مەسرور بارزانی، سەرۆكێ حوكمەتا هەرێما كوردستانێ، پەیوەندییەكا تەلەفۆنی ژ ئالیێ هەیبەت حەلبووسی، سەرۆكێ جڤاتا نوونەرێن ئیراقێ ڤە پێگەهشت.
د وێ پەیوەدییا تەلەفۆنیدا، حەلبووسی هێرشا درۆنی یا سەر نڤیسینگەها تایبەت یا مەسرور بارزانی و جهێ ئاكنجیبوونا ڕێڤەبەرێ ئاژانسا پاراستنێ پرۆتەستۆ كر.
هەیبەت حەلبووسی هەڤسۆزی و پشتەڤانییا خوە بۆ پاراستنا ئاسایش و ئارامییا هەرێما كوردستانێ و ئیراقێ دیار كر و دوپاتی ل سەر گرنگییا رێگریكرنێ ژ ڤان جۆرە بنپێكرنێن ئەمنی كر.
سەرۆكێ حوكمەتا هەرێما كوردستانێ، پێزانین و سوپاسییا خوە ئاراستەی سەرۆكێ جڤاتا نوونەرێن ئیراقێ كر بۆ دەربڕینا وێ پشتەڤانی و هەڤسۆزییێ.

بارەگەهێ بارزانی د بەیاننامەیەكێ دا، ل گەل پرۆتەستۆكرنا هێرشێن درۆنی یێن سەر نڤیسینگەها سەرۆكێ حوكمەتا هەرێما كوردستانێ و جهێ ئاكنجیبوونا ڕێڤەبەرێ ئاژانسا پاراستنێ، دوپاتی دكەت كو ئەڤ هێرشە بزاڤەكەن بۆ تێكدانا ئارامییا هەرێما كوردستانێ و بكارئینانا درۆن و مووشەكان كێشەیان چارەسەر ناكەت.
بارەگەهێ بارزانی ڕاگەهاند»ب توندی وێ هێرشا درۆنی پرۆتەستۆ دكەین ئەوا سپێدەهییا ڕۆژا دوشەمبی 17/8/2026ێ ژ وێ ئالیێ سنۆرێ ئیرانێ ڤە هاتییە كرن بۆ سەر نڤیسینگەها سەرۆكێ حوكمەتا هەریچمێ و جهێ ئاكنجیبوونا ڕێڤەبەرێ ئاژانسا پاراستنێ ل پیرمامێ».
هەروەسا دیاركر»هەرێما كوردستانێ چو جاران نەبوویە پشكەك ژ ڤان شەڕ و ئالۆزیێن ل دەڤەرێ هەین، و ئەڤ جۆرە هێرشێن نەڕەوا كو چو بهانەیان هەلناگرن، بزاڤەكەن بۆ تێكدانا ئارامییا هەرێما كوردستانێ. ب پشتڕاستی بكارئینانا درۆن و مووشەكان كێشەیان چارەسەر ناكەت».

سەرۆكێ هەرێما كوردستانێ، ب توندی هێرشێن ل سەر نڤیسینگەها مەسرور بارزانی پرۆتەستۆ كر و داخوازێ ژ حوكمەتا فیدرال كر بەرپرسیارەتییا خۆ بۆ پاراستنا ئاسایشا وەلاتی ب جهبینیت.
نێچیرڤان بارزانی، سەرۆكێ هەرێما كوردستانێ، د بەیاننامەیەكێ دا ب توندی ئەو هێرشە پرۆتەستۆ كرن یێن كو سپێدەهییا رۆژا دووشەمبی نڤیسینگەها مەسرور بارزانی، سەرۆكێ حوكمەتا هەرێما كوردستانێ و جهێ ئاكنجیبوونا سەرۆكێ ئاژانسا پاراستنێ كرینە ئارمانج.
سەرۆكێ هەرێما كوردستانێ ئەو هێرشە ب تەمامی ڕەت كرن و وەك پێشهاتەكا مەترسیدار هەژمارتن.
د پشكەكا دی یا بەیاننامەیێ دا، نێچیرڤان بارزانی داخواز ژ حوكمەتا فیدرال كر بەرپرسیارەتی و پێگیریێن خۆ یێن دەستووری د پاراستنا ئاسایش و ئارامییا وەلاتی دا بجهبینیت، دا كو ڕێگری ل دووبارەبوونا ڤان جۆرە دەستدرێژییان بهێتە كرن.
سەرۆكێ هەرێما كوردستانێ تەئكید ل وێ چەندێ كر، پاراستنا سەروەری، ئاسایش و سەقامگیریا ئیراقێ ب هەرێما كوردستانێ ڤە، بەرپرسیارەتیەكا هەڤپشكە، لەوما پێدڤییە هەموو لایەك كار بۆ ئارامكرن و نەهێشتنا ئالۆزییان بكەن.

سەرۆكێ حوكمەتا هەرێما كوردستانێ ڕاگەهاند، كۆمارا ئیسلامییا ئیرانێ ب درۆنان هێرش كرییە سەر نڤیسینگەها تایبەت یا وی و مالا ڕێڤەبەرێ ئاژانسا پاراستن و زانیاری. هەروەسا دبێژیت، هێرش گەفەكا ڕاستەوخۆیە بۆ سەر ئاسایش و ئارامییا هەرێما كوردستانێ.
ل رۆژا دووشەمبی، 17/8/2026، مەسرور بارزانی، سەرۆكێ حوكمەتا هەرێما كوردستانێ، د هەژمارا خۆ یا تایبەت دا ل تۆڕا جڤاكی یا «ئێكس» پەیامەك بەلاڤكر و ڕاگەهاند «ل دووڤ ڤەكۆلین و پێزانینێن پشتڕاستكری یێن دژە تیرۆرا كوردستانێ، ئەڤرۆ ئۆفیسا من یا تایبەت و جهێ ئاكنجیبوونا ڕێڤەبەرێ ئاژانسا پاراستن، د هێرشەكا درۆنی یا ئیرانی دا هاتینە ئارمانجكرن».
د پەیاما سەرۆكێ حوكمەتا هەرێمێ دا هاتییە»ب توندترین شێوە، ئەڤان هێرشێن نەڕەوا و قەبوولنەكری پرۆتەستۆ و شەرمەزار دكەم».
مەسرور بارزانی دوپات كرییە «ئەڤە پێنگاڤەكا مەترسیدارە و گەفەكا ڕاستەوخۆیە بۆ سەر ئاسایش و ئارامییا هەرێما كوردستانێ».
سەرۆكێ حوكمەتتا هەرێمێ دیاركر یە ژی»ئەڤ هێرشە چو جاران نەشێن مە بدەنە ڕاوەستاندن ژ بەردەوامبوونا مە د ئەنجامدانا ئەركێن مە و پاراستنا وەلاتییێن مە دا».

فراكسیۆنا پارتی دیموكراتی كوردستان د پەرلەمانێ كوردستانێ دا، ب توندترین شێوە هێرشا درۆنی یا ڕۆژا دووشەمبی 17/8/2026ێ، بۆ سەر نڤیسینگەها تایبەت یا مەسرور بارزانی، سەرۆكێ حوكمەتا هەرێما كوردستانێ و جهێ ئاكنجیبوونا ڕێڤەبەرێ ئاژانسا پاراستنێ ل پیرمامێ پرۆتەستۆ كر.
فراكسیۆنا پارتی د بەیاننامەیەكێ دا دیار كر كو ئەڤ هێرشا ژ ئالیێ ئیرانێ ڤە هاتییە ئەنجامدان، بنپێكرنەكا بێ بهانە یا یاسایێن نێڤدەولەتی و بنەمایێن جیرانەتیا باشە. د بەیاننامەیێ دا هاتییە ژی»ئەڤ هێرشە نە بتنێ ئارمانجگرتنا كەسایەتی و دەزگەهانە، بەلكو دەستدرێژییە بۆ سەر ئاخ، سەروەری و شكۆیا دەولەتا ئیراقێ و قەوارەیێ هەرێما كوردستانێ».
فراكسیۆنا پارتی ئاماژە ب وێ چەندێ كر كو سیاسەتا مەسرور بارزانی و حوكمەتا هەرێمێ بەردەوام ل سەر بنەمایێ بێلایەنی، ئاشتی و دووركەفتن ژ شەڕ و ململانێیێن دەڤەرێ بوویە، لەوما ئەڤ جۆرە ڕەفتاران چو بهانە بۆ نینن و خزمەتا بەرژەوەندیێن هەڤپشك ناكەن.
د پشكەكا دی یا بەیاننامەیێ دا، فراكسیۆنا پارتی داخواز ژ حوكمەتا فیدرالییا ئیراقێ كر كو بەرپرسیارەتییا خۆ یا دەستووری و یاسایی هەلگریت و هەموو ڕێكارێن سیاسی و دیپلۆماسی بگریتە بەر دا كو ڕێگری ل دووبارەبوونا ڤان دەستدرێژییان بهێتە كرن، چونكی پاراستنا ئاسایش و سەروەرییا هەرێما كوردستانێ بەرپرسیارەتییەكا هەڤپشكە.
ل دووماهیێ، فراكسیۆنا پارتی دوپات كر كو هەرێما كوردستانێ دێ بەردەوام بیت ل سەر پەیاما خۆ یا ئاشتی و دیالۆگێ، و ب چو ڕەنگەكی قەبوول ناكەت دەستدرێژی بهێتە سەر خاك و شكۆیا قەوارێ هەرێمێ.

مەكتەبا سیاسی یا پارتی ب توندترین شێوە هێرشا درۆنی یا سەر نڤیسینگەها سەرۆكێ حوكمەتا هەرێمێ و جهێ ئاكنجیبوونا سەرۆكێ ئاژانسا پاراستنێ پرۆتەستۆ كر و داخواز ژ حوكمەتا ئیراقێ كر ڕێگریێ ل وان بنپێكرنان بكەت.
مەكتەبا سیاسی یا پارتی دیموكراتی كوردستان د بەیاننامەیەكێ دا ئاماژە ب وێ چەندێ كر، د دەمەكێ دا هەموو ئالی چاڤەڕێی وێ چەندێ بوون ئاسایش و ئارامییا ئیراقێ و هەرێما كوردستانێ پاراستی بیت، لێ شەڤا بووری ب ڕێیا دوو درۆنان نڤیسینگەها مەسرور بارزانی، سەرۆكێ حوكمەتا هەرێما كوردستانێ و جهێ ئاكنتجیبوونا ڕێڤەبەرێ ئاژانسا پاراستنێ هاتنە ئارمانجكرن.
د بەیاننامەیێ دا هاتییە، هەموو بزاڤێن وان بۆ دوورئێخستنا هەرێما كوردستانێ و ئیراقێیە ژ تێكەلبوونێ د كێشە و ئالۆزیێن دەڤەرێ دا، و چو جاران هەرێما كوردستانێ نەبوویە و نابیتە پشكەك ژ شەڕ و ئالۆزییان.
پارتی دیموكراتی كوردستان گەلەك ب توندی ئەو كریارا تێكدەرانە پرۆتەستۆ كر، و ئەو ڕەفتارانە د بەرژەوەندییا چو ئالییەكی دا نابینیت و ب مەترسیدار دزانیت بۆ سەر گەشەپێدانا پەیوەندییان و ئالۆزتركرنا رەوشێ.
ل دووماهیا بەیاننامەیێ ب ڕۆهنی هاتییە دوپاتكرن ، ئەركێ سەر ملێ حوكمەتا فیدرالییا ئیراقێیە ل سەر ڤی پرسی ب ڕژدی بهێتە دەنگ و ڕێگریێ ل ڤان هێرش و بنپێكرنان بكەت، هەروەسا د زووترین دەم دا ب ڕێكا گونجای بەرهنگاری ڤان جۆرە دەستدرێژییان ببیتەڤە.

دەستەیا سەربخۆ یا مافێن مرۆڤی ل هەرێما كوردستانێ، ب توندی هێرشا درۆنی پرۆتەستۆ كر كو سپێدەیا رۆژا دووشەمبی ژ سنۆرێن كۆمارا ئیسلامییا ئیرانێ ڤە بۆ سەر قەزا پیرمامێ ل پارێزگەها هەولێرێ هاتینە ئەنجامدان و نڤیسینگەها تایبەت یا سەرۆكێ حوكمەتا هەرێمێ و جهێ ئاكنجیبوونا ڕێڤەبەرێ ئاژانسا پاراستن كرینە ئارمانج.
د بەیاننامەیا دەستەیا سەربخۆ یا مافێن مرۆڤی دا هاتییە، سات 12:28 سپێدەیا دووشەمبی 17/8/2026، هێرشەكا درۆنی یا تێكدەرانە ژ ئالیێ سنۆرێن ئیرانێ ڤە بۆ سەر نڤیسینگەها تایبەت یا سەرۆكێ حوكمەتا هەرێما كوردستانێ و جهێ ئاكنجیبوونا ڕێڤەبەرێ ئاژانسا پاراستن ل قەزا پیرمامێ هاتییە ئەنجامدان.
دەستەیا سەربخۆ یا مافێن مرۆڤی دیاركر ژی كو كو ئارمانجكرنا دەم ب دەم یا دەڤەرێن ئاڤەدان و دەزگەهێن فەرمی یێن هەرێما كوردستانێ ب ڤی ڕەنگی، بنپێكرنەكا دیار و مەترسیدار یا سەروەرییا ئاخا ئیراقێ و هەرێما كوردستانێیە، هەڤدەم ئەنجامدانا ئەڤان كاران بنپێكرنا هەموو پەیماننامەیێن نێڤدەولەتی و بنەمایێن مافێن مرۆڤی و ژیانا وەلاتییانە كو مەترسییا جدی ل سەر ئارامییا دەڤەرێ دروست دكەت.
د بەیاننامەیا دەستەیا مافێن مرۆڤی دا ئاماژە ب وێ چەندێ ژی هاتییە كرن، سەرەڕای هندێ كو خۆشبەختانە هێرشێ چو زیانێن گیانی نەبووینە، لێ پاراستنا ئاسایش و ژیانا وەلاتییان مافەكێ بنەڕەتییە و ناهێتە قەبوولكرن ب چ هێجەتان ئاخا هەرێما كوردستانێ ببیتە مەیدانا هێرش و هەڤڕكی و پەیامێن سەربازی.
ل دوماهیا بەیاننامەیێ، دەستەیا سەربخۆ یا مافێن مرۆڤی داخواز ژ حوكمەتا فیدرالا ئیراقێ و جڤاكێ نێڤدەولەتی كرییە هەلوەستەكێ ڕۆهن و جدی هەبیت بۆ ڕاگرتنا ئەڤان دەستدرێژی و بنپێكرنێن بەردەوام و بزاڤێن جدی بهێنە دان بۆ پاراستنا سەروەرییا ئاخێ و دابینكرنا ئاسایش و ئارامیێ ل دەڤەرێ.

پشتی هێرشێن درۆنی یێن ڕۆژا 17/8/2026ێ، بۆ سەر نڤیسینگەها تایبەت یا مەسرور بارزانی، سەرۆكێ حوكمەتا هەرێما كوردستانێ و جهێ ئاكنجیبوونا ڕێڤەبەرێ ئاژانسا پاراستنێ ل پیرمامێ، پێلەكا بەرفرەهـ یا پرۆتەستۆكرنێ ل سەر ئاستێ هەرێمی، ئیراقێ و نێڤدەولەتی دروست بوو، و ئەڤ هێرشە وەك بنپێكرنەكا مەترسیدار بۆ سەر سەروەرییا ئیراقێێ هاتە هەژمارتن.
قوباد تالەبانی، جێگرێ سەرۆكێ حوكمەتا هەرێما كوردستانێ، ب توندترین شێوە ئەڤ هێرشە پرۆتەستۆ كر و ڕاگەهاند كو هەلوەستێ هەرێمێ بەردەوام ئاشتیخوازانە بوویە. وی دوپات كر كو ئەڤ جۆرە هێرشانە نە ڕێزگرتنە ل ڕۆلێ ئاشتیخوازانەیێ هەرێمێ و بنپێكرنەكا مەترسیدارە بۆ سەر سەروەرییا ئیراقێ.
ل سەر ئاستێ ئیراقێ، مستەفا كازمی، سەرۆك وەزیرێن پێشترێ ئیراقێ، هۆشداری دا ژ تێكەلبوونا ئیراقێ د ململانێیێن دەڤەرێ دا و ڕاگەهاند كو نابیت ئیراق ببیتە گۆرەپانەك بۆ لێكگۆهارتنا پەیامان و ئێكلاكرنا حساباتان. هەروەسا خەمیس خەنجەر و سەرمەد خەنجەر ژ هەڤپەیمانییا (سیادە)، ئەڤ هێرشە ب «كارەكێ تیرۆریستی» و «پێشهاتەكێ گەلەك مەترسیدار» ناڤ كر، و داخواز ژ جڤاكا نێڤدەولەتی و حوكمەتا فیدرال كر كو سنۆرەكی بۆ دەستدرێژیێن ئیرانێ دابنن.
ژ ئالیێ خۆ ڤە، مەزلووم عەبدی، فەرماندەیێ گشتیێ هێزێن سوریا دیموكرات (هەسەدە)، هەڤسۆزییا خۆ بۆ گەل و حوكمەتا هەرێمێ دیار كر و ئەڤ هێرشە وەك دەستدرێژییەك بۆ سەر ئیرادەیا گەلێ كوردستانێ و ئارمانجگرتنا دەزگەهێن فەرمی یێن دەولەتێ هەژمارت.
د هەمان چوارچۆڤەدا، پەیڤدارێ كۆمەلا دادگەرییا كوردستانێ پرۆتەستۆكرنا حزبا خۆ بۆ ڤان هێرشان ڕاگەهاند و دوپاتی ل سەر بێلایەنییا هەرێمێ د ململانێیان دا كر. هەروەسا هەڤپەیمانییا مەسیحی و ئایدن مەعروف، وەزیرێ هەرێمێ بۆ كاروبارێن پێكهاتەیان، ئەڤ هێرشە ب «ترسنۆكانە» ناڤ كرن و ڕاگەهاندن كو ئەڤ كارە نەشێن ئیرادەیا دەزگەهێن هەرێمێ بشكێنن.
میر حازم تەحسین سەعید، میری ئێزدییان ل ئیراقێ و جیهانێ، ب توندی هێرشا سەر نڤیسینگەها مەسرور بارزانی پرۆتەستۆ كر و ڕاگەهاند كو پێدڤییە دیالۆگ و تێكگەیشتن تاكە ڕێكا چارەسەركرنا ناكۆكییان بن، ب دوور ژ هەر گرژییەكا ئاسایش و ئارامیێ تێك بدەت.
میر حازم ئاماژە كر كو ئەڤ كارە مەترسینە بۆ سەر ئاسایشا هەرێمێ و دەڤەرێ، و دوپات كر كو هەرێما كوردستانێ دێ هەر وەك لانكا لێبۆرینێ و پێكڤەژیانێ بۆ هەموو ئایین و پێكهاتەیان مینیت.
دادوەر عەبدولجبەبار عەزیز حسن، سەرۆكێ جڤاتا دادوەریێ ل هەرێما كوردستانێ ژی، هێرشا درۆنی یا سەر نڤیسینگەها حوكمەتا هەرێمێ پرۆتەستۆ كر و دیاركر كو بنپێكرنەكا دیار یا سەروەری، ئارامی و ئاسایشا هەرێمێ و وەلاتییانە.
هەموو ئالیێن سیاسی و كەسایەتیێن ناڤبری، د پەیامێن خۆ دا هەڤڕا بوون ل سەر وێ چەندێ كو پاراستنا ئاسایش و سەروەرییا هەرێما كوردستانێ بەرپرسیارەتییەكا نیشتمانی و ئیراقێیە، و پێدڤییە حوكمەتا فیدرال ب ڕژدی بەرهنگاری ڤان دەستدرێژییان ببیتەڤە دا كو ئارامییا دەڤەرێ نەكەڤیتە مەترسیێ.

فراكسیۆنا پارتی دیموكراتی كوردستان د جڤاتا نوونەرێن ئیراقێ دا، ب توندترین شێوە هێرشا درۆنی یا سەر نڤیسینگەها تایبەت یا مەسرور بارزانی، سەرۆكێ حوكمەتا هەرێما كوردستانێ و جهێ ئاكنجیبوونا ڕێڤەبەرێ ئاژانسا پاراستنێ شەرمزار كر.
فراكسیۆنا پارتی د بەیاننامەیەكێ دا ئاشكرا كر، هەرێما كوردستانێ بەردەوام وەك فاكتەرەكێ سەرەكی یێ ئارامیێ ل دەڤەرێ ڕەفتار كرییە و بەردەوام بزاڤ كرینە هەرێم و هەموو ئیراق ژ شەڕ، ململانێ و ئالۆزییێن دەڤەرێ دوور بن.
د بەیاننامەیێ دا دوپاتی هاتییە كرن كو ئارمانجگرتنا نڤیسینگەها سەرۆكێ حوكمەتێ و ئاژانسا پاراستنێ «بەزاندنا ئاشكرا یا بەهایێن نیشتمانییە و ڕەفتارەكا مەترسیدارە بۆ تێكدانا ڤێ ئارامیێ».
د پشكەكا دی یا بەیاننامەیێ دا، فراكسیۆنا پارتی داخواز ژ حوكمەتا فیدرالییا ئیراقێ كر كو ئەركێن خۆ یێن دەستووری و ئەمنی ب جهبینیت و هەلوەستەكێ ڕۆهن و بڕیاردەرانە نیشا بدەت، هەروەسا داخواز كر كو ڕێكارێن كریاری و توند وەربگریت بۆ دانانا سنۆرەكی بۆ ڤان دەستدرێژییان، دا كو ڕێگری ل هەر بزاڤەكێ بهێتە كرن كو ئاسایش و ئارامیا گشتی دئێخیتە مەترسیێ دا.

دژە تیرۆرا كوردستانێ ڕاگەهاند، سپێدەهییا رۆژا دووشەمبی، ژ ئالییێ سنۆرێ ئیرانێ ڤە ب دوو درۆنێن بۆمبڕێژكری هێرش هاتییە كرن بۆ سەر نڤیسینگەها تایبەت یا سەرۆكێ حوكمەتا هەرێما كوردستانێ و جهێ ئاكنجیبوونا ڕێڤەبەرێ ئاژانسا پاراستن ل قەزایا پیرمامێ، لێ هێرشێ چو زیانێن گیانی ل پاش خۆ نەهێلاینە.
دژە تیرۆرا كوردستانێ د بەیاننامەیەكێ دا ئاشكرا كر «دەمژمێر 12:28ی سپێدەهییا رۆژا دووشەمبی، دوو درۆنێن بۆمبڕێژكری ژ جۆرێ (حەدید-110) ژ ئالییێ سنۆرێ وەلاتێ ئیرانێ ڤە بەرەڤ بارەگەهێ نڤیسینگەها تایبەت یا سەرۆكێ حوكمەتا هەرێما كوردستانێ و جهێ ئاكنجیبوونا ڕێڤەبەرێ ئاژانسا پاراستن ل قەزایا پیرمامێ ل پارێزگەها هەولێرێ هاتنە هاڤێتن».
د بەیاننامەیێ دا ئاماژە ب وێ چەندێ ژی هاتییە كرن، خۆشبەختانە هێرشان چو زیانێن گیانی ل پاش خۆ نەهێلاینە.
دژە تیرۆرا كوردستانێ دوپات ژی كر، ب توندترین شێوە ڤان هێرش و دەستدرێژییان پرۆتەستۆ دكەن و ڕاگەهاند «ئەڤ دەستدرێژییە ب چو ڕەنگەكی ناهێنە قەبوولكرن و تەمامییا بەرپرسیارەتییا لێكەفتێن وێ ژی ل سەر ملێ ئەنجامدەرێن وێ یە».