ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا٩٠٠ کەسێن دی تووشی کۆرۆنایێ بووینە و هەروەسا ٢٤ نەخوشێن کۆرۆنایێ ژی مرینە.
ل گۆر ئامارا وەزارەتا ساخلەمیێ د ماوەیێ ٢٤ دەمژمێرێن بۆری دا ٢٧٥ نەخوشێن کۆرۆنایێ ژی چارەسەر بووینە.
ل پارێزگەها دهۆکێ ژی ٣٠٣ کەسێن دی تووشی کۆرۆنایێ بووینە و حەفت نەخوشێن کۆرۆنایێ ژی مرینە و هەمان دەمی دا ٧٥ نەخوش ژی ب تەمامی چارەسەر بووینە.
ئەڤرۆ نیوز، عەلی حاجی :
وەزیرێ خواندنا بلند و ڤەکولینێن زانستی سەرەدانا زانکویا زاخۆ کر و ژلایێ سەروکێ زانکویێ و ستافێ زانکویێ ڤە هاتە پێشوازی کرن .
د کونگرەیەکێ روژنامەڤانی دا د. ئارام محەمەد گۆت: (د درێژیا زنجیرا سەرەدانێن مە دا بۆ زانکویێن کوردستانێ مە سەرەدانا زاخۆ کر،سەرەدانا مە ژی ب سەر کرنا هولێن خواندنێ بوو ژبەر کو سیستەمێ ئاوێتە وەکری یە ٨٠٪ خواندن دناڤ کەمپسێ دا بهێتە خواندن و ٢٠٪ ب ئونلاین بیت و ئەگەر رەوش باشتر بوو دێ ب سیستەمەکێ دیتر کار و کاروبارێن خوە و سیستەمێ خواندنێ ب رێڤەبەین بەلێ هەکە رەوش خرابتر بوو وەکو ئەنجومەنێ وەزارەتێ دێ کومبونا خوە گرێدین و دێ بریارێن نوو دەرکەین،زانکویا زاخۆ وەکو هەمی زانکویێن دیتر هندەک کێشە هەنە ب تایبەتی ژی کێمیا میلاکێ ماموستایان و ژلایێ خوە ڤە ژی زانکویا زاخۆ ئەو کێشەیە گەهاندی یە و دێ ب هویربینی ل سەر روویننە خارێ دا کو چارەسەر بکەین ژبەر کو ئارمانجا مە چارەسەر کرنا کێشەیانە).
ناڤهاتی ئەو چەندە ژی دیار کر بۆ دەمێ سێ روژانە ئەم هویربینیێ ل سەر سکالایێن قوتابیان دکەین و ل دووف رێنما و یاسایێ دێ سەرەدەریێ دگەل سکالایێن قوتابیان کەین و دەمەکێ نێزیک ژی دێ دەرەنجامێن وان سکالایان دیار بیت .
ل دووماهیێ گۆت ژی هێشتا هندەک زانکو ماینە ل کوردستانێ کو دناڤ لیستا زانکویێن باوەر پێکریێن حکومەتا عێراقێ دا نینن بەلێ کێشەیا وان ژی کێشەیەکا تەکنیکی یە و ل دور ڤی بابەتی ژی وەزارەتا خواندنا بلند و ڤەکولینێن زانستی ل عێراقێ سەرەدانا مە کریە و پلە ئێک ژی کێمیا میلاکی یە ل وان زانکویان و ئەو پروسەیە دێ بەردەوام بیت هەتا کو دهێتە چارەسەر کرن.
ئەڤرۆ نیوز:
رێڤەبەریا گشتی یا ساخلەمیا پارێزگەها دهۆکێ راگەهاند کو ٧٥ نەخۆشێن دی یێن کۆرۆنایێ ل دهۆکێ ب تەمامی چارەسەربوون.
رێڤەبەریا گشتی یا ساخلەمیا پارێزگەها دهۆکێ هەروەسا دیار ژی کریە کو ب ڤێ چەندێ هژمارا گشتی یا نەخۆشێن چارەسەربووین گەهشتنە 12988 کەسان و هەروەسا نها 12606 نەخۆش ل ژێر چارەسەریێ ماینە.
ئەڤرۆ نیوز:
وەزارەتا کۆچ و کۆچبەرێن عیراقێ ئاشکرا کریه، ل ده‌ستپێكا سالا بهێت دێ سەرجەم کەمپێن ئاواران دائێخیت، ژ بلى وان یێن دكه‌ڤنه د سنۆرێ هەرێما کوردستانێ دا.
ئیڤان فائیق، وەزیرا کۆچ و کۆچبەران راگەهاندیه، وەزارەتا وێ پلانه‌كا نیشتمانی داێژتیە بۆ داخستنا سەرجەم کەمپان ل ده‌ستپێكا سالا 2021.
لدووڤ وێ پلانێ دێ سەرجەم کەمپان ژ بلى ئه‌وێن دكه‌ڤنه د سنۆرێ هەرێما کوردستانێ دا هێنه داخستن، وێ وەزارەتێ هیڤى خواستیه، كو ب وی گاڤێ ملیۆنه‌ك و 500 هزار ئاوارە ڤه‌گه‌رنه سه‌ر مال و مولكێن خوه.
ئیڤان فائیق دبیێژیت ژى: وان هەماهەنگی ل گەل رێکخراوا کۆچا نێڤدەوڵەتی هەیە، كو پشته‌ڤانیا وان بكه‌ت، داكو هاریكاریا وان خێزانان بكه‌ت ژ بۆ ئاڤاكرنا مالێن وان یێن هه‌رفتى ل ده‌ڤه‌رێن هاتاینه ئازادكرن، هەروەسا قەرەبۆکرنا وان خێزانێن ماینه بێ جهـ و رێك.
وەزارەتا کۆچ و کۆچبەران گۆتیه ژى، ل دووماهیا ڤێ هه‌یڤی دێ كه‌مپێن: کەرکووک، سەلاحەدین و کەمپێن پارێزگه‌ها ئەنبار و کەمپا عامریێ ل فەلوجە دائێخیت بۆ هندێ ئاوارێن نەینەوا ب حه‌زا خوه ڤه‌گه‌رنه ده‌ڤه‌رێن خوه.
لدووڤ داتایێن نه‌فەرمی، هژمارا ئاواران ل هەموو ئیراقێ دگه‌هیته 5 ملیۆن و 500 هزار کەسان، ل گه‌ل هندێ ژى نێزیکی ملیۆن کەسان د ده‌مێ شەرێ داعشێ دا به‌ره‌ف وه‌لاتێن جیران و ئورۆپا ڤه چووینه.
ئەڤرۆ نیوز:
وەزارەتا ساخلەمیا ھەرێما کوردستانێ راگه‌هاند: ژ ئه‌نجامێ سەرپێچیکرنا رێنمایی و مامەلەکرنێ ب دەرمانێن نەقانوونی کۆمپانیەکا دەرمانان ھاتە داخستن.
رێڤەبەریا کوالێتى و کونترۆلا دەرمان و پێدڤیێن نۆشدارى راگەھاندنەک به‌لاڤکریه و تێدا راگەھاندیه: د درێژاھیا کار و چالاکیێن لژنێن چاڤدێریا بازاری ل وەزارەتا ساخلەمیێ، پتشی پشکنین و دووڤچوونێ ژ ئه‌نجامێ سەرپێچیکرنا رێنمایی و مامەلەکرنێ ب دەرمانێن نەقانوونی کومپانیەکا دەرمانان ھاتە داخستن و رێکارێن قانوویی ل ھەمبەری وێ کومپانیێ ھاتینە وەرگرتن.
هه‌روه‌سا گۆتیه: ئه‌م هه‌موو کومپانیێن دەرمانان ئاگەھدار دکەین، پێدڤیه پابەندبن ب رێنمایێن ساخلەمیێ و قانوونا دەرمانان ب بەرۆڤاژی ڤێ چەندێ دێ رووبروو قانوونێ و دادگەھێ بن.
ئەڤرۆ نیوز:
هەر دو شاندێن پارتی و ئێکەتی ل سەرۆکاتیا هەرێما کوردستانێ د کۆمبوونێ دانە و ل گۆر زانیاریان بابەتێ هێرشا پەکەکێ ل سەر پێشمەرگێن کوردستانێ، پەیوەندیێن پارتی و ئێکەتیێ و دووماهی پێشهاتێن ل عیراقێ و کوردستانێ تەوەرێن سەرەکی یێ کۆمبوونا هەر دو شاندێن بالا یێن پارتی و ئێکەتیێ نە.
نێچیرڤان بارزانی سەرۆکێ هەرێما کوردستانێ سەرپەرشتیا کۆمبوونا هەر دو شاندێن پارتی و ئێکەتیێ دکەت و هوشیار زێباری سەرۆکاتیا شاندێ پارتی دکەت و بافل تالەبانی هەڤسەرۆکێ ئێکەتیێ ژی سەرۆکاتیا شاندێ ئێکەتیێ دکەت.
ئەڤرۆ نیوز:
حوکمەتا هەرێما کوردستانێ راگەهاند کو مەسرور بارزانی سەرۆکێ حوکمەتا هەرێما کوردستانێ ل گەل شاندەکێ ئەڤرۆ سەرەدانا ئورۆپا دکەن و دێ ل گەل بەرپرسێن چەندین وەلاتێن ئورۆپا هەڤدیتنان کەن.
ل گۆر زانیاریان د سەرەدانا سەرۆکێ حوکمەتێ یا بۆ ئورۆپا دا دێ بابەتێ پەیوەندیێن هەرێما کوردستانێ ل گەل وەلاتێن ئورۆپا هێنە گەنگەشە کرن و حوکمەتێ هەرێما کوردستانێ دڤێت مفای ژ ئەزموونا سەرکەفتی یا وەلاتێن ئورۆپا د کەرتێ ئابووری و چەندین بابەتێن دیتر دا وەربگریت.
ل گۆر زانیاریان سەرۆکێ حوکمەتێ دێ سەرەدانا هولەندا، بەلجیکا، ئەلمانیا و فرەنسا کەت.
ئەڤرۆ نیوز:
پشتى راگەهاندنا ئەنجامێن هەلبژارتنان ل ئەمریکا و سەرکەفتنا جۆ بایدنى بۆ سەرۆكاتیا وى وه‌لاتى، بۆ جارا ئێكێ د مێژوویا ئەمریکا دا ژنه‌ك دبیته جێگرا سەرۆکێ ویلایەتێن ئێکگرتى یێن ئه‌مریكا و ناڤێ وێ چوو د مێژوویێ دا.
کامالا هاریس، باپیرێن وێ خەلكێ گونده‌كێ هندستانێ نه، بابێ وێ ب ره‌گه‌ز هندییه و دایکا وێ جامایکییە، هەردو کۆچبەربووینه ئەمریکا، كامالا دبیته ئێكه‌م ژن پۆستێ جێگرا سەرۆکێ ئەمریکا وەربگریت، دناڤا ئەمریکا ژى دا چاڤێ ره‌شپیستان ل هندێیه، كو کامالایێ کاریگەری ل سەر ئیدارا ئەمریکا هەبیت و جۆداهیێ و نەژادپەرستیێ نەهێلیت، وێ ژى ئه‌ڤ چه‌نده دوپاتكریه.
چیرۆکا کامالا هاریس یا سەرنجراکێشە، باپیرێن وێ ل گوندێ تولاسندرا پورام ژیاینه، کچا دو کۆچبەرێن جامایکی و هیندییە، ئاكنجیێن گوندێ باپیرێن کامالایێ دلخۆشن ب ڤێ سەرکەفتنێ و پەیام ژى بۆ هنارتینه، وێ ژى به‌رده‌وام جه‌خت ل یه‌كسانیێ كریه دناڤبه‌را ژن و مێران و هه‌موو ئه‌مریكیان دا.
ئەڤرۆ نیوز:
وەزارەتا ژێدەرێن ئاڤێ یا عیراقێ راگەهاندیه، ل دەمەكێ نێزیك دێ پڕۆتۆكۆلەك دناڤبەرا هەردو حكومەتێن بەغدا و ئەنقەرەدا هێتە ئیمزا كرن بۆ برێڤەبرنا ئاڤا رووبارێ دیجلەى و گەرەنتیكرنا پشكا ئیراقێ ژ ئاڤا وی رووباری.
پەیڤدارێ وەزارتا ژێدەرێن ئاڤێ یا حكومەتا عیراقى راگەهاندیه، گوتۆبێژ ل گەل وەلاتێن دەوروبەر د وارێ پرسێن ئاڤێدا ئەنجامێن باش بخه‌ڤە ئیناینە، ب تایبه‌تى ژى ل گەل وه‌لاتێ توركیا.
عه‌لى رازى گۆت ژى: ل دەمەكێ نێزیك ئەو پرۆتۆكۆلە دێ دناڤبەرا هەردو وەلاتاندا هێتە ئیمزا كرن و ئەو كێشەیا چەندین سالە عیراق تێدا دنالیت، دێ هێتە چارەسەركرن.
ئەڤرۆ نیوز، عەلی حاجی :
ل كەمپێن ئاوارەیێن ئێزدیان ل باژێرێ زاخۆ خوەپیشاندان ل دژی هەبوونا هێزێن دەرەكی و نەیاسایی و ب مەرەما پشتەڤاتیكرن ل رێكکەڤتنا دناڤبەرا حكومەتێن كوردستانێ و عێراقێ دا هاتنە ئەنجام دان و خوەپیشاندەران ژی داخازا جێبەجێكرنا رێكکەڤتنێ دكرن .
فێسەل خانەسوری ئێك ژ چالاكڤانێن ئێزدیان ل كەپا چەمشكو بۆ روژناما ئەڤرۆ گۆت: (خوەپیشاندانا هاتیە كرن ب پشكداریا ئاوارەیێن هەر ئێك ژ كەمپێن بێرسڤ ئێك و دوو و دەركار و چەمشكو و باجد كەندالا بوو،ئەڤ خوە پیشاندان ژی ب مەەرما پشتەڤانیكرن بوو ل رێكەڤتنا دناڤبەرا حكومەتێن كوردستانێ و عێراقێ بوو كو تێدا خوە پیشاندەران داخازا جێبەجێكرنا وێ رێكەڤتنێ دكرن و زێدەباری هندێ ژی داخازا دەرچوونا هێزێن پەكەكێ و حەشدا شەعبی ل دەڤەرێن خوە دكرن ژبەر هەبونا وان هێزان هەتا نوكە خەلكێن شنگالێ نەشیاینە ڤەگەرنە سەر مالێن خوە بەلێ هەكە ئەو دوو هێزە دەڤەرێن مە چول بكەن بێگومان ژلایێ حكومەت و رێكخراوێن بیانی دێ ئاڤەدانی كەڤیتە شنگالێ و دەوروبەرێن وێ) .
ناڤهاتی ئەو چەندە ژی گۆت: (ژبەر ئەگەرێن ئەمنی و ئاڤەدانی و نەبونا كارگێریەكا شەرعی هەتا نوكە وەلاتیێن مە نەشیاینە ڤەگەرن بۆ جهێن خوە و خوە پیشاندانا هاتیە ئەنجام دان نەبتنێ ل زاخۆ بوو بەلكو ل كەمپێن شاریا و هەتا شنگالێ ل دەڤ مەزارێ شێخ شەرفەدینی ژی هاتنە ئەنجام دان و زێدەتر ژ هەر دەمەكێ خەلكێ شنگالێ دخازن ڤەگەرن سەر جهێن خوە پشتی شەش سالێن دژوار د ئاوارەیێ دا دەرباز كرین و ئێدی خەلكێ ناخازیت ئاوارە بیت) .
نيشاندان