ئه‌ڤرۆ نیوز:

وه‌زاره‌تا خواندنا بلند وڤه‌كۆلینێن زانستى ل هه‌رێما كوردستانێ، داخۆیانیه‌كا بریكارێ وه‌زاره‌تا خواندنا بلند یا عیراقێ ره‌ت دكه‌ كو راگه‌هاندبوو، دان پێدان ب باوه‌رنامێن زانكۆیێن تایبه‌ت یێن هه‌رێما كوردستانێ ناهێته‌ كرن.

عەباس ئەکرەم، په‌یڤدارێ وه‌زاره‌تا خواندنا بلند دبه‌یاننامه‌كێ دا راگه‌هاند” داخۆیانیا سه‌لام خۆشناو بریكارێ وه‌زاره‌تا خواندنا بلند ل عیراقێ ره‌ت دكه‌ین كو گۆتبوو حوكمه‌تا عیراقێ دا پێدانێ ب باوه‌رنامێن زانكۆیێن تایبه‌ت ل هه‌رێما كوردستانێ ناكه‌ت، ئه‌ڤ ئاخڤتنه‌ چو بنه‌مایه‌كێ راستیێ تێدا نینه‌”.

رۆهنكر ژى” دده‌مێ بۆرى دا وه‌زاره‌تا خواندنا بلند ل هه‌رێما كوردستنای ل گه‌ل وه‌زاره‌تا خواندنا بلند ل عیراقێ یاداشتنامه‌كا هه‌ڤپشك ئیمزاكربوو، پێگیریا خوه‌ ب برگه‌ ومادێن رێككه‌فتنێ ده‌ربرى بوو وچاڤه‌رێ دكه‌ین وه‌زاره‌تا خواندنا بلند ل عیراقێ ژى برگه‌ ومادێن یاداشتنامێ بجهبینیت”.

گۆت ژى”بریار وراسپارده‌یا وه‌زاره‌تا مه‌ سه‌باره‌ت ڤان پرسان د چارچۆڤێ وێ یاداشتناما هه‌ڤپشكه‌ كو د ناڤبه‌را مه‌ هه‌ردو لایه‌نان دا هاتیه‌ ئیمزاكرن ودژى چو لایه‌كى نینه‌، له‌وما ب پێدڤى دزانین ب هه‌موویان رابگه‌هینین كو داخۆیانیا بریكارێ وه‌زاره‌تا خواندنا بلند ل عیراقێ چو بنه‌مایه‌ك بۆ نینه‌، كارێن لژنێن مه‌ یێن هه‌ڤپشك ژى بۆ بابه‌تێن هه‌ڤپشك د ناڤبه‌را هه‌ردو لایه‌نان دا د به‌رده‌وامن”.

ئەڤرۆ نیوز:

بارەگایێ بارزانی ئەڤرۆ بەیاننامەک دەربارێ گۆتنێن حەیدەر عەبادی سەرۆک وەزیرێن بەرێ یێ عیراقێ بەلاڤکر و تێدا هاتیە کو عەبادی هندەک گۆتنێن نەراست ل دۆر پێشمەرگێن کوردستانێ و کەرکووکێ گۆتینە و ئەو یەک ژی پشتی هندێ دهێت رەوشەکا نوو پشتی هەلبژارتنێن عیراقێ هاتیە پێش.

د پشکەکا دی یا بەیاننامێ دا ئاماژە ب هندێ هاتیە کرن کو ئاشکرایە ئەنجامێ هەلبژارتنێن عیراقێ عەبادی و ئەو کەسە سزادان یێن کو دژبەریا مافێن رەوا یێن گەلێ کوردستانێ دکرن، وان دڤیا شەرێ ناڤخوەیی ل عیراقێ دروست بکەن و تاوانێن مەزن ل دژی گەلێ کوردستانێ ل کەرکووکێ ئەنجام دان، ل ئالیێ دی گەلێ کوردستانێ د هەلبژارتنێن پەرلەمانێ کوردستانێ ژی پاداشتا پێشمەرگەیی و وان کەساندا یێن بەرگیری ل کوردستانێ کرن.

د بەیانناما بارەگایێ بارزانی دا ئاماژە ب هندێ ژی هاتیە کرن کو عەبادی ل هەمبەر گەلێ کوردستانێ و پێشمەرگێن قارەمانێ بێ وەفا بوو، چونکو هەکە پێشمەرگە نەبان عەبادی ب چو رەنگەکێ نەدشیا ل مووسلێ ل دژی داعشێ سەرکەڤیت.

د بەیانناما بارەگایێ بارزانی دا ئاماژە ب هندێ ژی هاتیە کرن کا چاوا پێشمەرگێن کوردستانێ خەونێن رژێما بەرێ ل دژی گەلێ کوردستانێ ژناڤبر، وەسا ژی هەموو خەونێن عەبادی تێک دا و ئەڤرۆکە عەبادی باشتر ژ هەر کەسەکێ دزانیت کا پێشمەرگێن قارەمان چاوا شیان هەموو پیلانێن وی ژناڤ ببەن.

د دووماهیا بەیاننامێ دا ئەو یەک ژی هاتیە دیار کرن کو قۆناغەکا نوو ل عیراقێ دەستپێکریە و نابیت کەسێن خوەپەرست چو رۆل ل عیراقێ هەبن، چونکو قۆناغا نها قۆناغا پێکڤەژیانێ و چەسپاندنا قانوونێ و شەراکەتا راستەقینە یە و یێن وەکو عەبادی چو رۆل نابن.

ئەڤرۆ نیوز:

ئەندامەکێ سەرکردایەتیا پارتی دیار دکەت کو ل ڤێ مەهێ دێ سەرۆکێ هەرێما کوردستانێ هێتە دانان و هەتا دووماهیا مەها داهاتی ژی دێ سەرۆکێ حوکمەتا هەرێما کوردستانێ هێتە دانان.

ئاراس حەسۆ میرخان ئەندامێ سەرکردایەتیا پارتی دیار کر کو هەتا دووماهیا ڤێ مەهێ دێ سەرۆکێ هەرێما کوردستانێ هێتە دانان و ل دووماهیا مەها داهاتی ژی دێ سەرۆکێ حوکمەتێ هێتە دانان و گۆت: (کارێ مە بۆ پێکئینانا کابینا نوو یا حوکمەتێ بەردەوامە، ل گەل هەموو ئالیان ژی دانوستاندنان دکەین و نابیت بابەتێ ئاڤاکرنا کابینا نوو یا حوکمەتێ پتر گیرو بیت، ژ بەر هندێ ژی هەتا دووماهیا مەها چار کابینا حوکمەتێ دێ هێتە دیار کرن و دڤێت ئالیێن پشکدار ژی ناڤێ وەزیرێن خوە رادەست بکەن).