دوهی سێشەمبی 23/9/2025، نێچیرڤان بارزانی، سەرۆكێ هەرێما كوردستانێ ل گەل ئەكیرا ئیندۆ، بالیۆزێ ژاپۆنێ ل ئیراقێ، هەڤبەندیێن چاپۆنێ ل گەل ئیراقێ و هەرێما كوردستانێ، رەوشا گشتییا ئیراقێ، هەڤبەندیێن هەولێر – بەغدا و بەرهەڤیێن هەلبژارتنێن داهاتی یێن جڤاتا نوونەرێن ئیراقێ گەنگەشەكر.
سەرۆكاتییا هەرێما كوردستانێ د بەیاننامەیەكێدا بەلاڤكر» د دیدارەكێدا كو قۆنسلێ چاپۆنێ ل هەرێما كوردستانێ بەرهەڤبووی، هەڤبەندیێن چاپۆنێ ل گەل ئیراقێ و هەرێما كوردستانێ ب جهێ گرنگیێ بۆ هەردو ئالییان هەژمارت و دوپاتی ل بهێزكرن و بەرفرەهكرنا وارێن هاریكارییا هەڤپشك د ناڤبەرا واندا كر».
سەرۆكاتییا هەرێما كوردستانێ دیاركر ژی»هەردو ئالییان بەرهەڤی و كار و چالاكیێن كۆمپانیێن چاپۆنی ل ئیراقێ و هەرێما كوردستانێ ب گرنگ دانا و رۆناهی ئێخستە سەر وان وارێن كو دشیاندایە چاپۆن وەبەرهێنانێ تێدا بكەت. هەر سەبارەت ڤێ چەندێ نێچیرڤان بارزانی رێز و سوپاسی بۆ هاریكاریێن چاپۆنێ و رۆل و بەرهەڤی و چالاكیێن كۆمپانیێن وێ ل ئیراقێ و هەرێما كوردستانێ دوپاتكر».
دووماهی پێشهاتێن رۆژهەلاتا ناڤین و دەرئەنجامێن وان ل سەر ئیراقێ و وەلاتێن دەڤەرێ، تەوەرەكێ دی یێ دیدارێ بوو.

دوهی سێشەمبی 23/9/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل جاشوا هاریس، كاربڕێڤەبەرێ بالیۆزخانەیا ئەمریكا ل ئیراقێ كر.
ب گۆڕەی بەیاننامەیەكا حوكمەتا هەرێما كوردستانێ» د كۆمبوونەكێدا، كو وێندی گرین، قونسلا گشتییا ئەمریكا ل هەرێما كوردستانێ بەرهەڤبووی، بیر و بۆچوون ل دۆر دووماهی گوهۆڕین و پێشهاتێن رەوشا گشتییا ئیراقێ و دەڤەرێ و پێشڤەبرنا هەڤبەندیێن هەرێما كوردستانێ و ئەمریكا هاتنە لێكگۆهارتن».
حوكمەتا هەرێما كوردستانێ د بەیاننامەیا خوە دا دیاركر ژی» سەرۆكێ حوكمەتا هەرێمێ پیرۆزباهییا دەستبكاربوونێ ل كاربڕێڤەبەرێ بالیۆزخانەیا ئەمریكا كر و هیڤییا سەركەفتنێ بۆ خواست و دوپاتی ل گرنگییا زێدەتر ب هێزكرنا هەڤبەندیێن هەردو ئالییان كر».
بەیاننامەیا حوكمەتا هەرێمێ ئاماژەكر ژی» جاشوا هاریس، باس ل پێگەهێ گرنگ یێ هەرێما كوردستانێ وەك هەڤپشكەكا ستراتیژی یا ئەمریكا ل دەڤەرێ كر و پشتەڤانی و خواستا وەلاتێ خوە ژی بۆ ب هێزتركرنا هەڤبەندییان ل گەل هەرێما كوردستانێ د وارێن جۆرا و جۆر دا دوپاتكر».
حوكمەتا هەرێما كوردستانێ ئاماژە ب وێ چەندێ ژی كر» هەردو ئالی د هەڤڕابوون ل سەر وێ چەندێ هنارتنا پەترۆلا هەرێما كوردستانێ د زووترین دەمدا دەست پێ بكەت و حوكمەتا فیدرالی، مووچە و شایستەیێن دارایی یێن هەرێما كوردستانێ بهنێریت».

دوهی سێشەمبی 23/9/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل ئەكیرا ئیندۆ، بالیۆزێ چاپۆنێ ل ئیراقێ كر.
ب گۆڕەی بەیاننامەیا حوكمەتا هەرێما كوردستانێ» د دیدارەكێدا، دانوستاندن ل دۆر پێشڤەبرنا هەڤبەندیێن چاپۆنێ و هەرێما كوردستانێ و رەوشا گشتییا ئیراقێ و بەرهەڤیێن هەلبژارتنێن داهاتی یێن جڤاتا نوونەرێن ئیراقێ هاتە كرن».
ئاماژە ب وێ چەندێ ژی هاتە كرن» بالیۆزێ چاپۆنێ ل ئیراقێ باس ل كار و چالاكی و پڕۆژەیێن وەلاتێ خوە ل هەرێما كوردستانێ كر كو ب رێیا ئاژانسا جایكا، چەندین پڕۆژەیێن جۆرا و جۆر ئەنجام ددەن».
حوكمەتا هەرێما كوردستانێ د بەیاننامەیا خوە دا باس ل وێ چەندێ ژی كر» سەرۆكێ حوكمەتا هەرێما كوردستانێ، رێز وسوپاسییا هەرێما كوردستانێ بۆ هاریكاری و پشتەڤانی و پڕۆژەیێن چاپۆنێ دەربڕی و دوپاتی ل گرنگییا مفا وەرگرتنێ ژ شارەزایی و ئەزموونا چاپۆنێ د وارێن پیشەسازی و پەروەردەیی و گەشەپێدانا ئابووری كر».

سەرۆكێ حوكمەتا هەرێما كوردستانێ سەرەخوەشی ل بنەمالا ئەكبەر حاجی رۆستەم كر و ب (توندترین شێوە) تیرۆركرنا وی پرۆتەستۆ كر.
دوهی سێشەمبی 23/9/2025، مەسرور بارزانی، سەرۆكێ حوكمەتا هەرێما كوردستانێ د پەیامەكا بەهیداریێ دا راگەهاند» سەرەخوەشییا خوە ئاراستەی بنەمال و كەسوكارێن كەساتیێ نیشتمانپەروەرێ ناڤدارێ گەرمیان (ئەكبەر حاجی رۆستەم) دكەم و هەڤپشكێ خەما وانم و ب توندترین شێوەژی تیرۆكرنا وی پرۆتەستۆ دكەم».
سەرۆكێ حوكمەتا هەرێما كوردستانێ دوپاتكر» پێدڤییە دامودەزگەهێن دەڤەرێ ب زووترین دەم، ڤەكۆلینێن پێدڤی بۆ ڤەدیتنا تاوانباران بكەن و پێرابوونێن قانوونی وەربگرن».
مەسرور بارزانی ل دووماهییا پەیاما خوە دا گوت» خودایێ مەزن گیانێ رەحمەتی ب بەحەشتێ شاد بكەت و ئارامییا ب بنەمال و دۆست و هەڤالێن وی ببەخشیت».

حوكمەتا ئیراقا فیدرال و حوكمەتا هەرێما كوردستانێ ل سەر دەستپێكرنا هنارتنا پەترۆلا هەرێما كوردستانێ ب رێیا توركیا رێككەفتن.
ئاژانسا رویتەرز ژ زاردەڤێ دو بەرپرسێن وەزارەتا پەترۆلا ئیراقێ بەلاڤكر» حوكمەتا ئیراقا فیدرال و حوكمەتا هەرێما كوردستانێ ل گەل كۆمپانیێن پەترۆلی گەهشتنە رێككەفتنێ بۆ دەستپێكرنا هنارتنا پەترۆلا خام ب رێكا بەندەرێ جەیهان یێ توركی».
ئەڤ چەندە رێ ددەتە هنارتنا نێزیكی 230 هزار بەرمیلێن پەترۆلێ د رۆژەكێدا.
ئاژانسا رویتەرز ژ زاردەڤێ بەرپرسەكێ وەزارەتا پەرتۆلا ئیراقێ ڤەگوهاست» ل رۆژا سێشەمبی مە دەست ب پێرابوونێن تەكنیكی كر بۆ بەرهەڤكرنا كارێن بۆرییا پەترۆلێ و پێشبینی دهێتە كرن د دەمێ 48 ساتاندا هنارتنا پەترۆلا هەرێما كوردستانێ بهێتە دەستپێكرن».
ب گۆڕەی بەرپرسێن ئیراقی كو ئاگەهداری رێككەفتنێ نە ل پلانا بەراهییێ داخواز ژ حوكمەتا هەرێما كوردستانێ هاتیە كرن پێگیر بیت ب گەهاندنا ب كێمی 230 هزار بەرمیلان د رۆژەكێدا ب كۆمپانییا (سۆمۆ) هەڤدەم 50 هزار بەرمیلێن دی ژی د رۆژەكێدا بۆ بكارئینانا ناڤخوەیێ دێ هێنە تەرخانكرن.
ل دووڤ رێككەفتنا سێقۆلی د ناڤبەرا حوكمەتا ئیراقا فیدرال و حوكمەتا هەرێما كوردستانێ و كۆمپانیێن پەترۆلی ل هەرێما كوردستانێ، بازرگان و كۆمپانی دشێن پەترۆلێ ب بهایێ كۆمپانییا (سۆمۆ) ل بەندەرێ جەیهان یێ توركی بكڕن.

سەرۆك مەسعود بارزانی، دوهی ل سەلاحەدین پێشوازی ل شاندەكێ‌ هەڤپەیمانیا «ئەساس» یا ئیراقی ب سەرۆكاتیا محسن مەندەلاوی كر.
د دیدارێ‌ دا بیروبۆچوون ل دۆر رەوشا سیاسی یا ئیراقێ‌ و هەلبژارتنێن داهاتی یێن جڤاتا نوونەرێن عیراقێ‌ لێك گوهاڕتن.
هەر د ڤێ‌ دیدارێ‌ دا، دوپاتی ل سەر هەماهەنگیا د ناڤبەرا هێز و لایەنێن سیاسی دا هاتە كرن.
هەر دوهی ب هەمان مەبەست محسن مەندەلاوی كو جگێرێ‌ سەرۆكێ‌ جڤاتا نوونەرێن ئیراقێ‌ یە ژی ل گەل نێچیرڤان بارزانی، سەرۆكێ‌ هەرێما كوردستانێ‌ كۆمبوو و رەوشا پەیوەندیێن هەرێما كوردستانێ‌ و ئیراقێ‌ دیسا هەلبژارتنێن جڤاتا نوونەران هێڤێنی دانوستاندنا وان بوو.
هەر د دیدارا ناڤبری دا ل گەل مەسرور بارزانی سەرۆكێ‌ حوكمەتا هەرێما كوردستانێ‌، دوهی ل هەولێرا پایتەخت، دوماهی گوهۆڕین و پێشهات و رەوشا گشتییا ئیراقێ و بەرهەڤیێن هەلبژارتنێن جڤاتا نوونەران هاتنە گەنگەشەكرن.
د وێ‌ كۆمبوونێ دا كو شاخەوان عەبدوللا، جێگرێ سەرۆكێ جڤاتا نوونەرێن ئیراقێ ژی بەرهەڤببوو،

دوهی دوشەمبی 22/9/2025، نێچیرڤان بارزانی، سەرۆكێ هەرێما كوردستانێ، پێشوازی ل موحسن مەندەلاوی، جێگرێ ئێكێ یێ سەرۆكێ جڤاتا نوونەرێن ئیراقێ و شاندەكێ د گەلدا كر كو ژ جێگرێ دویێ یێ سەرۆكێ جڤاتا نوونەرێن ئیراقێ و هەژمارەكا ئەندامێن جڤاتا ناڤبری پێكهاتبوون.
سەرۆكاتییا هەرێما كوردستانێ د بەیاننامەیەكێدا بەلاڤكر» د كۆمبوونەكێدا رەوشا گشتییا ئیراقێ، پرۆسەیا سیاسی و هەلبژارتنێن داهاتی یێن جڤاتا نوونەرێن ئیراقێ، كار و بەرنامەیێن جڤاتا نوونەران، هەڤبەندیێن هەولێر – بەغدا و رەوشا دەڤەرێ گەنگەشەكر» .
سەرۆكاتییا هەرێما كوردستانێ دیاركر ژی» هەردو ئالییان دوپاتی ل گرنگییا چارەسەركرنا كێشەیێن ئیراقێ، ب تایبەتی چارەسەركرنا كێشەیێن هەولێر – بەغدا ل سەر بنەمایێ دەستووری و رێككەفتنان كر كو د بەرژەوەندییا ئارامییا وەلاتی و پێشكەفتنا وی دایە».
سەبارەت ڤێ چەندێ سەرۆكێ هەرێما كوردستانێ سوپاسییا هەموو وان كەسایەتی و ئالییان كر كو كاری بۆ چارسەەركرنا كێشەیان دكەن، هەروەسا پشتەڤانییا خوە بۆ بزاڤان و تێكگەهشتنا حوكمەتا هەرێما كوردستانێ و حوكمەتا فیدرالی دەربارەی پرسا شایستەیێن دارایی و مووچەیێ فەرمانبەرێن هەرێما كوردستانێ، دوپاتكر.
هەردو ئالی هەڤڕابوون ل سەر گرنگییا ئەنجامدانا هەلبژارتنێن داهاتی یێن جڤاتا نوونەرێن ئیراقێ و باس ل بەرهەڤییان كر. ل دۆر ڤێ چەندێ هەردو ئالی پێشڤەبرن ب پرۆسەیا دیموكراسی ب پێدڤی و گرنگ بۆ پاراستنا ئارامییا وەلاتی هەژمارت.
گرنگییا كارێ هەڤپشك و هاریكارییا د ناڤبەرا پێكهاتە و ئالیێن سیاسی یێن وەلاتی و چەند پرسێن دی یێن جهێ گرنگییا هەڤپشك، تەوەرەكێ دی یێ كۆمبوونێ بوو.

دوهی دوشەمبی 22/9/2025، مەسرور بارزانی، سەرۆكێ حوكمەتا هەرێما كوردستانێ، پێشوازێ ل شاندەكێ جڤاتا نوونەرێن ئیراقێ ب سەرۆكاتییا موحسن مەندەلاوی، جێگرێ ئێكێ یێ سەرۆكێ جڤاتا نوونەران كر.
د كۆمبوونەكێدا كو شاخەوان عەبدوللا، جێگرێ سەرۆكێ جڤاتا نوونەرێن ئیراقێ بەرهەڤبووی، دوماهی گوهۆڕین و پێشهات و رەوشا گشتییا ئیراقێ و بەرهەڤیێن هەلبژارتنێن جڤاتا نوونەران هاتنە گەنگەشەكرن.
هەردو ئالی هەڤڕابوون ل سەر پێدڤی و گرنگییا چارەسەركرنا كێشەیێن هەرێما كوردستانێ و حوكمەتا فیدرال ل سەر بنەمایێ رێزگرتنێ ل سیستەمێ فیدرالی و قەوارەیێ دەستووریێ هەرێما كوردستانێ و دابینكرنا مافێن دەستووری و شایستەیێن دارایی یێن هەرێما كوردستانێ.

دیدار/ دلۆڤان ئاكرەیی

بریاردەرێ فراكسیونا پارتی دیموكراتی كوردستانێ ل جڤاتا نوونەرێن ئیراقێ دیاركر: پارتی نابیت ب ساناهی بچیتە بن بارێ پێكئینانا كابینەیا نوو یا حوكمەتا ئیراقێ و پێدڤییە هەرێمێ مەرج هەبن چونكو نییەتا حوكمەتا ئیراقێ یا باش نەبوویە.
شوان كەلاری، بریاردەرێ فراكسیونا پارتی دیموكراتی كوردستان ل جڤاتا نوونەرێن ئیراقێ سەبارەت ب پشكدارییا پارتی د حوكمەتا نوو یا ئیراقێدا بۆ رۆژنامەیا (ئەڤرۆ) گوت» نابیت ل كابینەیا بهێت یا حوكمەتا ئیراقێ پارتی ب ساناهی بچیتە بن ربارێ پێكئینانا وێ و دەنگی ل سەر بدەت، بەلكو پێدڤییە ل گەل حزبێن دی یێن كوردستانی ب ئێك پاكێج بەری پێكئینانا حوكمەتێ كۆمەكا بابەت كێشەیان هەنە كۆ پێدڤییە بهێنە ئێكلاكرن، تاكو ئەو پرس ب ئێكجاری بهێنە چارەسەركرن، هەرچەندە ئیراق جهێ باوەریێ نینە، دەستووری بنپێ دكەت و رێككەفتنێن سیاسی بجهنائینیت، میناك پێدڤی بوو د كابینەیا محەمەد شیاع سوودانی دا رێككەفتن هاتبانە بجهئینان و د دەمێ شەش مەهاندا قانوونا پەترۆل و غازێ هاتبا دەركرن».
كەلاری گۆت ژی» ل حوكمەتا مەحەمەد شیاع سوودانی دا بڕیار بوو رێككەفتنا شنگالێ و مادەیا 140 یا دەستووری و بابەتێ بودجەی بهێنە چارەسەركرن و ل جڤاتا نوونەران دەنگ ل سەر هاتبا دان و رێككەفتن هاتبا كرن، بەلێ ئێك ژ گرفتێن ئیراقێ ئەوە رێز و بها بۆ رێككەفتنان نەمایە و ئەو وەلاتێ باوەری پێ نەما و رێزێ ل رێككەفتنان نەگریت باوەری ب وی وەلاتی نامینیت، بهایێ چو تشتان نامینیت و ئێدی بەر ب هەلوەشاندنێ و كارەساتان دچیت، لەوما گرنگە د هەر كابینەیەكا ئیراقێدا كورد ب ئێك پاكێج پرسان ئێكلا بكەن، چونكو بابەتێ مووچەی ل گەل كوردستانێ رێككەفتن ل سەر هاتبوو كرن و چبوو د ناڤا قانوونا بوودجەی دا، بەلێ
مە دیت ل دەمێ سالەكێ دا سێ مووچە هاتن، ب شێوەیەكی ئەم یێن مژوولكرین كو بتنێ ئەم ب هانا مووچەی بكەڤین و كەنگی دێ مووچە ژ بەغدایێ هێتە هنارتن».

رێككەفتنا سێقۆلی بۆ هنارتنا پەترۆلا هەرێما كوردستانێ هاتە ئیمزاكرن و ل نێزیك دێ دەست ب هنارتنا پەترۆلا كوردستانێ هێتە كرن.
دوهی دوشەمبی 22/9/2025، وەزارەتا سامانێن سروشتی ل حوكمەتا هەرێما كوردستانێ و وەزارەتا پەترۆلا ئیراقا فیدرال و كۆمپانیێن بەرهەمهێنەرێن پەترۆلا كوردستانێ، رێككەفتنا هنارتنا پەترۆلا هەرێما كوردستانێ ل هەولێرێ ئیمزاكر.
ل دووڤ پێزانینان، چاڤەڕێ دهێتە كرن ل كۆمبوونا ئەڤرۆ سێشەمبی 23/9/2025 یا جڤاتا وەزیرێن ئیراقێ، ئەو رێككەفتنا سێقۆلی ژ ئالیێ محەمەد شیاع سوودانی، سەرۆك وەزیرێن ئیراقا فیدرال بهێتە راگەهاندن و پاشی بڕگەیێن رێككەفتنێ بهێنە بەلاڤكرن.
ئەڤە د دەمەكیدایە دوهی دوشەمبی 22/9/2025، شاندەكێ تەكنیكیێ كۆمپانییا (پەترۆلا باكوور) یا ئیراقی سەرەدانا باژێرێ هەولێرێ كری، ب ئارمانجا ب دوماهیئانێ ب پێرابوونێن دەستپێكرنا هنارتنا پەترۆلا هەرێما كوردستانێ. شاندێ ناڤبری ل گەل وەزارەتا سامانێن سروشتی ل حوكمەتا هەرێمێ بۆ دەمێ چار ساتان كۆمببوو.
ل دووڤ پێزانینان، بڕیارە ئەو پەترۆلا رادەستی كۆمپانییا (سۆمۆ) دهێتە كرن، ب رێكا كۆمپانییا (پەترۆلا باكوور) یا ب سەر وەزارەتا پەترۆلا ئیراقێڤە بۆ بەندەرێ جەیهان یێ توركی بهێتە هنارتن.
ئەڤ پێشهاتە د دەمەكیدایە كو ل رۆژا ئێكشەمبییا بۆری 21/9/2025، پێشەوا هەورامانی، پەیڤدارێ حوكمەتا هەرێما كوردستانێ راگەهاندبوو» چاڤەڕێ دهێتە كرن ل رۆژا دوشەمبی 21/9/2025 رێككەفتنا سێقۆلی د ناڤبەرا وەزارەتا پەترۆلا ئیراقێ، وەزارەتا سامانێن سروشتی ل حوكمەتا هەرێما كوردستانێ و كۆمپانیێن بەرهەمهێنەرێن پەترۆلا كوردستانێ بهێتە ئیمزاكرن، ب مەبەستا هنارتنا پەترۆلا هەرێما كوردستانێ بۆ بەندەرێ جەیهان یێ توركی».
گوتبوو ژی» ل دەمەكێ گەلەك نێزیك رێككەفتنا سێقۆلی دێ هێتە ئیمزاكرن، چونكە دڤێت بەری كۆمبوونا جڤاتا وەزیرێن ئیراقێ ئەو رێككەفتنە بهێتە ئیمزاكرن».
ب گۆڕەی رێككەفتنێ، هەرێما كوردستانێ رۆژانە 230 هزار بەرمیلێن پەترۆلێ دێ رادەستی كۆمپانییا (سۆمۆ) كەت و دێ 50 هزار بەرمیل بۆ پێدڤییە ناڤخوەیی بكارئینیت.
ژ ئالیێ خوەڤە باسم خزەیر، بریكارێ وەزارەتا پەترۆلا ئیراقێ ل حەفتییا بۆری د بەیاننامەیەكێدا راگەهاندبوو» ل چەند رۆژێن داهاتی ل گەل حوكمەتا هەرێما كوردستانێ و كۆمپانیێن پەترۆلی ل كوردستانێ ل دۆر دەستپێكرنا هنارتنا پەترۆلا هەرێما كوردستانێ، دێ رێككەڤن، پەیڤدارێ حوكمەتا هەرێما كوردستانێ ژی دبێژیت: ب ئیمزاكرنا رێككەفتنا سێقۆلی د ناڤبەرا حوكمەتا فیدرال و حوكمەتا هەرێما كوردستانێ و كۆمپانیێن بەرهەمئینانا پەترۆلی ل هەرێمێ هیچ ئاستەنگەك ل پێشبەری هنارتنا مووچەیێ فەرمانبەرێن هەرێما كوردستانێ نامینیت».
بریكارێ وەزارەتا پەترۆلا ئیراقێ ئاماژە ب وێ چەندێ كر كو وەزارەتا پەترۆلێ یا بەرهەڤە بۆ هنارتنا پەترۆلا هەرێما كوردستانێ.
ناڤبری گوت ژی» دۆسێیا گرێبەستێن پەترۆلی یێن هەرێما كوردستانێ ژ ئالیێ وەزارەتا سامانێن سروشتی ل هەرێما كوردستانێ دهێنە بڕێڤەبرن، چونكە ژ ئالیێ هەرێما كوردستانێ و كۆمپانیێن بەرهەمهێنەرێن پەترۆلێ هاتینە ئیمزاكرن».
بریكارێ وەزارەتا پەترۆلا ئیراقێ دیاركر ژی كو وان ئاسانكاری و پێرابوونێن پێدڤی وەرگرتینە بۆ وێ چەندێ د زووترین دەمدا هنارتنا پەترۆلا هەرێما كوردستانێ دەست پێ بكەت و گوت» ل ل نێزیك دێ ل گەل كۆمپانیێن پەترۆلی و هەرێما كوردستانێ گەهینە رێككەفتنێ».