبێژمێ چاڤەرێ نوویاتیان بن”.
ناڤبری ئاماژە دا وێ چەندێ کو ئەڤرۆ چو گوھۆرین د بەرنامێن دھۆک تیڤی دا ناھێنە کرن، چونکی ھەیڤا رەمەزانێ نێزیک بوویە و گوھۆرین ب خوە دێ ھێنەکرن، بەلێ پشتی ھەیڤا رەمەزانێ وان لبەرە چەندین گوھۆرینان بکەن و چەندین بەرنامێن نوو پێشکێش بکەن و گۆت: “ئاستەنگێن دھۆک تیڤی وەکو بەھراپتریا دەزگەھێن دی یێن راگەھاندنێ یە ل ھەرێما کوردستانێ و قەیرانا دارایی کارتێکرنەکا مەزن لێ کریە ب تایبەت ژ لایێ تەکنیکی ڤە و ئەم نەشیاینە بەردەوامیێ بدەینە تەکنولۆژیا نوو یا جیھانێ ژ بەر ڤێ چەندێ رەنگە ئەم ھەر د پاشڤەمای بین”.
رێڤەبەرێ دھۆک تیڤی دیار کر کو ھندەک کەنالێن دی یێن راگەھاندنێ یێن ھەرێما کوردستانێ ل خوە دگەریێن، بەلێ دھۆک تیڤی چوجاران ل خوە نەگەریایە و دیتن و بووچوونێن وێ د ئاشکرانە و بێ شەرم دبێژیت ئەز ب سەر لایەنەکێ سیاسی ڤە مە ئەو ژی پارتی دیمۆکراتی کوردستانە و گۆت: “ھەموو تەلەڤزیۆنێن پشتی دھۆک تیڤی ھاتینە ڤەکرن ل پارێزگەھا دھۆکێ خوە ل زارێ بەھدینی نەکریە خۆدان بتنێ دھۆک تیڤی ھەر وەکی خوە مایە و تاکە کەنالە ھەتا نوکە خوە ل زارێ ناڤھاتی کریە خودان و گرنگیەکا تایبەت دایە زارۆیان و ھەموو وارێن ژیانێ و بابەتێن نەتەوەیی و سیاسی و وەرزشی و تەرفیھی و وەرزشی د ناڤ دا ھەنە، بەلێ ھەتا نوکە ئەم سنوورێن خوە دزانین و مە سنوورێن خوە وەکو ھندەک تەلەڤزیۆنان خوە نەبەزاندینە”.
د لایەکێ دی دا عەدنانی خویاکر کو نوکە دھۆک تیڤی کەنالەکێ ئاسمانی یە ل سەر ھەیڤا دەستکرد NSS12 دھێتە پەخشکرن، بەلێ نەچوویە د نایلسات دا ژبەر ڤێ چەندێ خەلکەک دبێژیت نەبوویە کەنالەکێ ئاسمانی و گۆت: “مە دو جۆرێن راگەھاندنێ ھەنە یا لۆکال و یا جیھانی، بەلێ کەنالێن مە یێن ئاسمانی ھوسا ھزر دکەن کو راگەھاندنەکا جیھانی یە لێ ئەو ژی لۆکالن، چونکی پەیام و زمانێ وان یێ لۆکالە”.
ل دووماھیێ ناڤبری دیار کر کو 90% ژ کەنالێن راگەھاندنێ یێن ھەرێما کوردستانێ کادرێ دھۆک تیڤی د ناڤ دا کار دکەت و دھۆک تیڤی بوویە پەیمانگەھا پێگەھاندنا راگەھاندکاران و گۆت: “ئەم ھەست پێ دکەبن کو ب چوونا کادرێ مە بۆ دەزگەھێن دی یێن راگەھاندنێ کارتێکرنەکا مەزن یا ل مە دھێتەکرن ژ بەر ڤێ چەندێ پێدڤیە ئەم سیستەمەکی بدانین و ئەو کادرێ ئەم پێ بگەھینین نابیت ب کەیفا خوە بچیت ل کەنالەکێ دی کار بکەت و ھەکە ئەڤ پێنگاڤە بھێتە ھاڤێتن راگەھاندن دێ بیتە پیشەسازی ل ھەرێما کوردستانێ و ھەتا نەبیتە پیشەسازی راگەھاندکار بھایێ خوە نوزانیت”.