سكرتێرێ جڤاتا وەزیرێن هەرێما كوردستانێ ئاشكرا دكەت كو ئاریشەیێن تایبەت ب مووچەی و پەترۆلێ ل دگەل حوكمەتا فیدرالی یا ئیراقێ بەر ب چارەسەرییا دویماهیێ دچن، راگەهاند ژی كو ب ڤی مەرەمی شاندەكێ حوكمەتا هەرێما كوردستانێ دێ سەرەدانا بەغدا كەت.
د. ئامانج رەحیم، سكرتێرێ جڤاتا وەزیرێن هەرێما كوردستانێ راگەهاند: «پشتی رێككەفتنا سێ ئالی، ئاستێ بەرهەمئینانا پەترۆلا هەرێما كوردستانێ زێدە بوویە و گەهشتییە نێزیكی 220 بۆ 230 هزار بەرمیلان د ڕۆژەكێ دا».
هەڤدەم بزاڤ بەردەوامن داكو كۆمپانیێن پەترۆلێ ڤەگەرن سەر ئاستێ بەرهەمئینانێ یێ بەرێ، ب مەرەما زێدەكرنا داهاتێ گەنجینەیا گشتی یا ئیراقێ. سەبارەت ب دۆسیەیا مووچەی و بودجەی، ئامانج رەحیم گۆت: «سێ بابەتێن سەرەكی یێن كو دۆسیەیا پەترۆلێ، داهاتێن نە پەترۆلی و سیستەمێ ئەسێكۆدا (سیستەمێ گومرگیێ ئەلیكترۆنی) ب خۆ ڤە دگرن، بەر ب چارەسەریێ دچن. بریارە ل ڤێ حەفتیێ شاندەكێ حوكمەتا هەرێما كوردستانێ سەرەدانا بەغدا بكەت بۆ ئەنجامدانا دانوستاندنێن دووماهیێ ل سەر ڤان مەلەفان».
سكرتێرێ جڤاتا وەزیران رۆهن كر: «ب چارەسەركرنا ڤان دۆسیەیان، پرسا مووچەی دێ ب تەمامی بنەجه بیت وئێدی نابیتە سەردێرا سەرەكی یا میدیایان، بەلكو دێ ب شێوەیەكێ رێكوپێك هێتە پارڤەكرن. پارڤەكرنا مووچەیێ مەها پێنجێ د دەمێ خۆ دا و هەڤشێوەی دەڤەرێن دی یێن ئیراقێ، ئێكەم ئەزموونا سەركەفتی یا بنەجهكرنا مووچەی بوو، ئەم دێ هەموو بزاڤەكێ كەین داكو ئەڤ پرۆسە بەردەوام بیت».

سڕی ساکیک ئەندامێ پەرلەمانێ تورکیا راگەهاند کو، هەر رۆژ بەرپرسێن تورکیا بەحسێ ئاشتیێ دکەن، لێ ئاشتی تنێ ب گۆتنان بجه ناهێت و دڤێت ژ بۆ ئاشتیێ ب کریاری هندەک تشت بهێنە کرن، بابەت تنێ راگرتنا شەڕی نینە، بەلکو بابەت مافێن گەلێ کوردە ل تورکیا، هەکە بەرپرسێن تورکیا بخوازن ئاشتی ل تورکیا بهێتە بجهئینان دڤێت راستیا گەلێ کورد بهێتە قەبوول کرن، دڤێت د دستوورێ تورکیا دا هەبوونا گەلێ کورد بهێتە قەبوول کرن و گۆت: (مخابن هەتا نها ژی ب کریاری چو بۆ ڤێ یەکێ نەهاتیە کرن و هەر رۆژ بەرپرسێن تورکیا دبێژن قووناغا تورکیا بێ تیرۆر، ئانکۆ ب کورتی دخوازن کوردان بخاپینن، لێ دڤێت ئەو ژی باش بزانن کو سەردەمێ خاپاندنا کوردان ب دووماهی هاتیە).
ناڤهاتی د بەردەوامیا ئاخڤتنا خوە دا ئەو یەک ژی دیار کر، ئەڤرۆکە کورد گەلەک هشیارن و شەڕی بۆ دەستڤەئینانا مافێن خوە یێن رەوا دکەن، دێ وی دەمی ل تورکیا ئارامی هەبیت دەمێ کورد ژی بگەهنە هەموو مافێن خوە، نابیت ل ژێر ناڤێ ئاشتیێ بزاڤا خاپاندن و بێدەنگکرنا کوردان بهێتە کرن، ئەو یەک ب چو رەنگەکێ ناهێتە قەبوول کرن و گۆت: (من بەری دەمەکێ ب ئاشکرا داخواز ژ سەرۆک کۆمارێ تورکیا بەرێز ئەردۆغانی کر کو ب کریاری کار بۆ چارەسەرکرنا پرسا کوردی بهێتە کرن، دڤێت هندەک تشت بهێنە کرن دا باوەری بۆ کوردان دروست بیت، چونکی هەتا نها ژی باوەریا کوردان ب دەولەتا تورکیا نینە و دەمێ باوەری نەبیت گەلەک زەحمەتە بەحسێ ئاشتیێ بهێتە کرن).
سڕی ساکیک د پشکەکا دی یا ئاخڤتنا خوە دا ئەو یەک ژی دیار کر، کوردان دڤێت ل وەلاتەکێ دا بژین کو رێز ل وان بهێتە گرتن، ئەو بگەهنە هەموو مافێن خوە و ئێدی زۆرداری ل وان نەهێتە کرن، مخابن نها تشتەک وەسا نینە، هێشتا ژی راستیا کوردان نەهاتیە قەبوول کرن و گۆت: (ئاشتی دەمەکێ دێ واتەیا خوە هەبیت کو کورد ژی وەکو تورکان بگەهنە هەموو مافێن خوە، هێشتا زۆرداری ل کوردان دهێتە کرن و ئاستەنگی ل هەمبەر پەروەردەیا ب زمانێ کوردی هەنە، ب هزاران سیاسەتمەدارێن کورد د زیندانان دانە، هەتا رەوش وەسا بیت کەس نەشێت بەحسێ ئاشتیێ بکەت، ئاشتی و پێکڤەژیان دێ دەمەکێ واتەیا خوە هەبیت کو کورد ژی وەکو تورکان بن).
ئەندامێ پەرلەمانێ تورکیا ئەو یەک ژی نەڤەشارت کو هێشتا ژی گەلەک کەس ل تورکیا وەسا دبینن دڤێت ب شەڕی و کوشتنێ ل گۆر خوە پرسا کوردی چارەسەر بکەن، هێشتا ژی گەلەک سیاسەتمەدار وەسا دبینن کو تورک مللەتێ سەرەکی یە و دڤێت کورد ب رەوشا خوە یا نها رازی بن و گۆت: (هزرکرنێن وەسا گەلەک مەترسیدارن و کەسێن کو خوەدان هزرێن وەسا بن نەشێن ئاشتیێ دروست بکەن، ئاشتی و ئارامی و پێکڤەژیان بۆ تورکیا گەلەک گرنگە، چونکی بێی چارەسەرکرنا پرسا کوردی نە رەوشا تورکیا ئارام دبیت و نە ژی کەس دشێت بەحسێ ئاشتیێ و پێکڤەژیانێ بکەت).

ئەحمەد داودئۆغلو، سەرۆكێ پارتییا ئاییندەیا توركیا، د هەڤپەیڤینەكا تایبەت دا ل گەل كەنالێ «كوردستان24» رۆناهی ئێخستە سەر سەرەدانا خۆ یا بۆ هەرێما كوردستانێ و دوپاتی ل سەر گرنگییا هەبوونا پێگەهەكێ بهێز یێ كوردان ل بەغدا كر.
داودئۆغلو سیاسەتا بێلایەنانەیا هەولێرێ ل هەمبەر ململانێیێن دەڤەرێ ب «دروست» ناڤ كر و دیار كر، كو بڕیارێن حەكیمانە یێن سەرۆك مەسعود بارزانی بووینە قەلغانەك ژ بۆ پاراستنا هەرێما كوردستانێ ژ ئالۆزیێن شەڕی.
ناڤبری ئاماژە ب وێ چەندێ ژی كر، كو سەرۆك بارزانی ب تنێ سەركردەیێ سیاسی یێ كاریگەرە ل دەڤەرێ، یێ كو ژ سالا 1991ێ وەرە هەموو گۆڕانكاریێن دەڤەرێ دیتینە و ئەزموونا وان هەیە».
داودئۆغلوی، توركیا و هەرێما كوردستانێ وەك دوو هەڤپشكێن ستراتیژی دیتن و دووپات كر كو ئاشتی د ناڤبەرا هەردوو ئالییان دا یا پێشكەفتی یە. هەروەسا ل سەر ئاستێ ناڤخۆیی یێ توركیا ژی، داخوازا لادانا ئاستەنگێن ل هەمبەر زمانێ كوردی و ب دووماهی ئینانا سیستەمێ قەیومی كر ژ بۆ ئاڤاكرنا دەستوورەكێ دیموكراسی.
سەرۆكێ پارتییا ئاییندە یا توركی دوپاتی ل وێ چەندێ كر كو هەلوەشاندنا گرۆپێن چەكدار د ئیراقێ دا، مەرجێ سەرەكی یێ ئارامییا سیاسی و پێشئێخستنا ئابۆری یە. ناڤبری گۆت ژی: «ل هەر جهەكێ لەشكەرێ فەرمی هەبیت، نابیت گرۆپێن چەكدار هەبن».
داودئۆغلوی داخواز ژ پارتی و ئێكەتی كر كو بۆچوونێن جودا ل ئالییەكێ دابنێن و پێكڤە ل بەغدا كار بكەن، چونكو رۆلێ پارتی دیموكراتی كوردستانێ وەك هێزەكا كاریگەر ل بەغدا یێ گرنگە. هەروەسا رەخنە ل كابینەیا نوو یا حوكمەتا ئیراقێ گرت كو پۆست نەدایە پێكهاتەیا توركمان و داخواز كر نوونەرایەتییا كورد ل بەغدا یا بهێز بیت.
ل دووماهییا هەڤپەیڤینێ دا، داودئۆغلوی مللەتێ كورد بلند هەلسەنگاند و گۆت: «كورد مللەتەكێ مەرد و ئازایە، ئەوێن كوردان ب توندوتیژ دبینن، ژ جەوهەرێ ڤی مللەتی نەگەهشتینە».
ناڤبری ب سۆزەكا خۆش ب دووماهی ئینا و گۆت: «ئینشائەللا د هەڤپەیڤینا داهاتی دا دێ ب زمانێ كوردی ل گەل هەوە ئاخڤم».

ل رۆژا چارشەمبی، 10/6/2026، ب سەرپەرشتییا مەسرور بارزانی، سەرۆكێ حوكمەتا هەرێما كوردستانێ و بەرهەڤبوونا قوباد تالەبانی، جێگرێ سەرۆكێ حوكمەتا هەرێمێ، جڤاتا وەزیرێن هەرێما كوردستانێ كۆمبوو و چەند پرسێن گرنگ یێن گرێدای ب پەیوەندیێن هەولێرێ و بەغدایێ، دۆسیەیا پەترۆلێ و داهاتان ڤە هەنە، گەنگەشە كرن.
پێكئینانا دەستەیەكا بلند یا هەماهەنگیێ:
د پشكا ئێكێ یا كۆمبوونێ دا، مەسرور بارزانی، سەرۆكێ حوكمەتا هەرێمێ رۆناهی ئێخستە سەر دووماهی سەرەدانا خۆ یا بۆ بەغدایێ و گرنگییا دانانا نەخشەڕێیەكێ بۆ بەردەوامیدان ب دانوستاندنێن د ناڤبەرا هەردوو حوكمەتان دا. د ڤی چارچۆڤەی دا، سەرۆكێ حوكمەتا هەرێمێ پێشنیازا پێكئینانا «دەستەیەكا بلند یا وەزاری یا هەماهەنگییا بەردەوام» كر، كو ژ وەزیر و بەرپرسێن پەیوەندیدارێن هەردو حوكمەتان پێكبهێت.
قوباد تالەبانی، جێگرێ سەرۆكێ حوكمەتا هەرێمێ ژی پشتەڤانییا خۆ بۆ ڤێ پێشنیازێ دیار كر و راگەهاند، ئەڤ پێنگاڤە دێ بیتە ئەگەرێ ب دەزگەهكرنا چارەسەركرنا ئاریشەیان و رۆلەكێ ئەرێنی د ناڤبەرا هەردوو ئالییان دا دبینیت. جڤاتا وەزیران پێشنیاز پەسەند كر و بڕیار دا ئاراستەی حوكمەتا فیدرال بكەن.
دۆسیەیا پەترۆلێ:
جڤاتا وەزیران دوپاتی ل سەر پشتەڤانیكرنا حوكمەتا نوو یا فیدرال ب سەرۆكایەتییا «عەلی ئەلزەیدی» كر بۆ رووبڕووبوونێ ل گەل ئاستەنگێن دارایی. هەروەسا وەزیرێ سامانێن سروشتی و شاندێ دانوستاندكار راسپارد، رێكارێن خۆ بلەزتر بكەن داكو ب رێیا بۆرییا پەترۆلا هەرێمێ، هنارتن ل بلندترین ئاست دەستپێبكەتەڤە و داهات ژی بچیتە گەنجینەیا فیدرال. دوپاتی ل وێ چەندێ ژی كر كو دڤێت كۆمپانیێن پەترۆلێ د چەند رۆژێن داهاتی دا دەست ب بەرهەمئینانێ بكەن، پشتی كو حوكمەتا فیدرال پشتڕاستی ل سەر پاراستنا ئاسایشا كەرتێ وزەیێ و قەرەبووكرنا زیانان دای.
داهات و سیستەمێ ئەسیكۆدا:
د تەوەرا دووماهیێ دا، پرسا داهاتێن ناڤخۆ و بجهئینانا سیستەمێ «ئەسیكۆدا» هاتە گەنگەشەكرن. وەزیرێ دارایی راپۆرتەك ل سەر داهاتێن پێنج مەهێن ئێكێ یێن 2026ـێ پێشكێش كر، كو تێدا ئاماژە ب داكەفتنا داهاتی ب رێژەیا پتر ژ 70% كر، ئەڤە ژی ژ بەر بارودۆخێ دەڤەرێ و شەڕی.
جڤاتا وەزیران داخواز ژ حوكمەتا فیدرال كر، پێداچوونێ ب گۆژمەیێ 120 ملیار دیناران دا بكەت یێن وەكی پشكا گەنجینەیا فیدرال هاتینە دیاركرن. هەروەسا داخواز كر كو ل نێزیكترین دەرفەت، جڤاتا وەزارییا فیدرال بۆ كاروبارێن ئابۆری، وێ تێگەهشتنا دەستپێكێ یا د مەها نیسانێ دا هاتییە ئیمزاكرن پەسەند بكەت، داكو داهاتێن دەروازەیێن سنۆری زێدە ببن و بازاڕ پێش بكەڤیت.

فازل میرانی، بەرپرسێ دەستەیا كارگێڕییا مەكتەبا سیاسییا پارتی دیموكراتی كوردستانێ، د داخۆیانییەكێ دا ئاشكرا كر، كو پشكەك ژ ئالیێن سیاسی یێن هەرێما كوردستانێ، بەرسڤا ئەرێنی بۆ دەستپێشخەرییا سەرۆك بارزانی هەبوویە.
ل رۆژا 26 گولانا 2026ێ، ب هەلكەفتا جەژنا قوربانی، سەرۆك بارزانی داخواز ژ ئالیێن سیاسی یێن كوردستانێ كر، كو بەرژەوەندیێن خەلكێ كوردستانێ بكەنە پێش هەر تشتەكێ دی، و دەست ژ ململانێیێن بێ ئەنجام و خۆخۆریێ بینن، كو دەمەكە پڕۆسەیا سیاسی یا هەرێمێ پەكخستییە، و پشتی جەژنێ ل گەل هەڤدو كۆم ببن.
فازڵ میرانی د داخۆیانییەكا رۆژنامەڤانی دا گۆت: «هندەك ئالییان بەرسڤا ئەرێنی دایە دەستپێشخەرییا سەرۆك بارزانی، ئەم هیڤیداریین هەموو ئالی بەرژەوەندیێن نیشتمانی بكەنە پێشییا بەرژەوەندیێن كەسی، چونكو بتنێ ب ڤی شێوەی ئەم دشێین دوماهیێ ب كێشەیێن پەككەفتی بینین».
میرانی دوپاتی ل سەر بەرپرسیارییا هێزێن سیاسی ل هەمبەر گەلێ كوردستانێ كر و دیار كر، كو ئەركێ وانە قەرەبوویا چاكییا ڤی گەلێ دلسۆز بكەن و ئاسایش و ئارامیێ بۆ وان دابین بكەن، د هەمان دەم دا هیڤییا ئاشتی و پاراستنا وەلاتی خواست.
ئەڤ پەیاما فازل میرانی د دەمەكێ دایە، كو پتر ژ سالەك و حەفت مەهان ب سەر هەلبژارتنێن خولا شەشێ یا پەرلەمانێ كوردستانێ دا دەرباز بووینە، لێ هەتا نها هەرێم د چاڤەڕێیا رێككەفتنا دووماهیێ د ناڤبەرا هێزێن سەرەكی دایە.

پەیڤدارێ حوكمەتا هەرێما كوردستانێ راگەهاند، بۆ چارەسەركرنا هەر ئاریشەیەكێ و پێشئێخستنا پەیوەندییان ل گەل حوكمەتا فیدرال، دێ لیژنەیەكا بلند یا هەماهەنگیێ یا بەردەوام هێتە پێكئینان. هەروەسا دوپاتی ل وێ چەندێ ژی كر، هەرێما كوردستانێ بۆ دەربازبوونا ژ قەیرانێن دارایی، بەرهەڤییا هەموو ب ساناهی ئێخستنان دكەت بۆ دەستپێكرنا بەرهەمئینان و هنارتنا پەترۆلێ.
پێشەوا هەورامانی، پەیڤدارێ حوكمەتا هەرێما كوردستانێ، پشتی كۆمبوونا جڤاتا وەزیران د كۆنگرەیەكێ رۆژنامەڤانی دا دیار كر، د كۆمبوونێ دا سێ تەوەرێن سەرەكی هاتینە گەنگەشەكرن: پرسا پەترۆلێ، رێكخستنا داهاتێن ناڤخۆ ب رێكا سیستەمێ «ئەسیكۆدا»، و پێكئینانا لیژنەیەكا بلند یا هەماهەنگیێ د ناڤبەرا هەولێرێ و بەغدایێ دا.
هەورامانی ئاماژە ب وێ چەندێ كر، ئەڤ لیژنەیە دەرەنجامێ سەرەدانا مەسرور بارزانی، سەرۆكێ حوكمەتا هەرێمێ بوو بۆ بەغدا و دێ لیژنەیەكا بەردەوام بیت، ئارمانجا وێ ژی ب تنێ گەنگەشەكرنا ئاریشەیان نینە، بەلكو كاركرنە بۆ بهێزكرنا هەماهەنگیێ د هەموو بواران دا.
سەبارەت ب پرسا هنارتنا پەترۆلێ، پەیڤدارێ حوكمەتا هەرێما كوردستانێ ئاشكرا كر، شاندێ هەرێمێ و كۆمپانیێن پەترۆلێ ل گەل سەرۆك وەزیرێن ئیراقێ كۆم بووینە و هەرێما كوردستانێ بەرهەڤییا هەموو جۆرە ب ساناهی ئێخستنان دكەت.
ل دۆر مەرجێن كۆمپانیێن بیانی، هەورامانی گۆت: «كۆمپانییان داخوازا گەرەنتییا ئەمنی كریە، چونكو د بۆری دا نێزیكی 33 جاران هێرش كرینە سەر زەڤیێن پەترۆلێ و غازێ ل هەرێمێ، لەورا كۆمپانییا دڤێت پشتڕاست بن كو ژ ناڤخۆیا ئیراقێ هێرش ناهێنە كرن». هەروەسا داخوازا پێداچوونێ ب تێچوویێ دەرهینانا پەترۆلێ ژی كرینە.
ل دۆر سیستەمێ «ئەسیكۆدا»، ناڤبری دوپات كر كو هەرێما كوردستانێ چو كێشە ل سەر ڤی سیستەمی نینن و بەرهەڤن، ب تنێ چاڤەڕێی تیمێ حوكمەتا فیدرالێن بۆ دیاركرنا دەمێ كۆمبوونێ.
سەبارەت ب پرۆژەیێ كارەبێ، گۆت: ئارمانجا پرۆژەیێ 24 ساتی پێشكێشكرنا كارەبێ یە ب تێچوویەكا كێمتر، و كێشەیێن تەكنیكی یێن دەستپێكی ب شێوەیەكێ قۆناغ ب قۆناغ دێ هێنە چارەسەركرن. ل دۆر كێمبوونا بەنزینێ ژی، دیار كر كو ئەڤە ئاریشەیەكا دەمكی یە و دێ ب زووترین دەم ب دووماهی هێت.

ڕۆژا سێشەمبێ 9ی حوزەیرانا 2026، ل پیرمام سەرۆک مەسعود بارزانی پێشوازی ل ڕێزدار یان برێم، کونسوڵێ فەڕەنسا ل هەولێرێ کر.
د دیدارەکێ دا، کونسوڵێ فەڕەنسا کەیفخۆشیا خۆ ب دیدارا سەرۆک بارزانی دیار کر و جەخت ل سەر بەردەوامیا وێ پەیوەندیا گرنگا مێژوویی کر د ناڤبەرا هەرێما کوردستانێ و فەڕنسا دا. هەروەسا سوپاسیا ڕۆلێ دیارێ سەرۆک بارزانی کر بۆ وان پشتەڤانیێن دابینکرین د ئاڤادانکرن و گرنگیدان ب پێشڤەچوون و بەردەوامیا پەیوەندیێن د ناڤبەرا هەردوولایان دا.
ژ لایێ خۆڤە، سەرۆک بارزانی بخێرهاتنا کونسوڵێ فەڕەنسا کر و ئاماژە ب وێ چەندێ کر کو فەڕەنسا ڕۆلەکێ دیار د مێژوویا بزاڤا ڕزگاریخوازییا گەلێ کوردستانێ دا هەبوویە و ڕۆلێ فەڕەنسا د هەمی قۆناغێن مێژووییێن گەلێ کوردستانێ دا ب گرنگ وەسف کر و ڕاگەهاند کو ئەم شانازیێ ب وان پەیوەندییان دکەین.
بارودۆخێ سیاسی و ئاڵۆزیێن دەڤەرێ ب گشتی و پرۆسەیا سیاسی ل عێراقێ و ناڤخۆیا هەرێما کوردستانێ تەوەرەکێ دی یێ وێ دیدارێ بوون.

ل رۆژا سێشەمبی، 9/6/2026، بارەگەهێ بارزانی راگەهاند؛ د سالڤەگەڕا (41) یا تۆپبارانكرنا ئۆردۆگایێ زێوە ژ ئالیێ فرۆكەیێن رژێما بەرێ یا ئیراقێ ڤە، سەرۆك بارزانی پەیامەك بەلاڤكر. تێدا وێ تاوانێ ب بەرپەڕەكێ رەش د دیرۆكا دوژمنان دا و خەمگینترین رۆژا ژیانا خۆ د هەژمێریت و رادگەهینیت، ئەو جۆرە كۆمكۆژییە نەك هەر ئیرادەیا گەلێ كوردستانێ نەشكاند، بەلكو بوونە ئەگەرێ رژدبوونێ ل سەر خەباتێ تا گەهشتن ب سەركەفتنا دوماهیێ.
دەقێ پەیاما سەرۆك بارزانی د سالڤەگەڕا تۆپبارانكرنا ئۆردۆگایێ زێوە دا:
ل 9/6/ 1985 رژێما بەرێ یا ئیراقێ تاوانەكا مەزن دژی گەلێ كوردستانێ ئەنجام دا. د وێ رۆژێ دا، فرۆكەیێن رژێمێ ب شێوەیەكێ درندانە ئۆردۆگایێ پەنابەرێن زێوە ل رۆژهەلاتێ كوردستانێ تۆپبارانكرنا و د ئەنجامێ وێ هێرشا نەمرۆڤانە دا ب سەدان ژن و زارۆك و پیر و گەنجێن بێگونەه شەهید و بریندار بوون.
كارەساتا زێوە بەرپەڕەكێ دی یێ خویناوی یە د كارنامەیا رەشا رژێما بەرێ یا ئیراقێ دا. ئەو رۆژە ئێك بوو ژ خەمگینترین رۆژێن ژیانا من. نالە و شینیا دەیكان و جەستەیێ سۆتی و پارچەپارچەكریێ شەهیدان و بریندارێن زێوە دل و دەروونێ هەر خودان ویژدانەكێ دهەژاند.
ئارمانجا رژێمێ ژ تاوانا كۆمكوژییا زێوە و تاوانێن دی، شكاندنا ئیرادەیا پەنابەر، پێشمەرگە و خەباتكارێن كوردستانێ بوو. بەلێ وان تاوانان ئیرادەیا پێشمەرگە و رۆلەیێن گەلێ كوردستانێ بۆ بەردەوامیدان ب خەباتا دژی ستەمكار و دەستهەلاتدارێن وی دەمی یێن ئیراقێ رژدتر و ب هێزتر كر. د ئەنجامێ وێ قوربانیدان و خەباتێ دا، چارەنڤیسێ ستەمكار و تاوانباران سەرشۆری و شكەستن بوو، و سەربلندی و سەركەفتن ژی بۆ گەلێ كوردستانێ ما.
د چەل و ئێكەمین سالڤەگەڕا كارەساتا زێوە دا، سلاڤان بۆ گیانێ پاقژێ شەهیدێن زێوە و هەموو شەهیدێن رێكا ئازادییا كوردستانێ دهنێرین.
دهێتە زانین بەری 41 سالان و ل 9/6/1985ێ د سەردەمێ شەڕێ ئیراق – ئیرانێ دا، فرۆكەیێن شەڕی یێن ئیراقێ ئۆردۆگایێ زێوە ل نێزیك ورمێ ل رۆژهەلاتا كوردستانێ تۆپبارانكر، كو وەلاتیێن پەنابەرێن باشوورێ كوردستانێ تێدا ئاكنجی بوون و پترییا وان بنەمال و ئەندام و لایەنگرێن پارتی دیموكراتی كوردستان بوون.
هێرش ب هەشت فرۆكەیێن (سیخۆ) یێن رژێما بەعس هاتە كرن و ب ئەگەرێ وێ 136 پەنابەرێن بێتاوان كو پترییا وان ژن و زارۆك بوون شەهید بوون و ب سەدان وەلاتیێن دی ژی بریندار بوون.