ئه‌ڤرۆ نیوز:
وه‌زیرێ به‌ره‌ڤانیا عیراقێ به‌رهه‌ڤیا یه‌كه‌یێن سه‌ربازى بۆ شه‌رێ ئازادكرنا مووسل ل بن ده‌ستێ داعش راگه‌هاند و ئه‌ڤ شه‌ره ب ئێكلاكه‌ر وه‌سفكر.
خالید عوبەیدی، وه‌زیرێ به‌ره‌ڤانیا عیراقێ راگه‌هاند: یه‌كه‌یێن سه‌ربازى بۆ شه‌رێ ئازادكرنا مووسل د به‌رهه‌ڤن و دیسا به‌رهه‌ڤى ل سه‌ر پرچه‌ككرن و مه‌شق و راهێنانێن سه‌ربازى بۆ ئازادكرنا مووسل هاتینه كرن و گۆت: ئه‌ڤ شه‌ره دێ بۆ مه یێ ئێكلاكه‌ر بیت و ئاكنجیێن مووسل پشت راست دكه‌ین كو شه‌ر د زیانا وان دا ب دووماهى ناهێت.
ئه‌ڤرۆ نیوز:
د كه‌فتنه خوارا فروكه‌كێ ل ده‌مێ دادانێ دا، ل ده‌ڤه‌ره‌كا چیایى ل پاكستانێ، شه‌ش كه‌سان گیانێ خوه ژ ده‌ست دا كو د ناڤ قوربانیان دا هه‌ردو بالیوزێن فلیپین و نه‌رویج تێدابوون.
سوپایێ پاكستانێ د به‌یاننامه‌كێ دا به‌لاڤكریه كو وێ فرۆكێ 17 سه‌رنشین تێدابوون، 11 ژ وان بیانى بوون و شه‌ش پاكستانى بوون، و د ناڤ وان كه‌سێن گیانێ خوه ژ ده‌ستداى هه‌ردو بالیوزێن فلیپین و نه‌رویج بوون و دیسا خێزانێن بالیوزێ مالیزى و ئیندونیزى و هه‌ردو فرۆكه‌ڤانان ژى گیانێ خوه ژ ده‌ستدایه.
ئه‌ڤرۆ نيوز:
جوداكرنا ده‌نگێن هه‌لبژارتنێن بريتانيا يا به‌رده‌وامه و ب گۆره‌يى ئه‌نجامێن ده‌سپێكى پارتا پارێزگاران ل پێش پارتا كرێكاران كه‌فتيه.
پشتى ئه‌ڤا بۆرى ل ده‌مژمێر 10:00 هه‌لبژارتنێن په‌رله‌مان و جڤاتێن خۆجهى يێن بريتانيا ب دووماهى هاتين، پرۆسا جوداكرنا ده‌نگان ده‌سپێكر و نوكه نێزيكى ب دووماهى هاتنێ يه، ب گۆره‌يى ئه‌نجامێن ده‌سپێكى، كو 517 كورسى ژ سه‌رجه‌مێ 650 كورسيان هاتينه جوداكرن و تێدا پارتيا پارێزگاران ب سه‌رۆكاتيا دێڤێد كاميرۆن شيايه 227 كورسيان ب ده‌ست ڤه بينيت كو دبيته رێژا 34% يا ده‌نگان و د به‌رامبه‌ر دا، پارتا كرێكاران هه‌ڤركا سه‌ره‌كيا وى، شيايه 207 كورسيان ب ده‌ست خوه ڤه بينيت كو دبيته رێژا 32% يا ده‌نگان.
هه‌كه ئه‌نجام ب ڤى ره‌نگى بن، پارتا پارێزگاران دێ سه‌ركه‌فتنه‌كا مه‌زن تۆمار كه‌ت و شێت ل گه‌ل ئێك ژ پارتيێن بچووك يێن بريتانيا هه‌ڤپه‌يمانيه‌كێ ژ بوو دروستكرنا حوكمه‌تا وى وه‌لاتى دروست بكه‌ن و دێڤێد كاميرۆن دێ وه‌كو سه‌رۆك وه‌زيرێ وى وه‌لاتى مينيت.
ئەڤرۆ نیۆز، قائید میرۆ:
پشتی د خۆنیشاندانا دوھی يا باژێڕێ مھابادێ دا ئالۆزی تێکەفتی و نێزیکی ٢٠ وەلاتیێن کورد ھاتینە بریندارکرن، بڕیارە ئێڤاریا ئەڤرۆ خۆنیشاندان ل پتریا باژێڕێن کوردی بھێنە ئەنجامدان.
مستەفا شێخە، رۆژنامەڤان و نڤیسەرێ رۆژھەلاتێ کوردستانێ بۆ ئەڤرۆ نیۆز گۆت: “ب گورەيی زانیاریێن بۆ مە ھاتین ل رۆژھەلاتێ کوردستانێ، بڕیارە ئیڤاریا ئەڤرۆ ل پتریا باژێڕێن کوردی خۆنیشاندان بۆ پشتەڤانیا خەلکێ مھاباد بھێنە ئەنجامدان”.
شێخە گۆتژی: “ھەتا دەربازبوونا خوه‌نیشاندانێن ئەڤرۆ چو پێشبینی بۆ رەوشا رۆژھەلاتێ کوردستانێ ناھێنەکرن، چونکو دو بۆچوون ھەنە ل رۆژھەلاتێ کوردستانێ، ھندەک وەسا دبینن رەوشا ئیرانێ وەکو خوە بمینيت، چونکو ترس ھەیە وەکو وەلاتێن عەرەبی بەرۆڤاژی رەوش خراپتر ببیت، ھندەک ئەڤێ روودانا دوھیا مھايادێ ب دەلیڤە دزانن بۆ گۆھۆڕینان ل ئیرانێ”.
سێ رۆژان به‌رى نوكه ل ئێك ژ ئۆتێلێن باژێرێ مهاباد ل رۆژهه‌لاتێ كوردستانێ پشتى كو كه‌سه‌كێ پله‌دار ژ هێزێن ئه‌منى يێ سه‌ر ب هێزێن ته‌ناهيێ يێن كۆمارا ئيسلامى ل ئێك ژ ئۆتێلێن وى باژێرى ب ناڤێ “ئۆتێل تارا” بزاڤا ده‌ستدرێژى كريه سه‌ر كچه‌كا گه‌نج يا كورد ب ناڤێ “فه‌ريناز خوسره‌وانى”، كو ئه‌و كچ كارمه‌ند بووه ل وێ ئۆتێلێ و وێ ژى خوه ژ قاتێ چارێ يێ وێ ئۆتێلێ به‌ردايه خوار و گيانێ خوه ژ ده‌ست دايه.
وه‌كو نه‌رازيبوون به‌رامبه‌ر وێ ره‌فتارێ، ئه‌و كارمه‌ندێ سه‌ر ب هێزێن ته‌ناهيێ يێن ئيرانێ، رۆژا پێنجشه‌مبى رێكه‌فتى 7ى گۆلانا 2015ێ ب هزاران وه‌لاتيێن باژێرێ مهابادێ خوه‌نيشادانه‌كا به‌رفره‌هـ سازكر و ل ده‌مێ گه‌هشتنا هێزێن پۆليسێن باژێرى بۆ جهێ روودانێ كو به‌رامبه‌ر وێ ئۆتێلێ بوو يا روودان تێدا روودايى، شه‌ر و پێكدادان د ناڤبه‌را خوه‌نيشانده‌ران و هێزێن پۆليسان روودا.
ب گۆره‌يى ئه‌و پێزانينێن ده‌زگه‌هێن راگه‌هاندنێ به‌لاڤ كرين و د وێنان دا ديار، خوه‌نيشانده‌ران ئاگر به‌ردايه “ئوتێل تارا” شه‌ر و پێكدادان روودايه و هه‌تا نوكه يا به‌رده‌وامه و چه‌ند كه‌سه‌كان گيانێ خوه ژ ده‌ست دايه و هژماره‌ك ژى د بريندارن و د ناڤ وان ژى دا هێزێن پۆليسان ژى يێن هه‌ين.
ئەڤرۆ نیۆز، قائید میرۆ:
شەڤا 6 ل سه‌ر 7ى گۆلانا 2015ێ ل خالا پشکنینێ یا بانی مەقان کو دکەڤیتە د ناڤبەرا پارێزگەھێن کەرکووک و سلێمانیێ دا، ھژمارەکا زۆرا تانکەرێن پتڕۆلێ ھاتنە گرتن.
ژێدەرەکێ بەرپرس ل دەڤەرا چەمچەمال بۆ ئەڤرۆ نیۆز گۆت: “شەڤا بۆری ھژمارەکا زۆرا تانکەرێن پترۆلێ ل زالگەھا بانی مەقان یا قەزا چەمچەمال ھاتنە گرتن، کو ل بەر بوو ئەڤێ پترۆلێ بەرەف ئیرانێ ببەن”.
ژێدەری کو ناڤێ وی یێ پاراستیە ل ئەڤرۆ نیۆز گۆتژی: “ئەف تانکەرێن پتڕۆلێ ژ لایێ نەجمەدین کەریم پارێزگەری کەرکووکێ ھاتینە ھنارتن و ژ لایێ کۆسرەت رەسول جێگرێ سەرۆکێ ھەرێمێ ڤە ھاتینە گرتن، ژ بەر کو ب شێوەیەکێ نەقانوونی بوویە و نوکە تانکەر ل بانی مەقان ھاتینە راگرتن و پەیوەندی ب ئاریشەیێن ناڤا ئێکەتیێ ڤە ھەیە”.
ئه‌ڤرۆ نیوز:
حه‌یده‌ر عه‌بادى سه‌رۆك وه‌زیرێن عیراقێ یێ به‌رهه‌ڤ نینه ڤێ هه‌یڤێ بایێ فروشتنا نه‌فتا كوردستانێ، پارێ حكومه‌تا هه‌رێما كوردستانێ بهنێریت و د ڤى بیاڤى دا ناكوكى كه‌تیه د ناڤبه‌را وه‌زاره‌تا دارایى یا عیراقێ و عه‌بادى دا.
حكومه‌تا عیراقێ یا به‌رهه‌ڤ نینه، ئه‌و نه‌فتا كه‌ركووكێ كو ب رێیا بوریێن هه‌رێما كوردستانێ هاتیه هنارتن، حساب بكه‌ت، دده‌مه‌كێ دا ل گۆر رێككه‌فتنا د ناڤبه‌را هه‌رێم و به‌غدا، دڤێت رۆژانه حكومه‌تا هه‌رێما كوردستانێ رۆژانه 550 هزار به‌رمیلان بهنێریت، كو 250 ب رێیا كێلگه‌هێن هه‌رێمێ و 300 هزار به‌رمیل ژى ب رێیا كێلگه‌هێن كه‌ركووكێ.
ژبه‌ر ڤى ئه‌گه‌رى ژى بۆ هنارتنا پارێ هه‌رێمێ، ناكوكى كه‌تیه د ناڤبه‌را هه‌رێم و وه‌زاره‌تا دارایى یا عیراقێ ل گه‌ل حه‌یده‌ر عه‌بادى، ژبه‌ر كو حكومه‌تا كوردستانێ ل دووڤ وێ نه‌فتا دایه سومو دڤێت حكومه‌تا عیراقێ دا د به‌رامبه‌ر دا 856 ملیون دولار هنارتبان، به‌لێ عه‌بادى یێ به‌رهه‌ڤ نه‌بوویه و 543 ملیون دولار هنارتینه كو حكومه‌تا هه‌رێمێ ژى ڤێ چه‌ندێ ره‌ت دكه‌ت.
هه‌روه‌سا حكومه‌تا عیراقێ و حكومه‌تا هه‌رێمێ ل سه‌ر بهایێ به‌رمیلا نه‌فتێ ژى ناكوكى هه‌یه، حكومه‌تا عیراقێ بهایێ به‌رمیله‌كا نه‌فتێ ب 51 دولاران حساب كریه، دده‌مه‌كێ دا نوكه بهایێ به‌رمیلا نه‌فتێ 65 دولارن و هه‌یڤا چوویى ژى 58 دولار بوون و حكومه‌تا هه‌رێمێ خواستیه به‌رمیل ب 56 دولاران بهێته حسابكرن، به‌لێ هه‌ر عیراقێ ره‌تكریه.
ژێده‌ر:رووداو
ئه‌ڤرۆ نيوز:
ژ ئه‌نجامێ شه‌روپێكدادانێن د ناڤبه‌را خونيشانده‌ران و هێزێن پۆليسان، ل باژێرێ مهابادێ چه‌ند كه‌سه‌ك شه‌هيد و بريندار بوون و هه‌تا نوكه ژى شه‌ر يێ به‌رده‌وامه.
سێ رۆژان به‌رى نوكه ل ئێك ژ ئۆتێلێن باژێرێ مهاباد ل رۆژهه‌لاتێ كوردستانێ پشتى كو كه‌سه‌كێ پله‌دار ژ هێزێن ئه‌منى يێ سه‌ر ب هێزێن ته‌ناهيێ يێن كۆمارا ئيسلامى ل ئێك ژ ئۆتێلێن وى باژێرى ب ناڤێ “ئۆتێل تارا” بزاڤا ده‌ستدرێژى كريه سه‌ر كچه‌كا گه‌نج يا كورد ب ناڤێ “فه‌ريناز خوسره‌وانى”، كو ئه‌و كچ كارمه‌ند بووه ل وێ ئۆتێلێ و وێ ژى خوه ژ قاتێ چارێ يێ وێ ئۆتێلێ به‌ردايه خوار و گيانێ خوه ژ ده‌ست دايه.
وه‌كو نه‌رازيبوون به‌رامبه‌ر وێ ره‌فتارێ، ئه‌و كارمه‌ندێ سه‌ر ب هێزێن ته‌ناهيێ يێن ئيرانێ، ئه‌ڤرۆ رۆژا پێنجشه‌مبى رێكه‌فتى 7ى گۆلانا 2015ێ ب هزاران وه‌لاتيێن باژێرێ مهابادێ خوه‌نيشادانه‌كا به‌رفره‌هـ سازكر و ل ده‌مێ گه‌هشتنا هێزێن پۆليسێن باژێرى بۆ جهێ روودانێ كو به‌رامبه‌ر وێ ئۆتێلێ بوو يا روودان تێدا روودايى، شه‌ر و پێكدادان د ناڤبه‌را خوه‌نيشانده‌ران و هێزێن پۆليسان روودا.
ب گۆره‌يى ئه‌و پێزانينێن ده‌زگه‌هێن راگه‌هاندنێ به‌لاڤ كرين و د وێنان دا ديار، خوه‌نيشانده‌ران ئاگر به‌ردايه “ئوتێل تارا” شه‌ر و پێكدادان روودايه و هه‌تا نوكه يا به‌رده‌وامه و چه‌ند كه‌سه‌كان گيانێ خوه ژ ده‌ست دايه و هژماره‌ك ژى د بريندارن و د ناڤ وان ژى دا هێزێن پۆليسان ژى يێن هه‌ين.
ھەولێر، قائید میرۆ:
وەزارەتا کاروبارێن جڤاكى ئاشکرا کر كو ئه‌و مژوولی رێکەفتنەکێ نه د گەل کۆمارا ئیسلامیا ئیرانێ بۆ ڤەگەڕاندنا وەلاتیێن ئیرانی یێن ل ھەرێما کوردستانێ ب تۆمەتێن جودا ھاتینە حوکمکرن.
محەمەد کانی، پەیڤدارێ وەزارەتا کار و کاروبارێن جڤاكى بۆ ئەڤرۆ نیۆز گۆت” “ئەڤرۆ محەمەد ھاودیانی وەزیرێ كار و كاروبارێن جڤاكى د گەل مورتەزا حسێنی قونسلێ کۆمارا ئیسلامیا ئیرانێ ل ھەرێمێ کۆمبوویە و دانوستان ل دۆر ڤەگەڕاندنا ڤان حوکمكریێن ئیرانێ یێن ل ھەرێمێ ھاتەکرن.
کانی گۆتژی: “ل سالێن بۆری ھژمارەکا وەلاتیێن ئیرانێ ب تۆمەتێن جودا ل ھەرێما کوردستانێ ھاتینە زیندانیکرن و نوکە ھەرێم و ئیران مژوولی رێکەفتنێ نە، بۆ ڤەگەڕاندنا وان کەسێن ئیرانی و دەربازکرنا حوکمێ خوە ل ئیرانێ، بڕیارە بۆ ڤێ مەرەمێ ل رۆژێن داھاتی پشتی رێکێن قانوونی دھێنە بجهـ ئینان، رێکەفتن بھێتە ئیمزاکرن”.
ئه‌ڤرۆ نيوز:
پشتى رابوون مه‌عروف سه‌رۆكێ فراكسيۆنا گۆڕان ل په‌رله‌مانێ كوردستانێ پشتى ده‌ست ژ كاركێشانێ ژ سه‌رۆكاتيكرنا فراكسيۆنا گۆڕان ل په‌رله‌مانێ كوردستانێ پێشكێشك كربوو، ب گۆره‌يى نووچه‌يێ KNNC ئه‌ڤرۆ رۆژا پێنجشه‌مبى رێكه‌فتى 7ى گۆلانا 2015ێ بزاڤا گۆڕان ئه‌و ده‌ست ژ كاركێشان په‌سه‌ند كر.
هه‌ر ب گۆره‌يى وى نووچه‌يى د كۆمبوونا ده‌ست ژ كاركێشانا رابوون مه‌عروف په‌سه‌ند كرى، برزۆ مه‌جيد وه‌كو سه‌رۆك نوو يێ فراكسيۆنا گۆڕان ل جهێ وى ده‌ستنيشانكر.
ئه‌ڤرۆ نيوز:
ب گۆره‌يى چه‌ند پێزانينان داعش ب تۆمه‌تا خيانه‌تكرنێ مه‌لا شوان ل كه‌ركووك ده‌سته‌سه‌ركر و بۆ مووسل ڤه‌گوهاست.
مالپه‌رێ سۆمه‌ريه نيوز ژ ژێده‌ره‌كێ تايبه‌تێ خوه ڤه ل باژێرێ كه‌ركووك ئه‌و چه‌ند زانيه كو ئه‌ڤرۆ رۆژا پێنجشه‌مبى رێكه‌فتى 7ى گۆلانا 2015ێ داعش مه‌لا شوان ب تۆمه‌تا خيانه‌تكرنێ ده‌ستگير كر و ژ كه‌ركووك به‌ر ب باژێر مووسل ڤه‌گوهاست و كه‌سه‌كێ دى ل جهێ وى وه‌كو به‌رپرسێ دادگه‌ها شه‌رعى ل حه‌وێجه دانا.
ئه‌وى ژێده‌رى ئه‌و چه‌نده ژى راگه‌هانديه كو داعش دڤێت چو كورد د سه‌ركرداتيا رێكخراوێ دا نه‌مينن، ژبلى كوردان ناخوازن ڤى ئه‌ركى ب عيراقيان ژى بده‌ن و به‌رده‌وامێ بزاڤێ دكه‌ن ڤان پۆستان ب كه‌سانێن بيانى بده‌ن.
نيشاندان