مەكتەبا سیاسی یا پارتی ب توندترین شێوە هێرشا درۆنی یا سەر نڤیسینگەها سەرۆكێ حوكمەتا هەرێمێ و جهێ ئاكنجیبوونا سەرۆكێ ئاژانسا پاراستنێ پرۆتەستۆ كر و داخواز ژ حوكمەتا ئیراقێ كر ڕێگریێ ل وان بنپێكرنان بكەت.
مەكتەبا سیاسی یا پارتی دیموكراتی كوردستان د بەیاننامەیەكێ دا ئاماژە ب وێ چەندێ كر، د دەمەكێ دا هەموو ئالی چاڤەڕێی وێ چەندێ بوون ئاسایش و ئارامییا ئیراقێ و هەرێما كوردستانێ پاراستی بیت، لێ شەڤا بووری ب ڕێیا دوو درۆنان نڤیسینگەها مەسرور بارزانی، سەرۆكێ حوكمەتا هەرێما كوردستانێ و جهێ ئاكنتجیبوونا ڕێڤەبەرێ ئاژانسا پاراستنێ هاتنە ئارمانجكرن.
د بەیاننامەیێ دا هاتییە، هەموو بزاڤێن وان بۆ دوورئێخستنا هەرێما كوردستانێ و ئیراقێیە ژ تێكەلبوونێ د كێشە و ئالۆزیێن دەڤەرێ دا، و چو جاران هەرێما كوردستانێ نەبوویە و نابیتە پشكەك ژ شەڕ و ئالۆزییان.
پارتی دیموكراتی كوردستان گەلەك ب توندی ئەو كریارا تێكدەرانە پرۆتەستۆ كر، و ئەو ڕەفتارانە د بەرژەوەندییا چو ئالییەكی دا نابینیت و ب مەترسیدار دزانیت بۆ سەر گەشەپێدانا پەیوەندییان و ئالۆزتركرنا رەوشێ.
ل دووماهیا بەیاننامەیێ ب ڕۆهنی هاتییە دوپاتكرن ، ئەركێ سەر ملێ حوكمەتا فیدرالییا ئیراقێیە ل سەر ڤی پرسی ب ڕژدی بهێتە دەنگ و ڕێگریێ ل ڤان هێرش و بنپێكرنان بكەت، هەروەسا د زووترین دەم دا ب ڕێكا گونجای بەرهنگاری ڤان جۆرە دەستدرێژییان ببیتەڤە.

دەستەیا سەربخۆ یا مافێن مرۆڤی ل هەرێما كوردستانێ، ب توندی هێرشا درۆنی پرۆتەستۆ كر كو سپێدەیا رۆژا دووشەمبی ژ سنۆرێن كۆمارا ئیسلامییا ئیرانێ ڤە بۆ سەر قەزا پیرمامێ ل پارێزگەها هەولێرێ هاتینە ئەنجامدان و نڤیسینگەها تایبەت یا سەرۆكێ حوكمەتا هەرێمێ و جهێ ئاكنجیبوونا ڕێڤەبەرێ ئاژانسا پاراستن كرینە ئارمانج.
د بەیاننامەیا دەستەیا سەربخۆ یا مافێن مرۆڤی دا هاتییە، سات 12:28 سپێدەیا دووشەمبی 17/8/2026، هێرشەكا درۆنی یا تێكدەرانە ژ ئالیێ سنۆرێن ئیرانێ ڤە بۆ سەر نڤیسینگەها تایبەت یا سەرۆكێ حوكمەتا هەرێما كوردستانێ و جهێ ئاكنجیبوونا ڕێڤەبەرێ ئاژانسا پاراستن ل قەزا پیرمامێ هاتییە ئەنجامدان.
دەستەیا سەربخۆ یا مافێن مرۆڤی دیاركر ژی كو كو ئارمانجكرنا دەم ب دەم یا دەڤەرێن ئاڤەدان و دەزگەهێن فەرمی یێن هەرێما كوردستانێ ب ڤی ڕەنگی، بنپێكرنەكا دیار و مەترسیدار یا سەروەرییا ئاخا ئیراقێ و هەرێما كوردستانێیە، هەڤدەم ئەنجامدانا ئەڤان كاران بنپێكرنا هەموو پەیماننامەیێن نێڤدەولەتی و بنەمایێن مافێن مرۆڤی و ژیانا وەلاتییانە كو مەترسییا جدی ل سەر ئارامییا دەڤەرێ دروست دكەت.
د بەیاننامەیا دەستەیا مافێن مرۆڤی دا ئاماژە ب وێ چەندێ ژی هاتییە كرن، سەرەڕای هندێ كو خۆشبەختانە هێرشێ چو زیانێن گیانی نەبووینە، لێ پاراستنا ئاسایش و ژیانا وەلاتییان مافەكێ بنەڕەتییە و ناهێتە قەبوولكرن ب چ هێجەتان ئاخا هەرێما كوردستانێ ببیتە مەیدانا هێرش و هەڤڕكی و پەیامێن سەربازی.
ل دوماهیا بەیاننامەیێ، دەستەیا سەربخۆ یا مافێن مرۆڤی داخواز ژ حوكمەتا فیدرالا ئیراقێ و جڤاكێ نێڤدەولەتی كرییە هەلوەستەكێ ڕۆهن و جدی هەبیت بۆ ڕاگرتنا ئەڤان دەستدرێژی و بنپێكرنێن بەردەوام و بزاڤێن جدی بهێنە دان بۆ پاراستنا سەروەرییا ئاخێ و دابینكرنا ئاسایش و ئارامیێ ل دەڤەرێ.

پشتی هێرشێن درۆنی یێن ڕۆژا 17/8/2026ێ، بۆ سەر نڤیسینگەها تایبەت یا مەسرور بارزانی، سەرۆكێ حوكمەتا هەرێما كوردستانێ و جهێ ئاكنجیبوونا ڕێڤەبەرێ ئاژانسا پاراستنێ ل پیرمامێ، پێلەكا بەرفرەهـ یا پرۆتەستۆكرنێ ل سەر ئاستێ هەرێمی، ئیراقێ و نێڤدەولەتی دروست بوو، و ئەڤ هێرشە وەك بنپێكرنەكا مەترسیدار بۆ سەر سەروەرییا ئیراقێێ هاتە هەژمارتن.
قوباد تالەبانی، جێگرێ سەرۆكێ حوكمەتا هەرێما كوردستانێ، ب توندترین شێوە ئەڤ هێرشە پرۆتەستۆ كر و ڕاگەهاند كو هەلوەستێ هەرێمێ بەردەوام ئاشتیخوازانە بوویە. وی دوپات كر كو ئەڤ جۆرە هێرشانە نە ڕێزگرتنە ل ڕۆلێ ئاشتیخوازانەیێ هەرێمێ و بنپێكرنەكا مەترسیدارە بۆ سەر سەروەرییا ئیراقێ.
ل سەر ئاستێ ئیراقێ، مستەفا كازمی، سەرۆك وەزیرێن پێشترێ ئیراقێ، هۆشداری دا ژ تێكەلبوونا ئیراقێ د ململانێیێن دەڤەرێ دا و ڕاگەهاند كو نابیت ئیراق ببیتە گۆرەپانەك بۆ لێكگۆهارتنا پەیامان و ئێكلاكرنا حساباتان. هەروەسا خەمیس خەنجەر و سەرمەد خەنجەر ژ هەڤپەیمانییا (سیادە)، ئەڤ هێرشە ب «كارەكێ تیرۆریستی» و «پێشهاتەكێ گەلەك مەترسیدار» ناڤ كر، و داخواز ژ جڤاكا نێڤدەولەتی و حوكمەتا فیدرال كر كو سنۆرەكی بۆ دەستدرێژیێن ئیرانێ دابنن.
ژ ئالیێ خۆ ڤە، مەزلووم عەبدی، فەرماندەیێ گشتیێ هێزێن سوریا دیموكرات (هەسەدە)، هەڤسۆزییا خۆ بۆ گەل و حوكمەتا هەرێمێ دیار كر و ئەڤ هێرشە وەك دەستدرێژییەك بۆ سەر ئیرادەیا گەلێ كوردستانێ و ئارمانجگرتنا دەزگەهێن فەرمی یێن دەولەتێ هەژمارت.
د هەمان چوارچۆڤەدا، پەیڤدارێ كۆمەلا دادگەرییا كوردستانێ پرۆتەستۆكرنا حزبا خۆ بۆ ڤان هێرشان ڕاگەهاند و دوپاتی ل سەر بێلایەنییا هەرێمێ د ململانێیان دا كر. هەروەسا هەڤپەیمانییا مەسیحی و ئایدن مەعروف، وەزیرێ هەرێمێ بۆ كاروبارێن پێكهاتەیان، ئەڤ هێرشە ب «ترسنۆكانە» ناڤ كرن و ڕاگەهاندن كو ئەڤ كارە نەشێن ئیرادەیا دەزگەهێن هەرێمێ بشكێنن.
میر حازم تەحسین سەعید، میری ئێزدییان ل ئیراقێ و جیهانێ، ب توندی هێرشا سەر نڤیسینگەها مەسرور بارزانی پرۆتەستۆ كر و ڕاگەهاند كو پێدڤییە دیالۆگ و تێكگەیشتن تاكە ڕێكا چارەسەركرنا ناكۆكییان بن، ب دوور ژ هەر گرژییەكا ئاسایش و ئارامیێ تێك بدەت.
میر حازم ئاماژە كر كو ئەڤ كارە مەترسینە بۆ سەر ئاسایشا هەرێمێ و دەڤەرێ، و دوپات كر كو هەرێما كوردستانێ دێ هەر وەك لانكا لێبۆرینێ و پێكڤەژیانێ بۆ هەموو ئایین و پێكهاتەیان مینیت.
دادوەر عەبدولجبەبار عەزیز حسن، سەرۆكێ جڤاتا دادوەریێ ل هەرێما كوردستانێ ژی، هێرشا درۆنی یا سەر نڤیسینگەها حوكمەتا هەرێمێ پرۆتەستۆ كر و دیاركر كو بنپێكرنەكا دیار یا سەروەری، ئارامی و ئاسایشا هەرێمێ و وەلاتییانە.
هەموو ئالیێن سیاسی و كەسایەتیێن ناڤبری، د پەیامێن خۆ دا هەڤڕا بوون ل سەر وێ چەندێ كو پاراستنا ئاسایش و سەروەرییا هەرێما كوردستانێ بەرپرسیارەتییەكا نیشتمانی و ئیراقێیە، و پێدڤییە حوكمەتا فیدرال ب ڕژدی بەرهنگاری ڤان دەستدرێژییان ببیتەڤە دا كو ئارامییا دەڤەرێ نەكەڤیتە مەترسیێ.

فراكسیۆنا پارتی دیموكراتی كوردستان د جڤاتا نوونەرێن ئیراقێ دا، ب توندترین شێوە هێرشا درۆنی یا سەر نڤیسینگەها تایبەت یا مەسرور بارزانی، سەرۆكێ حوكمەتا هەرێما كوردستانێ و جهێ ئاكنجیبوونا ڕێڤەبەرێ ئاژانسا پاراستنێ شەرمزار كر.
فراكسیۆنا پارتی د بەیاننامەیەكێ دا ئاشكرا كر، هەرێما كوردستانێ بەردەوام وەك فاكتەرەكێ سەرەكی یێ ئارامیێ ل دەڤەرێ ڕەفتار كرییە و بەردەوام بزاڤ كرینە هەرێم و هەموو ئیراق ژ شەڕ، ململانێ و ئالۆزییێن دەڤەرێ دوور بن.
د بەیاننامەیێ دا دوپاتی هاتییە كرن كو ئارمانجگرتنا نڤیسینگەها سەرۆكێ حوكمەتێ و ئاژانسا پاراستنێ «بەزاندنا ئاشكرا یا بەهایێن نیشتمانییە و ڕەفتارەكا مەترسیدارە بۆ تێكدانا ڤێ ئارامیێ».
د پشكەكا دی یا بەیاننامەیێ دا، فراكسیۆنا پارتی داخواز ژ حوكمەتا فیدرالییا ئیراقێ كر كو ئەركێن خۆ یێن دەستووری و ئەمنی ب جهبینیت و هەلوەستەكێ ڕۆهن و بڕیاردەرانە نیشا بدەت، هەروەسا داخواز كر كو ڕێكارێن كریاری و توند وەربگریت بۆ دانانا سنۆرەكی بۆ ڤان دەستدرێژییان، دا كو ڕێگری ل هەر بزاڤەكێ بهێتە كرن كو ئاسایش و ئارامیا گشتی دئێخیتە مەترسیێ دا.

دژە تیرۆرا كوردستانێ ڕاگەهاند، سپێدەهییا رۆژا دووشەمبی، ژ ئالییێ سنۆرێ ئیرانێ ڤە ب دوو درۆنێن بۆمبڕێژكری هێرش هاتییە كرن بۆ سەر نڤیسینگەها تایبەت یا سەرۆكێ حوكمەتا هەرێما كوردستانێ و جهێ ئاكنجیبوونا ڕێڤەبەرێ ئاژانسا پاراستن ل قەزایا پیرمامێ، لێ هێرشێ چو زیانێن گیانی ل پاش خۆ نەهێلاینە.
دژە تیرۆرا كوردستانێ د بەیاننامەیەكێ دا ئاشكرا كر «دەمژمێر 12:28ی سپێدەهییا رۆژا دووشەمبی، دوو درۆنێن بۆمبڕێژكری ژ جۆرێ (حەدید-110) ژ ئالییێ سنۆرێ وەلاتێ ئیرانێ ڤە بەرەڤ بارەگەهێ نڤیسینگەها تایبەت یا سەرۆكێ حوكمەتا هەرێما كوردستانێ و جهێ ئاكنجیبوونا ڕێڤەبەرێ ئاژانسا پاراستن ل قەزایا پیرمامێ ل پارێزگەها هەولێرێ هاتنە هاڤێتن».
د بەیاننامەیێ دا ئاماژە ب وێ چەندێ ژی هاتییە كرن، خۆشبەختانە هێرشان چو زیانێن گیانی ل پاش خۆ نەهێلاینە.
دژە تیرۆرا كوردستانێ دوپات ژی كر، ب توندترین شێوە ڤان هێرش و دەستدرێژییان پرۆتەستۆ دكەن و ڕاگەهاند «ئەڤ دەستدرێژییە ب چو ڕەنگەكی ناهێنە قەبوولكرن و تەمامییا بەرپرسیارەتییا لێكەفتێن وێ ژی ل سەر ملێ ئەنجامدەرێن وێ یە».

ل ڕۆژا ئیكشەمبی، 16ێ تەباخا 2026ێ، سەرۆك بارزانی ب هەلكەفتا 80 سالییا دامەزراندنا پارتی دیموكراتی كوردستانێ پەیامەك بەلاڤكر.
سەرۆك بارزانی ب ڤێ هەلكەفتێ، گەرمترین پیرۆزباهی ل بنەمالێن سەربلندێن شەهیدان، پێشمەرگەیێن قەهرەمان، هەموو جەماوەر و لایەنگرێن پارتی و تەڤاییا خەلكێ كوردستانێ كر.
سەرۆك بارزانی د پەیاما خۆ دا دوپات كر»پارتی پێخەمەت ڤەگەراندنا هیڤی و هێزێ بۆ گەلێ كوردستانێ د سەردەمەكێ دژوار و زەحمەت دا هاتە دامەزراندن. د درێژاهییا دیرۆكا خەباتا خۆ دا، پارتی قوتابخانەیا خەباتكەر و شۆڕشگێڕێن كوردستانێ بوویە و د هەموو قووناغان دا بەرگریكارەكا ب هێز یا مافێن ڕەوایێن گەلێ كوردستانێ بوویە».
دەقێ پەیاما سەرۆك بارزانی:
ب هەلكەفتا 16 تەباخێ سالڤەگەڕا دامەزراندنا پارتی دیموكراتی كوردستان، گەرمترین پیرۆزباهی ل مالباتێن سەربلندێن شەهیدان، پێشمەرگەیێن قەهرەمان، هەموو جەماوەر و لایەنگرێن پارتی و تەڤاییا خەلكێ كوردستانێ دكەم.
پارتی پێخەمەت ڤەگەراندنا هیڤی و هێزێ بۆ گەلێ كوردستانێ د سەردەمەكێ دژوار و زەحمەت دا هاتە دامەزراندن. د درێژاهییا دیرۆكا خەباتا خۆ دا، پارتی قوتابخانەیا خەباتكەر و شۆڕشگێڕێن كوردستانێ بوویە و د هەموو قووناغان دا بەرگریكارەكا ب هێز و خودان هەلوەست یا مافێن ڕەوایێن گەلێ كوردستانێ بوویە. پارتی د بۆری، نوكە و پاشەڕۆژێ دا ئامرازەكە بۆ خزمەتكرنا خەلكی و ب جهئینانا ئارمانج و بهایێن نەتەوەیی و نشتیمانی.
پارتی باوەرییا دلسۆز و ب هێز ب پێكڤەژیان، برایەتی و تەبایییا د ناڤبەرا هەموو پێكهاتەیێن نەتەوەیی و ئایینی و تەڤاییا ئالییێن سیاسی یێن كوردستانێ و ئیراقێ دا هەیە، هەروەسا ڕێسایا پشكداریێ و ڕێزگرتن ل دەستووری ب گەرەنتیا تەناهی، ئارامی و ئاڤەدانكرنێ ل هەموو ئیراقێ دزانیت.
د هەلكەفتا 16 تەباخێ دا، پەیاما من بۆ جەماوەر، لایەنگر و ئەندامێن پارتی ئەڤەیە كو پارتی ژێدەرێ هێزا گەلێ كوردستانێ یە؛ ئەركێ سەرەكی یێ پارتی خزمەتكرنا گەلێ كوردستانێ یە و ب پشتەڤانییا خودایێ مەزن و ئیرادە و هیمەتا هەوە و هەموو خەلكێ كوردستانێ، چو ئاستەنگ نەشێن ببنە ڕێگر ل بەرامبەر ڤی ئەركێ پیرۆز.
د ڤێ هەلكەفتێ دا، یادا هەموو وان شەهید، پێشمەرگە، خەباتكەر و قەهرەمانان ب بلندی ڕادگرین یێن كو د درێژاهییا خەباتا پارتی دا قوربانی داین. هەروەسا دەستخۆشیێ ل ڕۆلێ كادر، ئەندام و جەماوەرێ خۆشتڤێ یێ پارتی دكەم كو ب دلسۆزی و وەستیانا خۆ د هەمووبارودۆخان دا پشتەڤانێن پارتییا خۆ بوون و دیرۆك و شانازی بۆ گەلێ خۆ تۆمار كرینە.

نێچیرڤان بارزانی، جێگرێ سەرۆكێ پارتی دیموكراتی كوردستان ب هەلكەفتا سالڤەگەڕا 80 یا دامەزراندنا پارتی پەیامەك بەلاڤكر و تێدا دبێژیت ، پارتی دێ هەر دەم دەستپێشخەر بیت بۆ دەربازكرنا ئاستەنگان و دوپاتیێ ل سەر پێشڤەبرنا حوكمڕانیێ دكەت.
ڕۆژا ئێكشەمبی، 16ی تەباخا 2026ێ، نێچیرڤان بارزانی د پەیامەكێ دا پیرۆزباهی ل سەرۆك بارزانی، مالباتێن شەهیدێن سەربلند، سەركردایەتی، كادر، ئەندام و جەماوەرێ پارتی كر و ڕاگەهاند»د سالڤەگەڕا 80 یا دامەزراندنا پارتییا مە، پارتی دیموكراتی كوردستان دا، ب ڕیز ڤە بارزانییێ نەمر و تەڤاییا وان قەهرەمان و شۆڕشگێڕ و پێشمەرگەیان ب بیر دئینینەڤە یێن كو ب باوەری و فیداكاریێ ڤە پێخەمەت ئازادییا كوردستانێ گیانێ خۆ بەخشی».
دەربارەی مێژوو و ئارمانجێن پارتی دیموكراتی كوردستان، نێچیرڤان بارزانی ئاماژە ب وێ چەندێ كر كو پارتی بەری هەشتێ سالان وەك پێدڤییەكا دیرۆكی ژ ناخێ خەون و هیڤیێن گەلێ كوردستانێ ژ دایكبوو دا كو ڕێبەرایەتییا بزاڤا ڕزگاریخوازییا كوردستانێ بكەت. هەروەسا دبێژیت: «ئەڤڕۆ ژی پشتی 80 سالێن تژی قوربانی و دەستكەفتێن مەزن، ب هەمان بەرپرسایەتییا دیرۆكی ڤە، د خەباتا بەردەوام دایە بۆ پاراستنا دەستكەفتێن دەستووری و ب دەستڤەئینانا پاشەڕۆژەكا باشتر بۆ گەلێ كوردستانێ».
د پشكەكا دی یا پەیاما خۆ دا، نێچیرڤان بارزانی دوپاتیێ ل سەر بەرپرسایەتییا نشتیمانییا پارتی دكەت وەك پێشەنگ و داینەمۆیا ب هێزكرنا تەبایی و پێكڤەژیانێ، هەروەسا ئاماژێ ب وێ چەندێ دكەت كو بۆ پاراستنا ڤێ كاروانێ دڤێت بەردەوام خۆ ل گەل گیانێ سەردەم و پێشكەفتنان نوژەن بكەینەڤە و دبێژیت «دڤێت مە بزاڤ هەبن بۆ سازیبوون و پێشڤەبرنا حوكمڕانیێ، دا كو پارتی وەك هەر دەم باوەری و گەرەنتییا سەرەكی یا مافێن ڕەوایێن گەلێ كوردستانێ بیت».

مەسرور بارزانی، جێگرێ سەرۆكێ پارتی دیموكراتی كوردستان ڕاگەهاند: پارتی و سەرۆك بارزانی گەرەنتییا پاراستنا ئاسایش، تەناهی و قەوارەیێ دەستووریێ هەرێما كوردستانێ نە و هەر دەم جهێ هیڤی و باوەرییا خەلكی نە.
مەسرور بارزانی، جێگرێ سەرۆكێ پارتی دیموكراتی كوردستان، ب هەلكەفتا 16ێ تەباخێ، سالڕۆژا ژ دایكبوونا سەرۆك مەسعوود بارزانی و سالڤەگەڕا 80 یا دامەزراندنا پارتی، گەرمترین پیرۆزباهی ئاراستەی سەرۆك بارزانی، مالبات و كەسوكارێن سەربلندێن شەهیدان و ئەنفالكرییان، پێشمەرگەیێن قەهرەمان، ئەندام و لایەنگرێن پارتی و تەڤاییا خەلكێ كوردستانێ كر.
جێگرێ سەرۆكێ پارتی د پەیاما خۆ دا ئاماژە ب وێ چەندێ كر كو هەلكەفتا دامەزراندنا پارتی دیموكراتی كوردستان ل سەر دەستێ ڕێبەرێ دیرۆكی و بابێ ڕۆحیێ گەلێ كورد، مەلا مستەفا بارزانییێ نەمر، ئێكە ژ گەشترین ڕۆژ و هەلكەفتێن دیرۆكا گەلێ مە.
مەسرور بارزانی د بەردەوامییا پەیاما خۆ دا دوپات كر كو پارتی و سەرۆك بارزانی، هیڤی و ئۆمێد و جهێ باوەرییا خەلكێ كوردستانێ نە؛ هەروەسا گەرەنتییا پاراستن و پێشڤەبرنا ئاسایش و تەناهییا قەوارەیێ دەستووریێ هەرێما كوردستانێ و كولتۆرێ پێكڤەژیانا ئاشتییانە یا د ناڤبەرا پێكهاتەیێن كوردستانێ دا نە، و ئەندازیارێن ئاڤەدانكرن، ئاڤاكرن و پێشڤەچوونا كوردستانێ نە.
جێگرێ سەرۆكێ پارتی، د دوماهییا پەیاما خۆ دا، ب ڕیز و پێزانینەكا كوور ڤە یادا دامەزرێنەرێ پارتی، بارزانییێ نەمر، ئیدریس بارزانییێ هەر دەم ل یاد و تەڤاییا سەركردە، خەباتكەر و شەهیدێن ڕێكا ئازادییا كوردستانێ ب بلند هەلسەنگاند.

بەرپرسێ مەكتەبا رێكخستنا پارێزگەها دهۆكێ یا پارتی دیموكراتی كوردستان دوپاتی ل وێ چەندێ كر كو پێكئینانا كابینەیا نوو یا حوكمەتا هەرێما كوردستانێ بێ پشكدارییا ئێكەتی نیشتمانی كوردستان سەركەفتی نابیت، د هەمان دەم دا ئاماژە ب پەیوەندیێن باش یێن د ناڤبەرا هەردوو ئالییان دا كر.
سەربەست لەزگین، ب هەلكەفتا سالڤەگەڕا 80 یا دامەزراندنا پارتی، پەیامەكا پیرۆزباییێ ئاراستەی سەرۆك مەسعود بارزانی و ئەندام و لایەنگرێن پارتێ كر و راگەهاند «پارتی د پرۆسەیا نووكرنێ دا یا بەردەوامە و سیاسەتەكا واقیعبینانە ل سەرجەم بواران دا ب جه دئینیت».
سەربەست لەزگین د دیدارەكێ دا ل گەل كوردستان 24 گۆت ژی «پارتی بەردەوام ب واقعییانە سەرەدەری ل گەل پرسێن نەتەوەیی و نیشتمانی كریە». ناڤبری پێگەهێ جەماوەریێ پارتێ ل دەڤەرا بەهدینان ب بلند هەلسەنگاند و گۆت»دەڤەرا بەهدینان بۆ پارتی دەڤەرەكا ستراتیژییە و باوەرییا خەلكێ ڤێ دەڤەرێ ب پارتی گەلەكا مەزنە، كو ل وێرێ پارتی بێ ركابەرە و د هەلبژارتنان دا شیاینە 450 هزار دەنگان ب دەستڤە بینن».
سەبارەت ب رەوشا ناڤخۆیی یا هەرێمێ، بەرپرسێ مەكتەبا رێكخستنا پارێزگەها دهۆكێ دلگرانییا خۆ نیشادا كو تا نهۆ پەرلەمانێ كوردستانێ كارا نینە و گۆت «جهێ داخێ یە كو پەرلەمان كارا نینە، مە چەندین كۆمبوون ل گەل ئێكەتیێ ئەنجام داینە و خالێن هەڤپشك یێن گەلەك د ناڤبەرا مە دا هەنە، هەتاكو ل سەر بەرنامەیەكێ هەڤپشك ژی بۆ پێكئینانا حوكمەتێ رێككەفتینە، لێ ئێكەتیێ نیازا راستەقینە بۆ پێكئینانا حوكمەتێ نینە».
ل دۆر بەلاڤكرنا پۆستان، سەربەست لەزگین رۆهنكر «هەكە ل شایستەیێن هەلبژارتنان بنێڕین، د هەموو كابینەیێن دەربازبووی دا، پارتی پلە و پۆستێن پتر پێشكێشی ئالیێن دی كرینە، ب جۆرەكێ كو ئێكەتی گەلەك ژ شایستەیێن خۆ یێن راستەقینە پتر پلە و پۆست وەرگرتینە».
دوپات كر ژی «ب دەستڤەئینانا چەند وەزارەتان ل نك مە هندە مەبەست نینە، بەلكو ئەوا بۆ پارتی گرنگ، كاركرنا هەڤپشك و نیازپاكییە».
هەروەسا هیڤیخواست دانوستاندنێن نهۆ یێن د ناڤبەرا ئالییان دا بەردەوام بن دا بگەهنە رێككەفتنا دووماهیێ ل سەر پێكئینانا كابینەیا دەهێ یا حوكمەتێ.
سەربەست لەزگین ئاشكەرا كر، تا نهۆ چو ژڤانەك بۆ كۆمبوونێ ل گەل ئێكەتیێ نەهاتییە دیاركرن، ژ بەر كو هەكە پێشوەخت پشتڕاست نەبن كو كۆمبوون دێ بەرهەمدار بیت، ئەنجامدانا وێ دێ بێ مفا بیت.
ل دۆر ئاستێ ئیراقێ ژی گۆت «پارتی بهێزترین حزبا ئیراقێ یە و هەژمارەكا گرانە د هەڤكێشەیان دا. د هەمان دەم دا، پارتی دڤێت باشترین پەیوەندییان ل گەل هەموو ئالیێن سیاسی یێن ئیراقێ دروست بكەت».
ل دۆر پەیوەندیێن هەولێرێ و بەغدایێ ژی، گۆت «د سالێن دەربازبووی دا، بەغدا بەرامبەر هەرێما كوردستانێ نیازپاك نەبوویە و ب پلان دژایەتییا هەرێمێ كریە. لێ د چەند مەهێن دەربازبووی دا گۆهۆڕین ب سەر هەلوەستێ حوكمەتا نوو یا ئیراقێ دا هاتییە، لەورا پارتی بڕیار دایە باشترین هەماهەنگیێ ل گەل ئالیێن ئیراقی دروست بكەت و پشتەڤانییا ڤێ حوكمەتێ بكەت».

ب هەلكەفتا سالڤەگەڕا 80 یا دامەزراندنا پارتی دیموكراتی كوردستان، ئالییێن سیاسی و سەركردەیێن هەرێما كوردستانێ و ئیراقێ پەیامێن پیرۆزباهیێ ئاراستەی سەركردایەتی و جەماوەرێ پارتی كرن و د پەیامێن خۆ دا دوپاتی ل سەر دیالۆگ و تەباییێ كر بۆ دەربازكرنا ئاستەنگان.
عەلی زەیدی: دیرۆكا سیاسی یا پارتی د پرۆسەیا نیشتمانی دا بلند د هەلسەنگینین
عەلی زەیدی، سەرۆك وەزیرێن ئیراقێ، پەیامەكا پیرۆزباهییێ ئاراستەی سەركردایەتی، كادر و جەماوەرێ پارتی كر. سەرۆك وەزیرێن ئیراقێ د پەیاما خۆ دا گۆت»جوانترین پیرۆزباهی و هیڤییا سەركەفتنێ ئاراستەی سەركردایەتی، كادر و جەماوەرێ پارتی دیموكراتی كوردستان دكەین ب هەلكەفتا 80 سالییا دامەزراندنا پارتییا وان، هیڤییا سەركەفتنا بەردەوام بۆ وان دخوازین.
د ڤێ هەلكەفتێ دا، دیرۆكا سیاسی یا پارتی و پشكداریێن وان یێن نیشتمانی د ژیانا نیشتمانی دا ل گەل هێزێن دی یێن سیاسی یێن ئیراقێ ب بلند د هەلسەنگینین. دوپات دكەین ل سەر بەردەوامبوونا كاركرنا هەڤپشك بۆ چەسپاندنا پرەنسیپێن هەڤپشكیێ د نیشتمانی دا، بهێزكرنا ئارامیێ، پاراستنا ئێكپارچەیی و سەروەرییا ئیراقێ و ئاڤاكرنا پاشەڕۆژەكێ كو خواستا هەموو پێكهاتەیان بجهـ بینیت.».
ئێكەتی: پێدڤییە خەبات ل سەر بنەمایێ ئارمانجێن نەتەوەیی و دیموكراتی بیت
مەكتەبا سیاسی یا ئێكەتی نشتیمانی كوردستانێ د پەیامەكا فەرمی دا پیرۆزباهی ل مەكتەبا سیاسی و ئەندامێن پارتی كر. ئێكەتیێ هیڤیخواست كو خەباتا هەموو ئالییان ل سەر بنەمایێ ئارمانجێن نەتەوەیی و دیموكراسی بیت بۆ دەربازكرنا ڤێ ڕەوشا نوكە بەرەڤ ڕوویێ كوردستانێ و دەڤەرێ بووی. هەروەسا دوپاتی ل سەر وێ چەندێ كر كو پێكڤەكاركرن دڤێت پێخەمەت ب هێزكرن و ڕاستكرنەڤەیا ڕێڕەوێ ئەزموونا هەرێمێ بیت.
سەلاحەدین محەمەد بەهائەدین: رێكخستنا ناڤمالا كوردی و كاراكرنا سازییان گرنگترین ئەركە بۆ دەربازكرنا قووناغێ
سەلاحەدین محەمەد بەهائەدین، ئەمینداری گشتی یێ ئێكگرتوویا ئیسلامییا كوردستانێ، د پەیامەكێ دا بۆ سەرۆك بارزانی، سەرەڕای پیرۆزباهیێ، ئاماژە ب ڕەوشا هەستیار و دژوار یا دەڤەرێ و هەرێمێ كر. ناڤبری داخوازی ژ پارتی كر كو د ئاستێ بەرپرسایەتیێ دا بن بۆ دەربازكرنا ڤێ قووناغێ و دوپاتی ل سەر كاراكرنا سازیێن یاسایی و نشتیمانی و ڕێكخستنا ناڤمالا كوردی و بیراقی كر دا كو وەلات ژ ڕوودانێن نەچاڤەڕێكری دوور بیت.
عەممار حەكیم: دامەزراندنا پارتی وەستگەهەكا دیار بوو د ژیانا سیاسی یا ئیراقێ دا
عەممار حەكیم، سەرۆكێ ڕەوتا حیكمە یا نشتیمانی ل ئیراقێ، پیرۆزباهی ل سەرۆك بارزانی و سەركردایەتییا پارتی كر. حەكیمی ڕاگەهاند كو دامەزراندنا پارتی وەستگەهەكا دیار بوو د ژیانا سیاسی یا ئیراقێ دا و ڕۆلێ وێ د چەسپاندنا مافێن گەلێ كوردستانێ و ب هێزكرنا دیموكراسیێ دا ب بلند هەلسەنگاند. هەروەسا دیالۆگ و تێكگەهشتن وەك تەنێ ڕێكا چارەسەركرنا كێشەیان ل قەلەم دا.
ئەیاد عەلاوی: پارتی خوەدان دیرۆكەكا پڕ ژ خەبات و قوربانیدانێ یە
ئەیاد عەلاوی، سەرۆك وەزیرێن پێشتر یێ ئیراقێ و سكرتێرێ گشتی یێ بزاڤا نیشتمانییا ئیراقی، ب هەلكەفتا 80 سالڤەگەڕا 80 یا دامەزراندنا پارتی دیموكراتی كوردستان، پەیامەكا پیرۆزباهییێ ئاراستەی سەرۆك مەسعود بارزانی و سەركردایەتی و ئەندامێن پارتی كر.
عەلاوی د پەیاما خۆ دا، ئاماژە ب دیرۆكا خەبات و قوربانیدانا پارتی دا و رۆلێ پارتی د چەسپاندنا دیموكراسیێ و هەڤپشكییا نیشتمانی د ئیراقێ دا ب بلند هەلسەنگاند.
سوودانی: دیرۆكا سیاسی یا پارتێ د قووناغێن جودا یێن ئیراقێ دا كاریگەرە
محەمەد شیاع سوودانی، سەرۆك وەزیرێن بەرێ یێ ئیراقێ، ب هەلكەفتا 80 سالییا دامەزراندنا پارتی دیموكراتی كوردستان، پەیامەكا پیرۆزباهییێ ئاراستەی سەركردایەتی، كادر و جەماوەرێ پارتی كر. سوودانی د پەیاما خۆ دا ئاماژە ب دیرۆكا سیاسی یا پارتی و رۆلێ وێ د رووبڕووبوونا دیكتاتۆرییەتێ دا كر، هەروەسا دوپاتی ل سەر گرنگییا بهێزكرنا پەیوەندیێن د ناڤبەرا بەغدایێ و هەولێرێ دا كر.
هەڤپەیمانییا سیادە: پارتی خودان دیرۆكەكاكا سیاسی و نیشتمانییا مەزنە
د پەیاما سەرمەد خەنجەر، سەرۆكێ هەڤپەیمانییا «سیادە» دا هاتییە « پارتی خودان ئامادەبوونا كاریگەرە د دیرۆكا سیاسی یا ئیراقێ دا و قوربانیێن مەزن داینە و رووبڕووی ئاستەنگ و وەستگەهێن دژوار بوویە».
هەروەسا سەرۆكێ هاوپەیمانییا سیادە، ، ئاماژە ب رۆلێ پارتی كر د «بەرگریكرنێ ژ داخوازێن گەلێ كورد و بهێزكرنا رێڕەوێ هەڤپشكییا نیشتمانی ل وەلاتی».
سەرمەد خەنجەر دوپاتی ل سەر گرنگییا گاڤهاڤێتنێ بەر ب ئیراقەكا ئارامتر، ئێكگرتیتر و گەشەكری كر، كو تێدا مافێن هەموو پێكهاتەیان پاراستی بن.
هەڤپەیمانییا عەزم: پارتی د كاروانێ نیشتمانیێ ئیراقێ دا خودان پشكدارییا كارا یە
هەڤپەیمانییا عەزم ب بەیاننامەیەكێ پیرۆزباهی ل سەرۆك بارزانی و تەڤاییا گەلێ كوردستانێ كر. ئاماژە ب وێ چەندێ كر كو ئەڤ هەلكەفتە ب بیرئینانەڤەیا كاروانێ سیاسی یێ مستەفا بارزانییێ نەمرە ژ سالا 1946ێ ڤە. هەروەسا دەستخۆشی ل قوربانییێن پارتی و پشكدارییا وێ یا كارا د كاروانێ نشتیمانی یێ ئیراقێ دا كر.
بەرەیێ توركمانی: پێدڤییە 80 سالییا پارتی ببیتە دەلیڤەیەك بۆ بهێزكرنا دیالۆگ و رێزگرتنا دەستووری
محەمەد سەمعان ئاغا، سەرۆكێ بەرەیێ توركمانی یێ ئیراقێ، د پەیاما خۆ دا پیرۆزباهی ل سەرۆك مەسعود بارزانی كر. ناڤبری ئەڤ هەلكەفتە وەك دەلیڤەیەك بۆ ب هێزكرنا دیالۆگێ و ڕێزگرتن ل دەستووری زانی، ب شێوەیەكێ كو مافێن هەموو پێكهاتەیان و ب تایبەت توركمانان پاراستی بن. هەروەسا دەربارەی كەركووكێ دوپاتی ل سەر پاراستنا برایەتیێ د ناڤبەرا كورد، توركمان و ئەرەبان دا كر دا كو باژێڕێ كەركووكێ ببیتە نموونەیا دادیێ.
میسال ئالوسی: شانازیێ ب خەباتا پارتی د ئاڤەدانكرن و پاراستنا مافێن گەلێ كوردستانێ دكەم
سیاسەتمەدارێ ئیراقی میسال ئالوسی، د پەیامەكێ دا بۆ سەرۆك مەسعود بارزانی، ڕێزا خۆ بۆ خەباتا گەلێ كورد و ڕۆلێ پارتی د ئاڤەدانكرن و پاراستنا مافان دا دیار كر. ئالوسی د پەیاما خۆ دا گۆت»شانازیێ دكەم كو گەرمترین پیرۆزباهیێ ئاراستەی كەسایەتییێ خەباتكەرێ جەنابێ هەوە و نەتەوەیێ كورد و بنەمالێن شەهیدان و جەماوەرێ پارتییا هەوە دكەم». هەروەسا هیڤی خواست كو ئالایێ كوردستانێ هەر ب بلندی بمینیت و ئاسایشا وەلاتییان و مافێن وان پاراستی بن.