ئه‌ڤرۆ نیوز:

جڤاتا وه‌زیرێن هه‌رێما كوردستانێ ڤه‌گوهاستنا راژا فه‌رمانبه‌رێن هه‌موو وه‌زاره‌تان بۆ په‌یمانگه‌ها دادوه‌رى راگه‌هاند.

د نڤیساره‌كا سه‌رۆكاتیا جڤاتا وه‌زیرێن هه‌رێما كوردستانێ كو ئاراسته‌ى هه‌موو وه‌زاره‌تان كریه‌، هاتیه‌” ل سه‌ر داخوازیا وه‌زاره‌تا داد، ناڤێن وان فه‌رمانبه‌ران بۆمه‌ ب هنێرن كو دخوازن خوه‌ ته‌نسیب بكه‌ن یان ژى راژا وان بۆ سه‌ر میلاكێ په‌یمانگه‌ها دداوه‌رى ل وه‌زاره‌تا داد بهێته‌ ڤه‌گوهاستن”.

هه‌روه‌سا تێدا هاتیه‌ دیاركرن كو ده‌لیڤا ڤه‌گوهاستنا راژێ یان ته‌نسیبێ بۆ فه‌رمانبه‌رێن بسپۆر د وارێن كارگێر، ژمێریارى، هونه‌رى، ئایتى، شوفێر وخزمه‌تگوزارى، دێ هه‌بیت.

ئه‌ڤرۆ نیوز:

سه‌رۆكێ باژێرڤانیا قه‌زا دوكان ل پارێزگه‌ها سلێمانیێ، پشتیوان ئه‌حمه‌د ئه‌ڤرۆ ئه‌ینیێ 5/4/2019 راگه‌هاند، ئاڤا سكرێ دوكان ژبن كونترۆلا وان ده‌ركه‌فتیه‌ وئێدى نه‌شێن سه‌ره‌ده‌ریێ ل گه‌ل رێژا مه‌زن یا وێ ئاڤا دهێته‌ دناڤ سكرى دا بكه‌ن.

ناڤبرى د داخۆیانیه‌كا رۆژنامه‌ڤانى دا گۆت” رێژه‌یا ئاڤا بارانێن دهێته‌ دناڤ سكرێ دوكان دا به‌رده‌وام د زێده‌بوونێ دایه‌ ویا ژ بن كونترۆلا حوكمه‌تا خوه‌جهى ل قه‌زا دوكان ده‌ركه‌فتى”.

هه‌روه‌سا داخواز ژ وه‌لاتیان كر كو ژ وان ده‌ڤه‌رێن ئاستێ ئاڤێ گه‌له‌ك بلند بووی دووربكه‌ڤن وداخواز ژ هێزێن ئه‌منى ژى كر هاریكاریا پێشكێش بكه‌ن بۆ چۆلكرنا ده‌ڤه‌رێ ژ رێڤینگ وگه‌شتیاران.

دهێته‌ زانین ئاڤا رووبارێ زێ بچووك پشكه‌ك ژ جادا سه‌ره‌كى د ناڤبه‌را سلێمانیێ وهه‌ولێرێ ل قه‌زا دوكان ڤه‌گرتبوو.

ل دووڤ پێزانینان ئه‌ڤه‌ ئێكه‌مین جاره‌ هه‌ر ژ سالا 1988 ئاستێ ئاڤا سكرێ دوكان دگه‌هیته‌ ڤى ئاستى.

ئه‌ڤرۆ نیوز:

په‌یڤدارێ فه‌رمى یێ پارتى دیموكراتى كوردستان، مه‌حموود محه‌مه‌د، ئه‌ڤرۆ ئه‌ینیێ 5/4/2019 راگه‌هاند، لایه‌نێن سیاسى بۆ پشكداریكرنێ د پێكئینانا كابینا نوو یا حوكمه‌تا هه‌رێمێ، بووینه‌ سێ پشك ب ڤى شێوه‌ى:

- هنده‌ك ل گه‌ل مه‌ یێن هاتینه‌ پێش ودێ پشكداریێ د حوكمه‌تێ دا كه‌ن.

- هنده‌كا ئۆپۆزسیۆنبوون یا هه‌لبژارتى.

هنده‌كێن دى ژى هه‌تا نوكه‌ به‌رسڤه‌كا دیاركرى نینه‌.

مه‌حمه‌د محه‌مه‌د، ل دووڤ مالپه‌رێ فه‌رمى یێ پارتى گۆت ژى” ل سه‌ر پشكداریا ئێكه‌تیێ د كابینا نوو یا حوكمه‌تێ دا، ئه‌م ل گه‌ل رێككه‌فتینه‌ وكێشه‌ ل سه‌ر پۆستان نینه‌، ئه‌وا نوكه‌ گرنگ پێكڤه‌ كاركرنه‌”.

ئه‌ڤرۆ نيوز:

ئه‌ندامه‌كا لژنا ده‌ستپاكيێ ل په‌رله‌مانێ كوردستانێ راگه‌هاند، ل گه‌ل پێكئينانا حوكمه‌تا داهاتى يا هه‌رێما كوردستانێ دێ ده‌ست ب چاكسازيێ ل هه‌موو سێكته‌ران هێته‌ كرن وگوهۆرين دێ ل ده‌زگه‌هێن كوردستانێ هێنه‌ كرن.

له‌يلا عه‌بدولجه‌بار، ئه‌نداما لژنا ده‌ستپاكيێ ل په‌رله‌مانێ كوردستانێ ژ فراكسيۆنا پارتى ديموكراتى كوردستان  ئه‌ڤرۆ پێنجشه‌مبى 4/4/2019 د داخۆيانيه‌كا رۆژنامه‌ڤانى دا، گۆت” ل گه‌ل پێكئينانا حوكمه‌تا نوو يا هه‌رێما كوردستانێ، ژ لايێ سه‌رۆك وه‌زيرێن نوو دێ ده‌ست ب چاكسازيێ د هه‌موو سێكته‌ران دا هێته‌ كرن”.

ئه‌ڤرۆ نیوز:

وه‌زاره‌تا ناڤخوه‌ ل هه‌رێما كوردستانێ راگه‌هاند، هه‌موو ترومبێلێن حكومى دێ لۆگۆیه‌كێ تایبه‌ت ل سه‌ر هێته‌ دانان وب چو شێوه‌كى نابیت ترومبێلێن حكومى بهێنه‌ برن بۆ مالان، به‌لكو دڤێت پشتى كارى ل فه‌رمانگه‌هێن حكومى بمینن.

سامى جه‌لال، رێڤه‌به‌رێ گشتیێ دیوانا وه‌زاره‌تا ناڤخوه‌، ل دووڤ رووداو، گۆت” ب گۆره‌ى بریاره‌كا وه‌زاره‌تا ناڤخوه‌، دێ لۆگۆیه‌كێ تایبه‌ت ب هه‌موو ترومبێلێن حكومى ڤه‌ هێته‌ لێدان وئه‌ڤرۆ مه‌ ده‌ست ب وى كارى كریه‌”.

گۆت ژى” ب چو شێوه‌كى نابیت ترومبێلێن حكومى بهێنه‌ برن بۆ مالان، به‌لكو دڤێت ل پشتى كارى ل فه‌رمانگه‌هێن حكومى بهێنه‌ راگرتن”.