ئه‌ڤرۆ نيوز:
په‌يڤدارێ حوكمه‌تا هه‌رێما كوردستانێ راگه‌هاند، رۆژا دوشه‌مبى 9/9/2019 بهێنڤه‌دانا فه‌رمى يه ل هه‌موو داموده‌زگه‌هێن حوكمه‌تێ.
جوتيار عادل، په‌يڤدارێ فه‌رمى يێ حوكمه‌تا هه‌رێما كوردستانێ ئه‌ڤرۆ ئه‌ينيێ 6/9/2019 راگه‌هاند” ب هه‌لكه‌فتا رۆژا 10 مه‌حه‌ره‌مێ كو دبيته رۆژا دوشه‌مبى يا داهاتى 9/9/2019 دێ بيته بهێنڤه‌دانا فه‌رمى ل هه‌موو داموده‌زگه‌هێن حوكمه‌تێ”.
گۆت ژى” رۆژا ئێكشه‌مبى 8/9/2019 ده‌واما ئاسايى يه ل هه‌موو داموده‌زگه‌هێن حوكمه‌تێ و ب هيچ جۆره‌كى نابيته بهێنڤه‌دان”.
ئه‌ڤرۆ نیوز:
وه‌زاره‌تا پلاندانانێ ل هه‌رێما كوردستانێ به‌لاڤكر كو ب مه‌ره‌ما رێكخستنا ئاراستا گۆتارا وه‌زاره‌تێ، بریار هاته دان كو بێ رازیبوونا وه‌زاره‌تێ نابیت فه‌رمانبه‌رێن وێ داخۆیانیان بۆ ده‌زگه‌هین راگه‌هاندنێ بده‌ن.
ل دووڤ نڤیساره‌كا وه‌زاره‌تا پلاندانانێ كو ل رۆژا 3/9/2019 ب ئیمزایا ره‌شید مه‌حمود وه‌زیرێ پلاندانانێ هاتیه ده‌ركرن وتێدا رادگه‌هینیت” ب مه‌ره‌ما رێكخستنا گۆتارا وه‌زاره‌تێ و مامه‌له‌كا ته‌ندروست ل گه‌ل ده‌زگه‌هین راگه‌هاندنێ، مه بریار دا كو هیچ فه‌رمانبه‌ره‌ك ب هه‌موو پلێن فه‌رمانبه‌ریێن خوه ڤه داخویانى و پشكداریێ د هیچ به‌رنامه‌كى دا نه‌كه‌ن كو په‌یوه‌ندى ب كار و چالاكیێن وه‌زاره‌تێ ڤه هه‌بیت بێ وه‌رگرتنا رازیبوونا مه”.
ئه‌ڤرۆ نیوز:
رێڤه‌به‌رێ گشتى یا پۆلیسێن هاتنوچوونێ ل عیراقێ راگه‌هاند، هه‌ر كه‌سه‌كێ مۆبایلێ ل ده‌مێ هاژۆتنا ترۆمبێلێ بكاربینیت دێ ب گۆژمێ 100 هزار دیناران هێته سزادان.
لیوا زوهێر عه‌باده، رێڤه‌به‌رێ گشتى یێ پۆلیسێن هاتنوچوونێ ل عیراقێ بۆ كه‌نالێ دیجله زێده‌تر گۆت” هه‌ر كه‌سێ راسته‌وخوه پاره‌ى ب پۆلیسێن هاتنوچوونێ بده‌ت دێ ب به‌رتیل هیته حسابكرن”.
دیاركر ژى” هه‌ر شوفێره‌كێ ل ده‌مێ 72 ده‌مژمێران دا سزایێ خوه بده‌ت دێ بۆ ب نیڤى هێته هژمارتن”.
ئاماژه كر ژى”دێ كار ب ڤان بریاران ل 6/10/2019 هێته كرن”.
ئه‌ڤرۆ نیوز:
لژنا دووفچوونا دەرمانان ب سەرۆکاتیا جەهوەر عەلی قایمقامێ قەزا دهۆکێ ئەڤرۆ پێنجشه‌مبى ۲۰۱۹/۹/٥ ل تاخێ شێلێ ل باژێرێ دهۆکێ كۆگەهەکا دەرمانێین قەچاخ گرت.
جەهوەر عەلی، قایمقامێ قەزا دهۆکێ دیاركر كو ئەڤە دەمەکە پشکا ئابوری ل ئاسایشا دهۆکێ دووفچوونا كۆگەهەکا دەرمانان دکەت کو جهەکێ نەگونجای وهێژایە وچو رێنمایێن لژنێ تێدا نەبوون وگۆت” د ڤێ كۆگەهێ دا چەندین جۆرێن دەرمانان هەبوون كو پتریا وان ب رێیێن قەچاخ ونە قانوونی هاتینه ود قەدەغەکرینە و ئیناینە ودفرۆشتە دەرمانخانان”.
قایمقامێ قەزا دهۆکێ دیارکر” دێ خودانێ كۆگەهێ هێتە رەوانەکرن بۆ دادگەهێ وپێرابونیێن قانوونى دێ د دەرهەق دا هێنە وەرگرتن”.
ئه‌ڤرۆ نیوز:
سه‌رۆك مه‌سعود بارزانى ئه‌ڤرۆ پێنجشه‌مبى 5/9/2019 ب هه‌لكه‌فتا سالڤه‌گه‌را داستانا خواكورك په‌یامه‌ك به‌لاڤكر.
سه‌رۆك بارزانى د په‌یاما خوه دا گۆت” ئه‌ڤرۆ 31 سالڤه‌گه‌را داستانا خواكوركه، د وێ داستانێ دا پێشمه‌رگه‌ى ب خوراگرى قوربانیدان بۆ دۆژمن و داگیركه‌رى سه‌لماند كو ئیرادا قوربانیدانێ ژ هه‌موو چه‌كه‌كى ب هیزتره و سه‌ركه‌فتن بۆ وانه یێن خودان دۆزه‌كا ره‌وا”.
سه‌رۆك بارزانى گۆت ژى” ل داستانا خواكوركى سه‌ره‌راى نه به‌رامبه‌رى د چه‌كى و له‌شكرى دا پێشمه‌رگه‌ى شیا گورزه‌كێ مه‌زن ل دوژمنى بده‌ت و ئومێد د ناخێ گه‌لێ كوردستانێ دا ب زیندى هێلا”.
ئه‌ڤرۆ نيوز:
ئه‌ڤرۆ پێنجشه‌مبى 5/9/2019 لژنا دووڤچوونا بازارى ل قايمقاميا قه‌زا دهۆكێ چه‌ندين كۆمپانيێن كه‌ره‌ستێن خوارنێ ل باژێرێ دهۆكێ ب گوژمەکێ پارەی سزادان.
ملله‌ت زكرى، ئه‌ندامێ لژنا دووڤچوونا بازارى دياركر” د بەردەوامیا دووفچوونا بازاری دا، ئەڤرۆكۆمپانیا (گیز) بگۆژمێ مليۆن دیناران هاتە سزادان ژبەر هەبوونا نێزیکی (۳۰۰)كيلۆیێن چەرەزاتێن خراب بووی و چەرەزات ژی هاتن دەستەسەرکرن”.
زێده‌تر گۆت” كۆمپانیا (چەلو) ژبەر کو چەندین کارتونیێن چبسا دگەل رونێ ترومبێلان د ئێک کوگا ڤە بوون ب گۆژمێ (٥۰۰)هزار دیناران هاتە سزادان”.
خوياكر” هەبوونا چەندین تەنێن پسكێت وشەربەتا ئکسپایر ل كۆمپانیا (بەروشکی) ب مليۆن دیناران هاتە سزادان وکەره‌ستە ژی هاتن ده‌سته‌سه‌ركرن وکومپانی ژی هاتە داخستن”.
دياركر ژى” خوارنگەها سەرکەت ب (۲۰۰)هزار دیناران هاتە سزادان ژبەر نەپێگريكرنێ ب رێنمایێن لژنێ”.
بۆ گه‌هاندنا هه‌ر گازنده‌كێ بۆ لژنا دووڤچوونا بازارى ل قايمقاميا قه‌زا دهۆكێ وه‌لاتى دشێن په‌يوه‌نديێ ب ڤێ هژمارێ بكه‌ن :
(۰۷٥۰۱٦۱۲٦۲۲)
ئه‌ڤرۆ نیوز:
سه‌رۆك مه‌سعود بارزانى ئه‌ڤرۆ پێنجشه‌مبى 5/9/2019 پێشوازى ل سه‌لیم جبوورى، ئه‌میندارێ گشتیێ حزبا هه‌ڤپه‌یمانیا مه‌ده‌نى بۆ چاكسازیێ یا عیراقى كر.
د دیداره‌كێ دا دووماهى گۆرانكاری و پێشهاتێن سیاسى ل سه‌ر ئاستێ عیراقێ وده‌ڤه‌رێ هاتنه به‌حسكرن و جبوورى رۆلێ سه‌رۆك بارزانى و پارتى دیموكراتى كوردستان د راستڤه‌كرنا پرۆسا سیاسى و سه‌قامگیریێ و ئاڤه‌دانكرنا ده‌وله‌تا مه‌ده‌نى بلند نرخاند.
هه‌روه‌سا دووپاتى ل سه‌ر به‌رده‌وامیا په‌یوه‌ندیێن د ناڤبه‌را هه‌ردولا و هه‌ماهه‌نگیا سیاسى و په‌رله‌مانى هاته كرن.
ئه‌ڤرۆ نيوز:
ل دووڤ نڤيساره‌كێ كو ل 29/8/2019 ب ئيمزا رێبه‌ر ئه‌حمه‌د وه‌زيرێ ناڤخوه ل هه‌رێما كوردستانێ هاتيه ده‌ركرن، تێدا ئاگه‌هداريا هه‌موو فه‌رمانبه‌رێن سه‌ر ب وه‌زاره‌تا ناڤخوه دكه‌ت و رادگه‌هينيت، ل چو قانوون و رێنمايه‌كا تايبه‌ت ب هێزێن ئاسايشا ناڤخوه و فه‌رمانبه‌رێن شارستانى نه‌هاتيه مووچه‌ى وه‌ربگريت و ئه‌رك و ده‌واما خوه يا رۆژانه بجه نه‌ئينيت، ژ به‌ر وێ چه‌ندێ هه‌وه ئاگه‌هدار دكه‌ين كو پێدڤيه هه‌موو ئه‌فسه‌ر و كارمه‌ند و فه‌رمانبه‌رێن شارستانى يێن سه‌ر ب ميلاكێ وه‌زاره‌تا ناڤخوه ڤه، رۆژانه بچنه ده‌واما فه‌رمى يا خوه بۆ ئه‌نجامدانا ئه‌ركێن خوه، به‌رۆڤاژى وێ چه‌ندێ رێڤه‌به‌رێ راسته‌وخوه دێ به‌رپرسيار بيت و روو ب روويێ پێرابوونێن قانوونى بيت.
ئەڤرۆ نیوز ، زنار تۆڤی:
ل شەڤا دەربازبووى تۆپخانا سۆپایێ تورکیا گوندێ بێدوهێ یێ سەر ب ناحیا کانی ماسێ یێ سەر ب قەزا ئامێدیێ ڤە تۆپ بارانکریە و تۆپەک ل مالا وەلاتیەکێ دایە.
عاشۆر وەلاتیەکێ گوندێ بێدۆهێ یە بۆ ئەڤرۆ نیوز دیار کر: کو ل شەڤا بوری ئەو ل گوندی بوویە دەما هاتیە تۆپ بارانکرن و ل دەمژمێر 12 شەڤا بوری تۆپخانا سۆپایێ تورکیا گوندێ بێدوهێ ل ناحیا کانى ماسێ توپبارانکریە د ئەنجامێ وێ توپبارانێ دا تۆپەک ب مالەکێ کەفتیه و زیانێن مەزن ب وێ مالێ کەفتینە و هەروەسا لدووڤدا سۆپایێ تورکیا ب چەکێ هوور تەقەژی کریە، لێ وێ تۆپبارانێ چ زیانێن گیانی نەگەهاندینە وان و دیار کر ژی رۆژانە ئەڤ دەڤەره دهێتە تۆپباران کرن ژ ئالیێ سۆپایێ تورکیا ڤە.
ئه‌ڤرۆ نيوز:
لژنا دارايى ل په‌رله‌مانێ كرودستانێ دێ سكالايێ ل سه‌ر قانوونه‌كا رێڤه‌به‌ريا دارايى ل عيراقێ تۆمار كه‌ت، چونكو قانوون هه‌ڤدژى دستوورێ عيراقێ يه.
د قانوونێ دا هاتيه كو هه‌رێما كوردستانێ پێدڤيه پرۆژێ قانوونا بوودجا خوه ب هنێريته وه‌زاره‌تا دارايى هه‌تا بهێته په‌سه‌ندكرن، به‌لێ د دستوورى دا هاتيه كو هه‌رێما كوردستانێ دشێت ل په‌رله‌مانێ خوه، بوودجا خوه په‌سه‌ند بكه‌ت. ئه‌ڤه ژى د وى ده‌مى دا دبيت كو به‌غدا پشكا بوودجا هه‌رێما كوردستانێ ژ بوودجا گشتى ديار بكه‌ت.
بۆ ڤێ مه‌ره‌مێ ژى نها لژنا دارايى ل په‌رله‌مانێ كوردستانێ رێكارێن قانوونى گرتينه به‌ر بۆ تۆماركرنا سكالا قانوونى ل دژى ڤێ بڕيارێ.
نيشاندان