مەسرور بارزانی، جێگرێ سەرۆكێ پارتی دیموكراتی كوردستان د پەیامەكێدا راگەهاند» ب هەلكەفتا سالڤەگەڕا 72 یا دامەزراندنا ئێكەتییا ئافرەتێن كوردستانێ، پیرۆزباهیێ ل سكرتێر و ئەندامێن مەكتەبا سكرتارییەت و هەموو ئافرەتێن كوردستانێ دكەم و هیڤییا سەركەفتن و پێشكەفتنا بەردەوام بۆ دخوازم».
مەسرور بارزانی د پەیاما خوە دا ئاماژە ب وێ چەندێ ژی كر» ئێكەتییا ئافرەتێن كوردستانێ، دیرۆكەكا پڕ ژ سەروەری و پشكدارییەكا دیار و كاریگەر د شۆڕەش و خەباتا رزگاریخوازا گەلێ كوردستانێ دا هەبوو و قوتابخانەیەك بوو بۆ پێگەهاندنا چەندین ئافرەتێن خودان شیان و سەركردە. هیڤیدارم د درێژەپێدانێ ب خەبات و كاركرنا رێكخراوەییا خوە دا ژ پێخەمەت داكۆكیكرنێ ژ مافێن ئافرەتێن كوردستانێ و ماف و دەستكەفتێن گەلێ كوردستانێ بەردەوام و سەركەفتێ بن».

مەسرور بارزانی، سەرۆكێ حوكمەتا هەرێما كوردستانێ ل باژێرێ مەنامە پایتەختێ وەلاتێ بەحرەینێ، ل گەل عەبدوللتەیف بن راشد ئەلزەبیانی، وەزیرێ دەرڤە یێ بەحرەینێ كۆمبوو.
د كۆمبوونەكێدا كو وائیل بن ناسر ئەلموبارەك، وەزیرێ كاروبارێن باژێرڤانییان و چاندنا بەحرەینێ بەرهەڤ بوو، پێشڤەبرنا پەیوەندیێن هەرێما كوردستانێ و وەلاتێ بەحرەینێ د وارێن جۆرا و جۆر دا گەنگەشەكر.
گرنگییا پاراستنا ئاسایش وئارامییا ئیراقێ و هەرێما كوردستانێ و دوماهی پێشهاتێن رەوشا گشتییا دەڤەرێ و ب تایبەتی گوهۆڕینێن سووریێ، پشكەكا دی یا دانوستاندنان بوو.

دامەزرێنەرێ حزبا ئوممە یا ئیراقی راگەهاند: سەرۆك بارزانی دشێت چارەسەرییا كێشەیان بكەت و هەموو ئالیێن سیاسی یێن ئیراقی كۆمڤەكەت، هەروەسا دبێژیت: میلیشیا رێگرن ئیراق پێش بكەڤیت و دەولەت ژی ل بن گەفێن میلیشیێن بەرەیێ موقاوەمێ ناهێتە ئاڤاكرن.
میسال ئالۆسی، دامەزرێنەرێ حزبا ئوممە یا ئیراقی گۆت» میلیشیا ل ئیراقێ ب سەر ئالیێن سیاسی ڤەنە و ئالیێن سیاسی ژی ئەڤ حوكمەتە یا پێكئینای، دڤێت خوە ئێكلابكەن ئەو حوكمەتن یان میلیشیا».
میسال ئالۆسی سەرنج بۆ وێ چەندێ ژی راكێشا» بەردەوام ل دووڤ بەرسڤا پرسیارەكێدا دگەریێم ئایا ئیراقێ هێزا چەكداری هەیە، هەكە هەبیت، چ پێدڤی ب میلیشیا دكەت؟ ئایا دبیت حوكمەت بێژیت بۆخوە پاراستنێ پێدڤی ب میلیشیایە؟كو نەخێر پێدڤی پێ نینە، بەلكو میلیشیا رێگرن ئیراق پێش بكەڤیت و دەولەت ل بن گەفێن میلیشیێن بەرەیێ موقاوەمە ناهێتە ئاڤاكرن، لەوما ئیراق یا بوویە ئەو دەولەتا شكەستن خواری».
دامەزرێنەرێ حزبا ئوممە یا ئیراقی سەبارەت پەیاما سەرۆك بارزانی كو ل كۆربەندێ مێپس ل دهۆكێ پێشكێشكری، دوپاتكر» پێشنیازا سەرۆك مەسعود بارزانی بۆ دانوستاندنێن ئاشتیێ و پاراستنا ئاشتییا جڤاكی و بەردەوامبوونا پڕۆسەیا سیاسی ل ئیراقێ، یا واقعی و فەلسەفی بوو و سەرۆك بارزانی دشێت چارەسەرییا كێشەیان بكەت و هەموویان كۆمڤەكەت، چونكە پەیاما وی بۆ هەموو ئالیێن سیاسی یێن ئیراقێ بوو».

بارەگەهێ بارزانی بەلاڤكر، ل رۆژا ئێكشەمبی 8/12/2024 سەرۆك مەسعود بارزانی ل سەلاحەدین پێشوازی ل شێخ عەبدوللا حمێدی عەجیل یاوەر، شێخێ شێخێن شەممەر كر.
د دیدارەكێدا، بیر و بۆچوون ل دۆر رەوشا دەڤەرێن سنۆری یێن ئیراقێ و سووریێ و دوماهی پێشهات و گوهۆڕینێن دەڤەرێ هاتنە لێكگوهارتن.

نێچیرڤان بارزانی، سەرۆكێ هەرێما كوردستانێ، ب ڤەخواندنەكا فەرمی یا ئیمانوێل ماكرۆن، سەرۆكێ فرەنسا ل گەل 50 سەرۆك و سەركردەیێن وەلاتان هاتبوو داخوازكرن بۆ فرەنسا بۆ پشكداریكرنێ د رێوڕەسمێن دوبارە ڤەكرنا كاتێدرائییا نۆتردام ل پاریسێ.
دوبارە ڤەكرنا وێ كاتێدرائیێ، روودانەكا دیرۆكی بوو ژ بەر وی رێوڕەسمێ مەزن یێ بۆ هاتیە سازكرن، كو پاریس كریە ناڤەندەكا یاسی بۆ كۆمكرنا سەرۆك و سەركردەیێن جیهانێ.
هەر ل دۆر پشكدارییا خوە د وی رێوڕەسمیدا، نێچیرڤان بارزانی، سەرۆكێ هەرێما كوردستانێ د پەیامەكێدا ل سەر تۆرا جڤاكییا ئێكس، گۆت» ل گەل سەرۆك ماكرۆن و سەركردەیێن دی ل پاریسێ، من پشكداری د رێوڕەسمێ دوبارە ڤەكرنا كاتێدرائییا نۆتردام یا ناڤدار دا كر. ئەڤ روودانا دیرۆكی، رژدییا مە ل سەر پاراستنا میراتێ هەڤپشك مە یێ مرۆڤایەتی نیشان ددەت، پیرۆزباهیێ ل هەڤالێ خوە سەرۆك ماكرۆن دكەم بۆ ڤی كاری «.
سەرۆكایەتییا هەرێما كوردستانێ وێنەیێ نێچیرڤان بارزانی، سەرۆكێ هەرێما كوردستانێ ل گەل سەرۆك و سەركردە و كەسایەتیێن جیهانێ بەلاڤكر، كو ل شەڤا شەمبییا بۆری ل پاریسێ ل كۆچكا ئێلیزێ دیدار هەبوو.
ژوان سەرۆك و سەركردە و كەسایەتیێن جیهانی یێن نێچیرڤان بارزانی دیدار ل گەل ئەنجامداین:
– دۆنالد ترمپ، سەرۆكێ هەلبژارتیێ ئەمریكا.
– ئیمانوێل ماكرۆن، سەرۆكێ فرەنسا.
– فرانك والتەر شتاینمایەر، سەرۆكێ ئەلمانیا.
– ئیلۆن ماسك، ملیاردێرێ ئەمریكی، خودانێ تۆرا جڤاكییا ئێكس و سپەیس ئێكس، هەروەسا بەربژارێ دۆنالد ترەمپی بۆ رێڤەبەرییا دەزگەهێ كارامەیێ د كابینا داهاتی یا ترمپی دا.
– سێرگیۆ ماتارێلا، سەرۆكێ ئیتالیا.
– ئالار كاریس، سەرۆكێ ئیستۆنیا.
– دێك شۆف، سەرۆك وەزیرێن هولەندا.
– میلۆس ڤوچێڤیچ، سەرۆك وەزیرێن سربیا.
– كارل نیهامەر، شیرەتكارێ نەمسا.
– شازادە مەولای رەشید، شازادێ مەغرب.
– قەداسەتا مار ئاوایێ سیێ، سەرۆكێ كونیسەیا ئاشووری ل جیهانێ.
– جیانی انفانتینۆ، سەرۆكێ فیدراسیۆنا نێڤدەولەتی یا تەپا پێی.
سەرۆكایەتییا هەرێما كوردستانێ پێشتر راگەهاندبوو» ڤەخواندن و پشكداریكرنا نێچیرڤان بارزانی، سەرۆكێ هەرێما كوردستانێ د ڤی رێورەسمێ دا، نیشانا دۆستایەتی و پەیوەندییا ب هێزا د ناڤبەرا فرەنسا و هەرێما كوردستانێ دایە، هەروەسا گرنگییا ۆل و پێگەهێ هەرێما كوردستانێ ل سەر ئاستێ دەڤەرێ و پەیوەندیێن دپلۆماسی یێن نێڤدەولەتیدا نیشان ددەت».
بەلاڤكر ژی» ژ بلی پەیوەندیێن دبلۆماسی، هاریكارییا هەڤپشك یا فرەنسا ل گەل ئیراقێ و هەرێما كوردستانێ د وارێ كەلتووریدا، وارێن دی یێن پەیوەندێن هەردو ئالییاندا. سەبارەت ڤێ چەندێ هەرێما كوردستانێ د چەندین وارێن چالاكیێن رەوشەنبیری و شوونواریدا، ل گەل ئالیێن پەیوەندارێن فرەنسی، هاریكارییا نێزیك یا هەی».

وەزیرێ ناڤخوە ل حوكمەتا هەرێما كوردستانێ راگەهاند، هندەك تشت ژ بابەتێ قانوونێ یێ دەركەفتین و یێن بووینە بابەتەكێ سیاسی، هەروەسا زێدەتر برسیكرن و ئازاردانا خەلكێ كوردستانێیە، هەر كەسەكێ ل پشت وێ بڕیارێ بیت، بڕیارەكا شاشە، هەروەسا خزمەتێ ب ئاشتیێ و سەقامگیریێ و پێكڤەژیانێ ل ئیراقێ و هەرێما كوردستانێ ناكەت، چونكە ئەو بابەتە قوت وژیانا خەلكییە».
رێبەر ئەحمەد، وەزیرێ ناڤخوە ل هەرێما كوردستانێ گۆت ژی» داخوازییا مە ئەوە ب زووترین دەم مووچەیێن خەلكێ هەرێما كوردستانێ بهێنە دابینكرن و ئێدی بهانەیان نەئینن، چونكە ئەم وەكو حوكمەتا هەرێما كوردستانێ و خەلكێ كوردستانێ ژی بێزار بووین».
هەروەسا دیاركر ژی» ئەوا نەدبوو رادەستی وان بهێتە كرن، هەموو هاتییە رادەستكرن».
رێبەر ئەحمەدی ئەوژی گۆت» مخابن ئەو رەوشێن هەیان هەیام ل دەڤەرێ دوبارە دبن، هەردەم دبنە فاكتەرەك بۆ پتربوونا ئاوارە و پەنابەران، هەكە ئەو روودانە بەردەوام بن، ئاوارە و پەنابەر ژی دێ زێدەتر بن، هەروەسا ئەم ل هەرێما كوردستانێ ب رێكا رێڤەبەرییا هەماهەنگییا قەیرانان هەموو بەرهەڤی د بەردەستن، بەلێ هەتا نوكە كۆمێن پەنابەران روو ل هەرێما كوردستانێ نەكریە».

دوهی شەمبیێ 7/12/2024، سەرۆك مەسعود بارزانی پەیامەك ل دۆر رووداو و گوهۆڕینێن ڤێ دوماهیێ ل سووریێ بەلاڤكر.
سەرۆك بارزانی ج پەیاما خوە دا، راگەهاند»روودانێن سووریێ كاریگەرییا راستەوخوە ل سەر چارەنڤیسێ سیاسی و ئاسایشا سووریێ و دەڤەرێ یا هەی، هەروەسا هیڤی خوازت گوهۆڕین ببنە ئەگەرێ وێ چەندێ تێكگەهشتن ببیتە بنەمایێ چارەسەركرنا كێشەیان».
سەرۆك بارزانی د پەیاما خوە دا ئاماژە ب وێ چەندێ كر» ب گرنگییەكا مەزن دووڤچوونێ بۆ روودان و گوهۆڕینێن ڤێ دوماهیێ دكەین كو ل سووریێ روو ددەن، چونكە وان پێشهات و روودانان كاریگەرییا راستەوخوە ل سەر چارەنڤیسێ سیاسی و ئاسایش و سەقامگیرییا سووریێ و هەموو دەڤەرا مە یا هەی».
سەرۆك بارزانی هیڤی خوازت» پێشهات و گوهۆڕینێن سووریێ د ئەنجامدا ببنە ئەگەرێ وێ چەندێ دانوستاندن و تێكگەهشتن ببیتە بنەمایێ چارەسەركرنا كێشەیان و رەفتارەكا وەسا نەهێتە ئەنجامدان كو ناكۆكی و گرفتا نەتەوەیی و تایفی د ناڤ پێكهاتەیێن سووریێ دا كوور بكەت».
سەرۆك بارزانی د پشكەكا دی یا پەیاما خوە دا گۆت» هیڤییا وێ چەندێ دخوازین ئالی ب شێوەیەكێ ئاشتییانە بگەهنە رێككەفتنەكێ كو د بەرژەوەندییا هەموو پێكهاتەیێن سووریێ و پێكڤەژیانێ و ئاشتیێ و سەقامگیریێدا بیت».

سەرۆك مەسعود بارزانی ل سەلاحەدین پێشوازی ل ئانیل بروا ئینان، بالیۆزێ توركیا ل ئیراقێ كر.
د دیدارەكێدا باس ل پڕۆسەیا سیاسییا هەرێما كوردستانێ و پێنگاڤێن پشتی هەلبژارتنێن پەرلەمانێ كوردستانێ و پێكئینانا حوكمەتا نوو یا هەرێما كوردستانێ هاتە كرن، هەروەسا پەیوەندیێن د ناڤبەرا حوكمەتا هەرێما كوردستانێ و حوكمەتا ئیراقا فیدرالی هاتنە گەنگەشەكرن.
هەروەسا د وێ دیدارێدا باس ل پەیوەندیێن هەردو ئالییان و دوپاتی ل هەماهەنگیێ و پێشڤەبرنا پەیوەندییان هاتە كرن. دوماهی پێشهات و گوهۆڕینێن دەڤەرێ تەوەرەكێ دی یێ دیدارێ بوو.

نێچیرڤان بارزانی، سەرۆكێ هەرێما كوردستانێ پێشوازی ل میكیلێ كامێرۆتا، قۆنسلێ گشتیێ ئیتالیا ل هەرێما كوردستانێ كر، كو ب مەرەما مالئاڤاهیێ ژ بەر ب دوماهی هاتنا ئەركێ وی سەرەدانا سەرۆكێ هەرێمێ كربوو.
د دیدارەكێدا نێچیرڤان بارزانی، سوپاسییا ئەرك و بزاڤێن قۆنسلێ ئیتالیا بۆ پێشڤەبرنا پەیوەندیێن وەلاتێ وی ل گەل هەرێما كوردستانێ كر، هەروەسا هیڤییا سەركەفتنێ د ئەركێ وی یێ نوو دا بۆ خواست.
ژ ئالیێ خوەڤە كامێرۆتا، سوپاسییا پشتەڤانییا سەرۆكێ هەرێمێ و ئالیێن پەیوەندیدارێن هەرێما كوردستانێ كر كو د هاریكار بوون بۆ سەرئێخستنا ئەركێ وی.
هەروەسا دوپاتی ل خواستا وەلاتێ خوە بۆ پێشڤەبرنا پەیوەندیێن خوە ل گەل هەرێما كوردستانێ و بەرفرەهكرنا هاریكارییا هەڤپشك د ناڤبەرا وان دا، كر.