ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ل هەرێما کوردستانێ ٦٤٥ کەسێن دی تووشی ڤایرۆسێ کۆرۆنایێ بووینە و هەروەسا ٢٥ نەخوشێن کۆرۆنایێ ژی مرینە.
ل گۆر ئامارا وەزارەتا ساخلەمیێ د ماوەیێ ٢٤ دەمژمێرێن بۆری دا ٤٧٤ نەخوشێن کۆرۆنایێ ژی ب تەمامی چارەسەر بووینە.
ل پارێزگەها دهۆکێ ژی ٢٤٧ کەس تووشی کۆرۆنایێ بووینە و شەش نەخوش ژی مرینە و د هەمان دەمی دا ٢٩١ نەخوشێن کۆرۆنایێ ژی چارەسەر بووینە.
ئەڤرۆ نیوز:
شاندەکێ عیراقێ ب سەرۆکاتیا قاسم ئەعرەجی شیرەتکارێ ئاسایشا نشتیمانی یا عیراقێ سەرەدانا هەولێرێ کریە و ل دۆر چاوانیا بجهکرنا رێککەفتنا شنگالێ یا د ناڤبەرا هەولێرێ و بەغدا دا دێ ل گەل رێبەر ئەحمەد وەزیرێ ناڤخوە یێ حوکمەتا هەرێما کوردستانێ کۆمبیت.
ل گۆر زانیاریان شاندێ حوکمەتا عیراقێ دێ رۆژا پێنجشەمبیێ سەرەدانا مووسلێ ژی کەت.
ئه‌ڤرۆ نیوز:
دوو بیڤه‌له‌رزان وه‌لاتێن ئه‌ندۆنیسیا و فلیپین هه‌ژاندن و تا نوكه زیانێن وان نه‌هاتینه زانین.
دوو بیڤه‌له‌رزێن بهێز ئه‌ڤرو روژا سێشه‌مبى وه‌لاتێن ئه‌ندۆنیسیا و فلیپین هه‌ژاندنن،
ئاژانسا كه‌شناسى و كه‌ش و هه‌وا و گه‌ردوننانسى د به‌یانه‌كێ دا راگه‌هاند، بیڤه‌له‌رزه‌ك ب هێزا شه‌ش پۆینت سێ پله ل گۆره‌ى پیڤه‌رێ رێخته‌ر ل كه‌نارێن سومترا رویدایه.
دهه‌مان ده‌م دا، سه‌نته‌رێ بیڤه‌‌له‌رزانى یێ ئورۆپا ناڤه‌راست راگه‌هاند، بیڤه‌له‌رزه‌ك ب هێزا شه‌ش پۆینت ئێك پله ل گۆره‌ى پیڤه‌رێ رێخته‌ر ناوچا مینداناو ل فلیپینێ هه‌ژاند.
تا نها ژى زه‌ره‌ر و زیانێن هه‌ردو بیڤه‌له‌رزان ژ لایێ ده‌ستهه‌لاتدارێن هه‌ردوو وه‌لاتان نه‌هاتینه راگه‌هاندن.
ئه‌ڤرۆ نیوز:
سه‌رۆكێ هه‌لبژارتیێ ئه‌مریكا هۆشداری ژ بلندبوونا رێژه‌یا مرنێ ب كۆرۆنایێ دان هه‌كه سه‌رۆكێ نها یێ رژد بیت ل سه‌ر ره‌تكرنا هه‌ماهه‌نگیێ.
جۆ بایدن، سه‌رۆكێ هه‌لبژارتیێ ئه‌مریكا هۆشداری ژ بلندبوونا رێژه‌یا مرنێ ب كۆرۆنایێ دان هه‌كه دۆنالد ترامپ هه‌ماهه‌نگیێ دگه‌ل تیمێن دی نه‌كه‌ت ژ بۆ هاریكاریكرنێ، رێژه‌یه‌كا مه‌زن یا مرۆڤان ژىدێ مریت و پێدڤییه خوه ژ بۆ به‌لاڤه‌كرنا ڤاكسینێ به‌رهه‌ڤ بكه‌ن.
بایدن گۆت ژی: هه‌كه ڤایرۆس نه‌ما و هاریكاریێن دارایی پێشكێشی خه‌لكی كرن، پاشان ئه‌و ده‌م دێ یێ گونجای بیت بۆ دوباره ئاڤه‌دانكرنێ ب شێوه‌یه‌كێ باشتر.
دیار ژی كر، ئیداره‌یا وی دێ دوپاتیێ ل سه‌ر باجان كه‌ت كو كۆمپانیێن مه‌زن دده‌ن و گرێبه‌ستان بۆ چ كۆمپانییان ئیمزاناكه‌ت یێن كو به‌رهه‌مێن خوه ل ئه‌مریكا چێنه‌كه‌ن.
ئەڤرۆ نیوز:
بۆ جارا ئێکێ ل کوردستانێ پشکا فرۆکەڤانیێ ل زانکۆیا سەلاحەدین ل هەولێرێ هاتە ڤەکرن و وەزارەتا خواندنا بلند ژی راگەهاند کو کۆمپانیا هواوی کو ئێکە ژ کۆمپانیێن مەزن ل جیهانێ چەندین کەرەستە بۆ خواندنا پشکا فرۆکەڤانیێ دابین کریە.
وەزارەتا خواندنا بلند یا حوکمەتا هەرێما کوردستانێ دیار ژی کریە کو ئەو دشێن نها قوتابیان بۆ خواندنا فرۆکەڤانیێ وەربگرن.
ئه‌ڤرۆ نیوز:
کۆمپانیەکا ئەمریکی ڤاکسینه‌كێ دژى کۆرۆنایێ بەرهەمئینا و ل دەمەکێ نێزیک دێ ئێخیته دناڤا بازارى دا.
بەری نوکە کۆمپانییێن فایزه‌ر یا ئه‌مریكى و بیۆنتیک یا ئه‌لمانى بەرهەمئینانا ڤاکسینەکێ کۆرۆنایێ کو كراتێكرنا وی دگەهیتە سه‌دێ نۆت راگەهاندبوو.
پشتى وێ یه‌كێکۆمپانیا مۆدێرنا یا ئەمریکی ژى راگەهاندیه،كو وان ژی ڤاکسینێ کۆرۆنایێ بەرهەمئینایە و كراتێكرنا ڤاکسینا وان ل سەر نەهێلانا نەخۆشیێ دگه‌هیته نێزیکی 95%.
هه‌ر چه‌نده وێ کۆمپانیێ گەلەک زانیاری ل سەر وێ ڤاکسینێ بەلاڤ نەکرینە، لێ دیار كریه،چەند حەفتیەکێن کێم بۆ بەلاڤکرنا وێ ڤاكسینێ ماینە.
تێستا ڤاکسینێ مۆدێرنا ل سەر 30 هزار ئەمریکیان هاتیە کرن و دەمێ تێستێ چار حەفتی بووینه.
ئه‌ڤرۆ نیوز:
حكومه‌تا یۆنانێ داخوازه‌كا فه‌رمى بۆ كرینا فرۆكه‌یێن ئێف سیهـ و پێنج پێشكێشى ئه‌مریكا كرییه.
رۆژنامه‌یه‌كا ناڤخوه یا یۆنانى ژ زارێ به‌رپرسه‌كێ مه‌زن یێ وه‌زاره‌تا به‌رگرییێ ئاشكرا كر، پشتى كێریاكۆس میتسۆتاكیس، سه‌رۆكوه‌زیرێن یۆنانێ داخوازا كڕینا هه‌ژده فرۆكه‌یێن رافایل یێن فره‌نسى كرى، راسته‌خۆ ئه‌و داخواز ئاراسته‌ى ئه‌مریكا كرییه.
وه‌زاره‌تا به‌رگرییا یۆنانى داخوازه‌ك پێشكێى وه‌زاره‌تا به‌رگرییا ئه‌مریكا پێنتاگۆنێ كرییه و ئاشكرا كریه، یۆنان به‌رهه‌ڤه بچیته د هێزا به‌رگرییا ئاسمانى یا هه‌ڤپشك دا و هه‌موو مه‌رجان بجهبینیت.
ل دویڤ داخوازا یۆنانى یا پێشكێشى ئه‌مریكا كرى، داخواز هه‌ژده هه‌تا بیست و چار فرۆكه‌یێن ئێف سیهـ و پێنج كرییه.
ئه‌ڤرۆ نیوز:
هه‌ژماره‌كا به‌رپرسێن ئه‌مریكى ئاشكرا كر، سه‌رۆكێ ئه‌مریكا پرسیار ژ ئیداراه‌یا خوه كرییه كا چاوا دشیان دایه دربه‌كێ له‌شكرى ل كۆمارا ئیسلامیا ئیرانێ بده‌ت، لێ به‌رپرسێن كۆچكا سپى ئه‌و رازى كرییه وى كارى نه‌كه‌ت.
رۆژنامه‌یا نیویۆرك تایمز یا ئه‌مریكى ژ زارێ هه‌ژماره‌كا به‌رپرسێن ئیدارا نها و یا كه‌ڤن ئاشكرا كر، دۆنالد ترامپ رۆژا پێنجشه‌مبییا بوورى د گه‌ل هه‌ژماره‌كا شیره‌تكارێن خوه كۆمبوویه، پرسیار ژى كرییه دێ چاوا د شیان دابیت دربه‌كێ سه‌ربازى ل بنگه‌هێن ئه‌تۆمى یێن ئیرانێ بده‌ن.
ل گۆره‌ى گۆتنا وان به‌رپرسان، ئه‌و داخوازا ترامپى هات پشتى چاڤدێرێن ناڤده‌وله‌تى ئاشكرا كرى كو ئیرانێ قه‌بارێ یۆرانیۆمێ هێڤینكرى زێده‌كریه، وان به‌رپرسان ژى هۆشدارى ژ ئه‌نجامێن وێ هێرشكرنێ داینه ترامپى.
رۆژناما نیویۆرك تایمز ئاشكرا ژى كر، مایك بێنس، جێگرێ سه‌رۆكێ ئه‌مریكا، مایك پۆمپێیۆ، وه‌زیرێ ده‌رڤه و بریكارێ وه‌زاره‌تا به‌رگریێ پێنتاگۆنێ پشكدارى وێ كۆمبوونێ ببوون.
ئه‌ڤرۆ نیوز:
سه‌رۆكێ پارتییا دیمۆكراسى و گه‌شه‌پێدان یا توركى دێڤا راگه‌هاند، هه‌كه سه‌رۆككۆمارێ توركیا ژ دل بخوازیت چاكسازیێ بكه‌ت، پێدڤیه ده‌ست ژ سه‌رۆكاتییا پارتییا داد و گه‌شه‌پێدان ئاكه‌پێ به‌رده‌ت.
عه‌لى باباجان، سه‌رۆكێ پارتییا دیمۆكراسى و گه‌شه‌پێدان یا توركى، د گۆتاره‌كێ دا به‌حسى ره‌وشا توركیا كر و راگه‌هاند، ره‌نگه د چه‌ندین رۆژێن بهێن دا هنده‌ك كه‌س بهێنه ئازادكرن.
باباجان گۆت ژى: ئه‌ردۆغان پشتى هه‌ژده سالێن ده‌ستهه‌لاتێ دبێژیت: دێ چاكسازییان د ئابوورى دا كه‌ن، لێ ئێدى خه‌لك گوهداریا گۆتنێن وى ناكه‌ت، به‌لكو خه‌لكى كریار دڤێن و هه‌كه ئه‌ردۆغانى بڤێت چاكسازییان بكه‌ت، پێدڤیه ده‌ست ژ سه‌رۆكاتییا پارتییا داد و گه‌شه‌پێدان ئاكه‌پێ به‌رده‌ت.
ئه‌ڤرۆ نیوز:
سه‌رۆكوه‌زیرێن ئیراقێ فه‌رمان ل ئۆپه‌راسیۆنێن هه‌ڤپشك كرییه كو ده‌ریێن سنۆرى یێن نه‌فه‌رمى دائێخن.
ده‌سته‌یا ده‌ریێن سنۆرى یا ئیراقى د به‌یانه‌كێ دا راگه‌هاند، مسته‌فا كازمى، سه‌رۆكوه‌زیرێن ئیراقێ فه‌رمان دایه ئۆپه‌راسیۆنێن هه‌ڤپشك بۆ رێگرتنێ ل قاچاغیێ و زیان گه‌هاندن ب ئابوورێ ئیراقێ و پاراستنا به‌رهه‌مێ خۆمالى، هه‌موو ده‌ریێن سنۆرى یێن نه‌فه‌رمى دائێخن.
هه‌روه‌سا كازمى فه‌رمان دایه فه‌رمانبه‌رێن ده‌زگه‌هێ هه‌والگیریێ ل ده‌ریێ سنۆرى دانیت، داخواز ژى كریه ده‌ریێن سنۆرى یێن فه‌رمى پێشبێخن بۆ باشتركرنا رێكارێن گومركى و رێگرتن ل گه‌نده‌لیێ.
نيشاندان