ئه‌ڤرۆ، هۆشه‌نگ تاجر:
دوهی ل باژێرێ ئامه‌دێ هێزێن ئێمناهیێ یێ توركیا ده‌ست ب ئۆپه‌راسیۆنه‌كێ كرن و د ئه‌نجام دا نێزیكی بیست كه‌سان هاتنه ده‌سته‌سه‌ر كرن كو ئێك ژ وان ژی بایرام بۆزیه‌ل جێگرێ سه‌رۆكێ گشتی یێ پارتا سوسیالیست یا كوردستانێ یه.
مه‌سعود ته‌ك سه‌رۆكێ گشتی یێ پارتا سوسیالیست یا كوردستان ل باكور راگه‌هاند كو دوهی سه‌رێ سپێدێ هێزێن ئێمناهیێ یێن توركیا ل باژێرێ ئامه‌دێ ده‌ست ب ئۆپه‌راسیۆنه‌كێ كرینه كو گه‌له‌ك سیاسه‌تمه‌دارێن كورد هاتنه ده‌سته‌سه‌ر كرن و گۆت: (بایرام بۆزیه‌ل جێگرێ سه‌رۆكێ گشتی یێ پارتا مه ژی د ناڤ وان كه‌سان دایه كو دوهی هاتنه ده‌سته‌سه‌ركرن، بێگومان نێزیكی بیست كه‌سان هاتینه ده‌سته‌سه‌ركرن كو هنده‌ك ژ به‌رپرس و رێڤه‌به‌رێن هه‌ده‌پێ ژی د ناڤ وان كه‌سان دانه).
مه‌هدی ئاتا پارێزه‌رێ كورد ژی بۆ ئه‌ڤرۆ دیار كر كو هێزێن ئێمناهیێ ب به‌هانا ئالیگرێن تیرۆرێ دوهی ده‌ست ب ئۆپه‌راسیۆنه‌كێ ل باژێرێ ئامه‌دێ كرینه كو ١٩ كه‌س هاتینه ده‌سته‌سه‌ركرن كو ئێك ژ وان ژی به‌رێز بایرام بۆزیه‌ل جێگرێ سه‌رۆكێ گشتی یێ پارتا سوسیالیست یا كوردستانێ یه و هێزێن ئێمناهیێ دیار كرینه كو ئۆپه‌راسیۆن ب فه‌رمانا داده‌وه‌رێ گشتی ده‌ستپێكریه و هه‌تا ٢٤ ده‌مژمێران ژی ناهێلن پارێزه‌ر سه‌ره‌دانا گرتیان بكه‌ن و بێگومان ره‌وشه‌ك خراب هاتیه پێش و گۆت: (ئه‌م ژ نێزیكڤه دووڤچوونا ره‌وشا نها دكه‌ین و مه دڤێت بزانین كا تومه‌تێن ل سه‌ر به‌رێز بایرام بۆزیه‌لی چنه و بۆچی هاتیه گرتن، چونكو هه‌تا نها ب فه‌رمی چو تشته‌ك نه‌هاتیه گۆتن و دڤێت بزانین كا دێ ئه‌ڤرۆكه چ بۆ مه هێته گۆتن).
ئه‌و یه‌ك د ده‌مه‌كێ دایه كو دو رۆژان به‌ری نها سه‌رۆك كۆمارێ توركیا ره‌جه‌ب ته‌یب ئه‌ردۆغان راگه‌هاند كو وان شیاینه د ناڤ ئاخا توركیا دا په‌كه‌كێ گه‌له‌ك لاواز بكه‌ن و نها په‌كه‌كه د ناڤ ئاخا توركیا دا نه‌شێت چو چالاكیان بكه‌ت، لێ هه‌ده‌په وه‌كو لقێ سیاسی یێ په‌كه‌كێ ئاریشان بۆ توركیا دروست دكه‌ت و گۆت: (مه ده‌ست ب قۆناغه‌كا نوو كریه و مه دڤێت توركیا ژ به‌لایا هه‌ده‌پێ ژی ب ته‌مامی قورتال بكه‌ین و نها ده‌ست ب كاره‌كێ باش دهێته كرن، چونكو هه‌ده‌په ژی وه‌كو په‌كه‌كێ بوویه به‌لا و دڤێت ئه‌م توركیا ژ ده‌ستێ وان گرۆپان قورتال بكه‌ین).
چاڤدێرێن سیاسی ل توركیا دیار دكه‌ن كو ئه‌ردۆغانی دڤێت به‌ری هه‌لبژارتنان دو تشتان بكه‌ت دا بشێت جاره‌كا دی سه‌رنجا رایا گشتی یا توركیا بۆ خوه راكێشیت، ئه‌ردۆغانی دڤێت ب داخستنا هه‌ده‌پێ و ده‌ستپێكرنا ئۆپه‌راسیۆنه‌كا نوو ل دژی رۆژئاڤایێ كوردستانێ جاره‌كا دی ده‌نگێ نه‌ته‌وه‌په‌رستان بۆ خوه كۆم بكه‌ت، چونكو نها ره‌وشا ناڤخوه‌یی یا توركیا گه‌له‌ك خرابه و رێژا ده‌نگێن ئاكپارتیێ گه‌له‌ك كێم بووینه، ئه‌ردۆغان هه‌ست ب مه‌ترسیه‌كا مه‌زن ل سه‌ر پاشه‌رۆژا خوه و پارتا خوه كریه و نها دڤێت ب رێیا شه‌ره‌كێ نوو جاره‌كا دی رێژا ده‌نگێن خوه زێده بكه‌ت، ژ به‌ر هندێ ژی دهێته چاڤه‌رێكرن كو د چه‌ند رۆژێن داهاتی دا رێژه‌كا زێده‌تر ژ به‌رپرسێن هه‌ده‌پێ و سیاسه‌تمه‌دارێن كورد بهێنه ده‌سته‌سه‌ركرن.
ل گۆر باوه‌ریا چاڤدێرێن سیاسی سه‌ره‌رای دژبه‌ریا هه‌ر ئێك ژ رۆسیا و ئه‌مریكا بۆ ده‌ستپێكرنا ئۆپه‌راسیۆنه‌كێ ل رۆژئاڤایێ كوردستانێ لێ توركیا به‌رهه‌ڤیان دكه‌ت دا ئێرشی رۆژئاڤایێ كوردستانێ بكه‌ت و هه‌كه تشته‌ك وه‌سا روو بده‌ت دێ كاره‌ساتێن گه‌له‌ك مه‌زن روو ده‌ن، لێ دوهی جاره‌كا دی ئه‌مریكا راگه‌هاند دڤێت هه‌موو ئالی پێگیریێ ب ئاگربه‌ستێ بكه‌ن و ئه‌و ل دژی هندێ نه توركیا ده‌ست ب ئۆپه‌راسیۆنه‌كا نوو ل دژی كوردان ل سووریێ بكه‌ت.
نيشاندان