بەرپرسێ لژنەیا بلند یا هەلبژارتنێن پارتی دیموكراتی كوردستان راگەهاند: بەرنامەیێ كارێ پارتی بۆ جڤاتا نوونەرێن ئیراقێ، بجهئینانا دەستوورێ بەردەوام یێ ئیراقێیە، پێشكەفتنا ئابۆری و دادپەروەری ل هەرێما كوردستانێ و ئیراقێیە، هەروەسا دبێژیت: پارتی ژ پێخەمەت پێكڤەژیان و ماف و ئازادیێن هەموو پێكهاتەیێن كوردستانێ خەباتێ دكەت.
دوهی ئێكشەمبی 12/10/2025، مەحموود محەمەد، بەرپرسێ لژنەیا بلند یا هەلبژارتنێن پارتی دیموكراتی كوردستان ل رێوڕەسمێ دەستپێكرنا بانگەشەیا هەلبژارتنێن جڤاتا نوونەرێن ئیراقێ د پەیڤەكێدا بەرنامەیێ پارتی دیموكراتی كوردستان بۆ خولا نوو یا جڤاتا نوونەرێن ئیراقێ بەرچاڤكر.
مەحموود محەمەد د پەیڤەكێدا گوت» پارتی دیموكراتی كوردستان دوپاتیێ ل بجهئینانا دەستوورێ بەردەوام یێ ئیراقێ دكەت، بۆ وێ چەندێ سەروەرییا ئاخێ یا پاراستی بیت و كێشە چارەسەر ببن، چونكە ژێدەرێ هەموو كێشەیێن ئیراقێ، بجهئینانا دەستوورییە.
بەرپرسێ لژنەیا بلند یا هەلبژارتنێن پارتی باس ل وێ چەندێ ژی كر» پارتی ژ پێخەمەت پێشكەفتنا ئابۆری، هەمەجۆركرنا جۆرێن داهاتی، بجهئینانا مادەیا 140 یا دەستووری، دادپەروەری ل هەرێما كوردستانێ و ئیراقێ كار دكەت» .
گوت ژی» پارتی دیموكراتی كوردستان ب سەرۆكاتییا سەرۆك بارزانی، ژ پێخەمەت ماف و ئازادیێن هەموو پێكهاتەیێن كوردستانێ و پێكڤەژیانێ خەباتێ دكەت و بزاڤێن مە ژ پێخەمەت وێ چەندێ دوپات دكەین، هەڤدەم پارتی بۆ چارەسەركرنا كێشە و ناكۆكییان، دانوستاندن ب تاكە رێچارەسەر دزانیت و دوپاتیێ ل دەولەتەكا دیموكراسی ل ئیراقێ دكەت».
بەرپرسێ لژنەیا بلند یا هەلبژارتنێن پارتی دیموكراتی كوردستان داخوازێ ژ دەنگدەران دكەت ل رۆژا 11/11/2025، ژ پێخەمەت بجهئینانا دەستوورێ بەردەوام یێ ئیراقێ، بەرژەوەندیێن هەرێما كوردستانێ و ئیراقێ، پاشەڕۆژەكا گەشتر، ئارامی و خوەشگوزەرانی ب درووشمێ هەڤپشكی، هەڤسەنگی و لهەڤكرن دەنگ ب پارتی دیموكراتی كوردستان بدەن..

دوهی ئێكشەمبی 12/10/2025، مەسرور بارزانی، سەرۆكێ حوكمەتا هەرێما كوردستانێ كەنیسەیا (ئەم ئەلنوور) ل قەزا عەنكاوە ل پارێزگەها هەولێرێ ڤەكر.
د پەیڤەكێدا كو ل مەراسیمێن ڤەكرنا وێ كەنیسەیێ پێشكێشكری، سەرۆكێ حوكمەتا هەرێما كوردستانێ هیڤی خواست خووشك و برایێن كریستیان مفای ژ وێ كەنیسەیێ وەربگرن كو ژ ئالیێ وەزارەتا ئەوقاف و كاروبارێن ئایینی ل حوكمەتا هەرێما كوردستانێ هاتیە دروستكرن.
ئەوژی بەرچاڤكر كو حوكمەتا هەرێما كوردستانێ دێ بەردەوام بیت د بزاڤێن خوە دا بۆ ب دووماهی ئینانا وێ رەوشا سەپاندی ل دەشتا نەینەوا، تاكو خووشك و برایێن كریستیان بشێن بزڤرن دناڤ مالێن خوەدا
دەقێ پەیڤا سەرۆكێ حوكمەتا هەرێما كوردستانێ..
قەداسەتا پاتریارك كار ئەگناتیۆس ئەفرام
قەداسەتا پاتریارك كاردینال لویس ساكۆ
گەلەك خوەش حالم ئەڤرۆ د ڤی رێوڕەسمیدا پشكدارم كو ڤەكرنا كەنیسەیا (ئوم ئەلنوور) كو ژ ئالیێ وەزارەتا ئەوقاف و كاروبارێن ئایینی ل حوكمەتا هەرێما كوردستانێ هاتیە دروستكرن.
ئەڤ كەنیسەیە ب ناڤێ (ئەم ئەلنوور) هاتیە ڤەكرن ئانكو دایكا رۆناهی، كو ئێكە ژ ناسناڤێن حەزرەتا مەریەما پاكیزە (سلاڤێن خودێ ل سەر بن). حەزرەتا مەریەم نەك تنێ ل ئایینێ كریستیان، بەلكو ل ئایینێ ئیسلامێ ژی پێگەهەكێ گەلەك تایبەت هەیە و د قورئانا پیرۆز دا، ل دەهان ئایەتان، ب رێزەكا مەزنڤە ناڤێ وێ هاتیە، مە گەلەك خانم یێن هەین كو ب وی ناڤی هاتینە ناڤكرن. هیڤیدارم ئەڤ كەنیسەیە، ببیتە جهەكێ گرنگ یا خوداپەرستییا خووشك و برایێن كریستیان ل عەنكاوە و ببیتە مەلبەندەكێ زێدەتر پێشڤەبرنا برایەتیێ و دۆستایەتیێ د ناڤبەرا ئایینان و گەشەپێدانا كەلتوورێ پێكڤەژیانێ ل هەرێما كوردستانێ.
ل ڤان سالێن دووماهیێ، ب تایبەتی ژی پشتی هێرشا تیرۆرستێن داعشێ ل سەر هەرێما كوردستانێ و مووسلێ و دەشتا نەینەوا، هزاران خووشك و برایێن كریستیان ژ وان دەڤەران، نەچاربوو مال و حالێن خوە بجه بهێلن و پەنایێ بۆ هەرێما كوردستانێ بینن، ب تایبەتی ژی ل عەنكاوە ئاكنجی ببن و ب ئاشتی و ئارامی بژین، ئەڤ كەنیسەیەژی، دیارییەكا حوكمەتا هەرێما كوردستانێیە بۆ وان خووشك و برایێن كو وەك گوهلێبوویم، پشكەكا مەزن ژێ ژ ئاوارەیێن دەشتا نەینەوانە كو ژ ئەگەرێ نەئارامییا دەڤەرا وان، هەر ل ڤێرێ ماینە ومفای ژ ڤێ كەنیسەیێ وەردگرن و خوداپەرستیێ تێدا دكەن.
حوكمەتا هەرێما كوردستانێ دێ بەردەوام بیت د بزاڤێن خوەدا بۆ دووماهئینانێ ب وێ رەوشا سەپاندی ل دەشتا نەینەوا و بۆ دروستكرنا سەقایەكێ ئارام، بۆ وێ چەندێ خووشك و برایێن مە بشێن ب سەربلندی و ب ئارەزوویا خوە بزڤرن بۆ مال و كەنیسەیێن خوە.
بەری چەند رۆژان، مە پرۆژەیەكێ رێ و پران ل نێزیك پەرستگەها لالش ڤەكر كو ئاسانكارییەكا مەزن بوو بۆ خووشك و برایێن مە یێن ئێزدی. هەر ئەڤرۆ ژی پشتی ڤەكرنا ڤێ كەنیسەیێ، بەرێ بناغەیێ پەیمانگەها ئەزهەر یا ئایینی دێ دانین و هەروەسا دێ پشكداریێ د ئاهەنگا درەچوونا پەیمانگەها پێشنڤێژ وگوتارخوینان ل هەولێرێ كەین. ئەڤە هەموو بەلگە و نیشانا هەمەڕەنگییا جڤاكا كوردستانێ و گرنگیدانا حوكمەتا هەرێما كوردستانێیە ب هەموو ئایینان و ب زێدەتر ب هێزكرنا پێكڤەژیانا ئاشتییانە و ئازادییا ئایینی ل هەرێما كوردستانێ.
حوكمەتا هەرێما كوردستانێ دێ بەردەوام بیت ل سەرئێخستنا پەیاما ئاشتیێ و پێكڤەژیانێ و رێزگرتنێ ل هەموو ئایینان نەك تنێ ل هەرێما كوردستانێ، بەلكو ل سەرانسەری رۆژهەلاتا ناڤین.
دوبارە پیرۆزباهییا ڤەكرنا ڤێ كەنیسەیێ ل هەوە دكەم و خودایێ مەزن كوردستانێ بپارێزین و هەردەم ب خوەشی و برایەتی بژین.

هۆشەنگ تاجر:

هژمارەک ژ چاڤدێرێن سیاسی یێن کورد دیار دکەن، گرنگە د ڤان هەلبژارتنان دا پارتی ب هێزەکا مەزنتر ژ جاران بچیتە بەغدا، چونکی نها مەترسیێن مەزن ل سەر قەوارێ هەرێما کوردستانێ هەنە و بهێزبوونا پارتی دێ بیتە ئەگەرێ بهێزبوونا کوردان ل بەغدا.

حەسەن بیلدرجی چاڤدێرێ سیاسی یێ باکورێ کوردستانێ بۆ ئەڤرۆ دیار کر، یا راست پێدڤیا کوردان ب هێزەکا نەتەوەیی و مەزن ل بەغدا هەیە کو بشێت بەرەڤانیێ ژ مافێن گەلێ کوردستانێ بکەت و د هەمان دەمی دا هێزەکا کاریگەر بیت و ل هەمبەر سیاسەتا توندرەو یا بەغدا ژی راوەستیت و خوەدان هەلوەست بیت، هەتا نها تنێ هێزا شیایە کارەکێ وەسا ل بەغدا بکەت پارتی دیموکراتی کوردستان بوویە، ژ بەر ڤێ یەکێ ژی د ڤان هەلبژارتنان دا ئەز داخواز ژ هەموو دەنگدەرێن هەرێما کوردستانێ و دەڤەرێن دی یێن کوردی دکەم ئانکو من دڤێت هەموو دەنگدەرێن کورد دەنگێ خوە بدەنە لیستا ٢٧٥، چونکی بهێزبوونا پارتی ئانکو بهێزبوونا کوردان ل بەغدا.
ئەحمەد شادی چاڤدێرێ سیاسی یێ رۆژهەلاتێ کوردستانێ ژی دیار کر، گرنگە ئەم ڤێ راستیێ بزانین کو هەلبژارتنێن ڤێجارێ گەلەک جودانە، چونکی ل رۆژهەلاتا ناڤین گوهۆڕینێن گەلەک مەزن روو ددەن، مەترسی ل سەر کوردان هەنە لێ د هەمان دەمی دا هەکە کورد بهێز بن دێ گەهنە گەلەک مافێن خوە، ژ بەر ڤێ یەکێ ژی ئەز پشتەڤانیێ ل لیستا پارتی دیموکراتی کوردان دکەم و هێڤیدارم ڤێجارێ ژی پارتی وەکو هەلبژارتنێ بۆری بیتە هێزا ئێکێ ل سەر ئاستێ ئیراقێ، چونکی هەر کەس دزانیت ل ئیراقێ تنێ هێزا کو حسابەک بۆ دهێتە کرن پارتی یە و گرنگە وەلاتیێن هەرێما کوردستانێ ژی ژ بۆ پاشەرۆژا گەش بۆ وەلاتێ خوە دەنگێ خوە بدەنە پارتی و پشتەڤانیێ ل لیستا سەرۆک بارزانی بکەن.
هژمارەک زێدە ژ چاڤدێرێن سیاسی و کەسێن ئەکادیمی یێن رۆژئاڤایێ کوردستانێ ژی دیار کرن، سەرۆک بارزانی و پارتی دیموکراتی کوردستان د رۆژێن تەنگاڤ دا پشتەڤانی ل رۆژئاڤایێ کوردستانێ کرینە نها پارتی ب هەموو شیانێن خوە دڤێت کورد ل رۆژئاڤایێ کوردستانێ بگەهنە مافێن خوە، ژ بەر ڤێ یەکێ ژی وەکو کوردێن رۆژئاڤا ئەو پشتەڤانیێ ل لیستا ٢٧٥ یا پارتی دیموکراتی کوردستان دکەن، چونکی ب سەرکەفتنا پارتی دێ پێگەهێ کوردان ل ئیراقێ و دەڤەرێ بهێز بیت.

نێچیرڤان بارزانی، سەرۆكێ هەرێما كوردستانێ، ل ئەنقەرە ل گەل رەجەب تەیب ئەردۆغان، سەرۆككۆمارێ توركیا كۆمبوو.
د كۆمبوونەكێدا باس ل هەڤبەندیێن توركیا ل گەل ئیراقێ و هەرێما كوردستانێ هاتە كرن، هەروەسا وارێن هاریكارییا هەڤپشك یا توركیا و هەرێما كوردستانێ، رەوشا گشتییا ئیراقێ، پرۆسەیا سیاسی و هەلبژارتنێن جڤاتا نوونەرێن ئیراقێ، رەوشا ناڤخوەییا هەرێما كوردستانێ و پێشهاتێن سووریێ گەنگەشەكر.
هەردو ئالییان ئاستێ هەڤبەندیێن توركیا و هەرێما كوردستانێ بلند هەلسەنگاند و بەرهەڤی نیشادا بۆ زێدەتر پێشڤەبرنا هاریكارییا هەڤپشك د هەموو واراندا، ب تایبەتی د وارێ ئابۆری و لێكگوهارتنا بازرگانی و هاریكاریێ د كەرتێ وزەیێدا.
هەر سەبارەت ڤێ چەندێ رۆناهێ ئێخستە سەر دەستپێكرنا هنارتنا پەترۆلا هەرێما كوردستانێ بۆ بازارێن جیهانێ ب رێیا بەندەرێ جەیهان یێ توركی كو د بەرژەوەندییا ئابۆرییا هەموو ئیراقێدایە. هەردو ئالی هەڤڕابوون كو پرۆسە خزمەتا ئارامییا ئیراقێ ب گشتی دكەت.
سەرۆككۆمارێ توركیا بەردەوامییا پشتەڤانییا وەلاتێ خوە بۆ ئیراقێ و هەرێما كوردستانێ دوپاتكر و هەڤبەندیێن وەلاتێ خوە ل گەل هەردو ئالییان ب گرنگ و جهێ پیتەپێدانا توركیا هەژمارت.
ژ ئالیێ خوەڤە نێچیرڤان بارزانی رێز و سوپاسی بۆ پشتەڤانی و هاریكارییا توركیا ل ئیراقێ و هەرێما كوردستانێ دیاركر و دوپاتكر كو توركیا جیرانەكا گرنگ یا هەرێما كوردستانێ و ئیراقێیە و دشیاندایە د گەلەك واراندا و بۆ بەرژەوەندییا هەڤپشك، پێكڤە هاریكاریێ بكەن.
پاراستنا ئارامییا دەڤەرێ، پێنگاڤێن پرۆسەیا ئاشتیێ ل توركیا، دوماهی پێشهاتێن رۆژهەلاتا ناڤین و چەند پرسێن دی یێن جهێ گرنگییا هەڤپشك، تەوەرەكێ دی یێ كۆمبوونێ بوو .
ژ ئالییەكێ دی ڤە د چارچۆڤەیێ سەردانا خوە دا بۆ توركیا نێچیرڤان بارزانی، سەرۆكێ هەرێما كوردستانێ ل ئەنقەرە ل گەل هاكان فیدان، وەزیرێ دەرڤەیێ توركیا كۆمبوو.
د كۆمبوونەكێدا هەردو ئالییان دوپاتی ل خواستا دوقۆلی بۆ پێشڤەبرنێ ب هەڤبەندیێن توركیا ل گەل ئیراقێ و هەرێما كوردستانێ كر، هەروەسا ل دۆر چاوانییا بەرفرەهكرنا وارێن هاریكارییا هەڤپشك، بیر و بۆچوون لێكگۆهارتن.
ل تەوەرەكێ دی یێ كۆمبوونێ باس ل پرسا ئاڤێ د ناڤبەرا توركیا وئیراقێدا هاتە كرن، سەبارەت ڤێ چەندێ نێچیرڤان بارزانی داكۆكی ل پێدڤییا هەماهەنگیێ د ناڤبەرا ئیراقێ و توركیا كر، ب شێوەیەكی، بڕێڤەبرنا ئاڤێ هەموو پێدڤیێن هەردو ئالییان دابین بكەت. رەوشا دەڤەرێ و چەند پرسێن جهێ گرنگییا هەڤپشك، ئالییەكێ دی یێ كۆمبوونێ بوو.

سەرۆكاتییا هەرێما كوردستانێ راگەهاند: رێز و سوپاسییا خوە بۆ رەجەب تەیب ئەردۆگان، سەرۆككۆمارێ توركیا دوپات دكەین كو ل كۆمبوونا ل گەل نێچیرڤان بارزانی، سەرۆكێ هەرێما كوردستانێ ل رۆژا پێنجشەمبی 9/10/205، فەرمان دای گەشتێن ئەسمانی یێن هێلێن فرۆكەڤانی یێن توركیا دەست پێ بكەن.
سەرۆكاتییا هەرێما كوردستانێ دیاركر: ئەڤ بڕیارە د چارچۆڤەیێ هەڤبەندییا ب هێز د ناڤبەرا هەرێما كوردستانێ و توركیا دهێت كو پشتڕاستین دێ هاریكار بیت بۆ زێدەتر پێشڤەبرنا هاریكارییا هەڤپشك و د بەرژەوەندییا هەردو ئالییاندا ب تایبەتی دێ د بەرژەوەندییا وەلاتیێن مە ل سنوورێ سلێمانیێ دا بیت.

مەسرور بارزانی، سەرۆكێ حوكمەتا هەرێما كوردستانێ، ل تۆرا جڤاكییا ئێكس راگەهاند: پێشوازیێ ل ئاگربەستا غەزە دكەین، پێنگاڤەكا گرنگە بۆ ئارامكرنا گرژیێن دەڤەرێ.
هەروەسا، سەرۆكێ حوكمەتا هەرێما كوردستانێ، ئاماژە ب وێ چەندێ كر، هیڤیخوازین ئەم رێككەفتنە رێخوەشكەر بیت بۆ ئارامییا درێژخایەن ل رۆژهەلاتا ناڤین.
پێشتر دۆنالد ترمپ، سەرۆكێ ئەمریكا د پۆستەكیدا ل پلاتفۆرما (ترۆس سۆشیال) نڤیسبوو» گەلەك ب شانازیڤە رادگەهینم، ئیسرائیل و حەماس ل سەر قووناغا ئێكێ یا پلانا نیشتمانی رازی بوون».

مەسرور بارزانی، سەرۆكێ حوكمەتا هەرێما كوردستانێ، پیشوازی ل گریگیی تیڤادار تاكاچ، قونسلێ گشتیێ نوو یێ هنگاریا ل هەرێما كوردستانێ كر.
د دیدارەكێدا سەرۆكێ حوكمەتا هەرێما كوردستانێ پیرۆزباهی لێكر و پشتەڤانییا حوكمەتا هەرێما كوردستانێ ژ پێخەمەت پێشڤەبرنا هەڤبەندیێن دوقۆلی بۆ دیاركر.
قونسلێ گشتیێ نوو یێ هنگاریا، دوپاتی ل گرنگییا ب هێزكرنا هەڤبەندیێن وەلاتێ خوە ل گەل هەرێما كوردستانێ د وارێن جۆراوجۆردا، ب تایبەتی ژی بازرگانی، كر.

دوهی شەمبیێ 11/10/2025، بارەگەهێ بارزانی، رۆهنكرنەك ل دۆر دروستكرنا پاركەكێ ل پارێزگەها هەلەبجە بەلاڤكر و ئەڤە دەقێ وێ یە:
دەمێ چەندێ رۆژانە ل هەژمارەكا میدیا و دەزگەهێن راگەهاندنێ هاتیە بەلاڤكرن كو ل سەر ئەركێ سەرۆك بارزانی پارەكەك وەك دیاری ب وەلاتیێن باژێرێ هەلەبجە هاتیە دان و پێرابوونێن پێدڤی بۆ دروستكرنا پاركێ هاتینە وەرگرتن.
ل ڤێرێ بۆ خەلكێ خوەشتڤیێ كوردستانێ و هەلەبجە رادگەهینین كو ئەو بەرپرسیارەتییا حوكمەتێ و ئالیێن پەیوەندیدارە خزمەتا خەلكێ خوەشتڤیێ باژێرێ هەلەبجە و هەموو جهێن كوردستانێ بكەن و ئەوا سەرۆك بارزانی ئەنجامدای وەك هەردەم تنێ ئەو بوویە كو حوكمەت و ئالیێن پەیوەندیدار راسپاردینە، هیچ دەمەكی قوربانیدانا هەلەبجە پشت گوه نەهاڤێژن و دڤێت هەموو ئالییەك ب باشترین شێوە خزمەتا هەموو كوردستانێ و ب تایبەتی هەلەبجە بكەت.

وەزیرێ سامانێن سروشتی ل حوكمەتا هەرێما كوردستانێ راگەهاند: بڕێڤەبرنا دۆسێیا پەترۆلی د دەستێ حوكمەتا هەرێما كوردستانێ دایە، هەڤدەم ژ وی دەمێ پرۆسەیا هنارتنا پەترۆلێ دەستپێكری نێزیكی دو ملیۆن و 100 هزار بەرمیلێن پەترۆلێ بۆ بەندەرێ جەیهان یێ توركی یێن هاتینە هنارتن، دیاركر ژی ل چەند رۆژێن داهاتی دێ دەست ب بەلاڤكرنا پەترۆلا سپی هێتە كرن.
كەمال محەمەد، وەزیرێ سامانێن سروشتی ل حوكمەتا هەرێما كوردستانێ گوت» هەتا رۆژا چارشەمبی 8/10/2025 زێدەتر ژ دو ملیۆن و 100 هزار بەرمیلێن پەترۆلی بۆ بەندەرێ جەیهان یێن هاتینە هنارتن، ب شێوەیەكێ ل 11 رۆژێن رۆژێن بەری وێ رۆژێ، رۆژانە ب تێكرایی نێزیكی 190 هزار بەرمیلێن پەترۆلێ رادەستی سۆمۆ ل بەندەرێ جەیهان هاتینە كرن، كو هەرێما كوردستانێ شیان هەنە رۆژانە هەتا 800 هزار بەرمیلێن پەترۆلێ بهنێریت».
كەمال محەمەد گوت ژی» نوكە هەرێما كوردستانێ رۆژانە 250 هزار بەرمیلێن پەترۆلێ بەرهەم دئینیت، كو ب گۆڕەی وێ رێككەفتنا هەی هەرێما كوردستانێ 50 هزار بەرمیلان بۆ پێدڤییا ناڤخوەیی بكاردئینیت».
ل دۆر وان 50 هزار بەرمیلێن پەترۆلێ، وەزیرێ سامانێن سروشتی باس ل وێ چەندێ كر» ئەو رێژەیا پەترۆلێ ل هەرێما كوردستانێ وەك پەترۆلا رەش بۆ زەڤیێن كارەبێ، پانزینێ، بەرهەمئینانا رێژەیەكا كێم یا پەترۆلا سپی، دهێتە بكارئینان ، هەكە ئەو رێژەیە نەهاتبا وەرگرتن، دا كاریگەریێ ل سەر هەموو سێكتەران كەت، كو ب تمامی بەهرا پێدڤییان ناكەت، د دەمەكیدا حوكمەتا ئیراقێ نێزیكی 800 هزار بەرمیلێن پەترۆلێ بۆ پێدڤییا ناڤخوە بكاردئینیت».
هەروەسا ئەوژی بەرچاڤكر» حوكمەتا ئیراقێ سۆز دایە، هەكە ئەو رێژەیا پەترۆلێ بەهرا پێدڤیێن ناڤخوە یێن هەرێمێ نەكر، دێ 15 هزار بەرمیلێن دی یێن پەترۆلێ دەتە هەرێمێ».
ل دۆر وێ چەندێ بۆ ماوەیەكێ دەمكی هنارتنا پەترۆلێ هاتبوو راگرتن، گوت» پشتی كۆمپانییا سۆمۆ ل 3/10/2025، ئەم ئاگەهداركرین كو هندەك ل عمبارێن بەندەرێ جەیهان پڕ ببوون، هنارتنا پەترۆلێ بۆ دەمێ 10 ساتان هاتبوو راگرتن، هەروەسا ل 6/10/2025 داخوازكر رێژەیا هنارتنا پەترۆلێ كێم بكەن، دوبارە عمبار پڕببوون».
رۆهنكر ژی» پڕبوونا عمباران حالەتەكا ئاسایییە، هەڤدەم بۆ چارەسەركرنا وێ كێشەیێ پێنگاڤ هاڤێتینە و داخواز ژ وەزارەتا پەترۆلێ كریە خشتیەیەكێ باشتر ل گەل تانكەران رێكبێخن».
ل دۆر بڕێڤەبرنا دۆسێیا كەرتێ پەترۆلێ ئاماژە كر» زەڤیێن پەترۆلا هەرێما كوردستانێ ژ روویێ بڕێڤەبرنیڤە، داتا و رێژە، ڤەگوهاستن تاكو بەندەرێ جەیهان هەر وەك پێشتر ژ ئالیێ حوكمەتا هەرێما كوردستاتێ دهێتە بڕێڤەبرن، هەڤدەم ئەركێ كۆمپانییا سۆمۆ تنێ ب بازاركرنا پەترۆلا هەرێمێ یە».
گوت ژی» ب رێژەیا 65% ئەو مووچەیێ حوكمەتا ئیراقێ ددەتە هەرێما كوردستانێ، ژ داهاتێ پەترۆلا هەرێمێ پێكهاتیە». هەروەسا دبێژیت» پشكەك ژ داهاتێ فرۆتنا پەترۆلێ ب رێكا سۆمۆ بۆ ئیراقێ دچیت، كو پێشتر بۆمە بوو، هەڤدەم داهاتێ بەهرا كۆمپانیێن دی دچیتە هەژمارەكا تایبەت و ل دوماهییا مەهێ ب رازیبوونا حوكمەتا هەرێما كوردستانێ، كۆمپانیێن وارێ پەترۆلێ بەهرا خوە دبەن».
هەروەسا ل دۆر مووچەیێ فەرمانبەرێن هەرێما كوردستانێ، ئاماژە كر» حوكمەتا ئیراقێ سێ بەهانە هەبوون ئەوژی تەوتین، كو ب پڕۆژەیێ (هەژمارا من) ئەو هاتنە رازیكرن، هەروەسا داهاتێ نەپەترۆلی، كو تێكگەهشتنەكا باش بۆ چارەسەركرنا وێ كێشەیێ هەیە، هەڤدەم كێشەیا سەرەكی هنارتنا پەترۆلێ بوو، كو ئەوژی هاتە چارەسەركرن».
سەبارەت بەلاڤكرنا پەترۆلا سپی كەمال محەمەد گوت» ل چەند رۆژێن داهاتی بەلاڤكرنا پەترۆلا سپی ل دەڤەرێن چیایی دێ دەستپێكەت».
وەزیرێ سامانێن سروشتی گوت ژی» 30 مەهان هنارتنا پەترۆلا هەرێما كوردستانێ ژ ئەنجامێ سكالایا حوكمەتا ئیراقێ هاتبوو راگرتن، كو زیانەكا مادی یا مەزن ب هەرسێ ئالیێن حوكمەتا هەرێما كوردستانێ، حوكمەتا ئیراقێ و كۆمپانیێن وارێ پەترۆلێ گەهشتبوو، هەروەسا نوكە ب وێ رێككەفتنا هاتیە كرن كو ئەمریكا رۆلەكێ كارا و كاریگەر هەبوو، د مفایێ هەرسێ ئالییاندایە».
دیاركر ژی» رێككەفتن هەتا 31 كانوونا ئێكێ 2025، بەلێ پشتی وی ژڤانی ژی هنارتنا پەترۆلێ دێ بەردەوام بیت، تاكو رێككەفتنەكا نوو دهێتە كرن».
ل دۆر مفایێ توركیا ژ رێككەفتنێ، گوت» هەكە پەترۆلا كەركووكێ ب رێیا بۆریا پەترۆلییا هەرێما كوردستانێ بهێتە هنارتن، توركیا بۆ هەر بەرمیلەكێ ئێك دۆلار و 29 سەنتان ژ وەزارەتا پەترۆلا ئیراقێ وەردگریت».

زنار تۆڤی:

پارتی دیموكراتی كوردستان ب لیستا ژمارە 275 دەست ب بانگەشێ بۆ هەلبژارتنێن پەرلەمانێ ئیراقێ كریە، سەرۆكا لیستا پارتی دیموكراتی كوردستان ل سلێمانیێ دبێژیت: سۆزێ د دەینە خەلكێ كا چاوا بەری نوكە مە بەرگریێ ژ مافێ خەلكێ خوە كریە، د نوكە و داهاتی ژی دا ب هەمان رەنگ دێ د بەردەوام بین.
د. ئەشواق جاف، بەربژارا هەژمار ئێك و سەرۆكا لیستا پارتی دیموكراتی كوردستان ل سلێمانیێ، دیار كر» هیڤیدارین بانگەشەیا هەلبژارتنێن جڤاتا نوونەرێن ئیراقێ ب ئارامی برێڤەبچن و پشتی ب دووماهی هاتنا ئەڤێ پرۆسەیێ ژی، هەموو ئالییێن كوردی ب ئێكدەنگ بچنە بەغدایێ بۆ ب دەستڤەئینانا مافێ خەلكێ كوردستانێ، هەروەسا ئەوا گرنگ، سەركەڤتنا كوردستانێ و خەلكێ كوردستانێیە، لەوما پێدڤییە پێكڤە و ب ئێك دەست خەباتێ بۆ مافێ خەلكی و بجهئینانا دەستووری و قانوونێ بكەین، ژ بەر كو مافێ خەلكێ كوردستانێ د ناڤا دەستوورێ ئیراقێ دا هاتییە چەسپاندن».
د. ئەشواق جاف، رۆهنكر ژی»هەموو خەلكێ كوردستانێ دزانیت پڕۆژەیێن پارتی دیموكراتی كوردستان د بەرژەوەندییا خەلكێ كوردستانێ دانە و هەردەم پارتی د سەنگەرێ بەرگریكرنێدا بوویە ژ بۆ ب دەستڤەئینانا مافێن خەلكێ كوردستانێ و بەردەوام ژی بەرگری ژ قەوارەیێ هەرێما كوردستانێ كریە، لەوما خەلكێ مە ژی پێشوازیێ ل پارتی و هەموو بەربژارێن پارتی ژی دكەن، ئەم ژی سۆزێ ددەین هەر وەك چاوا ل دەمێ بۆری مە بەرگری ژ خەلكی و مافێن وان كریە، د نوكە و د داهاتی ژی دا دێ وێ بەرگریێ ژمافێن وان كەین».