ئەڤرۆ نيوز:

موقتە‌دا سە‌در ل مە‌یدانا تە‌حریر ژ پلانە‌کا کوشتنێ قورتال بوو و ئێک ژ سە‌رکردێن گرۆپە‌کا شیعی ئاشکراکر، پلانا ژناڤبرن و کوشتنا سە‌رکردێ باسکێ سە‌دری (موقتە‌دا سە‌در) ھاتە ھە‌لوە‌شاندن پشتی پە‌یڤا خوە دناڤ 150 ەزار لایەنگر و پشتە‌ڤانێن باسکێ سە‌دری دا ل ئەینیا بۆری پێشکێشکری و ژ مە‌یدانا تە‌حریر دە‌رکە‌فتی.
سایتێ ئارم نیۆز یێ ئیماراتی، ژ زار دە‌ڤێ ئێک ژ سە‌رکردێن کە‌تیبا حزبوللا یێ ب کو ناڤێ ( ئە‌بو سە‌جاد) دھێتە نیاسین گۆت” پلانە‌ک ژ ئالیێ گرۆپەکا شیعی یا ب ناڤێ ( کە‌تیبا تایبە‌ت) ب تنێ ب دووراتیا 30 خولە‌کان ژ کوشتنا موقتە‌دا سە‌در یا دوور بوو، بە‌لێ پلانا وان سە‌رنە‌گرت و موقتە‌دا سە‌در ژ مە‌یدانا تە‌حریر قورتال بوو”.
ناڤبری زێدەتر گۆت” ئە‌ندامێن ،، کە‌تیبا تایبە‌ت ،، مە‌شق و راھێنان ل سە‌ر ئە‌نجامدانا کارێن تیرۆرکرنێ ل وە‌لاتێ ئیرانێ و دە‌ڤە‌را بە‌درە و جە‌سان ل ڕۆژھە‌لاتا عیراقێ ل سە‌ر سنۆرێ ئیرانێ کرینە، ل ژێر سە‌رپە‌رشتیا پاسدارێن ئیرانێ”. ھە‌روە‌سا دیارکر کو ھژمارا ئە‌ندامێن کە‌تیبا تایبە‌ت دگەھیتە 140 کە‌سان و ھندە‌ک راھێنان ل ژێریا لوبنانێ ل سە‌ر دە‌ستێ حزبوللاھا لوبنانی ژی ئە‌نجامداینە. ئە‌بو سە‌جادێ خوە‌یاکر، سێ گرۆپ چاڤە‌ڕێی دە‌رکە‌فتنا موقتە‌دا سە‌دری ژ مە‌یدانا تە‌حریرێ بوون، پشتی ئە‌نجامدانا نڤێژا ئە‌ینیێ دناڤ پشتە‌ڤانێن خوە دا، ب مە‌رە‌ما لێدانا کاروانێ موقتە‌دای ب چە‌کی و بومبێن دە‌ستی و نارنجوکان، بە‌لێ ناڤبری داخواز ژ زێرە‌ڤانێن خوە کر ھە‌ر ئێک ل جھێ خوە نڤێژا خوە بکە‌ت، پاشی بلە‌ز ب زێرە‌ڤانیا 15 ترومبێلێن گوللە‌نە‌بڕ ژ مە‌یدانا تەحریر دە‌رکە‌فت. ھە‌روە‌سا ئەبو سە‌جادی ئاشکراکر، دو گرۆپ ل سە‌ر جادا محە‌مە‌د ئە‌لقاسم یا بلەز و ب تایبە‌ت لنک دوڕیانا وێ جادا ناڤبری کو ل بە‌ر بوو ھێرشی کاروانێ موقتە‌دا سە‌دری بکە‌ن ب مووشە‌کێن بناڤێ ،، تە‌وفان ،، ئە‌و ژی کۆپیە‌کا نووژە‌نکریا مووشکا ،، تاو ،، یا ئە‌مریکی یە و ژئالیێ وە‌لاتێ ئیرانێ ڤە ھاتیە دروستکرن.
سە‌رکردێ شیعی ھە‌روە‌سا گۆت” گرۆپا سیێ ھندە‌ک ئالیە‌تێن گە‌روک بوون کو موشە‌کێن ئۆتۆماتیکی یێن ئیرانی ژ جۆرێ 40 ملم و ب دووراتیا 2200 مە‌تران کارێ وێ ب تنێ بێدە‌نکرنا ئالیێ بە‌رھنگاربوو ھە‌کە بە‌ڕە‌ڤانی ژئالیێ سە‌دری ڤە ھاتە‌کرن”.
ل دووڤ ژێدە‌ری، ئە‌و مووشە‌ک ھاڤێژ ژ ئالیێ ئیرانێ ڤە وە‌کو دیاری بۆ فە‌یلە‌قا بە‌در یا شیعی ھاتینە، دە‌مێ ژ باسکێ جڤاتا بلندا ئیسلامی ب سە‌رۆکاتیا عە‌مار حە‌کیم جودا بووی. و بە‌ری چە‌ند ڕۆژە‌کان، ل پارێزگە‌ھا واست کو دکەڤیتە ژێریا ڕۆژھە‌لاتا عیراقێ، دڕوودانە‌کا چاڤە‌ڕێ نە‌کری دا، وێنێن سە‌رکردێ شیعی و سەرۆکێ باسکێ سەدری (موقتە‌دا سە‌در) و بابێ وی ھاتنە سۆتن و ھێرش ل سە‌ر بنگە‌ھێن سە‌دریان ژئالیێ ھندە‌ک کە‌سێن نە‌بە‌رنیاس ڤە ل دە‌ڤە‌رێن پارێزگە‌ھا واست ھاتنە ئەنجامدان، ھە‌ڤدە‌م پۆلیسێن پارێزگە‌ھێ بادە‌کێن ڤە‌کۆلینێ ل دوور وان ڕوودانان ڤە‌کرینە ل سەر وان کەسێن بزاڤێ دکەن دوبە‌رە‌کیێ د ناڤبەرا شیعە‌یان دا پە‌یدا بکە‌ن.
ژئالیە‌کێ دی ڤە،‌ داخویانیێن موقتە‌دا سە‌دری ب سە‌دە‌ما ھێرشکرنا سە‌ر دە‌ڤە‌را کە‌سە‌ک، پێلە‌کا ڕە‌نگڤە‌دانێن سیاسی ب خوەڤە گرتیە، ب تایبە‌تی د ناڤبە‌را حزبێن شیعی یێن پشتە‌ڤانیا سیستە‌مێ (ویلایە‌تا فە‌قیە) یا ئیرانی دکە‌ن، کو پتریا پۆستە و کورسیێن دە‌ستھە‌لاتێ ددە‌ستێن وان دانە، ھە‌ڤدە‌م بزاڤا نە‌رازیبوونا پشتە‌ڤانیا زانایێن سونی یێن عیراقێ ژی ب خوەڤە گرت و بەرھەڤی مە‌یدانا تە‌حریر بوون و پشکداری د وان خوەنیشاندان دا کرن.