ئه‌ڤرۆ نیوز:
به‌شیر حه‌داد جێگرێ دوێ یێ سه‌رۆكێ جڤاتا نوونه‌رێن عیراقێ راگه‌هاند: حوكمه‌تا عیراقێ هه‌یڤا شه‌شا سالا بهێت ده‌ست نیشانكریه بۆ هه‌لبژارتنان، له‌ورا پرۆسه‌یا ته‌عریبێ ده‌ستپێكریه بۆ ئه‌وێ چه‌ندێ رێژه‌یا عه‌ره‌بان ل ده‌ڤه‌رێن ئاریشه سه‌ر زێده‌تر بكه‌ن و دیموگرافیا ده‌ڤه‌رێ بگوهورن و كارتێكرنێ بێخنه سه‌ر ده‌نگێ كوردان.
جێگرێ سه‌رۆكێ جڤاتا نوونه‌رێن عیراقێ ئه‌و چه‌نده ژی راگه‌هاند حوكمه‌تا هه‌رێما كوردستانێ ل هه‌موو دانوستاندنان ته‌ئكید ل سه‌ر چاره‌كرنا ئاریشه‌یێن كوردستانێ كریه، بزاڤا دروستكرنا هێزا هه‌ڤبه‌شا پێشمه‌رگه‌ی و سوپایێ عیراقی دده‌ت، ژبوی هێزا پیشمه‌رگه‌ی بزڤریته ئه‌ڤان ده‌ڤه‌ران.
ناڤبری ئاماژه ب وێ چه‌ندێ ژی دا، هه‌كه سه‌ركردایه‌تیا كورد ئه‌وان ئاریشانه چاره نه‌كه‌ت، ئه‌ڤه هه‌وه‌كا دی یا ته‌عریبكرنێ ده‌ست پێ دكه‌ت، دێ كارتێكرن ل سه‌رده‌نگێ كوردان هه‌بیت، له‌ورا پێدڤیه به‌ری هه‌لبژارتنان ئه‌و ئاریشه‌یه بهێته چاره‌كرن و دوماهی پێ بینن بۆئه‌وێ چه‌ندێ ده‌نگێ كوردان ل ئه‌وان ده‌ڤه‌ران كێن نه‌كه‌ت.
ئه‌ڤرۆ نیوز:
رێڤه‌به‌راتیا گشتی یا به‌ره‌ڤانیا باژێری ل عیراقێ راگه‌هاند ژ سالا 2011 وه‌ره عیراقێ ئینانا ماده‌یێ نیتراتێ ئه‌مونیومی قه‌ده‌غه‌كریه، چونكو گرۆپێن توندره‌و بكار دئینان بۆ ته‌قینان.
عه‌مید حه‌سه‌ن ئیبراهیم هاریكارێ رێڤه‌به‌رێ گشتی یێ به‌ره‌ڤانیا باژیری ل عیراقێ راگه‌هاند ل سالا 2011 وه‌ره عیراقێ ئینانا ماده‌یێ ئه‌منیومی قه‌ده‌غه‌كریه. چونكو داعشێ بۆ كردارێن تیرۆریستی بكار دئینا، نوكه چ ماده‌یین ئه‌مونیومی ل عیراقی نینن، هه‌موو كوگه‌هـ گرتینه ژبه‌ركۆ مه‌رجێ سلامه‌تیی دانین.
لگۆری ڤه‌كۆلینێن ده‌ستپێكی یێن حوكمه‌تا لبنانێ ئه‌گه‌رێ ته‌قین و ئاگربه‌ربوونێ ل به‌یرۆتا لبنانێ ژ 2750 ته‌نێن ماده‌یێ ئه‌مونیومی بوو كۆ 6 ساله ل به‌نده‌رێ به‌یرۆتێ هاتبو عومباركرن.
ئه‌ڤرۆ نیوز:
وه‌زیرێ به‌ره‌ڤانیا ئه‌مریكا راگه‌هاند: د پلانا ئه‌مریكادایه هێزێن خوه ل ئه‌فغانستانێ تا دوماهیا ئیسال كێم بكه‌ت بۆ پینج هزار سه‌ربازان.
مارك ئیسپه‌ر وه‌زیرێ به‌ره‌ڤانیا ئه‌مریكا راگه‌هاند نوكه هه‌شت هزار و 600 سه‌ربازێن ئه‌مریكا ل ئه‌فغانستانێ هه‌نه د پلانێ دایه ئه‌وێ ژماره‌یێ كێم بكه‌ین بۆ پینج هزار سه‌ربازان.
مارك ئیسپه‌ر وه‌زیرێ به‌ره‌ڤانیا ئه‌مریكا ئه‌و چه‌نده ژی راگه‌هاند ده‌مێ بجهكرنا ئه‌وێ پلانێ ل دوماهیا هه‌یڤا تشرینا دوێ یا ئیسال دبیت، د چارچوڤه‌یێ ئه‌وێ رێكه‌تنێ دبیت ئه‌وا كۆ ل گه‌ل ریكخراوا چه‌كدارێن تالیبان ئیمزاكری.
به‌ریا نها سه‌رۆكێ ئه‌مریكا دونالد تره‌مپ راگه‌هاند بوو د پلانا واشنتونێ دایه ژماره‌یا سه‌ربازێن خو ل ئه‌فغانستانێ بۆ نێزیكی چار هزار سه‌ربازان كێم بكه‌ت، به‌لێ ده‌مێ بجهكرنا ئه‌وێ پلانێ دیارنه‌كر بوو.
15 هه‌یڤا بوری زالمایێ خه‌لیل زاد هنارتیێ تایبه‌تێ ئه‌مریكا ل ئه‌فغانستانێ راگه‌هاند ل هه‌یڤا ئایارا ئیسال پینج هزار سه‌رباز ژ بنگه‌هێن سه‌ربازی یێن ئه‌مریكا ل ئه‌فغانستانی هێنه ڤه‌كێشان، د چارچوڤه‌یێ بزاڤێن وان بۆ دوماهی هاتن ب شه‌رێ 18 ساله‌یێ ئه‌وی وه‌لاتی.
ئه‌ڤرۆ نیوز:
مه‌یاده نه‌جار ئه‌نداما جڤاتا نوونه‌رێن عیراقێ راگه‌هاند بریاره رۆژا سێ شه‌مبێ شاندێ بلندێ حوكمه‌تا هه‌رێمێ سه‌ره‌دانا به‌غدا بكه‌ت و هه‌ردو ئالی گه‌هشتینه رێكه‌تنێ و بتنێ ئیمزا كرن مایه.
مه‌یاده نه‌جار ئه‌و چه‌نده ژی راگه‌هاند هه‌كه گوهورین روو نه‌ده‌ن، بریاره رۆژا سێ شه‌مبێ 11/8/2020 شاندێ بلندێ حوكمه‌تا هه‌رێمێ سه‌ره‌دانا به‌غدا بكه‌ت ب مه‌به‌ستا رێكه‌تنێ ل سه‌ر پرسێن هه‌لاویستیێن دناڤبه‌را وان دا، دانوستاندن ل قوناغا رێكه‌تنێ دایه و رێكه‌تن ل سه‌ر زۆرینه‌یا پرسان هاتیه كرن بتنێ ئیمزاكرن مایه.
ده‌ربارێ رێكه‌تنێ مه‌یاده نه‌جار ئه‌و چه‌نده ژی راگه‌هاند ب ئه‌گه‌رێ ئه‌وێ چه‌ندێ بۆدجه‌یه‌كا سالانه نینه و ده‌مێ بۆدجێ ژی دیار نینه و هه‌یڤانه بۆدجه بۆ پارێزگه‌هان دهێته ته‌رخانكرن له‌ورا دیاركر نینه دێ چه‌وا بیت، به‌لێ یا گرنگ رێكه‌تنه ل به‌رژوه‌ندا هه‌ردو ئالیان و وه‌لاتیان دایه.
ئه‌ڤرۆ نیوز:
فه‌رمانده‌یێ ئوپراسیونێن هه‌ڤپشك ته‌ئكید ل هه‌ماهه‌نگیا دناڤبه‌را هێزێن پێشمه‌رگه‌ی و هێزێن عیراقی كر، چونكو داعش گه‌فه بۆ سه‌ر هه‌موو ده‌ڤه‌رێ.
یه‌حیا ره‌سول په‌یڤدارێ فه‌رمانده‌یێ گشتی یێن هێزێن چه‌كدارێن عیراقی راگه‌هاند كۆمبوون و لێك تێگه‌هشتنا هێزێن هه‌ڤپشك هه‌یه دناڤبه‌را فه‌رمانده‌یێ ئوپراسیونێن هه‌ڤپشك و هێزێن پاراستنا توخیبێ هه‌رێما كوردستانێ پێشمه‌رگه‌ی دا بۆ ئه‌نجامدانا ئوپراسیونه‌كا هه‌ڤپشك ل ده‌ڤه‌رێن كۆ زانیاریێن هه‌والگری ئاماژه ب هه‌بوونا شانه‌یین تیرۆریستێن داعشی دكه‌ن تێدانه.
په‌یڤدارێ فه‌رمانده‌یێ گشتی یێن هێزێن چه‌كدارێن عیراقێ ئه‌و چه‌نده ژی راگه‌هاند هه‌ماهه‌نگی و لهه‌ڤگوهارتنا زانیاریێن هه‌والگری دبیاڤێ به‌رهنگاربوونا تیرۆرێ گه‌فێن ئه‌منی بخوڤه دگریت ب تایبه‌ت دبیاڤێ كۆنترولكرنا توخیبی ل گه‌ل هنده‌ك وه‌لاتان و رێگریكرن ژ دزه‌كرنا تیرۆریستان.
یه‌حیا ره‌سول ئه‌و چه‌نده ژی دیاركر هه‌ر ل سه‌ر بنه‌مایێ ئه‌وێ رێكه‌تنێ، ناڤه‌ندا هه‌ماهه‌نگیا هه‌ڤپشك دناڤبه‌را ئوپراسیونێن هه‌ڤپشك و ده‌زگه‌هێن ئه‌منی یێن هه‌رێمێ هاتینه پێك ئینان كۆ ژماره‌یه‌كا ئه‌فسه‌ران ب نوونه‌راتیا سوپایێ عیراقێ و حوكمه‌تا هه‌رێمێ كاری تێدا دكه‌ن.
ناڤبری ئه‌و چه‌نده ژی دازانین كۆ ناڤه‌ندێن هه‌ڤپشك دێ ل دیاله و خانه‌قین و ده‌ڤه‌رێن كه‌ركووكێ و هنده‌ك ده‌ڤه‌رێن دی كار كه‌ن، چونكو داعش گه‌ف و مه‌ترسیه‌كه ل سه‌ر هه‌رێمێ و عیراقێ ژی دڤێت ئه‌وان مه‌ترسیان نه‌هێلین.
ئه‌ڤرۆ نیوز:
بێگه‌رد تاله‌بانی وه‌زیرا چاندنێ و ژێده‌رێن ئاڤێ یا حوكمه‌تا هه‌رێما كوردستانێ راگه‌هاند كو ل ده‌مێ بوری زێده‌باری بریارا قه‌ده‌غه‌كرنێ، به‌لێ چه‌ند به‌رهه‌مه‌كێن چاندنێ ژ ده‌رگه‌هێن توخیبی دهاتنه ناڤ هه‌رێمێ دا.
د راگه‌هاندنه‌كێ دا، وه‌زیرا چاندنێ راگه‌هاند د پێخه‌مه‌تا پاراستنا به‌رهه‌مێ جۆتیارێن هه‌رێمێ به‌رهه‌مێ هاوه‌رده‌كری قه‌ده‌غه‌دكه‌ین، له‌ورا ده‌مێ بوری زانیاری گه‌هشتنه مه كۆ ل چه‌ند ده‌رگه‌هه‌كێن توخیبی به‌رهه‌مێ قه‌ده‌غه‌كری هاتیه ناڤ هه‌رێمێ، ئه‌ڤه ژی كارتێكرنه‌كا راسته‌وخو ل سه‌ر به‌رهه‌مێ جۆتیارێن هه‌رێمێ دبیت.
وه‌زیرا چاندنێ ئاماژه ب وێ چه‌ندێ ژی دایه كۆ وه‌زاره‌تێ نڤیسار ئاراسته‌ی جڤاتا وه‌زیران كریه بۆ ئه‌وێ چه‌ندێ هه‌ماهه‌نگیه‌كا پێدڤی ل گه‌ل بكه‌ن و رێگریێ ژ ئینانا به‌رهه‌مێن قه‌ده‌غه‌كری بهێته‌كرن.
ئه‌ڤرۆ نیوز:
په‌یڤدارێ فه‌رمانگه‌ها ساخله‌میا كه‌ركووكێ راگه‌هاند چار توشبوویێن دی یێن ڤایرۆسێ كورونایێ ل كه‌ركووكێ گیانێ خوه ژ ده‌ست دان.
سامان یابه په‌یڤدارێ فه‌رمانگه‌ها ساخله‌میا كه‌ركووكێ راگه‌هاند رۆژا 8/8/2020 ل كه‌ركووكێ 293 كه‌س تووشی كورونایێ بوون و 64 كه‌س ژی ساخ بوون و چار كه‌سان ب ڤایرۆسێ كورونایێ ژی گیانێ خوه ژ ده‌ست دان.
په‌یڤدارێ فه‌رمانگه‌ها كه‌ركووكێ ئه‌و چه‌نده ژی راگه‌هاند:
ل كه‌ركووكێ تانوكه 5 هزار و 704 كه‌س تووشی كورونایی بوون، هه‌زار و 813 كه‌س ژی ل نه‌خوشخانه‌یادانه و سی هزار و 607 كه‌س ژی باش بووینه و هه‌روه‌سا 284 كه‌سان ژی گیانێ خوه ژ ده‌ست دایه.
ئەڤرۆ نیوز:
دەزگەهێ ئاسایشا هەرێما کوردستانێ راگەهاند: د ئۆپەراسیۆنەکێدا ل سنووری قەزا چەمچەمال وان شەش تیرۆریست دەستەسەر کرینە، کو وان دڤیا حەشارگەهەکێ دروستبکەن و رێیەکا پەیوەندیێ دروستبکەن ل گەل چەند شانەیێن نھێنی یێن داعشێ.
ئەڤرۆ شەمبیێ 08-08-2020، دەزگەهێ ئاسایشا هەرێما کوردستانێ راگەهاندنەک دەربارەی دەستگیرکرنا شەش کەسان ل سنوورێ چەمچەمال بەلاڤکریە و گۆتیە: ل سالا 2014 وان هەر شەش کەسان بەیعەت دایە داعشێ و چەکداربووینە و پشکداربووینە د چەندین تاوانان دا.
د چەند ئۆپەراسیۆنان دا ل رۆژا 04-08-2020 تیرۆریستێن تاوانبار (ج .م) کو د ژیێ 26 سالیێ دایە و تیرۆریست (ئ .ھ ) کو د ژیێ 30 سالیێ دایە هاتینە دەستگیر کرن کو ھەردو خەلکێ فەلوجەنە، هەروەسا ل دەمێ وێ ئۆپەراسیۆنێدا ئێک ژ دەستەسەر کریان ب ناڤێ (م.ھ) کو ژیێ 29 سالە، ژ دەست ھێزێن ئاسایشێ درەڤیت و پاشی ب برینداری دهێتە گرتن.
ئەوێن هاتینە دەستگیرکرن ھەر ئێک ژ تاوانباران (ع.م) د ژیێ 31 سالیێ دایە، (ع.ع) د ژیێ 22 سالیێ دایە و خەلکێ مەحمودیێ یە، ل ناڤا باژێرێ چەمچەمال تیرۆریست (ع.د) کو د ژیێ 29 سالیێ دایە و خەلکێ بەغدایە هاتیە دەستگیرکرن.
نيشاندان