ئه‌ڤرۆ نیوز:
وه‌زیرێ ده‌رڤه‌یێ ئه‌مریكا راگه‌هاند: وه‌لاتێ وی ب چار مه‌رجان پشته‌ڤانیا حكومه‌تا نوو یا عیراقێ ب سه‌رۆكاتیا عه‌دنان زرفی كه‌ت.
مایك پومپیوه وه‌زیرێ ده‌رڤه‌یێ ئه‌مریكا راگه‌هاند: هه‌كه عه‌دنان زرفی ل پێك ئینانا كابینا نوو، لبه‌رچاڤكرنا ئه‌وان مه‌رجێن مه بكه‌ت، ئه‌ڤه پشته‌ڤانیا ئه‌مریكا و جڤاكا نێڤ ده‌وله‌تی بده‌ستڤه دئینیت، ئه‌و ژی پارستنا سه‌روه‌ریا عیراقێ و دابینكرنا پێدڤیێن وه‌لاتیان و دژایه‌تیكرنا گه‌نده‌لیێ و ژناڤبرنا وێ و پاراستنا مافێن مرۆڤی.
ئه‌ڤرۆ نیوز:
پشتی دیاریكرن ژ لایێ سه‌رۆك كۆمارێ عیراقێ ڤه، زرفی به‌ربژارێ راسپاردی بۆ پێك ئینانا حكومه‌تا نوو یا عیراقێ ئێكه‌م په‌یاما خو به‌لاڤكر.
عه‌دنان زرفی به‌ربژارێ راسپاردی بۆ پێك ئینا كابینا نوو یا حكومه‌تا عیراقێ د په‌یامه‌كێ دا پشتی هاتیه راسپاردن راگه‌هاند: راسپاردنا من بۆ پوستێ سه‌رۆك وه‌زیران به‌رپرسیاریه‌كا دیرۆكی یه و دێ هه‌موو شیانێن خۆ بۆ خزمه‌تكرنا گه‌لێن عیراقێ ته‌رخان كه‌م و من دڤێت حكومه‌ته‌كێ پێك بینم هه‌مووو پیكهاته پشكدار بن، دوور ژ پشكێن حزباتیێ بیت.
سه‌رۆك وه‌زیرێ راسپاردی حكومه‌تا نوو یا عیراقێ دیاركر ب چ شیوه‌یه‌كی به‌ربژارێن وه‌زیر یێن سه‌پاندی ژلایێ لایه‌نێن سیاسی بۆ پوستێن وه‌زیریێ قه‌بیل ناكه‌م، زیده‌باری ئاریشه‌یێن هه‌رێم و خونیشاندانان چاره‌كه‌ین و هه‌ڤكاریا پێشمه‌رگه‌ی كه‌ین، هه‌ڤده‌م سوزێ دده‌م ڤه‌كولینێ ل بكۆژین خونیشانده‌ران بكه‌م.
ئه‌ڤه ده‌مه‌كی دایه ئێك ژ ئه‌گه‌رێن شكه‌ستنا محه‌مه‌د عه‌لاوی نه‌رازیبوونا وی ژ كاندیدكرنا لایه‌نان بوو، هه‌كه ئه‌ڤه ژی هه‌ر ئه‌وێ سیاسه‌تێ بكار بینیت دێ شكه‌ستنێ ئینیت.
ئەڤرۆ نیوز:
ب فەرمانا سەرۆکێ حوکمەتا هەرێما کوردستانێ، بوودجێ دویێ یێ هەوارهاتنێ بۆ بەرهنگاربوونا نەخۆشیا کۆرۆنا یێ هاتە تەرخانکرن.
وەزارەتا ساخلەمیا حوکمه‌تا هه‌رێما کوردستانێ راگەهاندیە، ب فەرمانا مەسرور بارزانی سەرۆکێ حوکمەتا هەرێما کوردستانێ، ژ بۆ پاراستنا ساخلەمیا وەلاتیان، بوودجێ دویێ بۆ بەرهنگاربوونا ڤایرۆسێ کۆرۆنا یێ هاتیە تەرخانکرن.
ئەڤرۆ نیوز:
هژمارەکا بەلێندەرێن پارێزگەها دھۆکێ بریار دایە سوبەهی 18 ئادارێ دەست ب دروستکرنا نەخۆشخانەکا 104 تەختی بکەن کو دێ یا تایبەت بیت ب تووشبوویێن کۆرۆنا یێ ڤە.
زیرەک دۆسکی، سەرۆکێ کۆمەلا بەلێندەرێن کوردستانێ لقێ دھۆک، بۆ رووداوێ راگەهاند، ئەڤرۆ 17 ئادارێ هژمارەک ژ بەلێندەرێن دھۆکێ پشتی ئەنجامدانا کۆمبوونەکێ بڕیار دایە ھەر ئێک لدووڤ شیانێن خوە، پشکداریێ د پرۆژێ دروستکرنا نەخۆشخانەکا تایبەت بۆ کۆرۆنا یێ ڤە بکەن.
گۆتیە ژی، مە نڤیسارەک پێشکێشی پارێزگارێ دھۆکێ کریە بۆ دەستنیشانکرنا پارچە زەڤیەکێ و پشتی رەزامەندیا وی بۆ دابینکرنا پارچە زەڤیەکێ ل سنوورێ ناحیا رزگاری یا سەر ب قەزا سێمێلێ ڤە، بڕیارە ب چاڤدێریا رێڤەبەرایا گشتی یا ساخلەمیا دھۆکی و لژنا بلند یا خۆپاراستنێ ژ کۆرۆنا یێ، دەست ب دروستکرنێ بهێته کرن و د زووترین دەمدا بهێتە تەمام کرن، هەر ھێشتا پەم نزانین دێ چەند پارە بۆ هێته خەرج کرن، بەلێ دێ یا 104 تەختی بیت و ھەموو پێدڤیێن ساخلەمیێ دێ تێدا هەبن.
ئه‌ڤرۆ نیوز، زنار تۆڤى:
مه‌نار زیاد، خه‌لكا شنگالێ یه و ئه‌ڤه ده‌مێ چه‌ند سالانه ل باژێرێ دهۆكێ دژیت، نوكه قۆتابیه ل قۆناغا چارێ ل كۆلیژا ئه‌ندازیارى ل زانكۆیا حه‌دبا ل مۆسل، د دیداره‌كێ دا بۆ ئه‌ڤرۆ نیوز دیار كر: وێ پێلاڤه‌ك بۆ كه‌سێن نابینا و ئه‌وێن گه‌له‌ك هه‌ست ب ده‌نگان ژى نه‌كه‌ن چێكریه، مه‌ره‌ما وێ ژ ڤى پرۆژه‌ى ئه‌و بوویه، كو ئه‌و كه‌سێن نابینا، ده‌مێ وێ پێلاڤێ دكه‌نه پێن خوه، ل دووراتیا مه‌تره‌كێ ئه‌و پێلاڤ دێ وان ئاگه‌هدار كه‌ت و دێ پێن وان ره‌جفینیت و دێ بۆ دیار كه‌ت، كو تشته‌كێ ب مه‌ترسى ل پێشیا وان هه‌یه، ب رێیا وێ پێلاڤێ ئه‌و كه‌سه دێ ژ وێ مه‌ترسیێ هێته پاراستن و دێ وى كه‌سى ئاگه‌هدار كه‌ت، كو نابیت ئه‌و كه‌سه د وى جهى را بچیت و باشتره رێیا خوه ب گوهۆریت، داكو توشه كه‌فتنێ نه‌بیت، دیسان ئه‌و دشێت هه‌تا دووراتیا چار مه‌تران ژى ب رێیا وێ پێلاڤێ وان كه‌سێن نابینا ئاگه‌هدار بكه‌ت.
ناڤهاتیێ گۆت ژى: ئه‌ڤه ده‌مه‌كێ درێژ بوو، ئه‌ز مژوولى ڤى كارى، لێ پشتى من ب دووماهى ئیناى، من سه‌ركه‌فتن تێدا ئینایه و مه ئه‌و پێلاڤه جه‌رباندى یه ل دووراتیا مه‌تره‌كێ مرۆڤى ئاگه‌هدار دكه‌ت، هه‌كه تشته‌ك د رێیا مرۆڤێ نابینان دا هه‌بیت، هه‌روه‌سا داخوازیا من ئه‌وه، كو جهێن شۆله‌ژێ هاریكاریا وێ یا مادى بكه‌ن، داكو ئه‌ز بشێم ڤى پرۆژه‌ى به‌رفره‌ه بكه‌م و ڤێ چه‌ندێ بێخمه د خزمه‌تا كه‌سێن نابینا دا ل كوردستانێ.
مه‌نارێ ئه‌و ژى گۆت: ئه‌ڤ هزره بۆ من ژ هندێ هات، ده‌مێ من ل زانكۆیێ دخواند، من كه‌سێ نابینا دیت و ڤێ چه‌ندێ كارتێكرنه‌كا مه‌زن ل من كر، له‌وما من هزر د چێكرنا ڤێ پێلاڤێ دا كر، ژ پێخه‌مه‌ت ئه‌ز بشێم هاریكاریا كه‌سێن نابینا بكه‌م، نوكه ب تنێ من پێدڤى ب هاریكاریا مادى هه‌یه، ژ پێخه‌مه‌ت ئه‌ز بشێم ڤان پێلاڤان بێخمه دناڤا بازارى دا، هه‌روه‌سا من ل به‌ره ڤى پرۆژه‌ى بێخمه د خزمه‌تا هه‌موو مرۆڤێن جیهانێ دا.
ئەڤرۆ نیوز:
حوکمەتا هەرێما کوردستانێ راگەهاند، د کۆمبوونا جڤاتا وەزیران دا چەندین بریارێن تایبەت ب جێبەجێکرنا رێنمایێن بەرهنگاربوونا ڤایرۆسێ کۆرۆنا یێ و نرخاندنا رەوشا ئابووری هاتنە دان، حوکمەتێ بریاردایە میکانیزمەکا گونجای بۆ بجهئینانا مووچەی ببینن.
ئەڤرۆ سێشەمبی 17.3.2020 حوکمەتا هەرێمێ راگەهاندیە، د کۆمبوونا جڤاتا وەزیران دا کو ب ئاوایەکێ ڤیدیۆ کۆنفرانس برێڤەچوویە، هەر ئێک ژ وەزارەتێن دارایی و ئابووری، ناڤخۆ، کاروبارێن پێشمەرگەی و دەزگەهێ ئاسایش هاتینە راسپاردن د نێزیکترین دەم دا میکانیزمەکا گونجایی بۆ خەرجکرنا مووچێ فەرمانبەران ببینن، ب تایبەتی مووچێ هێزێن پێشمەرگەی و پۆلیسان و ئاسایشا ناڤخۆ، ب مەرجەکێ رێکارێن خۆپاراستنێ بەرچاڤ بهێنە وەرگرتن.
دیار کریە ژی، بریار هاتیەدان د چارچۆڤێ جێبەجێکرنا قانوونا چاکسازیێ دا، دارایا گشتی بهێتە رێکخستن ب ئاراستا خزمەتکرنا وەلاتیان و دابینکرنا دەبارا وان و خەرجیێن گشتی ژی بهێنە کێمکرن، هەروەسا بریار دایە ل ڤان نێزیکان کۆمبوونەکا تایبەت ب نەفت و گازێ بهێتە ئەنجامدان، ب مەرەما گۆتۆبێژکرنا دەلیڤێن ڕێکخستنا داهاتی و خەرجیێن نەفت و گازێ ل هەرێمێ، دیسان بەرچاڤگرتنا رەوشا دارایی و لێکەفتێن دارایی ل هەرێمێ، هەروەسا پەیوەندی و هەڤبەندی دێ ل گەل حوکمەتا فیدرالی د بەردەوام بن، ژ پێخەمەت دابینکرنا شایستێن دارایی و مافێن دستوری یێن هەرێمێ.
ئەڤرۆ نیوز:
د کۆنگرەکێ رۆژنامەڤانی دا فەرهاد ئەترۆشی پارێزگارێ دهۆکێ دیار کر، ژ بلی نانپێژی و سەمونخانا و جهێن فرۆتنا کەرەستێن هشک و دەرمانخانە و پیشەسازیێن ترۆمبێلا، بریار دا هەموو بازارێن پارێزگەها دهۆکێ بهێنە داخستن، ئەڤ بریارە دێ بۆ دەمێ ١٠٠ دەمژمێران و هەتا ٢٣ ڤێ هەیڤێ یا بەردەوام بیت.
ناڤهاتی گۆت ژی، هەتا نوکە بریارا قەدەغەیا هاتنوچوونێ ل دهۆکێ و سنورێن وێ نەهاتیە راگەهاندن و نوکە هاتنوچوون ل دهۆکێ و قەزا و ناحیێن وێ یا ئاسایە.
پارێزگارێ دهۆکێ دیارکر ژی، هەتا نوکە ل سنورێ پارێزگەها دهۆکێ چ حالەتێن گومانلێکری یان توشبوون ب ڤایرۆسا کۆرۆنایێ نەهاتیە تۆمار کرن.
ئەو ژی گۆت، رۆژانە ل سەنتەرێ باژێرێ دهۆکێ و هەموو قەزا و ناحیێن گرێدایی وێ، رێنمایێن نوو ژ ئالیێ لیژنا بەرهنگاربوونا کۆرۆنایێ ب سەر وەلاتیان دا دهێنە پارڤە کرن.
ئەڤرۆ نیوز:
سەرۆکێ حوکمەتا هەرێما کوردستانێ سەرەپەرشتیا کۆمبوونەکا تایبەت کر کو ل دۆر رێکارێن حوکمەتێ بۆ رێگریکرن ل بەلاڤبوونا کۆرۆنا برێڤە چوو.
کۆمبوون د چارچۆڤێ ڤیدیو کۆنفرانس بوو و تێد قوباد تالەبانی و گەلەک وەزیر ژی پشکدار بوون.
سەرۆکێ حوکمەتێ داخواز کر کو وەزارەتا دارایی و پێشمەرگە ل گەل ئالیێن دی پێکڤە ئالیەتەکێ پەیدا بکەن کو بشێن مووچێ فەرمانبەران ب تایبەتی ژی یێن پێشمەرگەی و هەموو فەرمانبەران دابەش بکەن ب رەنگەکێ کو کارتێکرنا خوە ل رێکارێن تایبەت یێن حوکمەتێ و وەزارەتا ساخلەمیێ ل دۆر کۆرۆنا نەکەت.
سەرۆکێ حوکمەتێ ئەو یەک ژی دیار کر کو دڤێت دەست ب هەوەکا نشتیمانی بهێتە کرن بۆ کۆمکرنا هاریکاریان بۆ خەلکێ هەژار و ب هەموو رەنگەکێ هاریکاریا وان کەسان بهێتە کرن.
ئه‌ڤرۆ نیوز، ناجی به‌ده‌ل:
سالار محه‌مه‌د سلێمان رێڤه‌به‌رێ قوتابخانا صه‌لاح الدین، ل سنورێ په‌روه‌ردا دهۆك رۆژئاڤا بۆ ئه‌ڤرۆ نیۆز ئاشكراكر كو پشتی ده‌رگه‌هێن قوتابخانا هاتینه گرتن ژ به‌ر ئه‌ڤێ نه‌خوشیێ وه‌ك خوپاراستن، ل دووف رێنمایێن ساخله‌میێ دڤێت ژ مال نه ده‌ركه‌ڤین، وه‌ك كارگێریا قوتابخانێ ل گه‌ل مامۆستا مه هزر ل دانانا وانان كر بۆ قوتابیان ب شێوێ ئونلاین و ب رێكا گرۆپێن ڤایبه‌ری كو هه‌ر ل ده‌سپێكا سالێ مه گرۆپ هه‌بووینه و رۆژانه مه واجب و كونتاك ل گه‌ل سه‌میانێن قوتابیان هه‌بووینه.
رێڤه‌به‌رێ قوتابخانێ ئاماژه كره وێ چه‌ندێ ژی كو ماوه‌یه‌كه مه ده‌ست ب خواندنێ كریه ل هه‌موو قوناغان بۆ ئێكێ هه‌تا شه‌شێ و پتریا وانا دهێنه گۆتن و پتر فوكسا مه ل سه‌ر بابه‌تێن زانستی یه ل بازنێ دووێ ئانكو و بازنێ ئێكێ بابه‌تێن بیركاری و كوردی و زانست و زمانێ ئنگلیزی و هه‌تا كومه‌لایه‌تی و رۆژانه مامۆستا پشتی نیڤرۆ دێ ئه‌ركی ب ده‌نگ و ره‌نگ بۆ قوتابیان د گرۆپێ وێ پولێ دا به‌لاف كه‌ت و دێ قوتابی دروست كه‌ن و هه‌ر ئێك ڤیدیویه‌كێ بۆ گرۆپی هنێریت و هه‌تا مه تجربێن زانستێ و بیركاریێ قوتابیان ل ناف مال كرینه و هنارتینه و هنده‌ك قوتابیان نێت نینه و ماموستایێن مه ب ته‌له‌فونێ بابه‌تی دگه‌هینێ.
رێڤه‌به‌رێ قوتابخانێ ئه‌و ژی دیاركر كو سه‌رپه‌رشتێ په‌روه‌ردێ مه هایداركرینه و ل گه‌ل ڤه‌كرنا ده‌رگه‌هێن قوتابخانا دێ ئه‌ف بابه‌تێن مه گۆتین دوباره كه‌ینه ڤه بۆ زارۆكان و دا بهێته بیرا وان ڤه و نمرێن باش ل قوتابخانێ ل سه‌ر ئه‌ڤا خواندین وه‌ربگرن.
سالار محه‌مه‌د ئارمانجا ژ ئه‌ڤی كاری ژی گۆت: مه به‌ستا مه ئه‌وه زارۆك رۆژانه ل گه‌ل مامۆستایێن خوه بهێنه گرێدان ب په‌رتووكێ و خواندنێ ڤه، یا دووێ دایك و باب ژی نوكه ل مالن ئه‌و ژی هاریكاریا وا بكه‌ن و دیسا دا زارۆك بهێنه مژولكرن ب په‌رتوكێ ڤه و داخازا ده‌ركه‌تنێ ژ مال نه‌كه‌ن و دا گیانێ وی یێ ب سلامه‌ت بیت.
ئه‌و ژی ئاشكراكر كو پێ ناحسم قوتابخانه‌كا حوكمی ڤی كاری بكه‌ت، ره‌نگه قوتابخانێن ئه‌هلی ڤی كاری دكه‌ن به‌لێ یێن حوكمی.
قوتابخانا سه‌لاح الدین ل سالا 1922 و هنده‌ك ژێده‌ر دبێژن به‌رێ ژی هه‌بوویه هاتیه دامه‌زراندن و ئێكه‌م قوتابخانه بوو ل دهۆك هاتیه دروستكرن و ئه‌فه 98 ساله به‌رده‌وامه ل سه‌ر خواندنێ.
نيشاندان