ب بەرهەڤبوونا مەسرور بارزانی، سەرۆكێ حوكمەتا هەرێما كوردستانێ، هەشتەمین ئڤێنتا (تێدێكس نیشتمان) ل باژێرێ هەولێرێ بڕێڤەچوو و تێدا سەرۆكێ حوكمەتا هەرێمێ پەیڤەك پێشكێشكر ئەڤە دەقێ وێ یە:
گەلەك خوەشحالم كو هەوە ئەز ڤەخواندیم ئەڤرۆ ل گەل هەوە پشكداربم د ڤێ هەلكەفتا گرنگدا، ب تایبەتی كو ژ ئالیێ گەنجان هاتیە رێكخستن، ئەڤ گەنجێن كو ئومێد و پاشەڕۆژا وەلاتێ مەنە. دەستخوەشیێ ل رێكخەرێن (تێدێكس نیشتمان) دكەم، هیڤیدارم هەردەم سەركەفتی بن، ئەڤە چەندین جارە هوون ڤان جۆرە هەلكەفتان بەرهەڤ دكەن و كارەكێ وەسا دكەن هەم گەنجان زێدەتر ئومێد ب خوە هەبیت، هەم ئەم زێدەتر ئاشنا بین ب شیانێن گەنجێن مە. دەستخوەشیێ ل هەوە دكەم، ئینشائەللا هەردەم د سەركەفتی بن.
د جهێ خوەدایە سوپاسیێ و دەستخوەشیێ ل وان گەنجێن خوەشتڤی ژی بكەم كو ژ دەرڤە هاتین و خێرهاتنەكا گەرم لێ بكەم، هەرچەندە پێشتر ئەز ل خزمەتا وان بوون و مە چەندین ئاخڤتن ژی پێكڤە كرن، بەلێ ئەوژی د بەرهەڤن ل ڤێرێ، ژ وەلاتێن ئۆرۆپا سەرەدانا كوردستانێ كریە، ئەڤە ژی پشكەكە ژ وێ هەوا كو مە شیای كارەكێ وەسا بكەین سپۆنسەرییا زڤرینا ڤان خوەشتڤییان بكەین زێدەتر بهێن ژ نێزیك ئاشنا بن هەم ب گەنجێن وەلاتی و هەم ب نیشتمانی خوە و ئەو ب خوە ژی ل وان وەلاتێن لێ دژین، شیان و ئەو زانستێ كو تێدا فێربووین، بزڤرنە وەلاتی و ئەو هەڤبەندی دروستكرنە د ناڤبەرا ڤێرێ و دەرڤە دێ بیتە هێزەكا دی بۆ وەلاتێ مە، بۆ گەنجێن مە یێن خوەشتڤی و بۆ وان گەنجێن بەرێز كو ل كوردستانێنە، پەیاما مە بۆ وان گەنجێن خوەشتڤی ژی ئەو كو هوون دشێن هەموو خەونەكێ بكەنە راستی.
دخوازم ئاماژێ ب هندەك ژ كارێن حوكمەتا هەرێما كوردستانێ بكەم كو من د دەمێ بۆریدا هەمە ب پێداگیری و باوەری ب خوەبوونا گەلێ مە نەبا، دبیت گەلەك ئەستەم بوو بشێین نوكە ئەم بگەهینە ڤێ قووناغێ ژ پێشكەفتنێ د چەندێن سێكتەر و واراندا. هەموو ئالییەكی بزاڤا وێ چەندێ دكر كو مە پاشڤە ببەن و مە بێ ئومێد و هیڤی بكەن كو ئەم نەشێین وەلاتێ خوە بەر ب پێشڤە ببەین و گەلەك ئاستەنگ بۆمە دروستكرن ورێگری كر، بودجە ژ مە بڕی، كێشەیێن سیاسی بۆ مە دروستكرن، ئەم تووشی كێشەیێن ئەمنی و ئاسایشێ كرین، بەلێ ب خۆڕاگرییا ڤی مللەتێ خوەشتڤی و ب بێهنفرەهییا هەموو وەلاتیێن بەرێز، مە شیا روو ب روویێ هەموو وان قەپخوازییان ب راوەستین و نەك تنێ ڤان قەیرانان ئێك ل دووڤ ئێكێ دەرباز بكەین، بەلكو پێنگاڤان ژی بەر ب پاشەڕۆژەكا گەشتر ب هاڤێژین و ل چەندین واران بشێین سەركەفتنا مەزن ب دەستڤەبینین.
بەری هەموو تشەكەكی داخوازا من ژ گەنجێن خوەشتڤی ئەوە كو پێدڤییە هوون زێدەتر ژ هەموو تشتەكی حەز ژ وەلاتێ خوە بكەن. بەری بهێمە ڤێرێ، دو گەنجان رێ ل من گرت و گوتە من هەكە دو شیرەتان ل مە بكەی، ئەو شیرەتە دێ چ بن؟ شیرەتا من ئەوبوو كو هوون حەز ژ وەلاتێ خوە بكەن و یا دویێ هەوە باوەری ب خوە هەبیت.
هەكە بنێرینە وەلاتێن پێشكەفتی یێن جیهانێ، هیچ كەسەك نەچوویە وەلاتێ وان بۆ دروست بكەن، بەلكو شیانێن گەنجیچن وان بوو كو وەكر وەلاتێن وان رۆژ ب رۆژ بەر ب پێشكەفتنێ پێنگاڤان ب هاڤێژیت، ئەم هیچ ژ وان وەلاتن كێمتر نینن. بەرامبەر ڤی هەستێ نیشتمانپەروەری و خوەشتڤیێ بۆ وەلاتی و بۆ خەلكێ ڤی وەلاتێ، هێزەكا دی یا غەریب هەردەم بزاڤا وێ چەندێ كریە گەنجێن مە بێ ئومێد بكەن، بەر ب مشەختبوونێ بچن، باوەری ب وەلاتێ خوە نەبیت، هیچ خوەشتڤییەك بۆ ڤێ ئاخێ نەمینیت، بەرسڤا مە بۆ هەموو وان كەسێن كو دخوازن گەنج و وەلاتی ژێك ڤەقەتینن ئەوە كو گەنجێن مە زێدەتر ژ هەموو كەسەكی قەدرێ ڤێ ئاخێ بزانن، چونكە دزانن بهۆست ب بهۆستا ڤێ ئاخێ دهێ خوونا شەهیدێن مەیە و بهۆست ب هۆستا ڤێ ئاخێ یا پیرۆزە.
خوەشحالم كو دبینم ئەڤرۆ ب سەدان گەنجێن خودان شیان و بەهرەمەند ل ڤێرێ كۆمبووینە بۆ وێ چەندێ هزرێن خوە ل گەل هەڤدو لێكبگهۆرن، بۆ وێ چەندێ دەستكەفتێن خوە نیشا مە بدەن و بێژنە مە كو پاشەڕۆژا مە د دەستەكێ ئەمین دایە.
ئەز دخوازم ئاماژێ ب چەند دەستكەفتێن ڤی دەمی یێن حوكمەتا هەرێمێ بدەم كو بێگومان ئەڤە ژی هەر ب پالپشتی و پشتەڤانییا هەوەیێن خوەشتڤی بوویە، ئێك ژ وان تشتێن كو مە شیای سەركەفتنا مەزن تێدا ببینین ئەو بوو كو گرنگیێ ب هەمەجۆركرنا ئابۆری كوردستانێ بدەین و تنێ چاڤێ مە ل وزەیێ یان پەترۆلێ و غازێ نەبیت. مە كارەكێ وەسا كر كو جارەكادی جوتیارێن مە بزڤرن بۆ زەڤیێن خوە و بەرهەمێ ناڤخوەییێ كوردستانێ ب ئاستەكی بگەهینن كو نەك تنێ ل ناڤ هەرێما كوردستانێ مفای ژی وەربگرن، بەلكو بۆ دەرڤەی كوردستانێ ژی بهنێرن. بۆ جارا ئێكێ بەرهەمێ ناڤخوەیێ هەرێما كوردستانێ بۆ دەرڤەی كوردستانێ هاتە هنارتن و ئەڤ پرۆسەیە یا بەردەوامە، ئەڤە جهێ سەربلندییێ و شانازیێیە، بەلێ هەكە باوەری ب خوەبوونا جوتیارێن مە نەبا، باوەری ب خوەبوونا ڤی مللەتی نەبا، بێگومان ئەم دا هەر وەسا مینن و دا هەر چاڤێ مە ل وێ چەندێ بیت خەلكەكێ دی بهێت نانی بدەتە مە. نوكە كوردستان گەهشتییە ئاستەكی و ئومێدا مە ئەوە كو گەلەك زێدەتر ژی ژ وێ چەندێ بكەین كو كوردستان ببیتە سەبەتا خۆراكی نەك تنێ بۆ كوردستانێ، بەلكو بۆ هەموو دەڤەرێ.
مە پێشبینییا وێ چەندێ دكر كو سەقا ل ڤێ دەڤەرێ تێكبچیت و مە دیت ل دەمێ بۆری چەندین سالێن هشكەسالیێ و نەبارینا بارانان كێشەیا ئاڤێ بۆ وەلاتێ مە دروستكر، مە بزاڤا وێ چەندێ كر كو بەنداڤان دروست بكەین، بۆ وێ چەندێ ل ڤێ قەیرانێ ئەم بشێین باشترین مفای ژ ئاڤا سەرزئەرد وەرگرین و ئێدی پەنایێ بۆ ئاڤا ژێرئەرد نەبەین كو مخابن زیانەكا مەزن ب ئاڤا ژێرئەرد یا وەلاتێ مە گەهاندیە. چەندین جاران بزاڤ هاتنە كرن ل گەل وەلاتێن بیانی، كۆمپانیێن بیانی قەیرانا ئاڤێ ل باژێرێ هەولێرێ بهێتە چارەسەركرن، بەلێ هەر سالەكێ ب بهانەیەكێ هاتە پاشئێخستن، تاكو گەهشتییە وی رادەی كو مە داخواز ژ دلسۆزێن ڤی وەلاتی كری بۆ گەهاندنا ئاڤا ب لەز بۆ باژێرێ هەولێرێ و نەك تنێ ب 12 سالان، بەلكو ب 12 مەهان شیان مەزنترین پرۆژە ل سەر ئاستێ ئیراقێ ل باژێرێ هەولێرێ دروست بكەن ب باشترین شێوە و مە هەموویان دیت كو مە شیای د ڤی دەمیدا ئاڤێ ژ زێ مەزن بۆ باژێرێ هەولێرێ ڤەگوهێزین. پشكا دویێ یا پرۆژەی ژی د رێ دایە و ئینشائەللا د دەمەكێ نێزیكدا ئەوژی دێ هێتە ڤەكرن و باژێرێ هەولێرێ و دەروبەرێن وێ دێ مفادار بن ژ گەهاندنا ئاڤێ بۆ ڤی باژێرێ . چەندین پرۆژەیێن هەڤشێوەی ژی هەنە ل چەمچەمال، ئاكرێ و ل جهێن دی یێن كوردستانێ كو دیسان هیڤییا مە ئەوە ب دەمەكێ زوو بشێین وان پرۆژەیان ژی ب دووماهی بینین و ئێدی خەلكێ مە ژ كێشەیا بێئاڤیێ رزگار ببیت.
پشكەكا دی یا دەستكەفتێن ڤێ حوكمەتێ دروستكرنا رێ و پرایە، دبیت مە هەموویان دیتبیت و ل وان رێیان مە هاتنوچوون كربیت و هندەك جاران ئەڤ رێیە مخابن بووینە جهێ مرنێ ژ بەر كو ب شێوەیەكێ ستانداردێ نێڤدەولەتی نەهاتینە دروستكرن یان ژ بەر هۆكارێ ب لەز هاژۆتنا ترۆمبێلان تووشی روودانێن نەخوەش بووین و مە چەندین كەسێن ئەزیز ژ دەستداینە. ئەوا ل سەر حوكمەتا هەرێمێ بوو ئەڤە بوو كو رێیان ب ئاستەكێ نێڤدەولەتی دروست بكەت و ل ئاستێ وەزارەتێن پەیوەندیدار ب تایبەتی وەزارەتا ناڤخوە كو رێنما بۆ هاژۆتنا ترۆمبێلان دەربكەت كا چاوان وەلاتی هەكە پێگیریێ پێ بكەن، دێ شێین رێژەیا روودانان كێم كەین. دبینین كو هەوا دروستكرنا رێ و پران، رێیێن ب لەز د ناڤبەرا باژێرێن مەزن و دناڤ باژێراندا ژی، كولان و جادەیان هەموو هاتینە قیركرن، جادەیێن گەلەك باش هاتینە دروستكرن، رێیێن بلەز یێن گەلەك باش هاتینە دروستكرن، هیڤیدارم وەلاتی هەم مفادار بن ژێ، هەم ئەڤ رێنمایە ل بەرچاڤبگرن بۆ سەلامەتییا خوە و هەموو وەلاتیێن دی. ئەڤە ژی دەستكەفتەكێ دی یێ حوكمەتا هەرێما كوردستانێ بوو كو ب دووماهی نەهاتینە و دێ بەردەوام بین د دروستكرنا ڤێ ژێرخانەیا گرنگدا بۆ سەلامەتییا وەلاتییان و مفاوەرگرتنا وان ژ ڤان پڕۆژەیان.
پشكەكا دی یا گرنگ كو مە گەلەك بزاڤكر بۆ ئاسانكاریكرن بۆ وەلاتییان، ئەوبوو كو كەرتێ بانكی یان سیستەمێ دارایی ل كوردستانێ ب شێوەیەكێ ستانداردێ نێڤدەولەتی بەر ب پێشڤە ببەین، مخابن پشكەك ژ ڤی كەرتی د دەستهەلاتا هەرێما كوردستانێدا نینە و پێدڤییە ئەم پێگیری هندەك رێنمایێن ل سەر ئاستێ حوكمەتا فیدرالی بین، بەلێ ب هەموو شێوەیەكی مە بزاڤ كریە رازیبوونا حوكمەتا فیدرالی و ب تایبەتی بانكا ناڤەندییا ئیراقی وەربگرین تاكو كەرتێ بانكی ل هەرێما كوردستانێ بەر ب پێشڤە ببەین. ئەڤ كەرتێ بانكی نەك تنێ بۆ وێ چەندێیە كو مووچەیێ وەلاتییان ل بنكان بهێنە دان، بەلكو بانك ببن جهەك كو هاریكارییا هەموو وەلاتییەكی بكەن بۆ وێ چەندێ بشێن قەرێن مەزن و بچووك بدەنە وەلاتییان، تاكو ئەوژی بشێن د بەرژەوەندییا پڕۆژەیێن خوە دا بكاربینن. دروستكرنا سێكتەری بانكی و پێشئێخستنا سێكتەرێ دارایی ل هەرێما كوردستانێ، ئێكە ژ وەرچەرخانەیێن مەزن یێن ڤێ حوكمەتێ كو ب دیتنا من د پاشەڕۆژێدا دێ شێت هاریكارەكا مەزنتر بیت بۆ راكێشانا وەبەرهێنەرێن بیانی و باوەریدان ب وەبەرهێنەرێن ناڤخوەیی، هەموو وەلاتیێن كوردستانێ ژی بشێن مفادار بن وەكو هەموو كەسان ل هەموو وەلاتێن جیهانێ، ل وەلاتێن جیهانێ یێن پێشكەفتی كو گەلەك مفای ژ ڤی سێكتەری دبینن، مە دیسان ل ڤێرێ پێنگاڤێن باش هاڤێتینە و دەستكەفتێن باش مە ب دەستڤەئیناینە، بەلێ هێشتا مایە و هیڤیدارم ب هەبوونا هەوەییچن خوەشتڤی، بشێین گەلەك ژ ڤێ زێدەتر ب دەستمە بكەڤیت .
هەر ژ بەر ڤێ چەندێ ژی یە كو دخوازم ئاماژێ ب ڤێ خالێ بدەم ،چونكە پترییا ڤان كارێن هاتینە كرن، ب دەستێن گەنجێن ڤی وەلاتی هاتینە كرن. ئەڤ پڕۆژەیێن كو ئەز باس لێ دكەم، هەموو گەنجێن ڤی وەلاتی، گەنجێن خوەشتڤی یێن ڤی وەلاتی كو گەلەك ئالییان ل بەربوو بێ هیڤی بكەن، بێژنێ هوون نەشێن چ بكەن، هەر ئەو گەنجە روو ب روویێ ڤان پرۆپاگندەیان بوون، هەر ئەڤان گەنجان خواست بهێن و خزمەتا وەلاتێ خوە بكەن، ل سەر مە بوو رێ بۆ خوەش بكەین، پشتەڤانێن وان بین. ئەوا ل سەر مە بوو، مە رێ بۆ خوەشكرن و مە پشتەڤانی لێكر و داخواز ژێ كر كو بهێن هاریكارێن مە بن و خوە و وەلاتێ خوە دروست بكەن، ئەڤ دەستكەفتێن كو ئەڤرۆ دبینین، بەرهەمێ خەبات و وزەحمەتا وان گەنجێن خوەشتڤییە.
ب دیجیتالكرنا سیستەم و خزمەتگوزاریێن حوكمەتا هەرێما كوردستانێ، پشكەكا دی یە ژ وان خزمەتگوزاریێن كو دێ حوكمەتا هەرێما كوردستانێ بۆ وەلاتیێن خوەشتڤی ئەنجامدەت، ئەڤێ چەندێ بێگومان پێدڤی ب زانست و شارەزایێیە، ئەو گەنجێن خوەشتڤی كو د گەل زانست و تەكنەلۆژیایا سەردەمدا شیاینە زێدەتر خوە پێبگەهینن، هەر ئەو كەسەنە كو دشێن ژ هەموو روویەكیڤە وەلاتێ مە بەر ب پێشڤە ببەن و ئەو دشێن ڤان جۆرە خزمەتگوزارییان باشتر بكەن.
ئەز وان تشێن بۆ هەوەیێن بەرێز و خوەشتڤی دبێژم بۆ وێ چەندێیە كو بێژمە هەوە ئەڤە سۆز نینن، تشتەك نینن كو ل داهاتی مە گومان هەبیت ئایا دێ هێنە ئەنجامدان یان نە، ئەڤە هەموو ئەو بیر و بۆچوونە بوون كو ل دەستپێكێ بەری چەند سالان مە هەبوون و ل گەل هەوە مە ئاخڤت، مە گوت ئەم دشێین پێكڤە مە هەموو ئەو دەستكەفتە هەبن، ئەڤرۆ ئەم ل ڤێرێ دیدەڤانێن ب دەستڤەئینانا هەموو وان دەستكەفتاینە، ئەڤە بەرهەمێ هەوەیە، ئەڤە باوەری ب خوەبوونا هەوەیە. ژ ئەڤرۆ ژی بۆ پاشەڕۆژەكا گەشتر، بۆ كوردستانەكا ئارامتر، بۆ كوردستانەكا پێشكەفتیتر، هەوە باوەری ب خوە هەبیت، ئەوا خووشك و برایێن هەوە ئەنجامدای، هوون ژی دشێن ئەنجام بدەن و هوون دشێن زێدەتر ژی ئەنجام بدەن، لەوما من باوەری یا ب هەوە هەی، دەستخوەشیێ ل هەوە دكەم، هیڤیدارم هەردەم سەركەفتی بن، رۆژ ب رۆژ سەركەفتنێن مەزنتر تۆمار بكەن.
ب خۆڕاگرییا ڤی مللەتی دێ پێنگاڤان بەر ب پاشەڕۆژەكا گەشتر هاڤێژین
نيشاندان