جڤاتا ئاسایشا هەرێما كوردستانێ د رۆهنكرنەكێدا ئاماژە ب وێ چەندێ كر كو پشتی چەندین سالان ژ دووڤچوونێ و ب پشتبەستنێ ب پێزانینێن جڤاتا ئاسایشا هەرێما كوردستانێ و هەماهەنگیێ ل گەل هەڤپەیمانان و پاشی ل گەل هێزێهن فیدرالی یێن ئیراقی، جێگرێ خەلیفێ داعشێ و بەرپرسێ داعشێ ل ئیراقێ و سووریێ ب ناڤێ عەبدوللا مەكی موسلح ئەلرفیعی یێ ناڤدار ب (ئەبو خەدیجە) د چالاكییەكێدا هاتە كوشتن، بەلێ مخابن د بەیاننامەیا سەرۆك وەزیرێن فیدرالدا هیچ ئاماژەیەك ب رۆلێ سەرەكی یێ جڤاتا ئاسایشا هەرێما كوردستانێ نەهاتە دان و ئەڤ چەندە ژی ئاماژەیەكا باش نینە بۆ ئاسۆیێ هاریكارییا دامودەزگەهێن هەرێما كوردستانێ و ئیراقێ.
جڤاتا ئاسایشا هەرێما كوردستانێ بەلاڤكر ژی» ئەڤ كریارە بەلگەیا رژدییا مەیە د بەرهنگاربوونا گەفێن تیرۆرستان ل دەڤەرێ».
جڤاتا ئاسایشا هەرێما كوردستانێ دوپاتكر ژی» دامودەزگەهێن سەر ب جڤاتا ئاسایشا هەرێما كوردستانێ، رۆلەكێ كاریگەر د بەرهنگاربوونا گەفێن تیرۆرستان ل ڤێ دەڤەرێ هەبوو و هەروەسا ب كارایی د ڤی ئەركیدا دێ بەردەوام بیت و باشترە حوكمەتا فیدرالی ژی دەلیڤەیەكا گونجایتر یا هاریكارییا و هەماهەنگیێ پەیدا بكەت ژ پێخەمەت پاراستنا ئارامیێ ل سەرانسەری ئیراقێ».
ژ ئالیێ خوەڤە سەگڤان سندی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان و جێگرێ سەرۆكێ لژنەیا ئاسایش و بەرگریێ ل جڤاتا ناڤبری ل دۆر ڤی بابەتی گۆت» ئەمریكا ل سەر ئاستەكێ بلند سوپاسییا دەزگەهێن ئەمنی یێن كوردستانێ كر بۆ وان بزاڤێن مەزن یێن ئەنجامداین د كوشتنا وی سەركردەیێ داعشێدا، گەلەگ بزاڤ ل ئیراقێ هاتە كرن ئەڤ رۆلە بهێتە ڤەشارتن، بەلێ سەرنەگرت، د بەیاننامەیا فەرمییا ئیراقێ ژی دا باسێ رۆلێ دەزگەهێن ئەمنی یێن هەرێما كوردستانێ نەهاتە كرن، پاشی ب رۆهنكرنەكێ هاتە باسكرن، ل ڤێرێ یا گرنگ ئەوە بهێتە گۆتن هەكە رۆلێ پێشمەرگەی و دەزگەهێن ئەمنی یێن هەرێما كوردستانێ نەبیت ل دەڤەرێ، رۆژانە ب دەهان سەركردەیێن هەڤشێوەیێن داعشێ دێ دروست دبن، هەموو ژی دزانن ئەفسانەیا داعشێ و هێزا داعشێ ل كوردستانێ هاتە شكاندن، هیچ دەمەكی هیچ گرۆپەكا ئیراقێ نەشێت وی رۆلێ دەزگەهێن ئەمنی یێن هەرێما كوردستانێ ببینن، ڤێجارێ خواست وێ چەندێ بكەن بەلێ بۆ نەچوو سەر و ل سەر ئاستێ سەرۆكایەتییا ئەمریكا سوپاسییا هەرێما كوردستانێ هاتە كرن».

سەرۆكێ ئەمریكا د پەیامەكێدا خوەشحالییا خوە بۆ كوشتنا كەسێ دویێ یێ رێكخستییا داعش یا تیرۆرستی ل ئیراقێ و سووریێ دیاركر و راگەهاند: ب هەماهەنگی ل گەل حوكمەتا ئیراقێ و هەرێما كوردستانێ، مە شیا مەزنترین ئەمیرێ رەڤی یێ داعشێ ل ئیراقێ و سووریێ ژناڤ ببەین. هەروەسا فەرماندەییا ناڤەندی یا هێزێن ئەمریكی ژی راگەهاند، پشتی چەندین پشكنینان كوشتنا عەبدوللا مەكی موسلح ئەلرفیعی یێ ناڤدار ب (ئەبو خەدیجە) هاتە پشتڕاستكرن كو ل سەرانسەری جیهانێ سەرپەرشتییا كریارێن چەكداری و پارەداركرنا كریارێن تیرۆرستی یێن داعشی دكر.
ل سپێدەهییا دوهی شەمبیێ 15/3/2025، دۆنالد ترەمپ، سەرۆكێ ئەمریكا ل تۆرا جڤاكییا (ئێكس) بەلاڤكر» ب هاریكارییا هێزێن ئەمنی یێن ئیراقێ و هەرێما كوردستانێ، مە شیا مەزنترین ئەمیرێ رەڤی یێ داعشێ ل ئیراقێ و سووریێ ژناڤ ببەین».
هەر سەبارەت كوشتنا وی ئەمیرێ داعشێ، فەرماندەییا ناڤەندی یا هێزێن ئەمریكی (سینتكۆم) ب بەلاڤكرنا ڤیدیۆیا كوشتنا وی ئەمیرێ داعشێ، ئاماژە كریە، هێزێن مە ب هەماهەنگی ل گەل هێزێن هەوالگیری و ئەمنی یێن ئیراقێ د هێرشەكا ئەسمانیدا ل پارێزگەها ئەنبار شیا كەسێ دویێ یێ رێكخستییا داعش یا تیرۆرستی و فەرماندەیێ ئۆپەراسیۆنان و ئەمیرێ لژنەیا نوونەرایەتیێ، عەبدوللا مەكی موسلح ئەلرفیعی یێ ناڤدار ب (ئەبو خەدیجە) ل گەل ئەندامەكێ دی یێ داعشێ بكوژن.
هەر د بەیاننامەیا فەرماندەییا ناڤەندی یا هێزێن ئەمریكی دا ئاماژە ب وێ چەندێ هاتە كرن كو ئەبو خەدیجە ئەمیرێ بلندترین دەستەیا بڕیاردانێ بوو ل رێكخستییا داعش یا تیرۆرستی بوو، هەروەسا بەرپرس بوو ژ كریارێن چەكداری و پلاندانانا وێ رێكخستییا تیرۆرستی ل سەر ئاستێ نێڤدەولەتی، هەڤدەم ل سەرانسەری جیهانێ سەرپەرشتییا پارەداركرنا كریارێن تیرۆرستی یێن داعشێ كریە.
د پشكەكا دی یا بەیاننامەیێدا هاتیە» پشتی هێرشا ئەسمانی، هێزێن فەرماندەیا ناڤەندی یا هێزێن ئەمریكی و هێزێن ئیراقی چوونە وی جهی و تەرمێ هەردو تیرۆرستان دیت كو قاویشێن مینڕێژكری پێڤە بوون، بەلێ نە پەقین و چەند پارچەیێن چەكی ژی د دەستی دابوون.
ژ ئالیێ خوەڤە، جەنەرال مایكل ئێریك كۆرێلا، فەرماندەیێ فەرماندەیا ناڤەندی یا هێزێن ئەمریكی (سینتكۆم) راگەهاند» ئەبو خەدیجە ئێك بوو ژ سەركردەیێن گرنگ یێن داعشێ ل سەر ئاستێ نێڤدەولەتی و دێ بەردەوام بین ل سەر نەهێلانا تیرۆرستان و هەلوەشاندنا رێكخستییا وان كو بووینە گەف ل سەر وەلات و هێزێن ئەمریكا و هەڤپەیمانان و هەڤپشكێن مە ل دەڤەرێ و جهێن دی».
پترییا ئاوارەیێن زڤرینە شنگالێ ژ ئالیێ بەغدایێ ڤە نەهاتینە قەرەبووكرن

جێگرێ پێشتر یێ سەرۆك وەزیرێن ئیراقێ یێ ئاژە ب وێ چەندێ كر، گوهۆڕین ل ئیراقێ یێن ب رێڤە، هەروەسا دبێژیت: سیستەمێ سیاسی یێ نوكە ل ئیراقێ نەشێت بەردەوام بیت.
سالح موتلەگ، جێگری پێشتر یێ سەرۆك وەزیرێن ئیراقێ ژ پشكا سوننەیان بۆ كەنالێ (الحرە) یێ ئەمریكی گۆت» پترییا سیاسەتمەدارێن ئیراقی وانەیان ژ گوهۆڕینێن دەڤەرێ وەرناگرنو ل سەر هەمان وێ رێبازێ نە كو ژ سالا 2003 ێ ل دووڤ دچن و پەیڕەو دكەن».
سالح موتلەگ دوپاتكر ژی» هەڤوەلاتیێن ئیراقێ ژ رەوشا نوكە یا وەلاتی د رازی نینن و ب تمامی یێن بێ ئومێد بووین و باوەری ب سندووقێن دەنگدانێ نەمایە بۆ گوهۆڕینێ».
موتلەگی گۆت ژی» سیستەمێ نوكە یێ ئیراقێ نەشێت بەردەوام بیت، چونكە پشك پشكانێیە و قەبارەیێ گەندەلیێ ل وەلاتی بەردەوامە».
جێگرێ پێشتر یێ سەرۆك وەزیرێن ئیراقێ دیاركر ژی» هەكە ئەڤ رەوشە ب ڤی شێوەی بەردەوام بیت، گوهۆڕین ل ئیراقێ دێ روودەن، ئەو گوهۆڕینە ژی یان دێ ژ ناڤخوە یان ژی دێ ژ ئالیێ ئەمریكا ڤە بیت».
ناڤبری باس ل وێ چەندێ ژی كر» هەكە گوهۆڕین ژ ئالیێ ئەمریكا ڤە بیت، دێ ب وی مەرجی دگەلدا بن ب هەمان شێوەیێ بۆری نەبیت كو ل سەر بنەمایێ پشك پشكانێ یا تائیفی بوو».
هەورەسا خویاكر ژی» هندەك ژ وان ئالیێن خودان گرۆپێن میلیشیا و پەیوندی ب ئایدیۆلوجیا وەلاتێن دی ڤە هەی، بزاڤێ دكەن هەبوونا هێزێن بیانی ل ئیراقێ بكەنە بەهانە بۆ وێ چەندێ هەتا هەتایێ د ژیانا سیاسیدا بمینن تاكو بەردەوامیێ ب هەژموون و كاریگەرییا خوە و دزی و تالان و سڤكایەتیكرن ب هەڤوەلاتییان بدەن».
ل دوماهیێ گۆت» حەشدا شەعبی فەرمانێن فەرماندەییا گشتییا هێزێن چەكدار ل ئیراقێ بجه نائینیت، بەلكو فەرمانان ژ دەرڤەی ئیراقێ وەردگریت، لەوما جهێ باوەریێ نینە و نابیتە پشكەك ژ دەزگەهێن وەلاتی».

وەزارەتا كۆچ وكۆچبەرێن ئیراقێ راگەهاند ژ ئەگەرێ گێروبوونا قەرەبوویا خەلكێ ڤەكەریای جهێن خوە یێن رەسەن ل شنگالێ نوكە ڤەگەریانا ئاوارەیان یا كێمبووی.
عەلی عەباس، پەیڤدارێ وەزارەتا كۆچ وكۆچبەرێن ئیراقێ گۆت» ئاوارەیێن ژ كەمپان ڤەگەریاین جهین خوە هێشتا گەلەك ئاوارە ژ وان نەهاتینە قەرەبووكرن ژ ئەگەرێ كێمبوونا بودجەیا وەزارەتا كۆچ وكۆچبەرێن ئیراقێ یا تایبەت ب ڤەگەریانا ئاوارەیان وئەڤ چەندە ژی بوویە ئاریشە بۆ هەموو ئاوارەیێن ڤەگەریاین جهێن خوە».
ژ ئالیێ خوەڤە شەریف سلێمان، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان و ئەندامێ لیژنا كۆچ و كۆچبەران ل جڤاتا ناڤبری بۆ رۆژنامەیا (ئەڤرۆ) گۆت» چەند زڤرینا ئاوارەیان بۆ شنگالێ گێرۆبیت دێ ئاریشەیێن وان بۆ زڤرینێ زێدەتر بن ب تایبەتی كەسێن خانیێن وان ئاخ كو نوكە پترییا خانیێن ئاخێ ژناڤچووینە و هەبوونا گرۆپێن چەكدار دناڤ شنگالێدا و نەبوونا خزمەتگوزاریان و قەرەبوونەكرنا خەلكێ شنگالێ، هەموو ئەگەرن كو ئاریشەیێن ئاوارەیان بۆ زڤرینا شنگالێ زێدەتر بن».
شەریف سلێمانی دیاركر ژی» هەژمارەكا خەلكێ شنگالێ ژ كەمپان و ژدەرڤەی كەمپان ڤەگەریاینە شنگالێ وهەتا نوكە سەدان خێزانێن ئێزدی یێن ڤەگەریاین و بەخشینا دارایی یا ڤەگەریانێ دگەل پێتڤیێن ناڤمالی وەرنەگرتینە و ئەو سۆزێن وەزارەتا كۆچ و كۆچبەرێن ئیراقێ داینە ئاوارەیان بجهنەئیناینە وئەڤە بوویە ئەگەر خەلك ژیانا ئاوارەبوونێ هەڵبژێریت و د ناڤ خیڤەتاندا بمینیت».

سەرۆك بارزانی و مەزلۆم عەبدی دوپاتكر كو پێدڤییە د پێنگاڤێن داهاتی د پرۆسەیا سیاسی یا سووریێ دا هەلوەستێ كوردی ئێك بیت.
بارەگەهێ بارزانی د بەیاننامكەیەكێدا بەلاڤكر» ل رۆژا چارشەمبی 12 ئادارا 2025، د پەیوەندییەكا تەلەفۆنیدا د ناڤبەرا سەرۆك مەسعود بارزانی و مەزلۆم عەبدی، فەرماندەیێ گشتیێ هێزێن سووریا دیموكرات (هەسەدە)، رەوشا سیاسی و دووماهی گورانكاریێن سووریێ هاتە كەنگەشەكرن».
بارەگەهێ بارزانی ئاماژە ب وێ چەندێ ژی كر» د وێ پەیوەندییا تەلەفۆنیدا مەزلۆم عەبدی هووردەكاری و دەرئەنجامێ سەرەدانا خوە بۆ دیمەشقێ و تێكگەهشتنا وان ل گەل حوكمەتا سووریێ بۆ سەرۆك بارزانی شرۆڤەكر».
د بەیاننامەیا بارەگەهێ بارزانی دا هاتیە ژی» هەر د وێ پەیوەندییا تەلەفۆنیدا دوپاتی ل سەر وێ چەندێ هاتە كرن كو پشتەڤانی ل هەر پێنگاڤەكێ بهێتە كرن كو ببیتە ئەگەرێ ئاشتیێ و ئارامیێ ل سووریێ و هەروەسا ئەو چەندە ژی هاتە دوپاتكرن، پێدڤییە ل پێنگاڤێن داهاتی د پرۆسەیا سیاسی یا سووری دا هەلوەستێ كوردی ئێك بیت».

دوهی چارشەمبی 12 ئادارا 2025، ب سەرپەرشتییا مەسرور بارزانی، سەرۆكێ حوكمەتا هەرێما كوردستانێ و ب بەرهەڤبوونا قوباد تالەبانی، جێگرێ سەرۆكێ حوكمەتا هەرێمێ، جڤاتا وەزیرێن هەرێما كوردستانێ كۆمبوو.
ب گۆڕەی پشكەكا بەیاننامەیا حوكمەتا هەرێمێ» ل دەستپێكا كۆمبوونێ، سەرۆكێ حوكمەتا هەرێمێ ب ناڤێ جڤاتا وەزیران، وەزارەتا دارایی و ئابووری راسپارد بۆ بەرهەڤكرنا خشتەیێ بەلاڤكرنا مووچێ مەها شواتێ یێ فەرمانبەرێن هەرێمێ پشتی كو ل رۆژا 12 ئادارێ گۆژمەیێ 958 ملیار دیناران وەكو مووچێ مەها شواتێ چوویە سەر هەژمارا وەزارەتا دارایی و ئابووری ل هەرێما كوردستانێ و بڕیار هاتە دان ل رۆژا پێنجشەمبی 13 ئادارێ دەست ب بەلاڤكرنا مووچەی بهێتە كرن. د هەمان دەمدا هەموو وەزارەت و دەزگەهێن حكومی هاتنە راسپاردن ب لەز لیستا مەها ئادارێ بەرهەڤ بكەن بۆ وێ چەندێ بۆ وەزارەتا داراییا فیدرال بهێتە هنارتن، بۆ مەزاختنا مووچێ مەها ئادارێ بەری بێهنڤەدانێن جەژنا رەمەزانا پیرۆز».
ئەڤە د دەمەكی دایە وەزارەتا دارایی و ئابووری ل هەرێما كوردستانێ د بەیاننامەیەكێدا ئاماژە ب وێ چەندێ كر، پشتی دو حەفتییان ژ كۆمبوونێن بەردەوام د ناڤبەرا تیما تەكنیكی یا وەزارتا داراییا حوكمەتا فیدرال و وەزارەتا دارایی و ئابووری ل هەرێما كوردستانێ، دوهی چارشەمبی 12/3/2025، گۆژمەیێ 957 ملیار و 925 ملیۆن و 880 هزار و 78 دینار وەكو تەمویلا مووچێ مەها شواتێ یێ فەرمانبەر و مووچەخۆرێن هەرێمێ چوو سەر هەژمارا بانكییا وەزارەتا دارایی و ئابووری ل هەرێما كوردستانێ ل لقێ هەولێرێ یێ بانكا ناڤەندییا ئیراقی.
وەزارەتا دارایی و ئابووری دیاركر ژی» ئەو پارەیێ وەزارەتا داراییا ئیراقێ بۆ مووچێ مەها شواتێ یێ فەرمانبەر و مووچەخۆرێن هەرێما كوردستانێ هنارتی، هەمان ئەو گۆژمە بوو كو ژ ئالیێ وەزارەتا دارایی و ئابووری ل هەرێما كوردستانێ بۆ مووچێ وێ مەهێ داخوازكری و بێی هیچ لێبڕینەكێ هاتە مەزاختن».
وەزارەتا دارایی و ئابووری ئەوژی بەرچاڤكر، ل رۆژا پێنجشەمبی 13/3/2025 دێ دەست ب بەلاڤكرنا مووچێ مەها شواتێ یێ فەرمانبەر و مووچەخۆرێن هەرێما كوردستانێ هێتە كرن و د چەند رۆژێن كێمدا مووچێ هەموو فەرمانبەر و مووچەخۆران دێ هێتە بەلاڤكرن.
وەزارەتا دارایی و ئابووری ئاماژەكر ژی كو ل گەل هەموو وەزارەت و دەستە و سەرۆكایەتییان ل سەر هێلن بۆ وێ چەندێ ل حەفتییا داهاتی، لیستا مووچێ مەها ئادارێ بۆ وەزارەتا داراییا حوكمەتا فیدرال بهێنە هنارتن.

هەولێر، قائید میرۆ

دانوستاندن د بەردەوامن بۆ دەستپێكرنا هنارتنا پەترۆلا هەرێما كوردستانێ بۆ دەرڤە و جێگرێ سەرۆكێ لیژنا پەترۆل و غازێ ل جڤاتا نوونەرێن ئیراقێ ژی ئاشكراكر، ل نێزیك دێ پەترۆلا هەرێما كوردستانێ بۆ بازاڕێن جیهانێ هێتە هنارتن، هەروەسا بسپۆرەكێ ئابووری ژی دبێژیت، هنارتنا پەترۆلێ دێ كاریگەری ل سەر پەیداكرنا داهاتی بۆ ئیراقێ و هەرێما كوردستانێ هەبیت.
د. سەباح سوبحی، جێگرێ سەرۆكێ لیژنا پەترۆل و غازێ ل جڤاتا نوونەرێن ئیراقێ بۆ رۆژنامەیا (ئەڤرۆ) دیاركر» ئاستەنگ ل هەمبەر هنارتنا پەترۆلا هەرێما كوردستانێ نەماینە، بەلێ تنێ مایە گەرەنتی بۆ كۆمپانیێن پەترۆلێ بهێتەدان و تنێ ئێك نڤیسار پێدڤییە هەتا كۆمپانیێن وەبەرهێنانێ د كێلگەهێن پەترۆلا هەرێما كوردستانێدا دكەن پشتڕاستبن و دەست ب هنارتنا پەترۆلێ بهێتەكرن، چونكە كۆمپانیێن ل كەرتێ پەترۆلێ ل هەرێما كوردستانێ كار دكەن دو داخوازی یێن هەین یا ئێكێ، گەرەنتی هەبیت ئەو 16 دۆلارێن كریا دەرئینانا پەترۆلێ بهێنە زامنكرن و حوكمەتا ئیراقێ گیرۆ نەكەت، هەروەسا قەرێ بەری نوكە یێ كۆمپانییان بهێتە ئێكلاكرن، هەكە ئەو دو خالە بهێنە چارەسەركرن دێ ئێكسەر پرۆسەیا هنارتنا پەترۆلێ بڕێڤەچیت و ئەز باوەرم هند نەمایە و ل نێزیك دێ پرۆسەیا هنارتنا پەترۆلا هەرێما كوردستانێ هێتە دەستپێكرن».
جێگرێ سەرۆكێ لیژنا پەترۆل و غازێ ل جڤاتا نوونەرێن ئیراقێ ئاماژەكر» پشتی دەرچوونا بڕیارا دادگەها فیدڕالی ل دۆر پەترۆلا هەرێما كوردستانێ، هنارتنا پەترۆلێ چو پەیوەندییەك ب هنارتنا مووچێ فەرمانبەرێن هەرێما كوردستانێ ڤە نینە، لێ پشتی چوونا پەترۆلێ دێ پشكا هەرێمێ هێتە دیاركرن و مەزاختن، رێككەفتن هاتیەكرن دێ گرێبەستان دەنە حوكمەتا ئیراقێ، ئەوژی پشتی كۆمبوونا وەزارەتا پەترۆلا ئیراقێ و كۆمپانیێن كەرتێ پەترۆلێ، بەلێ دڤێت هەماهەنگی دگەل حوكمەتا هەرێما كوردستانێ ژی هەبیت و ئالیێ نێڤدەولەتی ژی پشكدار ببیت».
ژ ئالیێ خوەڤە، د. ئدریس رەمەزان، پسپۆرێ ئابووری بۆ رۆژنامەیا (ئەڤرۆ) گۆت» پەترۆل ژێدەرێ سەرەكیێ داهاتێ هەرێما كوردستانێ و ئیراقێیە، لەوڕاژی هنارتنا پەترۆلا هەرێما كوردستانێ دێ كاریگەری ل سەر داهاتێ هەرێما كوردستانێ هەبیت، هەتا دێ كاریگەری ل سەر داهاتێ ئیراقێ ژی هەبیت، دەستپێكرنا هنارتنا پەترۆلا هەرێما كوردستانێ ڤێجارێ دێ بیتە ئەگەرێ پشتەڤانییا قانوونی ژی، چونكە بەری نوكە بەغدا رێگربوو ل هنارتنا پەترۆلا هەرێما كوردستانێ و سكالا تۆماركربوو، بەلێ نوكە دادگەها فیدڕالی بڕیاردایە و حوكمەتا ئیراقێ ژی رازیبوونا خوە دیاركریە بۆ هنارتنا پەترۆلا هەرێما كوردستانێ، چونكە ئیراقێ دیت پشتی راگرتنا پەترۆلا هەرێما كوردستانێ بۆ دەرڤە كاریگەری ل سەر كێمبوونا داهاتێ ئیراقێ پەیداكریە، ب دیتنا من پەترۆلا هەرێما كوردستانێ بهێتە هنارتن دی مفا بۆ ئیراقێ ژی هەبیت ئەو كورتئینانا هەی تژی بكەت، هەرێما كوردستانێ دێ ڤێجارێ ب فەرمی چیتە سەر نەخشەیێ وزەیا جیهانی و دێ كاریگەری ل سەر پێگەهێ هەرێما كوردستانێ هەبیت، چونكە دێ هەرێم بیتە هەڤڕكا وەلاتێن بەرهەمێ پەترۆلێ هەی ل جیهانێ».

د چارچۆڤەیێ سەرەدانا شاندێ پارتی دیموكراتی كوردستان ب سەرۆكایەتییا د. هێمن هەورامی، ئەندامێ مەكتەبا سیاسی بۆ وەلاتێ چینێ، چەندین كۆمبوونێن دی ئەنجامدان، ل دەستپێكێ ل گەل رێڤەبەرێ كاروبارێن رۆژئاڤایێ ئاسیا و رۆژهەلاتا ناڤیت و باكوورێ ئەفریقیا ل حزبا كۆمۆنیستا چینی كۆمبوو.
شاندێ پارتی دیموكراتی كوردستان كۆمبوونەكا هەمە لایەنە ل گەل (یو وی) رێڤەبەرێ كاروبارێن رۆژئاڤایێ ئاسیا و رۆژهەلاتا ناڤین و باكوورێ ئەفریقیا ل حزبا كۆمۆنیستا چینی و تیما تایبەت ب ئیراقێ و ئیرانێ و دەڤەرا كەنداڤی ڤە ل بارەگەهێ سەرەكیێ پەیوەندیێن دەرڤە یێ حزبا كۆمۆنیستا چینی، ئەنجامدا.
ل دەستپێكی ( یو وی)، ب هووری هەلوەستێ حزبا كۆمۆنیستا چینی و حوكمەتا چینی بەرامبەر پارتی دیموكراتی كوردستان و هەرێما كوردستانێ راگەهاند و دیاركر كو ب گرنگیڤە دنێرنە پەیوەندیێن خوە ل گەل پارتی و پێگەهێ سیاسی و جەماوەریێ پارتی و كاریگەرییا وێ یا مەزن ل سەر سیاسەت و بڕیارێن هەرێما كوردستانێ و هەڤكێشەیێن ئیراقێ و دەڤەرێ بلند هەلسەنگاند.
هەروەسا خواستا وەلاتێ خوە بۆ باشتركرنا پەیوەندییان و پێشڤەبرنا زێدەتر یا هەمەلایەنە ل گەل پارتی و هەرێما كوردستانێ ژ ئەولەویەتا كارێ حزبا خوە دانا و راگەهاند: شاندێ بلند یێ پارتی ئیكەم حزبا ئیراقییە ل سالا نوو دا كو ب فەرمی بۆ چینێ دهێتە ڤەخواندن و ئەڤە ژی بەلگەیە ل سەر گرنگییا پارتی ل دەف چینێ.
ژ ئالیێ خوەڤە د.هێمن هەورامی، ئەندامێ مەكتەبا سیاسی یا پارتی سەرەرای سوپاسییا گەرم یا پارتی و ئەندامێن شاندی ڤەخواندنا شاندی بۆ سەرەدانا چینێ و بۆ وێ پێشوازییا گەرم، ل سەر هەموو هەڤكێشەیێن ناڤخوەیی یێن هەرێمێ و دەلیڤەیێن وەبەرئێنانا كۆمپانیێن چینی و رەوشا سیاسی و ئەمنی و ئابووری یا ئیراقێ و پرسا سووریێ و رەوشا ئاشتیێ ل توركیا و هەڤكێشەیێن گشتی یێن دەڤەرێ، بۆچوون و سەرنجێن پارتی ب هووری بۆ شەرۆڤەكر.
پاشی شاندێ پارتی دیموكراتی كوردستان بۆ وەلاتێ چینێ ل پەكینا پایتەختا وی وەلاتی ل گەل (د. جین شین) بریكارێ وەزیرێ كاروبارێن دەرڤە یێ چینی كۆمبوو.
بریكارێ وەزیرێ دەرڤەیێ چینی خوەشحالییا خوە بۆ دیدارێ دیاركر و باس ل هەلوەست و سیاسەتا چینێ بەرامبەر هەرێما كوردستانێ ب گشتی و پارتی دیموكراتی كوردستان ب تایبەتی كر و راگەهاند كو حزب كۆمۆنیستا چینی و حوكمەتا چینی ب گرنگی دنێرنە رۆل و پێگەهێ پارتی و هەرێما كوردستانێ د ناڤ هەڤكێشەیێن سیاسی و ئەمنی و ئابووری یێن ئیراقێ و دەڤەرا رۆژهەلاتا ناڤین و ڤەخواندنا شاندەكێ بەرفرهە یێ پارتی دیموكراتی كوردستان وەكو ئێكەمین شاندێ پارتێن كاریگەرێن دەڤەرا رۆژهەلاتا ناڤین و باكوورێ ئەفریقیا ئەنجامێ وێ گرنگیێ و رێزێ یە كو چین ب پارتی دیموكراتی كوردستان و هەرێما كوردستانێ ددەت.
د. هێمن هەورامی ب ناڤێ شاندێ پارتی، سلاڤ و رێزێن تایبەت یێن سەرۆك بارزانی ب رێكا بریكارێ وەزیرێ دەرڤەیێ چینی بۆ (شی جین پین) سەرۆكێ چینێ و سەركردایەتییا حزبا كۆمۆنیستا حوكمڕان ل وی وەلاتی هنارتن.
هەورامی ب هووری سیاسەت و هەلوەست و بۆچوونا پارتی ل سەر رەوشا سیاسی یا ناڤخوەیی، رەوشا ئیراقێ ژ روویێ ئەمنی و سیاسی و ئابووری، رەوشا سووریێ و پرۆسەیا ئاشتیێ و رۆلێ پارتی دیموكراتی كوردستان و سەرۆك بارزانی و هەڤكێشەیێن گشتی یێن دەڤەرێ و دەلیڤەیێن زێدەتر وەبەرئێنانا چینی ل هەرێما كوردستانێ وپەیوەندیێن كەلتووری د ناڤبەرا هەردو ئالییاندا رۆهنكر.

دوهی سێشەمبی 11/3/2025، سەرۆك بارزانی د پەیامەكێدا ل سالڤەگەڕا 55 یا رێككەفتنا 11 ئادارا 1970 راگەهاند: ئەو رێككەفتن دەستكەفتەكا دیرۆكی وگرنگ یا خەباتا گەلێ كوردستانێ بوو ب رێبەرییا بارزانیێ نەمر.
دەقێ پەیاما سەرۆك بارزانی:
رێككەفتنا 11 ئادارا 1970 دەستكەفتەكا دیرۆكی و گرنگ یا خەباتا گەلێ كوردستانێ بوو ب رێبەرییا بارزانیێ نەمر. بۆ ئێكەمین جار حوكمەتا ئیراقێ دانپێدان ب پشكەك ژ مافێن گەلێ كورد كر و ئەو دەلیڤەیە پەیدابوو گەلێ كوردستانێ بشێت كاری ل سەر خوەبڕێڤەبرنێ و ب هێزكرنا زمان و كەلتوور و دابینكرنا ئارامیێ بكەت. ئەو رێككەفتنە بەرهەمێ خەباتا پێشمەرگەی و كادرێن حزبی و هەموو تەخ و چینێن كوردستانێ ل شۆڕەشا ئیلۆنێ بوو و هەلگرا وانەیەكا ستراتیژی و گرنگ بوو بۆ قۆناغێن داهاتی ژ خەباتا بزاڤا رزگاریخوازا كوردستانێ و بۆ ئەگەرێ ب هێزتربوونا دۆزا رەوا یا گەلێ كوردستانێ.
ل سالڤەگەڕا 55 یا رێككەفتنا 11 ئادارێ هزاران سلاڤان بۆ گیانێ پاقژێ شەهیدێن شۆڕەشا ئیلۆنێ و هەموو شۆڕەشێن كوردستانێ دهنێرین و مە رێز بۆ هەموو پێشمەرگە خەباتكەرێن شۆرەشا ئێلۆنێ یا هەی كو ب پێداگیری و ورەیێن پیلایی دەستكەفتێن مەزن بۆ گەلێ خوە مسۆگەركری.

دوهی سێشەمبی 11/3/2025، نێچیرڤان بارزانی، سەرۆكێ هەرێما كوردستانێ ل سالڤەگەڕا 55 یا رێككەفتنا 11 ئادارێ پەیامەك بەلاڤكر و راگەهاند» ئەڤرۆ سالڤەگەڕا 55 یا رێككەفتنا 11 ئادارا 1970 ساخ دكەین كو ب رێبەرییا بارزانیێ نەمر بوو خالا وەرچەرخانێ و ویستگەهەكا دیرۆكی و گرنگ یا خەباتا گەلێ كوردستانێ و ئێكەم بەلگەنامەیا فەرمی یا دانپێدانێ ب پشكەك ژ مافێن وی یێن رەوا، هەروەسا بنەمایێ قانوونی بۆ دەستكەفتێن مە یێن نوكە داڕشت، ب شێوەیەكی هیچ دەستهەلاتەكا ئیراقی نەشێت جارەكادی مافێن مە رەت بكەت. ب ڤی هەلكەفتێ ب رێزڤە بیرئینانا وان كەسان دكەین یێن كو ژ پێخەمەت ئازادی و مافێن گەل و نیشتمانیدا گیانێ خوە بەخشی. سلاڤان ل بنەمالێن سەربلندێن شەهیدان، ل پێشمەرگەیێن قەهرەمان و گەلێ كوردستانێ ب هەموو پێكهاتەیێن وی ڤە، دكەین».
گۆت ژی» رێككەفتنا 11 ئادارێ، نموونەیا چارەسەرییەكا دادپەروەرانە بوو ل سەر بنەمایێ تێكگەهشتنێ و دانوستاندنێ، بەلێ پاشی دەستهەلاتا ئیراقێ لێ پەشێمان بوو و د ئەنجامدا، چەندین سالان ململانێ و شەڕ پەیدابوو كو ژبلی نەهامەتیێ و ئازارێ چو بۆ ئیراقێ نەئینا. ئەڤرۆ ژی، ئیراق هێشتا باجا پێگیری نەبوونێ ب وێ رێككەفتنێ و بنەمایێ هەڤپشكییا راستەقینە و مافێن دستووری یێن هەموو پێكهاتەیان ددەت. وانە و ئەزموونێن دیرۆكێ د سەلمینن كو ب دەستڤەئینانا ئارامیێ تنێ ب رێكا دیموكراسیێ، كو درووشمێ شۆڕەشێ بوو، رێزگرتنێ ل فرەلایەنیێ، كارێ هەڤپشك و چەسپاندنا دادپەروەریێ و یەكسانیێ د ناڤبەرا هەموویاندا.
ئێكڕێزی ، گەرەنتییا راستەقینەیە بۆ پاراستنا دەستكەفتێن دستووری و پاشەڕۆژا نڤشێن مە. لەوما داخوازێ ژ هەموو هێزێن سیاسی یێن كوردستانێ و ئیراقێ دكەین پەندێ ژ ڤێ ئەزموونێ وەربگرین و ب گیانێ بەرپرسیارەتییا نیشتمانی پێمڤە كار بكەین، بۆ چەسپاندنا فیدرالیێ، پاراستنا مافێن هەموو پێكهاتەیێن ئیراقێ و ب هێزكرنا پێكڤەژیانا ئاشتییانە. پاشەڕۆژا ئیراقێ د جهئینانا دستووری، ب هێزكرنا هەڤپشكییا راستەقینە و ئاڤەدانكرنا وەلاتەكیدایە كو ئاسایش، ئارامی و دادپەروەری تێدا بالادەست بیت».