ئەڤرۆ نیوز، لەزگین جوقی:
بەرپرسێ پشکا رەوشەنبیری ل دەستەیا بلندا بنگەھێ لالش یێ رەوشەنبیری و جڤاکی دیار کر کو ل رۆژا ١١/٢/٢٠١٩ رێورەسمێن جەژنا خدر ئلیاس دەستپێکرن و دڤێ جەژنێ دا ئێزدی نێچیرێ ناکەن و سەرژێکرنا تەرش و تەوالی ژی ناھێتە کرن.
شەمۆ قاسم، بەرپرسێ پشکا رەوشەنبیری ل دەستەیا بلندا بنگەھێ لالش یێ رەوشەنبیری و جڤاکی بۆ ئەڤرۆ نیوز دیار کر کو ئەڤ جەژنە دکەڤیتە د رۆژا پێنچ شەمبیا بھێت دا بەری جەژن بھێتە کرن ئێزدی چەندین رێورەسمێن تایبەت ب جەژنا خدر ئلیاس ڤە دگێرن و گۆت: “ئەو کەسێن ناڤێن وان خدر یان الیاس ژی سێ رۆژیان ب رۆژی دبن و ھەر کەسەکێ دی یێ ئێزدی بڤێت رۆژیان دگریت”.
ناڤهاتی ئاماژە دا وێ چەندێ کو جەژنا خدر ئلیاس پتر گرێدایی وەرزێ چاندنێ و سرۆشتیە و رێورەسمێن ڤێ جەژنێ ژی ل رۆژا دووشەمبی دەست پێ دکەن ھەر مالەکا ئێزدی ھندەک دەخل و دانی دقەلینیت کو ئێزدی دبێژنێ قەلاتک و پاشی ئێزدی ڤان قەلاتکان دبەنە ئاشی و دھێرن و دکەنە پێخوون و ئێڤاریا رۆژا جەژنێ ئانکو ل رۆژا چارشەمبی ھەر مالەکا ئێزدی ھندەک پێخوونێ دکەنە د سینیکەکێ دا و ل سەرێ خانیێ مالێ د دانن ب وێ ھیڤیێ خدر ئلیاس نیشانەکێ لسەر بکەت و ببیتە ھێمایێ بەرەکەتی د وێ مالێ دا و ئێزدی چەرخووس چێدکەن ئەو ژی ب ساڤارێن ھێرای و قەلاندی دروست دکەن بۆ زادێ جەژنێ ھەموو جوتیار ژی پێخوونێ دبەن ل ناڤ زەڤیێن خوە بەلاڤ دکەن داکو خێر و بەرەکەت بکەڤیتە دناڤ زەڤیێن وان یێن چاندنێ دا و گۆت: “ئێزدی وەکو بیر و باوەر ل رۆژێن رۆژیا وجەژنێ نێچیرێ قەدەغەدکەن و سەربر ژی ناھێنە سەرژێکرن و و ئێزدی دڤان رۆژان دا ب رێ و ریبارێن دوور ناچن دبیر و باوەریا ئێزدیان دا گونەهە ئەڤە بھێنە کرن و چەندین بیر وباوەرێن دێ ب ڤێ جەژنێ ڤە ھەنە”.
ناڤهاتی خویا کر کو جەژنا خدر ئلیاس ئێکە ژ جەژنێن ھەرە کەڤنار دناڤ ئێزدیان دا، پتریا مللەتێن کەڤن رێ ورەسمێن جەژنا خدر ئلیاس دگێران ھەتا نوکە ئێزدیان ئەڤ جەژنە و بیر و باوەرێن وێ پاراستینە و گرنگیێ پێ ددەن.
نيشاندان
