ئه‌ڤرۆ نیوز:
بنگه‌هێ هاتنوچوونا ناحیا زاویته هوشداریه‌كێ ئاراسته‌ى شۆفێران دكه‌ت ژبه‌ر پێلا بارانێ ئه‌وا ئه‌ڤرۆ پارێزگه‌ها دهۆكێ ڤه‌گرتى وب تایبه‌تى ناحیا زاویته.
سالح جه‌میل ژراگه‌هاندنا هاتنوچوونا ناحیا زاویته بۆ ئه‌ڤرۆ نیوز گۆت” نوکە جادا کەلیێ زاویتە یا تژى بووى ژ ئاڤا بارانان، له‌وما داخازێ ژ هەموو شوفێران دکەین کو پێگیریێ ب رێنمایێن هاتنوچوونی بکەنە و لەزاتیا ترومبێلێن خوه کێم بکە دا تووشی چو گرفتێن هاتنوچوونێ نەبن”.
ئه‌ڤرۆ نيوز:
كۆمسيۆنا بلند يا هه‌لبژارتنان وراپرسى ل هه‌رێما كوردستانێ راگه‌هاند، هه‌موو پێرابوون يێن هاتينه ئه‌نجامدان بۆ به‌لاڤكرنا پارێ كارمه‌ندێن رۆژا هه‌لبژارتنان ل هه‌رسێ پارێزگه‌هێن هه‌وڵێر وسلێمانيێ ودهۆكێ.
زه‌رده‌شت مه‌لا حه‌سه‌ن، رێڤه‌به‌رێ گشتيێ دارايى ل كۆمسيۆنا بلند يا هه‌لبژارتنان وراپرسى ل هه‌رێما كوردستانێ دداخۆيانيه‌كا رۆژنامه‌ڤانى دا گۆت” ژئه‌گه‌رێ بێهنڤه‌دانان ونه‌هێلانا پاشكه‌فتا مووچێ فه‌رمانبه‌ران، وه‌زاره‌تا دارايى مژوولى وێ چه‌ندێ يه كو به‌رى نه‌ورۆزێ مووچێ فه‌رمانبه‌ران به‌لاڤ بكه‌ت، له‌وما پارێ كارمه‌ندێن رۆژا هه‌لبژارتنان ل وان هه‌ر سێ پارێزگه‌هان دێ پشتى نه‌ورۆزێ هێته به‌لاڤكرن”.
گۆت ژى” پارێ كارمه‌ندێن رۆژا هه‌لبژارتنان ل پارێزگه‌ها هه‌له‌بجه يێن هاتينه به‌لاڤكرن”.
كۆمسيۆنا بلند يا هه‌لبژارتنان وراپرسى بۆ رێڤه‌به‌رێ بنگه‌هى ورێڤه‌به‌رێ ويستگه‌هێ 200 هزار ديناران دێ مه‌زێخيت وبۆ كارمه‌ندێن دى 150 هزار ديناران دێ مه‌زێخيت”.
ئەڤرۆنیوز،سەباح زوهێر زێباری:
کاوە زوهێر رێڤەبەرێ هونەری و رەوشەنبیری ل ئاکرێ بۆ ئەڤرۆ نیوز ددەتە دیارکرن : مە ب سپونسەریا کومپانیا(MRF)بەرهەڤیێن نەوروزێ کرینە و بەردەوامین ل سەر بەرهەڤیێن باشتر،ب هەماهەنگیا دەڤەرداریا ئاكرێ و هەمی لایەنێن پەیوەندیدار دێ کار و چالاکیێن هەمەجور ئەنجامدەین.
ناڤهاتی گۆت ژی: ژ وان چالاکیان ژی دێ ل دەست پێکێ پەیکەرێ نەوروزا ئاکرێ بلنداهیا سێ مەترا کو ژلایێ پەیکەرتاش (حەمید عەجیل)دروست کریە، ئەڤ پەیکەرە دێ هێتە بلندکرن، هەروەسا دێ ٤۰۰۰ پڤدانک ل گورەپانێ دا هێنە بلندکرن، کو ئەڤە تشتە یێ نوی یە د نەوروزا ئاکرێ دا، هەروەسا پتری ۱۰۰۰ خەتیرا هاتینە بەرهەڤکرن کو دێ هەمی گروپێن ئاکرێ پشکداربن بۆ سەر ئیخستنا وان خەتیرا بۆ کەلها ئاکرێ و کەلها کەڤن و،تیشێ و گرێ توپا دێ ئەڤ خەتیرە هێنە بلندکرن.
کاوە زوهێر ئاماژێ ددەتە وێ چەندێ ژی کو د ئەڤسالەدا هندەک یاریێن بهێز یێن ئاگری دێ هێنە پەقاندن کو بۆ ئێکەم جارە ئەڤ یاریە دێ ل کوردستانێ هێنە پەڤاندن، هەروەسا دێ ئالایەکێ ٦۰مەتردرێژی و ۱۳مەتر پانی هێتە بلندکرن، دگەل چەندین ئالایێن دی، هەروەسا مە بریاردایە کو ئەڤ سالە چ سترانبێژان داخازنەکەین، چونکی ئەڤ خەلکێ دهێتە ئاکرێ پتر مەرەم بۆ دیتنا جوانی و سیمایێ ئاکرێ یە نەک گوهداریا سترانایە، لەوا دێ ب رێکا دیجێ سترانێن نەتەوی بهێنە پێشکێشکرن.
ئه‌ڤرۆ نیوز:
سه‌رۆكێ فراكسیۆنا پارتی دیموكراتی كوردستان ل په‌رله‌مانێ كوردستانێ راگه‌هاند، ئه‌م بزاڤێ دكه‌ین ب زووترین ده‌م ده‌زگه‌هێ سه‌رۆكایه‌تیا هه‌رێما كوردستانێ بهێته كاراكرن ومه ده‌مه‌كێ ڤه‌كری نینه تاكو چاڤه‌رێی ئێكه‌تیێ بكه‌ین.
ئومێد خوشناو، سه‌رۆكێ فراكسیۆنا پارتی دیموكراتی كوردستان ل په‌رله‌مانێ كوردستانێ گۆت” ئێك ژ بابه‌تێن سه‌ره‌كی یێن په‌رله‌مانی، پرسا قانوونا سه‌رۆكایه‌تیا هه‌رێما كوردستانێ، ل دۆر ڤێ چه‌ندێ دانوستاندنێن مه دبه‌رده‌وامن تاكو دگه‌هینه ئه‌نجامه‌كی، بزاڤی دكه‌ین ب زووترین ده‌م ده‌زگه‌هێ سه‌رۆكایه‌تیا هه‌رێما كوردستانێ بهێته كاراكرن، چونكی ئه‌و بابه‌ت پێدڤی ب ل هه‌ڤهاتنا نیشتمانی یه”.
سه‌باره‌ت رژدیا ئێكه‌تیێ ل سه‌ر چه‌ند داخوازیه‌كا، ئومێد خوشناو زێده‌تر بۆ باسنیوز گۆت” هیڤیدارم بێ فراكسیۆنا ئێكه‌تیێ گاڤ بۆ وی بابه‌تی نه‌هێنه هاڤێتن، هیڤیدارین ئه‌وژی بهێنه پێش وگاڤێن ب له‌زتر د دانوستاندنێن پێكئینانا حوكمه‌تێ دا بهێنه هاڤێتن، به‌لێ مه ده‌مه‌كێ ڤه‌كری ل به‌رده‌ست نینه تاكو چاڤه‌رێی فراكسیۆنا ئێكه‌تیێ بكه‌ین”.
ئەڤرۆ نیوز:
ئەڤرۆ ١٦-٣-٢٠١٩ ل بیرەوریا دەربازبوونا ٣١ سالیا کارەساتا کێمیا بارانا باژێرێ حەلەبچە، سەرۆک مەسعود بارزانی رادگەھینت، پێدڤیە مروڤایەتی ژ بەر کارەساتا کێمیا بارانا حەلەبچە شەرمێ ژ خوە بکەت.
زێدەتر سەرۆگ بارزانی برێکا پەیجێ خوە یێ تورا کومەلایەتی یا تویتەری راگەھاند کێمیا بارانا حەلەبچە بیرەوەریەکە ێدڤیە مروڤایەتی ژ بەر کارەساتا کێمیا بارانا حەلەبچە مروڤایەتی شەرمێ ژ خوە بکەت و جڤاتا نێڤدەولەتی ژی ب رژدی ل سەر راوەستیت و ھەلویستێ خوە ھەبیت بۆ ناساندنا جینوسایدکرنا ڤێ تاوانا درندانە و قوربانیێن وێ ژی بھێنە قەرەبووکرن و دەڤەرا وێ ژی بھێتە ئاڤەندان کرن کو ل ئاستێ قوربانیدانا ڤێ دەڤەرێ و مێژوویا وان یا پر سەروەری.
ژلایەکێ دی ڤە ھەر ئەڤرۆ ١٦-٣-٢٠١٩ سەرۆک مەسعود بارزانی ھەڤخەمیا خوە ھەمبەر بەرامبەر گیان ژدەستدانا سەرۆکێ دەستەیا دەسپاکیا عیراقێ حاکم عزەت توفیق ربەتکی ئەوێ ب ئەگەرێ روودانەکا دلتەزین گیانێ خوە ژ دەست دای، و سەرەخوشیا خوە ئاراستەی بەرێز و کەسوکارێن خودێ ژێ رازی کر و جھێ وی ل بەھەشتا بەرین شاد بکەت.
ئەڤرۆ نیوز، عەلی حاجی:
دوھی روژا ئەینی 15/3/2019 د روودانەکێ کەسەکێ دانعەمر ل زاخۆ کو خودان ھەڤژینە د ناڤ دوکانا خوە دا گیانێ خوە ژ دەست دەت و پشتی دو روژان ژ گیان ژ دەستدانا وی کەسی ژنوو گیانێ وی ھاتە دەرخستن و ھەتا نھا ئەگەرێن گیان ژ دەست دانێ ژی د دیار نینن.
ئەحمەد عەبدولرەحمان شاھد حالێ روودانێ بو ئەڤرۆ نیوز دیار کر کو ناڤێ وی کەسێ گیانێ خوە ژ دەست دایی محەمەد فەتحولایە و د بنەرەت دا تورکمانە و ژدایک بوویێ سالا 1968ێ یە خەلکێ کەرکووکێ یە و نێزیکی 10 سالایە ل زاخۆ دژیت و خودانێ دو زارۆیایە و کارێ لەحیمکرنا کارێن بچووک دکر و ھەر دیسان ژی دارتاش بوو و ژ بەر کو ئەڤ کەسە ژ مالا خوە ھاتیە دوورخستن د ناڤ جھێ خوە یێ کاری دا دنڤست، بەلێ دوھی رۆژا ئەینی گیانێ خوە ژ دەست دایە و گۆت: ژنوو ئەڤرۆ رۆژا شەمبی دەمژمێر 11:00ێ سپێدێ مە زانی یە گیانێ خوە ژدەست دایە، پشتی مە زانی ڤی کەسی د ناڤ دوکانا خوە دا گیانێ خوە یێ ژ دەست دایی ئێکسەر مە پۆلیسێن زاخۆ ئاگەھدار کرن.
ئاشکەرا ژی کر کو ھەتا نوکە ئەگەرێن گیان ژ دەست دانا وی کەسی نەھاتینە زانین و پشتی پۆلیس گەھشتینە روودانێ ڤەکۆلینا خوە دەست پێکرینە ژبو زانینا ئەگەرێن گیان ژ دەست دانا وی کەسی.
ئه‌ڤرۆ نيوز:
رێڤه‌به‌ريا هاتنوچوونا پارێزگه‌ها دهۆكێ ب هه‌لكه‌فتا هاتنا وه‌رزێ بهارێ و سيرانێن نه‌ورۆزێ، چه‌ند رێنمايان بۆ دايك و بابێن زارۆيان به‌لاڤ دكه‌ت دا كو ل به‌رچاڤ بهێنه وه‌رگرتن ل ڤى وه‌رزى ب مه‌ره‌ما ساخى و سلامه‌تيا گيانێ وان.
چەند رێنمایێن پێدڤی بو دایک و باب و شوفێرێن هێژا ل وەرزێ بهارێ و نەورۆزێ:
۱ـ چاڤدێریا زارويێن خوه بکەن و نەهێلن بکەیفا خوه هاتنوچوونێ ل سەر جاددا بکەن.
۲ـ لەزاتیێ بکارنەئینن دا ڤان سەیران و خوشیا ل کەسێ نەکەنە نەخوشی و تازی.
۳ـ بۆ هاریکاریکرنا پولیسان ترۆمبێلێن زێدە بکارنەئینن دا قەرەبالغا جاددا دروست نەبیت و بێ ئاریشە بگەهیە مالا خوە.
٤ـ دایک و باب نابیت ب چو رەنگەکی ترۆمبێلێ رادەستی زارۆيان بکەن.
٥ـ گەنج و لاو پێدڤیە زێدەتر هاریکاربن ل گەل پولیسێن هاتنوچوونێ و دیاردا لەزاتیێ و بەتەناشا و بلندکرنا توزا لایێ جاددێ بهێلن.
٦ـ باش بزانە کارمەندێن هاتنوچوونێ بۆ پاراستنا تە و زارۆيێن تە ل سەر جاددێ یە لەورا وەک هەڤال سەحکەیێ.
ئه‌ڤرۆ نيوز:
ل سالرۆژا بيره‌وه‌ريا كاره‌ساتا هه‌له‌بچه، سه‌رۆك وه‌زيرێن عيراقێ د به‌ياننامه‌كێ دا، سه‌ره‌خۆشيێ ل گه‌لێ كورد دكه‌ت.
ئه‌ڤرۆ رۆژا شه‌مبى 16ى ئادارا 2019ێ عادل عه‌بدولمه‌هدى سه‌رۆك وه‌زيرێن عيراقێ د به‌ياننامه‌كێ دا، راگه‌هاند كو كاره‌ساتا كيميابارانا هه‌له‌بچه، وژدانا مرۆڤاتيێ هه‌ژاند و لاپه‌ره‌كێ ره‌شه ل لاپه‌رێن ره‌ش يێن رژێما به‌عس به‌رامبه‌ر گه‌لێ كورد، “ناهێته ژبيركرن”.
سه‌رۆك وه‌زيرێن عيراقێ سه‌ره‌راى سه‌ره‌خۆشيكرن ب هه‌لكه‌فتا سالڤه‌گه‌را 31ێ يا كيميابارانكرنا هه‌له‌بچه ل گه‌لێ كورد، راگه‌هاند: هه‌له‌بچه هه‌ر دێ “ب هێمايێ دڕنده يێ ديكتاتوريه‌ت”ێ مينيت و گه‌لى موكمتر كه‌ت ل سزادانا “جه‌لاد” و تاوانبارێن كيميابارانا هه‌له‌بچه.
عادل عه‌بدولمه‌هدى شه‌هيدێن هه‌له‌بچه ب “سه‌ربلند و نه‌مر” و كه‌سوكارێن ئه‌وان شه‌هيدان ب جهێ شانازيێ ناڤ دبه‌ت و سه‌ره‌خۆشيێ ل گه‌لێ كورد دكه‌ت به‌رامبه‌ر قوربانيێن وان.
16ى ئادارا 1988ێ رژێما به‌عس يا عيراقێ ب چه‌كێ كيمياوى، باژێرێ هه‌له‌بچه بوردومانكر و ژ ئه‌گه‌رێ وێ چه‌ندێ ژبلى وێرانبوونا باژێرى، زێده‌تر ژ پێنج هزار وه‌لاتيان كو پتريا وان ژن و زارۆ بوون، شه‌هيد بوون.
ئه‌ڤرۆ نيوز:
جڤاتا وه‌زيرێن هه‌رێما كوردستانێ ل 31ى ئادارێ سالرۆژا كيميابارانا هه‌له‌بچه په‌يامه‌ك به‌لاڤكر و داخواز دكه‌ت حوكمه‌تا عيراقێ قه‌ره‌بوويا ماددى و مه‌عنه‌وى يا هه‌له‌بچه‌ييان بكه‌ت.
جڤاتا وه‌زيران د په‌يامه‌كێ دا كو دانه‌ك ب ده‌ست ئه‌ڤرۆ نيوز كه‌فتيه دده‌ته زانين كو ئه‌و چاڤه‌رێ وێ چه‌ندێ ژ حوكمه‌تا عيراقێ دكه‌ن كو ئه‌ركێ سياسى و ئه‌خلاقى يێ خوه د ده‌رهه‌ق ڤێ پارێزگه‌هێ دا و خه‌لكێ وێ ژ هه‌موو جوره گرنگيپێدانه‌كێ بجهـ بينيت.
ده‌رباره‌ى قوربانيێن كيميابارانا هه‌له‌بچه، جڤاتا وه‌زيران دبێژيت: “ساخكرنا ڤێ كاره‌ساتێ ژبلى وێ چه‌ندێ كو رێزگرتنه ل قوربانيێن ملله‌تێ مه و مێژوويا تژى قوربانيدان و تێكوشان، ته‌كست ل سه‌ر وێ چه‌ندێ دكه‌ين كو حوكمه‌تا هه‌رێما كوردستانێ ل گرنگى دانا جدى ب ژيان و خزمه‌تكرنا برينداران و خێزان و كه‌سوكارێن قوربانيێن چه‌كێ كيمياوى و خزمه‌تكرنا زێده‌ترا هه‌له‌بچه‌يێن عه‌زيز… وه‌كو چاوان هه‌له‌بچه‌يا شه‌هيد سيمبۆلا ئازار و قوربانيێن گه‌لێ مه‌يه، ب هه‌مان ره‌نگ سيمبۆلا خوراگرى و زيندويێ يه”.
ده‌قێ په‌ياما جڤاتا وه‌زيران ل سالرۆژا كيميابارانا هه‌له‌بچه:
ئەمڕۆ سی و یەک ساڵ بەسەر کارەساتی کیمیابارانکردنی هەڵەبجەدا لەسەر دەستی ڕژیمی پێشووی عێراق تێدەپەڕێت کە وێڕای شه‌هیدبوونى پێنج هەزار هاووڵاتیی بێتاوان، هەزارانی دیکەش بریندار بوون و تا ئێستاش زۆربەیان بەدەست لێکەوته و کاریگەرییە خراپە تەندروستی و دەروونییەکانی ئەو کارەساتەوە دەناڵێنن. ئەمە وێڕای ئاوارەبوونی هەزاران خێزان و وێرانکردن و تێکدانی ژینگەی ئەو دەڤەرە دڵگیرەی کوردستان.
یادکردنەوەی ئەم کارەساتە جگە لەوەی ڕێزگرتنە لە قوربانیانی گەلەکەمان و مێژووی پڕ لە تێکۆشان و قوربانیدانمان، جەختکردنه‌وه‌ی حکوومەتی هەرێمى كوردستانیشە لە بایەخدانی جددی بە ژیان و خزمەتکردنی برینداران و خانەوادە و کەسوکاری قوربانیانی چەکی کیمیایی و خزمەتکردنی زیاترى هەڵەبجەی ئازیز کە بێگومان کاری زۆر ماوە بۆیان بکرێت و حکوومەت بە پەرۆشەوە خزمەتی زیاتر و پێشکەشکردنی خزمەتگوزاریی باشتر بە پارێزگای هەڵەبجە و دانیشتوانە سەربەرزەکەی بە ئەرکی گرنگ و سەرەکیی خۆی دەزانێت.
چاوەڕوانیمان لە حکوومەتی عێراقیش بەجێگەیاندنی ئەرکی یاسایی و ئەخلاقیی خۆیەتی دەرهەق بەم پارێزگایە و دانیشتوانەکانی لە هەموو جۆرە بایەخپێدانێک له‌گه‌ڵ قەرەبووکردنەوەی ماددی و مەعنەویی خەڵکەک و ژینگەکەی، وەک قوربانیی دەستی دەوڵەتی عێراق.
وەک چۆن هەڵەبجەی شەهید سیمبولی ئازار و قوربانیی گەلەکەمانه، بە هەمان شێوەش سیمبولی خۆڕاگری و زیندووییمانە. قوربانیان و ئەو ئازیزانەمان کە لەم کارەساتە ناخهەژێنەدا لەدەستمان داون، هەمیشە لە یادمانن و تاهه‌تایه لە ویژدانی ئەم گەلەدا یادیان زیندووە.
هەزاران سڵاو بۆ گیانی پاک و بێتاوانی شەهیدانی کیمیابارانی هەڵەبجەی ئازیز و سەرجەم شەهیدانی کوردستان.
ئه‌نجومه‌نى وه‌زیرانى هه‌رێمى كوردستان
16/3/2019
نيشاندان