ئه‌ڤرۆ:
بڕیارە ئەڤرۆ پەرلەمانێ کوردستانێ کۆمبوونەکێ ئەنجام بدەت و تێدا، دەنگدانێ ل سەر ئەندامێن کۆمسیۆنا سەربخوەیا ھەلبژاتنێن ھەرێما کوردستانێ بھێتەدان، سەرۆکێ فڕاکسیۆنا بەرەیا تورکومانی ژی دبێژیت، ھەکە داخوازیێن مە بۆ زێدەکرنا دو ئەندامان ژ پێکھاتێن تورکومان و مەسیحی نەھێنە کلان، ئەڤە ھەتا دووماھیا ڤێ خۆلا پەرلەمانی دێ بایکۆتا کۆمبوونان کەین، ھەروەسا دیارکر، ئەڤ دو ئەندامێن بۆمە ھاتینە دانان نوونەرێن پارتی و ئێکەتینە و نوونەرێن پێکھاتێن خوە نینن.
نازم ھەرکی، جێگرێ سەرۆکێ لیژنەیا نافخوەیا پەرلەمانێ کوردستانێ بۆ رۆژناما ئەڤرۆ دیارکر، بڕیارە ئەڤرۆ کۆمبوونا پەرلەمانی بھێتە گرێدان و گۆت” گۆرەی بەرنامێ کاری، دێ دەنگ ل سەر ئەندامێن کۆمسیۆنا سەربخوەیا ھەلبژارتنێن ھەرێما کوردستانێ ھێتەدان، ھژمارا وان ئەندامێن دەنگ ل سەر دھێتەدان ٩ ئەندامن و گۆرەی قانوونا پەرلەمانی دانانا ئەندامێن ئەنجوومەنێ کۆمسیۆنێ ژ ٩٠ رۆژان نەبۆریت، ئەڤ نەە ئەندام ب ڤی شێوەی ھاتینە دابەشکرن، ژوانا پارتی و ئێکەتی ھەر ئێکی سێ ئەندام و گۆران ژی، دو ئەندامێن دی بۆ ئێکگرتوویا ئیسلامی و کۆمەلا ئیسلامی ھاتینە دیارکرن، بەلێ پارتی و ئێکەتی ھەر ئێک دێ ئەندامەکێ بەھرا خوە دەتە پێکھاتەیا مەسیحی و ئێک بۆ تورکومانا، ئەڤەژی ژ ئەنجامێ رێککەفتنێ بوویە د ناڤبەرا لایەنێن سیاسی دا”.
ھەرکی خویاکر” فڕاکسیۆنا پارتی دیموکراتی کوردستان پشتەڤانیا داخوازیێن ھەردو پێکھاتێن مەسیحی و تورکومان دکەت و دڤێت ئەوژی تێدا ھەبانە، بەلێ ئەڤە ب رێککەفتنا سیاسی ھاتینە دانان و ئەم وەکی فڕاکسیۆنا پارتی دێ ھەموو بزاڤان کەین، دو ئەندام بۆ ڤان دو پێکاھاتان بھێنە زێدەکرن، بەلێ ئەم تنێ نەشێین ئەڤێ چەندێ بدەست خوەڤە بینین، ژ بەر کو پێدڤیە لایەن و فڕاکسیۆنێن دی ژی تێدا پشکداربن و رازیبوونا خوە بدەنە دیارکرن، نوکە ژی ئەم د ژردین وەکی پارتی و پشتەڤانیا ئەڤان داخوازیێن وان دکەین، چونکی ھەر بۆ ناڤودەنگێ ھەرێما کوردستانێ باشترە ژی پێکھاتێن جۆدا پشکدارببن”.
ئایدن مەعروف، سەرۆکێ فڕاکسیۆنا بەرەیا تورکومانی ل پەرلەمانێ کوردستانێ بۆ ئەڤرۆ گۆت” کۆمسیۆنا بلندا ھەلبژارتنێن ھەرێما کوردستانێ یا ھەموو پێکھاتەیێن ھەرێمێ یە و مە وەکی پێکھاتێن تورکومان و مەسیحی و ئەرمەن، بڕیادایە پشکداری د کۆمبوونا ئەڤرۆ یا پەرلەمانێ کوردستانێ دا نەکەین، ژبەرکو ژ سەرجەمێ ٩ ئەندامێن دەستەیا کۆمسیۆنا بلند و ھەلبژارتنێن ھەرێمێ چو ئەندام بۆمە نەھاتینە دیارکرن و تنێ گۆتیە پارتی ژ سێ ئەندامێن خوە ئێکی بدەتە تورکومانەکێ ب سەر پارتی ڤە و ئێکەتی ژی ژ سێ ئەندامێن خوە ئێکی بدەتە مەسیحیەکێ سەر ب ئێکەتیێ ڤە، ئەم ژی ب ڤێ چەندێ رازینابین و ھەکە داخوازیێن مە نەھێنە بجھئینان، ھەتا ئەم ل پەرلەمانی ماینە ئەڤ یازدە پەرلەمانتارێن پێکھاتێن جۆدا پشکداری کۆمبوونێن پەرلەمانی ناکەین، چونکو گۆرەی مادەی پێنجێ ژ قانوونا راستڤەکرنا کۆمسیۆنا ھەلبژارتنان ھاتیە و دڤێت ئەڤ پێکھاتە دناڤ خوەدا کەسەکی ب نوونەرێ خوە دانن، نەک بڤی شێوەی پێدڤیە نوونەرێن مە ب رازیبوونا مە بھێنە دانان”.
ئایدنی گۆت ژی” مە یاداشتەک دایە سەرۆکێ ھەرێما کوردستانێ و مە داخوازکریە دو ئەندام بھێنە زێدەکرن و بەرپرسێ لقا کۆمسیۆنێ ل دھۆکێ یان ھەولێرێ بدەنە مە تورکومان و مەسیحیان، دیارە سەرۆکێ پەرلەمانی و سەرۆکێن فڕاکسیۆنا ب پێشنیارا مەدا چووینە و بڕیارە ئەڤرۆ بەری کۆمبوونا پەرلەمانی، ئەم ل گەل دەستەیا سەرۆکایەتیا پەرلەمانی کۆمبوونەکێ گرێبدەین و تێدا ب ھووری بھێتە بەحسکرن، ھەکە ھات و ب داخوازیێن مە رازیبوون، دڤێت مادێ پێنجێ بھێتە راستڤەکرن و ئەڤ ھەردو ئەندامێن بڕیارە ب نوونەرایەتیامە بھێنە دانان دەنگ ل سەر نەھێتەدان ھەتا قانوون بھێتە راستڤەکرن، ئەڤە ژی دێ مینیت بۆ کۆمبوونا ئەڤرۆ و ئەم د رژدین ل سەر داخوازیێن خوە “.

ئه‌ڤرۆ نيوز، نيوار محه‌مه‌د سه‌ليم:

رێڤه‌به‌ريا كه‌شناسى و بيڤه‌له‌رزێ ل هه‌رێما كوردستانێ رێژا هه‌ڤبه‌ركرى يا باران بارينا ئه‌ڤ ساله‌ ل گه‌ل يا سالا بۆرى ئاشكه‌را كر و دا زانين كو ل دهۆكێ زێده‌ترى 130 ملم ژ سالا بۆرى زێده‌تر باران باريه‌.

رێڤه‌به‌ريا كه‌شناسى و بيڤه‌له‌رزێ ل هه‌رێما كوردستانێ ئه‌ڤرۆ رۆژا سێشه‌مبى راگه‌هاند كو وه‌كو هه‌ڤبه‌ركى ل گه‌ل سالا بۆرى ل هه‌رێما كوردستانێ جوداهيه‌كا مه‌زن د ناڤبه‌را رێژێن باران بارينێ دا هه‌يه‌ ب گۆره‌يى وى خشتێ به‌لاڤكرى.

ل پارێزگه‌ها دهۆكێ ل سالا 2013 هه‌تا ڤى ده‌مى 131ز8 ملم باران باريبوو، به‌لێ ل ئه‌ڤ ساله‌ 269.5 ملم باران باريه‌، ل زاخۆ ژى 152.9 ملم باريبوون و نوكه‌ 269.8 ملم باران باريه‌.

ده‌رباره‌يى هه‌ولێر ژى دايه‌ زانين كو سالا بۆرى هه‌تا ڤى ده‌مى ل هه‌ولێر ب تنێ 19.2 ملم باران باريبوون، به‌لێ ئه‌ڤ ساله‌ گه‌هشته‌ 14.5 ملم بارانێ، ل پيرمام ژى رێژا هه‌ره‌ بلندا ئه‌ڤ ساله‌ يا بارانێ تۆماركريه‌ ل باژێر و باژێركێن كوردستانێ كو ل سالا بۆرى 73.5 ملم باريبوون، به‌لێ ئه‌ڤ ساله‌ 312.7 ملم باران بارينه‌.

ل پارێزگه‌ها سلێمانيێ ژى ئه‌ڤ رێژه‌ هه‌تا راده‌كێ باش يا به‌رچاڤه‌ ب ره‌نگه‌كى ل سالا 2013 ل سلێمانيێ 166.9 ملم باران باريبوون، به‌لێ نوكه‌ 228.4 ملم باران باريه‌ و ل چه‌مچه‌مال ژى ژ 103 مليمان بۆ 153.2 ملم بلند بوويه‌.

ئەڤرۆ نیوز، مللەت جەمال:
بەرپرێ راگەھاندنێ ل رێڤەبەریا ھاتنوچوونا پارێزگەھا دھۆک راگەھاند کو بۆ ئەڤرۆ نیوز دیارکر کو ژ بەر پێدڤیاتیا پارێزگەھا دھۆکی ب دامەزراندنا پۆلیسێن ھاتنوچوونێ، وەزارەتا ناڤخۆ یا ھەرێما کوردستانێ رازەمەندیا خوە دەربری ل سەر دامەزراندنا 50 پولیسێن ھاتنوچوونێ بۆ پارێزگەھا دھۆک.
رائید ئازاد تاھا بەرپرێ راگەھاندنێ ل رێڤەبەریا ھاتنوچوونا پارێزگەھا دھۆک گۆت: “پێدڤیە ژیێ داخازکەرێ فورمێ ژ 17 سالان کێمتر نەبیت و ژ 35 سالیێ زێدەتر نەبیت و دەرچوویێن ناڤنجی بیت و درێژاھیا وی یان وێ ژ 170 سم کێمتر نەبیت و پێدڤیە بەلگەنامێن پێدڤی ل گەل خوە بینیت ئەو ژی ناسناما بارێ شارستانی و رەگەزناما عیراقی و پلێتا ئاھێن خوارنێ و کارتا زانیاریان و 8 وێنێن رەنگا و رەنگ”.
زێدەتر گۆت: “فورمە دێ سوبه‌هى ل رێڤەریا ھاتن و چوونا پارێزگەھا دھوکێ ل دومیز ھێنە بەلاڤکرن”.