ئەڤرۆ نیوز:
وەزارەتا کارەبا حوکمەتا هەرێما کوردستانێ راگەهاند، ئەو وەلاتیێن گەلەک پارێن كارەبێ کەفتینە سەر و نەداین، دشێن ب 12 قستان وی پارەی بدەن.
وەزارەتا کارەبێ دەربارەی هەلمەتا بڕینا زێدەگاڤیان ل سەر کارەبا نیشتمانی گۆتیە، وەلاتیێن باژێرێ هەولێرێ ئاگەهدار دكەین كو پرۆسا بەستنا پیڤەرێن كارەبێ بۆ وان یەکێن ب زێدەگاڤی هاتینە دروستكرن دێ بەردەوام بیت، وەلاتی دشێن سەرەدانا فەرمانگەهێن كارەبێ بكەن بۆ بەستنا پیڤەرێ کارەبێ بێی کو بهێنە غەرامە کرن.
ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویا کرن: د روودانەکا ترافیکێ دا وەلاتیەکێ گیانێ خوە ژ دەستدا.
ناڤهاتی زێدەتر دا دیار کرن: ئەڤرۆ ئێکشەمبی 2.2.2020 د روودانەکا ترافیکێ دا ل ناڤا سەنتەرێ باژێرێ دھۆکێ دا د ناڤبەرا دو ترومبێلان دا روودایە، کو ترۆمبێلەکا تایبەت مازدا ل گەل ترۆمبێلەکا تایبەت جیب، د ئەنجامدا کەسەکێ گیانێ خوە ژ دەست دا و دو کەسێن دیتر ژی بریندار بوون، هەروەسا زیانێن مادی گەهشتنە هەردو ترۆمبێلان.
ئەڤرۆ نیوز:
هەژارێ شامل رۆژنامەڤان و نڤیسەرێ کورد ل روسیا دیار کر کو د ناڤ چەند مەهێن دووماهیێ دا بەرپرسێن بلند یێن روسیا دو جاران سەرەدانا هەرێما کوردستانێ کرینە، ئەو یەک ژی نیشا ددەت کو هەلویستێ روسیا ب رەنگەکێ باش ل هەمبەر کوردان هاتیە گوهۆرین و نها روسیا گرنگیەکا مەزن ددەتە هەرێما کوردستانێ و رۆژئاڤایێ کوردستانێ ژی.
نڤیسەرێ کورد ئەو یەک ژی دیار کر کو روسیا گرنگیەکا مەزن ددەتە رۆژئاڤایێ کوردستانێ ژی و ژ بۆ هندێ هزر و نێرینا سەرکردایەتیا کورد ل هەرێما کوردستانێ وەردگرن و سەرەدانێن ڤێ دووماهیێ ژی بۆ هندێ د گرنگن و ئەو یەک دێ بیتە ئەگەرێ هندێ کو پێگەهێ هەرێما کوردستانێ بهێز ببیت و کورد ل سووریێ ژی بگەهنە مافێن خوە، چونکو ل سووریێ چ تشتەک بێی رزامەندیا روسیا ناهێتە کرن.
ئەڤرۆ نیوز:
جۆتیار عادل پەیڤدارێ حوکمەتا هەرێما کوردستانێ راگەهاند کو دێ حوکمەت ل سەر پرۆژێ خوە یێ چاکسازیێ بەردەوام بیت، مخابن هندەک کەس و هێز ئاریشە دروست کرینە و ناهێلن غاز بگەهیتە وەلاتیان ل هەولێرێ و دهۆکێ.
فراکسیۆنا پارتی ل پەرلەمانێ کوردستانێ ژی ئەڤرۆ راگەهاند کو هندەک کەسێن مافیا ناهێلن غاز بگەهیتە وەلاتیان و ئاریشان بۆ خەلکی ل هەولێرێ و دهۆکێ دروست دکەن و ئەو یەک ژی ب چو رەنگەکێ ناهێتە قەبوولکرن و دڤێت یا پێدڤی ل دژی وان کەسان بهێتە کرن.
ئەڤرۆ نیوز:
ئه‌ڤرۆ ئێڤارى 2/ 2/2020 لدووڤ شیره‌تێن فه‌رهاد ئه‌مین ئه‌تروشى پارێزگه‌رێ دهوكێ 12كم دن یێن رێكا روڤیا گوپال ل هه‌مبه‌ر وەلاتیان هاتنه ڤه‌كرن.
ئه‌ندازیار خه‌دیجه محەمەد ئەحمەد رێڤه‌به‌را رێك وپرا ل دهوكێ ل دۆر ڤه‌كرنا وان 12 كم رێكێ گوت: لدووڤ فه‌رمانا پارێزگارێ دهۆكێ ئه‌ڤرۆ رێكه‌فتى 2-2-2020 مه 12 كم دى ژرێكا سه‌ره‌كى یا دهوك هه‌ولێر ژ روڤیا بو گوپالى ڤه‌كرن ئه‌ڤێ پارچا رێكێ گرنگیا خو هه‌یه ژبۆ هاتنوچونا گشتى و روودانێن هاتنوچونێ دێ كێمتر لێ هێن هه‌روه‌سا وەلاتى بله‌ز تر دێ شێن هاتنوچونا دهوك و هه‌ولێر كه‌ن.
سه‌باره‌ت ڤه‌كرنا هه‌موو رێكێ رێڤه‌به‌را رێك وپرا ل دهوكێ گوت: درێژیا رێكێ ل سنورێ پارێزگه‌ها دهوكێ هه‌تا سه‌ر رووبارێ زێى 21كم و 200 مترن و 26م یا فره‌هه ورێژا گشتى یا ئه‌نجامدانێ گه‌هشتیه 87% ولدوڤ به‌رنامێ كارى هه‌تا 21-3-2021دێ ب دوماهى هێت لێ ئه‌م كارێ خو بله‌زتر ئه‌نجامده‌ین مه‌لبه‌ره رێكا ناڤبرى ل سنورێ پارێزگه‌ها دهوكێ دماوێ ئه‌ڤ ساله‌دا هه‌موو بكه‌ڤیته دخزمه‌تێ دائانكو ئه‌و (5) كم ماین ژى ل ئه‌ڤ ساله دێ ب دوماهى هێن.
به‌رێ بنیاتى ل روژا 3-10-2018بورێكا ناڤبرى هاتیه دانان وبه‌رى نوكه (5)كم رێكێ ل هه‌مبه‌ر هاولاتیان هاتبونه ڤه‌كرن وئه‌ڤرو 2-2-2020 دوازده كم دن ل هه‌مبه‌ر هاولاتیان هاتنه ڤه‌كرن وب توماكرنا ڤێ رێكا ستراتیجى یا جوت سایدى دناڤبه‌را دهوك وهه‌ولێر هاتن وچون دێ بله‌زتر هێته ئه‌نجامدان ورودان ژى دێ كێمتر لێ هێن پروژه ل سه‌ر بودجا حكومه‌تا هه‌رێما كوردستانێ وژلایێ گروپێ داڤین گروپ بكوژمێ (80) ملیون دولاران دهێته ئه‌نجامدان.
ئه‌ڤرۆ نیۆز، قائید میرۆ
چه‌ند رۆژه‌كه ئاریشه‌یا نه‌بوون و بلندبوونا بهایێ غازێ ل باژێڕێ هه‌ولێرێ په‌یدابوویه و قایمقامێ هه‌ولێرێ ژی دبێژیت، هژماره‌كا چه‌كداران رێكێ ناده‌ن غاز بگه‌هیت.
نه‌به‌ز عه‌بدولحه‌مید، قایمقامێ قه‌زا هه‌ولێرێ بۆ ئه‌ڤرۆ نیۆز دیاركر” دوهی رۆژا شه‌مبی ئاریشه‌یا كێمیا غازێ هاتیه چاره‌سه‌ركرن ئینانا غازێ ب كۆمپانیه‌كادی هاتیه‌دان، به‌لێ هه‌ر دوهی هژماره‌كا چه‌كداران خودانێ كۆمپانیێ ره‌ڤاندیه و گه‌ف لێكرینه.
نه‌به‌ز عه‌بدولحه‌مید دبێژیت” داخوازێ ژ سه‌رۆكایه‌تی جڤاتا وه‌زیران دكه‌ین بۆ چاره‌سه‌ركرنا ئاریشا نه‌بوونا غازێ ل هه‌ولێرێ، چونكه نابیت وه‌لاتی باجا هنده‌ك كه‌سان بده‌ن یێن دخوازن رێگریێ بكه‌ن ل گرێبه‌ستا كۆمپانیا ڤه‌گوهاستنا غازێ.
ئه‌ڤرۆ نیوز:
وه‌زاره‌تا پترۆلا عیراقێ ته‌ڤایا فرۆتنا پترۆلا ل سالا 2019 راگه‌هاند زێده‌تری ملیاره‌ك و 250 ملیۆن به‌رمیلێن پترۆلێ فرۆتی نه و داهاتێ وان بوویه 80 ملیار دۆلار.
وه‌زاره‌تا پترۆلێ ئه‌و چه‌نده ژی دیاركر ل سالا 2019 ملیاره‌ك و 287 ملیۆن و 196 هه‌زار به‌رمیلێن پترۆلێ ره‌وانه‌ی بازاری كرینه، كۆمپانیێن چینی و هندی دیارترین كریارێن پترۆلا عیراقی نه.
ته‌ڤایا هنارتنا پترۆلا عیراقێ د هه‌یڤه‌كێ دا 107 ملیۆن و 266 هه‌زرا به‌رمیلێن پترۆلێ بوون، بڤێ چه‌ندێ د رۆژه‌كێ دا سێ ملیۆن و 460 هزار به‌رمیلێن پترۆلی هنارتینه بازاری.
وه‌زاره‌تا پترۆلا عیراقێ ئه‌و چه‌نده ژی دازانین كۆ ئه‌و پترۆلا ل 2019 دا فرۆتی، ب بهایێ 78 ملیار و 27 ملیۆن دۆلاران بوو، ئه‌ڤه ژی ته‌ڤایا داهاتی د هه‌یڤه‌كی دا دگه‌هته شه‌ش ملیار و 543 ملیۆن دۆلاران و ته‌ڤایا بهایی هه‌ر به‌رمیله‌كا پترۆلێ 61 دۆلار و شه‌ش سه‌نت بوون.
ئه‌ڤرۆ:
به‌رپرسه‌كێ پارتی دیموكراتی كوردستان ل خانه‌قین نووترین پێزانینان ل سه‌ر ره‌وشا ده‌ڤه‌رێ به‌رچاڤ دكه‌ت و به‌حسێ مه‌ترسیێن حه‌شدا شه‌عبی و داعشێ ل سنوورێ وێ ده‌ڤه‌رێ دكه‌ت.
شێخ جه‌عفه‌ر مسته‌فا، به‌رپرسێ لقێ 15 یێ پارتی دیموكراتی كوردستان ل خانه‌قین راگه‌هاند حه‌شدا شه‌عبی و داعش هه‌موو سنوورێ ده‌ڤه‌را نه‌فتخانه ل پارێزگه‌ها دیالا یا كونترۆلكری.
شێخ جه‌عفه‌ر مسته‌فا دیاركر” ره‌وشا خانه‌قینێ یا باش نینه و ترس یا ل ده‌ف خه‌لكێ وێ هه‌ی، گومان یا هه‌ی روودانێن ڤێ دووماهیێ و تێكدانا ره‌وشا ده‌ڤه‌رێ، ده‌ستێ حه‌شدا شه‌عبی تێدا هه‌بیت، چونكی خالێن پشكنینێ ددانن و یێن بووینه گرفت بۆ هاتنوچوونێ د ناڤبه‌را خانه‌قینێ و به‌عقوبه (سه‌نته‌رێ پارێزگه‌ها دیالا) دا وخه‌لك د ترسیت، پێشتر ب تنێ ب شه‌ڤێ ته‌قێ دكر، به‌لێ نوكه ب شێوه‌كێ ئاشكرا خه‌لكی دره‌ڤینن”.
به‌رپرسێ لقێ 15 یێ پارتی دیموكراتی كوردستان ل خانه‌قینێ گۆت ژی” حه‌شدا شه‌عبی و داعش یێن هاتینه ده‌ڤه‌را نه‌فتخانه و ڤێ جارێ ب چه‌كێ پێشكه‌فتی و ب هامه‌رێن له‌شكری ل نه‌فتخانه یێن جێگیر بووین و خه‌لكێ ئاكنجی د ناڤ كه‌مپان دا ژی ب به‌هانه‌یا ئه‌منی یێن ده‌ركرین و نوكه نه‌فتخانه یا بوویه دو پشك و پشكا رۆژهه‌لاتی هه‌تا مه‌ندلی هه‌موو تونێلێن داعشێ نه و ل رۆژئاڤا و جهێن دی ژی چه‌كدارێن داعشێ یێن لێ هه‌ین و پشكه‌كا دی ژی یا د بن كونترۆلا حه‌شدا شه‌عبی دا و ده‌مه‌كه حه‌شدا شه‌عبی ژی ئالوگۆری پێ هاتیه كرن و هێزا له‌شكری یا مه‌غاویرێن فه‌وجا 3 ل وان ده‌ڤه‌ران هاتیه جێگیركرن وهه‌تا باره‌گایێ لقێ 15 ل خانه‌قینێ ژی هێز تێدا جێگیركریه”.
شێخ جه‌عفه‌ر مسته‌فا گۆت دیاركر” داعش ل ده‌ڤه‌رێن جه‌باره، قه‌ره‌ته‌په، جه‌له‌ولا، سه‌عدییه و حه‌مرین یێن به‌لاڤ بووین و ب شه‌ڤێ هاتنوچوونێ ل وان ده‌ڤه‌ران دكه‌ن و عه‌ره‌بێن سوننه ژی هاریكاریا وان دكه‌ن”.
سه‌باره‌ت هێزێن پێشمه‌رگه‌ی ل وان ده‌ڤه‌ران، وی به‌رپرسێ پارتی گۆت” ل سنوورێ لایێ دی یێ سیروان و قه‌ره‌ته‌په ژی پێشمه‌رگێ لیوایێن 3 و 5 یێن لێ هه‌ین و لیوایه‌كا هه‌ڤپشك ژی ل ره‌خێ دی یێ سیروان و باره‌گایێ باوه مه‌حموود یا هه‌ی كو تێكهه‌له د ناڤبه‌را پێشمه‌رگه‌ی و حه‌شدا شه‌عبی، به‌لێ پێشمه‌رگه گۆمانێ ژ حه‌شدا شه‌عبی دكه‌ت چونكی باوه‌ری پێ نینه و یێن د ئاماده‌باشیێ دا”.
ئه‌ڤرۆ:
نڤیسینگه‌ها فه‌رماندێ گشتیێ هێزێن چه‌كدار ل عیراقێ به‌رده‌وامیا كاركرنا هێزێن عیراقی ل گه‌ل هه‌ڤپه‌یمانیا نێڤده‌وله‌تی راگه‌هاند.
نڤیسینگه‌ها فه‌رماندێ گشتیێ هێزێن چه‌كدار ل عیراقێ د به‌یاننامه‌كێ دا دیاركر كو بریار هاته دان كارێ هه‌ڤپشك ل گه‌ل هه‌ڤپه‌یمانیا نێڤده‌وله‌تی بهێته كرن كو دبیاڤێ ئه‌سمانی دا ئاسانكاریا پێشكێشی هێزێن عیراقی دكه‌ت.ئه‌وژی ل دووڤ پێدڤیا هێزێن عیراقێ كو فه‌رماندێن ئۆپه‌راسیۆنێن په‌یوه‌ندیدار دیار دكه‌ن، كاركرنی ژی ل گه‌ل هه‌ڤپه‌یمانیا نێڤده‌وله‌تی دێ به‌رده‌وام بیت تاكو رێككه‌فتنه‌ك ل سه‌ر شێوازێ پێكڤه كاركرنێ ل داهاتی دهێته كرن.
ل 15 حوزه‌یرانا 2014 هه‌ڤپه‌یمانیا نێڤده‌وله‌تی دژی داعشێ ب سه‌ركێشیا ئه‌مریكا هاتبوو پێكئینان و ل سه‌ر داخوازا حوكمه‌تا عیراقێ، شه‌ر دژی داعشێ دكر.
نڤیسینگه‌ها فه‌رماندێ گشتیێ هێزێن چه‌كدار ل عیراقێ ئه‌و بریارا به‌رده‌وامیا كاركرنێ ل گه‌ل هه‌ڤپه‌یمانیا نێڤده‌وله‌تی ڤه‌گه‌راند بۆ به‌رده‌وامیا لڤینێن داعشێ ل چه‌ندین ده‌ڤه‌رێن جودا جودا ل عیراقێ و ب ده‌لیڤه دیتن ژده‌مێ مای بۆ مانا هێزێن هه‌ڤپه‌یمانیا نێڤده‌وله‌تی، به‌رێ رێكخستنا په‌یوه‌ندیه‌كا نوو د ناڤبه‌را هێزێن عیراقێ و هێزێن هه‌ڤپه‌یمانیا نێڤده‌وله‌تی.
ل ده‌ستپێكا هه‌یڤا كانوونا دویێ 2020 و ب به‌رهه‌ڤبوونا عادل عه‌بدولمه‌هدی سه‌رۆك وه‌زیرێن عیراقێ، په‌رله‌مانێ عیراقێ ده‌نگ ل سه‌ر بریاره‌كێ دا كو حوكمه‌تا عیراقی پێگیر دكه‌ت ب كاركرنێ ل سه‌ر ب دووماهی هاتنێ ب هه‌بوونا هه‌ر هێزه‌كا بیانی د ناڤ ئاخا عیراقێ دا، به‌لێ د وێ كۆمبوونێ دا فراكسیۆنێن كوردستانی و پتریا سوننه‌یان پشكدار نه‌بوون.
ئەڤرۆ نیوز:
پشتی ئاشکرا کرنا بەربژاربوونا محەمەد تۆفیق عەلاوی بۆ پێکئینانیا حوکمەتێ ژ ئالیێ خوەنیشاندەران ڤە هاتە رەتکرن.
خوەنیشاندەرێن گۆڕەپانا تەحریر ڕاگەهاند: کو محەمەد تۆفیق بەری نوکە پشکداربوویە د کابینێن حوکمەتێ دا و ژبەر وێ چەندێ وەک بەربژارێ پێکئینانا حکومەتا نوو یا عێراقێ قەبوول ناکەن و وی رەت دکەن.
هەروەسا هەموو خوەنیشاندەرێن باژێرێن دیتر یێن باشور و ناڤەراستا عیراقێ ژی محەمەد تۆفیق ڕەتکریە، دخۆازن سپێدێ خوەنیشاندانێن ملیۆنی ئەنجام بدەن و دبێژن دڤێت سەرۆک کۆمار ژ وێ بڕیارێ پەشیمان بیت.
نيشاندان