ئەڤرۆ نیوز،زنار تۆڤی:
ژ ئەگەرێ بارینا بەفرەکا زۆر ل دەڤەرا بەرواری بالا و گرتنا رێیا چەندین گوندان،چەند قوتابخانێن ڤێ دەڤەرێ نەچاربوون تاقیکرنێن کورسێ ئێکێ لدەمژمێر 12 تاکو 1 پشتی نیڤرۆ ئەنجام بدەن.
دیار عەبدی قوتابیەکێ ئامادەیا بریفکا بەرواری بۆ ئەڤرۆ نیوز گۆت:رۆژانە پتری دو دەمژمێران ئەم ب پیا دچین ھەتاکو ئەم دگەھینە قوتابخانێ،ژبەرکو بەفرەکا زۆر باریە و ترومبێل نەشێن ھاتنوچوونێ بکەن،ئەم گەلەک برێڤە دوەستین و گەلەک سەرمایە و ھەتاکو ئەم دگەھینە قوتابخانێ ئەم گەلەک زەحمەتێ دبینین.
محەمەد سەلمان قوتابیەکێ دییە دبێژیت:ئەڤە چەند ڕۆژە بۆ ماوێ پتر ژ دو دھمژمێران ئەو ب پیا ژ گوندێ ھرۆرێ دھێن،ژبەرکو رێک نەھاتیە ڤەکرن و ھەر چەندە ئەم گەلەک وەستیانێ دبینین،لێ ئەم نەچارین ژبەڕکو مە تاقیکرن یێن ھەین،لێ قوتانخانێ تاقیکرنێن مە یێن کرینە دەمژمێر 12 ھەتاکو ئەم بگەھینە قوتابخانێ و تاقیکرن ژمە نەچن.
ناسر محەمەد سەعید رێڤەبەرێ پەروەردا قەزا ئامێدیێ بۆ ئەڤرۆ نیوز دیارکر:رێڤەبەرێ گشتی یێ پەروەردێ دەلیڤە دایە قوتابخانێن وان دەڤەرێن بەفر لێ دبارن کو بۆ سلامەتیا قوتابیان و برێڤەچونا پرۆسا خواندنێ،ھەر چ دەمێ وان بڤێت دیاربکەن بۆ ئەنجامدانا تاقیکرنان.

ئه‌ڤرۆ نيوز، نيوار محه‌مه‌د سه‌ليم:

به‌رپرسێ راگه‌هاندنێ ل رێڤه‌به‌ريا گشتيا په‌روه‌ردا پارێزگه‌ها دهۆكێ راگه‌هاند كو وه‌زاره‌تا په‌روه‌ردێ ل حوكمه‌تا هه‌رێما كوردستانێ پشتى ڤان ئه‌زموونێن قوتابيان دێ حه‌فتيه‌كێ كه‌ته‌ بهێنڤه‌دان.

ئه‌حمه‌د عه‌بدولا زوبێر، به‌رپرسێ راگه‌هاندنێ ل رێڤه‌به‌ريا گشتيا په‌روه‌ردا پارێزگه‌ها دهۆكێ بۆ ئه‌ڤرۆ نيوز گۆت: “ب گۆره‌ى خشتێ ئه‌زموونێن سالا خواندنێ 2015-2016، ل رۆژا پێنجشه‌مبى يا حه‌فتيا بهێت دێ بهێنڤه‌دانا ئێك حه‌فتى ده‌سپێكه‌ت.

زێده‌تر گۆت: “ب گۆره‌ى ئه‌و خشتێ ل به‌ر ده‌ستێ مه‌ يێ بۆ وه‌زاره‌تا په‌روه‌ردێ هاتيه‌ دانان، رۆژا پێنجشه‌مبى رێكه‌فتى 14ى كانوونا دويێ 2016 دێ رۆژا ئێكێ يا بهێنڤه‌دانا وه‌زرێ ئێكێ ده‌سپێكه‌ت و رۆژا سێشه‌مبى 19ى كانوونا دويێ 2016 دێ ب دووماهى هێت”.
به‌رپرسێ راگه‌هاندنێ ل رێڤه‌به‌ريا گشتيا په‌روه‌ردا پارێزگه‌ها دهۆكێ ئاماژه‌ ب وێ چه‌ندێ ژى كر كو ژ ئه‌گه‌رێ به‌فر بارينێ ل هنده‌ك ده‌ڤه‌رێن ئاكرێ بۆ رۆژه‌كێ ئه‌زموون نه‌هاتينه‌ كرن و ئه‌و ده‌ڤه‌ر دێ ئه‌زموونا خوه‌ ل رۆژا بهێنڤه‌دانێ كه‌ن.

ئه‌حمه‌د عه‌بدولا زۆبێر ده‌رباره‌ى ڤێ بهێنڤه‌دانێ دا زانين ژى كو ب تنێ بۆ قوتابى و مامۆستايانه‌ و ژ رێڤه‌به‌ريێن سه‌ر ب په‌روه‌ردێ ڤه‌ ناگريت.

ئەڤرۆ نیوز:
رێڤەبەرێ کۆنترۆلا بەلاڤکرنا کارەبا ھەرێما کوردستانێ دیار کر کو سۆتەمەنی بۆ چەند وێستگەھەکێن بەرھەمئینانا کارەبێ ھاتیە دابینکرن و دەمژمێرێن دانا کارەبا نشتیمانی بۆ وەلاتیان ژ شەش دەمژمێران نوکە بووینە 11 دەمژمێر.
ئومێد محەمەد ئەحمەد، رێڤەبەرێ کۆنترۆلا بەلاڤکرنا کارەبا ھەرێما کوردستانێ ئاشکرا کر، ل دووڤ خشتێ دانا کارەبا نشتیمانی بۆ وەلاتیان بۆ ڤێ ھەیڤێ شەش ھەتا ھەشت دەمژمێرێن کارەبێ ھاتبوونە دیارکرن و بۆ مالپەرێ فەرمیێ پارتی دیموکراتی کوردستان گۆت: “د ڤان رۆژان دا سۆتەمەنی بۆ چەند وێستگەھەکێن بەرھەمئینانا کارەبێ ھاتیە دابینکرن، لەو پێج دەمژمێرێن دی یێن دانا کارەبا نشتیمانی بۆ وەلاتیان ل سەر خشتێ ڤێ ھەیڤێ زێدەبووینە و 11 دەمژمێران کارەب دێ ھەبیت”.
ئاماژە ب وێ چەندێ ژی کر، بزاڤێن واتن دبەردەوامن بۆ دابینکرنا سۆتەمەنیێ بۆ وێستگەھێن دی یێن بەرھەمئینانا کارەبێ و گۆت: “دەمژمێرێن دانا کارەبا نشتیمانی دێ ھێشتا زێدە ژی کەین”.
رێڤەبەرێ کۆنترۆلا بەلاڤکرنا کارەبا ھەرێما کوردستانێ خویا ژی کر، ڤان دو ھەیڤان بارێ کارەبا نشتیمانی یێ گرانە، چونکو خواست ل سەر بکارئینانا کارەبێ زێدە دبیت و وەلاتی کارەبێ بۆ خوە گەرمکرنێ ژی بکاردئینن و پتر کارەب دڤێت، پاشی دێ رەوشا کارەبێ ئاسایی بیت و دەمژمێرێن دانا کارەبێ ژی دێ زێدە بن.

ئەڤرۆ نیوز:

ل گەل پەیدابوونا ڕێکخستیا دەولەتا ئیسلامی (داعش) یا تیرۆرستی ل سووریێ و عیراقێ، ھژمارەکا گەنج و مەلا و خێزان ل ھەرێما کوردستانێ ژئەگەرێ کاریگەریا گوتارێن ھندەک ژ مزگەفتان، چوونە دناڤ ڕێزێن داعشێ دا، گوتارێن توند یێن ھندەک مزگەفتان، ئێکە ژ ھەکارێن بەرچاڤ یێن چوونا گەنجان بۆ ناڤ ڕێزێن داعشێ، ل ڤێ دووماھیێ ژی وەزارەتا ئەوقافێ و کاروبارێن ئایینی ل ھەرێمێ بریار دا 30 گوتاربێژێن نڤێژا ئەینیێ ژ گوتاربێژیێ ل مزگەفتێن ھەرێمێ دووربێخیت، چونکی گوتارێن وان ھۆکارن بۆ توندوتیژیێ دناڤ جڤاکی دا و ھاندانا گەنجان بۆ چوون دناڤ گرۆپێن توندڕەو دا.

ئێک ژوان مەلایێن ھاتینە دوورخستن ژی (مەلا سەلیم شووشگەیی) گوتاربێژێ مزگەفتا (عەبدوللادزەیی) یە ل ھەولێرێ و ئەندامێ پەرلەمانێ عیراقێ یە ژی ل سەر فراکسیۆنا کۆمەلا ئیسلامی. زێدەتر  ژ3ا گەنجێن تاخێ ھەڤالان ل باژێرێ ھەولێرێ کو سەرەدانا وێ مزگەفتێ دکر، یێن گەھشتینە داعشێ، ل دووڤ راپۆرتەکا کەنالێ کوردستان 24.

د وێ راپۆرتێ دا، مەلا سەلیم شووشگەیی دبێژییت” گوتارێن من ب دەنگ و ڕەنگ یێن ھەین و ھەر کەسێ حەز بکەت بزانیت ئایا گوتارێن من توندو تیژی تێدایە، دشێت ببینیت و گوھێ خوە بدەتێ و بریارێ بدەت، جھێ حێبەتیێ یە د دەزگەھێن راگەھاندنێ دا مە و مزگەفتا مە نەشرین بکەن، ئەڤە ھەولەکا سیاسی یا خرابە و دھەمان دەم دا ھەکە کەسەکی شاشی ھەنە، بلا ل دادگەھێ سکالا ل سەر بھێتە تۆمارکرن و ھەکە ئەو تشتە راستە، ھەرن دەڤ کەسوکارێن وان و پرسیار ژێ بکەن، کا کی ئەگەرێ چوونا وان گەنجایە بۆ ناڤ داعشێ”.

ئەبوبەکر عەبدولکەریم، بابێ ئێک ژ گەنجێن چوویە ناڤ ڕێزێن داعشێ کو وی گەنجی بەری ھینگێ سەرەدانا وێ مزگەفتێ دکر، بۆ کوردستان 24 دیارکر کو پشتی کۆڕێ وی گەھشتیە داعشێ، چارەنڤیسێ وی یێ دیار نینە و وی سکالا یا ل سەر مزگەفتا ناڤبری تۆمارکری کو ئەگەر بوو کۆڕێ وی بگەھیتە داعشێ و دبێژیت” بەری نوکە کۆڕێ من تەلەفون دکر و جار دا بێژیت ئەز یێ ل سووریێ و جار ژی دگوت ئەز یێ ل مووسلێ، بەلێ نوکە نزانم ل کیرێ یە، ئەو بەری بگەھیتە داعشێ، سەرەدانا مزگەفتا مەلا سەلیم شووشگەیی ل تاخێ ھەڤالان دکر ، بەلێ نزانم کا وانە ل وێرێ دخواندن یان نە و مە سکالا یا ل سەر وێ مزگەفتێ تۆمارکری”.

گۆڕەی ئامارێن وەزارەتا ئەوقافێ و کاروبارێن ئایینی ل ھەرێما کوردستانێ، ددەمێ دو سالێن بۆری دا، 500 گەنج ژ ھەرێما کوردستانێ یێن چووینە دناڤ ڕێزێن داعشێ دا  کو ھندەک ژوان یێن ھاتینە کوشتن و ھندەک ژی یێن زڤرین بۆ ھەرێمێ و ھندەکێن دی ژی یێن ھاتینە دەستەسەرکرن ل دەمێ بەرھەڤی دکرن بۆ ئەنجامدانا کریارێن توندوتیژی ل ھەولێرێ.

ل دووڤ پێزانینێن کوردستان 24، د مەھا نیسانا 2014 ێ دا، ئاسایشا ھەولێرێ شەش گەنج دەستەسەرکرن کو بەرھەڤی بۆ ئەنجامدانا کریارەکا توندوتیژی ل ھەولێرێ دکر کو ئەو گەنجە  ئاکنجیێن ھەردو تاخێن ھەڤالان و پێنجێ حەسارۆکان بوون، پشتی بەلاڤکرنا دەقێ دانپێدانێن وان ب پەیوەندیکرنا وان ب داعشێ، ھۆکار بۆ کاریگەریا ھزرا جیھادی یا سەلەفی زڤراندن کو وان د گوتارێن (مەلا سەلیم شووشگەیی) دا وەردگرت و بەردەوام ژی ھاتن و چوونا مزگەفتا (عەبدوللا دزەیی) دکر ل تاخێ ھەڤالان، دیسا ل رۆژا 17 گولانا 2015، سێ گەنجێن ئاکنجیێن تاخێ ھەڤالان کو ھاتنوچوونا وێ مزگەفتێ دکر ل بازگا شێراوە ل سەر ڕێیا ھەولێر – کەرکووک و بەری بگەھنە ناڤ ڕێزێن داعشێ، ھاتنە دەستەسەرکرن، دیسا چەندین سنێلە و گەنجێن دی یێن ھاتنوچوونا وێ مزگەفتێ دکەن یێن چووینە دناڤ ڕێزێن داعشێ دا و ل وێرێ یێن ھاتینە کوشتن، ژوان ژی ( زانا فەخرەلدین، مستەفا عەبدوللا و ھاوار جەلال مام ڕەش) و ھژمارەکا دی ژ گەنجێن دچوونە وێ مزگەفتێ ھەتا نوکە یێن دناڤ ڕێزێن داعشێ دا وەکو ( سلێمان عەبدوللا، بەرزی کەیفی یێ بەرنیاس ب ( مەلا کەیفی)، ئەحمەد نەجات قادر، سەفین سالح،  سەیفەلدین قادر عوسمان، ئەحمەد ھوشیار، دیار ئەبوبەکر، سلێمان یاور ئەبوبەکر، راوێژ عومەر محەمەد، شوان محەمەد قادر، خدر جەمال خدر، ڕامان مەحمەد ئەجمەد، مەریوان سەلاحەدین، ئەمین نەوزاد جەلیل، ئەسکەندەر حەمەد ئەمین و بەلێن ئەکرەم محەمەد). ددەمێ دو سالێن بۆری دا، ھژمارەکا کریارێن خوەکوژی ل ھەولێرێ ھاتنە ئەنجامدان، پشتی دەستەسەرکرنا ئەنجامدەرێن وان کریاران، تیرۆرستان دانپێدان ب وێ چەندێ کر کو  کاریگەریا گوتارێن توندڕەو ل سەر وان ھەبوو و پشکەک ژوان بەردەوام سەرەدانا وان مزگەفتان دکر کو گوتارێن گوتاربێژێن وان گەلەک د توند بوون و دبوونە ئێک ژ ھوکارێن چوونا گەنجان بۆ ناڤ ڕێزێن داعشێ.