ئەڤرۆ نیوز ، عەلی حاجی :
كار ل سەر دروستكرنا دەوروبەرێن پرا دەلال بەردەوامە و هتا نوكە 30% ژ كارى هاتیه ئه‌نجامدان ، د دەما سەخبێریكرنێ دا، هند ژ سومبولێن نوو تایبەت ب مێژوویا پرێ ڤە هاتینە دیتن .
ئه‌ڤرۆ نيوز:
هه‌تا نوكه مووچێ حه‌فت هه‌يڤێن پێشمه‌رگه‌ى كو دبيته 476 مليار دينار ژ لايێ حوكمه‌تا عيراقێ بۆ هه‌رێما كوردستانێ نه‌هاتيه ڤرێكرن، ئه‌ڤه د ده‌مه‌كى دايه كو جڤاتا نوونه‌رێن عيراقێ ژ پرۆژێ بودجا سالا 2019 مووچٍێ پێشمه‌رگه‌ى جهگير كريه ب گۆژمێ 68 مليار ديناران هه‌يڤانه.
محه‌مه‌د ره‌زا، سه‌رۆكێ لژنا ئاسايش وبه‌رگريێ ل جڤاتا نوونه‌رێن عيراقێ بۆ كوردستان 24 گۆت” ل به‌رچاڤ وه‌رگرتنا قه‌هره‌مانيا پێشمه‌رگه‌ى دێ دووڤچوونێ بۆهنارتنا مووچێن وان كه‌ين”.
دهێته زانين به‌رهه‌ڤيێن پرۆژێ بودجا سالا 2020 يێن ده‌ستپێكرين، به‌لێ هێشتا چو برياره‌كێ مووچێ تايبه‌ت يێ پێشمه‌رگه‌ى يێ سالا 2019 ره‌وانه‌ى هه‌رێما كوردستانێ نه‌كريه.
ئەڤرۆ نیوز، حەمۆ محەمەد:
بەرپرسێ پشکا پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ دیار کر، د ھەیڤا خزیرانێ دا دو روودانێن کوشتنێ روودابوون و زەلامەک و ژنەک ھاتبوونە کوشت و کۆژمەکێ پارەی ژی ھاتبوو دزین و دبێژیت: ئەم شیاین بکوژێن ھەردو روودانان ل گەل باندێ دزیکەران دەستەسەر بکەین.
موقەدمێ مافپەروەر ھێمن سلێمان، بەرپرسێ پشکا پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ ئەڤرۆ ١/٧/٢٠١٩ د کۆنگرەکێ رۆژنامەڤانی دا دیار کر، ل رۆژا ٢١/٦/٢٠١٩ پۆلیس ھاتنە ئاگەھدارکرن کو کەلەخێ کەسەکی ل کۆمەلگەھا خانکێ ھاتیە دیتن و گۆت: “پشتی ئەفسەر و پۆلیسێن مە گەھشتینە جھێ روودانێ دەست ب ڤەکۆلینێ کر و دیاربوو کەسەک بناڤێ (ئەکرەم حەسەن) دژیێ (٣٨) سالیێ دا ھاتیە کوشتن کو ئاکنجیێ سەنتەرێ باژێرێ دھۆکێ بوو، مە کەلەخێ وی بۆ نۆشداریا داد ل دھۆکێ ھنارت بۆ زانینا ئەگەرێ دروست یێ گیان ژ دەستدانا وی”.
موقەدمێ مافپەروەر ھێمن سلێمان ھەر ل دۆر ڤێ روودانێ گۆت: “ھەر وێ رۆژێ رۆژا مە تەرم دیتی و ب شەڤ مە سێ کەس ب ئەگەرێ کوشتنا وی دەستەسەرکرن، پشتی ڤەکۆلینێ دیاربوو دو کەس د بێ گونەە بوون و کەسێ دیتر بکوژێ (ئەکرەم حەسەنی) بوو، بکوژی دیار کر: ھەڤژینا (ئەکرەم)ی ژی دەست دگەل تاوانێ ھەبوو و پەیوەندیەکا سۆزداریێ دگەل کەسەکێ دیتر ھەبوو، لەورا داخواز ژ بکوژی کربوو ھاریکار بیت بۆ کوشتنا ھەڤژینێ وێ، لەورا ھەڤژینا وی ژی ھاتیە دەستەسەرکرن و تاوانباران دانپێدان ب تاوانا خوە کریە و ل دووڤ بەندێ (٤٠٦) دێ ھێنە دادگەھکرن”.
ھێمنی خویا ژی کر، ل رۆژا ٩/٦/٢٠١٩ پۆلیسێن وان ھاتنە ئاگەھدارکرن کو (زەلامەک و ھەڤژینا) خوە قەستا باژێرێ مووسل کری و دیار نەمای و گۆت: “گومان بۆ مە دروستبوو کو روودانەکا کوشتنێ ب سەرێ وان ھاتبیت، لەو مە ھەماھەنگی دگەل پۆلیسێن نەھێلانا گۆنەھباریا ل مووسلێ کر، دیاربوو ژنەک ل سەنتەرێ مووسل ھاتیە کوشتن، پشتی وێنە بۆ مە ھاتینە ھنارتن دیاربوو ئەو ژنە یە ئەوا دگەل ھەڤژینێ خوە بەرزەبووی، د دووڤ دا مە ب ھەماھەنگی ل گەل پۆلیسێن مووسل بکوژێ وێ ژنێ کو ھەڤژینێ وێ ب خوە بوو دیار کر و ئەم شیاین وی کەسی ژ مووسل بەرەڤ ھەولێرێ بینین و ل ھەولێرێ دەستەسەر بکەین مە ڤەگوھاستە دھۆکێ و دانپێدان ب تاوانا خوە کر کو وی ھەڤژینا خوە ل مووسل ب گۆللێن دەبانجێ کوشتیە”.
موقەدمێ مافپەروەر ھێمن سلێمان د وی کۆنگرێ رۆژنامەڤانی دا خویا ژی کر، ل رۆژا ١٧/٦/٢٠١٩ دو کەسێن ب رەگەز عەرەب سەرەدانا نڤیسنگەھا نەھێلانا گونەھباریان ل سێمێلێ کر و دیار کرن کو چەند کەسەکان پتری ٥٠ ھزار دۆلارێن وان ب زووری ژ وان وەرگرتینە و رەڤینە و گۆت: “پشتی ڤەکۆلینان دیاربوو، ئەو ھەردو کەسێن عەرەب و ئەو کەسێن پارە ژێ ستاندین رێکەفتبوون مامەلێ ب پارێ بلۆک کری و ب نیڤ بھا ژێ وەرگرن، لێ وان کەسان بیسەک بۆ وان دانابوو و ٥٠ ھزار دۆلار و ٨٠٠ ھزار دینارێن عیراقێ ژێ ستاندن و گۆت: “پۆلیسێن مە شیان چار کەسان دەستەسەر بکەن ئەوێن ٥٠ ھزار برین، دیسا ھەردو کەسێن عەرەب ژی ھاتنە دەستەسەرکرن، ژ بەر کو تاوانباربوون ب مامەلەکرنێ ب پارێ بلوککری”.
گۆتژی: “وی باندێ دزیکەرا پلان دانابوو کو تۆمارێن وان یێن دەنگی ژی د مۆبایلێ دا ھەنە ١٠ کەسێن دی بڤی رەنگی بشەلینن و کۆژمێن مەزن یێن پارەی ژێ وەرگرن”.
ئەڤرۆ نیوز:
د. بەشیر حەداد جێگرێ سەرۆکێ پەرلەمانێ عیراقێ داخواز ژ سەرۆک وەزیرێن عیراقێ کریە کو پارێن جۆتیارێن هەرێما کوردستانێ یێن سالێن ٢٠١٤ هەتا ٢٠١٨ خەرج بکەت و هەروەسا داخواز کریە ژی کو پارێن قەرەبۆیا وان کەسان ل کوردستانێ ژی بهێتە رەوانەکرن کو ژ بەر لەهیان تووشی زیانێن مەزن هاتبوون.
جێگرێ سەرۆکێ پەرلەمانێ عیراقێ داخواز ژ سەرۆک وەزیران کریە ژی کو فەرمان بدەتە وەزارەت و ئالیان پەیوەندیدار دا پارێن پێدڤی بۆ هەرێما کوردستانێ بهێنە رەوانەکرن.
ئه‌ڤرۆ نيوز:
وه‌زاره‌تا پێشمه‌رگه راگه‌هاند گۆژمێ پێنج مليۆن ديناران دێ بۆ كه‌سوكارێن شه‌هيدێن شه‌رێ داعشێ وئێك مليۆن ديناران ژى بۆ چاره‌سه‌ريا بريندارێن وى شه‌رى.
جه‌بار ياوه‌ر، ئه‌ميندارێ گشتيێ وه‌زاره‌تا پێشمه‌رگه راگه‌هاند” د كۆمبوونه‌كێ دا ب ئاماده‌بوونا وه‌زيرێ ورێكارێ وه‌زاره‌تا دارايى وئابوورى ل هه‌رێما كوردستانێ وبه‌رپرسێن بلند ل وه‌زاره‌تا پێشمه‌رگه هاتيه ئه‌نجامدان، به‌حس ل مه‌زاختى وپێدڤيێن وه‌زاره‌تا پێشمه‌رگه هاته كرن ژ وان ژى وان شه‌هيد وبريندارێن شه‌رێ داعشێ كو هه‌تا نوكه پاره بۆ نه‌هاتيه مه‌زاختن”.
ياوه‌ر د داخۆيانيه‌كا رۆژنامه‌زڤانى دا گۆت ژى” ل شه‌رێ دژى تيرۆرستێن داعشێ 1726 پێشمه‌رگه شه‌هيد بوون، وه‌زيرێ دارايى وئابوورى سۆز يا داى كو كارێ به‌راهيێ يێ وان دابينكرنا پێنج مليۆن ديناران بيت بۆ مالباتێن سه‌ربلندێن شه‌هيدان، چونكى هه‌تا نوكه هژماره‌كا مه‌زن يا مالباتێن شه‌هيدان ئه‌و گۆژمێ پاره‌ى وه‌رنه‌گرتيه”.
ئه‌ڤرۆ نيوز:
راسپارديێ پێكئينانا كابينا نوو يا حوكمه‌تا هه‌رێما كوردستانێ مه‌سرور بارزانى ئه‌ڤرۆ دو شه‌مبى 1/7/2019 پێشوازى ل شانده‌كێ بلند يێ له‌شكريێ هه‌ڤپه‌يمانان ب سه‌رۆكاتيا جه‌نه‌رال ويچ جێگرێ فه‌رماندێ گشتيێ تيما هه‌ڤپشك يا ۆپه‌راسيۆنێن تايبه‌ت ل عيراقێ وسووريێ كر.
د كۆمبوونه‌كێ دا پێشهاتێن ده‌ڤه‌رێ ب گشتى وهه‌ماهه‌نگيا هێزێن هه‌رێما كوردستانێ وهه‌ڤپه‌يمانان هاته به‌حسكرن.
مه‌سرور بارزانى، زێده‌بارى ئاماژه‌دان ب رۆل وكاريگه‌ريا هه‌ماهه‌نگيا د ناڤبه‌را هێزا پێشمه‌رگه وهه‌ڤپه‌يمانان ل شه‌رێ دژى تيرۆرستێن داعشێ وبده‌ستڤه‌ئينانا ده‌ستكه‌فتێن له‌شكرى، دووپاتى ل پێدڤيا به‌رده‌واميا هه‌ماهه‌نگيا هه‌مه‌لايه‌نه د ناڤبه‌را هێزێن هه‌رێما كوردستانێ وهه‌ڤپه‌يمانان كر.
د به‌رامبه‌ر دا شاندێ بلند يێ هه‌ڤپه‌يمانان، زێده‌بارى سۆپاسكرنا هه‌رێما كوردستانێ بۆ هه‌ماهه‌نگيا و، هيڤيا سه‌ركه‌فتنێ بۆ مه‌سرور بارزانى خواست ل سه‌رۆكاتيكرنا كابينا نوو يا حوكمه‌تا هه‌رێما كوردستانێ ودووپات ژى كر كو به‌رده‌واميا هه‌ماهه‌نگيێ دێ رۆلێ خوه بينيت ل پاراستنا ده‌ستكه‌فتان ورێگرتنێ ل دياربوونا تيرۆرستان.
ئەڤرۆ نیوز، عەلی حاجی :
پشتی 3 رۆژان مایە دناڤ ئاڤا خابیری دا ل گوندێ دووكەرێ ، ئەڤرۆ دوشەمبێ دوماهی تەرمێ پێنچ كەسێن خەندقی هاتە دیتن .
خالد سەعید ، رێڤەبەرێ پشكا بەرەڤانیا باژێری ل زاخۆ بۆ ئەڤرۆ نیوز گۆت” ئەڤرۆ ئه‌م هاتینە ئاگەهدار كرن ل سەر دیتنا دووماهی تەرمێ وان پێنچ كەسێن ژ ئێك خێزان خەندقین ل دوكەرێ ئەو ژی تەرمێ (حەسەن قادر)ی بوو كو سەروكێ وێ خێزانێ بوو ، ئەو تەرمە ژلایێ وه‌لاتیان ڤە هاتبوو دیتن وبو نوشداريا داد هاتە رەوانە كرن”.
گۆت ژى” جودا ژ وێ روودانێ، د نوكە دا بتنێ ته‌رمێ دو كەسێن دی د ناڤ خابیری دا ماینە ئێك ژوان كچە و ئەوێ دی ژی گەنجەكێ زاخۆیە كو بریارە د ده‌مه‌كێ نێزیك دا هەوەكا دی یا مەزن بهێتە دەست پێكرن ب درێژيا خابیرێ زاخۆ بۆ ڤەدیتنا تەرمێ وان دو كەسان و ئەم ب هێڤینە بشێن وان تەرمان ببینن و ئەگەرێ سەەركیێ نەدیتنا وان دو تەرمان ژی شیلی بوونا ئاڤێ یە”.
ناڤهاتی گوت ژی : ب رێیا نڤیسارەكێ مە داخاز ژ قایممقامیا زاخۆ كری یە كو پشكەكا ئامیرێن پێشكەڤتی بو بەرەڤانیا باژٍێری ل زاخۆ دابین بكەت كو ئەو ئامیرە تایبەتن بۆ ڤەدیتنا تەرمێ وان كەسێن دخەندقن و دێ ئەو ئامیرە گەلەك هاریكار بن .
ئه‌ڤرۆ نيوز:
راگه‌هاندنا رێڤه‌به‌ريا پۆليسێن پارێزگه‌ها دهۆكێ ئه‌ڤرۆ ئێكشه‌مبى 30/6/2019 رۆهنكرنه‌ك ل دۆر ده‌سته‌سه‌ركرنا كۆميسه‌ره‌كێ پۆليسان ل قه‌زا زاخۆ به‌لاڤكر.
د وێ رۆهنكرنێ دا هاتيه، پشتی ل چەند دەزگەهێن راگەھاندنێ و سایت و تورێن جڤاکی بەلاڤ بوی کو ئەفسەرەکێ پولیسێن زاخو ژلایێ ئاسایشێ ڤە ھاتیە دەستەسەرکرن …ئەم وەکو رێڤەبەریا پولیسێن پارێزگەھا دھوک ئەڤی دەنگوباسی رەت دکەین و ب شاشی ل قەلەم ددەین و ھیچ ئەساسەك بۆ نینە، و یا دروست ب ڤی شێوێ ل خوارێ یە:-
د ماوێ بوری دا چەند پەیجەک ھەبوینە ب ناڤێن جودا جودا ناڤزراندن ئانکو( تشھیر) ب کەسایەتیێن دیارێن زاخو و چەند ئەفسەرو ھاولاتیان کرینە، بۆ کونترولکرنا ڤی بابەتی رێڤەبەرێ پولیسێن قەزا زاخو و رێڤەبەرێ ئاسایشا زاخو کومبوینە و بریار ھاتیە دان ب پێکئینانا لیژنەکێ ژ ئەفسەرێن پولیسێن نەھێلانا گونەھباریا و ئەفسەرێن ئاسایشێ ل زاخو ب سەرپەرشتیا ئەفسەرێ بنگەھێ پولیسێن زاخو.
دیڤچونا چەند گومانلێکریەکان ھاتە کرن دیاربویە پشتی چەندین بەڵگێن یاسایی، کومیسەرەکێ پولیسان ل بنگەھێ پولیسێن زاخو تومەتبارە و پشتی فەرمانا گرتنێ بۆ وی ژ دادگەهێ دەرکەفتی، ڤی کومیسەری ب خو خوه رادەستکریە.
دياركريه ژى” ب فەرمانا دادوەری ل دویڤ بەندێ (٢ل سەر ٦سالا٢٠٠٨) یاسایا خراپ بکارئینانا ئامیرێن پەیوەندیێ، نوکە ل بەشێ پولیسێن زاخو یێ دەستەسەرکریە و چەندین داخوازکار (مشتکی) ل سەر تومەتبارێ ناڤبری ھەنە و ژوان ھاولاتی و ئەفسەرێن پولیسان و ئاسایشێ ژی دگەل دانە”.
رێڤه‌به‌ريا پۆليسێن پارێزگه‌ها دهۆكێ د رۆهنكرنا خوه دا دبێژيت” داخواز ژ دەزگەھێن راگەھاندنێ دکەین بێ زانیاری ھیچ دەنگویەکی بەلاڤ نەکەن و ل پێش رویدانان نەکەڤن و ب بەرپرسیارەتی مامەلێ دگەل بویەران بکەن”.
ئه‌ڤرۆ نيوز:
برياره ل 7/7/2019 ده‌ست ب به‌لاڤكرنا مووچێ هه‌يڤا چار ل هه‌رێما كوردستانێ بهێته كرن ب ڤى شێوه‌ى:
- ئێك شه‌مبى 7/7/2019 ديوانا وه‌زاره‌تا پێشمه‌رگه .
- دوشه‌مبى 8/7/2019 مووچێ يه‌كه‌يێن 70 و 80 يێن پێشمه‌رگه‌ى.
- سێشه‌مبى 9/7/2019 وه‌زاره‌تا په‌روه‌ردێ.
- چارشه‌مبى 10/7/2019 وه‌زاره‌تا دارايى وئابوورى.
- پێنجشه‌مبى 11/7/2019 وه‌زاره‌تا ساخله‌ميێ.
- دو شه‌مبى 15/7/2019 وه‌زاره‌تێن (شه‌هيد وئه‌نفالكريان، كار و كاروبارێن جڤاكى) كه‌سوكارێن شه‌هيدان وئه‌نفالكريان، زيندانيێن سياسى، خودان پێدڤيێن تايبه‌ت.
هه‌روه‌سا وه‌كو خشتێ هه‌يڤێن بۆرى دێ مووچێ وه‌زاره‌تێن دى هێته به‌لاڤكرن.
ئه‌ڤرۆ نيوز:
سه‌رۆكێ جڤاتا پارێزگه‌ها دهۆكێ، فه‌هيم عه‌بدوللا راگه‌هاند، كاركرن بۆ باشتركرنا ره‌وشا كاره‌با دهۆكێ يا به‌رده‌وامه وبۆ كێمكرنا بهايێ پارێ موه‌ليدێن ئه‌هلى ژى داخوازيه‌ك ئاراسته‌ى وه‌زاره‌تا كاره‌بێ هاتيه كرن.
فه‌هيم عه‌بدوللا، سه‌رۆكێ جڤاتا پارێزگه‌ها دهۆكێ بۆ مالپه‌رێ فه‌رميێ پارتى گۆت” ژ به‌ر هه‌بوونا كێشه‌كێ د هێلێن ڤه‌گوهاستنا كاره‌بێ دا د ناڤبه‌را باژێرێن كوردستانى دا، رێژه‌كا كێمتر يا كاره‌بێ دگه‌هيته دهۆكێ به‌رانبه‌ر باژێرێن دى وحوكمه‌تا هه‌رێمێ ژى بۆ چاره‌سه‌ركرنا ڤێ كێشێ گاڤێن پێدڤى هاڤێتينه”.
گۆت ژى” ژ به‌ر وێ كێشێ، ل پارێزگه‌ها دهۆكێ ب گشتى رۆژانه 14 ده‌مژمێران كاره‌با نيشتمانى يا هه‌ى، به‌لێ ل پارێزگه‌هێن دى نێزيكى 19 ده‌مژمێران كاره‌با نيشتمانى يا هه‌ى، ئه‌ڤه ژى بوويه ئه‌گه‌ر وێ چه‌ندێ وه‌لاتى پارێ زێده‌تر بده‌نه خودانێن موه‌ليدێن ئه‌هلى”.
سه‌رۆكێ جڤاتا پارێزگه‌ها دهۆكێ راگه‌هاند ژى” ژ ئه‌گه‌رێ وێ بريارێ كو حوكمه‌تا هه‌رێما كوردستانێ بۆ چێكرنا هێلێن كاره‌بێ ده‌ركرى، د پێنج هه‌يڤێن داهاتى دا ئه‌و كێشه ب تمامى دێ چاره‌سه‌ر بيت، بۆ ڤان پێنج هه‌يڤان ژى مه داخواز ژ حوكمه‌تا هه‌رێمێ كريه كو رێژا پێنج مليۆن لترێن گازوايلێ بده‌ته موه‌ليدێن ئه‌هلى، يان ژى ئه‌و ويستگه‌هێن كاره‌بێ ئه‌و دكه‌ڤنه سنوورێ دهۆكێ، حوكمه‌ت ب شێوه‌كێ ده‌مكى يه‌كه‌يێن زێده‌تر بێخيته كارى بۆ وێ چه‌ندێ وه‌لاتى گۆژمه‌كێ كێمتر يێ پاره‌ى بده‌نه كاره‌با موه‌ليدان، يان ژى وه‌كو پارێزگه‌هێن دى پاره‌ى بده‌ن”.
نيشاندان