ئەڤرۆ نیوز:
ئەڤرۆ عەبدولرەحمان مستەفا پارێزگارێ بەرێ یێ کەرکووکێ وەکو سەرۆکێ لیستا هەڤپەیمانیا کوردستانی بۆ هەلبژارتنێن جڤاتا پارێزگەهێن عیراقێ هاتە هەلبژارتن.
سەرۆکێ لیستا هەڤپەیمانیا کوردستانی راگەهاند کو ئێکەتیا هەموو هێز و ئالیێن سیاسی یێن کوردستانی دێ سەرکەفتنا مە گەرەنتی کەت و هێڤی خواست هەلویستێ نها یێ هەموو ئالیێن کوردستانی بۆ دەڤەرێن کوردستانی یێن دەرڤەی ئیدارا هەرێما کوردستانێ بەردەوام بیت.
ئه‌ڤرۆ نیوز، مه‌حمود نهێلی:
رێكخراوه‌كا ئیتالى دێ هوله‌كا نشته‌گه‌ریان ل سه‌ر بنه‌مایێن زانستى یێن مودێرن و نوو و پێشكه‌فتى ل ئامێدیێ ڤه‌كه‌ت و پارێ پێدڤى ژى بۆ ته‌رخانكریه. ئیسماعیل موسته‌فا ره‌شید قایمقامێ قه‌زا ئامێدیێ بۆ ئه‌ڤرۆ نیوز دیاركر، كو وان پێشوازى ل شانده‌كى ساخله‌میا پارێزگه‌ها دهوكێ كری، كو پێكهات بوون ژ رێڤه‌به‌رێ گشتى یێ ساخله‌میا پارێزگه‌ها دهوكێ و شاندنه‌كى ئێكه‌تیا ئه‌ورپا و رێكخراوا ( AISPO) یا ئیتالى .
ناڤهاتى دیاركر، كو مه‌ره‌ما سه‌ره‌دانا ڤێ شاندنێ دیاركرنا رازیبوونا خوه بوویه ل سه‌ر چێكرنا هوله‌كا پێشكه‌فتى و مودێرن یا نه‌شته‌گه‌ریان ل نه‌خوشخانا ئامێدیێ و گۆت: ( ژبلى كو ئه‌ڤ هولا نه‌شته‌رگه‌ریان دێ ژلایێ ڤێ رێكخراوێ ڤه هێته چێكرن هه‌موو ئامیره و كه‌ره‌سته‌یێن پێدڤى یێن ڤێ هولێ دێ ژلایێ هه‌مان رێكخراوا ڤه هێنه دابینكرن.
دیاركر، كو ل دووڤ پێشبینى و گۆتنێن كارمه‌ندێن ڤێ رێكخراوێ چێدبیت ل ده‌سپێكا سالا بهێت ده‌ست ب چێكرنا ڤێ هولێ بهێته كرن و گۆت: (ئه‌ڤ كارێ ئێكه‌تیا ئه‌ورپا و رێكخراوێن بیانى پێنگاڤه‌كا باشه د بوارێ ساخله‌میێ دا ل ده‌ڤه‌رێ هاڤێژتى و هیڤیا به‌ردوامیا خوه‌ست كو ئه‌ڤ رێكخراوه ل ده‌ڤه‌رێ كارێن باشتر و پرۆژێن گرنگ ئه‌نجام بده‌ن.
ئه‌ڤرۆ نيوز:
ب مه‌ره‌ما ره‌تكرنا قانوونا ژماره 14 يا سالا 2019ێ يا قانوونا راستڤه‌كرى يا ئێكێ يا قانوونا هه‌لبژارتنێن جڤاتێن پارێزگه‌هان ل وان پارێزگه‌هـ و قه‌زايێن ناڤ هه‌رێمێ دا هاتينه رێكخستن، وه‌زيرێ داد ل هه‌رێما كوردستانێ سكالايه‌ك ل دژى محه‌مه‌د حه‌لبۆسى سه‌رۆكێ په‌رله‌مانێ عيراقێ تۆماركر.
فه‌رسه‌ت ئه‌حمه‌د، وه‌زيرێ داد يێ هه‌رێما كوردستانێ سكالايه‌ك ل رۆژا 24ى ئيلۆنا 2019ێ د رێيا بريكارێ خوه يێ قانوونى دا ره‌وانه‌ى دادگه‌ها بلندا فيدرال ل به‌غدا كريه.
د سكالايێ دا وه‌زيرێ داد ئاماژه ب وێ چه‌ندێ كريه كو ئه‌و راستڤه‌كرن يا به‌تاله، چونكو سه‌رۆكێ جڤاتا نوونه‌رێن عيراقێ قانوونا ژماره (14) يا سالا 2019ێ دانايه كو ماددێ وێ قانوونێ دژى ئێكن ل گه‌ل حوكمێن دستوورى و بنه‌مايێن هه‌لبژارتنێن گشتى و بنه‌مايێن ديموكراتى و ئه‌و مافێن بنجينه‌يى يێن د دستوورى دا هاتينه ناگۆنجن، ئه‌ڤه ژى دبيته ئه‌گه‌ر كو قانوونا راستڤه‌كرى يا ژماره (14) يا سالا 2019ێ به‌تال ببيت و ره‌تكرن ببيته كاره‌كێ پێدڤى ب گۆره‌يى حوكمێن ماددێ 12ێ يێ دستوورى.
د به‌ر رووناهيا وى ماددێ دستوورى دا، وه‌زيرێ داد يێ هه‌رێما كوردستانێ د هه‌شت خالان دا به‌لگه‌يێن قانوونى بۆ دستوورينه‌بوون و قانوونينه‌بوونا وێ قانوونا راستڤه‌كرى خستينه به‌رچاڤ.
ئه‌ڤرۆ نیوز، عه‌لی حاجی:
د داخویانیه‌كێ دا رێڤه‌به‌رێ ئه‌وقافا زاخۆ بۆ ئه‌ڤرۆ نیوز دیار كر ژبه‌ر شه‌رێ به‌رده‌وامێ هێزێن په‌كه‌كێ و توركیا زیانه‌كا مه‌زن به‌ر ب مزگه‌ڤتێن سه‌ر ب رێڤه‌به‌ریا مه كه‌ڤتینه و هه‌ژماره‌كا وان ژی هاتینه چول كرن .
زێده‌تر مه‌لا سه‌عید عه‌بدولره‌حمان گۆت: ل سنورێ رێڤه‌به‌ریا مه هه‌ر ژ ناحیا كانی ماسێ هه‌تا باژێرێ زاخۆ ژئه‌گه‌رێ شه‌رێ به‌رده‌وامێ د ناڤبه‌را سوپایێ توركیا و هێزێن په‌كه‌كێ دا 30 مزگه‌فتێن سه‌ر ب رێڤه‌به‌ریا مه ڤه هاتینه چول كرن و هیچ كه‌سه‌ك نه‌شێت نڤێژێن خوه تێدا ئه‌نجام بده‌ت،ل سنورێ ده‌ڤه‌را زاخۆ 202 مزگه‌ڤت هه‌نه كو ژ وان مزگه‌ڤتان ژی بتنێ ل 120 مزگه‌ڤتان گوتار ل روژانێن ئه‌ینیێ دا تێدا دهێنه خواندن و پشكا مایی ژمزگه‌ڤتان ل روژانێن ئه‌ینیێ گوتار تێدا ناهێنه خواندن ژبه‌ر كێمیا میلاكێ رێڤه‌به‌ریا مه وسه‌رجه‌مێ گشتیێ فه‌رمانبه‌ر و گوتار خوین و پێش نڤێژ و پاقژكه‌ر و بانگده‌ران بتنێ 227 كه‌سن و ئه‌ڤه ژی رێژه‌یه‌كا كێمه ل سنورێ رێڤه‌به‌ریا مه .
گۆتژی: ب تنێ 27 پێش نڤێژ و گوتارخوین ب شێوێ دامه‌زراندی ل ده‌ڤ مه هه‌نه و هه‌ر دیسان 93 كه‌سێن دیتر گوتاران پێشكێش دكه نكو پرانیا وان خوه به‌خش و یان ژی هنده‌ك ژ وان به‌رامبه‌ر 50 هزار دیناران ل روژانێن ئه‌ینیان دا گوتاران پێشكێش دكه‌ن ،هه‌كه میلاكه‌كێ پێدڤی ل به‌ر ده‌ست هه‌بایه دا ل مزگه‌ڤتێن مایی ژی گوتار تێدا هێنه خواندن .
ئه‌ڤرۆ نیۆز، ئه‌میر ئه‌ترووشی
به‌رپرسێ پشكا ره‌وشه‌نبیری ل بنگه‌هێ لالش ل دهۆكێ راگه‌هاند، مه دووڤچوون ل سه‌ر كێشا كێمیا پرتووكێن بابه‌تێ ئێزدیاتیێ كر و بریار هاته دان پرتووكێن ئێزدیاتیێ بۆ سالا نوو یا خووندنێ (2019_2020)ێ بهێنه چاپكرن.
شه‌مۆ قاسم، به‌رپرسێ پشكا ره‌وشه‌نبیری ل بنگه‌هێ لالش ل دهۆكێ بۆ ئه‌ڤرۆ نیۆز دیاركر: “د پلانا وه‌زاره‌تا په‌روه‌ردا حكومه‌تا هه‌رێما كوردستانێ دا نه‌بوویه پرتووكێن ئێزدیاتیێ بهێته چاپكرن، ئه‌م ناچار بووین هانا خۆ بگه‌هیننه به‌رێز “شێخ شامۆ” راوێژكارێ سه‌رۆكێ حكومه‌تا هه‌رێمێ بۆ كاروبارێن ئێزدیان و سه‌رۆكێ بنگه‌هێ لالش و پشتی بابه‌ت گه‌هشتیه به‌رده‌ستێ وی په‌یوه‌ندی ب وه‌زاره‌تا په‌روه‌ردێ كر و رازه‌مه‌ندی وه‌رگرت كو چ پێویسته بهێته كرن و ئیسال كێشا كێمیا پرتووكێن بابه‌تێ ئێزدیاتیێ ل قۆناغێن خواندنێ بهێته چاره‌كرن و ئیعاز هاته دان بۆ چاپكرنێ”.
شه‌مۆ دیار كر ژی “ل بنگه‌هێ لالش ل دهۆكێ كۆمبوونه‌ك ژ بۆ چاره‌كرنا كێشا نه‌بوونا پرتووكێن بابه‌تێ پرۆگرامێ ئێزدیاتیێ بۆ هه‌موو قۆناغێن خواندنێ دگه‌ل سه‌رپه‌رشتێن ئێزدیاتیێ ل قۆناغا ئاماده‌یی و بنه‌ره‌ت ل په‌روه‌ردێن سێمێل و شێخان و شنگال و تلكێفێ هاته ئه‌نجام دان”.
ئەڤرۆ نیوز ، زنار تۆڤی:
ل ده‌رگه‌هێ سەرزێری یێ سنورى ل ناحیا كانی ماسێ یا سەر ب قەزا ئامێدیێ ڤە، یاكو دكەڤیتە د ناڤبەرا هەرێما كوردستانێ و باكورێ كوردستانێ دا، سوبەهی 1/ چریا ئێكێ یا 2019 دەمژمێرەك دێ هێتە كێمكرن بۆ هاتنوچوونا رێڤنگان د ڤی دەرگەهی را و ئەڤ بریارە دێ هەتا 31/3/2020 یا بەردەوام بیت.
عرفان سلێمان عەبدوللا، رێڤەبەرێ ده‌رگه‌هێ سەرزێری یێ سنورى بۆ ئەڤرۆ نیوز دیار كر: ل دووڤ وێ پرۆتوكولا هاتیە موركرن د ناڤبەرا رێڤەبەریا كۆمەلگەها ده‌رگه‌هێ سەرزێری یێ سنورى و رێڤەبەرێ گۆمركا ئوزوملۆ و ب بەرهەڤبوونا قایمقامێ قەزا ئامێدیێ و قەزا چەلێ، ژ سوبەهی 1 چریا ئێكێ و پێدا دێ دەواما فەرمی ل ژ دەمژمێر 8:30 سپبَدێ هەتا پبَنجی ئێڤارێ بیت، ژبەركو دەڤەرا مە دەڤەەركا چیایی یە و ل وەرزێ زڤستانێ رۆژ كورت دبن، لەوما وان ئەڤ بریارە دایه كو هه‌تا 31/3/2019 دێ كار پێ هێته كرن.
هەروەسا گۆت ژی: هێشتا ده‌رگه‌هێ سەرزێری نەبوویە 24 دەمژمێری، هەر چەندە مە گەلەك بزاڤ كرینە كو ئەڤ دەروازە ببیتە دەروازەكێ فەرمی و ببیتە 24 دەمژمێری ژی.
ئەڤرۆ نیوز،عەلی حاجی :
د رێ و رەسمەكێ تایبەت دا بۆ ئێكەم جار ل كوردستانێ پروژەیێ سیستەمێ نوو یێ پاقژكرنا ئاڤێ دناڤ هەر دو پروژەیێن كەڤن و نوو دا یێ ئاڤا زاخۆ هاتە ڤەكرن و رێكخراوەكا ئەلمانی تیچوویێ وی پروژەیی ب ستویێ خوەڤە گرت بوون .
هاشم ئیبراهیم، رێڤەبەرێ ئاڤا زاخۆ بۆ ئەڤرۆ نیوز دیار كر ئەڤە سیستەمەكێ نوو یێ جیهانی یە بناڤێ سیستەمێ خویێ كو پێشتر ب سیستەمێ گازا كلورێ مە ئاڤا پروژێ زاخۆ پاقژ دكر، بەلێ د نوكە دا ئەڤ سیستەمە دەست ب كار بوو و بتنێ دێ ب ئاڤ و خوویێ كلوری چێكەین و ئاڤا زاخۆ پاقژ كەین.
گۆت ژى” بۆ ئێكەم جارە ئەڤ سیستەمە ل كوردستانێ و عێراقێ دهێتە دانان و ڤی سیستەمی گەلەك مفا هەنە كو ژوان ژی مەترسیا گازا كلورێ دناڤ ئاڤێ دا نامینیت ژبەر كو هەر دەما شاشیه‌ك دروست ببا، دا مەترسیەك مەزن كەڤیتە سەر وه‌لاتیان،ئەڤ سیستەمە ب رێیا خوویێ و ئاڤێ دێ چیتە ناڤ ئامیرەیەكێ كارەبایی دا و دێ رێژەیا پێدڤی یا كلورێ ئامادە كەت ، هەر دیسان مەزاختیێن پروژەی ژی گەلەك كێمترە ژ سیستەمێ بەری نوكە و دشێم بێژم نیڤا تێچوویێ سیستەمێ بەری نوكە بیت .
میشایل غابێ، بەرپرسەكێ رێكخراوا giz بۆ ئەڤرۆ نیوز گوت : ئەڤ پروژە ل گەلەك وەلاتێن جیهانی كار پێ دهێتە كرن و ئەڤ سیستەمە ل زاخۆ ژی هاتە دانان و زێدەتری 50 وەلاتان ڤی سیستەمە دهێتە بكاردئینن و تێچوویێ پرۆژەی 644 هزار دولارێن ئەمریكی یە و بریارە ئەم ل دو دەڤەرێن سەر ب پارێزگەها هەولێرێ و دەڤەرا مووسل ئەڤ سیستەمە بهێتە دانان كوكۆمپانیه‌كا ناڤخوه‌یى سەرپەرشتیا ڤی پروژەی دكەت .
ئه‌ڤرۆ نيوز:
سه‌رۆكێ ده‌سته‌يا وه‌به‌رهێنانێ ل هه‌رێما كوردستانێ راگه‌هاند، د قانوونا وه‌به‌رهێنانێ ل كوردستانێ و راستڤه‌كرنا وێ ژى ل پاشه‌رۆژێ، رێيێن باشتر بۆ بازرگانان و وه‌به‌رهێنه‌رێن ناڤخوه‌يى و بيانى دێ هێنه ره‌خساندن، تاكو وه‌به‌رهێنانێ باشتر ل هه‌رێما كوردستانێ بهێته ئه‌نجامدان.
محه‌مه‌د شوكرى، سه‌رۆكێ ده‌سته‌يا وه‌به‌رهێنانێ ل هه‌رێما كوردستانێ، ل دۆر ڤه‌كرنا پيشانگه‌ها نێڤده‌وله‌تى يا هه‌ولێرێ كو ئه‌ڤرۆ ب به‌رهه‌ڤبوونا مه‌سرور بارزانى سه‌رۆكێ حوكمه‌تا هه‌رێما كوردستانێ هاته ڤه‌كرن، گۆت” پيشانگه‌هه‌كه گرنگه ژ به‌ركو دێ ده‌ليڤێن زێده‌تر بۆ بازرگانان و وه‌به‌رهێنه‌رێن ناڤخوه و بيانى دابين كه‌ت”.
ناڤبرى زێده‌تر بۆ مالپه‌رێ فه‌رميێ پارتى ديموكراتى كوردستان گۆت” دێ وه‌به‌رهێنه‌رێن بيانى و ناڤخوه‌يى هانده‌ين كو زێده‌تر د وارێ دابينكرن و دروستكرنا كارگه‌هێن مه‌زن رۆل د كوردستانێ دا هه‌بيت، تاكو وه‌لاتيێن هه‌رێما كوردستانێ مفادار بن”.
ئه‌ڤرۆ نيوز:
جڤاتا بلند يا فه‌توايێ ل هه‌رێما كوردستانێ، مامه‌له‌كرن ب پارێ جۆرێ 25 دينارێ هه‌لوه‌شاندى يێ سه‌رده‌مێ رژێما ژناڤچوويا عيراقێ حه‌رام كر.
ل دووڤ نڤيساره‌كا جڤاتا بلند يا فه‌توايێ كو ل 25/9/2019 ئيمزا ل سه‌ر هاتيه كرن كو به‌رسڤا هنده‌ك خودانێن كۆمپانيێن گوهۆرينا پاره‌ى هاتيه دان ل دۆر حوكمێ مامه‌له‌كرنێ ب پارێ هه‌لوه‌شياى يێ جۆرێ 25 دينارێ عيراقى يێ به‌رێ.
جڤاتا بلند يا فه‌توايێ رۆهنكر ژى كو پشتى ڤه‌كۆلينه‌كا پێدڤى ب تێكرايا ده‌نگان بريار هاته دان كو مامه‌له‌كرن ب وى جۆرێ پاره‌ى كو ره‌سيد نه‌مايه و ب فه‌رمى هاتيه هه‌لوه‌شاندن يا دروست نينه، چونكى ب فه‌رمى باوه‌رى يا ژ ده‌ستداى و به‌رۆڤاژى قانوونێن كار پێ دهێته كرن”.
ئەڤرۆ نیوز، هۆشەنگ تاجر:
کۆنفرانسێ سووریێ ژ ئالیێ پارتا کۆماریا گەل ڤە هاتە برێڤەبرن و هەموو ئالیێن سیاسی یێن سووریێ بێی کوردان بۆ کۆنفرانسی هاتنە ڤەخواندن و چاڤدێرێن سیاسی ژی دبێژن ئەو یەک نیشا ددەت کو هەلویستێ جەهەپێ ل هەمبەر کوردان ژ یێ ئاکپارتیێ خرابترە.
دەزگەهێن راگەهاندنا تورکیا ژی دیار دکەن کو جەهەپێ ب رێیا سازکرنا کۆنفرانسێ سووریێ دڤێت هەڤڕکیا ئاکپارتیێ بکەت و ئارمانجا وێ ژی دەستهەلاتە و پرسا کوردی و چارەسەرکرنا وێ د بەرنامێ جەهەپێ دا نینە.
نيشاندان