ئه‌ڤرۆ:

به‌رپرسه‌كێ پارتی دیموكراتی كوردستان ل سنوورێ پارێزگه‌ها دهۆكێ، راگه‌هاند به‌رهه‌ڤیێن باش بۆ هه‌لبژارتنێن داهاتی یێن جڤاتا نوونه‌رێن ئیراقێ یێن هاتینه‌ كرن ودیاركر ب هه‌موو پێڤه‌ره‌ك ده‌نگ و كورسیێن پارتی د هه‌لبژارتنێن ڤێ جارێ یێن ئیراقێ دێ زێده‌ بن.

عومه‌ر ئۆره‌یی، به‌رپرسێ لقێ 18 یێ پارتی دیموكراتی كوردستان، گۆت” ل سنوورێ قه‌زا ئامێدیێ به‌رهه‌ڤیێن باش یێن هاتینه‌ كرن بۆ هه‌لبژارتنێن جڤاتا نوونه‌رێن ئیراقێ و به‌ربژارێن پارتی ب جه‌ماوه‌رێ سنوورێ ده‌ڤه‌را ئامێدیێ یێن هاتینه‌ نیاسین، بریاره‌ ژی ل رۆژێن داهاتی ده‌هان چالاكی بۆ هه‌وا هه‌لبژارتنان ل ده‌ڤه‌را ئامێدیێ بهێنه‌ ئه‌نجامدان”.

به‌رپرسێ لقێ 18 پتر رۆهنكر” ده‌نگێن پارتی د هه‌لبژارتنێن جڤاتا نوونه‌رێن ئیراقێ كو بریاره‌ ل هه‌یڤا داهاتی بهێنه‌ ئه‌نجامدان، دێ زێده‌ بن، ژ ئه‌نجامێ وێ چه‌ندێ ژی دێ دێ هژمارا كورسیێن پارتی ل جڤاتا نوونه‌رێن ئیراقێ بلند بن بۆ سه‌ر 25 كورسیان دا، ئه‌ز ب خوه‌ پێشبینیێ دكه‌م هژمارا كورسیێن پارتی ژ 25 كورسیان زێده‌تر لێ بهێن و ببنه‌ 28 كورسی”.

عومه‌ر ئوره‌یی ئاماژه‌ كر” چه‌ند پیڤه‌ره‌ك یێن هه‌ین بۆ زێده‌بوونا ده‌نگێن پارتی و په‌سه‌ندكرنا سیاسه‌تا پارتی ژلایێ خه‌لكێ كوردستانێ ڤه‌، پرۆژێن حوكمه‌تێ بۆ خزمه‌تكرنا وه‌لاتیان، هه‌روه‌سا ئه‌و داتا و پێزانینێن ل دۆر ئه‌ندام و لایه‌نگرێن پارتی هه‌ین، ئه‌و هه‌موو ئه‌نجامێن وێ راستیێ نه‌ كو پارتی دێ سه‌ركه‌ڤیت و ب هه‌موو پیڤه‌ره‌كێ پێشبینیا زێده‌بوونا ده‌نگ و كورسیێن پارتی دكه‌ین”.

ئه‌ڤرۆ:

سه‌رۆكێ هه‌رێما كوردستانێ دووپاتی ل گرنگیا دیالۆكی و لێكتێگه‌هشتن و بیر و بۆچوونێن هه‌ڤپشك و دیتنا رێچاره‌كێ بۆ كێشه‌ و ئالۆزیێن ده‌ڤه‌رێ ل سه‌ر بنه‌مایێ هه‌ڤدوو قه‌بوولكرنێ دكه‌ت.

نێچیرڤان بارزانی، سه‌رۆكێ هه‌رێما كوردستانێ پێشوازی ل شانده‌كێ پارتا گه‌لێ كۆماری یا توركی (جه‌هه‌په‌) ب سه‌رۆكایه‌تیا (ئۆغوز كائان سالیجی)، جێگرێ سه‌رۆكێ وێ پارتێ كر.

ب گۆره‌ی به‌یاننامه‌كا سه‌رۆكایه‌تیا هه‌رێما كوردستانێ، د دیداره‌كێ دا شاندێ پارتا ناڤبری به‌حسێ ئارمانج ژ سه‌ره‌دانا خوه‌ بۆ هه‌رێما كوردستانێ كر و دووپاتی ل وێ چه‌ندێ كر كو چاره‌سه‌ركرنا كێشه‌ و ئالۆزیێن ده‌ڤه‌رێ ب دیالۆكێ و لێكتێگه‌هشتنێ د ناڤبه‌را گه‌ل و پێكهاتان دبیت، بۆ ڤێ مه‌ره‌مێ ژی پارتا وان بجهئینانا روانگه‌هه‌كێ دووربین ل سه‌ر وی بنه‌مایی ده‌ستپێكریه‌ و هیڤی خواست په‌یوه‌ندیه‌كا باش و ل سه‌ر بنه‌مایێ به‌رژه‌وه‌ندیا گه‌لێن ده‌ڤه‌رێ ل گه‌ل هه‌رێما كوردستانێ و پێكهاتان ئاڤا بكه‌ین و پێكڤه‌ كاری بۆ چاره‌سه‌ركرنا كێشان و ئارامیێ و سه‌قامگیریێ ل ده‌ڤه‌رێ بكه‌ن، هه‌روه‌سا ئاماژه‌ ب گرنگیا رۆل و پێگه‌هێ هه‌رێما كوردستانێ كر”.

سه‌رۆكێ هه‌رێما كوردستانێ ژی دووپاتی ل گرنگیا دیالوك و لێكتێگه‌هشتن و بیر و بۆچوونێن هه‌ڤپشك و دیتنا رێچاره‌یا كێشه‌ و ئالۆزیێن ده‌ڤه‌رێ ل سه‌ر بنه‌مایێ هه‌ڤدو قه‌بوولكرنێ و نه‌هێلانا ئینكارێ كر و ئه‌ڤ سه‌ره‌دانه‌ ژی وه‌كو سیاسه‌ته‌كا نوو یا (جه‌هه‌پێ) هژمارت”.

نێچیرڤان بارزانی سوپاسیا حوكمه‌تا توركیا كر كو به‌رده‌وام ل ته‌نگاڤیان دا هاریكاریا خه‌لكێ كوردستانێ كریه‌ و ئاماژه‌ ب هاریكاریا توركیا ل ده‌مێ ئۆپه‌راسیۆنێن ئه‌نفالان ل سالا 1988 كر كو ده‌رگه‌هێن خوه‌ بۆ خه‌لكێ كوردستانێ ڤه‌كرن و هاریكاریا وان كری. ل دۆر رۆل و پێگه‌هێ هه‌رێما كوردستانێ ژی، سه‌رۆكێ هه‌رێمێ دووپات كر كو وه‌كو به‌رده‌وام ب فاكته‌رێ ئارامیێ و سه‌قامگیریێ دێ مینیت.

ئه‌ڤرۆ:

پێكهاتێن ده‌شتا نه‌ینه‌وا پشته‌ڤانیا خوه‌ بۆ به‌ربژارێن پارتی دیموكراتی كوردستان دووپات دكه‌ن و به‌حس ل وێ چه‌ندێ دكه‌ن كو پارتی دیموكراتی كوردستان تاكه‌ حزبه‌ بشێت بێ جوداهی به‌رگریێ ل هه‌موو پێكهاتان بكه‌ت، له‌وما دخوازن پارتی ل به‌غدا نوونه‌راتیا وان بكه‌ت.

غه‌زوان داودی، ئه‌ندامێ به‌رێ یێ جڤاتا پارێزگه‌ها نه‌ینه‌وا و نوونه‌رێ شه‌به‌كا، گۆت” پشتی ب بیانوویێن جودا به‌ربژارێ شه‌به‌ك ل ده‌شتا نه‌ینه‌وا هاتیه‌ دوورخستن، پتریا كوردێن شه‌به‌ك كو نێزیكی 45 هزار ده‌نگده‌رن بریار دایه‌ ده‌نگ ب پارتی دیموكراتی كوردستان بده‌ن و لایه‌نگرێن پارتی نه‌، چونكه‌ كوردێن شه‌به‌ك دو مه‌زه‌بن، سوننه‌ و شیعه‌، ئه‌وێن سوننه‌ هه‌موو سه‌ر ب پارتی نه‌ و ئه‌وێن شیعه‌ ژی پشكه‌كا وان سه‌ر ب پارتی نه‌، له‌وما دخوازین هه‌موو كوردێن شه‌به‌ك ده‌نگ ب پارتی بده‌ن، چونكه‌ پارتی تاكه‌ حزبه‌ داكۆكیێ ل مافێن هه‌موو پێكهاتان دكه‌ت و پشته‌ڤانیا وان دكه‌ت و دخوازیت ببیته‌ نوونه‌را وان ل به‌غدا”.

وه‌حیده‌ یاقو هۆرمز، نوونه‌را مه‌سیحیان ل خۆلا به‌رێ یا په‌رله‌مانێ كوردستانێ، دبێژیت” بۆ كۆتا مه‌سیحیان ل ده‌شتا نه‌ینه‌وا هژماره‌كا به‌ربژار یێن هه‌ین، به‌لێ كاری دكه‌ین و داخواز ژی ژ مه‌سیحیان دكه‌ین ده‌نگ ب وی به‌ربژارێ بده‌ن یێن نێزیكی پارتی، یان ژی ده‌نگ ب به‌ربژارێن پارتی بده‌ن، چونكه‌ تنێ پارتی د خه‌ما پێكهاتان دایه‌ و كاری بۆ ب ده‌ستڤه‌ئینانا مافی|َن پێكهاتان دكه‌ت، به‌لگه‌ ژی نوكه‌ خه‌لكێ ده‌شتا نه‌ینه‌وا ل هه‌رێما كوردستانێ ئاواره‌نه‌ و خزمه‌تا گه‌له‌ك باش بۆ وان ل هه‌رێما كوردستانێ دهێته‌ كرن”.

ژلایێ خوه‌ڤه‌، شێخ عومه‌ر، نوونه‌رێ به‌رێ یێ كوردێن ئێزدی ل جڤاتا پارێزگه‌ها نه‌ینه‌وا، گۆت” ل سنوورێ بازنێ دو پتریا كوردێن ئێزدی ل گه‌ل پارتی دیموكراتی كوردستان دانه‌ و پشته‌ڤانیێ ل پارتی دكه‌ن، ب تایبه‌ت به‌ربژارێ پارتی شێروان دوبه‌ردانی، چونكه‌ پتریا خه‌لكێ ده‌ڤه‌رێ پشته‌ڤانیێ ل به‌ربژارێن پارتی دكه‌ن، له‌وما پارتی دێ پتریا ده‌نگێن ده‌ڤه‌رێ ب ده‌ستڤه‌ئینیت”.

پتر رۆهنكر” كوردێن ئێزدی ل باشیكێ پشته‌ڤانیێ ل به‌ربژارێن پارتی ل بازنێ دو دكه‌ن و كاری بۆ سه‌رخستنا وان دكه‌ن، چونكه‌ دزانن پارتی خزمه‌تا پێكهاتان دكه‌ت و به‌رده‌وام ده‌رگه‌هێ كوردستانێ بۆ هه‌موو پێكهاتان بێ جوداهی یێ ڤه‌كریه‌” .

ئه‌ڤرۆ:

نوونه‌رێ حوكمه‌تا هه‌رێما كوردستانێ ل ئێكه‌تیا ئورۆپی راگه‌هاند، ئه‌ڤرۆ سێشه‌مبی 7/9/2021، شانده‌كێ بلند یێ ئێكه‌تیا ئورۆپی ب سه‌رۆكایه‌تیا (جۆزیف بۆرێل) به‌رپرسێ سیاسه‌تا ده‌رڤه‌ و ئاسایشا ئێكه‌تیا ئورۆپی سه‌ره‌دانا هه‌ولێرێ كه‌ت و ل گه‌ل به‌رپرسێن بلند یێن هه‌رێما كوردستانێ كۆمبیت.

د. دلاوه‌ر خالد ئاژگه‌یی، نوونه‌رێ حوكمه‌تا هه‌رێما كوردستانێ ل ئێكه‌تیا ئورۆپی، ل دۆر ئارمانج سه‌ره‌دانا شاندێ بلند یێ ئێكه‌تیا ئورۆپی، گۆت” جۆزێف بۆرێل به‌رپرسێ سیاسه‌تا ده‌رڤه‌ و ئاسایشا ئێكه‌تیا ئورۆپی ل گه‌ل شانده‌كێ بلند یێ ئێكه‌تیا ئورۆپی ئه‌ڤرۆ دێ سه‌ره‌دانا هه‌رێما كوردستانێ كه‌ن” زێده‌تر گۆت” بۆرێل خودان بلندترین پۆستێ ئێكه‌تیا ئورۆپایه‌ و نوونه‌راتیا هه‌ر 27 وه‌لاتێن ئه‌ندام د ئێكه‌تیا ئورۆپی دا دكه‌ت، سه‌ره‌دانا وی دێ بۆ ئیراقێ و هه‌رێما كوردستانێ بیت و دێ ل گه‌ل سه‌ركردایه‌تیا سیاسی یا هه‌رێما كوردستانێ كۆمبیت”.

نوونه‌رێ حوكمه‌تا هه‌رێمێ ل ئێكه‌تیا ئورۆپی ئاماژه‌ كر كو ئێكه‌تیا ئورۆپی ب گرنگی دنێریته‌ په‌یوه‌ندیێن خوه‌ ل گه‌ل هه‌رێما كوردستانێ، بێگومان ئه‌ڤ سه‌ره‌دانه‌ ژی د چارچۆڤێ ب هێزكرنا په‌یوه‌ندیێن د ناڤبه‌را هه‌ردولا دهێت، ل ده‌مێ شه‌رێ داعشێ ژی ئێكه‌تیا ئورۆپی و وه‌لاتێن ئه‌ندام تێدا هاریكارێن هه‌رێما كوردستانێ بوون ژ روویێ چه‌ك و ته‌قه‌مه‌نیێ و دابینكرنا فرۆكان و هنارتنا شیره‌تكارێن له‌شكری بۆ هه‌رێما كوردستانێ”.

سه‌باره‌ت گرنگیا سه‌ره‌دانا وی شاندێ بلند یێ ئێكه‌تیا ئورۆپی بۆ هه‌رێما كوردستانێ، د. دلاوه‌ر خالد ئاژگه‌یی، نوونه‌رێ حوكمه‌تا هه‌رێمێ ل ئێكه‌تیا ئورۆپی راگه‌هاند” هه‌لبژارتنێن پێشوه‌خت ل ئیراقێ یێن ل پێش كو بریاره‌ ل 10/10/2021 بهێنه‌ ئه‌نجامدان و ئه‌و روودانێن ل ده‌ڤه‌رێ روو دده‌ن و ئه‌و سه‌ره‌دانێن كو به‌رپرسێن وه‌لاتێن ئورۆپی بۆ هه‌رێما كوردستانێ ئه‌نجام دده‌ن، ئاماژه‌یه‌ بۆ رۆلێ گرنگ یێ هه‌رێمێ وه‌كو ناڤه‌نده‌كا گرنگ یا ئه‌منی و سیاسی ل ده‌ڤه‌رێ، له‌وما هه‌ر بریار و پێشهاته‌ك ل ده‌ڤه‌رێ ببیت، بێی دانوستاندن ل گه‌ل به‌رپرسێن هه‌رێما كوردستانێ یا سه‌ركه‌فتی نابیت”.

ناڤبری گۆت ژی” ئه‌و سه‌ره‌دانه‌ دێ بیته‌ پشته‌ڤانیه‌كا گرنگ یا ئێكه‌تیا ئورۆپی بۆ هه‌رێما كوردستانێ، هه‌روه‌سا هه‌رێما كوردستانێ ژی د نوكه‌ دا ل سه‌ر ئاسته‌كێ نێڤده‌وله‌تی یێ گه‌له‌گ بلند دانوستاندن دگه‌لدا دهێته‌ كرن، ئه‌ڤه‌ ژی پشته‌ڤانیه‌كا دیبلۆماسی و سیاسی یه‌ بۆ هه‌رێما كوردستانێ”.

دیدار، هۆشه‌نگ تاجر:

جێگرێ سه‌رۆكێ گشتی یێ پارتا سوسیالیست یا كوردستانێ ل باكور دیار دكه‌ت كو پارتا كۆماریا گه‌ل د هه‌لبژارتنێن سالا ٢٠١٩ دا ب ده‌نگێ كوردان شیا سه‌ركه‌فتنه‌كا مه‌زن تۆمار بكه‌ت، نها هه‌لوه‌ستێ جه‌هه‌پێ ل هه‌مبه‌ر كوردان هاتیه‌ گوهۆرین و خوه‌ نێزیكی كوردان دكه‌ن، ئه‌و یه‌ك ژی هه‌م بۆ هه‌رێما كوردستانێ و هه‌م ژی بۆ پرسا كوردی ل باكور گه‌له‌ك گرنگه‌.

بایرام بۆزیه‌ل جێگرێ سه‌رۆكێ گشتی یێ پارتا سوسیالیست یا كوردستانێ ل باكور PSK د دیداره‌كا تایبه‌ت دا ل گه‌ل رۆژناما ئه‌ڤرۆ دیار كر كو به‌ری نها هه‌لوه‌ستێ جه‌هه‌پێ ل هه‌مبه‌ر كوردان گه‌له‌ك توند بوو، دڤێت ژبیر نه‌كه‌ین كو جه‌هه‌په‌ پارتا كه‌مال ئه‌تاتوركی یه‌ و به‌ری نها وان گه‌له‌ك كارێن خراب ل دژی گه‌لێ كورد ل توركیا كرینه‌، لێ پشتی كو كه‌مال كچلدار ئوگلۆ وه‌كو سه‌رۆكێ جه‌هه‌پێ ده‌ست ب كار كری پێنگاڤ ب پێنگاڤ دڤێت هه‌لوه‌ست و سیاسه‌تا خوه‌ ل هه‌مبه‌ر كوردان بگوهۆرن، چونكو ئه‌و ژی باش دزانن هه‌ر هێزه‌كێ‌ بڤێت ل توركیا ببیته‌ ده‌ستهه‌لاتدار و سیاسه‌تێ بكه‌ت دێ پێدڤی ده‌نگێن كوردان بیت و گۆت: (د هه‌لبژارتنێن باژێرڤانیان یێ سالا ٢٠١٩ ل توركیا دا جه‌هه‌پێ شیا ب ده‌نگێن كوردان باژێرڤانیێن هه‌ری مه‌زن و گرنگ ژ ده‌ستێ ئاكپارتیێ ده‌رخینیت، بۆ هه‌ر كه‌سه‌كێ ژی ئاشكرایه‌ كو ل باژێرێن وه‌كو ئسته‌نبۆل و ئه‌نقه‌ره‌ جه‌هه‌په‌ ب ده‌نگێ كوردان سه‌ركه‌فت و ئه‌و یه‌ك ژی سه‌ركه‌فتنه‌كا دیرۆكی بوو، ئێدی ژ وێ رۆژێ هه‌تا نها پێنگاڤ ب پێنگاڤ جه‌هه‌پێ دڤێت پتر خوه‌ نێزیكی كوردان بكه‌ت).

ناڤهاتی ئه‌و یه‌ك ژی دیار كر كو سه‌ره‌دانا شاندێ جه‌هه‌پێ بۆ هه‌رێما كوردستانێ و هه‌ڤدیتنا وان یا ل گه‌ل سه‌رۆك بارزانی ژی نیشا دده‌ت كو جه‌هه‌پێ هه‌ست ب سه‌نگ و پێگه‌هێ كوردان كریه‌ و ئێدی ئه‌و ژی باش دزانن بێی كوردان سه‌ركه‌فتی نابن و گۆت: ( ئه‌ز سه‌ره‌دانا شاندێ جه‌هه‌پێ بۆ هه‌رێما كوردستانێ گه‌له‌ك گرنگ دبینم چونكو ئه‌و یه‌ك نیشا دده‌ت كو ئێدی ل توركیا بێی كوردان كه‌س نه‌شێت بهێته‌ سه‌ر ده‌ستهه‌لاتێ، ئانكۆ ئێدی بهایێ كوردان زێده‌تر لێ هاتیه‌، به‌ری نها گه‌له‌ك جاران دگۆتن كورد سیاسه‌تێ نزانن و سڤكاتی ب كوردان دكرن لێ نها به‌رێ خوه‌ دده‌نه‌ كوردان و خوه‌ نێزیكی كوردان دكه‌ن، ئه‌و یه‌ك ژی هه‌م بۆ هه‌رێما كوردستانێ گه‌له‌ك گرنگه‌ و هه‌م ژی بۆ چاره‌سه‌ركرنا پرسا كوردی ل توركیا ژی گرنگیه‌كا خوه‌ یا دیرۆكی هه‌یه‌).

جێگرێ سه‌رۆكێ گشتی یێ پارتا سوسیالیست یا كوردستان ل باكور ئه‌و یه‌ك ژی دیار كر كو سالا ٢٠٢٣ ل توركیا دێ هه‌لبژارتنێن سه‌رۆكاتیێ و یێ په‌رله‌مانی هێنه‌ كرن، لێ دبیت زووتر ژی هه‌لبژارتن برێڤه‌ بچن، ژ به‌ر هندێ هه‌ر ژ نها ڤه‌ گه‌له‌ك هێز به‌رهه‌ڤیێن خوه‌ دكه‌ن، هه‌ڤپه‌یمانا ملله‌ت یا ب سه‌رۆكاتیا جه‌هه‌پێ دڤێت ڤێجارێ ئاكپارتیێ ژ ده‌ستهه‌لاتێ دوور بكه‌ت، ئاكپارتی د ماوه‌یێ چه‌ند سالێن بۆری دا توركیا تووشی گه‌له‌ك قه‌یرانان كریه‌ و پێگه‌هێ خوه‌ یێ جاران د ناڤ جڤاكێ توركیا دا نه‌مایه‌، ئه‌و یه‌ك ژی بۆ هه‌ڤپه‌یمانا ملله‌ت ب تایبه‌تی ژی بۆ جه‌هه‌پێ ده‌لیڤه‌كا گه‌له‌ك گرنگه‌ دا بشێت بهێته‌ سه‌ر ده‌ستهه‌لاتێ و گۆت: (جه‌هه‌پێ دڤێت وه‌كو سالا ٢٠١٩ جاره‌كا دی ب پشته‌ڤانیا كوردان بهێته‌ سه‌ر ده‌ستهه‌لاتێ و ئاكپارتیێ ژی ژ ده‌ستهه‌لاتێ دوور بكه‌ت، ژ به‌ر هندێ ژی شاندێ جه‌هه‌پێ سه‌ره‌دانا هه‌رێما كوردستانێ كر و ئه‌و په‌یامه‌ دا كوردان كو وان دڤێت په‌یوه‌ندیێن خوه‌ ل گه‌ل كوردان باش بكه‌ن، بێگومان باشبوونا په‌یوه‌ندیێن كوردان ل گه‌ل جه‌هه‌پێ و هه‌ر هێزه‌كا دی ل توركیا بۆ كوردان ژی گه‌له‌ك باشه‌ و د خزمه‌تا چاره‌سه‌ركرنا پرسا كوردی دایه‌).

بایرام بۆزیه‌ل د پشكه‌كا دی یا ئاخڤتنا خوه‌ دا ئاماژه‌ ب هندێ ژی كر كو به‌رپرسێن ئاكپارتیێ ژ سه‌ره‌دانا شاندێ جه‌هه‌پێ بۆ هه‌رێما كوردستانێ دلگرانن، چونكو ئه‌و ژی باش دزانن ب پشته‌ڤانیا كوردان جه‌هه‌پێ دشێت ئاكپارتیێ تووشی ئاریشان بكه‌ت، ژ به‌ر هندێ ژی ره‌نگه‌ ئاكپارتیێ ژی هه‌لوه‌ستێ خوه‌ ل هه‌مبه‌ر كوردان بگوهۆریت ئانكۆ هه‌ڤڕكیه‌كا نوو د ناڤبه‌را وان دا دروست ببیت كو ئه‌و یه‌ك ژی بۆ كوردان ل هه‌رێما كوردستانێ و باكورێ كوردستانێ دێ گه‌له‌ك باش بیت و گۆت: (ئێدی ل رۆژهه‌لاتا ناڤین و توركیا كورد بوونه‌ خوه‌دان پێگه‌هه‌ك مه‌زن، بێی كوردان وه‌كو جاران كه‌س نه‌شێت سیاسه‌تێ بكه‌ت، ژ به‌ر هندێ ژی دڤێت كورد ژی بزانن كا دێ ب چ ره‌نگه‌كێ سه‌ره‌ده‌ریێ ل گه‌ل گوهۆرینێن نها ل ده‌ڤه‌رێ و توركیا كه‌ن).

ناڤهاتی د دووماهیا ئاخڤتنا خوه‌ دا ئه‌و یه‌ك ژی نه‌ڤه‌شارت كو هه‌ر هێزه‌ك بۆ به‌رژه‌وه‌ندیێن خوه‌ سیاسه‌تێ دكه‌ت، نها جه‌هه‌په‌ ژێ پێدڤی كوردانه‌ و دڤێت ب پشته‌ڤانی و ده‌نگێن كوردان ئاكپارتیێ ژ ده‌ستهه‌لاتێ دوور بكه‌ت، دڤێت كورد ژی شاره‌زا بن و بزانن كا دێ چاوا و ب چ ره‌نگه‌كێ سه‌ره‌ده‌ریێ ل گه‌ل ره‌وشا نوو ل ده‌ڤه‌رێ و توركیا كه‌ن، چونكو به‌ری نها كوردان گه‌له‌ك ده‌لیڤێن گرنگ ژ ده‌ست داینه‌ و دڤێت ڤێجارێ هه‌موو هێزێن كوردی وانان ژ روودانێن دیرۆكێ وه‌ربگرن و پێكڤه‌ بۆ به‌رژه‌وه‌ندیێن نه‌ته‌وه‌یی كار بكه‌ن.

ئه‌ڤرۆ:

په‌یڤدارێ پارتی و ئه‌ندامێ مه‌كته‌با سیاسی، مه‌حموود محه‌مه‌د، د خرڤه‌بوونه‌كێ دا ل دۆر گرنگیا راگه‌هاندنێ بۆ هه‌لبژارتنان، گۆتاره‌ك پێشكێش كر و ل پشكه‌كا ئاخڤتنێن خوه‌ دا راگه‌هاند، ئه‌م دژی ده‌مارگێریا نه‌ته‌وی نه‌ و مه‌ باوه‌ری ب پێكڤه‌ژیانێ یا هه‌ی، دشێین ژی نوونه‌راتیا هه‌موو ئیراقێ بكه‌ین نه‌كو ب تنێ كوردستانێ، ئارمانجا مه‌ ژی چاكسازی و به‌ر ب پێشڤه‌برنا جڤاكی یه‌.

مه‌حموود محه‌مه‌د، په‌یڤدار و ئه‌ندامێ مه‌كته‌با سیاسی یا پارتی دیموكراتی كوردستان، ئاماژه‌ ب وێ چه‌ندێ كر، مه‌ وه‌كو پارتی به‌ربژار دناڤ پتریا پێكهاتێن نه‌ته‌وی یێن جودا وه‌كو ئه‌ره‌ب، توركمان، كلدوئاشووری و نه‌ته‌وێن دی یێن جودا یێن هه‌ین، هه‌روه‌سا دناڤ ئاین و مه‌زه‌بێن جودا ژی مه‌ به‌ربژار یێن هه‌ین موسلمان، مه‌سیحی، ئێزدی، كاكه‌یی، سوننه‌ و شیعه‌ ژی.

دیاركر ژی كو دناڤ سه‌ركردایه‌تیا پارتا مه‌ دا ژی پێكهاته‌ و نه‌ته‌وێن جودا و فره‌ئاینێن جودا یێن هه‌ین، ئه‌ڤ چه‌نده‌ ژی بۆ بنه‌مایێن پارتی و باوه‌ریا وێ ب پێكڤه‌ژیانێ زڤراند.

په‌یڤدارێ پارتی گۆت ژی” پارتی باوه‌ری ب هزر و بۆچوونێن جودا یا هه‌ی، ئارمانجا مه‌ چاكسازی و پێشكه‌فتن و خزمه‌تكرنا خه‌لكی یه‌، ل پیناڤی به‌ر ب پێشڤه‌برنا جڤاكێ مه‌، ئه‌م نه‌كو تنێ هه‌رێما كوردستانێ، به‌لكو دشێین هه‌موو ئیراقێ ژی ب رێڤه‌ببه‌ین، له‌وما مه‌ به‌ربژار ل پتریا پارێزگه‌هان یێن هه‌ین”.

مه‌حموود محه‌مه‌د رۆهنكر ژی” هیچ ده‌مه‌كی شه‌رێ مه‌ ل گه‌ل ئه‌ره‌با نه‌بوو وه‌كو نه‌ته‌وه‌، ئه‌م دژی ده‌مارگێریێ و ته‌عه‌سوبا نه‌ته‌وی نه‌، به‌لكو كێشا مه‌ ل گه‌ل حوكمرانیان بوو، له‌وما ئه‌م داخوازا حوكمه‌ته‌كێ دكه‌ین كو باوه‌ری ب بنه‌مایێن دیموكراسیه‌تێ هه‌بیت ل پیناڤی خوه‌شگوزه‌رانیا هه‌موو نه‌ته‌وه‌ و پێكهاتێن جودا، نه‌كو مافێن وه‌لاتیان ل هه‌موو ئیراقێ بهێنه‌ پێشێلكرن و داهات ژی ببیته‌ چه‌كه‌ك ل هه‌مبه‌ر سینگێ هه‌ڤدوو بهێته‌ بكارئینان”.

هه‌روه‌سا گۆت” ئه‌م یێن دناڤ جڤاكێ خوه‌ دا و دزانین چاوان چاره‌سه‌ریا كێشێن خوه‌ بكه‌ین، له‌وما هه‌رده‌م ده‌رگه‌هێ دانوستاندنێ یێ ڤه‌كری بوو هه‌تاكو ل ده‌مێ خه‌باتا چه‌كداری ژی دا ده‌رگه‌هێ دانوستاندنێ نه‌هاتبوو داخستن، به‌لێ مخابن حوكمرانیێن ئیراقێ د وه‌سا نینن و ل شوینا چاره‌سه‌ریا كێشان، زێده‌تر لێ دكه‌ن، له‌وما ژی د نوكه‌ دا كێشه‌ ژ هه‌موو روویه‌كی ڤه‌ یێن كوورتر بووین، چونكی یێن كه‌فتینه‌ سه‌ر كێشه‌ و ئه‌زموونێن بۆری ژی دا”.

په‌یڤدارێ پارتی ل دووماهیا ئاخڤتنێن خوه‌ دا گۆت” بریار ئه‌وه‌ ل 11 ئه‌یلوولێ ب فه‌رمی ده‌ست ب هه‌وا هه‌لبژارتنان بكه‌ین”.

ژلایێ خوه‌ڤه‌، هه‌وار محه‌مه‌د، به‌رپرسێ هۆبا قانوونی ل ده‌زگه‌هێ هه‌لبژارتن یێ پارتی دیموكراتی كوردستان گۆت” ده‌ستپێكا هه‌وا هه‌لبژارتنان دێ ل هه‌ولێرێ بیت ب رێكخستنا كه‌رنه‌ڤاله‌كێ جه‌ماوه‌ری و ل لقێن دی یێن پارتی دێ ب هه‌مان شێوه‌ ده‌ستپێكه‌ت”.

گۆت ژی” پارتی گرنگیه‌كا تایبه‌ت ب ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ دده‌ت و دو نڤیسینگه‌هێن هه‌وا هه‌لبژارتنان ل كه‌ركووكێ یێن ڤه‌كرین و بریاره‌ ل نه‌ینه‌وا نڤیسینگه‌هه‌ك بهێته‌ ڤه‌كرن ودێ نڤیسینگه‌هێن زێده‌تر ژی هێنه‌ ڤه‌كرن”.

بۆ هه‌لبژارتنێن داهاتی یێن جڤاتا نوونه‌رێن ئیراقێ كو بریاره‌ ل 10/10/2021 بهێنه‌ ئه‌نجامدان، پارتی ل پارێزگه‌هێن هه‌ولێر، سلێمانیێ، دهۆك، هه‌له‌بجه‌، كه‌ركووك، نه‌ینه‌وا، سه‌لاحه‌دین، ئه‌نبار، نه‌جه‌ف كه‌ربه‌لا، واست و دیالا به‌ربژار یێن هه‌ین.

ئه‌ڤرۆ:

ئێك ژ سه‌ركرده‌كێ باسكێ سه‌دری د دیداره‌كا میدیایی دا راگه‌هاند، سه‌رۆك كۆمارێ داهاتی یێ ئیراقێ دێ بۆ پارتی دیموكراتی كوردستان بیت، دیاركر ژی كو نوری مالكی ده‌لیڤا وه‌رگرتنا پۆستێ سه‌رۆك وه‌زیران نینه‌.

عیسام حسێن، سه‌ركردێ باسكێ سه‌دری ب سه‌رۆكایه‌تیا موقته‌دا سه‌در، گۆت” سه‌رۆك مه‌سعود بارزانی یێ ناڤداره‌ ب هه‌بوونا بریار و په‌یڤێن ب هێز ل ده‌ف و یێ راستگۆیه‌ ژی ل گه‌ل هه‌ڤپه‌یمانێن خوه‌”.

ئاماژه‌ كر ژی” دروستكرنا هه‌ڤپه‌یمانیێ ل گه‌ل مه‌سعود بارزانی كاره‌كێ گه‌له‌ك باش بوو و نێزیكبوونه‌ك د بۆچوونان دا د ناڤبه‌را سه‌رۆك مه‌سعود بارزانی و سه‌رۆكێ باسكێ سه‌دری موقته‌دا سه‌در دا یا هه‌ی و لێكتێگه‌هشتن ژی یا گه‌هشتیه‌ ئاستێن بلند”.

وی سه‌ركردێ باسكێ سه‌دری رۆهنكر ژی” ل ده‌مێ سه‌ره‌دانا ڤێ دووماهیێ یا نوری مالكی بۆ هه‌ولێرێ، سه‌رۆك مه‌سعود بارزانی ب وێ راگه‌هاندبوو كو ئه‌و یێ ل هیڤیا زڤرینا موقته‌دا سه‌دری یه‌ بۆ پشكداریێ د پرۆسا هه‌لبژارتنان دا و ئه‌و هه‌ڤپه‌یمانه‌كێ ستراتیژی یه‌ بۆ باسكێ سه‌دری”.

گۆت ژی” فشارێن ده‌رڤه‌یی كارتێكرنێ ل سه‌رۆك بارزانی ناكه‌ن، به‌رۆڤاژی ئێكه‌تی نیشتمانی كوردستان كو باسكێ سه‌دری به‌ری نوكه‌ ئه‌زموونه‌كا نه‌ د ئاستێ پێدڤی دا ل گه‌ل هه‌بوو ل سالا 2012 ل ده‌مێ پێشنیازكرنا پرسا ڤه‌كێشانا باوه‌ریێ ژ سه‌رۆك وه‌زیرێن پێشتر نوری مالكی”.

هه‌روه‌سا گۆت” سه‌ره‌دانا ڤێ دووماهیێ یا مالكی بۆ هه‌ولێرێ پتر یا پرۆتوكۆلی بوو و مالكی هه‌ڤپه‌یمانیه‌كا پێشتر ل گه‌ل بارزانی هه‌بوو، به‌لێ مالكی پێگیری ب سۆزێن خوه‌ نه‌كر و د ئه‌نجامدا گه‌له‌ك كێشه‌ د ناڤبه‌را هه‌ردو لایه‌نان دروست بوون و ئێدی بارزانی باوه‌ری ب نوری مالكی نابیت ژ ئه‌نجامێ ئه‌زموونێن پێشتر”.

ئاماژه‌ كر ژی” پۆستێ سه‌رۆك كۆمارا ئیراقێ یێ داهاتی دێ بۆ كوردان بیت و ب دیاركری دێ بۆ پارتی دیموكراتی كوردستان  بیت وسه‌رۆكایه‌تیا جڤاتا نوونه‌ران ژی دێ بۆ سوننه‌یان بیت، و ئه‌ڤه‌ پتر دێ ل سه‌ر هه‌ڤپه‌یمانیان مینیت”.

دیاركر ژی” رێژا پشكداریێ د پرۆسا هه‌لبژارتنان دێ یا باش بیت تا راده‌كێ پشتی هاتنا باسكێ سه‌دری بۆ ناڤ مه‌یدانا هه‌ڤركیێ و بریاردای پشكداریێ د هه‌لبژارتنان دا بكه‌ت”.

پتر گۆت” مالكی یێ بوویه‌ پشكه‌ك ژ بۆری و وی هیچ ده‌لیڤه‌ نینن بۆ دووباره‌ وه‌رگرتنا پۆستێ سه‌رۆك وه‌زیران، یاریكه‌رێ سه‌ره‌كی د ڤێ قۆناغێ دا باسكێ سه‌دری یه‌ و مه‌ گه‌له‌ك تێبینی یێن ل سه‌ر مالكی هه‌ین و هه‌شت سالێن ئه‌و د پۆستێ سه‌رۆك وه‌زیران دا تێرا وێ چه‌ندێ دكه‌ن كو وی ژ هه‌موو روویه‌كی ڤه‌ ب هه‌لسه‌نگینین”.

سه‌باره‌ت حزبا ده‌عوه‌ كو بۆ ده‌مێ چه‌ندین سالان پشتی ژناڤچوونا رژێما به‌عس، پۆستێ سه‌رۆك وه‌زیران د ده‌ست دابوو، گۆت” ئه‌و حزبه‌ یا بوویه‌ پشكه‌ك ژ بۆری و نوكه‌ یا بۆ چه‌ندین كوتلێن سیاسی به‌لاڤبووی وه‌كو ده‌وله‌تا قانوونێ و نه‌سر و چه‌ندین كوتلێن دی”.

ئه‌ڤرۆ، ره‌مه‌زان هه‌رنی:

ب مه‌به‌ستا ئه‌نجامدانا هه‌وا هه‌لبژارتنێن جڤاتا نوونه‌رێن ئیراقێ، به‌ربژارێن پارتی قه‌ستا پارێزگه‌ها كه‌ركووكێ دكه‌ن بۆ ب رێڤه‌چوونا هه‌وا هه‌لبژارتنان، به‌لێ ژلایێ بازگه‌هێن كه‌ركووكێ ڤه‌ رێگری ل وان دهێته‌ كرن و ئاسته‌نگ بۆ دهێنه‌ دروستكرن.

هه‌وار محه‌مه‌د ، به‌رپرسێ هۆبا قانوونی ل ده‌زگه‌هێ هه‌لبژارتنێن پارتی دیموكراتی كوردستان بۆ رۆژناما (ئه‌ڤرۆ) راگه‌هاند” پارتی دیموكراتی كوردستان ل پارێزگه‌ها كه‌ركووكێ نڤیسنگه‌هه‌ك بۆ سه‌رپه‌رشتیكرنا هه‌وا هه‌لبژارتنان ڤه‌كریه‌، به‌لێ هێزێن ئه‌منی ل كه‌ركووكێ رێ ناده‌ن به‌ربژارێن پارتی ل بازگه‌هێن (كه‌ركووك – هه‌ولێر) هاتنوچوونێ بكه‌ن وبچنه‌ دناڤ جه‌ماوه‌ری دا بۆ ب رێڤه‌چوونا هه‌وێن خوه‌ یێن هه‌لبژارتنان، ئه‌ڤه‌ژی بوویه‌ ئاریشه‌ بۆ به‌ربژارێن پارتی ل وێ پارێزگه‌هێ”.

گوت ژی” پشتی بزاڤێن زۆر ئه‌م شیاینه‌ وێ ئاریشێ چاره‌ بكه‌ین كو رێ ب به‌ربژاران بهێته‌ دان بچنه‌ دناڤ كه‌ركووكێ دا، له‌ورا زڤرینه‌ڤه‌ كه‌ركووكێ، به‌لێ هه‌تا باره‌گه‌هێن پارتی نه‌ ڤه‌گه‌رن بۆ كه‌ركووكێ، ئه‌ڤ ئاریشه‌ دێ به‌رده‌وام دووباره‌ بن و ئه‌و ناخوازن پارتی ڤه‌گه‌ریته‌ڤه‌ بۆ كه‌ركووكێ، له‌ورا ئاریشان دروست دكه‌ن و هێزین ئه‌منی چه‌ندین جاران رێگری كریه‌ تایبه‌ت ل (شاخه‌وان عه‌بدولا) كو به‌ربژارێ پارتی یه‌ ل كه‌ركووكێ، ژ به‌ر كو ناڤبری خودان جه‌ماوه‌ره‌كێ مه‌زنه‌ ل كه‌ركووكێ”.

ئه‌ڤرۆ:

پشتی ب دووماهی ئینانا سه‌ره‌دانا خوه‌ بۆ ئیراقێ و هه‌رێما كوردستانێ و گه‌هشتنا وی بۆ پاریس، سه‌رۆكێ فره‌نسی (ئێمانوێل ماكرۆن) د تویته‌كا تایبه‌ت دا به‌حسێ سه‌ره‌دانا خوه‌ بۆ هه‌ولێرا پایته‌ختێ هه‌رێما كوردستانێ و رۆلێ پێشمه‌رگه‌ی ل شه‌رێ دژی داعشێ دكه‌ت.

سه‌رۆكێ فره‌نسی (ئێمانوێل ماكرۆن) د پێگه‌هێ خوه‌ یێ تایبه‌ت دا ل سه‌ر تۆرا جڤاكی یا تویته‌ری، ل دۆر سه‌ره‌دانا خوه‌ بۆ هه‌رێما كوردستانێ به‌لاڤكر” فره‌نسا هیچ ده‌مه‌كی پێگیریا شه‌ركه‌رێن كورد ل شه‌رێ دژی داعشێ ژبیر ناكه‌ت، من خواست سه‌ره‌دانا خوه‌ بۆ ئیراقێ ل هه‌ولێرێ ب دووماهی بینم، نێچیرڤانێ ئه‌زیز، سوپاس بۆ وێ پێشوازیێ”.

ئێمانوێل ماكرۆن پشتی پشكداری د كۆپیتكا هاریكاریێ ل به‌غدا كری، گه‌هشته‌ هه‌ولێرا پایته‌ختێ هه‌رێما كوردستانێ و ل گه‌ل هه‌رسێ سه‌رۆكایه‌تیێن هه‌رێما كوردستانێ (سه‌رۆكێ هه‌رێمێ، سه‌رۆكێ حوكمه‌تێ، سه‌رۆكا په‌رله‌مانی) كۆمبوو، هه‌روه‌سا دیداره‌كا تایبه‌ت ژی ل گه‌ل سه‌رۆك مه‌سعود بارزانی هه‌بوو.

ئه‌ڤرۆ:

شیره‌تكارێ سه‌رۆكێ هه‌رێما كوردستانێ راگه‌هاند، هاتنا ئێمانوێل ماكرۆن سه‌رۆكێ فره‌نسا بۆ هه‌رێمێ گرنگیه‌كا مه‌زن یا هه‌ی و سه‌ره‌دانه‌كا دیرۆكی بوو و نیشانا ب هێزبوونا قه‌وارێ هه‌رێما كوردستانێ یه‌، چونكه‌ فره‌نسا پێگه‌هه‌كێ ب هێ زیێ هه‌ی ل سه‌ر ئاستێ جیهانێ و كاریگه‌ریا مه‌زن ژی یا هه‌ی و په‌یوه‌ندیه‌كا باش ژی ل گه‌ل سه‌رۆكێ هه‌رێما كوردستانێ و سه‌ركردایه‌تیا كوردی یا هه‌ی.

زیره‌ك كه‌مال، شیره‌تكارێ سه‌رۆكێ هه‌رێما كوردستانێ، گۆت” هاتنا سه‌رۆكێ فره‌نسا بۆ هه‌رێما كوردستانێ گرنگیه‌كا مه‌زن یا هه‌ی، چونكه‌ فره‌نسا ژبلی وێ چه‌ندێ كو وه‌لاته‌كێ گرنگه‌ و پێگه‌هه‌كا گرنگ یا هه‌ی، كاریگه‌ری یا ل سه‌ر هه‌موو جیهانێ هه‌ی و ماكرۆن ب خوه‌ ژی د چارچۆڤێ سیاسه‌تا وه‌لاتێ خوه‌ په‌یوه‌ندی ل گه‌ل سه‌رۆكێ هه‌رێمێ و سه‌ركردایه‌تیا كوردی یێن هه‌ین، ئه‌ڤه‌ ژی بۆمه‌ یا گرنگه‌ و ل به‌غدا ژی ماكرۆنی به‌حس ل وێ چه‌ندێ كر كو دێ سه‌ره‌دانا براده‌رێن خوه‌ ل هه‌رێما كوردستانێ كه‌م”.

زیره‌ك كه‌مال دیاركر ژی” راسته‌ هه‌رێما كوردستانێ ب گۆره‌ی دستووری یا د چارچۆڤێ ئیراقێ دا، به‌لێ سه‌ره‌دانا ماكرۆنی بۆ هه‌رێمێ، گرنگیا خوه‌ یا هه‌ی ژ هه‌موو روویه‌كی ڤه‌، له‌وما سه‌ره‌دانه‌كا دیرۆكی بوو نه‌كو سه‌ره‌دانه‌كا ئاسایی بوو، ئه‌و سه‌ره‌دانا ژی دچیته‌ د چارچۆڤێ سه‌ره‌دانێن دیرۆكی و نیشانا ب هێزبوونا قه‌وارێ هه‌رێما كوردستانێ یه‌ و به‌رسڤدانه‌ بۆ وان كه‌سێن ل ده‌مێ تالیبان چوویه‌ دناڤ كابۆل دا، هه‌وه‌ك دژی هه‌رێما كوردستانێ ده‌ستپێكری، كو ئه‌مریكا و هه‌ڤپه‌یمان دێ خوه‌ ژ ئیراقێ ژی ڤه‌كێشن و هه‌رێم و ئیراق دێ كه‌ڤنه‌ د بن مه‌ترسیێ دا، كو وێ چه‌ندێ چو راستی بۆ نه‌بوو”.

شیره‌تكارێ سه‌رۆكێ هه‌رێما كوردستانێ رۆهنكر ژی” ئه‌و سه‌ره‌دانه‌ گه‌له‌ك یا گرنگ بوو بۆ هه‌رێما كوردستانێ و دێ ئه‌نجامێن باش ژی بۆ هه‌رێما كوردستانێ هه‌بن ل سه‌ر ئاستێ نێڤده‌وله‌تی، چونكه‌ هاتنا سه‌رۆكێ فره‌نسا بۆ هه‌رێما كوردستانێ، گرنگیه‌كا تایبه‌تی یا هه‌ی كو ل گه‌ل سه‌ره‌دانا ئیراقێ، سه‌ره‌دنا هه‌رێما كوردستانێ ژی كر”.