ئەڤرۆ نیوز، بارزان مزووری:

سەرۆکێ باژێرڤایا ناحیا کەلەکچی بۆ ئەڤرۆ نیوز دیار کر کو ئەڤە بۆ دەمێ پێنج سالانە کۆمپانیا کار ل سەر دانانا ماستەر پلانا باژێرێ ناحیا کەلەکچی کری کارێ خوە راوەستاندیە و گۆت: “هەتا نوکە ڤێ کۆمپانیێ بتنێ 70% کارێ ماستەر پلانێ ئەنجامدایە”.
ئەندازیار شاکر تەیب، سەرۆکێ باژێرڤانیا ناحیا کەلەکچی بۆ ئەڤرۆ نیوز دیار کر کو ئەو کۆمپانیا کارێ دانانا ماستەر پلانا ناحیا کەلەکچی دکەت گرێبەست دگەل وەزارەتا باژێرڤانی و گەشت گۆزارێ ئیمزاکریە چەندین جاران وان داخواز ژێ کریە ڤێ ماستەر پلانێ ب دووماهی بینن، بەلێ ژ بەر نەمەزاختنا پارێ وان ژ لایێ حوکمەتێ ڤە نەشێن کار بو تمامکرنا وێ بکەن.
ناڤهاتی ئاماژە دا وێ چەندێ کو ئەڤە ژ سالا ٢٠١٤ ێ وەرە ڤێ کۆمپانیێ کارێ ماستەر پلانێ ٧٠% ب دووماھی ئینایە، لێ نوکە کارێ خوە راوەستاندیە.
سەرۆکێ باژێرڤایا ناحیا کەلەکچی خویا کر کو ھەموو جورێن خزمەتگوزاری و جھێن ئاڤاھیێن میری و باخچە و پارکێن راوەستاندنا ترۆمبێلان و چەندین جھێن دی دڤێ ماستەر پلانێ دا ھاتینە دیار کر و گۆت: “ژبەر راوەستاندنا ماستەر پلانێ نوکە ئەم ژی وەکو پێدڤی نەشێن کارێن خوە ل سنوورێ باژێرڤانیا ناحیا کەلەکچی ئەنجام بدەین”.

ئەڤرۆ نیۆز، قائید میرۆ:

بڕیارە پشتی پەسەندکرنا پڕۆژە قانوونا بۆدجا گشتی یا عیراقێ ھژمارەکا فەرمانبەران ل عیراقێ بھێنە دامەزراندن و پەرلەمانتارەک ژی ئاماژە بڤێ چەندێ دکەت، کو ھەر دامەزراندنەک ھەبیت ئەڤە دێ ھەرێما کوردستانێ ژی ڤەگریت.
محەمەد ئەمین مزیری، ئەندامێ پەرلەمانێ عیراقێ بۆ ئەڤرۆ نیوز دیار کر کو ھەموو سالەکێ دگەل بەرھەڤکرنا پڕۆژە قانوونا بۆدجا گشتی یا عیراقێ جھێ دامەزراندنا فەرمانبەران د ناڤا بودجێ دا دھێتە دیارکرن و بڕیارە ئەڤ سالە ژی ھژمارەکا فەرمانبەران بھێنە دامەزراندن، چونکو ھژمارەکا زۆرا فەرمانبەرێن گرێبەست و خوەبەخش ھەنە و پێدڤیە ببنە ھەمیشەیی، بەلێ ژبەرکو ھێشتا پڕۆژە قانوونا بودجەی نەھاتیە پەسەندکرن ژلایێ پەرلەمانێ عیراقێ دیار نینە دێ چەند ھزار فەرمانبەر بۆ ئەڤ سالە ھێنە دامەزراندن.
محەمەد ئەمین مزیری گۆتژی” ھەر دامەزراندنەکا ل عیراقێ ھەبیت بێگومان دێ ھەرێما کوردستانێ ژی ڤەگریت، بەلێ ئەز نەشێم بێژم دێ چەند فەرمانبەر ھێنە دامەزراندن، چونکو وەک من ئاماژەکری دڤێت دناڤا بودجێ بھێنە دیارکرن، بەلێ وەزارەتێن عیراقێ داخوازکریە و ھەکە داخوازا سەر بگریت دێ ھەرێما کوردستانێ ژی مفاداربیت و فەرمانبەرێن نوو دێ ھێنە دامەزراندن.