نوونەرێ حوكمەتا هەرێما كوردستانێ ل فرەنسا راگەهاند: دامەزراندنا سەنتەرێ كلتۆرییێ فرەنسی- ئەلمانی ل سەر كەلها هەولێرێ، گرنگیدانا دو وەلاتێن مەزن یێن ئۆرۆپایە ب هەرێما كوردستانێ، ب تایبەتی ژی فرەنسا دخوازیت هەڤبەندی د هەموو واراندا ل گەل هەرێما كوردستانێ هەبن و گرنگییەكا تایبەت ب هەرێما كوردستانێ ددەت.
عەلی دۆلەمەری، زێدەتر بۆ رۆژنامەیا (ئەڤرۆ) دبێژیت» دامەزراندنا سەنتەرێ كلتۆرییێ فرەنسی – ئەلمانی ل سەر كەلها هەولێرێ، بۆ هەرێما كوردستانێ گرنگییەكا گەلەك مەزن هەیە، ب تایبەتی ژی وەلاتەكێ وەك فرەنسا ب تنێ هەڤبەندییا سیاسی نینە، بەلكو هەڤبەندییا كلتۆری و ئابۆری و ئەكادیمی و د وارێن دیتر ژی دا هەیە، چونكی دو وەلاتێن مەزن یێن ئۆرۆپا د وی سەنتەریدا پشكدارن، ئەو ژی فرەنسا و ئەلمانیا نە و وان دڤێت كلتۆرێ هەرێما كوردستانی و هەردو وەلاتان بهێتە تێكهەلكرن و مفای ژ هەڤدو وەربگرن».
دۆلەمەری گوت ژی» ئەو وەلات دخوزان هەڤبەندیێن خوە ل گەل هەرێما كوردستانێ زێدەتر بەرفرەهـ بكەن ژ روویێ كلتۆری و هونەری و رەوشەنبیری و وارێن دیتر یێن ژیانێ، لەوما د هەموو واراندا گاڤێن كریاری هاتینە هاڤێتن، هەروەسا ل 20 ی خزیرانێ ل هەموو سالان ل فرەنسا جەژنا مۆزیكێیە و ل هەرێما كوردستانێ ژی گرۆپەكێ فرەنسی و ئەلمانی و كوردی دهێنە تێكهەلكرن و ژ وەلاتێ فرەنسا ژی گرۆپ دهێنە هەرێما كوردستانێ و ژ هەرێمێ ژی دچنە فرەنسا، هەروەسا نوكە هەڤبەندیێن هەرێما كوردستانێ و فرەنسا د ئاستەكێ گەلەك باش دانە».
عەلی دۆلەمەری دیاركر ژی» ب رەنگەكێ گشتی هەڤبەندیێن د ناڤبەرا هەرێما كوردستانێ و فرەنسادا د هەموو واراندا د ئاستەكێ گەلەك باش دانە، هەروەسا ئەو تێكهەلبوونە ژی دێ بیتە ئەگەرێ وێ چەندێ هەڤبەندیێن هەرێما كوردستانێ و فرەنسا زۆر باشتر بن، چونكی فرەنسا هەردەم ل گەل باشبوونا هەڤبەندیێن د ناڤبەرا هەرێما كوردستانێ و ئیراقێ دایە، چونكی نەبوونا هەڤبەندیێن د ناڤبەرا هەردو ئالییاندا دێ بیتە ئەگەرێ نە ئارامییا وەلاتی، لەوما حەزا وان ئەوە هەڤبەندیێن باش د ناڤبەرا وان دا هەبن و ب تایبەتی ژی فرەنسا پێخوەشە هەرێما كوردستانێ هەردەم یا ئارام بیت».

رۆژنامەیەكا عەرەبی د راپۆرتەكێدا باس ل وێ چەندێ دكەت، ئەو فشارێن زۆر یێن حوكمەتا محەمەد شیاع سوودانی دئێخیتە سەر حوكمەتا هەرێما كوردستانێ، هیچ مفایەك بۆ وی نینە، تنێ ئەو نەبیت كو بازنەیا نەیارێن خوە بەفرەه دكەت و بازنەیا هەڤپەیمانێن وێ بچووك دبیت.
رۆژنامەیا (العرب) د راپۆرتا خوە دا بەلاڤكر، ئەو فشارێن زۆر یێن حوكمەتا محەمەد شیاع سوودانی دئێخیتە سەر حوكمەتا هەرێما كوردستانێ، ب «لۆژیكا بەرژەوەندییان» هیچ مفایەك بۆ سوودانی نینە، ژ ئالییەكێ دی ژی ڤە كاریگەری ل سەر دۆسێیێن دی دێ هەبیت و ناكۆكیێن دی د ناڤبەرا هەولێرێ و بەغدایێ پەیدا دكەت، ئەڤە د دەمەكیدا یە ئیراق بەر ب هەلبژارتنێن جڤاتا نوونەران دچیت.
د وێ راپۆرتێدا هاتیە ژی» زێدەبوونا ناكۆكیێن حوكمەتا هەرێما كوردستانێ و دەستهەلاتا فیدرالی فشارەكا مەزن دئێخیتە سەر حوكمەتا هەرێمێ بێ كو هیچ بەرژەوەندییەكێ بۆ حوكمەتا ئیراقێ و ب تایبەتی بۆ سەرۆك وەزیران، سوودانی پەیدا بكەت. بەلكو ئەڤە خزمەتا بەرژەوەندییا وان ئالییان دكەت ئەوێن كاری ل سەر بەردەوامبوونا ئالۆزییان دمەن، ئەو تنێ هەڤڕكێن سوودانی بخوەنە، گرنگیێ ب وێ چەندێ ددەن بازنەیا نەیارێن وی زێدەتر ببیت و بازنەیا هەڤپەیمانێن وێ بچووك ببیت».
رۆژنامەیا ناڤبری ب لۆژیكا بەرژەوەندییان باس ل وان گرژییان دكەت و خواندنا وێ چەندێ بۆ دكەت كو د بەرژەوەندییا سوودانی دا نینە و دبێژیت» ب لۆژیكا بەرژەوەندییان، راستەوخوە بەرژەوەندیێن د ناڤبەرا هەولێرێ و بەغدایێ دا د بەرژەوەندییا هەلبژارتنا سوودانی دا نینە، كو ئەڤە گەفا ژ دەستدانا پشتەڤانییا هەڤپەیمانێن وی یێن كوردن كو ب هێزن و د حوكمەتا نوكە دا پشكدارن».
ل دووڤ رۆژنامەیا (العرب)، دڤیا حوكمەتا محەمەد شیاع سوودانی كار بۆ تەناكرنا رەوشان بكەت، سەرنجێ بدەتە سەر سەركەفتنێن خوە، بەلێ ئەو گرژییە ژ سەركەفتنێن سوودانی كێم دكەن، هەروەسا د راپۆرتا وێ رۆژنامەیێدا هاتیە ژی» زێدەبوونا گرژییان د ناڤبەرا حوكمەتا هەرێمێ و حوكمەتا فیدرالیدا، ب تایبەتی ل وی دەمێ بەر ب هەلبژارتنان دچن، كێمكرنا سەركەفتنێن كابینەیا سوودانی یە، كو نەشیایە سەقایێ سیاسەتا گشتی ل وەلاتی تەنا بكەت و هەڤبەندیێ د ناڤبەرا هەموو هەڤپەیمانێن خوە یێن ناڤخوەیا وەلاتێ بڕێڤەببەت».
دیاركر ژی» روویەكێ دی یێ هەڤكێشەیێ ئەوە گرژی وەكو سەركەفتنە بۆ نەیارێن سوودانی و هەڤڕكێن وی یێن مەزن دناڤ خێزانا سیاسییا شیعی دا، هەر ئەڤە ژی هۆكارێ وێ چەندێیە حزب و میلیشا رژدن ل سەر وێ چەندێ هەڤبەندیێ د ناڤبەرا هەرێمێ و دەستهەلاتا فیدرالیدا ئالۆز بكەن د بابەتێ شایستەیێن دارایی یێن هەرێما كوردستانێ ژ بودجەیا دەولەتا ئیراقێ و مووچەی، تا دگەهیتە تێكهەلبوونا هندەك میلیشیا دوان هێرشێن ب درۆنان دهێنە كرن ل سەر دەزگەهێن پەترۆلی یێن هەرێما كوردستانێ».
رۆژنامەیا (العرب) خویاكر ژی كو ئەو سیاسەتا حوكمەتا فیدرالی كوردان ل ئیراقێ توڕە دكەت، هەتاكو سەركردە و بەرپرسێن كورد ژی ب زمانەكێ توند دەربڕینێ ژ توڕەبوونا كوردان دكەن، رۆژنامەیێ دوماهی پەیاما سەرۆك مەسعود بارزانی وەك نموونە ئینا كو ل سالڤەگەڕا جینۆسایدا ئێزدییان گوتی» دڤێت دوماهی ب وان هزر و رەفتارێن شۆڤینییانە بهێت كو هەر جارێ ب بەهانەیەكێ و ب مەژییەكێ نەمرۆڤانە، گەلێ كوردستانێ ئازار ددەن».
ژ بلی داخۆیانییا سەرۆك بارزانی، رۆژنامەیا (العرب) باس ل داخۆیانییا رێبەر ئەحمەد، وەزیرێ ناڤخوە ل هەرێما كوردستانێ دكەت و دبێژیت» ئەو زمانێ توند كو رێبەر ئەحمەد، وەزیرێ ناڤخوە ل هەرێما كوردستانێ بۆ رەخنەگرتنێ ل دەستهەلاتا فیدرالی ب كارئینای، رەنگڤەدانا حالەتێ گرژییایە د ناڤبەرا هەردو ئالییاندا و د بنەڕەتدا ژی ئەنجامێ وێ فشارا داراییا توندە كو بەغدا دئێخیتە سەر هەرێمێ و نێزیكە كاریگەریێنوێ بەرفره دبن ژ زیندیكرنا ناكۆكیێن گەڤن».
ژ بلی وێ چەندێ رۆژنامەیا ناڤبری ئەو داخۆیانییا رێبەر ئەحمەدی ڤەدگوهێزیت كو دبێژیت» دڤێت سیاسەتا هێرشكرنێ ل سەر هەرێما كوردستانێ ب راوەستیت، مەترسییا بڕینا مووچە و بودجەی ژ وان كارەستان كێمتر نینە كو ل دەمێن بۆری تووشی هەرێما كوردستانێ بووین، ئەو دۆرپێچا ل سەر گەلێ كوردستانێ هاتیە دانان ب كارەساتەكا مەزن دهێتە هەژمارتن».
سەرەرای وێ چەندێ رێبەر ئەحمەد دبێژیت»هەڤبەندییا هەرێمێ و بەغدایێ دەستوورییە، لەوما دڤێت بزڤریتە سەر دەستووری و قانوون بهێتە بجهئینان و مافێن كوردان بهێنە پاراستن و دوماهی ب سیاسەتا زیانگەهاندنێ ب كوردان بهێت».

ئەندامەكێ كۆنگرێسێ ئەمریكی گرێبەستێن حوكمەتا هەرێما كوردستانێ ل گەل دو كۆمپانیێن ئەمریكی بلند د هەلسەنگینیت و دوپات دكەت: دێ ئەنجامێن گەلەك باش هەبن، هەروەسا ئاماژەكر: مە هەڤبەندییەكا گەلەك باش ل گەل هەولێرێ هەیە.
رۆبێرت ئەدێرهۆلت، ئەندامێ كۆنگرێسێ ئەمریكی، ل دۆر هەڤبەندیێن هەولێرێ و واشنتۆنێ ب «گرنگ و پێدڤی هەژمارتن و دوپاتی ل پێشڤەبرنا وان هەڤبەندیێن دۆستانە د هەموو واراندا كر، ب تایبەتی سیاسی و ئابۆری.
ل رۆژا 19/5/2025، ب سەرپەرشتییا مەسرور بارزانی، سەرۆكێ حوكمەتا هەرێما كوردستانێ د رێوڕەسمەكیدا، دو رێككەفتن د وارێ وزەیێدا، د ناڤبەرا وەزارەتا سامانێن سروشتی ل حوكمەتا هەرێما كوردستانێ و هەردو كۆمپانیێن ئەمریكی ( ئێچ كەی ئێن ئێنێرجی) و ( وێستێرن زاگرۆس) هاتنە ئیمزاكرن.
ئەدێرلهۆلتی گرێبەستێن حوكمەتا هەرێما كوردستانێ ل گەل وان هەردو كۆمپانیێن ئەمریكی ب گەلەك باش هەژمارتن و دوپات كر ژی» چاڤەڕێی ئەنجامێن گەلەك باش ژ گرێبەستێن د ناڤبەرا هەولێرێ و واشنتۆنێدا دكەین».
سەبارەت هەڤبەندیێن ئەمریكا و وەلاتێن دی یێن جیهانێ ژی، وی ئەندامێ كۆنگرێسێ ئەمریكی گوت» بۆمە گەلەك گرنگە ل سەرانسەری جیهانێ مە هەڤال هەبن، وەكو ئەمریكا ئەم بزاڤێ دكەین هەڤبەندیێن خوە ل گەل هەموو ئالییەكی باشتر بكەین».

بەرپرسەکێ حوکمەتا سووریێ دیار دکەت، کۆنفرانسێ پێکهاتەیان ل حەسەکێ پێنگاڤەک مەترسیدارە و داخوازا سیستەمەک نە ناڤەندی ژ ئالیێ شامێ ڤە ب توندی دهێتە رەتکرن و شام پشکداریێ د دانوستاندنێن ل گەل هەسەدێ ل پاریسێ دا ناکەت.

بەرپرسەکێ حوکمەتا سووریێ راگەهاند، کۆنفرانسێ پێکهاتەیان ل حەسەکێ د دەمەکێ دا هاتە سازکرن کو حوکمەتا سووریێ دخواست ب رێیا دانوستاندنێن ل پاریسێ پرسێن هەی چارەسەر بکەت، لێ کۆنفرانسێ حەسەکێ و داخوازکرنا سیستەمەک نە ناڤەندی ژ بۆ سووریێ ب چو رەنگەکێ ناهێتە قەبوول کرن و وەکو دەستهەلاتا سووریێ ئەو پشکداریێ د دانوستاندنێن ل پاریسێ دا ناکەن.
هەمان بەرپرسی کو ناڤێ وی نەهاتیە ئاشکرا کرن بۆ ئاژانسا (سانا) ئەو یەک ژی دیار کریە، وەکو دەستهەلاتا سووریێ ئەو ب چو رەنگەکێ ل گەل سیستەمەک نە ناڤەندی ژ بۆ سووریێ نینن، ئەو یەک دێ بیتە ئەگەرێ ئالۆزیێن گەلەک مەزن ژ بۆ پاشەرۆژا سووریێ، کۆنفرانسێ حەسەکێ و داخوازیێن ژ بۆ سیستەمەک نە ناڤەندی دێ ئاستەنگێن مەزن ل هەمبەر دانوستاندنێن ژ بۆ چارەسەرکرنا پرسێن هەی د ناڤبەرا هەسەدێ و شامێ دا دروست کەن و وەکو هەلوەستەک ل هەمبەر کۆنفرانسێ حەسەکێ ئەو پشکداریێ د دانوستاندنێن ل پاریسێ دا ناکەن.
ل ئالیێ دی بەرپرسەکێ رێڤەبەریا خوەسەر ژی دیار کر، وەکو کوردێن سووریێ ئەو داخوازا سیستەمەک نە ناڤەندی ژ بۆ سووریێ دکەن، نابیت ناڤێ کۆمارێ ببیتە کۆمارا عەرەبی یا سووریێ، چونکی ل سووریێ تنێ عەرەب ناژین و خەلکێن دی ژی دژین، وان دڤێت ناڤێ وەلاتی ببیتە کۆمارا سووریێ و هەروەسا دڤێت سیستەمێ نوو یێ سووریێ ژی سیستەمەک نە ناڤەندی بیت، چونکی ئەزموونا چەندین سالێن بۆری ل سووریێ ئەو یەک سەلماندیە سیستەمێ ناڤەندی ل گەل راستیا سووریێ ناگونجیت و دێ بیتە ئەگەرێ روودانا ئالۆزیێن گەلەک مەزن، ژ بەر ڤێ یەکێ ژی دڤێت دەستهەلاتا شامێ راستیێن هەی قەبوول بکەت و ل دژی سیستەمەک نە ناڤەندی نەبیت.
چاڤدێرێن سیاسی ل سووریێ و رۆژئاڤایێ کوردستانێ ژی وەسا دبینن، هەلوەستێ نها یێ شامێ گەلەک مەترسیدارە، چونکی رژدیا دەستهەلاتا ئەحمەد شەرعی ژ بۆ سیستەمەک ناڤەندی نیشا ددەت دەستهەلاتا نها یا شامێ رازی نینە کورد و دورزی و پێکهاتەیێن دی بگەهنە مافێن خوە، ئەو یەک ژی دێ رێ بۆ ئالۆزیێن نوو ل سووریێ ڤەکەت، چونکی کوردان بریارا خوە دایە و ب چو رەنگەکێ قەبوول ناکەن وەکو بەرێ ل سووریێ بژین، کوردان دڤێت بگەهنە مافێن خوە، هەروەسا ئەمریکا، فرەنسا و گەلەک وەلاتێن دی یێن رۆژئاڤایی ژی پشتەڤانیێ ل مافێن کوردان دکەن و دخوازن مافێن کوردان و پێکهاتەیێن دی یێن ل سووریێ د دستووری دا بهێنە گەرەنتیکرن و هەکە شام ل گۆر راستیا نها بزاڤێ نەکەت دێ شەڕەک نوو ل سووریێ دەستپێکەت.

سەرۆك بارزانی ب هەلكەفتا سالڤەگەڕا 20 یا دامەزراندنا دەزگەهێ خێرخوازیێ بارزانی پەیامەك بەلاڤكر و تێدا گوت» ب هەلكەفتا سالڤەگەڕا 20 یا دامەزراندنا (دەزگەهێ خێرخوازیێ بارزانی) گەرمترین پیرۆزباهیێن خوە ل سەرۆك و رێڤەبەر و كارمەندێن دەزگەهێ خێرخوازیێ بارزانی دكەم. من رێز بۆ رۆلێ مرۆڤدۆستانە و خێرخوازانەیێ وی دەزگەهێ هەیە د هاوارچوونا ئاوارە و لێقەومییان و هاریكارییا نەخوەش و بێ سەرپەرشتان و خەلكێ هەژار و كێمدەرامەت. ئەركێ خوە ب شێوەیەكێ هەژی ئەنجامدایە و جهێ شانازیێ نە، دەستخوەشیێ و سوپاسییا وان دكەم وهیڤییا سەركەفتن و بەردەوامیێ بۆ دخوازم».
ژ ئالیێ خوەڤە نێچیرڤان بارزانی، سەرۆكێ هەرێما كوردستانێ پەیامەكا پیرۆزباهیێ ب ڤێ هەلكەفتێ بەلاڤكر و تێدا گوت» سالڤەگەڕا 20 یا دامەزراندنا دەزگەهێ خێرخوازیێ بارزانی ب گەرمی و ژ دل ل بەرپرس و رێڤەبەر و كارمەندێن وی پیرۆز دكەم، دەستخوەشیێ لێ دكەم بۆ وان هەموو ئەرك و خزمەتێن مرۆڤایەتی و خێرخوازی یێن جوامێرانە ئەوێن پێشكێش كرین، هیڤییا بەردەوامیێ و سەركەفتنێ بۆ دخوازم».
گوت ژی» كار و خزمەتا مرۆڤایەتی و خێرخوازی و ب هاوارچوونا دەزگەهێ خێرخوازیێ بارزانی د دەمێ 20 سالێن ژیێ خوەدا بۆ لێقەومییان، بەرجەستەكرنا گیانەكێ بلند یێ مرۆڤایەتی، نموونەیەكا بلند یا مرۆڤپەروەری و هاریكاریێ بوویە كو شوون تبلێن وی د دیار و بەرچاڤن و جهێ رێز و سوپاسییەكا مەزنە».
هەر ب هەمان هەلكەفت، مەسرور بارزانی، سەرۆكێ حوكمەتا هەرێما كوردستانێ پەیامەك بەلاڤكر و تێدا راگەهاند» دەزگەهێ خێرخوازیێ بارزانی خودانێ پێگەهەكێ دیارە د كارێ بەخشین و خێرخوازیێدا».
د پەیاما سەرۆكێ حوكمەتا هەرێمێ دا هاتیە ژی» ل سالڤەگەڕا 20 یا دامەزراندنا دەزگەهێ خێرخوازیێ بارزانی، گەرمترین پیرۆزباهییان ئاراستەی سەرۆك و ئەندامێن دەستەیا كارگێری و هەموو كارمەندێن دەزگەهێ خێرخوازیێ بارزانی دكەم، هیڤییا بەردەوامبوونێ و سەركەفتنێ بۆ دخوازم، هەروەسا دەستخوەشیێ لێ دكەم بۆ وەستییان و كاركرنا وان یا بەردەوام ژ پێخەمەت هاریكارییا خەلكێ هەژار و لێقەومای».
مەسرور بارزانی دیاركر ژی» دەزگەهێ خێرخوازیێ بارزانی، خودان پێگەهەكێ دیارە د كارێ بەخشین و خێرخوازیێدا و بێی هیچ جوداهی، خزمەتەكا هەژی و بەرچاڤ پێشكێشی خەلكێ هەژار و كێمدەرامەت و لێقەومای دكەت نەك تنێ ل كوردستانێ، بەلكو ل دەڤەرێن دی یێن ئیراقێ و وەلاتێن دەوروبەر و جیهانێ ژی. من رێزەكا مەزن بۆ هەموو خێرخواز و بەخشەر و هەموو ئەو ئالی و ئاژانس و رێكخراو و دەزگەهێن خێرخوازی هەیە، كو هاریكاریێ و هەماهەنگیێ ل گەل دەزگەهێ خێرخوازیێ بارزانی دكەن و كار و چالاكی و پرۆژەیێن هەڤپشك ئەنجام د دەن».
ل دووماهیێ گوت» سالڤەگەڕا دامەزراندنا دەزگەهێ خێرخوازیێ بارزانی پیرۆز بیت و هیڤیدارم هەردەم نموونەیەكا گەش یا كارێ مرۆڤایەتی و خێرخوازی بیت».

نێچیرڤان بارزانی، سەرۆكێ هەرێما كوردستانێ ب مەبەستا مالئاڤاهیێ بۆ ب دووماهی هاتنا ئەركێ وێ، پێشوازی ل كریستیانە هۆمان، بالیۆزا ئەلمانیا ل ئیراقێ كر.
د دیدارەكێدا سەرۆكێ هەرێما كوردستانێ، ئاستێ هەڤبەندیێن ئەلمانیا ل گەل ئیراقێ و هەرێما كوردستانێ بلند هەلسەنگاند وخواستا هەرێما كوردستانێ بۆ پێشڤەبرنا هەڤبەندییان و بەرفرەهكرنا هاریكارییا هەڤپشك د هەموو واراندا ل گەل ئەلمانیا، دوپاتكر.
نێچیرڤان بارزانی هەروەسا رێز و سوپاسی پێشكێشی بالیۆزا ئەلمانیا كر ژ بۆ ئەرك و بزاڤێن وی ژ پێخەمەت زێدەتر ب هێزكرنا هەڤبەندیێن وەلاتێ وێ ل گەل ئیراقێ و هەرێما كوردستانێ و هیڤییا سەركەفتنێ د ئەركێ وێ یێ نوو دا بۆ خواست.
ژ ئالیێ خوەڤە هۆمان سەرەرای نیشادانا خوەشحالیێ بۆ وی دەمێ ئەركێ وێ ل ئیراقێ، سوپاسییا خوە بۆ پشتەڤانییا ئالیێن پەیوەندیدارێن هەرێما كوردستانێ د سەرئێخستنا ئەركێ وێ دا دیاركر، هەروەسا دوپاتكر كو وەلاتێ وێ ب گرنگیڤە دنێریتە هەڤبەندیێن خوە ل گەل ئیراقێ و هەرێما كوردستانێ وخوازیارە د هەموو كەرت و واراندا، زێدەتر بهێنە پێشڤەبرن.
هەڤبەندیێن هەولێر – بەغدا، رەوشا ئیراقێ و هەرێما كوردستانێ و پێشهاتێن سووریێ و دەڤەرێ ب گشتی، تەوەرەكێ دی یێ دیدارێ بوو كو قۆنسلێ گشتیێ ئەلمانیا ل هەرێما كوردستانێ بەرهەڤ ببوو.

سەرۆك بارزانی ل سالڤەگەڕا (11) یا كارەساتا شنگالێ، پەیامەك بەلاڤكر و راگەهاند: كارەساتا شنگالێ، تاوانەك بوو سنۆرێن دڕندەیێ دەرباز كربوو، دیاركر ژی كو ئەو ئازارەكە چو جاران ژ بیرا مە ناچیت، ئاماژە كر ژی كو پێدڤییە دەولەتا ئیراقێ قەرەبوویا قوربانیێن كارەساتا شنگالێ و هەموو وان جینۆسایدان بكەت.
دوهی ئێكشەمبی 3/8/2025، سەرۆك بارزانی پەیامەك ل سالڤەگەڕا كارەساتا شنگالێ بەلاڤكر و راگەهاند» ئەو تاوانا بەری 11 سالان یا تیرۆرستێن داعشێ دژی خوشك و برایێن مە یێن ئێزدی ئەنجامدای، تاوانەك بوو هەموو سنۆرێن نەمەردیێ و دڕندەیێ دەرباز كربوون، ئەڤە ئازارەكە چو جاران ژ بیرا مە ناچیت. قەدەرێ گەلێ كورد ئەو بوو كو هەردەم دوژمنێن دلڕەق و بێویژدان هەبوون و تووشی كارەسات ل دووڤ كارەساتێ بوویە. ئەوا ل دژی خوشك و برایێن ئێزدی روودای، درێژەپێدەرا وان زنجیرە كارەساتایە كو ل دژی گەلێ كوردستانێ هاتینە ئەنجامدان، ل دەف هەموو كەسەكی یا رۆهنە ژبەر كوردبوون و بیروباوەرێن ئایینی، ئێزدی تووشی هەوێن كەرب و بێویژدانییا تاوانبارێن داعشێ بوون و هاتنە جینۆسایدكرن».
سەرۆك بارزانی د پەیاما خوەدا، ئاماژە ب وێ چەندێ ژی كر» پشتی روودانا وێ كارەساتێ ل سەر دەستێ تیرۆرستێن داعشێ، گەلێ كوردستانێ و پێشمەرگەی ب دل و ب گیان ل گەل خوشك و برایێن خوە بوون و ئەوا ژ دەستێ وان هاتی بۆ رزگاركرنا ئاوارەیان و ئازادكرنا شنگالێ و چیایێ شنگالێ ئەنجامدا. ل ڤێرێ رۆلێ پێشمەرگێ كوردستانێ و هەموو وان قەهرەمانان بلند د هەلسەنگینین كو دیرۆكەكا گەش تۆماركری و سەرێ تیرۆرستان ئێخستییە بن پیێن ئێزدییان، هەروەسا گەلەك سوپاسییا هێزێن هەڤپەیمانان دكەین كو د هاریكارییا پێشمەرگەی و شكاندنا داعشێدا رۆلەكێ بەرچاڤ هەبوو».
ل سالڤەگەڕا 11 یا كارەستا شنگالێ، سەرۆك بارزانی سلاڤ بۆ گیانێ شەهید و قوربانیێن وێ تاوانێ و هەموو وان تاوان وكۆمكوژییان هنارتن كو ب سەر گەلێ كوردستانێ هاتین و گۆت» پێدڤییە دەولەتا ئیراقێ قەرەبوویا قوربانیێن كارەساتا شنگالێ و هەموو وان جینۆسایدا بكەت كو دژی گەلێ كوردستانێ هاتینە ئەنجامدان، دڤێت دووماهی ب وان هزر و رەفتارێن شۆڤینییانە بهێت كو هەر جارەكی و ب بەهانەیەكێ و ب مەژییەكێ نەمرۆڤانە گەلێ كوردستانێ ئازار ددەن».

دوهی ئێكشەمبی 3/8/2025، سەرۆك مەسعود بارزانی ل سەلاحەدین پێشوازی ل هیتۆشی ئیشیزۆكا، قونسلێ گشتیێ نوو یێ وەلاتێ ژاپۆنێ ل هەولێرێ كر.
د دیدارەكێدا سەرۆك بارزانی پیرۆزباهی ل قونسلێ گشتیێ نوو یێ ژاپۆنێ كر د ئەركێ وی یێ نوودا و هیڤییا سەركەفتنێ بۆ خواست، سەرۆك بارزانی ئاماژە ب وێ چەندێ كر، كو شارستانییەتا گەلێ ژاپۆنێ خزمەتەكا مەزن گەهاندییە هەموو مرۆڤایەتیێ و ژڤی رووییڤە رۆلێ بەرچاڤ هەبوو و بەرهەڤی و پشتەڤانییا خوە و دەزگەهێن حوكمەتا هەرێما كوردستانێ بۆ باشتركرنا هەڤبەندیێن هەرێما كوردستانێ ل گەل ژاپۆنێ نیشادا.
ژ ئالیێ خوەڤە ئیشیزۆكای خوەشحالییا خوە دیاركر كو وەك قونسلێ نوو یێ ژاپۆنێ دێ ل هەرێمێ دەست بكاربیت و دوپاتكر كو حوكمەت و گەلێ ژاپۆنێ دێ بەردەوام بن د پشتەڤانیكرن و گرنگیدانێ ب هەڤبەندیێن د ناڤبەرا هەرێما كوردستانێ و ژاپۆنێدا.
هەر د وێ دیدارێدا بیر و بۆچوون ل دۆر رەوشا سیاسی و دووماهی گوهۆڕینێن ل سەر ئاستێ دەڤەرێ و ئیراقێ هاتنە لێكگۆهارتن و دوپاتی ل پێشڤەبرنا هەڤبەندیێن د ناڤبەرا هەرێما كوردستانێ و ژاپۆنێدا هاتە كرن».

دوهی ئێكشەمبی 3/8/2025، نێچیرڤان بارزانی، سەرۆكێ هەرێما كوردستانێ ل سالڤەگەڕا (11) یا جینۆسایدا كوردێن ئێزدی ل شنگالێ د پەیامەكێدا راگەهاند: ئەركێ حوكمەتا ئیراقێیە خوە ل هەڤوەلاتیێن ئێزدی بكەتە خودان و ئێدی رێكێ نەدەت شنگال و دەڤەرێ ئێزدییان، ببنە مەیدانێن میلیشیا وگرۆپێن چەكدار و ئێكلاكرنا ئەجیندایێن هەرێمی.
سەرۆكێ هەرێما كوردستانێ د پەیاما خوە دا گۆت» سالڤەگەڕا (11) یا جینۆسایدا ئێزدییان دكەین و ب رێز و وەفادری قوربانیێن وێ تاوانا داعشێ، دئینینە بیرا خوە. پێگیری پێشكێشكرنا هەر جۆرە پشتەڤانییەكێ نە بۆ هەڤوەلاتیێن مە یێن ئێزدی و سەرەرای هەموو ئازارێن بۆری، ب ئومێد ڤە دنێرینە پاشەڕۆژێ و پێكڤە كار دكەین بۆ نەهێلانا وان برینان».
سەرۆكێ هەرێما كوردستانێ دیاركر ژی» جهێ داخ و دلتەنگییەكا مەزنە كو 11 سالە هێشتا نێزیكی نیڤا ئێزدییان، د رەوشەكا دژوار یا ئابۆری و جڤاكی و دەروونی د كەمپاندا دژین. ئەركێ حوكمەتا ئیراقێیە خوە ل هەڤوەلاتیێن ئێزدی باشتر بكەتە خودان و قەرەبوویا وان بكەت و ئێدی رێكێ نەدەت شنگال و دەڤەرێن ئێزدی، ببنە مەیدانێن میلیشیا و گرۆپێن چەكدار و ئێكلاكرنا ئەجیندایێن هەرێمی».
رۆهنكر ژی» دڤێت پشتڕاستبوون، ئارامی، ئاڤەدانی و خزمەتگوزاری بۆ شنگالێ و دەڤەرێن دی بهێتە زڤراندن، دادپەروەری بۆ جڤاكێ ئێزدی بدەستڤە بهێت و تاوانبار بهێنە سزادان. لەوما دوپاتیێ ل بجهئینانا رێككەفتنا حوكمەتا هەرێما كوردستانێ و حوكمەتا ئیراقا فیدرال بۆ ئاساییكرنا رەوشا شنگالێ و ب پارێزگەهكرنا وێ دكەین. هەروەسا داخوازێ ژ جڤاكێ نێڤدەولەتی دكەین ژ هەموو روویەكیڤە د هەوارا ئێزدییاندا بهێت».
نێچیرڤان بارزانی دیاركر ژی» سوپاسییا هەموو وان وەلاتان دكەین كو كۆمكوژییا ئێزدییان ب جینۆساید دایە نیاسین و دێ بەردەوام بین د كار و بزاڤێن خوە دا تاكو زێدەتر ل سەر ئاستێ نێڤدەولەتی ب جینۆساید بهێتە نیاسین. سوپاس و پێزانین بۆ هاریكارییا هەڤپەیمانییا نێڤدەولەتی د شكاندنا داعشێدا. خوشك و برایێن مە یێن ئێزدی پشتڕاست دكەین كو دێ هەردەم پارێزەرێن وان بین و هەتا رەڤاندییەكێ ئێزدی مابیت، كارێ نڤیسینگەها مە بۆ رزگاركرن و ئاشكراكرنا چارەنڤیسێ وان بەردەوام بیت».
ل دووماهیێ گۆت» سلاڤ ل بیرئینانا قوربانیێن ئێزدی و ل ئیرادەیا ب هێز و خۆڕاگرییا ئێزدییان. سلاڤ ل بیرئینان و گیانێ هەموو وان پێشمەرگێن قەهرەمان ب فەرماندەییا سەرۆك مەسعود بارزانی، بۆ رزگاركرنا شنگالێ و هەموو پێكهاتەیێن كوردستانێ و ئیراقێ گیانێ خوە بەخشی».

دوهی ئێكشەمبی 3/8/2025، مەسرور بارزانی، سەرۆكێ حوكمەتا هەرێما كوردستانێ ل سالڤەگەڕا 11 یا كارەساتا شنگالێ ل سەر دەستێ تیرۆرستێن داعشێ پەیامەك بەلاڤكر.
سەرۆكێ حوكمەتا هەرێما كوردستانێ د پەیاما خوە دا گۆت» ل سالڤەگەڕا داگیركرنا شنگالێ و جینۆسایدكرنا خوشك و برایێن ئێزدی ژ ئالیێ تیرۆرستێن داعشێڤە، ب رێزڤە بیرئینانا شەهیدێن وێ كۆمكوژییا تیرۆرستێن داعشێ دكەین كو برینەكا كوورە د دیرۆكا گەلێ كوردستانێ و مرۆڤایەتیێدا ب گشتی».
گۆت ژی» ل سالڤەگەڕا ڤێ كارەساتێ، پێدڤییە ب رێزڤە بیرئینانا گیانفیدایی و قوربانیدانا پێشمەرگێن قەهرەمانێن كوردستانێ بكەین كو ب سەركردایەتییا سەرۆك بارزانی، شنگال و دەور و بەرێن وێ ئازاد كر، هەروەسا سوپاسییا هەلوەستێ جوامیرانەیێ كوردستانێ ب گشتی و پارێزگەها دهۆكێ و دەڤەرا بەهدینان ب تایبەتی دكەین د هاوارچوون و هاریكارییا خوشك و برایێن مە یێن ئێزدی».
مەسرور بارزانی دیاركر ژی»حوكمەتا هەرێما كوردستانێ یا بەردەوامە د بزاڤ و كاركرنێدا بۆ ئازادكرن و زڤراندنا هەموو وان رەڤاندیێن كو هەتا نوكە نەهاتینە ئازادكرن و دیتن و ودیاركرنا چارەنڤیسێ بێسەروشوونكریان. هەروەسا درێژەدان ب پشتەڤانییا داراییا رزگاربوویان و هاریكاریكرنا خوشك و برایێن مە یێن ئێزدی ئەوێن ژ ئەگەرێ ئاسایی نەبوونا رەوشا شنگالێ و دەور و بەرێن وێ، هێشتا هەر د كەمپاندا دژین و نەشیاینە بزڤڕنە دەڤەرێن خوە».
سەرۆكێ حوكمەتا هەرێمێ دیاركر ژی» د ڤێ هەلكەفتا خەمگیندا، دوپات دكەین كو پێدڤییە حوكمەتا فیدرال ئەرك و بەرپرسیارییا خوە بجهبینیت و خوشك و برایێن مە یێن ئێزدی قەرەبوو بكەت و هاریكارییا ئاوارەیان بكەت و رێكێ خوەش بكەت بۆ وێ چەندێ ب سەربلندی بزڤرن بۆ دەڤەرێن خوە، ئەوژی ب رێكا بجهئینانا رێككەفتنا شنگالێ و دەركەفتنا هێزێن چەكدار و میلیشیا ژ دەڤەرێ و زڤراندنا ئاشتیێ و تەناهیێ بۆ دەڤەرێ. كو مخابن ژ ئەگەرێ بجهنەئینانا رێككەفتنا شنگالێ و ژبەر وێ رەوشا نەجهگیر پشتی ئازادكرنێ ب سەر شنگالێ هاتییە سەپاندن، دشیاندا نەبوو بهێتە ئاڤەدانكرن و خزمەتگوزاریێن پێدڤی پێشكێشی خەلكێ وێ دەڤەرێ بهێنە كرن».