ئه‌ڤرۆ نيوز:
ئێكه‌تى دێ پشكداريێ د رێوره‌سمێن سووندخوارنا سه‌رۆكێ هه‌رێمێ دا كه‌ت
ئێكه‌تى دێ پشكداريێ د رێوره‌سمێن سووندخوارنا سه‌رۆكێ هه‌رێمێ دا كه‌ت
نووترين نووچه
- هیڤیدارین دادگەها فیدرال د بەرسڤا نامەیا مە دا بڕیارەكا ئەرێنی و د بەرژەوەندییا خەلكێ كوردستانێ دا دەربكەت
- ژ بەر پشتگوهـ ئێخستنێ مە پرسا ئاوارەیان گەهاندیە UNێ
- ئەڤرۆ دادگەها فیدرال ل سەر پرسا مووچەیێن فەرمانبەرێن كوردستانێ دێ كۆمبیت
- پێدڤییە ئالیێن سیاسی یێن كوردستانی د شەڕێ ئیسرائیلێ و ئیرانێ دا د بێلایەن بن
- سەرۆك بارزانی و رێكخەرا كۆنسلخانەیا ئیماراتێ دوپاتی ل دۆستایەتی و پەیوەندیێن دو قولی كر
- سەرۆكێ هەرێمێ و كاربرێكەرا قونسلخانەیا ئیماراتێ دووماهی پێشهاتێن دەڤەرێ گەنگەشەكرن
- پێدڤییە جڤاكێ نێڤدەولەتی رۆلێ خوە بۆ راوەستاندنا كریارێن سەربازی بگێڕیت
- حوكمەتا ئیراقێ ئاستەنگان دروست دكەت
- ب بەرهەڤبوونا سوودانی مە كۆمبوونەكا باش ل دۆر مووچەی ئەنجامدا
- گوهۆڕین دێ هەموو دەڤەرێ و ئیراقێ ڤەگریت
سه‌ره‌كى نوچێن گرنگ
ئه‌مريكا: ته‌رمێ دو سيناتۆران ب كوشتى هاته ديتن
ئه‌ڤرۆ نيوز:
د دو روودانێن جودا دا، ته‌رمێ دو سناتۆرێن به‌رێ يێن ئه‌مريكا ل مالێن وان ب كوشتى هاتنه ديتن ئه‌و دو روودان ژى بوونه ئه‌گه‌رێ به‌حس و خواستا گه‌رم يا ميديا ئه‌مريكا.
ب گۆره‌ى ميديايێن ئه‌مريكا، هه‌ردو سيناتۆرێن كوشتى به‌رى نها ل جڤاتا پيران نوونه‌راتيا ويلايه‌تا ئه‌ركانزاس و ئوكلاهۆمو دكر و ب گۆله‌يان هاتينه كوشتن.
د ڤێ ده‌ربارێ دا پۆليسێن ئه‌ركانزاس راگه‌هاند كو ته‌رمێ سيناتۆرا به‌رێ يا كۆماريان ليندا كولينز، يا 56 سالى د ناڤ مالا وێ دا ب كوشتى هاتيه ديتن و ڤه‌كۆلين د ڤى وارى دا د به‌رده‌وامن.
سيناتۆرێ دويێ ژى هه‌ر سه‌ر ب كۆماريانه و ناڤێ وى جوناسان نيكولزه و 53 سالى يه، ل سالا 2000 هه‌تا 2012 ل جڤاتا پيران نوونه‌راتيا ويلايه‌كا ئوكلاهۆما كريه و پاشان ژى ل زانكۆيا هه‌مان ويلايه‌ت كار كريه و رۆژا چارشه‌مبى پشتى بيستنا ده‌نگێ گوله‌يان ل مالا وان، ئه‌و ژى ب كوشتى ل مالا وى هاتيه ديتن.
ده‌سته‌لاتدارێت ناڤخۆ يێ ئه‌كلاهوما بزاڤێ دكه‌ن ب رێيا نوشداريا داد چاوانيا كوشتنا نيكۆلز ئاشكه‌را بكه‌ن.
ئه‌ڤ ساله گه‌شتيار نه‌شێن سه‌ره‌دانا گه‌ليێ سێپركا بكه‌ن
ئەڤرۆ نیوز، نەوزاد ھلۆری:
گەلیێ سێپرکا کو دکەڤیتە باشوورێ قەزا ئامێدیێ ب دوراتیا 13کم ئێکە ژ خوشترین ھاڤینگەھێن کوردستان و پارێزگەھا دھۆکێ و رۆژانە دناڤبەرا 200 بو 300 ترومبێلێن گەشتیار و وەلاتیان قەست دکرێ، ژ ئەگەرێ باران و لەھیێن ئەڤ سالە رێیا سەرەکی یا گەھشتنا وێ ژ کارکەفتیە، ھەتا نوکە نەھاتیە ڤەکرن ڤە.
محەمەد بەرگارەی، ئێک ژ وەلاتێن دەڤەرا بەرێ گارێ یە بۆ ئەڤرۆ گۆت: (گەلێ سێپرکا ئێکە ژ جھێن گەشتوگۆزاری و ھژمارەکا زور یا جھێن گەشتوگۆزاری و بازار لێ ھاتینە چێکرن و دەلیڤەیێن کاری بو ھژمارەکا خەلکی ھاتینە دیتن و تێدا کاردکەن و سالانە ھژمارەکا زور ژ گەشتیاران ل ھەموو پارێزگەھێن ھەرێما کوردستان و باشوور و ناڤەراستا عیراقێ ژی سەرەدانێ بو دکەن، بەلێ ئەڤ سالە ژ ئەگەرێ زور بارینا بارانێ رێیا گەھشتنا گەلی ھاتیە خراپکرن و ھەتا نوکە ژی نەھاتیە چێکرن).
زێدەتر گۆت: (ھندەک جورێن ترومبێلان دشێن د رێیا کومەلگەھا ئازادی ل سەرسنکێ بگەھن نێزیکێ گەلی، بەلێ یا گرنگە رێیا سەرەکی یا ئامێدیێ بو گەلیێ سێپرکا بھێتە چێکرن داکو خەلک ب ساناھی بگەھن گەلی).
بەرگارەی دیارکر ژی کو ئەوان چەند جارەکا داخوازی ل جھێن شولەژێ کریە کو رێیا گەلیێ سێپرکا دروست بکەن ڤە بەلێ ھەتا نوکە بەرسڤا وان نەھاتیەدان و زێدەتر گۆت: (ئەڤ سالە زیانەکا زور ب خودانکار و خەلکێ دەڤەرێ کەفتیە، چونکی ماینە بێ کار و گەشتیار نەشێن بگەھن ھاڤینگەھێ، ئەگەر دووبارە رێیا سەرەکی بھێتە چێکرن ڤە، جارەکا دی، دێ گەشتیار و وەلاتی شێن قەست کەنێ).
گەلیێ سێپرکا دبیتە ئێک ژ 35 ھاڤینگەھێن تورمارکری ل سنوورێ قەزا ئامێدیێ و دکەڤیتە گوندێ زێوە ل بنارێ چیایێ گارەی، ئاڤەکا شین و سار ھەیە.
دو کەسان ژ ئەگەرێ ئاگربەربوونا دەخلودانێ گیانی خوە ژ دەست دان
ئەڤرۆ نیوز، لەزگین جوقی:
رێڤەبەرێ ناحیا سنوونێ راگەھاند کو ل دەڤەرا “ئوم خەباری” ئاگر بەربوویە دەخلودانێ جۆتیارێن سنوونێ د ئەنجام دا رووبەرەکێ مەزن یێ دەخلودانێ ھاتیە سووتن و چار کەس ژی د ناڤ دا سووتن ژ وانا ژی دو کەسان گیانی خوە ژ دەست داینە و دو کەسێن دی بریندار بووینە.
نایف سەیدۆ، رێڤەبەرێ ناحیا سنوونێ بۆ ئەڤرۆ نیوز دیارکر کو پێدڤیە ڤەکۆلینەکا ب لەز د سووتنا دەخلودانێ جۆتیاران دا بھێتە کرن و ھەموو کەسێن زەرمەند ژی بھێنە قەرەبوو کرن چونکو ھەکە بەغدا جۆتیاران قەرەبوو نەکەت سالا بھێت جۆتیار نەشێن چاندنێ بکەن پێدڤیە ئەگەرێن سووتنا دەخلودانی و گیان ژ دەستدانا دو کەسان و سووتنا دو کەسێن دی بھێنە دیارکرن و رێگریێ ل حالەتێن سووتنا دەخلودانی بکەن، “بەری نوکە ژی چەندین جاران مە ئەڤ داخوازە ژ حوکمەتا عیراقی کریە”.
رێڤەبەرێ ناحیا سنوونێ گۆت: “وەسان دیارە وەکو پێدڤی پلان نەھاتینە دانان بۆ رێگری کرنێ ل سووتنا دەخلودانی و دەمێ حالەتەک ژی رووددەت زوو بھێتە کونترول ھەتا ئەڤ حالەتێن سووتنا دەخلودانآ بنە ئەگەر وەلاتی ببنە قوربان”.
رێڤه‌به‌رێ پۆليسان نووترين پێزانينان ل سه‌ر كوشتنا دلينێ ئاشكه‌را دكه‌ت
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌رێ پۆليسێن دهۆكێ راگه‌هاند كو تاوانبارێ به‌رپرس ژ كوشتنا دلينێ هاتيه ده‌سته‌سه‌ركرن و دانپێدان ب تاوانا خوه كريه و دايه زانين كو نه‌شيايه ده‌ستدرێژيێ بكه‌ته سه‌ر.
ليوا تارق ئه‌حمه‌د، رێڤه‌به‌رێ پۆليسێن پارێزگه‌ها دهۆكێ د كۆنگره‌كێ رۆژنامه‌ڤانى دا راگه‌هاند كو ل شه‌ڤا 7 ل سه‌ر 8ى خزيرانا 2019ێ ئه‌و هاتينه ئاگه‌هداركرن ل سه‌ر روودانێ و پشتى ئه‌فسه‌رێ نوبه‌دار گه‌هشتيه جهێ روودانێ و روودان ب چاڤێن خوه ديتى راپۆرتا خوه نڤيسيه و ل رۆژا پاشتر هاتيه ئاگه‌هداركرن و ئه‌و ب خوه ژى ل جهێ روودانێ ئاماده بوويه.
رێڤه‌به‌رێ پۆليسان زێده‌تر گۆت: “هه‌ر ئێكسه‌ر ژماره‌كا تۆمه‌تباران هاتينه ده‌ستنيشانكرن و ل دووماهيێ ژى دو كه‌س ماينه و كه‌سه‌ك ژ وان دانپێدان ب تاوانا خوه كريه و كه‌سێ دژى كو برايێ وى يه تاوانا وى ڤه‌شارتيه و ژ به‌ر هندێ ژى ئه‌و ژى دێ ل دووڤ قانوونێ هێته سزا دان”.
ليوا تارق، ئاماژه ب وێ چه‌ندێ ژى كر كو ئه‌ڤ كچه هاتيه خاپاندن و كه‌سێ تاوان ل گه‌ل كرى هه‌ڤالێ بابێ وێ بوويه و ب په‌يڤا “مام” رازى كريه كو هه‌ڤالێ بابێ وێ يه و ژ تاخێ كۆچه‌را بريه تاخێ خه‌بات و ل وێرێ د ناڤ وان بيستانان دا بزاڤ يا كرى ده‌ستدرێژيا سكسى بكه‌ته سه‌ر، به‌لێ وێ زارۆيێ رێ نه‌دايه.
گۆتژى: “پشتى زارۆيێ رێ نه‌دايێ وه‌كو دانپێدانێن تاوانبارى، ئه‌وى داره‌ك ژ په‌رژانێ بيستانه‌كى ڤه‌كر و سه‌رێ وى يێ تيژ بوو ل ستوويێ وێ دايه و ئێكێ دژى ل ستوويێ وێ دايه و درانديه و ب كرێتترين شێوه كوشتيه”.
نه‌ڤه‌شارت ژى كو پشتى چوويه مال برايێ خوه ئاگه‌هدار كريه و پاشان ژى ئه‌و برايێ خوه پێكڤه چووينه مالا وان و پشكدارى د خه‌ما وان دا كريه دا كو تاوانا وان بهێته ڤه‌شارتن. “ژ به‌ر كو برايێ وى ژى تاوانا وى ڤه‌شارتيه ئه‌و ژى دێ ل سه‌ر ڤێ روودانێ هێته سزادان ب گۆره‌ى قانوونێ”.
ليوا تارق نه‌ڤه‌شارت كو هێشتا ئه‌و نه‌شێن بڕيارا دووماهيێ ل سه‌ر وێ چه‌ندێ بكه‌ن كا ده‌ستدرێژى كريه سه‌ر يان نه و چاوان هاتيه كوشتن ژ به‌ر كو هێشتا راپۆرتا نوشداريا داد ده‌رنه‌كه‌فتيه ژ به‌ر كو لاشێ وێ گه‌له‌ك تێكچوويه ل به‌ر هه‌تاڤێ و هه‌تا راپۆرتا نوشداريا داد ده‌رنه‌كه‌ڤيت ئه‌و نوزانن كا ده‌ستدرێژى كريه سه‌ر يان نه، به‌لێ ته‌كست ل سه‌ر وێ چه‌ندێ كريه كو ب ساتۆرێ نه‌هاتيه كوشتن و دبيت هه‌ر وه‌كو وى گۆتى بيت كو ب دارى هاتيه كوشتن.
ده‌رباره‌ى وێ چه‌ندێ كا تاوانبار يێ نه‌خۆشه ژ لايێ ده‌روونى ڤه يان نه، رێڤه‌به‌رێ پۆليسان گۆت: “تاوانبار ژ دايكبوويێ 1972ێ يه و وه‌كو ديار چو نه‌خۆشيێن ده‌روونى نينن، ب تنێ يا ڤيايى حه‌زێن خوه يێن سكسى تێر بكه‌ت و گۆت: “ئه‌و ب خوه ژى تاوانباره‌كێ كه‌ڤنه و به‌رى نها ل سالا 2005ێ بزاڤا كوشتنێ كريه و ل سه‌ر هاتيه زيندانكرن و ل مووسل ژى چه‌ند تاوان ئه‌نجام داينه و كه‌سه‌كێ مه‌يى ڤه‌خۆره و حه‌بێن بێهۆشكه‌ر ژى دخۆت، ب لێبۆرينه‌كا گشتى هاتيه ئازاد كرن”.
سوبەھی سەرۆکێ ھەرێمێ دێ سووند خوت و سەرۆکێ جڤاتا وەزیران ھێتە راسپاردن
ئەڤرۆ نيوز:
بریارە سوبەھی نێچیرڤان بارزانی سەرۆکێ ھەلبژارتی یێ ھەرێما کوردستانێ د رێورەسمەکێ بەرفرەە دا ل ھەولێرێ سووندا قانوونی بخۆت و سەرۆکێ جڤاتا وەزیران ژی دێ ھێتە راسپاردن.
دەستەیا سەرۆکاتیا پەرلەمانێ کوردستانێ بەرنامێ کارێ روونشتنا ئاسایی یا پەرلەمانی یێ سوبەھی راگەھاند و تێدا ھاتیە” خواندنا بڕیارا ھەژمار 6 سالا 2019 یا تایبەت ب ھەلبژارتنا نێچیرڤان بارزانی وەکو سەرۆکێ ھەرێما کوردستانێ و سووند خواندنا سەرۆکێ ھەرێمێ ل دووڤ مادێ 9 ژ قانوونا ھژمار 1 سالا 2005 یا راستڤەکری.
ھەر ل دووڤ بەرنامێ کارێ روونشتنی دێ نێچیرڤان بارزانی پەیڤەکێ پێشکێش کەت، ل دووڤ دا دێ ناڤئینانا سەرۆکێ جڤاتا وەزیرێن ھەرێما کوردستانێ ھێتە ئەنجامدان.
مەسرور بارزانی بەربژارێ پارتی دیمۆکراتی کوردستانە بۆ وەرگرتنا پۆستێ سەرۆک وەزیرێن ھەرێما کوردستانێ.
رۆهنكرنه‌ك ل دۆر گيرۆبوونا هاتنا عومره‌كارێن كورد ژ سعوديێ دهێته دان
ئه‌ڤرۆ نيوز:
وه‌زاره‌تا ئه‌وقاف وكاروبارێن ئاينى ل هه‌رێما كوردستانێ راگه‌هاند، هژماره‌كا عومره‌كارێن هه‌رێما كوردستانێ نوكه ژ وه‌لاتێ سعوديێ نه‌وڤرينه ژئه‌گه‌رێ دروستبوونا كێشه‌كا ته‌كنيكى ل فرۆكا وان، دياركر ژى كو هه‌تا رۆژا 17 حزه‌يرانێ هه‌موو عومره‌كارێن هه‌رێمێ دێ زڤرن.
نه‌به‌ز ئيسماعيل، په‌يڤدارێ وه‌زاره‌تا ئه‌وقاف وكاروبارێن ئاينى ئه‌ڤرۆ شه‌مبيێ 8/6/2019 گۆت” ل هه‌يڤا ره‌مه‌زانێ ئه‌و وه‌لاتيێن هه‌رێما كوردستانێ كو ب مه‌ره‌ما عومرێ سه‌ره‌دانا سعوديێ كربوو زێده‌ترن ژ شه‌ش هزار كه‌سان، دناڤ وان دا هه‌يه ب حه‌زا خوه بۆ ده‌مێ 10 بۆ 30 رۆژان ماينه، ئه‌وێن دو دڤێت ل ڤان چه‌ند رۆژان هاتبان، ژ ئه‌گه‌رێ شاشيه‌كا ته‌كنيكى ل ده‌مێ چوونا وان، فرۆكا وان گيروبوويه”.
زێده‌تر گۆت” ساخله‌ميا هه‌موو عومره‌كارێن هه‌رێما كوردستانێ يا باشه ول 17 حزه‌يرانێ دێ هه‌موو زڤرن بۆ كوردستانێ، ئه‌وێ نه‌رازى يه دشێت ل ده‌مێ هاتنا وى سكالايێ ل ده‌ف مه ل سه‌ر كۆمپانيان تۆمار بكه‌ت”.
خوياكر ژى” د نوكه دا رێڤه‌به‌ريا حه‌ج وعه‌مرێ ل هه‌رێما كوردستانێ ل گه‌ل هێلا ئه‌سمانى يا عيراقى وده‌سته‌يا حه‌ج وعومرێ ل عيراقێ ل سه‌ر خه‌تن بۆ وێ چه‌ندێ هه‌ر چ زوويه كار بۆ زڤرينا وان عه‌مره‌كاران بهێته كرن كو ل وه‌لاتێ سعوديێ ماينه”.
بازرگانەکێ قەزا شێخان ب پێنج کێران دھێتە کوشتن
ئەڤرۆ نیوز، بارزان مزووری:
بازرگانەکێ ئێزدی یێ قەزا شێخان ب پێنج کێران ل بەغدا دھێتە کوشتن و تۆمەتبار ترۆمبێل و پارێن وی ژی ل گەل خوە دبەن، برایەکێ وی ژی دبێژیت: مە گۆمان یا ل سەر کەسەکێ ب رەگەز عەرەب ھەی.
سەعید شەمۆ، برایێ ئەو بازرگانێ ھاتیە کوشتن بۆ ئەڤرۆ نیوز دیار کر، ل رێکەفتی ٦/٦ برایێ من بناڤێ (شەمۆ دەروێش خەتاری) ل رۆژا ٦/٦/٢٠١٩ ژ سەر کارێ خوە ڤەگەڕیایە شقا خوە د ناڤ سەنتەرێ باژێرێ بەغدا دا، ھندەک کەس دبنە مێھڤانێن وی، پشتی مێھڤانداریێ ژ لایێ وانڤە ب پێنج کێران دھێتە کوشتن و گۆت: “وان تاوانباران ترۆمبێلا برایێ من ژ جۆرێ مونیکا ھژمارە دھۆک و چانتەکێ مەزن یێ پاران دگەل گۆستیلکا تبلا وی ل گەل خوە یێن برین و دەرگەھێ شقا وی ژی یێ دائێخستی و لاشێ وی د ناڤ ژوورەکا شقێ دا بجە ھێلایە”.
ناڤھاتی خویا کر، بەری برایێ من بھێتە کوشتن خێزانا وی تلەفۆن بۆ کربوو و دگەل ئاخڤتبوو، ل رۆژا د دووڤ دا پەیوەندی بۆ کرەڤە تلەفۆنا وی یا گرتی بوو و گۆت: “مە پەیوەندی ب پسمامێن خوە کرن ل بەغدا چوونە بەر دەرێ شقێ ترۆمبێلا وی بەر دەرێ شقێ نەبوو، ئێکسەر دچنە شقێ دەرگەھێ شقێ شکاند کو لاشێ وی د ژوورەکێ ڤە یێ دانای”.
گۆتژی: “مە گۆمان ل سەر کەسەکێ ب رەگەز عەرەب یا ھەی کو ئەڤ تاوانە ل ھەمبەر برایێ من کربیت”.
بر ایێ بازرگانێ ھاتیە کوشتن دا زانین کو ئەڤە زێدەتری ٢٠ سالایە برایێ وی ل بەغدا کارێ بازرگانی دکەت و گۆت: “ئەڤە برایێ من یێ سیێ یە، ب ڤی شێوەی دھێتە کوشتن، برایێ من ژ دایک بوویێ سالا ١٩٦٣ یە و بابێ شەش زارۆیایە، سێ کچ و سێ کوڕان و ئاکنجیێ کۆمەلگەھا خەتارێ یە یا سەر ب قەزا شێخان ڤە”.
پشتی سێ رۆژان تەرمێ دلینا ١٠ سالی ھاتە دیتن
ئەڤرۆ نیوز، حەمۆ محەمەد:
بەرپرسێ پشکا پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ دیار کر، تەرمێ وێ زارۆیا ١٠ سالی یا بەری سێ رۆژان ژ مال دەرکەفتی و بێ سەروشوون بووی د ناڤ چەمێن د بن یاریگەھا دھۆکێ دا ھاتە دیتن و بۆ نۆشداریا داد ل دھۆکێ ھاتیە ھنارتن.
موقەدمێ مافپەروەر ھێمن سلێمان، بەرپرسێ پشکا پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ خویا کر، دوھی بەری نیڤرۆ ٨/٦/٢٠١٩ تەرمێ وێ زارۆیا ١٠ سالی یا بناڤێ (دلین وەلید) بەری سێ رۆژان ژ مال دەرکەفتی و بێ سەروشوون بووی د ناڤ چەمێن د بن یاریگەھا دھۆکێ دا ھاتە دیتن و گۆت: “ڤەکۆلینان ل سەر ڤێ روودانێ دەستپێکریە و پەڕێن ڤەکۆلینێ ل پۆلیسێن نەھێلانا گونەھباریا ل دھۆکێ ھاتینە ڤەکرن، بۆ زانینا ئەگەرێن گیان ژ دەستدان و نیاسینا وێ و ل رێڤەبەریا نۆشداریا داد پشکنین بۆ دھێنە ئەنجامدان”.
ل دووڤ پێزانینان ژی ئەوا د پشکنینێن دەستپێکی دا دیار بووی ئەوە کو ئەو زارۆیە ب چەقۆیان ھاتیە کوشتن و بزاڤا سەربڕینا وێ ژی ھاتیە کرن، لێ ھەتا نوکە راپۆرتا نۆشداریا داد دەرنەکەفتیە و ھوورکاریێن چاوانیا کوشتنا وێ دیار نەکرینە.
ل گۆرەی زانیاریێن وار ژی، دو کەسێن بەرگۆمان ھاتینە دەستەسەرکرن و لێپرسین ل گەل بەردەوامە.
ژڤانێ سویند خوارنا سه‌رۆكێ هه‌رێمێ وراسپاردنا سه‌رۆكێ حوكمه‌تێ هاته دیاركرن
ئه‌ڤرۆ نیوز:
ده‌سته‌یا سه‌رۆكاتیا په‌رله‌مانێ كوردستانێ به‌رنامێ كارێ روونشتنا ئاسایى یا په‌رله‌مانى ل رۆژا دوشه‌مبى 10/6/2019 راگه‌هاند.
د به‌رنامێ كارى دا هاتیه” خواندنا بریارا هژمار 6 سالا 2019 یا تایبه‌ت ب هه‌لبژارتنا نێچیرڤان بارزانى وه‌كو سه‌رۆكێ هه‌رێما كوردستانێ وسویند خوارنا سه‌رۆكێ هه‌رێمێ ل دووڤ مادێ 9 ژ قانوونا هژمار 1 سالا 2005 یا راستڤه‌كرى.
هه‌ر ل دووڤ به‌رنامێ كارێ روونشتنى دێ نێچیرڤان بارزانى سه‌رۆكێ هه‌رێما كوردستانێ په‌یڤه‌كێ پێشكێش كه‌ت، دیسا ل دووڤ برگا 3 ژ مادێ 56 یا قانوونا هه‌لبژارتنا په‌رله‌مانێ كوردستانێ یا هژمار 1 سالا 1992 یا راستڤه‌كرى، دێ ناڤئینانا سه‌رۆكێ جڤاتا وه‌زیرێن هه‌رێما كوردستانێ هێته ئه‌نجامدان.
دهێته زانین مه‌سرور بارزانى به‌ربژارێ پارتى دیموكراتى كوردستانه بۆ وه‌رگرتنا پۆستێ سه‌رۆك وه‌زیرێن هه‌رێما كوردستانێ.
نيشاندان
WP Facebook Auto Publish Powered By : XYZScripts.com