ئەڤرۆ نیوز:
ژێدەرەکێ ژ وەزارەتا دارایی و ئابووری یا حوکمەتا هەرێما کوردستانێ راگەهاند کو دووماهیا حەفتیا بهێت ئانکۆ ل رۆژا ٤/٧/٢٠١٩ دێ دەست ب بەلاڤکرنا مووچێ هەیڤا نیسانێ یێ فەرمانبەرێن هەرێما کوردستانێ هێتە کرن.
هەمان ژێدەری ئەو یەک ژی دیار کریە کو دەستپێکێ دێ مووچێ وەزارەتا پێشمەرگەی هێتە بەلاڤکرن و پاشی ژی وەزارەتێن پەروەردێ و ساخلەمیێ دێ مووچێن خوە وەرگرن.
ئەڤرۆ نیوز، عەلی حاجی :
ئەڤرۆ ل روژا ئێک شەمبێ ل رێکەڤتی ۲۳/٦/۲۰۱۹ ھەژمارەکا قوتابیێن پولا دوازدێ ل بەردەم ئاڤاھیێ رێڤەبـەریا پەروەردا زاخۆ نەرازی بونێ ئەنجام دان ل دور خەلەتیا پرسیاران دئەزمونێن دوماھیا سالێ دا.
عەلی سەدیق ؍ رێڤەبەرێ پەروەردا زاخۆ ب وەکالەت ؍ بۆ ئەڤرۆ نیوز ئاشکەرا کر خرڤەبونا وان قوتابیێن پولا دوازدێ ژپشکا زانستی و ئەدەبی و پیشەی بو، ژەر وێ چەندێ بویە دبابەتێن بیرکاری و عەرەبی و ئینگلیزیێ دا؍ شاشی د پشکەکا پرسیارێن وان وانەیان دا ھەبوینە و ھەر دیسان داخازیا وان یا دووێ ئەو بویە کو قوتابیێن دچنە قوناغا دووێ یا ئەزمونان ل زانکویا زاخۆ ناھێنە وەرگرتن ؍ دەربارەی شاشیا دپسیاران دا، رێڤەبەرێ پەروەردا زاخۆ پێش وەخت ب رێیا نڤێسارەکێ ئەڤ داخازیا قوتابیان گەھاندی یە رێڤەبەریا گشتی یا پەروەردا دھوکێ، وان ژی ب رێیا خوە لژنا بلند یا ئەزموونا ل کوردستانێ ئاگەھدار کرینە ؍ ئەو قوتابیێن نەرازی ژی مە دلنیا کرینە ئەو پسیارێن شاشی تێدا ھاتینە کرن، دێ نمرە ب وان ھێتە دان و مافێ وان ناھێتە خارن.
ل دوماھیێ گوت ژی : ل دور داخازیا وان یا دووێ ؍ ل گورەی ئاخڤتنێن سەروکێ زانکویا زاخۆ ؍ دەرچووێن قوناغا ئێکێ ل پولا دوازدێ ۷۰٪ دێ ھێنە وەرگرتن ل زانکویێ، دەرچووێن قوناغا دووێ ژی ۳۰٪ دێ ھێنە وەرگرتن و ترسا نەوەرگرتنێ بلا ل دەف قوتابیان نەمینیت، ئەم ژی پشتەڤانیا داخازیا وان دکەین و دێ پشتەڤانێ داخازیێن وان بین.
ئه‌ڤرۆ نيوز:
مه‌سرور بارزانى شيره‌تكارێ جڤاتا ئاسايشێ و راسپارديێ پێكئينانا كابينا نوو يا حوكمه‌تا هه‌رێما كوردستانێ، ئه‌ڤرۆ پێشوازى ل شانده‌كێ گرۆپێ هه‌موو پارتێن په‌رله‌مانێ بريتانيا بۆ دوستايه‌تيا هه‌رێما كوردستانێ ب سه‌رۆكاتيا لوپرێستى سه‌رۆك گرۆپێ هه‌موو پارتێن په‌رله‌مان و ئه‌ندامه‌تيا ستێڤ ريد، تۆبى پێركينس و گارى كێنت رێڤه‌به‌رێ گرۆپێ كوردستانێ ل په‌رله‌مانێ بريتانيا كر.
د وێ ديدارێ دا، مه‌سرور بارزانى ده‌ستخۆشى ل گرۆپێ په‌رله‌مانتارێن بريتانيا كر بۆ هاريكارى و پشته‌ڤانيا وان ل هه‌رێما كوردستانێ و به‌حسێ پێنگاڤێن پێكئينانا كابينا نوو يا حوكمه‌تێ كر.
هه‌ر د وێ ديدارێ دا، دانوستاندن ده‌رباره‌رى ژمارا زۆر يا ئاواره و په‌نابه‌ران ل هه‌رێما كوردستانێ كر و ته‌كست ل سه‌ر وێ چه‌ندێ كر كو پێدڤيه كۆمه‌لگه‌ها نێڤده‌وله‌تى بزاڤێن خوه بۆ پێشكێشكرنا هاريكاريێن مرۆڤايه‌تى دژوارتر بكه‌ت.
ژ لايێ خوه ڤه شاندێ گرۆپێ هه‌موو پارتێن په‌رله‌مانێ بريتانيا ته‌كست ل سه‌ر به‌رده‌واميا په‌يوه‌نديێن ناڤبه‌را هه‌رێما كوردستانێ و بريتانيا كريه و مه‌ره‌ما سه‌ره‌دانێ ژى روونكر كو ژ لايه‌كى ڤه پشته‌ڤانينا وه‌به‌رهێنه‌رێن بريتانيا بكه‌ن كو بهێنه هه‌رێما كوردستانێ و ژ لايه‌كێ دژى ڤه دڤێت ڤه‌كۆلينێ د ده‌رباره‌ى چاوانيا هاريكاريا ئاواره و په‌نابه‌ران دا بكه‌ن.
د دووماهيا ديدارێ دا، سه‌ره‌راى هيڤيا سه‌ركه‌فتنێ بۆ مه‌سرور بارزانى د ئه‌ركێ نوو يێ وى دا، ئاماده‌يا خوه ژى بۆ پشته‌ڤانيكرن د كابينێ دا ده‌ربڕى د چارچۆڤێ پشته‌ڤانيكرنا سه‌رمايه‌دارێن بريتانيا و پشكداريكرن د به‌ره‌ڤ پێشچوونا وارێ ئابوورى و پێشكێشكرنا بسپۆرى بۆ وارێن جودا يێن هه‌رێما كوردستانێ.
ئه‌ڤرۆ نيوز:
ل سلێمانيێ تۆمه‌تباره‌ك ده‌سته‌سه‌ركر كو پێشتر ل دهۆكێ ژ لايێ دادگه‌هێ ڤه بێ ئاماده‌بوونا خوه، دو سالان بڕيارا زيندانكرنێ بۆ ده‌ركه‌فت بوو.
پشكا په‌يوه‌ندى و راگه‌هاندنێ ل رێڤه‌به‌ريا پۆليسێن پارێزگه‌ها سلێمانيێ راگه‌هاند كو مه‌فره‌زه‌كا بنگه‌هێ پۆليسێن سه‌رچنار شه‌ش تۆمه‌تبار ده‌سته‌سه‌ركرن كو ئێك ژ وان تۆمه‌تباران سزايێ دو سالان زيندان بێ ئاماده‌بوون ل دادگه‌ها دهۆكێ هه‌بوويه و پێنج تۆمه‌تبارێن دژى ته‌قه كريه.
پشتى وێنه‌ك ل بڕيارا سزايێ تۆمه‌تبار (ش. ا. ع) ژ لايێ دادگه‌ها دهۆكێ گه‌هشتيه ده‌ستێ رێڤه‌به‌ريا پۆليسێن پارێزگه‌ها سلێمانيێ، بنگه‌هێ پۆليسێن سه‌رچنار راسپارد ب ده‌سته‌سه‌ركرنا تۆمه‌تبارى.
هێزێن پۆليسان ڤه‌كۆلين ده‌ستپێكرن و شيان ل 15ى خزيرانا 2019ێ تۆمه‌تبارێ ناڤبرى ژ لايێ مه‌فره‌زێن بنگه‌هێ پۆليسێن سه‌رچنار ڤه ده‌سته‌سه‌ركر كو سزايێ دوسال زيندان بێ ئاماده‌بوونا خوه ل دادگه‌ها دهۆكێ هه‌بوو ب گۆره‌ى ماددێ 456 ژ قانوونا سزايێن عيراقى.
ئه‌ڤرۆ نيوز:
هه‌پڤه‌يمانيا نه‌سر ئاشكه‌ر كر كو ئه‌گه‌ره‌كێ زۆر هه‌يه، عه‌بدولغه‌نى ئه‌سه‌دى ببيته وه‌زيرێ ناڤخۆ يێ عيراقێ.
فالح خه‌فاجى ئاخفتنكه‌رێ ب ناڤێ هه‌پڤه‌يمانيا نه‌سر ب سه‌رۆكاتيا حه‌يده‌ر عه‌بادى راگه‌هاند كو وه‌كو هه‌ڤپه‌يمانى چو كێشه‌ك ل سه‌ر به‌ربژاركرنا فالح فه‌ياز بۆ پۆستێ وه‌زيرێ ناڤخۆ يێ عيراقێ نينه و هه‌كه به‌ربژار بكه‌ن دێ ده‌نگى ده‌نێ.
ئاخفتنكه‌رێ ب ناڤێ هه‌پڤه‌يمانيا نه‌سر ئاماژه ب وێ چه‌ندێ ژى كر كو ئه‌گه‌ره‌كێ مه‌زن هه‌يه، عه‌بدولغه‌نى ئه‌سه‌دى، فه‌رمانده ل دژه تيرۆرا عيراقێ ببيته وه‌زيرێ ناڤخۆ.
ئه‌ڤرۆ نيوز:
ئانۆ جه‌هوه‌ر، ب گۆره‌ى پێزانينان به‌ربژاره بۆ وه‌رگرتنا پۆستێ وه‌زاره‌تا ڤه‌گوهاستن و گه‌هاندنێ د كابينا نه‌هێ يا حوكمه‌تا هه‌رێما كوردستانێ ژ پێكهاتێ كرستيانان و بۆ كوردستان 24 راگه‌هاند كو ژ لايێ مه‌سرور بارزانى ڤه هاتينه پشت راستكرن كو دێ مافێن وان د پاراستى بن.
ئانۆ جه‌هوه‌ر گۆت: “دێ پشكداريه‌كا كارا د حوكمه‌تا هه‌رێما كوردستانێ دا كه‌ين و وه‌كو هه‌رده‌م دێ پشته‌ڤانيا حوكمه‌تا هه‌رێمێ كه‌ين”.
ئاماژه ب وێ چه‌ندێ ژى كر مه‌سرور بارزانى د كۆمبوونا ل گه‌ل وان دا ب سينگه‌كێ به‌فره‌هـ گوهێ خوه دا پێشنياز و داخوازيێن پێكهاتان، “هه‌موو لايه‌نێن پشكدار د كۆمبوونێ دا، ب دلخۆشى ژ كۆمبوونێ ده‌ركه‌فتن”.
سه‌رۆكێ ته‌ڤگه‌را شلۆما دا زانين ژى كو بۆ وان پێدانا وه‌زاره‌تان يا گرنگ نينه به‌لێ ئه‌وان دڤێت پشكداريه‌كا كارا د حوكمه‌تێ دا بكه‌ن و گۆت: “ب گۆره‌ى پلانێ وه‌زاره‌تا ڤه‌گواستن و گه‌هاندنێ به‌ر ب پێكهاتێ ئاشوورى، كلدان و سريان دكه‌ڤيت”.
ئه‌ڤرۆ نيوز:
ل ده‌مژمێر 08:00ى سپێده‌هيا ئه‌ڤرۆ رۆژا ئێكشه‌مبى رێكه‌فتى 23ى تيرمه‌ها 2019ێ هه‌لبژارتنێن دووباره بۆ باژێرڤانيا سته‌مبۆلێ ده‌ستپێكرن و 10 مليۆن و 560 هزار و 963 كه‌سان مافێ ده‌نگدانێ هه‌يه.
هه‌ڤركيا هه‌ره مه‌زن د ناڤبه‌را هه‌ردو به‌ربژارێن ئاكپارتى و جه‌هه‌په دايه و ده‌نگده‌ر دێ بڕيارێ ل سه‌ر ڤێ چه‌ندێ ده‌ن، كا دێ بينالى يلدرم به‌ربژارێ ئاكپارتى يان ژى ئه‌كره‌م ئيمام ئوغلۆ به‌ربژارێ جه‌هه‌پێ بۆ ماوێ پێنج سالان بيته سه‌رۆكێ باژێرڤانيا مه‌زن يا سته‌مبۆلێ. سه‌ره‌راى وێ چه‌ندێ كو پارتيا سه‌عاده‌ت و وه‌ته‌نيه ژى به‌ربژار يێن هه‌ين، به‌لێ نه‌شێن هه‌ڤركيێ بكه‌ن ب تايبه‌ت هه‌لبژارتن د دووباره كرينه و هه‌ڤركى ب تنێ د ناڤبه‌را ئاكپارتى و جه‌هه‌پێ دا بوويه.
31 هزار و 124 سندوقێن ده‌نگدانێ هاتينه دانان و هێزێن ئه‌منى رێكارێن باش گرتينه به‌ر دا كو ئه‌ڤ هه‌لبژارتنه د پاراستى بن ژ هه‌ر كاره‌كێ تێكده‌رانه.
هه‌ده‌پێ به‌ربژار بۆ مه‌زنه باژێرڤانيا سته‌مبۆلێ نينه، به‌لێ داخواز ژ پشته‌ڤانێن خوه و لايه‌نگرێن خوه كريه ده‌نگه بده‌نه به‌ربژارێ جه‌هه‌پێ، ئه‌كره‌م ئيمامئۆغلۆ د پێناڤى وێ چه‌ندێ دا ب تنێ به‌ربژارێ ئاكپارتى شكه‌ستنێ بينيت.
هه‌ر چه‌نده عه‌بدولا ئوجه‌لان سه‌رۆكێ زيندانكرى يێ په‌كه‌كێ داخواز ژ لايه‌نگرێن خوه كربوو كو د ڤان هه‌لبژارتنان دا د بێ لايه‌ن بن، به‌لێ شاره‌زايان و سه‌رۆكێ به‌رێ يێ هه‌ده‌پێ يێ زيندانكرى سه‌لاحه‌دين ده‌ميرتاش ژى ئه‌ڤه ب كاره‌كێ چێكرى يێ هه‌ده‌پێ دده‌نه زانين و ده‌ميرتاش د نامه‌كێ دا راگه‌هاند كو ده‌سته‌لاتا توركيا دڤێت ئه‌ڤێ ناما ڤێ دووماهيێ يا توركيا وه‌كو شه‌رێ ناڤبه‌را ئوجه‌لان و هه‌ده‌پێ نيشان بده‌ت، به‌لێ ئه‌و چو جاران نابيته پارچه‌ك ژ وان دانوستاندنان.
د هه‌لبژارتنێن 31ى ئادارێ دا، هه‌لبژارتنێن سه‌رتاسه‌رى ل توركيا ب رێڤه چوون، بۆ باژێرڤانيا سته‌مبۆلێ جوداهى د ناڤبه‌را يلدرم و ئيمامئۆغلۆ دا نێزيكى 13 هزار ده‌نگان بوو، به‌لێ پاشان ل سه‌ر داخوازيا ئاكپارتى كۆمسيۆنا هه‌لبژارتنان ل توركيا بڕيارا دووباره‌كرنا هه‌لبژارتنان دا.
ده‌زگه‌هێن راپرسيێ ل توركيا ئاماژێ ب وێ چه‌ندێ دكه‌ن كو ده‌نگێن كوردان بۆ به‌ربژارێ جه‌هه‌پێ 10% زێده كرينه، به‌حس ل وێ چه‌ندێ ژى دكه‌ن كو ناما ڤێ دووماهيێ يا ئۆجه‌لان كو داخواز ژ ده‌نگده‌رێن هه‌ده‌پێ كرين د بێ لاين بن، يا دره‌نگ بوو و كارتێكرن نابيت، ژ به‌ر هندێ ژى رێژا ده‌نگێن جه‌هه‌پێ زێده بوويه.
ئەڤرۆ نیوز:
پەیڤدارێ فەرمی یێ حوکمەتا ھەرێما کوردستانێ پێزانینان ل دۆر دامەزراندنا فەرمانبەران دیار دکەت و دبێژیت: ژ ئەگەرێ بڕینا بودجا ھەرێما کوردستانێ ژ لایێ بەغداڤە دامەزراندن ھاتبوونە راوەستاندن، لێ کابینا نوو یا حوکمەتا ھەرێما کوردستانێ دشێت وێ بڕیارێ بدەت.
سەفین دزەیی، پەیڤدارێ فەرمی یێ حوکمەتا ھەرێما کوردستانێ دیار کر، ژ ئەگەرێ بڕینا بودجا ھەرێما کوردستانێ ل سالا ٢٠١٤ ژ لایێ بەغداڤە، ھەتا نوکە قانوونا بودجێ ل پەرلەمانێ کوردستانێ نەھاتیە پەسەندکرن، د چارچوڤێ قانوونا پەسەنکری یا بودجێ دا ھژمارا میلاک و دامەزراندنێ دھێتە پەسەندکرن، لەورا د ڤان چەند سالێن بۆری دا ژبلی دامەزراندنا ھژمارەکا دەرچوویێن کۆلیژێن نۆشداری و دەرمانسازی کو گەلەکا پێدڤی بوو بھێنە دامەزراندن، چو دامەزراندنێن دە نەبووینە.
ل دۆر دامەزراندنا فەرمانبەران د کابینا نوو دا، سەفین دزەیی بۆ باسنیوز گۆت: “کابینا نوو یا حوکمەتا ھەرێما کوردستانێ دشێت بڕیارا دامەزراندنێ بدەت، ئەو ژی پشتی میلاکات د چارچوڤێ بودجێ دا ل پەرلەمانی دھێتە پەسەندکرن”.
ناڤھاتی گۆتژی: “ھیڤیدارم ئاریشێن د ناڤبەرا ھەولێر و بەغدا دا بھێنە چارەکرن و ھەرێما کوردستانێ شایستێن خوە یێن دارایی وەربگریت، پاشی قانوونا بودجێ ل پەرلەمانێ کوردستانێ بھێتە پەسەندکرن و کابینا نوو یا حوکمەتا ھەرێما کوردستانێ بشێت کارێن خوە ئەنجام بدەت”.
ئه‌ڤرۆ نيوز:
مه‌سرور بارزانى راسپارديێ پێكئينانا كابينا نوو يا حوكمه‌تا هه‌رێما كوردستانێ ئه‌ڤرۆ شه‌مبيێ 22/6/2010 چه‌ندين ديدار وكۆمبوون ل گه‌ل لايه‌نێن سياسى يێن پێكهاتێن ئاينى ونه‌ته‌وى يێن كوردستانێ ئه‌نجامدان.
ل ده‌ستپێكێ مه‌سرور بارزانى ل گه‌ل 9 حزبێن توركمانى كۆمبوو كو چار كورسيێن پشكا پێكهاتێ توركمانى ل په‌رله‌مانێ كوردستانێ يێن هه‌ين، هه‌ڤده‌م جێگرێ سه‌رۆكێ په‌رله‌مانێ كوردستانێ ژ پێكهاتێ توركمانى يه، برياره ژى پێكهاتێ توركمانى ب وه‌زيره‌كى پشكداريێ د كابينا نوو دا بكه‌ن.
پشتى كۆمبوونێ ل گه‌ل لايه‌نێن توركمانى، مه‌سرور بارزانى وشاندێ دگه‌لدا سه‌ره‌دانا لايه‌نێن سياسى يێن كلدوسريان ئاشوورى كر ول گه‌ل وان ژى پرسا پێكئينانا كابينا نوو يا حوكمه‌تێ به‌حسكر.
ل ده‌ستپێكى ل گه‌ل هه‌ڤپه‌يمانيا نه‌ته‌وى يا كريستيانى كۆمبوو كو ژ سێ حزبێن سياسى پێك دهێت وسێ كورسيێن په‌رله‌مانى يێن هه‌ين، رۆميۆ هه‌كارى سكرتێرێ گشتيێ پارتى ديموكراتى بێت نه‌هرێن راگه‌هاند” دڤێت پشكداريا مه د كابينا نوو يا حوكمه‌تێ دا يا جياواز بيت وداخواز دكه‌ين د هه‌موو سه‌رۆكاتيان پۆستان وه‌ربگرين” گۆت ژى” مه به‌رده‌وام پشته‌ڤانيا حوكمه‌تا هه‌رێما كوردستانێ كريه و ب حوكمه‌تا خوه دزانين”.
پاشى مه‌سرور بارزانى وشاندێ د گه‌لدا ل گه‌ل بزاڤا ديموكراتى يا ئاشوورى كۆمبوون، يونادم يوسف كه‌نا، سكرتێرێ گشتيێ بزاڤا ديموكراتى يا ئاشوورى راگه‌هاند” كۆمبوونا مه يا ئه‌رێنى بوو، هه‌رچه‌نده پۆستێ وه‌زير بۆمه نابيت، به‌لێ ب هنده‌ك پۆستێن دى دێ پشكداريێ د كابينا نوو يا حوكمه‌تا هه‌رێما كوردستانێ دا كه‌ين ودێ پشته‌ڤانێن حوكمه‌تێ بين”.
ئه‌ندامه‌كێ پشكدار د دانوستاندنان دا بۆ كوردستان 24 گۆت كو حزبا وان ب وه‌رگرتنا پۆستێن ئيدارى ل پاريزگه‌ها دهۆكێ دێ پشكداريێ د حوكمه‌تا نوو دا كه‌ن وبه‌رى ئه‌نجامدانا ڤێ ديدارێ ژى هه‌لويستێ وان به‌رامبه‌ر كابينا نوو هه‌ر يا ئه‌رێنى بوو.
نيشاندان