ئەڤرۆ نیوز:

سەرۆکێ هەرێما کوردستانێ د پەیامەکێ دا بەرسڤا حەسەن نەسروللای دا و دبێژیت، گه‌لێ كوردستانێ و پێشمەرگە زێدەتر ژ سەدەیەکێ بەرهنگاری مەزنترین و درندانەترین هێرشا قرکار بووینه‌ و د‌ شه‌رێ داعشێ دا هەرێما کوردستانێ پاراست، گوتنێن حەسەن نەسروللای نەشیاون بەرامبەر‌ سه‌رۆك مه‌سعود بارزانى و قوربانیدانا پێشمەرگەی.

دەقێ پەیاما سەرۆکێ هەرێما کوردستانێ:

به‌ڕێز حه‌سه‌ن نه‌سروللا، ئه‌ميندارێ گشتي یێ حزبوللا لبنانى د گۆتارەکێ دا دوور ژ شێواز و ئەتەکێتێن سیاسى، ب شێوەکێ نەشیاو ده‌رهه‌ق ب سه‌رۆك مه‌سعود بارزانى و قوربانیدان و قارەمانيه‌تيا پێشمەرگەی ئاخفتیە، جهێ داخێ یە کەسەکێ وەک به‌رێز نەسروللا بێی بەرچاڤ وەرگرتنا ڕۆلێ مێژوویی یێ سەرۆک بارزانی د بەرهنگاربوونا ڕژێمێن دیکتاتۆر و ڕۆڵێ مەیدانی د تێکشکاندنا داعشێ دا، ب ڤی شێوەی هەستێ گەلێ کوردستانێ بریندار بکەت.

سەرۆک بارزانی هه‌موو ژیێ خوە د بەرهنگاربوونا ستەم و ستەمکاران و ژپێناڤی ئازاديا گه‌لێ خوە دا به‌خشيه‌، د شەرێ بەرهنگاربوونا داعشێ دا وەک فەرماندێ هێزێن پێشمەرگەی ب شێوەکێ ڕاسته‌وخۆ یێ مەیدانی و ل گەل هێزا پێشمەرگەی د سەنگەران دا، ڕۆلەکێ قارەمانانە گێرا، کو هەموو گەلێ کوردستانێ و زۆر ژ سەرکردێن جیهانی بۆ ئازایەتيا پێشمەرگەی و جه‌نابێ سه‌رۆكی شەهدەیی دایە.

گه‌لێ كوردستانێ هه‌موو دەما‌ هاریكاریا دۆستێن خوە دزانیت و سوپاسیا هه‌موو ئه‌وان دکەت، کو د شه‌رێ دژى داعشێ دا هاریکاریا هه‌رێما كوردستانێ دایە، ب‌ رێزڤە‌ دنێریتە پشتگيريا ئه‌وان و قه‌ت ژ بير ناكەت.

گه‌لێ كوردستانێ و پێشمەرگە زێدەتر ژ سەدەکێ بەرهنگاری مەزنترین و درندانەترین هێرشا قڕکاریێ بوویە، د‌ شه‌رێ داعشێ دا وان هەرێما کوردستانێ پاراست و پشکدار بوون د پاراستن و ڕزگارکرنا گەلەک جهێن دیتر یێن عێراقێ، ئەڤرۆ پاراستنا ئاشتی و پێکڤە ژیانێ و بەرهنگاربوونا تیرۆرێ، ب ئه‌ركێ هەرە ل پێشیا خوە دبينن، د دەمەکێ دا دۆخێ ڤێ دەڤەرێ وەسا دخوازیت ئەم هه‌موو كار بۆ ئارامكرن‌ و گێڕانا سه‌قامگيریێ بكه‌ين.
نێچيرڤان بارزانى
سه‌رۆكێ هه‌رێما كوردستانێ
13/1/2020

ئەڤرۆ نیوز:

پەرلەمانێ کوردستانێ راگەهاند، هەموو ئەو گوتنێن حەسەن نەسروللای ئەمیندارێ گشتی یێ حزبۆلایا لبنانی رەتکرن و هێزێن پیشمەرگەى ب خوینا خوە داعش تیکشکاندیە.

ئەڤا ل خوارێ دەقێ وێ راگەهاندنێ یە:

وه‌كو په‌رله‌مانێ كوردستانێ ب هه‌موو شێوه‌کێ وان گۆتنێن حه‌سه‌ن نه‌سروللای رێبەرێ حزبولایا لبنانی ره‌تد‌كه‌ین، کو د گوتارەکێ دا هێرشەکا نەره‌وا كریە ‌سه‌ر سه‌رۆك بارزانی و هێزێن پێشمه‌رگێ كوردستانێ كو ره‌مزێ خۆراگرى و روو ب ڕووبوونا تیرۆریستێن داعشن، ئەو هێزا پێشمه‌رگه‌ی بوو کو ب‌ خوینا خوە ئه‌فسانا داعشێ تێكشكاند و ب شێوه‌کێ راسته‌وخۆ و مه‌یدانی ل جهێ هه‌موو جیهانێ روو ب ‌ڕوو تیرۆریستێن داعشێ بوویە قاره‌مانیێن مەزن تۆمار كرینە.
ب ‌داخڤه‌ بەرپرسێن حزبا حه‌سه‌ن نه‌سروللای پشکەک بوویە ژ وان هێرشێن‌ نەره‌واو نە د‌ستووری، یێن کو ل سالا ٢٠١٧ هاتینە كرن بۆ‌ سه‌ر هه‌رێما كوردستانێ.

ئەم وه‌كو نوونه‌رێن هه‌رێما كوردستانێ وه‌فادارین به‌رامبه‌ر ب ‌هه‌ر كه‌س و لایه‌نەکێ كو‌ رۆژەکێ ژ رۆژان ل گەل مە هاریکار بووی.

زێدەروویێ ژ چ كه‌س و لایه‌نان قەبوول ناكه‌ین، وەکو پەرلەمانێ کوردستانێ و نوونەرێن خەلکێ کوردستانێ ئیدانا بێ رێزیێ ب هێزێن پێشمەرگێ کوردستانێ و هەر سمبولەکا نەتەوا مە دکەین.
پەرلەمانێ کوردستانێ
2020/1/13

ئەڤرۆ نیوز:

پشتی بۆ دەمەکێ روونشتنا په‌رله‌مانێ كوردستانێ هاتیە راگرتن، ب ئەگەرێ وێ كێشا دناڤبەرا دو په‌رله‌مانتاران درووست بووی، روونشتنێ ده‌ستپێكرە ‌ڤە.

هەروەسا ئەو کێشە هاتە چارە کرن و په‌رله‌مانتار زڤرینە‌ هۆلا په‌رله‌مانی و نوکە یێ گوتۆبێژان ل ‌سه‌ر ناڤەرۆکا ماده‌ و به‌ندێن پڕۆژه‌ قانوونا چاكسازیێ دكه‌ن.

دەرباره‌ی خالەکا پڕۆژه قانوونێ‌ ژ‌ مادێ حه‌فتێ، کو بەحسێ‌ خانه‌نشین كرنا پلێن بلند دکەت‌، هه‌ر ئێک ژ هیڤیدار ئه‌حمه‌د ژ‌ فراكسیۆنا پارتی و سیپان ئامێدی ژ فراكسیۆنا نه‌وه‌ی نوێ روو ب ‌روو ئێک بوون، بەلێ په‌رله‌مانتاران ناڤبژیڤانی كر.

ئەڤرۆ نیوز:

ئەڤرۆ مەسرور بارزانی سەرۆکێ حوکمەتا هەرێما کوردستانێ پێشوازی ل جینین هینیس پلاسخارت نوونەرا سکرتێرێ گشتی یێ نەتەوێن ئێکگرتی ل عیراقێ کر.

د هەڤدیتنەکێ دا هەر دو ئالیان دیار کرن کو دڤێت ئارامیا ل عیراقێ بهێتە پاراستن و هەموو ئالیەک رەوشا عیراقێ بەرچاڤ وەربگریت، چونکو ئالۆزبوونا رەوشا عیراقێ د بەرژەوەندیا چو ئالیەکێ دا نینە و ئەوک یەک دێ کارتێکرنا خوە یا خراب ل هەموو دەڤەرێ کەت.

ئەڤرۆ نیوز:

جۆتیار عادل، پەیڤدارێ حوکمەتا هەرێما کوردستانێ
بەرسڤا حەسەن نەسروللای، ئەمیندارێ گشتی یێ حزبوللا یا لبنانی ددەت و دبێژیت، ئەوێن هەولێر و کوردستان ژ هێرشا داعشان پاراستی هێزێن پێشمەرگەی بوون، نە چ خەلکێن دیبوون.

دەقێ بەرسڤا پەیڤدارێ حوکمەتا هەرێما کورستانێ بۆ حەسەن نەسروللای

بۆ مەلا حەسەن نەسروللا

بۆ مە سەیرە کو ب دەنگەکێ لەرزۆک و شێوازێ سنێلان، هێرشێ دکەیە سەر هەرێما کوردستانێ و رێبەرێ نەتەوەکێ، تە چەندین سالان رەنگێ رۆژێ نەدیتیە و ل ژێر ئەردی دا خوە حەشاردایە، تۆ ئیهانە و سفکاتیێ ب گەلەکێ قارەمان دکەی، ل جهێ وان هێرشێن بێ بنەما، هەقبوو تۆ داکۆکیێ ل وێ نەتەوا ژێر دەست بکەی، یا کو چەندین سالە ستەم و زۆرداری لێ دهێتە کرن.

ئەو هێزا پێشمەرگەی بوو، هەولێر و کوردستان پاراستی نەک خەلکێ دیتر، ل گەل هندێ دا مە سوپاسیا هەموو کەسان کریە، یێن کو هاریکاریا مە کری، بەلێ ئەو کەسێ کو نوونەرێ هەوە بوویە و ل دەمێ سەرەدانا وی بۆ لایێ سەرۆک بارزانی پشکداربوویە، دڤێت هەر هەمان کەس بیت ل گەل هەڤچەشنێن خوە، ل رۆژانێن 16 و 20 و 26 ئۆکتۆبەرا 2017 ئارمانج و خەونا وان داگیرکرنا کوردستانێ بوو، بەلێ ل بەرامبەر خۆراگرى و بەرگریا قارەمانانە یا پێشمەرگەی دا، لەرزۆک و سەرشۆر سەرێ خوە ل بەری دا و خەونا وان ژناڤچوو.

تۆ ژ ترسا نەیارێن خوە نەوێری سەرێ خوە راکەی، بۆ شەری ب نەتەوەکێ دفرۆشی کو چ پەیوەندی ب تەڤە نینە، سەرۆک بارزانی رەمزێ خۆراگریا نەتەوەکێ یە و تۆیێ ترسنۆک گەلەک ژ هندێ بچووکتری وێ زمان درێژیێ بکەی.
د. جۆتیار عادل
پەیڤدارێ حوکمەتا هەرێما کوردستانێ
2020/1/12