سەرۆك مەسعود بارزانی پێشوازی ل شێخ خەمیس خەنجەر، كەسایەتیێ سیاسیێ دیار ل ئیراقێ كر.
د دیدارەكێدا باس ل رەوشا سیاسی و ئەمنی ل ئیراقێ و پەیوەندیێن د ناڤبەرا حوكمەتا هەرێما كوردستانێ و حوكمەتا ئیراقا فیدرال هاتە كرن و هەروەسا رۆناهی هاتە ئێخستن ل سەر ئاستەنگ و گوهۆڕینێن رۆژهەلاتا ناڤین و دەڤەرێ ب گشتی.

پەیڤدارێ سەرۆكایەتییا هەرێما كوردستانێ راگەهاند، د ڤێ حەفتیێدا نێچیرڤان بارزانی، سەرۆكێ هەرێما كوردستانێ دێ سەرەدانا بەغدا كەت.
دلشاد شەهاب، پەیڤدارێ سەرۆكایەتییا هەرێما كوردستانێ دداخۆیانییەكا رۆژنامەڤانیدا گۆت» نێچیرڤان بارزانی، سەرۆكێ هەرێما كوردستانێ دێ سەرەدانا بەغدا كەت و پشكداریێ د كۆمبوونا ئالیێن حوكمەتا ئیراقێ پێكئینای (ئیدارەیا دەولەتێ) دا كەت».
دلشاد شەهاب گۆت ژی» بڕیارە سەرۆكێ هەرێما كوردستانێ ل گەل ئالیێن سیاسی ژی كۆمببیت».
پێشتر ئەبو میساق مەساری، ئەندامێ مەكتەبا سیاسییا رێكخراوا بەدر، كو ئێك ژ وان ئالییانە یێن هەڤپەیمانییا چارچۆڤەیێ هەماهەنگیێ یا شیعی پێكئینای راگەهاندبوو» بڕیارە ل دەستپێكا ڤێ حەفتیێ هەڤپەیمانییا ئیدارەیا دەولەتێ ب بەرهەڤبوونا محەمەد شیاع سودانی، سەرۆك وەزیرێن ئیراقێ كۆمببیت».
ئەبو میساق مەساری گۆتبوو ژی» بڕیارە رۆژا ئێكشەمبی 12/1/2025 ئەو كۆمبوون بهێتە ئەنجامدان، هەر چەندە هندەك سەركردەیان داخواز كربوو ئەو كۆمبوون بۆ رۆژا شەمبیێ بهێتە پێشئێخیتن».

سەرۆكێ حوكمەتا هەرێما كوردستانێ رەفتارا نوكە یا بەغدا بەرانبەر هەرێما كوردستانێ رەت دكەت و دوپاتیێ ل وێ چەندێ دكەت كو دخوازن پەیوەندییا هەولێرێ و بەغدایێ راستڤەكەن.
دوهی شەمبیێ 11/1/2025، ل باژێرێ هەولێرێ ب بەرهەڤبوونا مەسرور بارزانی، سەرۆكێ حوكمەتا هەرێما كوردستانێ، قوباد تالەبانی، جێگرێ سەرۆكێ حوكمەتا هەرێما كوردستانێ، نوونەرێن هەرێما كوردستانێ ل حوكمەتا فیدرال و سەرۆكێن فراكسیۆنێن كوردستانی یێن هەموو ئالییان ل جڤاتا نوونەرێن ئیراقێ، كۆمبوونەكا نەئاساییا جڤاتا وەزیرێن هەرێما كوردستانێ ل دۆر پرسا مووچەی و شایستەیێن دارایی یێن هەرێما كوردستانێ ل حوكمەتا فیدرالی هاتە ئەنجامدان.
مەسرور بارزانی، سەرۆكێ حوكمەتا هەرێما كوردستانێ ل بەراهییا كۆمبوونێ، راگەهاند» ئەم یێن گەهشتینە وێ باوەریێ كو ئەو رەفتارا نوكە بەغدا بەرانبەر هەرێما كوردستانێ دكەت، رەفتارەكا ستەمكارانە و نە دادپەروەرانەیە و یا قەبوولكری ژی نینە».
سەرۆكێ حوكمەتا هەرێمێ گۆت ژی» دڤیت ئەم وێ پەیوەندیێ (پەیوەندییا هەولێرێ و بەغدایێ) راستڤە بكەین، مە دستوورەك یێ هەی و دڤێت پێگیری وی دستووری بین».
هەروەسا باس ل وێ چەندێ ژی كر» دادگەها فیدرالی، تنێ د بەرژەوەندییا حوكمەتا فیدرالی دا بڕیار یێن دەركرین و چو جاران بڕیارەك دەرنەكریە كو بەرژەوەندییا خەلكێ هەرێما كوردستانێ تێدا بیت».
سەرۆكێ حوكمەتا هەرێمێ ئەوژی بەرچاڤكر» دڤێت ل سالا 2025 كارەكێ وەسا بكەین خەلكێ مە ژ وێ دلتەنگییا دەروونی دەربكەڤیت. خەلكێ مە هەژی وێ چەندێ نینە ب ڤی شێوەی رەفتار ل گەل بهێتە كرن. خەلكێ كوردستانێ هەژی وێ چەندێیە رێز ل خەبات و قوربانیدانا وی بهێتە گرتن وەكو خەلكی دی یێ ئیراقێ».
مەسرور بارزانی ل درێژییا ئاخڤتنێن خوە ئاماژە ب وێ چەندێ ژی كر» ئەم داخوازا ئێكسانیێ و مافێن خوە یێن دستووری دكەین و داخواز دكەین چ ل سەر ئاستێ ئیداری، چ ل سەر ئاستێ تەشغیلی ب هەموو جۆرەكی. ئەم هەموو، هەموو بزاڤێن خوە بكاربینین بۆ وێ چەندێ بشێین ڤان كێشە و گرفتێن هەین راستڤە بكەین و ئێدی پەیوەندییەكا ساخلەم د ناڤبەرا هەولێرێ و بەغدایێ دروست ببیت».
دیاركر ژی» ئەو رەفتارا نوكە بەغدا ل گەل هەرێما كوردستانێ دكەت، رەفتارا كیانەكێ فیدرالی نینە، بەلكو وەكو پارێزگەهەك بەلكو بچووكتر ژی رەفتارێ ل گەل هەرێما كوردستانێ دكەت».
مەسرور بارزانی دوپاتكر ژی» نابیت ئەم هەموو كێشەیێن خوە تنێ د بابەتێ مووچەیدا كورت بكەین. مخاین بەغدا ب سیاسەتەكا سەركەفتییانە یا شیای كێشەیێن مە بچووك بكەت، مە مژوول بكەت ب وێ چەندێ ئایا مەهانە مووچەیێن خەلكێ كوردستانێ دێ هێنە دان یان نە؟ ئەرێ ئەو هەموو تشتێن دی چیە؟ 100 سالە كوردستان قوربانیێ ددەت، ژ پێخەمەت مووچەی بوو یان ژ پێخەمەت پێناسە، ئاخ، نیشتمان، ئێكسانیێ و ئازادیێ بوو؟ «.
سەرۆكێ حوكمەتا هەرێما كوردستانێ ئاخڤتنا خوە ئاراستەی پەرلەمانتار و بەرپرسێن كوردی ل بەغدایێ كر و گۆت» ئەركێ هەوە یێ ئێكێ، ب بۆچوونا مە و ب بۆچوونا هەموو خەلكێ كوردستانێ، ئەوە بەرگریێ ژ بەرژەوەندیێن خەلكێ كوردستانێ بكەن، بەرگریێ ژ ماف و شایستەیێن دارایی یێن خەلكێ هەرێما كوردستانێ بكەن، كو مخابن ئەو بابەتە بوویە بابەتێ سەرەكیێ دانوستاندنان، ئەگەر نە مە چەندین خالێن دی یێن هەین كو دڤێت داكۆكیێ ل سەر بكەین. مادەیێ 140 هێشتا نەهاتییە ب جهئینان. بابەتێ دەڤەرێن دابڕای ژ هەرێما كوردستانێ نەهاتییە چارەسەركرن. بابەتێ پێشمەرگەی وەكو پێدڤی نەهاتییە چارەسەركرن. بابەتێ قەرەبووكرنا قوربانیێن ئەنفال و قوربانیێن رژێما بەرێ، هەموو یێن هاتینە ژبیركرن».
مەسرور بارزانی د پشكەكا دی یا ئاخڤتنێن خوە دا باس ل وێ چەندێ كر» مە هەموویان مووچەخۆر و فەرمانبەرێن ئیداری و پێشمەرگە یێن هەین، لەوما نابیت ژێیاتییا سیاسی بۆ حزبێن كوردستانێ رێگر بیت ل وێ چەندێ هوون هەموو نوونەرایەتییا هەموو كوردستانێ بكەن».
ل دووماهیێ سەرۆكێ حوكمەتا هەرێما كوردستانێ دوپاتكر» پێدڤییە بەرانبەر بەغدایێ، ئێكڕێز و ئێك دەنگ بین».

مەسرور بارزانی، سەرۆكێ حوكمەتا هەرێما كوردستانێ، پێشوازی ل كیارا فرانچینی، جێگرا بالیۆزێ ئیتالیا ل ئیراقێ كر.
د دیدارەكێدا بیر و بۆچوون ل دۆر پێشڤەبرنا پەیوەندیێن دو قۆلی، ب تایبەتی د وارێ ئابووری و بازرگانیدا، هەروەسا دووماهی گوهۆڕین و پێشهاتێن رەوشا گشتییا ئیراقێ و دەڤەرێ هاتنە لێكگوهارتن.
د پشكەكا دی یا دانوستاندنا، دوپاتی ل پێدڤییا چارەسەركرنا كێشەیێن د ناڤبەرا هەرێما كوردستانێ و حوكمەتا فیدرال و رێزگرتن ل مافێن دستووری یێن خەلكێ كوردستانێ هاتە كرن.

پەیڤدارێ حوكمەتا هەرێما كوردستانێ، د كۆنفرانسەكێ رۆژنامەڤانیدا راگەهاند: د كۆمبوونا جڤاتا وەزیرێن هەرێما كوردستانێدا چەند بڕیارەك هاتنە دان و هەژمارەكا وەزیرێن كورد د حوكمەتا ئیراقێدا هاتنە راسپاردن پەیامان بگەهیننە بەغدا.
دوهی شەمبیێ 11/1/2025 پشتی ب دووماهی هاتنا كۆمبوونا جڤاتا وەزیرێن هەرێما كوردستانێ ل گەل نوونەرێن كوردان د حوكمەتا ئیراقێ دا و فراكسیۆنێن كوردستانی ل جڤاتا نوونەرێن ئیراقێ، پێشەوا هەورامانی، پەیڤدارێ حوكمەتا هەرێما كوردستانێ د كۆنفرانسەكێ رۆژنامەڤانیدا گۆت» ل كۆمبوونا جڤاتا وەزیرێن هەرێما كوردستانێ چەند بڕیارەك هاتنە دان، كو چار وەزیرێن كورد ل حوكمەتا ئیراقێ، وان بڕیاران وەكو پەیام و مەسج دێ گەهیننە بەغدا».
ل دۆر بڕیاران، پێشەوا هەورامانی دیاركر ژ وان بڕیاران» ئێك: گرەنتی ومسۆگەركرنا مووچەیێ سالا نوو و نە بهێتە گیرۆكرن و نە كێشە بۆ بهێتە دروستكرن، ب گۆڕەی وێ چەندێ دناڤ خشتەیێ بۆدجەیدا هاتیە دیاركرن و مافێ كوردستانێیە و ل سەر وی بابەتی هیچ گەنگەشەیەك ناهێتە كرن، دو: د وێ راستڤەكرنا د قانوونا بۆدجەی دێ هێتە كرن، دڤێت هەرێما كوردستانێ ئاخڤتنا خوە د وان مادەیان دا هەبیت یێن پەیوەندی ب هەرێما كوردستانێ ڤە هەی و ب وی جۆری كو مافێ خەلكێ كوردستانێیە. هەروەسا ئەم داخوازا مووچەی ب تنێ ناكەین، بەلكو داخوازا بۆدجەی دكەین، ئەم كیانەكێ دستووری نە و نابیت وەكو پارێزگەه رەفتار ل گەل مە بهێتە كرن و نابیت غەدر ل گەل خەلكێ هەرێمێ بهێتە كرن و مافێن وی بهێنە پێشێلكرن».
سەبارەت ب جهنەئینانا وان داخوازییان، پێشەوا هەورامانی گۆت» بێگومان وی دەمی دێ هزر د پێرابوونێن دی دا هێتە كرن، هیڤیدارین نەكەهیتە وێ چەندێ بڕیارەك بهێتە دان زیانێ ل سەقامگیرییا ئیراقێ ژی بدەت، بڕیارا وی دەمی دێ زڤریت بۆ ئالیێن سیاسی، كا دێ چ بڕیارەكێ دەن، خوە ڤەكێشان یان بڕیارەكا دی».

ژێدەرەکێ ژ حوکمەتا تورکیا دیار کریە، نها بەحسێ ڤێ یەکێ دهێتە کرن کو جارەکا دی ئەحمەد تورک وەکو هەڤسەرۆکێ باژێرڤانیا مێردینێ ڤەگەریتە ڤە سەر کارێ خوە، چونکی نحەقی ل ئەحمەد تورک هاتیە کرن و هەروەسا ژ بۆ قۆناغا نها یا ل تورکیا ژی ئەو یەک گەلەک گرنگە.

سینان بورهان بەرپرسێ ئاژانسا مللەت یا تورکیا دیار کر، بەرپرسەکێ حوکمەتا تورکیا کو نەخواستیە نها ناڤێ وی بهێتە ئاشکرا کرن بۆ وی دیار کریە، نها قۆناغا ئاشتیێ ب رەنگەکێ باش ل تورکیا برێڤە دچیت، ئەحمەد تورک ژی د ناڤ شاندێ ئیمرالیێ دایە و کارەک گەلەک گرنگ دکەت، ژ بۆ ڤێ یەکێ ژی د ناڤ کابینا حوکمەتێ دا گەنگەشەیا ڤێ یەکێ دهێتە کرن کو مەها سێ ئەحمەد تورک جارەکا دی وەکو هەڤسەرۆکێ باژێرڤانیا مێردینێ ڤەگەریتە ڤە سەر ئەرکێ خوە و گۆت: (هندەک ژ ئەندامێن کابینا حوکمەتا ئەردۆغانی وەسا دبینن نحەقی ل ئەحمەد تورک هاتیە کرن، چونکی د کارێ خوە دا چو خەمساری نەکریە و هەروەسا ژ بۆ پێشڤەبرنا قۆناغا ئاشتیێ ل تورکیا ئەحمەد تورک خوەدان رۆلەک گەلەک گرنگە و ڤەگەریانا وی ل سەر کارێ خوە دێ کاریگەریا خوە یا گەلەک باش ل سەر پێشڤەبرنا قۆناغا ئاشتیێ هەبیت).
ناڤهاتی ئەو یەک ژی دیار کریە، دەولەت باخچەلی ب تەمامی پشتەڤانیا هندێ دکەت کو ئەحمەد تورک ڤەگەریتە ڤە سەر کارێ خوە و وی دەمی ژی باخچەلی ل دژی ڤێ یەکێ بوو کو ئەحمەد تورک ژ کاری بهێتە دوورخستن و دیارە نها باخچەلی رۆلەکێ سەرەکی بۆ ڤێ یەکێ دگێریت و گۆت: (هەر کەس دزانیت دەولەت باخچەلی سەرۆکێ پارتا بزاڤا نەتەوەپەرست دەستپێشخەرێ قۆناغا نوو یا ئاشتیێ یە، قۆناغ هەتا نها ژی ب رەنگەکێ باش برێڤە دچیت و دهێتە چاڤەرێکرن کو حەفتیا بهێت جارەکا دی شاندێ ئیمرالیێ سەرەدانا ئۆجەلانی بکەن، بێگومان ئەو یەک دێ ئەنجامێن خوە یێ گرنگ هەبیت، دڤێت ئەم چاڤەرێ بین بزانین کا دێ ب کریاری چ هێتە کرن).
سینان بورهان د دووماهیا ئاخڤتنا خوە دا ئەو یەک ژی دیار کریە، بەرپرسێن حوکمەتا تورکیا ب هێڤی کو دێ هەتا نەورۆزێ ل سەر داخوازا ئۆجەلانی پەکەکە دەست ژ چەکی بەردەت و دێ ئەو یەک بیتە دەستپێکەکا گەلەک نوو، چونکی ئەردۆغانی ب رەنگەکێ ئاشکرا بۆ شاندێ دەم پارتیێ دیار کریە هەتا پەکەکە دەست ژ چەکی بەرنەدەت وەکو حوکمەت ئەو نەشێت ب کریاری چو کارەکێ بکەن و دڤێت پەکەکە دەست ژ چەکی بەردەت و وی دەمی دێ قۆناغەکا نوو ل تورکیا دەستپێکەت، ئەو یەک دێ ئەنجامێن خوە یێن گەلەک باش ژی هەبن، ژ بەر ڤێ یەکێ ژی هەبوونا چەکان نها بوویە ئاستەنگ ل هەمبەر پێشڤەچوونا قۆناغا ئاشتیێ.

رۆژنامەڤان و بەرپرسێ سیاسەتا ئەمنی ل رۆژنامەیا (هەبەر تورك) راگەهاند، بێی كورد هەڤسەنگی ل رۆژهەلاتا ناڤین نابیت و توركیا ژی نەشێت بێی هەرێما كوردستانێ، كێشەیا كوردی چارەسەر بكەت.
چەتینەر چەتین، رۆژنامەڤان و بەرپرسێ سیاسەتا ئەمنی ل رۆژنامەیا (هەبەر تورك) گۆت» سەرەدانا مەسرور بارزانی بۆ توركیا یا گرنگە، چونكە دشێت رۆلەكێ گرنگ د چارەسەركرنا كێشەیا كوردی دا ب گێریت».
چەتینی گۆت ژی» پێشوازیكرنا هاكان فیدان ل مەسرور بارزانی ل مالا خوە، پەیامەكا گرنگ بوو، دهێتە زانین ژی كو بێی كوردان هەڤسەنگی ل رۆژهەلاتا ناڤین نابیت».
پتر گۆت» پەیاما توركیا ئەوە دڤێت ب پێكڤەیی كێشە بهێنە چارەسەركرن، چونكە توركیا نەشێت بێی هەرێما كوردستانێ كێشەیا كوردی چارەسەر بكەت».
ب دیتنا چەتینی، مەسرور بارزانی دشێت رۆلەكێ گرنگ د پڕۆسەیا چارەسەكرنا كێشەیا كوردی دا ب گێریت و سەرۆككومارێ توركیا و وەزیرێ دەرڤەیێ توركیا باوەرییەكا مەزن یا ب مەسرور بارزانی هەی».
د پشكەكا دی یا ئاخڤتنێن خوە دا گۆت» توركیا یا نەچارە كێشەیا كوردی چارەسەر بكەت، بەلێ چارەسەرییا ئێكئالییانە ناهێتە كرن».
ناڤبری ئاماژە كر ژی كو (پەیەدە) داخوازیێن ئیرانێ ل دەڤەرێ ب جه دئینیت و دڤێت (پەیەدە) و (هەسەدە) ب سەلمینن كو نابنە مەترسی ل سەر توركیا.

عەزیز هەورامی:

پارتی دیموكراتی كوردستان ل سەر ئاستێ هەرێما كوردستانێ زێدەتر ژ 812 هزار دەنگان ب دەستخوەڤە ئینان، ئەندامەكێ كۆمیتەیا ناڤەندییا پارتی ژی دبێژیت: ب تنێ ل ناڤ هەولێرێ پارتی زێدەتر ژ 50 هزار دەنگان یێن زێدەكرین.
بلند ئیسماعیل، ئەندامێ كۆمیتەیا ناڤەندییا پارتی دیموكراتی كوردستان و بەرپرسێ لقێ دو بۆ رۆژنامەیا (ئەڤرۆ) گۆت» پارتی دیرۆكەكا گەش یا هەی و خودانا قوربانیدانەكا مەزنە بۆ ب دەستڤەهاتنا ڤی قەوارەی، هەڤوەلاتیێن هەرێما كوردستانێ ژی یێن گەهشتینە وێ راستیێ كو تنێ پارتییە حوكمڕانییەكا باش و راستگۆ هەی، پارتی بەرنامە بۆ پاشەرۆژێ یێ هەی ژ روویێ سیاسی و جڤاكی و ستراتیژییەتا كێشەیا كوردی، خەلكێ كوردستانێ دزانن پارتی ل كیرێ بیت ئارامی و خوەشگوزەرانی ل وێرێ یێن هەین، لەوما دەنگ ب پارتی دا».
بلند ئیسماعیل پتر رۆهنكر» هەولێرێ ل گەل پارتی هەڤشێوەیێن ئێكن، پارتی حەز ل ئاسایش و خوەشگوزەرانیێیە و خەلكی ژی ئەو چەندە دڤێت، ئارمانجا پارتی باشترین رەوش دەستەبەر بكەت تاكو هەڤوەلاتی ژیانا ئاسایی یا خوە ب رێڤەببەن».
وی ئەندامێ كۆمیتەیا ناڤەندییا پارتی ئاماژە ب وێ چەندێ ژی كر» ئەو رەوشە ب سەرڤەچوو یا كو خولی دكرە د چاڤێ خەلكیدا، خەلك یێ ژ درووشمان تێربووی و كریار دڤێت، پارتی حزبا بەرپرسیارەتیێیە و هیچ دەمەكی ژی ژ بەرپرسیارەتیێ نا رەڤیت، د كێماسییاندا خوە دكەتە خودان و چارەسەری یا ل دەف هەی، كێرفێ دەنگێن پارتی د هەلبژارتنێن داهاتیدا دێ زێدەتر بیت، پارتی د هەلبژارتنێن ڤێ دوماهیێ یێن پەرلەمانێ كوردستانێ دا ل 20 ئۆكتۆبەرا بۆری چو د جەرگێ دەنگدەریدا، ب وێ رێژەیا دەنگان یا خەلكێ كوردستانێ دایە پارتی بەرپرسیارەتییا سەر ملێ مە ل حزبێ و حوكمەتێ و دەزگەهێن ئەمنی گرانتر لێكر، ئەو باوەرییا خەلكێ كوردستانێ ب پارتی دای بۆ ئەگەرێ ب دوماهیئینانا پیلانان، بەرسڤا نەحەزان دا، كو بانگەشەیا وێ چەندێ دكر پارتی دەنگان نائینیت و دێ شكێت، خەون ب وێ چەندێ ڤە ددیت كو 60 هەتا 70% ژ خەلكی بچنە سەر سندۆقێن دەنگدانێ و ب وی شێوەی پارتی دەنگ نامینن، بەلێ رێژەیا پشكدارییا خەلكی گەلەك یا زێدەبوو و دەنگێن پارتی ژی گەلەك زێدە بوون، پارتی د ناڤ هەموو تەخ و چیناندا دەنگ یێن هەین، لەوما پارتی گەلەك ب ساناهی دشێت باوەری و دەنگێن خەلكێ كوردستانێ وەربگریت».
خویاكر ژی» سەرۆك بارزانی، مەرجەعێ هەموو كوردستانییانە، سەركردەیەكێ ب هێز و بۆچوونێن وی ل رۆژهەلاتا ناڤین و جیهانێ جهێ رێزێ نە و ئاخڤتنێن وێ بلند دهێنە هەسلەنگاندن، پارتی ژی هەژمارەكا ب سەنگە ل رۆژهەلاتا ناڤین، چ كێشەیا گرێدای كوردستانێ وئیراقێ و پەیوەندی ب دەولەتێن دەڤەرێ هەبیت، بۆچوونا سەرۆك بارزانی ل سەر دهێتە وەرگرتن».
زێدەتر گۆت» پارتی یا شیای ب وێ حكمڕانییا ل كوردستانێ دكەت ل دەڤەرەكا دەوروبەرێن وێ پڕی ئاژاوە و دیكتاتۆر، ئازادیێ و دیموكراسیێ پەیدا بكەت و هەلبژارتن گەلەك ب ساناهی تێدا بهێنە ئەنجامدان، ئەڤە مەزنترین دەستكەفتە».
بلند ئیسماعیل خویاكر ژی» پارتی ل سنۆرێ لقێ 2 پتر ژ 50 هزار دەنگان یێن زێدەكرین، ب گشتی ژی پارتی ل سەر ئاستێ هەرێما كوردستانێ گەلەك دەنگێن خوە یێن زێدەكرین، ئەڤە ژی ئەركەكێ گران دئێخیتە سەر ملێن مە، د پێشڤەبرنا پڕۆژەیان و ئاسایش و ئارامیێ و پاراستنا سەرومالێ خەلكی كو بشێن بەرسڤا باوەرییا خەلكی بدەین».

شرۆڤەكارەكێ سسیاسی راگەهاند: ئێكگۆتارییا كوردان هەردەم ئێك بوو ژ بنەمایێن گرنگ یێن كوردستانێ، نەبوونا ئێكگۆتارییا كوردان زیانەكا گەلەك مەزن ل هەموو پرسێن كوردی دایە».
فازل بەشارتی، شرۆڤەكارێ سیاسی بۆ رۆژنامەیا (ئەڤرۆ) گۆت» تایبەتمەندییا ڤێ قۆناغێ یا جوداترە بوو و پێدڤییە د نوكەدا هەست ب بەرپرسیارەتیێ بكەین، ئەو روودانێن ئالۆز یێن نوكە ل رۆژهەلاتا ناڤین و ب تایبەتی ل دەڤەرا مە دا هەین، دەلیڤەیەكا گرنگ بۆ كوردان یا هەی ئێكگۆتار و ئێك سەنگەر هەبیت ژ بەركو هەموو روودان د بەرژەوەندییا كوردان دا نینن».
بەشارەتی زێدەتر گۆت» من بۆچوونەكا جودا یا هەی ژ حوكمەتا بنكەبەرفرهە وب دیتنا من پارتی و ئێكەتی د ناڤخوەدا حوكمەتەكا ب هێز دروست بكەن، ئەم نە د مفادار بووین ژ حوكمەتا بنكە بەرفرهە و نە ژی د سەركەفتی بووین، ژ بەر كو ئالی د كابینەیا بەرێ دا، د ئێك هەلویست نەبوون تاكو دوماهییا دەمێ حوكمەتێ، ل نیڤا رێكێ حوكمەت ب جه هێلا، ب بەهانەیێن جودا و لاواز، نەشیان حوكمڕانیێ بگەهیننە مەبەستێ».
وی شرۆڤەكارێ سیاسی گۆت ژی» كێشە د وێ چەندێ دایە هەموو دبێژن كاك مەسعود بارزانی برایێ مەزنە، بەلێ نە گوهدارییا برایێ مەزن كاك مەسعود بارزانی دكەن، نە راستییان ژی د گەلدا دبێژن».
هەكە ئالیێن سیاسی گوه ل رینمایێن سەرۆك مەسعود بارزانی كربا ئەم نەدگەهەشتینە ڤێ رۆژێ، ئەو گرفت و ئالۆزیێن هەین كو د ژیانا ئابووری و حوكمڕانییا مەدا دروست بووین، بەغدا ب میزاجێ خوە رەفتارێ ل گەل گەلێ كورد بكەت، بۆمە دیار دكەت ئەم نەشیاینە ب وێ رێكا سەرۆك بارزانی، بچین».
رۆهنكر ژی» پشكەك ژ سەركردەیێن حزبان داخواز دكەن سەرۆك بارزانی رێكەچارەیەكێ دابنیت بۆ رەوشێ، بەلێ بۆ بەرژەوەندییا خوە یێن حزبی و كەسایەتی، رێنمایێن سەرۆك بارزانی پەیڕەو ناكەن».
دیاركر ژی» هەكە مە ئێكگۆتار هەبیت دێ مە سەنگەكێ دی ل دەڤەرێ و حوكمڕانیێ هەبیت، هەموو دەستكەفتێن كوردان ل دەكێ ئێكگۆتاریێ مە یێن ب دەستڤەئیناین، نوكە ئێكگۆتاری بۆ كوردان گەلەك یا پێدڤییە ژ هەر دەمەكێ دی، بەغدا ب یاریكرنێ ب قۆتێ مللەتەكی دخوازیت بشكێنیت، نوكە بۆ دانا موچێن هەرێما كوردستانێ مەه بۆ كوردان یا كریە 60 رۆژ و 90 رۆژ!».

سەرۆكێ ناڤەندا فرەنسی بۆ ڤەكۆلینان ل سەر ئیراقێ راگەهاند، نێچیرڤان بارزانی، سەرۆكێ هەرێما كوردستانێ بزاڤا كێمكرنا گرژیێن دەڤەرێ ب تایبەتی د ناڤبەرا توركیا و هێزێن سوریا دیموكرات (هەسەدە) دكەت و دیاركر، نێچیرڤان بارزانی د ئێك دەمدا ل گەل توركیا و رۆژئاڤایێ كوردستانێ د ئاخڤیت و دخوازیت چەك بهێنە بێ دەنگكرن.
ئیمانوێل ماكرۆن، سەرۆكێ فرەنسا ل ڤێ حەفتیێ د پەیڤەكێدا بۆ دبلۆماتكار و بالیۆزێن وەلاتێ خوە گۆتبوو» پشتا خوە نادەینە شەرڤانێن كورد» د. عادل باخەوان، سەبارەت ڤێ چەندێ گۆت « ئەو ئاخڤتنا سەرۆكێ فرەنسا د تایبەت نینن بۆ رۆژئاڤایێ كوردستانێ، بەلكو د تایبەتن ژی ب هەرێما كوردستانێ و پرسا كوردی ل رۆژهەلاتا ناڤەڕاست ڤە».
سەرۆكێ ناڤەندا فرەنسی بۆ ڤەكۆلینان ل سەر ئیراقێ دیاركر» دەمێ ئەمریكا خوە ژ ئەفغانستانێ ڤەكێشای، ئیمانوێل ماكرۆن، سەرۆكێ فرەنسا هاتە هەولێرێ و گۆت هەكە ئەمریكا هەڤپەیمانێن خوە ب جه بهێلیت، ئەم ب جه ناهێلین، ئەڤە ژی ئێك ژ داخۆیانیێن هەرە گرنگن د دیرۆكا دبلۆماسییەتا مە دا».
د. عادل باخەوان گۆت ژی»هەكە ماكرۆنی ئەو ئاخڤتنە بەرامبەر هەر گرۆپ و پێكهاتەیەكێ دی یێ رۆژهەلاتا ناڤی گۆتبا، هەموو دیبلۆماسییەتا وی گرۆپی وەكو شانەیا هنگڤینی دا لڤیت بۆ وێ چەندێ كاری ل سەر بكەت».
سەرۆكێ ناڤەندا فرەنسی بۆ ڤەكۆلینان ل سەر ئیراقێ، باسێ كاریگەرییا ماكرۆنی ل سەر سەركردەیێن جیهانێ كر و ئاماژە ب دیدارا د ناڤبەرا نێچیرڤان بارزانی، سەرۆكێ هەرێما كوردستانێ و دۆنالد ترەمپ، سەرۆكێ هەلبژارتیێ ئەمریكا كر ل ڤەكرنا كاتیدراییا نۆتردامێ ل پاریس و گۆت» دەمێ سەرۆكێ فرەنسا دەلیڤەیا گەنگەشێ د ناڤبەرا نێچیرڤان بارزانی و دۆنالد ترەمپی دا پەیدا دكەت، ئەو ئاماژەیە كو ماكرۆن دخوازیت راستەوخوە كاراییا خوە ل سەر بڕیارێن ترەمپی ل دۆر رۆژئاڤا و هەرێما كوردستانێ دانیت».
د. عادل باخەوانی باسێ رۆلێ نێچیرڤان بارزانی د كێمكرنا گرژیێن دەڤەرێ ب تایبەت د ناڤبەرا توركیا و هێزێن سوریا دیموكرات (هەسەدە) كر و گۆت» ئەو چەندا ئەز ل سەر ئاگەهدار نێچیرڤان بارزانی، سەرۆكێ هەرێما كوردستانێ د ئێك دەمدا ل گەل توركیا و رۆژئاڤایێ كوردستانێ د ئاخڤیت، هەروەسا ئەو چەندە ئەز ل سەر ئاگەهدار ل پشت پەردێ و ب ئارامی سەرۆكایەتییا هەرێما كوردستانێ و سەرۆكێ هەرێما كوردستانێ دانوستاندنا راستەوخوە ل گەل توركیا و هەسەدێ یا هەی بۆ وێ چەندێ چەكێن وان بهێنە بێ دەنگكرن. ئەڤە ژی هەر ئەو ە یا وەزیرێ دەرڤە یێ فرەنسا داخوازكری».
ل دووڤ گۆتنا د. عادل باخەوانی، فرەنسا ل سەر سێ ئاستان ل رۆژئاڤایێ كوردستانێ كاردكەت، ئاستێ ئێكێ پێكدهێت ژ ئێكخستنا مالا كوردی، ئاستێ دویێ ب هێزكرنا پەیوەندیێن خوە ل گەل دەستهەلاتدارێن نوو یێن سووریێ، كو پشتی ژناڤچوونا دەستهەلاتا بەشار ئەسەدی ل دەستپێكێ ب شاندەكێ دەستپێكر و پاشی وەزیرێ دەرڤەیێ فرەنسا هنارتە سووریێ و ل گەل ئەحمەد شەرع، سەرۆكێ دەستهەلاتا نوو ل سووریێ كۆمبوو، كو دخوازیت ل گەل دەستهەلاتدارێن نوو یێن سووریێ پرسا كوردی باس بكەت و كوردێن سووریێ د حوكمەتا داهاتییا سووریێ دا ببنە دینامیكەكێ ستراتیژی. ئاستێ سیێ ژی وەكو د. عادل باخوان باس دكەت: پێكدهێت ژ هەماهەنگیێ ژ روویێ نێڤدەولەتیڤە، ب تایبەت ل گەل ئەنقەرە و واشنتۆن، دخوازیت ل گەل توركیا كار بكەت تاكو چەك بهێنە بێ دەنگكرن، فرەنسا ل گەل ئەمریكا ژی كار دكەت كو باوەریێ بۆ دۆنالد ترەمپی دروست بكەن تاكو هێزێن ئەمریكا ژ رۆژئاڤایێ كوردستانێ نەڤەكێشیت.