ئه‌ڤرۆ:

ئه‌نجوومه‌نێ نشتیمانی یێ كوردی ل سووریێ به‌ری دو رۆژان ل باژێرێ قامشلۆ كۆمبوو و پشتی كۆمبوونێ ژی راگه‌هاند كو ره‌وشا نها ل عه‌فرینێ و سه‌رێ كانیێ ب چو ره‌نگه‌كێ ناهێته‌ قه‌بوولكرن و دڤێت ئۆپۆزسیۆنا سووریێ و گرۆپێن سه‌ر ب توركیا رێزێ ل مافێن كوردان بگرن و بنپێكرنێن ل هه‌مبه‌ر كوردان بده‌نه‌ راگرتن ژ به‌ر هندێ ژی داخواز ژ ئۆپۆزسیۆنا سووریێ كر كو ل گۆر رێككه‌فتنا به‌ری نها یا د ناڤبه‌را هه‌ر دو ئالیان دا كار بكه‌ت و ئێرشێن ل دژی كوردان ل وان ده‌ڤه‌ران بده‌ته‌ راگرتن.

ئه‌نجوومه‌نێ نشتیمانی یێ كوردی ل سووریێ هه‌روه‌سا دیار دكه‌ت كو دڤێت د ئاستێ نێڤده‌وله‌تی دا كار بۆ چاره‌سه‌ركرنا قه‌یرانا نها ل سووریێ بهێته‌ كرن، ژ به‌ر هندێ ژی دڤێت هێزێن جیهانی رژێما به‌شاری نه‌چار بكه‌ن كو ده‌ستان ژ زۆرداریا نها به‌رده‌ت و رێزێ ل داخوازیێن هه‌موو گه‌لێن سووریێ بگریت، چونكو بۆ هه‌ر كه‌سه‌كێ ئاشكرایه‌ كو هه‌تا هه‌لوه‌ستێ رژێما به‌شاری وه‌كو نها بیت قه‌یرانا ل سووریێ ژی ناهێته‌ چاره‌سه‌ركرن.

د دووماهیا داخۆیانیا خوه‌ دا ئه‌نجوومه‌نێ نشتیمانی یێ سووریێ دیار دكه‌ت كو دانوستاندنێن وان ل گه‌ل په‌یه‌دێ هاتینه‌ راگرتن، چونكو په‌یه‌دێ پێگیریێ ب رێككه‌فتنێن به‌ری نها نه‌كرینه‌ و رێزێ ل داخوازیێن پارتێن كوردی ل رۆژئاڤایێ كوردستانێ ناگریت و جاره‌كا دی وه‌كو سالێن بۆری ده‌ست ب گرتنا ئه‌ندامێن وان كرینه‌ و ژ به‌ر هندێ ژی نها وان دانوستاندنێن ل گه‌ل په‌یه‌دێ و ته‌ڤده‌مێ داینه‌ راگرتن و هه‌كه‌ په‌یه‌ده‌ ده‌ستان ژ هه‌لوه‌ستێ خوه‌ یێ خراب به‌رده‌ت ئه‌و به‌رهه‌ڤن جاره‌كا دی ل گه‌ل په‌یه‌دێ و ته‌ڤده‌مێ ده‌ست ب دانوستاندنان بكه‌ن، چونكو هه‌تا كورد ل رۆژئاڤایێ كوردستانێ ئێكه‌تیا خوه‌ ئاڤا نه‌كه‌ن پرسێن هه‌ی ژی ناهێنه‌ چاره‌سه‌ركرن.

چاڤدێرێن سیاسی یێن رۆژئاڤایێ كوردستانێ هه‌لوه‌ستێ ئه‌نجوومه‌نێ نشتیمانی یێ كوردی گه‌له‌ك گرنگ دبینن و داخواز ژ په‌یه‌دێ و ته‌ڤده‌مێ ژی دكه‌ن كو ده‌ست ب قۆناغه‌كا نوو بكه‌ن و سیاسه‌تا خوه‌ ل هه‌مبه‌ر ئه‌نجوومه‌نێ نشتیمانی یێ كوردی ب گوهۆرن، چونكو سیاسه‌تا نها یا په‌یه‌دێ ئاسته‌نگیێن گه‌له‌ك مه‌زن ل هه‌مبه‌ر ئێكه‌تیا كوردان دروست دكه‌ت و كوردێن رۆژئاڤایێ كوردستانێ ژ سیاسه‌تا نها یا په‌یه‌دێ د رازی نینن، ژ به‌ر هندێ ژی دڤێت په‌یه‌ده‌ رێزێ ل هه‌موو پارت و ئالیێن سیاسی یێن رۆژئاڤایێ كوردستانێ بگریت و چو ئاسته‌نگیان ل هه‌مبه‌ر كار و چالاكیێن وان ل رۆژئاڤایێ كوردستانێ دروست نه‌كه‌ت.

ئه‌ڤرۆ:

سه‌رۆك بارزانی د دیداره‌كێ دا ل گه‌ل (فالح فه‌یاز) سه‌رۆكێ ده‌سته‌یا حه‌شدا شه‌عبی ره‌وشا ئیراقێ و ده‌ڤه‌رێ و دووماهی پێشهاتێن ئه‌منی هاتنه‌ به‌حسكرن.

هه‌ر د وێ دیدارێ دا دانوستاندن ل سه‌ر ره‌وشا سیاسی یا ئیراقێ و ده‌ڤه‌رێ و دووماهی پێشهاتێن ئه‌منی و هه‌روه‌سا گه‌ف و لڤینێن تیرۆرستێن داعشێ ژی هاتنه‌ كرن.

د دیدارا سه‌رۆك بارزانی و سه‌رۆكێ ده‌سته‌یا حه‌شدا شه‌عبی و ل پێناڤی پاراستنا ته‌ناهیێ و سه‌قامگیریێ، دووپاتی ل هه‌ماهه‌نگیێ د ناڤبه‌را هێزێن پێشمه‌رگێ كوردستانێ و هێزێن ئیراقێ هاته‌ كرن.

ئه‌ڤرۆ:

به‌ربژارێ هژمار 30 یێ پارتی دیموكراتی كوردستان ل بازنێ ئێك یێ كه‌ركووكێ بۆ هه‌لبژارتنێن جڤاتا نوونه‌رێن ئیراقێ، شاخه‌وان عه‌بدوللا،  ئاشكراكر، ل ناڤ كه‌ركووكێ دێ ده‌ست ب هه‌وا هه‌لبژارتنان كه‌ین و دێ ل ناڤ خه‌لكێ خوه‌ بین، بۆ وێ مه‌ره‌مێ ژی، وه‌كو ده‌ستپێك دێ دو باره‌گایان ل ناڤ كه‌ركووكێ ڤه‌كه‌ین.

شاخه‌وان عه‌بدوللا زێده‌تر گۆت” ئه‌ز وه‌كو به‌ربژارێ پارتی دیموكراتی كوردستانێ دێ زڤرم بۆ كه‌ركووكَ و ل وێرێ دێ ده‌ست ب هه‌وا هه‌لبژارتنان كه‌م و د نوكه‌ دا یێ به‌رهه‌ڤیان بۆ زڤرینا خوه‌ دكه‌م و ل ده‌ستپێكێ بۆ هه‌وا هه‌لبژارتنان ل ناڤ كه‌ركووكێ دێ دو باره‌گایان ڤه‌كه‌ین و دێ مه‌ باره‌گا ل ده‌رڤه‌ی باژێرێ كه‌ركووكێ ژی هه‌بیت بۆ وێ چه‌ندێ ل وێرێ ژی ده‌ست ب هه‌وا هه‌لبژارتنان بكه‌ین”.

وی به‌ربژارێ پارتی به‌حس ل وێ ئێكێ ژی كر” زڤرینا مه‌ ل سه‌ر داخوازا سه‌ركردایه‌تیا پارتی دیموكراتی كوردستانه‌ و جارێ ئه‌م دێ زڤرین و حزب ژی یا د دانوستاندنان داب ۆ زڤرینێ، به‌لێ هه‌لبژارتن یێن نێزیك بووین، له‌وما ل ده‌ستپێكێ ئه‌م دێ زڤرین”.

گۆت ژی” ئه‌و باره‌گایێن دێ هێنه‌ ڤه‌كرن بۆ به‌ربژار و كادر و ئه‌ندامێن پارتی یه‌ و ئه‌م دخوازین ل كه‌ركووكێ هه‌وا هه‌لبژارتنان ئه‌نجام بده‌ین و ل ناڤ خه‌لكێ خوه‌ بین و ل ده‌مه‌كێ گه‌له‌ك نێزیك ژی دا دێ ده‌ست ب زڤرینێ كه‌ین”.

ئه‌ڤرۆ، سه‌رجان مه‌حمود:

سه‌رۆكێ پارتا كۆماریا گه‌ل یا توركیا ل باژێرێ وانێ یێ باكورێ كوردستانێ د كۆمبوونه‌كا جه‌ماوه‌ری دا راگه‌هاند كو ده‌ستهه‌لاتا نها نه‌شێت چو پرسێن توركیا چاره‌سه‌ر بكه‌ت، ئه‌ردۆگانی دڤێت ب زۆرێ ده‌ستهه‌لاتا باژێرڤانیان ژ كوردان وه‌ربگریت، پارتا كۆماریا گه‌ل دشێت پرسا كوردی و هه‌موو پرسێن دی یێن توركیا چاره‌سه‌ر بكه‌ت.

كه‌مال كلچدار ئوگلۆ سه‌رۆكێ گشتی یێ پارتا كۆماریا گه‌ل (جه‌هه‌پێ) ل باژێرێ وان یێ باكورێ كوردستانێ كۆمبوونه‌كا به‌رفره‌ه ل گه‌ل به‌رپرس و ئه‌ندامێن سازیێن جڤاكێ سڤیل سازكر و راگه‌هاند كو حوكمه‌تا ئه‌ردۆگانی دخوازیت ب دارێ زۆرێ ده‌ستهه‌لاتا باژێرڤانیێن د ده‌ستێ كوردان و ئۆپۆزسیۆنێ دا داگیر بكه‌ت و گۆت: (مخابن ده‌ستهه‌لات ب هێزا ده‌وله‌تێ هه‌ول دده‌ت هه‌موو بنه‌مایێن دیموكراسیێ ژناڤ ببه‌ت و باژێرێن كو ب هه‌لبژارتنێ نه‌شیا ب ده‌ست بخینیت ب رێیا قه‌یومان كۆنترۆل دكه‌ت و ئه‌و یه‌ك بێرێزیه‌ و زۆرداریه‌ ل هه‌مبه‌ر ئیرادا وه‌لاتیان و كارێن وه‌سا خزمه‌تا پارچه‌كرنا وه‌لات دكه‌ت و من به‌ری نها گه‌له‌ك جاران گۆتیه‌ و ئه‌ز دیسان دبێژم كو  ئه‌م ب چو ره‌نگه‌كێ سیاسه‌تا قه‌یوم یا ده‌ستهه‌لاتا ئه‌ردۆگانی قه‌بوول ناكه‌ین).

كلچدار ئوگلۆ هه‌روه‌سا راگه‌هاند كو ئه‌ڤرۆ سه‌لاحه‌دین ده‌میرتاش هه‌ڤسه‌رۆكێ به‌رێ یێ پارتا دیموكراتی یا گه‌لان و په‌رله‌مانتار و سه‌رۆكێن باژێرڤانیێن هه‌لبژارتی د زیندانان دانه‌ و ده‌ستهه‌لات قه‌بوول ناكه‌ت چو كه‌س و ئالیه‌كێ ئۆپۆزسیۆنێ‌ د مه‌یدانا سیاسی یا توركیا دا بمینیت و وان دڤێت هه‌موو توركیا سه‌رێ خوه‌ ل هه‌مبه‌ر وان بچه‌مینن و گۆت: (د توركیا نها دا ئازادیا راده‌ربرینێ نه‌مایه‌، دادوه‌ری و دیموكراسی نه‌مایه‌ و ده‌ستهه‌لاتا ئه‌ردۆگانی رۆژ ب رۆژێ توركیا به‌ر ب سه‌رده‌مێ سه‌دسالا ناڤین ڤه‌ دبه‌ت و ب سه‌دان كه‌سێن ئه‌كادیمی، ره‌وشه‌نبیر، سیاسه‌تمه‌دار و رۆژنامه‌ڤان د زیندانێن توركیا دانه‌ و ل به‌ر ده‌ستێ ده‌ستهه‌لاتا ئاكپارتیێ پارتا بزاڤا نه‌ته‌وه‌په‌رست دا ب تنێ دۆسیایێن گرتن و قه‌ده‌غه‌ كرن و نه‌خشێ زۆرداریێ هه‌یه‌ و نه‌شێت هه‌تا نها به‌رسڤا سه‌ده‌مێ گرتنا ده‌میرتاشی و ب سه‌دان ره‌وشه‌نبیر و كه‌سێن ئه‌كادیمی بده‌ت و چو به‌رسڤه‌كا ده‌ستهه‌لاتێ ل سه‌ر ره‌وشا خراب یا ئابووریێ و سیاسه‌تا ده‌رڤه‌ دا نینه‌ و تنێ پرسێن هه‌ی ئالۆزتر دكه‌ن و چو هێڤیه‌ك ئێدی نه‌مایه‌ و بۆ هه‌ر وه‌لاتیه‌كێ ل توركیا ئاشكرا بوویه‌ كو ده‌ستهه‌لاتا نها نه‌شێت چو پرسان چاره‌سه‌ر بكه‌ت و وان دڤێت ب ئالۆزتركرنا ره‌وشا نها ژیێ ده‌ستهه‌لاتا خوه‌ درێژ بكه‌ن).

سه‌رۆكێ گشتی یێ پارتا كۆماریا گه‌ل د پشكه‌كا دی یا ئاخڤتنا خوه‌ دا ژی راگه‌هاند كو پرسا كوردی پرسه‌كا گه‌له‌ك گرنگ یا توركیا یه‌ و دڤێت ب رێیا دیموكراسیێ بهێته‌ چاره‌سه‌ركرن و د هه‌ر واری دا خزمه‌تگوزاریێن مه‌زن ل باژێرێن باشور و رۆژهه‌لاتێ توركیا بهێنه‌ كرن و گۆت: (باوه‌ر بكه‌ن به‌رنامه‌كا راست و دروست بۆ چاره‌سه‌ر‌كرنا پرسا كوردی ل به‌ر ده‌ستێ من دا هه‌یه‌ و ب رژدی ڤه‌ دبێژم ئه‌ز دێ پرسا كوردی چاره‌سه‌ر‌ كه‌م، دڤێت هه‌ر ئالیه‌ك بزانیت پێدڤیا باژێرێن وان، روحا و باژێرێن دی یێن هه‌رێمێ ب پرۆژێن مه‌زن یێن ئابووری و په‌یداكرنا ده‌لیڤێن كاری هه‌یه‌ و هه‌كه‌ هوون هاریكاریا من بكه‌ن، ئه‌م دشێین پێكڤه‌ ده‌ست ب قۆناغه‌كا نوو ل توركیا بكه‌ین، بێگومان ب هاریكاریا هه‌وه‌ ئه‌ز دشێم پرسا كوردی و هه‌موو پرسێن دی یێن توركیا چاره‌سه‌ر بكه‌م، چونكو هه‌تا پرسا كوردی و پرسا ئابووریێ ل توركیا نه‌هێنه‌ چاره‌سه‌ركرن دێ ره‌وشا وه‌لاتێ مه‌ هه‌ر یا ئالۆز بیت).

ئه‌ڤرۆ:

چه‌ندین ساله‌ ماده‌كێ دستووری د ناڤ دستوورێ ئیراقێ دا بۆ ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ بۆ هاتیه‌ جهگیركرن ئه‌وژی مادێ 140 ب مه‌ره‌ما ئێكلاكرنا هه‌موو كێشێن وان ده‌ڤه‌رانه‌، به‌لێ هه‌تا نوكه‌ حوكمه‌تێن ئیراقێ، كار بۆ بجهئینانا وێ مادێ نه‌كریه‌ و پشتگوه خستیه‌، ژلایێ خوه‌ڤه‌ شیره‌تكارێ مه‌كته‌با سیاسی یا پارتی به‌حسێ بزاڤێن چاره‌سه‌ركرنا ره‌وشا وان ده‌ڤه‌رێن كوردستانی یێن داگیركری دكه‌ت.

عارف رشدی، شیره‌تكارێ مه‌كته‌با سیاسی یا پارتی دیموكراتی كوردستان دبێژیت” بزاڤه‌ك یا هه‌ی بۆ ئاساییكرنا ره‌وشا وان ده‌ڤه‌رێن كو داعش رۆژانه‌ هێرشان ل سه‌ر دكه‌ت، ب تایبه‌ت ده‌ڤه‌رێن سنوورێ مادێ 140، ئه‌ڤه‌ ژی بۆ وێ چه‌ندێ هه‌ماهه‌نگیه‌ك د ناڤبه‌را هێزا پێشمه‌رگه‌ی و له‌شكرێ ئیراقێ دا بهێته‌ دروستكرن بۆ پركرنا ڤالاهیان و بزاڤێ كه‌ن روو ب روویێ هێرشێن داعشێ ببن و هه‌موو ئه‌و ده‌ڤه‌رێن ل سنوورێ مادێ 140، به‌ری هه‌لبژارتنان بهێنه‌ ئارامكرن، ل دۆر وێ چه‌ندێ ژی به‌رده‌وام ل گه‌ل به‌غدا ل سه‌ر هێلین”.

گۆت ژی” ئه‌مریكا و ئیراق و ئاكنجیێن وان ده‌ڤه‌ران ژی، پشت راست بوون ژ وێ چه‌ندێ كو بێ هێزا پێشمه‌رگه‌ی ئه‌و ده‌ڤه‌ره‌ ناهێنه‌ ئارامكرن و دیاربوویه‌ ژی كو پێشمه‌رگه‌ سه‌نگێ خوه‌ یێ هه‌ی بۆ ئارامیا وان ده‌ڤه‌ران”.

ل دۆر كار و ئارمانجا پارتی پشتی هه‌لبژارتنان ل به‌غدا، شیره‌تكارێ مه‌كته‌با سیاسی یا پارتی گۆت” بۆ دانانا سه‌نگه‌رێ كوردایه‌تیێ ل به‌غدا و بۆ وێ چه‌ندێ ده‌ستدرێژی ل سه‌ر مافێن گه‌لێ كوردستانێ نه‌هێنه‌ كرن، وه‌كو پارتی د به‌رهه‌ڤین بۆ دانوستاندنێ ل گه‌ل لایه‌نێن سیاسی و ده‌ستپێشخه‌ریێن نووی ێن گرێدای ب ئێكرێزیا كوردان ل به‌غدا”.

هه‌ر د وێ به‌یاننامێ دا هاتیه‌ ژی كو وه‌زیرێ سامانێن سروشتی ل هه‌رێما كوردستانێ، كه‌مال حه‌مید ئه‌ترووشی، راگه‌هاند كو دخوازن هاریكاریا هه‌ڤپشك ل گه‌ل وه‌زاره‌تا په‌ترۆلا ئیراقێ ب هێزتر ببیت بۆ وێ چه‌ندێ ببیته‌ ده‌رگه‌هه‌ك بۆ ئاسۆیه‌كێ نوو د په‌یوه‌ندیێن د ناڤبه‌را هه‌ردولا دا.

دیاركر ژی كو د چارچۆڤێ دیدارا خوه‌ دا ل گه‌ل وه‌زیرێ په‌ترۆلا ئیراقێ، ئه‌و بۆ دیاربوو كو به‌رهه‌ڤیه‌كا باش یا هه‌ی بۆ چاره‌سه‌ركرنا كێشێن هه‌لاویستی د ناڤبه‌را حوكمه‌تا فیدرالی و حوكمه‌تا هه‌رێما كوردستانێ دا و هه‌روه‌سا بجهئینانا رێككه‌فتنێن نوو كو د تایبه‌تن ب هاریكاریێ بۆ پێشخستنا پیشه‌سازیا په‌ترۆل و غازێ و پشته‌ڤانیكرن ل ئابوورێ نیشتمانی و گه‌شه‌پێدانا به‌رده‌وام.

ئه‌ڤرۆ:

به‌رپرسا پشكا په‌رله‌مان و حوكمه‌تا هه‌رێمێ ل باره‌گایێ بارزانی، د چارچۆڤێ وێبینارێن هه‌تیانه‌ یێن لقێ 6 یێ پارتی به‌حسێ  رۆلێ سه‌رۆك بارزانی دپرسا لێك نێزیككرنا لایه‌نێن كوردی ل رۆژئاڤایێ كوردستانێ و پرۆسا ئاشتیێ ل توركیا و پرۆسا ریفراندۆمێ ل هه‌رێما كوردستانێ كر.

ئامینا زكری،  به‌رپرسا پشكا په‌رله‌مان و حوكمه‌تا هه‌رێمێ ل باره‌گایێ بارزانی د بابه‌تێ خوه‌ دا ل وێبینارێ رۆناهی خسته‌ سه‌ر رۆلێ سه‌رۆك مه‌سعود بارزانی د لێك نێزیككرنا لایه‌نێن كوردێن رۆژئاڤا و ئیمزاكرنا رێككه‌فتنا هه‌ولێرێ یا ئێك و دو و رێككه‌فتنا دهۆكێ بۆ وێ چه‌ندێ ئه‌و واقعێ ل رۆژئاڤا دروست بووی ببیته‌ بنه‌مایه‌كێ باش بۆ ده‌ستكه‌فتێن مه‌زنتر ل پاشه‌رۆژێ و مافێن گه‌لێ كورد ل رۆژئاڤا بهێنه‌ بده‌ستڤه‌ئینان، ژلایه‌كێ دی ڤه‌ بریارا سه‌رۆك بارزانی ب هنارتنا هێزا پێشمه‌رگه‌ی بۆ رۆژئاڤا ده‌مێ پتریا كۆبانی كه‌فتیه‌ د ده‌ستێ تیرۆرستێن داعشێ داب ۆ شكاندنا وێ گرۆپا تیرۆرست و ئازادكرنا كۆبانی، هه‌ڤده‌م ئاماژه‌ ب رۆلێ مه‌زن یێ سه‌رۆك بارزانی دا بۆ ده‌ستپێكرنا پرۆسا ئاشتیێ ل توركیا و كۆمكرنا لایه‌نێن كوردی ل باكوور بۆ وێ چه‌ندێ ب رێیا دانوستاندنان ل گه‌ل حوكمه‌تا توركیا مافێن گه‌لێ كورد بهێنه‌ گه‌ره‌نتیكرن.

ئامینا زكری گۆت ژی” سه‌رۆك بارزانی د هه‌موو دیدارێن خوه‌ دا ل گه‌ل لایه‌نێن سیاسی یێن كوردستانی ئه‌و داخوازیه‌ ژێكریه‌ كو د ئێكده‌نگ و د ئێك هه‌لویست بن ل سه‌ر پرسا ریفراندۆمێ و سه‌ربخوه‌یا كوردستانێ، هه‌روه‌سا هه‌موو جوداهیان بێخنه‌ لایه‌كی بۆ وێ چه‌ندێ مفای ژ وێ ده‌لیڤا دیرۆكی وه‌ربگرین و سه‌ربخوه‌یێ بۆ كوردستانێ بده‌ستڤه‌بینین، هه‌كه‌ ئه‌م هه‌موو پێكڤه‌ بین و د ئێك ده‌نگ و د ئێك هه‌لویست بین، دێ شێین پشته‌ڤانیا نێڤده‌وله‌تی بۆ سه‌ربخوه‌یا كوردستانێ بده‌ستڤه‌بینین”.

خویاكر” ل سالا 2014، سه‌رۆك مه‌سعود بارزانی داخواز ژ په‌رله‌مانێ كوردستانێ كر كو قانوونا كۆمسیۆنا سه‌ربخوه‌ یا هه‌لبژارتنان و راپرسیێ ل كوردستانێ ده‌رباز بكه‌ت و رۆژه‌كێ ده‌ستنیشان بكه‌ت بۆ ئه‌نجامدانا ریفراندۆما سه‌ربخوه‌یێ” گۆت ژی” ل سالا 2015 بۆ جارا ئێكێ بوو پرسا سه‌ربخوه‌یا كوردستانێ ژلایێ سه‌رۆك بارزانی ڤه‌ ل گه‌ل سه‌ركردێن وه‌لاتێن جیهانێ و سه‌رۆك وه‌زیرێن ئیراقێ بهێته‌ به‌حسكرن، ده‌مێ ل كۆنگرێ مینشن یێ ئاسایشی ل ئه‌لمانیا، سه‌رۆك بارزانی ب راشكاوانه‌ ب حه‌یده‌ر عه‌بادی سه‌رۆك وه‌زیرێن ئیراقێ یێ وی ده‌می راگه‌هاندی، پێدڤیه‌ ب ته‌وافوقێ و دانوستاندنێ بابه‌تێ سه‌ربخوه‌یا كوردستانێ ئێكلا بكه‌ین و دشایندایه‌ دو جیرانێن باش بین ل گه‌ل هه‌ڤدو”.

ئامینایێ پتر رۆهنكر” ریفراندۆم ب رێككه‌فتنا هه‌موو لایه‌نێن سیاسی یێن كوردستانێ هاته‌ ئه‌نجامدان و هیچ بریاره‌كا ئێكلایه‌نه‌ ل سه‌ر وێ پرسێ ژلایێ سه‌رۆك بارزانی نه‌هاتیه‌ دان، به‌لكو هه‌ر بریاره‌ك ل سه‌ر ریفراندۆمێ ب رازیبوونا نوونه‌رێن هه‌موو پارت و لایه‌نێن كوردستانێ هاتیه‌ دان و ل 2017 رێژا 93% ژ خه‌لكێ كوردستانێ ده‌نگ ب به‌لێ بۆ سه‌ربخوه‌یا كوردستانێ دا و هیچ كه‌س و لایه‌نه‌ك نه‌شێت ئه‌ندامێ ریفراندۆمێ بگوهۆریت”.

ئامینایێ ئاماژه‌ دا كو سه‌رۆك بارزانی به‌رده‌وام دووپاتی ل سه‌ر وێ چه‌ندێ كریه‌ كون ابیت چاڤه‌رێی وێ چه‌ندێ ببین وه‌لاتێن جیهانێ سه‌ربخوه‌یێ ب دیارێ پێشكێشی مه‌ بكه‌ن، به‌لكو پێدڤیه‌ ئه‌م ب خوه‌ د ئێك ده‌نگ و د ئێك هه‌لویست بین و خه‌باتێ بۆ سه‌ربخوه‌یا كوردستانێ بكه‌ین.