ئەڤرۆ نیوز، نەوزاد ھلۆری:

دوھی سالرۆژا کارەساتا ئەنفالا شکەفتا دەکان بوو کو تێدا 75 کەس ژ خەلکێ دەکان د شکەفتا دەکان دا ژلایێ رژێما بەعش ھاتنە ئەنفالکرن ، و ژبلی سێ کەسان چوو کەس نەھاتیە قەرەبوکرن،وەلاتیەکێ گوندێ دەکان ژی دیارکر کو مخابنە کارەساتەکا مینا شکەفتا دەکان بێ دەنگی ببوریت و نەھێتە ساخکرن و چاڤێ کەسوکارێن قوربانیان ژی ل قەرەبوکرنێ یە.

کیڤی دەکانی وەلاتیەکێ گوندێ دەکانە بو ئەڤرۆ نیوز گۆت: (دوھی رێکەفتی 18-8-1969 سالروژا کارەساتا شکەفتا دەکان بوو کو رژێما بەعس شیا ب ھەڤکاریا ھندەک جاش و خو فروشا دەست ب سەر شکەفتا گوندێ دەکان بگریت و ئاگری بەردەتێ کو 75 کەس ژ ژن و زاروکان تێدابوون و ھەمووان بسوژیت ب تنێ چوار کەس رزگاربوون)

زێدەتر گۆت: (ژبلی سێ کەسان ژ ئەنفالکریێن شکەفتا دەکان ، چو کەس نەھاتیە قەرەبوکرن ژلایێ حوکمەتا بەغدا و حوکمەتا ھەرێمی ژی، ژبەرڤێ پێدڤی یە ئەو خەلک ژی بھێتە قەربوکرن و چەندین سالە خەلک چاڤەرێ دکەت، بەلێ جھێ داخێ یە کارەسات بێدەنگی بوری و بێ کو بھێتە ساخکرن و قەڕەبویا کەسوکارێن قوربانیان ژی نەدیارە)

دەکانی دیارکر ژی کو ئەنفالا گوندێ دەکان، ددەمەکێ دا درۆستبوویە کو پێشمەرگە ل گوندی ھەبوون بەلێ ژبەر چەتەیێن رژێما بەعس ل گوندی دەرکەفتن و ژن و زاروک چونە شکەفتا دەکان داکو خوە ب پارێزین، بەلێ دیارە ب ھاریکاریا ھندەک خو فروشان رژێما بەعس ب وان زانی و ئەو بوو ھاتن و شکەفت سوت و ھەموو ژن و زاروک تێدا سوتن و ھاتنە ئەنفالکرن و زێدەتر گوت: (پێدڤیە کەسیێن مینا دەکان بھێنە تومارکرن و سالانە د رێورسمێن ژ ھەژی دا رێز ل قوربانیان بھێتەگرتن و کار ژی لسەر قەرەبوکرنا کەسوکارێن قوربانیان بھێتەکرن داکو جیلێ نو بزانن ئەڤ ئازادیا نھا ھوسا ب ساناھی نەھتیە دەستڤەئینان و ھەستا نەتەوەی و نیشتمانیا وان بلند بیت).

ئه‌ڤرۆ نیوز، نه‌وزاد هلۆرى:

رێڤه‌به‌ریا به‌ره‌ڤانیا باژێرى دهۆكێ ئامارا روژانێن جه‌ژنێ و چه‌ند هه‌یڤێن بورى یێن سالا 2019 به‌لاڤكرن.

بێوار عه‌بدولعه‌زیز، به‌رپرسێ راگه‌هاندنا به‌ره‌ڤانیا باژێرى ل دهۆكێ د كونگره‌یه‌كا رۆژنامه‌ڤانى دا دیاركر كو ئه‌ڤ ساله‌ ل سنوورێ پارێزگه‌ها دهۆك هزار و 803 رودانێن ئاگرى رووداینه‌ و زێده‌تر گۆت: (ل سنوورێ پارێزگه‌ها دهۆك 22 كه‌س دئاڤێن رووبار و به‌نداڤ و بیران دا خه‌ندقینه‌ و 15 كه‌س ژى هاتینه‌ رزگاركرن و هه‌تا نوكه‌ ته‌رمێن سێ كه‌سان ژى نه‌هاتینه‌ دیتن، هه‌روه‌سا ژ ئه‌نجامێ روودانێن ئاگرى 13 كه‌سان گیانێ خوه‌ ژ ده‌ستدایه‌ و 27 كه‌س ژى برینداربوینه‌ و 53 كه‌س ژى لایێ تیمێن به‌ره‌ڤانیا باژێرى هاتنیه‌ رزگاركرن دناڤ روودانێن جودا جودا).

زێده‌تر گۆت: (ل روژانێن جه‌ژنا قوربانێ ژى ل سنوورێ پارێزگه‌ها دهۆك 61 روودانێن ئاگرى رووداینه‌ و دوو كه‌س ژى خه‌ندقینه‌، چوار كه‌س ژى ژلایێ تیمێن به‌ره‌ڤانیا باژێرى دناڤ ئاڤاهیان هاتینه‌ رزگاركرن، هه‌تا نوكه‌ ته‌رمێ ئێك ژ وان كه‌سێن خه‌ندقى نه‌هاتیه‌ دیتن).

ناڤبرى دیاركر ژى كو ژ ئه‌نجامێ روودانێن ئاگرى ل سنوورێ پارێزگه‌ها دهۆك ب كوژمێ چوار میار و 500 ملیون دیناران زیان ب وه‌لاتیان و جهێن گشتى كه‌فتینه‌، ژ وانان دوو هزار ته‌نێن گه‌نم و جه‌هێ وه‌لاتیان بویه‌ و پرانیا ئه‌گه‌رێن روودانان ژى دزڤرن بو نه‌هوشیاریا وه‌لاتیان و كێمیا رێنمایێن هوشیاركرنێ و نه‌ شاره‌زایا وه‌لاتیان بو مه‌له‌ڤانیان.