ئەڤرو نیوز:

47 سکالا یێن رویدانێن جودا د روژانێن جەژنا قوربانیێ دا ل سەرانسەری پارێزگەها دهوکێ هاتینە تومارکرن.

ل دور ڤى بابەتی بەرپرسێ پەیوەندی و راگەهاندنا رێڤەبەریا پولیسێن پارێزگەها دهۆکێ تایبەت بۆ ئەڤرو نیوز گۆت: 47 روودان و کێشێن سفك یێن جوراوجور هاتینه‌ توماركرن ژ وان بشەرچون و مەی ڤەخوارن و خراپ بکارئینانا ئامیرێن پەیوەندیێ و خەندقین و روودانێن هاتن و چونێ و بتنێ ئێک تاوانا دزیێ ل سەنتەرێ پارێزگەها دهوکێ هاتیە ئەنجامدان و ب رێکا سیستەمێ گرتن و دیڤچونا تاوانباران کەسەک هاتیە دەستەسەرکرن ژلایێ تیمێن هەوارهاتنێ ڤە و چەند کەسەک ل سەر تاوانا قومارێ هاتینه‌ گرتن.

زێدەتر مقەدمێ ماف هێمن سلێمان دبێژیت: خوش بەختانە هیچ روودانەکا کوشتنێ د روژانێن جەژنا قوربانیێ دا روینەدایە و بەرامبەر جەژنا بوری روودان و تاوان ب شێوەیەکێ بەرچاڤ کێمتر بوینە.

ئەڤرۆ نیوز،‎ ‎عەلی حاجی :‏

د‎ ‎داخویانیەکێ دا رێڤەبەرێ ئاسایشا گومرکا ئیبراھیم خەلیل بۆ ئەڤرۆ نیوز ئاشکەرا کر ئەو قەرەبالغا ل لایێ ‏تورکیا دروست بوویی کو بوویە ئەگەر بۆ ماوەیێ دو رۆژایە ھندەک ترۆمبێل ماینە د سرایێ دا ژ بەر رێژەیا ‏زورا چوونا وەلاتیێن کوردستانێ بۆ وەلاتێ تورکیا .‏

عەبدوەلوەھاب محەمەد گۆتژی : ئەڤ قەرەبالغا نوکە ل لایێ وەلاتێ تورکیا دروست بوویی، ھەمان قەرەبالغ ل ‏پێشیا جەژنێ د ناڤ دەرگەھێ نێڤدەولەتی یێ ئیبراھیم خەلیل ژی دروست ببوو، ژ بەر کو دڤێ جەژنێ دا ‏رێژکا زۆر یا وەلاتیێن ھەرێما کوردستانێ قەستا وەلاتێ تورکیا کربوون ب مەرەما گەشتکرنێ، ئەم پێشبینی ‏دکەین ھەتا دو یان سێ روژێن دی ئەو قەرەبالغ بمینیت، ژ بەر کو د نوکە دا بھێنڤەدان ل کوردستانێ ب دووماھی ‏ھات و ئەو گەشتیار ژی ژ بەر ڤێ چەندێ ڤەدگەرنە کوردستانێ و ب چو رەنگەکێ ژی گومرگا تورکیا ‏رانەوەستیایە و بەردەوام یێ کار کەن، بەلێ ژ بەر ب رێڤەبرنا مامەلەێن گەشتیاران کار ب گیرۆ دبیت.‏

دیار کر ژی کو وەکو دەرگەھێ نێڤدەولەتی یێ ئیبراھیم خەلیل د پەیوەندیێن بەردەوام داینە د گەل ‏گومرکا وەلاتێ تورکیا بۆ چارەسەر کرنا ڤێ کێشێ و گۆتژی: دا کو چو کێشەیەک ل لایێ مە دروست نەبیت مە ‏چەندین کومپیوتەرێن پاسەپورتان خستینە د خزمەتا خەلکی دا.‏

دا زانین ژی کو دبیت ھێشتا ھندەک وەلاتیێن مە ل لایێ تورکیا مابن ژ بەر ڤێ قەرەبالغێ ڤەنەگەریابنە ‏کوردستانێ، ئەم د نوکە ژی دا بەردەوامین ل سەر ھەولێن خوە و دخوازین ژی د زووترین دەم دا ھەمی وەلاتی ‏ڤەگەرنە کوردستانێ ب سلامەتی.‏

ب گورەی پێزانینێن ب دەست ب ئەڤرۆ نیوز کەفتین ل دو روژێن بەریا جەژنێ ھەتا رۆژێن جەژنێ نێزیکی 55 ‏ھزار کەسان ب رێیا دەرگەھێ نێڤدەولەتی یێ ئیبراھیم خەلیل قەستا وەلاتێ تورکیا کر بوون.‏