ئەڤرۆ نیوز:
بەری دەمەکێ کۆمبوونا هەر دو شاندێن پارتی و ئێکەتیێ ب دووماهی هات و داخۆیانیەک فەرمی هاتە بەلاڤکرن، د داخۆیانیێ دا ئاماژە ب هندێ هاتیە کرن کو د چارچۆڤێ رێککەفتنا کو بەری نها د ناڤبەرا پارتی و ئێکەتیێ دا هاتبوو ئیمزا کرن، کۆمبوونا ئەڤرۆکە یا بەرهەمدار بوویە و قۆناغەکا باش مە دەرباز کریە و دێ ل ڤێ حەفتیێ دا جارەکا دی کۆم بین.
د داخۆیانیێ دا ئاماژە ب هندێ ژی هاتیە کرن کو هەر دو ئالی ئامادەکاریێن باش دکەن دا بگەهنە رێککەفتنا دووماهیێ دا کابینا نوو یا حوکمەتێ بهێتە ئاڤاکرن.
ئه‌ڤرۆ نيوز:
جڤاتا نوونه‌رێن عيراقێ، ئه‌ڤرۆ رۆژا ئێكشه‌مبى دێ كۆم بيت بۆ ده‌نگدان ل سه‌ر كارلادانا نوفه‌ل عاگۆب، پارێزگارێ نه‌ينه‌وا، ل گه‌ل هه‌ردو جێگرێن وى، هه‌روه‌سا دانوستاندن ل دۆر راپۆرتا لژنا دووڤچوونا راستيان ل پارێزگه‌ها نه‌ينه‌وا.
ب گۆره‌ى كارناما كۆمبوونێ، جڤاتا نوونه‌رێ، عيراقێ ده‌مژمێر 13:00 دێ ده‌نگى ل سه‌ر كار ژ لادانا پارێزگارێ نه‌ينه‌وا نه‌وفه‌ل عاگۆب و هه‌ردو جێگرێن وى ده‌ت ژ ئه‌گه‌رێ نقۆمبوونا به‌له‌مه‌كێ ل باژێرێ مووسل، كو بوويه ئه‌گه‌رێ مرنا 120 كه‌سان و برينداربوون و بێسه‌روشوونبوونا ژماره‌كا دى.
پێنجشه‌مبيا بۆرى به‌له‌مه‌كێ كو 187 سه‌رنشين هه‌لگرتبوون ژ زه‌لام و ژن و زارۆيان ب مه‌ره‌ما ڤه‌گوهاستنێ بۆ دورگه‌يه‌كا گه‌شتيارى ل ناڤ رووبارێ ديجله ل باژێرێ مووسل نقۆم بوو.
هه‌رديسا جڤاتا نوونه‌ران دێ ئه‌ڤرۆ راپۆرتا لژنا دووڤچوونا راستيان ل پارێزگه‌ها نه‌ينه‌وا گه‌نگه‌شه كه‌ت وه‌كو د كارنامێ وان دا هاتى سه‌ره‌راى خواندنا ئێكێ بۆ چه‌ند پرۆژێن دى.
ئه‌ڤرۆ نيوز:
كۆمبوونا هه‌ردو شاندێن دانوستاندكارێن پارتى و ئێكه‌تى ل پيرمام ده‌ست پيكريه و بڕياره د ڤێ كۆمبوونێ دا، پارتى ديموكراتى كوردستان به‌رسڤا داخوازيێن ئێكه‌تى نشتيمانى كوردستان بده‌ت.
پێشتر ل سلێمانيێ ئێكه‌تى نشتيمانى كوردستان چه‌ندين داخوازى ژ شاندێ پارتى ديموكراتى كوردستان كربوون و چه‌ند داخوازيێن وان ژى هاتبوونه گوهۆڕين و بڕياره ئه‌ڤرۆ پارتى ديموكراتى كوردستان د كۆمبوونا نها هه‌ردو لايه‌ن تێدا، به‌رسڤا داخوازيێن ئێكه‌تيێ بهێته دان.
ئه‌ڤرۆ نيوز، له‌زگين جۆقى:
بەرپرسێ پشکا راگەھاندنێ ل رێڤەبەریا گشتی يا ساخلەمیا پارێزگەھا دھۆکێ دیارکر هزار و 593 کەسان ل جھێن گەشتیاری پەيوەندی ب تێمین ساخلەمیا دھۆکێ کرینە وھاتینە چارەسەرکرن و 120 کەس ژ وان ژی بۆ دەزگەھیێن ساخلەمیی ھاتینە ڤەگوھاستن و 224 کەس ژی ل میحوەری ناوەران باشیک قەستا تێمێن ساخلەمیێ کرینە و تێمین زیرەڤانیا ساخلەمیێ سێ جهـ سزا داینە.
حەمزە رەزیکی، بەرپرسێ پشکا راگەھاندنێ ل رێڤەبەریا گشتی يا ساخلەمیا پارێزگەھا دھۆکێ دیارکر کو د نەورۆزێ دا 201 زارۆ ژدایک بووینە ژ وانا ژی 119 کوڕ و 82 کچ بووینە و 19 حالەتیێن ژ جھێن بلند کەفتنی ژی ھاتینە تۆمارکرن و 81 حالەتیێن سوتنێ ژ وانا ژی پێنچ حالەتیێن سۆتنی ل نەخۆشخانێ ھاتینە نڤاندن و پێنچ کەس ب یاریێن ئاگری برینداربووینە و دو کەس ژی ب گولەیێن ئاگری برینداربووینە و مرن ژی ب رەنگەکی گشتی 20 کەس مرینە ژ وانا ژی چار زارۆ و 16 کەس ژی ژ ئەگەرێ جەلتەیێن دلی و مێشکی و نەخۆشین دێ يێن جۆرا و جۆر بووینە”.
ئاشکەرا کر کو د سێ رۆژێن جەژنا نەورۆزێ دا 14 هزار و 504 کەسان سەرا دەزگەھیێن ساخلەمیێ داینە ژ وانا ژی 405 نەخۆش ھاتینە نڤاندن و32 روودانیێن ترۆمبێلان ژی ل ساخلەمیێ ھاتینە تومارکرن د ئەنجام دا ژی 38 کەس بریندار بووینە و دو کەس مرینە ئەو ژی زارۆيه‌ك ل قەزا ئاکرێ و کەسەکێ 55 سالی ل ئامێدیێ و ھەشت حالەتیێن ب شەرچوونێ دروست بووینە.
هه‌ر وه‌سا دا زانين ژى كو د رۆژێن جه‌ژنا نه‌ورۆزێ دا، 112 نشته‌رگه‌ريێن جودا ل نه‌خۆشخانێن پارێزگه‌هێ هاتينه ئه‌نجام دان.
ئه‌ڤرۆ نيوز:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو سوبەھی رۆژا دوشه‌مبى رێکەفتی 25ى ئادارا 2019ێ ئەسمان دێ ئه‌ور و باران بيت و ل هنده‌ك جهان ژى دێ باران بارين دژوارتر بيت و بريسى ژى دێ ل گه‌ل دا هه‌بنظ
پشکا پێشبینیان ل رێڤەبەریا گشتیا کەشناسی و بیڤەلەرزێ ل ھەرێما کوردستانێ د نڤیسارەکێ دا کو دانەک بۆ ئەڤرۆ نیوز رەوانە کرینە راگەھاند کو دهێته پشبينيكرن ئه‌سمان ئه‌ور و باران بيت و ل هنده‌ك جهان ژى دێ باران بارين دژوارتر بيت و بريسى ژى دێ ل گه‌ل دا هه‌بنظ
پشکا پێشبینیان دایە زایە زانین کو دێ لەزاتیا بایی د ناڤبەرا 5 ھەتا 20کم دا و ماوێ دیتنێ ژی د ناڤبه‌را 9 بۆ10کم دا بیت، پلێن گەرمێ ژی دێ د ناڤبەرا 9 بۆ 10 پلان دا بن.
ئه‌ڤرۆ نیوز:
شیره‌تكارێ جڤاتا ئاسایشا هه‌رێما كوردستانێ ل دۆر دوباره سه‌رهلدانا داعشێ هوشداریێ دده‌ت وئاشكرا دكه‌ت كو ل پارێزگه‌هێن باكوورێ عیراقێ ل وان جهێن ژ ده‌ستێ داعشێ هاتینه ئازادكرن، شانێن نڤستى یێن داعشێ ب ته‌كتیكه‌كا نوو جاره‌كادى دێ سه‌رهلده‌ن.
مه‌سرور بارزانى، شیره‌تكارێ جڤاتا ئاسایشا هه‌رێما كوردستانێ بۆ رۆژناما گاردیان یا بریتانى گۆت” كونترۆلكرنا ده‌ڤه‌رێن دبن ده‌ستێ داعشێ دا، ئارمانجا سه‌ره‌كى یا شه‌رى بوو، قوربانیێن زۆر ژى ل وى شارى هاتن دان، ئه‌نجامێن شه‌رى ژى ل عیراقێ وسووریێ دبه‌رچاڤن”.
زێده‌تر گۆت” مانا كێشێن سیاسى وئابوورى یێن سه‌ره‌كى بێ چاره‌سه‌رى، رێ بۆ دوباره سه‌رهلدانا داعشێ خوه‌ش دكه‌ت”.
مه‌سرور بارزانى دیاركر ژى”داعش نه تنێ هه‌بوونا هێزه‌كا چه‌كدارى یان رووبه‌ره‌كێ جوگرافى، به‌لكو داعش ئایدیۆلۆژیه‌كا تایبه‌ته ورێكخراوا داعش شیایه خوه ل گه‌ل شكه‌ستنان بگونجینیت ول جهێن تایفگه‌رى تێدا یا زال، ده‌ست ب هێرشێن چه‌كدارى كریه”.
دیسا دبێژیت”ل پارێزگه‌هێن باكوورێ عیراقێ ل وان جهێن ژ ده‌ستێ داعشێ هاتینه ئازادكرن، شانێن نڤستى یێن داعشی ب ته‌كتیكه‌كا نوو جاره‌كادى یێن دیار بووین، ب مه‌ره‌ما به‌لاڤكرنا ترس ودودلیێ د ناڤ خه‌لكی دا”.
ئەڤرۆ نیوز:
فەرمانداریا گشتی یا هێزێن سووریا دیموکراتیک بەری دەمەکێ د رێوەرسمەکێ دا ب فەرمی ب دووماهی هاتنا خیلافەتا داعشێ ل سووریێ راگەهاند.
رێورەسم ب سروودا نەتەوی یا ئەی رەقیب هاتە دەستپێکرن و فەرماندارێ گشتی یێ هەسەدێ راگەهاند کو رێکخراوا تیرۆرستی یا داعشێ ل سەر دەستێ هێزێن سووریا دیموکرات ب هاریکاریا هێزێن هەڤپەیمانیا نێڤدەولەتی هاتە ژناڤبرن و ئێدی چو ئاخ د دەستێ داعشێ دا نەماینە و نها باغۆز وەکو دووماهی پێگەهێ رێکخراوا تیرۆرستی یا داعشێ ژی کەفتە دەستێ هێزێن مە.
مەزلەم عەبدی فەرماندارێ گشتی یێ هێزێن سووریا دیموکرات بەحسێ چەند سالێن شەرێ ل دژی داعشێ کر و راگەهاند کو مە شیایە هەتا نها نێزیکی ٥ ملیۆن وەلاتیێن سووریێ ژ دەستێ داعشێ رزگار بکەین، مە د شەرێ ل دژی داعشێ دا ب هزاران شەهید و بریندار داینە و گۆت: (سوپاسیا هەڤپەیمانیا نێڤدەولەتی یا ل دژی داعشێ دکەین کو هاریکاریا مە کرن و رێبازا مە یا دیموکراتیک بۆ ئەگەرێ هندێ کو ب پشکداریا هەموو پێکهاتێن ل سووریێ ئەم بشێن داعشێ ژناڤ ببەین).
ئەڤرۆ نیوز:
فراکسیونا پارتی ل پەرلەمانێ ھەرێما کوردستانێ ئیمزا ل سەر راستڤەکرنا قانوونا سەروکاتیا ھەرێما کوردستانێ کريه، و رادەستی سەروکاتیا پەرلەمانی ھاتیە کرن.
د ڤی دەربارەی دا سەباح مەحمود ئەندامێ پەرلەمانێ کوردستانێ دیارکر کو فراکسیونا پارتی ئیمزا ل سەر پرۆژە قانوونا راستڤەکرنا قانوونا سەروکاتیا ھەرێما کوردستانێ ھاتە کرن و سوبەھی دێ دەسپێکەن.
ل دووڤ وان زانیاریێن ھاتینە ئاشکرا کرن ژ لایێ پەرلەمانتارێن پارتی کو ب ھاریکاریا لایەنێن دی نوکە ئەو مژوولی کارێن راستڤەکرنا قانوونا سەروکاتیا ھەرێما کوردستانێ نە، و ھەموو بزاڤێن وان ئەون بێ ئێکەتی ئەڤ کارە نەھێتە کرن لێ ئەگەر ئامادە نەبوون کارێن راستڤەکرنا پرۆژە قانوونا سەروکاتیێ نا راوەستن.
سەروکێ فراکسیونا پارتی ئومێد خوشناو ئەو چەندە ژی راگەھاند ھەتا نڤێسیا دەستورێ ھەرێما کوردستانێ تمام دبیت، د برگەیا قانوونێ دا دێ ھێتە راستڤەکرن یا کوھاتیە سەروکێ ھەرێما کوردستانێ دێ ل ناڤ پەرلەمانی دا ھێتە ھەلبژارتن نەکو ناڤ خەلکی دا.
دیسان دیارکر فراکسیونا پارتی پرۆژە قانوون نوکە تمام بوویە و ھاتیە رادەستکرن بۆ سەرۆکاتیا پەرلەمانی.
ئه‌ڤرۆ نیوز:
فه‌رماندێ گشتى یێ هێزێن چه‌كدار ل عیراقێ، عادل عه‌بدولمه‌هدى، ئه‌ڤرۆ ئه‌ینیێ 22/3/2019 بریارا پێكئینانا شانه‌كا قه‌یرانێ بۆ چاره‌سه‌ركرنا ره‌وشا پارێزگه‌ها نه‌ینه‌وا پێكئینا، ژ ئه‌گه‌رێ ره‌وشا نه ئاسایى ئه‌وا پارێزگه‌ها ناڤبرى تێدا د بۆریت ب تایبه‌تى پشتى نقومبوونا به‌له‌ما گه‌شتیارى ل رووبارێ دیجله ل باژێرێ مووسل.
ل دووڤ بریار عه‌بدولمه‌هدى ئه‌و شانا قه‌یرانێ ژ سێ كه‌سان پێك دهێت ئه‌وژى هه‌ر ئێك ژ مزاحم قاسم خه‌یات، سه‌رۆكێ زانكۆیا مووسل وئه‌ندامه‌تیا هه‌ر ئێك ژ فه‌رماندێ ئۆپه‌راسیۆنێن نه‌ینه‌وا فه‌رماندێ پۆلیسێن نه‌ینه‌وا كو ئه‌و شانه دێ گرێداى فه‌رماندێ گشتى یێ هێزێن چه‌كدار بیت.
عه‌بدولمه‌هدى بریار دا ئه‌و شانا قه‌یرانێ كاروبارێن ده‌ستهه‌لاتا بجهئینانێ ل پارێزگه‌ها نه‌ینه‌وا ب رێڤه ببه‌ت تاكو جڤاتا پاریزگه‌ها نه‌ینه‌وا بریارێن خوه بده‌ت پشتى ڤه‌كۆلینێن نوكه دهێنه ئه‌نجامدان ل دۆر وێ روودانێ.
عه‌بدولمه‌هدى د بریارا خوه دا ئاماژه ب پاریزگارێ نه‌ینه‌وا كریه كو پێدڤیه پێگیریا تمام ب ڤێ بریارێ بكه‌ت.
نيشاندان