مەسرور بارزانی، سەرۆكێ حوكمەتا هەرێما كوردستانێ، پێشوازی ل یوسف مەكی گەنناوی، پارێزگەرـێ نەجەف و شاندەكێ دگەل وی دا كر.
ل گۆرەی بەیاننامەیەكا حوكمەتا هەرێما كوردستانێ، د ڤی دیداری دا، سەرۆكێ حوكمەتا هەرێما كوردستانێ بەرهەڤییا حوكمەتا هەرێمێ بۆ پێشڤەبرنا هەڤكاری و هەماهەنگیێ د ناڤبەرا هەرێما كوردستانێ و پارێزگەرێن ئیراقێ دا، ب تایبەتی نەجەف، د بوارێن جودا جودا دا دیار كر.
هەروەك د بەیاننامەیێ دا هاتی، پارێزگەرێ نەجەف ئاماژە ب مەرەما سەرەدانا خوە یا بۆ پایتەختێ هەرێما كوردستانێ كر، كو ئارمانج ژ وێ پێشئێخستنا پەیوەندیێن دو قۆلی و مفا وەرگرتنە ژ چاكسازی و ئەزموونا سەركەفتی یا حوكمەتا هەرێمێ د كەرتێن جودا دا، ب تایبەتی د بوارێ ب دیجیتالكرنا خزمەتگوزاریێن گشتی دا.

هەولێر، قائید میرۆ

ئەندامەكا جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند، بەری راگەهاندنا كابینەیا عەلی ئەلزەیدی، پارتی دیموكراتی كوردستان كاخەزەك پێشكەشی چارچوڤەیا هەماهەنگییا شیعەیان كربوو و هەموو خالێن د ناڤا كاخەزا پارتی دا هاتینە پەسەندكرن. ئەشواق جاف، ئەنداما جڤاتا نوونەرێن ئیراقێ ژ فراكسیۆنا پارتی بۆ رۆژنامەیا (ئەڤرۆ) گوت»مە تێبینی ل سەر كارنامەیا حوكمەتا ئیراقێ یا نوو هەنە و مە ئەو تێبینی پێشكێشی لیژنەیا بەرهەڤكرنا كارنامەیێ كرینە بۆ راستڤەكرنێ».
ئەشواق جاف، زێدەتر گۆت «پشتی كارنامەیا حوكمەتا عەلی ئەلزەیدی گەهشتییە دەستێ مە، ژ ئالیێ فراكسیۆنا پارتی ڤە ب هووری پێداچوون بۆ هاتییەكرن. هندەك تێبینیێن مە ل سەر كارنامەیێ هەبوون و پێشكێشی وێ لیژنەیێ هاتینە كرن. تێبینیێن پارتی ل دۆر كارنامەیا حوكمەتێ ب گرنگی هاتنە وەرگرتن».
دیاركر ژی» پارتیكاخەزەك بەرهەڤ كربوو كو ژ ئالیێ سەرۆك بارزانی ڤە هاتبوو پەسەندكرن. پارتی پێشنیازێن خوە پێشكێشی چارچوڤەیا هەماهەنگی كرن و هەموو خالێن گرێدای هەرێما كوردستانێ و قەوارەیێ هەرێمێ و ئەو قانوونێن پێدڤییە بهێنە دەركرن، ژ گەرەنتیكرنا مافێن هێزێن پێشمەرگەی بگرە هەتا هەموو مافێن فەرمانبەران تێدا هاتینە بنەجهكرن؛ بۆ نموونە پێگیریكرن ب دەستووری و بجهئینانا مادەیا 140 و پشكا بودجەیا هەرێمێ و چەندین داخوازیێن دی د ناڤا تێبینیێن پارتی دا بوون. چارچۆڤەیا هەماهەنگیێ هەموو ئەو خالێن پارتی پەسەند كرینە و هەموو داخوازیێن پارتی د چارچوڤێ دەستوورێ دا بوون».
ناڤبری ئەوژی گۆت «ئەم ل هیڤیێ نە ل كابینەیا نوو هەموو ئەو خالێن پارتی پێشنیاز كرین بهێنە بجهئینان، چونكە كورد و هەرێما كوردستانێ بەردەوام پشكەك بووینە ژ ئاشتیێ ل گەل ئیراقێ. مە وەك فراكسیۆنا پارتی دیموكراتی كوردستان هەموو تشتەك ب زەلالی پێشكێشی چارچوڤەیا هەماهەنگی و عەلی ئەلزەیدی كریە. هیڤیدارین ڤێجارێ پێگیریێ ب دەستووری بكەن، چونكە هەموو داخوازیێن پارتی دەستووری نە و بۆ خزمەتا خەلكێ كوردستانێ نە. راستە كابینە ژ ئالیێ جڤاتا نوونەران ڤە باوەری پێ هاتییەدان، بەلێ ئەو وەزیرێن ماین و هەتا نوكە باوەری وەرنەگرتی، پشتی جەژنێ دێ دوبارە جڤاتا نوونەران كۆمبیت و هەموو وەزارەتێن دی یێن باوەری پێ نەهاتییەدان، دێ ئەو ژی هێنە پڕكرن».

رۆژنامەیا «نیویۆرك تایمز» بەلاڤكریە كو ئیسرائیل پتر ژ سالەكێ دەرباز كریە بۆ بەرهەڤكرنا جهەكێ نهێنی د ناڤ ئاخا ئیراقێ دا ب مەرەما بكارئینانێ د ئۆپەراسیۆنێن دژی ئیرانێ دا، هەڤدەم بەرپرسێن ئیراقی ژی پاشتر هەبوونا بنگەهێ سەربازیێ ئیسرائیلی یێ دوویێ ل بیابانێن رۆژئاڤایێ وەلاتی پشتڕاست كریە.
رۆژا ئێكەشەمبی 16ێ گولانا 2026، رۆژنامەیا «نیویۆرك تایمز» ئاماژە ب روودانەكا رۆژا 3ێ ئادارێ كریە، دەمێ بارهەلگرەك كو شڤانەكێ دەڤەرێ دهاژۆت و بەرەڤ باژێڕكێ «نوخەیب» دچوو، ژ هەلیكۆپتەرەك كەفتە دووڤ و چەندین جاران گولە لێ هاتنە تەقاندن هەتا كو د ناڤەڕاستا لمێ دا هاتیە راوەستاندن و سووتی.
ل دووڤ راپۆرتا نیویۆرك تایمزێ، ئەڤ هێرشە پشتی هندێ هاتییە كو «عەواد شەمەری» یێ 29 سالی، د دەمێ گەشتەكا خوە دا ب رێكەفت تووشی بنگەهەكێ سەربازی یێ نهێنی یێ ئیسرائیلێ بوویە. خێزانا وی دبێژن كو عەوادی پەیوەندی ب فەرماندەیا سەربازی یا ئیراقێ كربوو دا كو وان ئاگەهدار بكەت ل سەر وان سەرباز و هەلیكۆپتەر و خێڤەتێن نێزیك وی بنگەهێ ئیسرائیلی دیتین، لێ ئەڤ دیتنە بوویە ئەگەرێ ژ دەستدانا ژیانا وی.
نیویۆرك تایمزێ باسێ هندێ ژی كریە كو بەری نوكە رۆژنامەیا «ووۆل ستریت جورنال» هەبوونا بنگەهەكێ ئیسرائیلی ل ئیراقێ ئاشكەرا كربوو، لێ نوكە بەرپرسێن ئیراقی هەبوونا بنگەهێ دوویێ یێ رانەگەهاندی ل بیابانێن رۆژئاڤایێ ئیراقێ پشتڕاست كریە.

ل ئێڤاریا دوهی رۆژا ئێكەشەمبی 17/5/2026، نێچیرڤان بارزانی، سەرۆكێ هەرێما كوردستانێ، ب سەرەدانەكا فەرمی یا دوو رۆژی بەرەڤ رۆما یا پایتەختا ئیتالیا بڕێكەفت.
سەرۆكایەتییا هەرێما كوردستانێ د بەیاننامەیەكێ دا بەلاڤكر «بڕیارە د چارچۆڤەیا سەرەدانا خوە دا، نێچیرڤان بارزانی ل گەل قەداسەتا پاپایێ ڤاتیكانێ، سەرۆككۆمارێ ئیتالیا و هەژمارەكا بەرپرسێن بلند یێن حوكمەتا ئیتالیا و دەولەتا ڤاتیكانێ كۆم ببیت».
دیاركر ژی «د وان كۆمبوونان دا، دێ پەیوەندیێن ئیراقێ و هەرێما كوردستانێ ل گەل ئیتالیا و ڤاتیكانێ، بارودۆخێ سیاسی و ئەمنی یێ ئیراقێ و دەڤەرێ، هەروەسا چەندین پرسێن دی یێن گرنگ یێن هەڤپشك گەنگەشە كەن».

ئەندامەكێ مەكتەبا سیاسی یا پارتی دیمۆكراتی كوردستان، هۆشداریێ ژ هەرفینا سیستەمێ سیاسی یێ ئیراقێ ددەت و راگەهاند، كو ب جهنەئینانا دەستووری و رێككەفتنان ئەگەرێن سەرەكی یێن قەیرانانە. هەروەسا ئاشكرا كر كو ژ كۆما 67 خالێن بەرنامێ حوكمەتێ بەرامبەر هەرێما كوردستانێ، تنێ 4 خال هاتینە ب جهئینان.
هێمن هەورامی، ئەندامێ مەكتەبا سیاسی یا پارتی دیموكراتی كوردستان د دەمێ پشكداریكرنا وی د پانێلەكا تایبەت دا ب ناڤێ «دیالۆگا ئیراق 2026» كو ل ئەمریكا بڕێڤە چوو، شرۆڤەكرنەكا هوور بۆ رەوشا نوكە یا ئیراقێ و پەیوەندیێن د ناڤبەرا هەولێر و بەغدا دا پێشكێش كر.
وی بەرپرسێ پارتی ئاماژە ب وێ چەندێ دا، ئیراق نوكە د ناڤ قەیرانەكا «سیستەماتیك» دا دەرباز دبیت و ئێدی چارەسەریێن دەمكی مفای ناگەهینن. دوپاتی ل سەر هندێ ژی كر كو هەر چارەسەرییەك دڤێت د چوارچۆڤەیا پرۆسەیەكێ دا بیت كو هەموو پێكهاتە و نەتەوەیێن ئیراقێ تێدا پشكداریێ بكەن، دا كو ئارامییەكا راستی بهێتە پێش.
د پشكەكا دی یا ئاخڤتنێن خۆ دا، پەردە ل سەر ئاستێ ب جهئینانا وان پەیمانان لادا یێن كو ب هەرێما كوردستانێ هاتبوونە دان و گۆت: نێزیكی 55 ماددەیێن دەستووری هەتا نوكە پشتگوهـ هاڤێتینە و نەهاتینە ب جهئینان. ژ وان 20 خالێن سیاسی یێن ل گەل محەمەد شیاع ئەلسوودانی رێككەفتن ل سەر هاتبوو كرن، تنێ چەند خالەكێن كێم كار ل سەر هاتییە كرن؛ هەڤدەم ژ كۆما 67 خالێن پرۆگرامێ حوكمەتێ بەرامبەر هەرێما كوردستانێ، تنێ چار خال هاتینە ب جهئینان، ئەڤە ژی ب وێ رامانێ دهێت كو تنێ 5% ژ رێككەفتنان چووینە د وارێ ب جهئینانێ دا.
وی ئەندامێ مەكتەبا سیاسی ئاماژە دا»ئەڤ پشتگوهـ هاڤێتنا مەزن بوویە ئەگەرێ دروستبوونا قەیرانا بێ باوەریێ و ئالۆزیێن بەردەوام د ئیراقێ دا».
دەربارەی هندێ كا بۆچی كێشە چارەسەر نابن، ئەندامێ مەكتەبا سیاسی یا پارتی راگەهاند كو كێشە نە د كەسایەتییا سەرۆك وەزیرانی دا یە، بەلكو د وی سەقایێ سیاسی دا یە یێ كو كاری تێدا دكەن. نموونە ب «عادل عەبدولمەهدی» ئینا و گۆت: «كەسێ وەك وی پەیوەندیێن باش ل گەل هەرێمێ نەبوون، بەلێ سەقایێ سیاسی رێك نەدا كێشە ب دوماهی بهێن».
د دوماهیێ دا، ئاماژە ب هندێ دا كو كوردان رێككەفتنەكا سیاسی ل گەل «چارچۆڤەیا هەماهەنگیێ» هەیە و هیڤی خواست كو ئەو ئالییە وەك خۆ و ل سەر بنەمایێ دەستووری پێگیری رێككەفتنێ بیت.
دەربارەی هندێ كو دهێتە گۆتن هەرێمێ ژ دەستهەلاتێن خۆ لادایە، گۆت: «هەر دلگرانیەك هەبیت، دڤێت تنێ ب رێكا دیالۆگێ چارەسەر بیت، نەك ب گڤاشتنان و بڕینا بودجەی».

ئەندامەكێ دەستەیا كارگێڕی یا مەكتەبا سیاسی یا پارتی دیموكراتی كوردستان رادگەهینیت، ئیراق خودانا هەموو پێدڤیێن گەشەپێدانێ یە، بەلێ ب دەست قەیرانا سەركردایەتیێ دنالیت. هەڤدەم ئاشكرا دكەت كو 182 پەرلەمانتارێن ئیراقێ ل بەرە فەریزەیا حەجێ ب جهـ بینن، هەكە ئەڤ چەندە روو بدەت، حوكمەتا ئیراقێ ب زوویی ناهێتە پێكئینان.
د دەمێ پشكداریكرنا وی د پانێلەكێ دا ل ژێر ناڤێ «دیالۆگا ئیراق 2026»، كو ژ ئالیێ جڤاتا ئاتلانتیك ل واشنتۆنێ هاتبوو رێكخستن، هشیار زێباری، ئەندامێ دەستەیا كارگێڕییا مەكتەبا سیاسی یا پارتی دیموكراتی كوردستان، وەك سیاسەتمەدارەك و كەسەكێ خودان ئەزموون د پرۆسەیا حوكمڕانییا ئیراقێ دا، ئاخڤتەكەرێ سەرەكی یێ دیالۆگێ بوو، كو تێدا باسێ پرسێن نوكە یێن ناڤخۆیا ئیراقێ و دەڤەرا رۆژهەلاتا ناڤین هاتە كرن.
هشیار زێبارێ د چارچۆڤەیا وی پەنەلی دا، شرۆڤەیەكا گشتگیر بۆ بارودۆخێ ئەمنی و سیاسی یێ ئیراقێ، پێگەهێ هەرێما كوردستانێ و ئالۆزیێن ل هەمبەر پێكئینانا حوكمەتا نوو یا ئیراقێ دیار كر.
د دەسپێكا ئاخڤتنێن خۆ دا، زێباری دوپاتی ل سەر پرەنسیپێن نەگهۆڕ یێن هەرێمێ كر و راگەهاند: «هەرێما كوردستانێ پشكەكە ژ ئارامییا دەڤەرێ و نابیتە مەترسی بۆ سەر چو ئالییان».
هەروەسا گۆت: «د دەمێ شەڕێ 40 رۆژی یێ د ناڤبەرا ئەمریكا و ئیرانێ دا، هەژمارەیا وان هێرشێن ژ ئالیێ ئیرانێ و میلیشیایێن ئیراقی ڤە بۆ سەر هەرێما كوردستانێ هاتینە كرن بێوێنە بوون، بەلێ ئەڤێ چەندێ دیار كر كو كوردستان و حوكمەتا هەرێمێ پشكەكن ژ ئاسایشا رەها یا دەڤەرێ، ژبەر هندێ مە شییا هەڤسەنگیێ بپارێزین و نەبینە پشكەك ژ وێ شەڕی».
دەربارەی رۆلێ هێزێن نێڤدەولەتی د وێ قەیرانێ دا، ئەندامێ دەستەیا كارگێڕی یا مەكتەبا سیاسی یا پارتی، دەستخۆشی ل هەڤپەیمانان كر و رۆهن كرەڤە: «دۆستێن مە یێن ئەمریكی هاریكارێن مە بوون و پشتڕاستی دانە مە كو ل گەل مە د راوەستیاینە، وان بەرگری ژ بەرژەوندیێن خۆ و هەرێما مە كر و هەتاكو قوربانی ژی دان».
ئاشكرا ژی كر كو «د ئەنجامێ وان هێرشان دا دوو سەربازێن فرەنسی گیانێ خۆ ژ دەست دان، هەروەسا بریتانی ژی گەلەك هاریكار بوون دا كو بشێین پێكڤە بەرگریێ ژ هەرێما كوردستانێ بكەین».
هشیار زێباری، د پشكەكا دی یا ئاخڤتنێن خۆ دا ئاماژە ب وێ چەندێ كر، بۆ هندێ ئیراق بەرەڤ پێش بچیت، پێدڤی ب ئارامییا سیاسی هەیە.
گۆت ژی: «د دەمێ شەڕێ د ناڤبەرا ئەمریكا و ئیرانێ دا، وەلاتێن كەنداڤی وەسا هزر دكر كو ئیراق ببوو ژێدەرێ نەبنەجهیێ نە تنێ بۆ خەلكێ خۆ، بەلكو بۆ جیرانێن خۆ ژی، ب تایبەت دەما میلیشیایان هێرش كریە سەر كوەیت، ئیمارات، سعوودیە و ئوردنێ».
زێباری پرسیارەك بلند كر و گۆت: «ئەو وەلاتە دێ چەوا جارەكا دی باوەریێ ب ئیراقێ دەنەڤە و دێ چەوا پەیوەندییان د گەل وەلاتەكێ وەسا دا دروست كەنەڤە؟ خودێ مەزن هەموو تشت داینە ئیراقێ؛ سامان، جوگرافییا و خەلكەكێ رەوشەنبیر، بەلێ ئەوا د سالێن بۆری دا نەبوی، سەركردایەتییەكا درست بوو».
دەربارەی مەیدانا سیاسی یا نوكە یا ئیراقێ، زێباری هیڤی خواست كو «كابینەیا نوو یا حوكمەتا ئیراقێ بهێتە پێكئینان، هەتاكو هەكە پشكەكا بچووك ژی بیت»، هەروەسا ئۆمێد خواست كو «ناكۆكیێن ل سەر وەزارەتا پەترۆلێ و بابەتێن دی ب زوویی بهێنە چارەسەركرن».
بەلێ د هەمان دەم دا هۆشداری دا ژ گیرۆبوونا پرۆسەیێ ب ئەگەرەكێ نەچاڤەڕێكری و راگەهاند: «182 پەرلەمانتارێن ئیراقێ ل بەرە فەریزەیا حەجێ ب جهـ بینن، هەكە ئەڤ چەندە روو بدەت، ب پشتڕاستی حوكمەتا ئیراقێ ب زوویی ناهێتە پێكئینان».

وەزیرێ دەرڤە یێ ئیراقێ دبێژیت، حوكمەتا نوو یا ئیراقێ یا جودایە و بەرنامەیێ خۆ یێ هەی؛ ئاماژێ ب وێ چەندێ ژی دكەت كو «ب پشتەڤانییا خودێ، پەیوەندیێن د ناڤبەرا هەولێر و بەغدایێ دا د ڤێ حوكمەتێ دا دێ باش بن».
د. فوئاد حوسێن، وەزیرێ دەرڤە یێ ئیراقێ د رێورەسمێن دەستبكاربوونا خۆ دا وەك وەزیرێ دەرڤە د حوكمەتا نوو یا ئیراقێ دا، گۆت: «هەر حوكمەتەكێ كار و بەرنامەیێ خۆ یێ هەی. قۆناغ ژی یا جودایە. ب پشتەڤانییا خودێ، ئەم هەموو دێ كار كەین بۆ سەركەفتنا ڤێ حوكمەتێ دا كو د خزمەتا خەلكێ ئیراقێ دا بیت. ب حەزا خودێ، پەیوەندیێن هەرێما كوردستانێ و بەغدایێ دێ باش بن».
پشتی روونشتنا رۆژا پێنجشەمبییا دەربازبووی یا جڤاتا نوونەرێن ئیراقێ و دەنگنەدان ب پشكەك ژ بەربژاران، نوكە بزاڤەك بۆ دروستكرنا هەڤپەیمانییەكێ ب ناڤێ (هەڤپەیمانییا هێزان) یا هەی. ل سەر ڤێ چەندێ فوئاد حوسێن گۆت: «پارتێن سیاسی مژوەلن، روونشتنێن زۆر دهێنە ئەنجامدان، نزانم دێ ناڤێ وێ چ بیت، كۆمەكا هێزان مژوولی پێكئینانا هەڤپەیمانییەكێ یان تێكگەهشتنەكێ نە».
دەربارەی وێ چەندێ كا ئەرێ پارتی دیموكراتی كوردستان دێ چیتە د ناڤ وێ هەڤپەیمانیێ دا، فوئاد حوسێن كو د هەمان دەم دا ئەندامێ مەكتەبا سیاسی یا پارتی یە گۆت: «نزانم، نوكە ڤەخواندن ل سەر دهێتە كرن».
فوئاد حوسێن ل سەر رەوشا دەڤەرێ ژی ئاخڤت و گۆت: «د حەفتیێن دوماهیێ دا پەیوەندی ب تایبەتی پەیوەندیێن ل گەل وەلاتێن كەنداڤی بوونە قۆربانیێن شەڕێ دەڤەرێ. ب هێزكرنا وان پەیوەندییان كارێ ب لەز یێ وەزارەتێ یە، ئێكسەر دێ كار بۆ باشكرنا وان پەیوەندییان كەین. پەیوەندی نەهاتینە بڕین، بەلێ هندەك كێشە ل ڤان دوماهییان پەیدا بوون، بەری پێكئینانا ڤێ حوكمەتێ. ب پشتەڤانییا خودێ، ئەم د بەرهەڤییان دانە بۆ باشكرنا وان پەیوەندییان».
شەڕێ ئەمریكا و ئیسرائیل دگەل ئیرانێ ل 28ێ شوباتێ دەستپێكر و پشكەك ژ گروپێن چەكدارێن ئیراقێ ژی چوونە د ناڤ شەڕی دا.
ل دووڤ راپۆرتەكا رۆژنامەیا (وول ستریت جۆرنال) یا ئەمریكی كو رۆژا 21ێ نیسانا 2026ێ هاتییە بەلاڤكرن، نیڤا وان هزار هێرشێن درۆنی یێن د دەمێ شەڕی دا ئاراستەی سعۆدیێ هاتینە كرن، ژ ناڤ ئاخا ئیراقێ بوون.

دیدار/ دلۆڤان ئاكرەیی

ئەندامەكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ دیار كر، پارتی دیموكراتی كوردستان دژی دەرنەچوونا بەربژارێ خۆ بۆ وەزارەتا ئاڤادانكرن و ئاكنجیبوونێ ل جڤاتا نوونەرێن ئیراقێ دێ هەلوەستەكێ وەرگریت و نەرازیبوونا خۆ ل هەمبەر سەرۆكێ جڤاتا نوونەران دیار دكەت، كو ژبەر مەرەم و ئەگەرێن سیاسی دەنگ ب بەربژارێ وان نەهاتییە دان.
سەلوان تاها ئاكرەیی، ئەندامێ فراكسیۆنا پارتی دیموكراتی كوردستان ل جڤاتا نوونەرێن ئیراقێ بۆ ڕۆژنامەیا (ئەڤرۆ) گۆت: «ئەم د ناڤ فراكسیۆنا پارتیدا مژوولی دانوستاندناینە ل دۆر وێ چەندا ل جڤاتا نوونەرێن ئیراقێ روودای و دەربازنەكرنا بەربژارێ مە؛ ئێك ژ بژاردەیێن مە ئەوە كو ئەم سكالایەكێ ل دادگەها بلندا فیدرالی دژی سەرۆكێ جڤاتا نوونەران تۆمار بكەین و تانەیێ ل بڕگەیا دەنگدانێ ب رێباز حەملان، بەربژارێ وەزارەتا ئاڤادانكرن و ئاكنجیبوونێ بدەین. پرۆسەیا خواندنا ناڤێ وی و دەنگدانێ تنێ حەفت چركە بوون و سەرۆكێ جڤاتا نوونەران زوو راگەهاند كو دەنگێن پێدڤی نەئیناینە. هەكە فراكسیۆنا پارتی بڕیارێ نەدەت پەنایێ ببەینە بەر دادگەها بلندا فیدرالی، وێ دەمی ئەم نەچارین ل گۆرەی یاسایێ رێباز حەملانی ژ بەربژاربوونێ ڤەكێشین و كەسایەتییەكێ دی بەربژار كەین».
ل دۆر هەلوەستێ ئالییێن دی یێن سیاسی، ئاكرەیی گۆت: «هەڤپەیمانییا دەولەتا یاسا ب سەرۆكاتییا نووری مالكی ژی ب نیازە ب هەمان شێوە سكالایێ ل دادگەها بلندا فیدرالی ل سەر بڕگەیێن دەرنەچوونا هەردوو بەربژارێن خۆ بۆ وەزارەتا ناڤخۆ و وەزارەتا خواندنا بلند تۆمار بكەت. جودا ژ پارتی و دەولەتا یاسایێ، هەڤپەیمانییا عەزم ژی ب سەرۆكاتییا موسەننا سامەڕایی دژی سەرۆكێ جڤاتا نوونەران دەست ب لڤینان كرییە و بڕیارە ل دادگەها فیدرالی سكالایێ دژی هەیبەت حەلبووسی، سەرۆكێ جڤاتا نوونەران ل دۆر بڕگەیا دەنگدانێ ب وەزیرێ وان تۆمار بكەن».
ل دوماهییێ، ئاكرەیی ئاماژە ب دەمێ روونشتنێن داهاتی كر و گۆت: «رەنگە دەنگدان ل سەر بەربژارێن وان نەهـ وەزارەتێن ماین بكەڤیتە مەها تەمووزێ ژبەر جەژنا قوربانێ و بێهنڤەدانا یاسادانانێ یا جڤاتا نوونەران».

ل ڕۆژا شەمبیێ 16 گولانا 2026ێ، سەرۆك مەسعود بارزانی پێشوازی ل مەتڕان میرۆسلاڤ ڤاچۆڤسكی بالیۆزێ نوو یێ ڤاتیكانێ ل ئیراقێ كر و د دیدارەكێ دا هەردو ئالییان باسێ پەیوەندیێن دۆستانە و بارودۆخێ پێكهاتەیان ل هەرێما كوردستانێ كر.
د ڤێ دیدارێ دا بالیۆزێ نوو یێ ڤاتیكانێ كەیفخۆشیا خۆ بۆ سەرەدانا هەرێما كوردستانێ دیار كر و سوپاسی و پێزانینێن قەداسەتا پاپای و ڤاتیكانێ گەهاندنە سەرۆك بارزانی و گەل و حوكمەتا هەرێمێ كو د دەمێن دژوار و تەنگاڤیێ دا دەرگەهێن خۆ بۆ خەلكێ لێقەومایی یێ دەڤەرێن دی یێن ئیراقێ ب گشتی و مەسیحییان ب تایبەتی ڤەكرینە و د هەوارا وان چووینە. هەروەسا ناڤبری دەستخۆشی ل فەرهەنگا جوان یا پێكڤەژیانێ و هەڤدووقەبوولكرنێ ل هەرێما كوردستانێ كر كو تێدا هەموو پێكهاتە هەست ب ئارامی و تەناهیێ دكەن، و سوپاسییا حوكمەتا هەرێمێ كر بۆ پشتەڤانیكرنا ئاڤاكرنا زانكۆیا كاتۆلیكی و نەخۆشخانەیا عەنكاوە و قوتابخانەیێن تایبەت ب مەسیحییان ڤە دا كو بشێن ب زمانێ دایكێ بخوینن. بالیۆزێ ڤاتیكانێ ئاماژە ب سەرەدانا دیرۆكی یا سەرۆك بارزانی بۆ ڤاتیكانێ و سەرەدانا (پاپا فرانسیس)ی بۆ هەرێما كوردستانێ ژی كر وەك نیشانەكا بهێز بۆ پەیوەندیێن ناڤبەرا هەردو ئالییان.
ژ ئالیێ خۆ ڤە سەرۆك مەسعود بارزانی پیرۆزباهییا دەستبكاربوونا بالیۆزێ نوو یێ ڤاتیكانێ كر و پشتەڤانییا خۆ بۆ سەرئێخستنا ئەركێ وی دوپات كر، و ئاماژە ب وێ چئەندێ دا كو پێكڤەژیان ل هەرێما كوردستانێ بوویە كولتوورەك كو كوردستانی شانازیێ پێ دكەن و دێ هەموو بزاڤان كەن ئەڤ فەرهەنگە بەردەوام بیت و بهێتە پێشئێخستن. هەروەسا سەرۆك بارزانی رۆناهی ئێخستە سەر قوربانیدانێن هێزێن پێشمەرگەی د شەڕێ دژی تیرۆرستێن داعشێ دا كو ب بێ جوداهی هەمووپێكهاتێن ئایینی و نەتەوەیی پاراستینە و د ڤێ رێكێ دا هەژمارەكا زۆرا پێشمەرگەیان گیانێ خۆ فیدا كریە.
د دووماهیا دیدارێ دا سەرۆك بارزانی سوپاسییا قەداسەتا پاپای و حوكمەتا ڤاتیكانێ كر بۆ پشتەڤانییا وان یا بەردەوام بۆ هەرێما كوردستانێ و هیڤی خواست قەداسەتا پاپای ل داهاتی دا سەرەدانا ئیراقێ و هەرێما كوردستانێ بكەت.

پشتی وەرگرتنا باوەریێ ژ ئالیێ جڤاتا نوونەرێن ئیراقێ ڤە، سەركردایەتییا سیاسی یا هەرێما كوردستانێ ب گەرمی پیرۆزباهی ل عەلی فالح ئەلزەیدی كر ب هەلكەفتا دەستبەكاربوونا وی وەك سەرۆك وەزیرێن فیدرال.
د ڤێ چارچۆڤەیێ دا، سەرۆك مەسعود بارزانی د پەیوەندییەكا تەلەفۆنی دا، پیرۆزباهی ل عەلی فالح ئەلزەیدی كر و هیڤییا سەركەفتنێ د ئەركێ وی یێ نوو دا بۆ خواست. سەرۆك بارزانی د پەیوەندییا خۆ دا پشتەڤانییا خۆ بۆ سەرئێخستنا كارێ كابینەیا نوو دیار كر.
ژ ئالییەكێ دی ڤە، نێچیرڤان بارزانی، سەرۆكێ هەرێما كوردستانێ، كو بخۆ بەرهەڤی روونشتنا جڤاتا نوونەران ببوو بۆ باوەریدان ب حوكمەتا نوو، د پەیامەكێ دا ل سەر تۆڕا جڤاكی یا (X) خۆشحالییا خۆ ب پێكئینانا كابینەیا نوو دیار كر و راگەهاند: «هیڤیخوازم ئەڤ حوكمەتە ب رەنگەكێ كار بكەت كو خزمەتا هەموو پێكهاتەیێن گەلێ ئیراقێ بكەت و خواستێن وان بۆ ئاسایش، ئارامی و ئاڤەدانیێ بجهـ بینیت».
هەروەسا، مەسرور بارزانی، سەرۆكێ حوكمەتا هەرێما كوردستانێ، د پەیامەكێ دا پیرۆزباهی ل عەلی فالح ئەلزەیدی كر و هیڤیخواست ئەڤ قۆناغە ببیتە دەسپێكەكا نوو بۆ بنەجهكرنا ئاشتیێ ل ئیراقێ.
سەرۆكێ حوكمەتا هەرێمێ دوپاتی ل سەر گرنگییا چارەسەركرنا هەموو كێشەیێن هەلاویستی د ناڤبەرا هەولێر و بەغدایێ دا كر، ل سەر بنەمایێ بجهئینانا دەستووری و ب هێزكرنا پەیوەندیێن دووقۆلی.
ئەڤ پیرۆزباهییە د دەمەكێ دانە كول رۆژا پێنجشەمبییا بۆری جڤاتا نوونەرێن ئیراقێ ب زۆرینەیا دەنگان باوەری دا كارنامە و پێكهاتەیا حوكمەتا عەلی فالح ئەلزەیدی، كو تێدا 14 وەزیران باوەری وەرگرت.