NO IORG
نوچێن گرنگ

ئەڤرۆ نیوز:

فه‌رهاد ئه‌مین ئه‌ترووشی پارێزگه‌رێ‌ دهۆكێ‌ ئه‌ڤرۆ 22\6\2019 پرۆتۆكۆله‌ك ل وه‌لاتێ‌ ئه‌لمانیا ل گه‌ل تۆماس كوفن پارێزگه‌رێ‌ پارێزگه‌ها ئیسن یا ئه‌لمانی ئیمزا كر.

پرۆتۆكۆل د وارێ‌ خزمه‌تێن ساخله‌میێ‌ دا هاتیه‌ ئیمزا كرن و ئه‌ڤ پرۆتۆكۆله‌ پشتی سه‌ره‌دانا شانده‌كێ‌ ئه‌لمانی دهێت ل 6/17 ئه‌ڤ ساله‌ بۆ پارێزگه‌ها دهۆكێ‌.
وه‌لاتێ‌ ئه‌لمانیا هه‌رده‌م دوپات دكه‌ت كو ئه‌و دێ به‌رده‌وام هاریكار و پشته‌ڤان بن بو هه‌رێما كوردستانێ و ب تایبه‌ت پارێزگه‌ها دهوكێ چونكێ هژماره‌كا مه‌زن یا ئاواران وه‌رگرتیه‌.

received_3263917493680210 received_1146121685576092 received_431882630996309 received_1054304911593152 received_370758803573988

ئەڤرۆ نیوز:

مەسرۆر بارزانی راسپاردیێ پێکئینانا کابینا نوو یا حوکمەتا هەرێما کوردستانێ ل هەولێر ل گەل بەرەی تورکمانی کۆمبوو.

ب مەرەما پشکداریپێکرن د کابینا نوو یا حوکمەتا هەرێما کوردستانێ دا، مەسرۆر بارزانی راسپاردیێ پێکئینانا کابینا نوو یا حوکمەتا هەرێما کوردستانێ ل هەولێر ل گەل بەرەی تورکمانی کۆمبوو.

ئەڤرۆ نیوز، نیوار محمەمەد سەلیم:

ئەڤرۆ رۆژا شەمبی رێکەفتی 22ی خزیرانا 2019ێ کۆنگرێ هەشتێ یێ میزۆبۆتامیا یێ تایبەت ب نۆشدارێن کورد ل سەرانسەری جیهانێ دەست ب کارێن خوە کر و بۆ ماوێ رۆژەکێ دێ یێ بەردەوام بیت.

زاخۆ
ئەڤرۆ نیوز ؍ عەلی حاجی :
ئەڤرۆ  ئەینیێ  ۲۱/٦/۲۰۱۹ گەنجەکێ ۲٦ سالی دناڤ ئاڤا خابیری ل گوندێ چەم سیرمو دخەندقیت و تا نوکە لێگەریان ل تەرمێ وی يا 
بەردەوامە.
بێوار عەبدولعەزیز ؍ بەرپرسێ راگه‌هاندنا بەرەڤانیا باژێری ل پارێزگه‌ها دهوکێ بۆ ئەڤرۆ نیوز گۆت” ئەڤرۆ ئه‌م هاتینە ئاگەهدارکرن ل سەر هەبوونا روودانه‌کا خەندقینێ ؍ پشتی تیمێن مە یێن نقومەڤانی گەهشتینە گوندێ چەم سیرمو ؍ دیار بوو گەنجەکێ ۲٦ سالی بناڤێ مێهڤان ئاڤدەل ئاکنجیێ باژێرێ زاخۆیە ب مەرەما مەلەڤانیان دناف خابیری دا یێ خه‌ندقى ؍ هەتا نوکە ژی تیمێن مە ل سەر لێگەریانا تەرم وی گەنجی دبەردەوامن.

ئه‌ڤرۆ نيوز:

به‌رى ده‌مه‌كێ كێم سه‌رۆكێ هه‌رێما كوردستانێ گه‌هشته‌ به‌غدا و بڕياره‌ پشتى ده‌مه‌كێ كێم ل گه‌ل سه‌رۆك وه‌زيرێن عيراقێ كۆم بيت و بڕياره‌ هه‌ر ئه‌ڤرۆ ل گه‌ل هه‌ر ئێك ژ سه‌رۆك كۆمار و سه‌رۆكێ جڤاتا نوونه‌ران ژى كۆم ببيت.

نێچيرڤان بارزانى، سه‌رۆكێ هه‌رێما كوردستانێ دێ ل گه‌ل هه‌ر ئێك ژ ڤان مه‌زنه‌ به‌رپرسێن عيراقى كێشێن هه‌لاويستى يێن ناڤبه‌را هه‌رێما كوردستانێ عيراقێ بن كو هه‌ر ئێك ژ كه‌رتێ په‌ترۆل و بوودجه‌ و به‌ركه‌فتيێن دارايى يێن فه‌رمانبه‌ران و كێشا پێشمه‌رگه‌ى و گه‌له‌ك ته‌وه‌رێن دى بن.

ئەڤرۆ نیوز ، نەوزاد ھلۆری:

سوتنا گەنمێ جوتیاران رۆژ بو رۆژێ د زێدەبوونێ دانە، ب گورەی ئامارێن بەرەڤانیا باژێری ل عیراقێ ئەڤ سالە نێزیکێ 300 روودانێن ئاگربەربوونا گەنمی رووداینە و ھزاران دونەمێن عەردی ھاتینە سوتن و زیانێن زور ب جوتیاران کەفتینە، نڤیسەرەکێ ھەولێرێ ئەگەرێن پشت سوتنا گەنمێ جوتیاران ئاشکرا دکەت.

باز ئەحمەد نڤیسەرێ ناسیارێ ھەولێرێ کو رولەکێ کارا د پرسێن نیشتمانی و نەتەوەی دناڤبەرا ھەرێما کوردستان و عیراقێ ھەیە بۆ ئەڤرۆ نیوز گۆت: (ددەما بوری دا چەندین ھەلویست و سووز ژلایێ خەلکی ھەمبەری سوتنا گەنمێ جوتیاران ھاتینەکرن و ھەموو داخبارن ب سوتنا گەنمی و پرانیا روودانان ژی ب قەزا و قەدەر دھێنە بێدەنگ کرن، بەلێ کێم کەس ھەیە ئەگەرێن سوتنا گەنمی بزانن، ئەگەرا سوتنا گەنمی چەقماقەک نینە کو ب ھەلگری و پاشان ئاگری بەردەیە گەنمی و ھەموو بسوژیت و پاشان بەرەڤانیا باژێری و جھێن شولەژێ بھێن ئەوان کەسان بگرن و بکەن زیندانێ، بەلکو ھندەک ئەگەرێن دن ھەنە و پێدڤی یە ژێدەرێ ئەوان بھێتەگرتن، جھێ داخێ یە کو ھەتا نھا دوڤچون لسەر نەھێلانا وان ئەگەران نەھاتیەکرن، بڤێ یەکێ تنێ جوتیار زیاندارە).

زێدەتر گۆت: (ئێک ژ وان ئەگەرێن سوتنا گەنمێ جوتیاران ئەوە کو ئاریشە و ناکوکیا چەند سالی یا کورد و عەرەبان کورتربیت، ژ ناکوکیان ببیتە شەرێن زێدەتر و برایەتی و پێکڤە ژیان نەمینیت، ئەگەرەکا دن ژی نەھێلانا نەتەوەیا کوردە ل عیراقێ ب تایبەتی دەڤەرێن کوردستانیێن دەرڤەیێ کارگێریا ھەرێما کوردستانێ و ڤەگەراندنا ئێکجارەکی بو باوەشا عیراقێ، دیسان نەھێلانا دیروک و شارستانیا چەند سالایە کورد قوربانیێ بو ددەت و خەباتێ بو دکەن).

ناڤبری دیارکر ژی کو نوکە رێژا چاندنا گەنمێ نافخوەیا عیراقێ دگەھیتە شەش ملیون تەنان، دیسان عیراق سالانە کێمتر ژ سێ ملیون تەنێن گەنمی ل دەرڤە دئینیت کو ھیچ پێدڤی یەک پێ نینە و زێدەتر گۆت: (دوزا نھێنی یا عیراقێ دڤێ یەکێ دا ئەوە کو عیراق مفای ژ گەنمێ جوتیارێن نافخوە ژ بەر ھەر ئەگەرەکێ ھەبیت وەرناگریت، بەلکو پشت بەستنێ ب گەنمێ ھاوردە دکەت ب تایبەتی ئوسترالیا و ئەمریکا و کەنەدا و تورکیا و روسیا، ھەبونا رێژەکا زور یا گەنمێ نافخوە دێ بیتە ئەگەرێ ھندێ کو دەنگەکێ نەرازیبوونێ ل پشت ھەبیت و عیراق نەچاربیت کو گەنمی ژ جوتیاران وەربگریت، ئێدی گڤاشتن لسەر بھێنەکرن کو نەشێت گەنمێ دەرڤە بکریت کو سالوخەتێن وان باشترە، ئەڤە زێدەباری وێ یەکێ کو دێ بارزگانیا دناڤبەرا وان وەلات و عیراقێ راوستیت و گەندەلی کێمتر بیت و بازرگان ژی زیانداربن، ژبەرڤێ نەچارن کو ژ ئەگەرێن سوتنا گەنمی بگەریێن، چونکی تەنا گەنمی ب 100 دولاران دگەھیتە عیراقێ و بازرگانێن عیراقی ب 600 دولاران د فروشن کو ئەڤ یەک ژی گەندەلیەکا گەلەک مەزنە و نەبوونا وێ دێ زیانێن زور ب بارزگان و گەندەلکاران کەڤیت).

باز ئەحمەد، ددرێژاھیا ئاخفتنێن خودا دیارکر ژی کو پشتی سالا 2003 ملیونان دولار ھاتینە خەرجکرن داکو عیراق ببیتە وەلاتەکێ خوەژین ئانکو ئەو بخوە پشت بەستنێ بخوە بکەت ب تایبەتی گەنم و جەھی، بەلێ رۆژ بو رۆژێ بارودوخێ خوەژینا وەلاتیان خراپتر لێ دھێت و زێدەتر گۆت: (نوکە عیراق بزاڤان دکەت ب شێوازەکێ نێھنی و بێ دیارکرنا ئەگەرا رێژا چاندنا گەنمی کێم بکەت، چونکی گەندەلی ل پشت ھەیە، ب تایبەتی عیراق دخوازیت گەنمی ل ھەرێما کوردستانێ کێم بکەت، ژبەرڤێ گرنکە دەستھەلاتدارێن ھەرێما کوردستانێ ھزرێ د وێ یەکێ دا بکەن کو ئەو کرین و فروتنا گەنمێ جوتیاران ب جیھانا دەرڤە ب ستویێ خوڤە بگرن، باشترین چارەسەری بو ڤێ یەکێ ئەوە کو کورد سەر بزاڤێن خوە بو دەولەتبوون خورت بکەن و ئەڤرۆ یان سوبەھی تنێ چارەسەری سەرخوبوونە).

ئه‌ڤرۆ نيوز:

ئه‌ڤرو ئێڤاری 19/6/ 2019 به‌رێز (نه‌وفه‌ل به‌ها‌و موسی ) وه‌زیرێ‌ كوچ وكوچبه‌رێن حوكمه‌تا عيراقا فیدرال وشاندێ‌ دگه‌لدا سه‌را كوچكا پارێزگه‌ها دهوكێ‌ دا ژلایێ‌ به‌رێزان فه‌رهاد ئه‌مین ئه‌تروشی پارێزگه‌رێ‌ دهوكێ‌ وبه‌هزاد علی ئاده‌م جێگرێ‌ پارێزگه‌ری واسماعیل محمد احمد هاریكارێ‌ پارێزگه‌ری بو كاروبارێن ئاواره‌ وپه‌نابه‌ران پێشوازی لێ‌ كرن.
دهه‌ڤدیتنه‌كێ دا به‌حسێ‌ ره‌وشا ئاواره‌ وپه‌نابه‌ران ل سنورێ‌ پارێزگه‌ها دهوكێ‌ وئه‌و فشارا ئێخستیه‌ سه‌ر هه‌موو سه‌كته‌رێن خزمه‌تكاری وئه‌و هاریكاریێن ب رێكا پارێزگه‌ها دهوكێ‌ ورێكخراوێن خێرخاز ومروڤایه‌تی و وه‌زاره‌تا كوچ وكوچبه‌ران بو دهێته‌ كرن ب گشتی هاته‌ كرن.
پاش دكونگره‌كێ‌ روژنامه‌ڤانیدا وه‌زیرێ‌ كوچ وكوچبه‌ران سوپاسیا هه‌رێما كوردستانێ‌ وپارێزگه‌رێ‌ دهوكێ‌ وكارگێریا پارێزگه‌هێ‌ وخه‌لكێ‌ ده‌ڤه‌رێ‌ ب تایبه‌تی كر هه‌مبه‌ر ئه‌و پێشوازیا ل ئاواره‌یان كری كو ژ سالا 2014ێ‌ هه‌تا نوكه‌ هه‌موو ره‌نگێن خزمه‌تێ‌ پێشكێشی وان كرین وته‌كه‌زكر كو هاتنا گه‌له‌ك ئاوارا بو سنورێن پارێزگه‌هێ‌ فشاره‌كا مه‌زن ئێخستیه‌ سه‌ر هه‌موو سه‌كته‌رێن خزمه‌تكاری وپشتی ده‌ڤه‌رێن لژێر ده‌ستێ‌ تیرورستێن داعش ژلایێ‌ سوپایێ‌ ئیراقێ‌ وهێزێن پێشمه‌رگه‌ی هاتینه‌ رزگاركرن رێك بو ڤه‌گه‌ریانا ژماره‌كا زور یا ئاواره‌یان هاتیه‌ خوشكرن وهنده‌ك زڤرینه‌ سه‌ر مالێن خو هه‌روه‌سا هنده‌ك ژی ماینه‌ ونوكه‌ ل دوڤ راسپارێن سه‌روك وه‌زیرێن ئیراقێ‌ ئه‌م هاتینه‌ دا ژنێزیك ره‌وشا ئاواره‌یان ل پارێزگه‌ها دهوكێ‌ ببینین وئاریشێن وان بزانین ورێكێ‌ لبه‌ر وان خوشكه‌ین كو ڤه‌گه‌رنه‌ سه‌ر جهێن خو ومه‌ به‌رهه‌ڤیێن خو كرینه‌ كو ل روژێن بهێت دێ‌ كوژمه‌كێ‌ پاره‌ی ئه‌وژی ملیونه‌ك و(500) هزار دینارن دێ‌ ل سه‌ر هه‌ر خێزانه‌كا ئاواره‌ به‌لافكه‌ین.
هه‌روه‌سا گوت: مه‌ پروژه‌كێ‌ دی هه‌یه‌ ئه‌م رێكێ‌ ل به‌ر ڤه‌گه‌ریانا ئاوارا خوشكه‌ین وپێدڤیێن وان یێن ژیانێ‌ ل باژێرێن وان بو دابینكه‌ین بو وێ‌ یه‌كێ‌ ب ئارامی ڤه‌گه‌رنه‌ سه‌ر جهێن خو.
ژلایێ‌ خوڤه‌ پارێزگه‌رێ‌ دهوكێ‌ بخێرهاتنا شاندێ‌ وه‌زاره‌تا كوچ وكوچبه‌ران كر وته‌كه‌زكر كو دان وستاندن ل دور ره‌وشا ئاواره‌ وپه‌نابه‌ران هاتنه‌ كرن وسوبه‌هی 20-6-2019 لیژنا بلندا كوچ وكوچبه‌را ل ئاڤاهیێ‌ پارێزگه‌هێ‌ دێ‌ كومبیت وب تێر وته‌سه‌لی دێ‌ به‌حسێ‌ ئاریشێن ئاوارا وپه‌نابه‌ران ل سنورێ‌ پارێزگه‌هێ‌ هێته‌ كرن چونكو هه‌تا نوكه‌ 21 كه‌مپێن ئاواره‌ وپه‌نابه‌ران هه‌نه‌ وپترژ 42هزار خێزانان دناڤ دا دژین وژڤێ‌ ژمارێ‌ پتر ژی ل ده‌رڤه‌ی كه‌مپا دژین وئه‌ڤ سه‌روبه‌ره‌ دخوازیت كو هاریكاریا وان پتر بهێته‌ كرن وته‌كه‌زكر كو ئه‌وا دشیان دابیت دێ‌ پارێزگه‌ها دهوكێ‌ هه‌ڤكاریێ‌ دگه‌ل وه‌زاره‌وتا كوچ وكوچبه‌ران كه‌ت بو چاره‌سه‌ركرنا ئاریشێن ئاواره‌ وپه‌نابه‌ران.

ئه‌ڤرۆ نيوز:

سه‌رۆك مه‌سعود بارزانى ئه‌ڤرۆ چارشه‌مبى 19/6/2019 پێشوازى ل شانده‌كێ بلند يێ حزبا ئيسلامى يا عيراقى كر ب سه‌رۆكاتيا ئه‌ياد سامه‌رايى سكرتێرێ گشتيێ حزبێ.
د كۆمبوونه‌كێ دا ره‌وشا عيراقێ وده‌ڤه‌رێ وگوهۆرينێن د ناڤ پرۆسا سياسى يا عيراقى هاتن ئالوگۆركرن، هه‌روه‌سا به‌حسێ ره‌وشا پارێزگه‌ها نه‌ينه‌وا وپرۆسا ئاڤه‌دانكرنا مووسلێ وره‌وشا خه‌لكێ وێ پارێزگه‌هێ هاته‌ كرن.

هه‌ر د وێ كۆمبوونێ دا مه‌ترسيێن هزرا توندره‌ويێ وسه‌رهلدانا تيرۆرستێن داعشێ هاته‌ به‌حسكرن ول دۆر وێ چه‌ندێ هه‌ماهه‌نگى وهشيارى هه‌موو لايه‌كى ب پێدڤى هاته‌ زانين.

د پشكه‌كا دى يا وێ كۆمبوونێ دووپاتى ل پێشڤه‌برنا په‌يوه‌نديێن د ناڤبه‌را هه‌ردولا دا وهاريكارى وهه‌ماهه‌نگيا په‌رله‌مانى د ناڤبه‌را پارتى ديموكراتى كوردستان وحزبا ئيسلامى يا عيراقى هاته‌ كرن.

ئه‌ڤرۆ نيوز:

شێخ سه‌باح ئه‌حمه‌د جابر ئه‌لسه‌باح ئه‌ميرێ وه‌لاتێ كوێتێ ئه‌ڤرۆ چارشه‌مبى 19/6/2019 ب رێيا ته‌له‌فۆنێ په‌يوه‌ندى ب سه‌رۆك مه‌سعود بارزانى كر.

د وێ په‌يوه‌نديا ته‌له‌فۆنى دا ئه‌ميرێ كوێتێ خوه‌شحاليا خوه‌ ده‌ربرى ب وێ پێشڤه‌چوونا سياسى كو ل ئاستێ هه‌رێما كوردستانێ وهه‌روه‌سا په‌يوه‌نديێن هه‌ولێرێ وبه‌غدا هاتينه‌ پێش وهيڤيا سه‌ركه‌فتنێ وپێشكه‌فتنا زێده‌تر بۆ گه‌لێ كوردستانێ خواست.

سه‌رۆك بارزانى سوپاسيا ئه‌ميرێ كوێتێ كر وب خێر هاتنا وى ژى كر كو ب سه‌ره‌دانه‌كێ ئه‌ڤرۆ گه‌هشتيه‌ به‌غدا.

ئه‌ڤرۆ نيوز:

سه‌رۆك مه‌سعود بارزانى ئه‌ڤرۆ چارشه‌مبى 19/6/2019 پێشوازى ل ئه‌ياد عه‌لاوى سه‌رۆكێ ئيئتيلافا نيشتمانى يا عيراقى وسه‌رۆكێ مينبه‌رێ عيراقى وشانده‌كێ دگه‌لدا كر.

ئه‌ياد عه‌لاوى ئارمانجێن مينبه‌رێ عيراقى رۆهنكرن وراگه‌هاند كو مينبه‌ر لايه‌نه‌كێ به‌رفرهه‌يه‌ ژ كه‌سايه‌تيێن ميانره‌و ونيشتمانپه‌روه‌ر وكار بۆ وێ چه‌ندێ دكه‌ت هه‌موو پێكهاتێن نه‌ته‌وى وئاينى يێن عيراقى يه‌كسان بن.

عه‌لاوى پێزانينا خوه‌ بۆ رۆلێ ئه‌رێنى وكاريگه‌ر يێ سه‌رۆك بارزانى دياركر وگۆت” رۆلێ جه‌نابێ هه‌وه‌ ل سه‌ر ئاستێ عيراقێ وكوردستانێ گه‌له‌ك يێ كاريگه‌ر بوو ويێ به‌رچاڤه‌ ونوكه‌ بۆ پاراستنا ديموكراسى ل عيراقێ ومه‌ هه‌موويان گه‌له‌ك زێده‌تر پێدڤى ب رۆلێ هه‌وه‌ يێ هه‌ى”.

website security
WP Facebook Auto Publish Powered By : XYZScripts.com