ئه‌ڤرۆ نيوز، نيوار محه‌مه‌د سه‌ليم:
ب گۆره‌ى پێزانينێن ل به‌ر ده‌ست، بڕياره ئه‌ڤرۆ مه‌سرور بارزانى، سه‌رۆك وه‌زيرێن هه‌رێما كوردستانێ و قوباد ته‌له‌بانى، جێگرێ سه‌رۆك وه‌زيران ل گه‌ل وى شاندێ حوكمه‌تێ يێ هه‌رێما كوردستانێ كۆم ببيت كو دوهى سه‌ره‌دانا به‌غدا كربوو و ل گه‌ل سه‌رۆك وه‌زيرێن عيراقێ و وه‌زيرێ په‌ترۆلێ كۆم ببوو.
بڕياره ژى پشتى كۆمبوونێ، شاند د كۆنفرانسه‌كێ رۆژنامه‌ڤانى دا، ئه‌نجامێن سه‌ره‌دانێ بۆ به‌غدا به‌رچاڤ بكه‌ن.
ئه‌ڤرۆ، سه‌باح زوهێر زێباری:
راگرێ كۆلیژا كارگێری و ئابووری یا زانكۆیا دهۆك دیاركر كو پێدڤیه هه‌رێما كوردستانێ هه‌می ده‌ما په‌یوه‌ندیێن خوه دگه‌ل عێراقێ خوش بكه‌ت، چونكی هه‌ردوو پێدڤی ئێكن، هه‌كه هه‌رێم و به‌غدا ل سه‌ر بودجا سالا نووی ژی رێكه‌فتن دێ گه‌له‌ك باش بیت و ره‌وشا هه‌رێما كوردستانێ ژی ژلایێ ئابووری ڤه باشتر بیت.
د.رێبه‌ر فه‌تاح راگرێ كۆلیژا كارگێری و ئابووری ل زانكۆیا دهۆك دیاركر سیاسه‌ت و ئابوور دپێكڤه گرێداینه،چونكی سیاسه‌ت سه‌ر بنه‌مایێ به‌رژه‌وه‌ندیا دهێته‌كرن و به‌رژه‌وه‌ندیێن ئابووری سیاسه‌تێ رێڤه‌دبه‌ن،ل وه‌لاتێن پاشكه‌فتی سیاسه‌ت ئابوورێ رێڤه‌دبه‌ت،لێ ل وه‌لاتێن پێش كه‌فتی ئابوور و به‌رژه‌وه‌ندیێن ئابووری سیاسه‌تێ رێڤه‌دبه‌ن،له‌وما وه‌كو دبینین هه‌روه‌لاته‌كێ سیاسه‌ت ئابوورێ رێڤه‌به‌ت و دویف به‌رژه‌وه‌ندیا خوه یا ساسی كاركربیت یا بوویه ئه‌گه‌ر كو كاودانێن خراب ب سه‌ردا بهێن و به‌روڤاژی هه‌روه‌لاتێ ئابوور سیاسه‌تێ رێڤه‌به‌ت گه‌شه‌یه‌كا ئابوریا باش بخۆڤه دیتی یه.
مامۆستایێ زانكۆیا دهۆك زێده‌تر خویاكر كو ل عێراقێ دا ل ده‌مێ حوكمه‌تا ئه‌یاد علاوی ل سالا 2004 عێراقێ پاره‌كێ خه‌یالی ده‌ستاندا هه‌بوو و به‌ری خه‌لكی هه‌میا دا مووچه خوریێ،مووچێن مه‌زن دانان و هه‌ر ئالیه‌كێ سیاسی ئه‌ڤ چه‌نده لایێ خودا راكێشا، له‌وما نوكه ئه‌ڤ به‌ره‌لای و نه‌دادی یا زۆر یا هه‌ی، ئه‌م وه‌كو ئابووریناس ئه‌ڤێ چه‌ندێ ب خه‌له‌تیه‌كا مه‌زن یا ئابووری دبینین،ئه‌ڤ سیسته‌مه هه‌تا نوكه یێ به‌رده‌وامه و عێراق و كوردستان پێكڤه دڤی ده‌ردی دا دنالن و سیسته‌مێ ئابووری هاتیه تێكدان، به‌ر ڤێ چه‌ندێ ژی سیسته‌مێ سیاسی ژی ل عێراقێ هاتیه تێكدان،ئه‌ڤه بوو ئه‌ڤه‌ر گه‌نده‌لی د عێراقێ و كوردستانێ دا دروست بیت، ئه‌ڤه ژی هه‌می ژ ئه‌گه‌رێ نه‌بوونا سیسته‌مه‌كێ دروستێ ئابووری یه كو ره‌وش گه‌هاندیه ڤی ئاسته‌ی.
دكتور رێبه‌ر ئاماژه دا وێ ئێكێ كو ل سالا 2004 هه‌تا 2014ێ عێراق پشكه‌كا زۆر یا پاره‌ی ل كوردستانی خه‌رج دكر،چونكی ئێمناهیا هه‌رێما كوردستانێ یا گونجای بوو كو كار ب پاره‌یبهێته‌كرن و ژینگه‌ها وه‌به‌رهێنانێ یا گونجای بوو،له‌وما ئه‌و پارێ زێده هه‌می ل كوردستانێ دهاته خه‌رجكرن، به‌رهندێ ژی ئه‌و ره‌وشا باش یا كوردستانێ پشتی سالا 2004ێ هه‌تا 2014ێ ئێك ژئه‌گه‌رێن ئابووریه‌كا باش كو هه‌مو داهاتێ زێده یێ عێراقێ دهاته هه‌رێما كوردستانێ.
د به‌رده‌وامیا ئاخفتنێن خوه‌دا راگرێ كۆلێژا كارگێری و ئابووری ل زانكۆیا دهۆك گۆت كو ب دیتنا من جیوپولوتیكا هه‌رێما كوردستانێ یا به‌رهه‌ڤی نینه كو سه‌ربوخوویا خوه وه‌ربگریت،لێ جیوئابوورا هه‌رێما كوردستانێ گه‌له‌ك یا باره كو سه‌رخووبیت، بۆ هندێ كو مه روله‌كێ مه‌زن هه‌بیت د ده‌ڤه‌رێ دا،له‌وما فه‌ره ئه‌م ل سه‌رڤێ كاركه‌ین كا چاوا جهێ خۆ یێ ئابووری دروست كه‌ین و ستراتیژیه‌تا خوه وه‌رگرین بۆ وێ چه‌ندێ بگه‌هینیه ستراتیژیه‌تا سیاسی،له‌وما ژی هه‌ردوو حوكمه‌تێن بزاڤێن باش كارینه كو وه‌به‌رهێنانێ بكه‌ن و ره‌وشا خه‌لكی خوشتر لێ بكه‌ن،چونكی ئه‌ڤ چه‌نده پێنگاڤه‌كا باشه بۆ هندێ هێدی هێدی بگه‌هیه سه‌رخووبوونا ئابووری.
زێده‌تر گۆت: مه چه‌ند كه‌رتێن ئه‌كتیف ل هه‌رێما كوردستانێ هه‌نه ژ وان كه‌رتێ گه‌شت و گوزاری یه دڤێت ئه‌م ڤی كه‌رتی به‌رفره‌هتر بكه‌ین ده‌رگه‌هێ مه یێ ڤه‌كری بیت بۆ گه‌شتیارێن ده‌رڤه و وان بخۆ رابكێشین،هه‌روه‌سا كه‌رتێ چاندنێ ژی ئه‌كتیف كه‌ین و پشته‌ڤانیا جۆتیاری بكه‌ین بازاری پێش بێخین،هه‌روه‌سا كه‌رتی پیشه‌سازی و ئه‌ڤ هه‌ڤركیا ئیرانێ و عێراقێ ژی ئه‌م مفای لێ وه‌ربگرین، یا گرنگ دڤێت په‌یوه‌ندیێن مه هه‌می ده‌ما دگه‌ل عێراقێ دباش بن،چونكی هه‌رده‌ما په‌یوه‌ندیێن مه تێكچوون گه‌ل عێراقێ دێ ره‌وشا ئابووری گه‌هیته ئاسته‌كێ خراب.
ل دور بارودوخێ نها ژی دكتور رێبه‌ر فه‌تاح دبێژیت كوئه‌ڤا عادل عه‌بدلمه‌هدی بۆ كوردان دكه‌ت به‌رامبه‌ر وی یه یا كوردان بۆ وی كری درابوردووی دا، ب دیتنا من كا چاوا عێراق بۆ كوردستانێ یا گرنگه وه‌سا كوردستان ژی بۆ عێراقێ یا گرنگه، به‌رهندێ هه‌می ده‌ما عێراق نه دگه‌ل جودابوونا كوردستانێ یه،چونكی دێ هه‌ڤسه‌نگیا وێ ل ده‌ڤه‌رێ دا تیك چیت و سه‌نگا خوه نامینیت،هه‌كه پێكهاتنه‌ك بهێته‌كرن و ئه‌و ماوێ حوكمه‌تا عێراقێ بۆ خونیشانده‌را دانای و خونیشانده‌ر به‌ره‌ف ئێمناهیێ بچن و پیكهاتنه‌ك هه‌بیت دناڤ ئالیێن سیاسی دێ دبه‌رژه‌وه‌ندی هه‌میاندا بیت،ڤه‌گه‌راندنه بۆ ئابوره‌كا باشتر،ئه‌ڤه ژی ئێك ژ پیشبینیایه، لێ سیناریوویا دووێ هه‌كه ل عێراقێ و ئیرانێ فه‌وزا چێبوو و كارتێكرنا خوه ل سه‌ر بهایێ پترولێ كر وی ده‌می دێ گه‌له‌ك پێش بین و سیناریوویێن دی هێنه پێش كا كورد چ بكه‌ن د ڤێ ره‌وشێ دا.
ئه‌ڤرۆ، رێوار محه‌مه‌د ره‌شید:
سه‌ندیكا پارێزه‌رێن كوردستانێ ناڤێ لیستێن پشكداربووی د هه‌لبژارتنێن سه‌ندیكایێ دا و ناڤێن به‌ربژاران بۆ وه‌رگرتنا پۆستێ نه‌قیبێ سه‌ندیكایێ ئاشكرا كرن.
ل رۆژا پێنجشه‌مبیا بۆری ب ئاماده‌بوونا نوونه‌رێن لیستێن هه‌لبژارتنێن پارێزه‌ران تیرۆپشك بۆ دانانا هژمارێن لیستێن هه‌لبژارتنێن سه‌ندیكا پارێزه‌رێن كوردستانێ هاته ئه‌نجامدان، دووڤ دا ناڤێن لیستێن پشكدار د هه‌لبژارتنان دا هاتنه ئاشكرا كرن كو پێكهاتینه ژ لیستا سه‌ربه‌خوه‌یی یا پارێزه‌ران، لیستا ئاینده یا پارێزه‌ران، لیستا پارێزه‌رێن راپه‌رین، لیستا برایه‌تی، لیستا پیشه‌یبوونا پارێزه‌ران.
د هه‌مان رۆژ دا ب رێیا لاپه‌رێ فه‌رمیێ سه‌ندیكا پارێزره‌رێن كوردستانێ د تۆرا جڤاكی یا فه‌یسبووكی دا ناڤێن وان پارێزه‌ران هاتنه به‌لاڤكرن یێن كو خوه به‌ربژاركرین بۆ پۆستێ نه‌قیبێ سه‌ندیكا پارێزه‌رێن كوردستانێ كو هژمارا وان 19 پارێزه‌رن.
هه‌ژی گۆتنێ یه كو ل رۆژا 28/11/2019 هه‌لبژارتنێن سه‌ندیكا پارێزه‌رێن كوردستانێ دێ هێنه ئه‌نجامدان و سێ رۆژان به‌ری ده‌مێ هاتیه دیاركرن دێ بانگه‌شا هه‌لبژارتنان ده‌ستپێكه‌ت.
ئه‌ڤرۆ نيوز:
شاندێ هه‌رێما كوردستانێ ب لێكتێگه‌هشتنێ ل سه‌ر بودجا 2020 ژ به‌غدا زڤرى، به‌رپرسێ نوونه‌راتيا حوكمه‌تا هه‌رێما كوردستانێ ژى ل به‌غدا دبێژيت، رێككه‌فتنا ده‌ستپێكى ل سه‌ر بودجه‌ى هاتيه كرن و ل رۆژا دوشه‌مبيا داهاتى دێ شاندێ كوردستانێ بۆ ئيمزاكرنا رێككه‌فتنێ دێ زڤريته به‌غدا.
ئەڤرۆ نیوز،عەلی حاجی :
بەرپرسێ ئاوارە و پەنابەران ل قاییمقامیا زاخۆ د داخویانیەکێ دا بۆ ئەڤرۆ نیوز دیار کر ب رێیا س رێکخراوان ل زاخۆ د چەندین دەلیڤێن کاری بو ئاوارە و خوە جهێن دەڤەرێ هێنە پەیدا کرن و بریارە دماوەیێ ڤێ حەفتیێ دا ئەو دەلیڤێن کاری دەست پێ بکەن.
زێدەتر خەلات ئوسمان گوت : سێ رێکخراو ل زاخۆ دێ رابن ب نوژەنکرنا هندەک قوتابخانە و بویاخکرنا جاددە و پاقژکرنا باغچەیان و ئەڤ کارە ب هەماهەنگی دگەل جهێن شولەژێ هێنە کرن و ب رێیا وان سێ کاران دێ دەلیڤێن کاری بۆ نێزیکی ٤٠٠ کەسێن خودان بروانامە و بێ بروانامە هێتە پەیدا کرن و ناڤ نڤێسین ژی ب رێیا لینکەکێ و ناڤ نڤیسینێ یە ل قاییمقامیا زاخۆ و ئەڤ ناڤ نڤیسینە دەست پێکری یە و هەر کەسەکێ دخازیت کاربکەت دشێت ناڤێ خوو تومار بکەت و دماوەیێ ڤێ حەفتیێ دا دێ دەست ب کارەکێ هێتە کرن و دێ هندەک دەلیڤێن کاری ژی دەست ب کار بن.
گوت ژی : بریارە پشتی قوناغا ئێکێ کارێ رێکخراوەکێ ب دوماهی دهێت هەر دو رێکخراوێن دیتر دەست ب کاری بکەن و بۆ ماوەیەکێ ئەو کار بەردەوام بیت و ئەو کەسێن ناڤێن خوە تومار دکەن ژبەریا دەست ب کاری بکەن روونشتنەک دگەل وان دا دهێتە ئەنجام دان.
ئەڤرۆ نیوز، عەلی حاجی :
رێڤەبەرێ کوچ و کوچبەران ل پارێزگەها دهوکێ بۆ ئەڤرۆ نیوز دیار کر ژبەر وێ بریارا حکومەتا عێراقێ دەرکری ل دور ڤەگەریانا هاولاتین عێراقی بۆ عێراقێ هەتا نوکە چەندین کەس ل کوردستان و عێراقێ مفادار بوینە ژ قەرەبوکرنێ و هەتا نوکە ئەو قەرەبوکرنە بەردەوامە.
زێدەتر ئەسکەندەر محەمەد گوت : ل دووف بریارا وەزارەتا کوچ و کوچبەران یا حکومەتا عێراقێ هەر هاولاتیەکێ کوردستانێ ژ سالا ١٩٧٠ هەتا سالا ١٩٩١ قەستا ژدەرڤەیی وەلاتی کربیت و دماوەیێ ڤان چەند سالەکێن بوری دا ب ئێکجاری بریارا ڤەگەریانێ دا بیت بۆ کوردستانێ پارچە زەڤیەکێ یان ژی شوققەکێ و کوژمەیەکێ پارەیی ب چار ملیون دیناران پێ دهێتە دان و هەر دیسان هەکە ئەو کەسە فەرمانبەر ژی بیت دێ دوبارە ڤەگەریتە دەواما خوە و ئەو دەمێ ژدەرڤەیی وەلاتی ژی ژیانا خوە دەرباز کری دێ بو وی ب خزمەت هێتە هەژمارتن،بەلێ هەر هاولاتیەکێ ژدەرڤەی هەرێمێ بیت و هەر ژ سالا ١٩٧٠ هەتا نوکە چو بیتە دەرڤەیی وەلاتی دێ هەمان قەرەبویا ب هاولاتیێن هەرێمێ هاتیە دان ب وان ژی هێتە دان و هەتا نوکە ژی ئەڤ بریارە دبوارێ جێبەجێ کرنێ دایە و نەهاتیە راوەستاندن و چو بریارێن راوەستیانا وێ نینن.
گوت ژی: ژبەر وێ بریارێ هەتا نوکە رێژەیەکا باش یا هاولاتیێن کوردستانێ و عێراقێ مفادار بوینە و ب رێیا وێ بریارێ مە گەلەک فەرمانبەر ڤەگەراندینە دەواما وان یا فەرمی و نوکە بەردەوامن ل سەر دەواما خوە و هەر کەسەکێ مەرجێن پێدڤی ل دەف هەبن دێ مفادار بیت ژ ڤێ بریارا تایبەت دەربارەی کوچبەرێن دەرڤەی وەلاتی.
نيشاندان