دیدار، سالار محەمەد دۆسكی:

حەسەن سلێڤانەی، بەربژێرێ‌ هەژمارە (16) لیستا (190) یا پارتی دیموكراتی كوردستان دا، ل دور هەلبژارتنا خوە بۆ بەربژێری یا پەرلەمانێ‌ كوردستانی بۆ ئەڤرۆ گۆت: پرۆگرامێ‌ من پرۆگرامێ‌ سەرەكیێ‌ پارتی دیموكراتی كوردستان، لژێر دروشمێ‌ (ئارامی و ئاڤەدانی، پێكڤەژیان و خوراگری)، چونكە ئەز بەربژارێ‌ پارتی دیموكراتی كوردستانم دێ‌ هەمی بزاڤێن من ئەوبن دچارچووڤێ‌ ڤی پرۆگرامی دا كار و خزمەتا گەل و وەلاتێ‌ خوە بكەم.
حەسەن سلێڤانەی، بەربژارێ‌ پارتی دیموكراتی كوردستان ئەو ژی گۆت: كاركرن ژ بوو پتر پاراستن و گەشەپێدانا رەوشەنبیرییا كوردی و پێشڤەبرنا زمان و ئەدەبێ كوردییە و دابینكرنا ژیانەكا ژ هەژی بۆ خەلكێ‌ كوردستانێ‌، نڤیسەر و هونەرمەند و رۆژنامەنڤێسێن كوردستانێ‌، دیسا خورتكرنا پەیوەندیان و ئاڤاكرنا پرێن رەوشەنبیری دناڤبەرا هەمی نڤیسەرێن كورد ل هەر چار پارچێن كوردستانێ‌، كاركرن ژبو دامەزراندنا پەرتوكخانا نشتیمانی یا كوردستانێ‌ بو پاراستنا كەدو بەرهەم و بەلگەنامێن ب كوردستانێ‌ ڤە گرێدایی، كاركرن ژبوو پاراستنا مافێن مرۆڤی و ئازارێن تاكە كەسی و رێزگرتن ل بیرەوەریێن ژێك جودا، پاراستنا گیانێ‌ پێكڤە ژیانێ‌ و لێبورینێ‌ و هاندانا دیالوكێ‌ دناڤبەرا ئاین و نەتەوە و زمانێن دیتر كو ئێك ژ نیشانێن پێشكەفتنێ‌ یە، بەرەڤانیرن ژ هزرێن مرۆڤانیێ‌ و كاركرن دژی هزرێن تیرۆرێ‌، كاركرن ل سەر ئازادی یا هزری و سیاسی ل كوردستانێ‌.
حەسەن سلێڤانەیی گۆت: دەنگدان بۆ لیستا (190) دەنگدانە بۆ خوینا شەهیدێن كورد و كوردستانێ‌ و خوراگریا پێشمەرگێ‌ قەهرەمان ئەوێن شیاین دەسكەفتێن كوردستانێ‌ ب پارێزن و نەهێلێن دوژمنێ‌ مللەتێ‌ كورد جارەكا دی ئاخا پیرۆزا كوردستانێ‌ ب هەرمینن، دەنگێ‌ هەوە بۆ لیستا (190) دەنگدانە بۆ سەربلنداهی یا كوردستانێ‌ و بەردەوامی یا خزمەتا گەل و وەلاتی یە.، دەنگدان بۆ لیستا پارتی دیموكراتی كوردستان دەنگدانە بۆ پاشەرۆژەكا گەشتر بۆ خەلكێ‌ كوردستانێ‌ وەفاداری یە بۆ خەباتا مللەتێ‌ كورد ب رێیا ئازادیی.

ئامێدیێ‌، مەحمود نهێلی

ئاخچین جبرائیل دۆسكی بەربژارا ژمارە (36) سەر ب لیستا پارتی دیموكراتی كوردستان یا ژمارە( 190) بۆ رۆژناما ئەڤرۆ دیاركر، ئێكەم ئەركێ‌ وێ‌ د پەرلەمانی دا دێ‌ پاراستنا هەیبەت و شكویا وەلاتیێن كوردستانێ‌ و پاراستنا ئازادی و پێكڤە ژیانێ‌ بیت، دێ‌ بمە پارێزەرا مافێن هەموو تەخ و چینێن خەلكێ‌ كوردستانێ‌ و بجهئینانا ئەجیندایێن پارتی دیموكراتی كوردستان.
ئاخچین دوسكی زێدەتر گۆت: ئەو بەرنامەیێ‌ پارتیا مە پارتی دیموكراتی كوردستان و لیستا (190) دانای داكو دخۆلا نوویا پەرلەمانێ‌ كوردستانێ‌ كار ل سەر بكەت، كارنامەیەكا تێر و تەسەل و گشت گیر و د خزمەتا هەموو خەلكێ‌ كوردستانێ‌ و وەلاتیان دا یە.
ئاخجین دۆسكی و دیاركر، دێ‌ كار كەت بۆ دیتنا دەلیڤەیێن كاری و دامەزراندنا دەرچویێن كولیژ و پەیمانگەهان و هەروەسا گرنگی دان ب ئافرەتان و رۆل و پێگەهێ‌ ئافرەتێ‌ دێ‌ كارنامەیا وێ‌ یا تایبەت بیت.
هەروەسا گۆت: گرنگی دان ب كەرتێ‌ گەشت و گۆرازی و كەرتێ‌ چاندنێ‌ و كەرتێ‌ پەروەردێ‌ و كەرتێ‌ ساخلەمیێ‌ دێ‌ ڤان بیاڤان دا هەموویان كار ل سەر كەین بتایبەتی ژی پتر گرنگی دان ب دەڤەرا ئامێدیێ‌.
ئاخچین جبرائیل دۆسكی خەلكا گوندێ‌ نێروە سیتو ل دەڤەرا دوسكی ژۆریا ڤە و ل سالا 1994 ل وەلاتێ‌ ئیرانێ‌ و د پەنابەریێ‌ دا ژ دایكبوویە و ماموستایە و كچا پێشمەگەریەكێ‌ یە و چەندین سالان د رێزێن ئێكەتیا ئافرەتێن كوردستانێ‌ دا كار دكەت و هەروەسا رۆلەكێ‌ بەرچاڤ هەبوویە د رێخراوا قوتابیان و رێكراوێن جەماوەری دا.

دوهی ئێكشەمبی 6/10/2024، مەسرور بارزانی، جێگرێ سەرۆكێ پارتی دیموكراتی كوردستان، ل باژێرێ دهۆكێ ل گەل مامۆستایێن زانكۆیێن دهۆكێ كۆمبوو و د پەیڤەكێدا راگەهاند، ئەڤ هەلبژارتنە دێ روودانەكا هەستییار ودیرۆكی بیت بۆ پاشەڕۆژا هەرێما كوردستانێ.
گۆت ژی» هەر بڕیارەكا د ڤان هەلبژارتناندا بدەین دێ چارەنڤیسێ وەلاتێ خوە دیار كەین، پاشەڕۆژا زارۆیێن خوە دیار كەین، بڕیاردانا مە دێ دیار كەت پشتی ڤان هەلبژارتنان ل چار سالێن داهاتی شێوازێ حوكمڕانیێ ل هەرێما كوردستانێ، دێ ب چ شێوە بیت».
مەسرور بارزانی دیاركر» بڕیار د رۆژەكێدا بۆ هەلبژارتنان دهێتە دان، بەلێ بڕیارا ڤان هەلبژارتنان چار سالان بەردەوام دبیت، هەروەسا ئەنجامێ بڕیارا هەوە هەر چ بیت، ئەڤ چار سالێن حوكمڕانیێ دیسان دێ بیتە بەرهەمێ بڕیارا هەوە، لەوما داخوازێ ژ هەموو خووشك و برایێن هێژا دكەم، چ ئەوێن ئەڤرۆ ل ڤێرێ د روونشتی یان هەموو ئەو هەڤوەلاتیێن ل هەر جهەكی و گوه ل مە دبن، داخوازێ ژ هەوە دكەم د ڤان هەلبژارتناندا بڕیارەكا نەتەوەیی و نیشتمانی بدەن، بۆ ئەوێ چەندێ بزانین پاشەڕۆژا ڤی وەلاتێ وڤان دەستكەفت و ئەزموونا كو بەرهەمێ خوینا شەهیدان و رەنج و خەباتا پێشمەرگەی و خۆڕاگرییا خەلكەكێ قەهرەمانە، ب هەدەر نەچیت».
راگەهاند ژی» هەكە ئەم دەنگی نەدەین و هەر ئێك ژ مە وەسا پێشبینیێ بكەت كو ئەڤ رەوشە دێ بەردەوام بیت، یان دەنگی بدەم یان دەنگی نەدەم هیچ جوداهییەك نینە، ئەڤە شاشییە، چونكە هەكە هەر ئێك ژ مە دەنگی نەدەت، دێ كەسەكێ دی ل شوونێ دەنگی دەت، هەكە هوون بڕیارێ نەدەن، دێ كەسێن دی ل شوونا هەوە بڕیارێ دەن، ب تایبەت هوون مامۆستایێن هێژا، ئەركەكێ گەلەك پیرۆز یێ ل سەر ملێ هەوە، لەوما دڤێت هوون رێنمایان بدەنە هەڤوەلاتیێن دی ژ خویندكار و قوتابییان و هەر كەسەكێ كو هەوە كاریگەری ل سەر دەنگدانا وی هەی، بچنە سەر سندووقێن دەنگدانێ تاكو پاشەڕۆژا خوە مسۆگەر بكەن، ئەز ژی یێ د وێ باوەریێدا بڕیارا هەوە دێ بڕیارەكا راست و دروست بیت».
گۆت ژی» چاڤەڕێ دكەین نەكو هەر هوون ب تنێ، بەلكو كەسوكارێن هەوە و خزم و جیرانێن هەوە، ل گەل قوتابیێن هەوە بهێنە هاندان رۆژا 20/10/ 2024 بچنە سەر سندووقێن دەنگدانێ و دەنگی بدەنە لیستا 190 یا پارتی دیموكراتی كوردستان. گرنگییا ڤان هەلبژارتنان بۆمە د دەمەكی دایە كو گوهۆڕینێن ب لەز ل دەڤەرێ روو ددەن و یا دیار نینە چارەنڤیسێ دەڤەرێ ژی دێ بەر ب كیڤە چیت، لەوما وەلاتێ مە پێدڤی ب بڕیارەكا حەكیمانە یا هەی و سەركردایەتییەكا حەكیمانە دڤێت، تنێ ب پەیڤ ئاخڤتنان و سۆز دانێ، وەلات بڕێڤە ناچیت، لەوما پێدڤییە مە ڤەخواندنەكا دروست ل سەر بۆریێ هەر ئالییەكێ سیاسی هەبیت، بۆ وێ چەندێ بزانین ل ئاستێ بڕێڤەبرنا ڤی وەلاتی نە یان نە».
مەسرور بارزانی، جێگرێ سەرۆكێ پارتی دیموكراتی كوردستان د پەیڤا خوە دا بۆ مامۆستایێن زانكۆیا دهۆكێ گۆت ژی» هەكە وەلاتێ مە نەچاری قوربانیدانێ بیت، ئەو سەركردایەتییا دهێتە هەلبژارتن كو د وی ئاستی دانە خوە بكەنە قوربانی بۆ خەلكێ خوە یان وەكو گەلەك ئالییان، وەكو هەموو جاران مللەتی دكەنە قوربانی خوە، بەلێ ئەز بێگومان بۆ هەوە دبێژم پارتی ئەو پارتە كو ل سەر دەستێ بارزانیێ نەمر دروست بوویە و نوكە ژی كو سەرۆك بارزانی رێبەرییا وێ دكەت ئەو حزبە كو هەردەم خوە كریە قوربانی مللەتێ خوە».
خویاكر» هەر ژ دەستپێكا دامەزراندنا خوە، پارتی بۆ وێ چەندێ هاتە دامەزراندن كو پێدڤییەكا نیشتمانی بوو، مللەتێ مە كەفتبوو بەر هەوا قڕكرنێ، ئاخا مە دهاتە وێرانكرن، خەلكێ مە بێ هیڤی كربوو، ئەو دەستكەفتێن پێشتر هەبوون، بەر ب ناڤچوونێ دهاتنە برن، خەلكێ كوردستانێ وەلێكربوو باوەری ب دۆزا خوە نەمینیت، بەلێ بارزانیێ نەمر بڕیارا دامەزراندنا پارتی دا، پارتی وەكو بزاڤەكا رزگاریخواز كو هەموو تەخ و چینێن كوردستانێ بێی جوداهی ل هەر باژێر و باژێرەك و دەڤەرەكا كوردستانێ، ب هەر بیر و بۆچوون و ئایینەكێ جودا و ئایین و نەتەوەیەكی بیت ل بن سیبەرا پارتی خوە ببینیت. ل وی دەمی ئەڤە بڕیارەكا حەكیمانە بوو. ڤێ چەندێ ژی وەكر بۆ جارا ئێكێ د دیرۆكا هەڤچەرخدا، بزاڤەكا رزگاریخوازییا نیشتمانی، نەكو ب تنێ نەتەوە، بەلكو نیشتمانی ل سەرانسەری كوردستانێ پەیداكر، ئەگەرێ مانا پارتی و سەركەفتنا پارتی رۆژ ل دووڤ رۆژێ، بۆ وێ بڕیارا حەكیمانەیە كو وی دەمی بارزانیێ نەمر دای، ئەڤرۆ ژی ئەم شانازیێ دكەین كو هەر ل سەر ڤێ رێكێ بەردەوامین و قوتابیێن ڤێ رێبازێنە، هیڤییا مە ژی ئەوە ئینشائەللا ب پشتەڤانییا خەلكێ كوردستانێ رۆژ ل دووڤ رۆژێ دێ دەستكەفتێن زێدەتر بۆ ڤێ پارتێ زێدەكەین كو د خزمەتا مللەتێ خوە دایە».
جێگرێ سەرۆكێ پارتی دیموكراتی كوردستان پتر گۆت» د جهێ خوەدایە سوپاسییا مامۆستایێن كوردستانێ بكەم كو د ڤی دەمێ بۆریدا خوە ل بەر نەخوەشییان گرت و فشارەكا ئابوورییا مەزن ل سەر وان بوو، بەلێ مامۆستا هەر وەكو ناڤ و پیشەیا وان، نەكو هەر ب وانەگۆتنێ بەلكو ب كریار سەلماند كو پێدڤییە مرۆڤ قوربانیێ بدەت بۆ بەرژەوەندییا وەلات و مللەتێ خوە، خوە ل بەرامبەر هەموو فشاران گرت و رێك نەدا پڕۆسەیا خواندنێ پەككەڤیت، نەهێلا قوتابی ژ فێربوونێ و خواندنێ بێ بەهر ببن، ئەڤە ژی جهێ دەستخوەشیێیە، وەستییان و خۆڕاگرییا هەوە جهێ رێزلێنانێیە، لەوما ئەم گەلەك سوپاسدارێن هەوەینە بۆ وێ هەموو وەستییانا هەوە د دەمێ بۆریدا دیتی».
سەبارەت پیلانێن دژی قەوارەیێ هەرێما كوردستانێ، مەسرور بارزانی، جێگرێ سەرۆكێ پارتی دیموكراتی كوردستان گۆت» گەلەك بزاڤ هەبوون بۆ وێ چەندێ هەموو جومگێن حوكمەتا هەرێما كوردستانێ تووشی شكەستنێ بهێن، مە ژی هەموو بزاڤ كرن رادەستی وان فشاران نەبین بۆ وێ چەندێ ئەڤ ئەزموونا مە بەردەوام بیت، ئەڤە ژی وەسا یا ب ساناهی نەبوو، بەلێ ئەوا جهێ دلخوەشیێ بوو، چەند نەیارێن مە فشارێن خوە زێدە دكرن، مە زێدەتر هەست ب پشتەڤانییا خەلكێ كوردستانێ دكر، ئەڤە ژی مەزنترین سەروەت و سامانە، بۆ هەر حوكمەت و دەستهەلاتەكێ، ما دام خەلك ل گەل تە بیت، هیچ هێزەك نەشێت تە پشكێنیت».

دوهی ئێكشەمبی 6/10/2024، نێچیرڤان بارزانی، جێگرێ سەرۆكێ پارتی دیموكراتی كوردستان ل هەوا بانگەشەیا هەلبژارتنێن پەرلەمانێ كوردستانێ ل باژێرێ هەولێرێ راگەهاند: رۆژا پارتی هەر یا هەلاتییە و هەردەم ژی دێ یا هەلاتی بیت. هەروەسا گۆت: سەرۆكەفتنا پارتی یا مسۆگەرە.
نێچیرڤان بارزانی، جێگرێ سەرۆكێ پارتی دیموكراتی كوردستان ل دەستپێكا پەیڤا خوە گۆت» هەر ژ ئەڤرۆ سەركەفتنا پارتی یا مسۆگەرە».
هەروەسا گۆت ژی» ئەڤرۆ ئەم یێن ل ڤێرێ كۆمبووین تاكو ل بەر رۆناهییا مەشخەلا 78 سالییا پارتییا مە (پارتی دیموكراتی كوردستان) بانگەشەیا هەلبژارتنان بگێرین، چیرۆكا گەلێ كوردستانێ و پارتی دیموكراتی كوردستان بووینە جێمكەك چو جاران ژێك ناهێنە جوداكرن، پارتی د تاریترین دیرۆكا سیاسییا مەدا چرایەكێ رۆهن و هێزەكا پۆلایی بوویە دژی ستەمێ و ملكەچی ئازادی و دیموكراسی و دادپەروەریێ بوو».
گۆت ژی» ل دەمێن بۆری رێكا مە یا ب ساناهی نەبوو، نوكە ژی د بێ گرفت نینین، ل پاشەڕۆژێدا ژی بێ گرفت نابین، ئەوا پێدڤییە گەلێ كوردستانێ بزانیت، پارتی سەربلندانە مەشخەلا مە بلند راگرتییە و پەیمان دایە بەردەوام بیت ل سەر وێ رێكێ».
جێگرێ سەرۆكێ پارتی دیموكراتی كوردستان ئەوژی گۆت» یێ پشتڕاستم ب هێمەتا گەلێ كوردستانێ دێ خەونا مە یا دێرین بیتە راستی، پارتی مەشخەلا خەبات و قوربانیێ ژ نڤشێ بەری خوە ب ئەمانەت یا وەرگرتی، دڤێت نڤشێ نوكە یێ پارتییا مە وێ مەشخەلێ هەلگرن و بەر ب پێشڤە ببەن، پەیاما رۆژا ئالایێ كوردستانێ و رۆژا درووشمێ پارتی بۆمە و بۆ گەلێ كوردستانێ ئەوە، دبێژیت، دڤێت هەردەم هێز و هیڤییا خوە نوو بكەین، ژبیرا مە نەچیت، رۆژا پارتی هەر یا هەلاتییە و هەردەم دێ هەلیت بۆ خزمەتكرنا گەل و نیشتمانی».
نێچیرڤان بارزانی خویاكر ژی» گەلێ مە ب گەلەك قۆناغێن تاری و نەهامەتیێ و شكەستنێ دەرباز بوویە، بەلێ هیچ دەمەكی نە شكەستن پێناسەیا پارتی بوو، نە بێهیڤی پێناسەیا پارتی بوو، پێناسەیا مە وەكو مللەت، وەكو پارتی دیموكراتی كوردستان، تیشك و پرشنگ و رۆناهی و گەشەیا ژیانێیە، پارتی وەسا ژ دایكبوویە، وەسا بەردەوام بوو، هەر ب وی رەوتی ژی دێ بەردەوام بیت».
نێچیرڤان بارزانی گۆت ژی» پارتییا مە ژ پارتەكا سیاسی مەزنتربوو، ئەم بزاڤەكین بووینە چرایێ رۆناهییا گەلێ كوردستانێ ب هەموو پێكهاتەیێن خوەڤە، ل دەمێن بۆری مە تاری ڤەرەڤاند، ل سەردەمێ مە یێ نوكە ئەم دەستپێشخەر و گرەنتی و ئاڤەدانی و سەقامگیری و ئاسایشا كوردستانێ و پێشكەفتنا كوردستانێ نە، دەمێ بارزانیێ نەمر ل سالا 1946 پارتی دیموكراتی كوردستان دامەزراندی، تنێ رێكخراوەك نەبوو، بەلكو پارتی بوو ستێرەكا نووژیانێ بۆ كوردان، بۆ گەلێ كوردستانێ كو ژ مێژەبوو د بێ بەهر بوون ژ ماف و دەنگ و ناسنامەیا خوە، ئەم پەیرەوكارێن پارتی دیموكراتی كوردستان و رێبازا پیرۆزا بارزانی، پێگیرین ب وێ رێبازێ نەكو ژ بەر بارزانی بوونێ، نەكو ژبەر وێ چەندێ پارتی دیموكراتی كوردستان دامەزراند، بەلكو ژ بەر وێ چەندێ رێبازا كوردایەتیێ و خۆڕاگریێ و خەبات و خەباتا مللەتەكێ ژێر دەست بەرجەستە كر».
ئەوژی گۆت» بۆ وێ رێبازێ، بۆ كوردستانەكا پڕ ئازادی، هەرێمەكێ ل سەر بنەمایێ دیموكراسی بڕێڤەبچیت، دیرۆكا مە یا دوور و نێزیك، خەباتا بێ راوەستییان ب خوەڤە گرت، كو ل ڤێ هەرێما مە، ل ڤێ كوردستانا مە، كێم خێزان یێن هەین قوربانی نەدابیت، رەنگێ سوور یێ ئالا مە بیرئینانا خوینا شەهیدانە كو گیانێ خوە بەخشی تاكو ئەم ل ڤێرێ ب زمانێ خوە باخڤین و ئاهەنگان بگێرین ژ پێخەمەت نیشتمانێ مە، درێژیێ ب كاروانێ خەباتا خوە بدەین، ئەم سوپاسدارێن ژن و زەلامێن ڤی مللەتی نە كو گیانێ خوە بەخشییە ژ پێخەمەت ئازادییا ڤی مللەتی».
نێچیرڤان بارزانی ئاماژەكر» قوربانیدانا گەلێ كوردستانێ، بیرئینانە كو ئازادی وەكە جەژنانە ناهێتە بەخشین، بەلكو ب خەبات وقوربانیدانێ ب دەستڤە دهێت، قوربانیدانا مە ب هەدەر نەچوویە و ناچیت، هەموو قوربانیێن مە، ئەم ژ ئارمانجا كوردستانەكا دیموكرات و ئازاد نێزیك كرینە، ل ڤێرێ دخوازم سوپاسییا خۆڕاگرییا گەلێ كوردستانێ بكەم، چونكە سەرەرای روو ب رووبوونا دژوار هەر ژ بڕینا بودجەی، گەفێن داعشێ بۆ نەهێلانا شوونوارێن ژیانێ ل هەرێما كوردستانێ و دەڤەرێن دابرای، سەرەرای دوورپێچا سەربازی، دائێخستنا ئەسمان و سنوورێ كوردستانێ، گەلێ كوردستانێ پشتەڤان بوو بۆ پەرلەمانی و حوكمەتێ و سەرۆكایەتییا هەرێمێ و هێزا پێشمەرگەی و ئاسایشا كوردستانێ، ل گەل گەشەكرنا مەدا، دڤێت ئەڤ پرەنسیپە د هەموو كارێن مەدا ، ئارمانجێن مەدا، ئاڤاكرنا جڤاكەكی بیت كو هەموو تاكەك تێدا بشێت یێ دادپەروەر و سەربلند بیت».
نێچیرڤان بارزانی رۆهنكر ژی» دڤێت ئەم وەكو مەشخەلا نەورۆزێ بین، كوردستان رۆژ ل دووڤ رۆژێ د پێشكەفتنێ دا یا بەردەوام بیت، د نووكرنا هیڤیێ بۆ گەلێ كوردستانێ، بۆ هەموو ئەوێن كو باوەری ب ئازادیێ و دادپەروەریێ و شكۆمەندییا كوردستانێ هەبیت، تنێ دەنگێ ئازاد و وێرەكێ هەوە و گەلێ مە گرەنتییە بۆ بەردەوامبوونا گەشەیا سیاسی و جڤاكی و كەلتوورییا وەلاتێ مە ب رێبەرییا سەرۆك بارزانی و پارتی دیموكراتی كوردستان».

رەمەزان زەكەریا:

باسل گۆران، بەربژارێ هەژمار 4 ل سەر لیستا هەژمار ‌190 یا پارتی دیموكراتی كوردستان بۆ خولا شەشێ یا پەرلەمانێ كوردستانێ بازنەیێ دهۆكێ‌، بەرنامەیێ خۆ یێ هەلبژارتنا ئاشكرا كر و گۆت: هەموو شیانێن خۆ دێ بۆ پشتەڤانیكرنا هێزێن ناڤخۆ، پۆلیس، ئاسایش و پێشمەرگەی مەزێخم.
بەربژار باسل گۆران، دیدارەكێ بۆ رۆژناما ئەڤرۆ گۆت: دێ كاری بۆ بجهكرنا كارنامەیا پارتی دیموكراتی كوردستان كو بۆ چار سالا هاتیە دارشتن كەم و پاشی من بەرنامەیێ خۆ یێ تایبەت هەیە.
باس گۆت: دەمێ 22 سالایە وەك ئەفسەرەكێ هێزێن ناڤخۆ سەر ب وەزارەتا ناڤخۆ ڤە كار دكەم و خزمەتا ئەمن و ئاسایشا كوردستانێ دكەم و ل هەرجهەكی بم و هەر پلە و پۆستەكی وەرگرم دێ هەر د خزمەتا پاراستنا كوردستانێ و جڤاكی دابم .
ناڤبری گۆتژی: ب درێژاهیا دەمێ بووری ل ناڤ هێزێن پۆلیس و ئاسایشێ‌ كو من ل سنوورێ پارێزگەها دهۆكێ‌ خزمەتكریە، من هەردەم دەرگەهێ مال ژی ڤەكریە بۆ هەر كەسێ ب سەرەدان یان ئاریشە بهێتە مال و خزمەتا وان بكەم، هەكە باوەری ب من هاتە دان و بوومە پەرلەمانتار دێ شێم پتر خزمەتا هەموو هێزێن ناڤخۆ ئاسایش و پۆلیسان كەم .
ناڤهاتی گۆت : دێ ل دەڤەرا بەردەڕەش و هەموو سنوورێ پارێزگەها دهۆكێ‌ كار كەم بۆ وێ چەندێ هەموو خەلكێ دەڤەرێ ژ وان پرۆژەیان مفاداربن كو پێشكێش دكەین، ئارمانجا من خزمەتكرنە.
ئاشكرا كر : دێ گەلەك ب رژدی كاركەم بۆ خۆشتركرنا ژین و ژیارا هێزێن ناڤخۆ، ئاسایش، پۆلیس و پێشمەرگەی، چونكو 22 سالە ئەفسەرم و باشتر ژ هەمووان د رەوشا هێزێن پێشمەرگەی و هێزێن ناڤخۆ دگەهم .

ئەڤرۆ، هەرهین محەمەد:

پارێزەر و كورە شەهید بوتان سەگڤان رەشید فەلەك دۆسكی، بەربژارێ‌ هەژمار (7) لیستا (190) یا پارتی دیموكراتی كوردستان ل بازنێ‌ دهۆكێ‌ راگەهاند، هەكە خەلكێ‌ مە باوەری دا من و چوومە پەرلەمانێ‌ كوردستانێ‌ ل دەستپێكێ‌ وەك پێشمەرگەكی ل پەرلەمانی دێ‌ درێژەپێدەرێن خەباتا مەدەنی بین و ب دەرئیخستنا قانوونێن باش دێ‌ خزمەتا مللەتێ‌ خوە كەین و هەمی بزاڤا دێ‌ كەین ژێرخانا ئابووری ل پارێزگەهێ‌ بەر ب پێشڤە ببیەن و ئەڤە ژی بهێزا گەنجان دهێتەكرن، دروستكرنا دەلیڤەیێن كاری و مفا وەرگرتن ژ شارەزایا وارێن جودا ژ دەرچوویێن زانكۆ و پەیمانگەهێن كوردستانێ‌، دیسا دێ‌ گرنگیەكا مەزن دەینە كەرتێ‌ پەروەردێ‌ و ساخلەمیێ‌ و دێ‌ كار ل سەر وێ‌ چەندێ‌ كەین هەیبەتا مامۆستایان وەك جاران ڤەگەڕیت و هێز و سەنگا خوە د ناڤا جڤاكی دا هەبیت و ژین و ژیارا وان بهێتـە خۆشكرن.
هەروەسا پێداچوون د پرۆگرامێن خواندنێ‌ دا ل هەمی قوناغا بهێتەكرن، پێداچوون ل كەرتێ‌ ساخلەمیێ‌ بهێتەكرن ئەڤە ژی دێ‌ ژ كارێن مەبن، چونكو ژیانا خەلكێ‌ مە ژ هەر تشتەكی گرنكترە و هەمی بزاڤا دێ‌ كەین مفا ژ شارەزایی و شیانێن دەرچوویێن كۆلیژێن نۆشداری بهێتە وەرگرتن و ئێدی خەلكێ‌ مە بۆ چارەسەریێ‌ پێدڤی ب چوونا دەرڤە نەبیت، هێزێن ناڤخو وەك پشكەكا گرنگا وەلاتێ‌ مە و تەناهی و ئارامی بەرهەمێ‌ رەنج و ماندیبوونا وانە و تایبەت تەخا خانەنشینێن ناڤخو دێ‌ هەمی بزاڤا كەین مووچەیێ‌ وان وەك یێن خانەنشینێن ئیراقێ‌ لێ‌ بهێت و هەمان قانوونا ئیراقێ‌ ل كوردستانێ‌ ژی بهێتە بجهئینان، گرنگە ل ڤێ‌ قوناغێ‌ خزمەتا خێزان و كەس و كارێن شەهیدان و پێشمەرگەیێ‌ قەهرەمان و زیندانیێن سیاسی و ئەنفالكریان بهێتەكرن و دێ‌ كار كەین ژین و ژیارا وان بهێتە خۆشكرن.
پارێزەر و كورە شەهید بوتان سەگڤان رەشید فەلەك دۆسكی، هەژمار (7) لیستا (190) یا پارتی گۆتژی: داخوازێ‌ ژ خەلكێ‌ خوە دكەین دەنگی بدەنە لیستا (190) ئەو لیستا قەوارەیێ‌ هەرێما كوردستانێ‌ پاراستی.

ئامێدیێ‌، مەحمود نهێلی:

مەیسەر عوبەید نهێلی بەربژارێ‌ هژمار 42 سەر ب لیستا 190 یا پارتی دیمۆكراتی كوردستان بازنێ‌ دهۆكێ‌ بۆ خولا نوو یا پەرلەمانی كوردستانێ‌ دیار كر، كو ب حوكمێ‌ وێ‌ یەكێ‌ ئەو خەلكێ‌ دەڤەرا ئامێدیێ‌ یە و ئێش و ئازارێن ڤی خەلكی پتر دزانیت دێ‌ هەموو شیانێن خوە دەتە كاری ژ پێخەمەت خزمەتكرنا خەلكێ‌ ڤێ‌ دەڤەرێ‌ ب تایبەتی و هەموو پارێزگەها دهۆكێ‌ ب گشتی.
ناڤهاتی بۆ رۆژناما ئەڤرۆ دیار كر، ئەو دێ‌ ل سەر كارنامەیا پارتی دیموكراتی كوردستان كار كەت كو هەموو یا گرێدایە ب كار و خزمەتكرنا خەلكێ‌ كوردستانێ‌ ڤە و گۆت: ئەو دێ‌ پتر ل سەر خزمەتكرنا تەخا گەنجان كار كەت و دیتنا دەلیڤەیێن كاری و ئینانا وەبەرهێنەران بۆ دەڤەرا ئامێدیێ‌، ژ بەر كو دەڤەرەكە پتری هەموو جهەكی خەلكێ‌ وێ‌ نەخۆشی دیتنە و ئازار كێشاینە و قوربانی داینە و هەیاما پتر ژ 100 سالایە شەڕ ل ڤێ‌ دەڤەرێ‌ بەردەوامە و خەلكێ‌ وێ‌ گەلەك نەخوەشی دیتینە، ژ بەر وێ‌ یەكێ‌ دێ‌ هەموو شیانێن خوە دەینە كاری بۆ خوەشكرنا ژیانا خەلكێ‌ ڤێ‌ دەڤەرێ‌ و بەرچاڤكرنا گلە و گازندەیێن خەلكی و ئارام كرنا دەڤەرێ‌.
مەیسەر نهێلی دیار ژی كر، خالەكا دی یا گرنگ ئەوە كو ئەو ل سەر كار بكەت كەرتێ‌ كەلتوری و وەرزش و لاوانە و گۆت: د وارێ‌ كەلتوری دا دەڤەرا مە دەڤەرەكا زەنگینە ژلایێ‌ فلوكلوری ڤە و دێ‌ بزاڤێ‌ كەین یاسایێن تایبەت د ڤی واری دا دەربێخین ژ پێخمەت پاراستنا كەلتو و كەلەپۆرێ‌ دەڤەرێ‌ و پێشئێختن و بەرچاڤكرنا وی.
ناڤهاتی گۆت:(ب حكمێ‌ وێ‌ یەكێ‌ كو من د وارێ‌ وەرزش و لاوان دا كاركریە، باش د نەخۆشیێن وان دگەهم، ژ بەر وێ‌ یەكێ‌ دێ‌ شێم د ڤی واری دا كارەكێ‌ باش بۆ گەنجان بكەم، ب تایبەتی ژی د وارێ‌ وەرزشێ‌ دا ).
مەیسەر نهێلی، كوڕێ‌ شەهید عوبەید ئەمین رەشاڤەییە ژ دایكبوویێ‌ سالا 1983 یێ‌ یە ل ناحیا دێرەلۆكێ‌ و خودان باوەرنامەیا ماستەرێ‌ یە و زێدەبری مامۆستایێ‌ زانینگەهێ‌ یە، سكرتێرێ‌ ئێكەتیا لاوێن دیموكراتا كوردستانێ‌ یە و چەندین سالان ژی رێڤەبەرێ‌ رێڤەبەریا هونەرێ‌ شانوویێ‌ بوویە ل دهۆكێ‌ و نوكە بەربژارێ‌ لیستا 190 یا پارتی یە.

ئامێدیێ‌، مەحمود نهێلی:

خدر اسلام انور محمد امین یێ‌ بەرنیاس ب مەلا خدر شێخ ئیسلام بەرگارەی، بەربژارێ‌ هەژمار 43 ل سەر لیستا پارتی دیموكراتی كوردستان یا هەژمار 190 . دیار كر، بەرنامەیێ‌ وی بەرمامەیێ‌ كارنامەیا لیستا پارتی دیموكراتی كوردستانە كو بەرنامەیەكێ‌ گشتگیر و دارێتی و تێروتەسەلە، بۆ خزمەتكرنا هەموو تەخ و چینێن گەلێ كوردستانێ‌.
مەلا خدر بۆ رۆژناما ئەڤرۆ گۆت: زێدەباری ڤێ‌ یەكێ‌ من سۆز یێ‌ دایە خودێ‌ چ ل سەر مینبەرا پێغەمبەری بیت سلاڤێن خودێ‌ ل سەر بن یان ژی ل پەرلەمانی بیت و هەر جهەكێ‌ لێ‌ بم ئەز د خزمەتا دین گەل و وەلاتێ‌ خوە دا بم و بەردەوامیێ‌ بدەمە خزمەتا مینبەرێ‌ و مزگەفتا و قوتابخانێن ئاینی.
دیار كر، دێ‌ كار كەم پتر گرنگیێ‌ بدەمە پێكڤەژیانێ‌ ل كوردستانێ‌ د ناڤبەرا هەموو ئول و مەزهەبا و یێ‌ رژدبم ل سەر بەرنامەیێ‌ كارێ‌ خوە ژ بۆ خزمەتكرنێ‌.
خدر اسلام انور ژ دایكبوویێ‌ سالا 1977ێ‌ ل گوندێ‌ زێوكا شێخا دەڤەرا بەرێ‌ گارەێ‌ یێ‌ سەر ب ناحیا دێرەلۆكێ‌ قەزا ئامێدیێ‌ ڤە.
ناڤهاتی باوەرنامەیا ماستەرێ‌ ب ( زانستێن ئیسلامی) هەیە و دەرچوویێ‌ پەیمانگەها پێشنڤێژ وگۆتارخوینانە ل دهۆكێ‌، و ل كۆلیژا شەریعەتی (الامام الاعزەم (ل باژێرێ‌ میسل سالا 2014 ێ‌ .
مەلا خدر كەسەكێ‌ شارەزایە د وارێ‌ زانستێن فقهێ‌ ئیسلامی و زانستێن دەروونی دا و پەرتووكەك ب ناڤێ‌ (ئەز و ئەنفال) نڤیسی یە و چاپكریە و نوكە ژی ڤە كۆلینەك ل سەر قڕكرن و جینۆساید كرنا خەلكێ‌ دەڤەرا بەرێگارێ‌ گوندێ‌ گویزێ‌ وەك نموونە ل بەر دەستە بۆ چاپكرنێ‌.

رەمەزان زەكەریا

مامۆستا سەمیان فەتحی هەركی ، بەربژارا ژمارە 30 ل سەر لیستا ژمارە 190 یا پارتی دیموكراتی كوردستان بۆ خولا شەشێ‌ یا پەرلەمانێ‌ كوردستانێ‌ بازنەێ‌ دهۆك بەرهەمێ‌ خۆ ئاشكراكر ، هەموو شیانێن خۆ دێ‌ مەزێخم بۆ خزمەتكرنا پێشمەرگەیان و رێكخستنا دەوامێن وان و پشتەڤانیكرنا وان.
مامۆستا سەمیان فەتحی هەركی ، بەربژارا ژمارە 30 ل سەر لیستا ژمارە 190 یا پارتی دیموكراتی كوردستان بازنەیێ‌ دهۆك ددیدارەكێ‌ دا بۆ رۆژناما ئەڤرۆ گۆت : ئێكەم كارێ‌ من دێ‌ ب جهئینانا كارناما پارتی دیموكراتی كوردستان بیت، و پاشی من بەرنامەیێ‌ خۆەیێ‌ تایبەت بۆ خزمەتكرنا هەموو تەخ وچینێن جڤاكی هەیە، وەك ئەندازیار و مامۆستا و پێشمەرگە و قوتابی و هەژارو كەسێن كێم دەرامەت من دڤێت بیێ‌ جوداهی خزمەتا هەموویان بكەم.
ناڤبریێ‌ گۆتژی: ئارمانجا من خزمەتكرنا هەموو تەخ و چینێن جڤاكیە ل دووڤ بەرنامە و پرەنسیبێن پارتی بەرنامەیێ‌ سەرەكی ژی خزمەتكرنا تەخا هەژارایە من بەرنامە هەیە 50% داهاتێ‌ خوەیێ‌ هەیڤانە بۆ قوتابیێن هەژار و كێم دەرامەت ل پەیمانگەه و زانكۆیان تەرخان بكەم، بۆ وێ‌ ئێكێ‌ بشێن بەردەوامیێ‌ ب خواندنا خۆ بدەن و ئاستەكێ‌ باشتر پێشكەش بكەن ل ناڤ جڤاكی و ببیتە بارسڤكیەك بۆ وان.
ناڤهاتیێ‌ گۆت: دێ‌ كاركەم بۆ پاراستنا بهایێن خێزانی و پشتەڤانیا ئافرەتان ل هەموو بوارەكێ‌ بۆ وێ‌ چەندێ‌ ئافرەت بشێت پتر رۆلێ‌ خۆ ل پێشڤەبرنا جڤاكێ‌ بینیت، ژبەر كو ئافرەتێ‌ شیانێن باش هەنە بۆ ئاڤاكرنا ولاتی ، هەروەسا دێ‌ كاركەم بۆ پێشمەرگەیێن قەهرەمان كو هەژێ‌ ژیانەكا باشترن و سەرۆك و رابەرێ‌ گەلێ‌ كورد سەرۆك بارزانێ‌ دبێژیت ئەز پێشمەرگەمە، لەورا ئەوا شیانێن مندا بیت بۆ باشتركرنا ژیان و ژیارا پێشمەرگەی دێ‌ كاركەم وەك رێكخستنەڤەیا دەوامێن وان و باشتركرنا ژیانا وان دابینكرنا پێدڤیێن سەربازی بۆ هەموو پێشمەرگەیان.
گۆت : دێ‌ كاركەم بۆ باشتركرنا رەوشا ئابووریا هەموو تەخ و چینێن جڤاكی ل هەر بوارەكێ‌ كاربكەن ئارمانجا من خزمەتكرنا وانایە بێ‌ جوداهی هەتا هەموو بگەهن ژیانەكا هەژیتر.

لەزگین جوقی:

د. سگڤان سلێمان خەمۆ دۆسكی، بەربژێرێ‌ ژمارە 27 ل سەر لیستا 190 یا پارتی دیموكراتی كوردستان بۆ خولا نوو یا پەرلەمانێ‌ كوردستانێ‌، تایبەت بۆ رۆژنامەیا ئەڤرۆ ڕاگەهاند: جهێ‌ شانازییێ‌ یە ئەز ل سەر لیستا پارتی دیموكراتی كوردستان بۆ پەرلەمانێ‌ كوردستانێ‌ هاتیمە بەربژاركرن، ئەو پارتا بەری 78 سالان ژ هناڤێن نەتەوەیەكێ‌ بێ‌ خودان دەركەفتی، و ل سەر دەستێ‌ ڕبەرێ‌ مللەتێ‌ كورد بارزانیێ‌ نەمر هاتیە دامەزراندن، و هەمی ژیێ‌ خوە پێخمەتی دۆزا ڕەوایا مللەتێ‌ كورد و هەمی ئاین و كەم نەتەوەیێن جودا جودا ل كوردستانێ‌ دژین تەرخانكری، وەبەرەڤانی ژ ئاخ و سەروەریا كوردستانێ‌ كری، ئەو پارتیا شۆرەش ل دوڤ شۆرەشێ‌ د چەپەرێ‌ بەرەڤانیكرنێ‌ دا مایی و روویبارێن خوینێ‌ رێتین و دەست نەداهێلاینە، داكو ئەڤرۆ كەرامەتا مرۆڤێ‌ كورد و كوردستانی یا پاراستی بیت.
بەربژارێ‌ ژماە 27 ل سەر لیستا پارتی یا ژماە 190 هەروەسا گۆت: دەنگدەرێ‌ خوشتڤی خوە ب سەر بلند دبینم، كو وەكو هەوە ژ مالباتەكا كوردپەروەر قوربانی دایی هاتیمە ژیانێ‌، و ژپەروەردەركنا بابەكێ‌ مە كو 50 سالێن ژیی خوە د سەنگەرێن بەرەڤانیا ژ ئاخا كوردستانێ‌ دەربازكرینە، هەڤدەم پاراستنا دەستكەفتێن كوردستانێ‌ ئێك ژ كارو بەرنامێن پەروەردەكرنا وی بوومە بووینە، داكو ئەم ئەڤرۆ پێكڤە هەست ب ئارامی و بەختوەریێ‌ بكەین، و دكەش ئاوەیەكێ‌ ئازاد دا دناڤ پرۆسەیەكا دیموكراسی دا هەلبژارتنان ئەنجام بدیەن.
دكتور سگڤان سلێمان خەمۆ دۆسكی، بەربژارێ‌ ژمارە (27) ل سەر لیستا (190) خوەیاكر، ئەڤرۆ وەكو نوشدارەك و مامۆستایەكێ‌ زانكۆیێ‌ هاتیمە بەرژار كرن، داكو ژ نێزیك ئاریشەیێن هەوە بزانم و ئەز ئێك ژ هەوە مە، و ل گەل هەوە هەمیان ئاگەهداری ئاریشە و ئاستەنگان و داخوازیێن هەوە باش دزانم، دێ‌ كار كەم وان ئایشە و ئاستەنگ و دخاوازیان دانا هۆلا پەرلەمانێ‌ كوردستانێ‌ ب رێكێن قانوونی یێن هەڤچەرخ بڕیار ل سەر بهێنە دان، وبكەڤنە دبوارێ‌ بجهیئنانێ‌ دا، بۆ نموونە دەرئێخستنا قانوونا بێما ساخلەمیێ‌ پێدڤی ب قانووونەكێ‌ هەیە، وكاركرنەكا پتر ل سەر ئاریشەیا دەرمانان و رەوشەنبیریا ساخلەمیێ‌ و پشتەڤانیا قوتابی و لاوان و ئافرەتان و رێكارێن پەیداكرنا دەلیڤەیێن كاری و داكوكی كرنا ل سەر مافێن فەرمانبەران و باشتكرنا ژیانا تاكە كەسی دجڤاكی، دێ‌ بنە كار و بەرنامە بۆ پەرلەمانێ‌ كوردستانێ‌.
د. سگڤان سلێمان دۆسكی، هەروەسا ئاشكراكر، ئەم دوێ‌ باوەریێ‌ داینە كو خەلكێ‌ مە ب هەمی تەخ و چینێن جڤاكێ‌ دهوكێ‌ ڤە، باوەریەكا موكم ب كارو بەرنامێن مە هەیە و پشتەڤانێن كار و پرۆژەیێن، و هەر ئەم پێدڤی ب پشتەڤانیا و هاریكاریا دەنگێن دلسۆزێن خەلكێ‌ دهوكێ‌ ینە، كو ب دەنگێن خوە یێن سەنگێن باوەریێ‌ خوە بدەنە مە و سۆزێ‌ ددەم دەنگ و رەنگێ‌ هەوە هەمیان بم، و ب دلسۆزی و خەمخوری ە ل دوڤ شیانان كار بكەم، وەكی هەمی قۆناغێن من دیێن كاری ، بەرەڤانیكەرەكێ‌ باشبم ژ كوردستانێ‌ ب گشتی و دهۆكێ‌ و دهۆكیا ب تایبەتی ل سەر رێكا دروست و یا كوردایەتی، چونكی هوین ژ هەژی خزمەتەكا باشترن.
ل دووماهیێ‌ بەربژارێ‌ ژمارە (27) ل سەر لیستا (190) گۆت: ب هیڤینە د رۆژا دەنگدانێ‌ دا ب گۆڕ و تێهنەكا زێدەتر قەستا سندۆقێن دەنگدانێ‌ بكەن، بۆ سەرئێخستنا لیستا پارتی دیموكراتی كوردستان، لیستا ژمارە (190).