ئەڤرۆ نیوز، قائید میرۆ:

بەرھەڤی دھێنەکرن بۆ راستڤەکرنا قانوونا سەرۆکایەتیا ھەرێما کوردستانێ و بڕیارە ل چەند رۆژێن داھاتی سەرۆکێ ھەرێما کوردستانێ دناڤا پەرلەمانی دا بھێتە ھەلبژارتن، پەرلەمانتارەکا پارتیژی دبێژیت، دگەل دوماھی ھاتنا خۆلا پەرلەمانی دێ دەمێ سەرۆکێ ھەرێمێ ژی دوماھی ھێت.

جوان رۆژبەیانی، پەرلەمانتارا فڕاکسیۆنا پارتی ل پەرلەمانێ کوردستانێ بۆ رۆژناما ئەڤرۆ گۆت” رەشنڤیسەک بۆ راستڤەکرنا قانوونا سەرۆکایەتیا ھەرێما کوردستانێ ھاتیە بەرھەڤکرن و بڕیارە بشێوەیێ تەوافووق دناڤبەرا فڕاکسیۆنێن پەرلەمانی پرسا سەرۆکایەتیا ھەرێما کوردستانێ بھێتە ئێکلاکرن و ئێک دەنگیەک ھەبیت لسەر ئەڤێ پرسێ، چونکە یا خویایە بابەتێ سەرۆکایەتیا ھەرێما کوردستانێ یێ گرنگ و ھەستیارە.

جوان رۆژبەیانی دیارکر” بڕیارە بۆڤێ خۆلا پەرلەمانی سەرۆکێ ھەرێما کوردستانێ دناڤا پەرلەمانی بھێتە ھەلبژارتن ھەتا وی دەمێ ھەرێم دبیتە خوەدی دستوورێ خوە، بەلێ ددەمێ دوماھی ھاتنا ئەڤێ خۆلا پەرلەمانێ کوردستانێ ئەڤە دێ دەمێ سەرۆکێ ھەرێما کوردستانێ ژی دوماھی بھێت.

ئه‌ڤرۆ نيوز:

سۆپاسالارێ هێزێن پێشمه‌رگه‌ى راگه‌هاند كو داعش چو گه‌ف ل سه‌ر هه‌رێما كوردستانێ نينه‌، به‌لێ ل ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ و ده‌وروبه‌رێن مووسل و سنورێ عيراق و سوريا ژى بزاڤێن داعش د زێده‌بوونێ دانه‌ و كريارێن تيرۆرستى ژى ئه‌نجام دده‌ن.

فه‌ريق جه‌مال ئێمينكى، سۆپاسالارێ هێزێن پێشمه‌رگه‌ى، ده‌رباره‌ى گه‌ف و لڤينێن داعش گۆت: “هندى هێزێن پێشمه‌رگه‌ى ل ده‌ڤه‌رێن كوردستانى يێن دره‌ڤه‌ى ئيدارا هه‌رێما كوردستانێ دبنه‌جهـ بوون، داعش چو ده‌رفه‌ته‌ك نه‌بوو خوه‌ رێك بێخيت و لڤينێن تيرۆرستى ئه‌نجام بده‌ت، به‌لێ پشتى روودانێن 16ى ئوكتۆبه‌رێ ژ ئه‌گه‌رێ بۆشاييا ئه‌منى، له‌شكرى و سياسى ل ده‌ڤه‌رێ، داعش سه‌رهلدايه‌ و لڤينێن وان ل چه‌ند ده‌ڤه‌ران بووينه‌ گه‌ف ل سه‌ر ژيان و گۆزه‌رانيا خه‌لكى”.

سۆپاسالارێ هێزێن پێشمه‌رگه‌ى ئاماژه‌ ب وان ده‌ڤه‌ران ژى دا يێن كو داعش تێدا سه‌رهلداى و گۆت: “ل سنورێ قه‌زا شنگال و ده‌ڤه‌رێن سنورى يێن ناڤبه‌را عيراق و سوريا، هه‌روه‌سا ل رۆژهه‌لات و رۆژئاڤايێ مووسل و سنورێ قه‌زا مه‌خمۆر ب تايبه‌ت ل چيايێ قه‌ره‌چوغ، هه‌روه‌سا ل سنورێ پارێزگه‌ها كه‌ركووك رۆژ بۆ رۆژێ لڤينێن تيرۆرستى و چالاكيێن وان د زێده‌ بوونێ دانه‌”.

فه‌ريق جه‌مال ئێمينكى ئاشكه‌را ژى كر كو داعش گه‌ف نابيت ل سه‌ر هه‌رێما كوردستانێ، “سه‌نگه‌رێن پێشمه‌رگه‌ى ب ره‌نگه‌كێ گه‌له‌ك باش مۆكم كرينه‌ و ئاماده‌ى هه‌موو ره‌نگه‌ به‌ره‌ڤانيه‌كێ نه‌، به‌لێ ده‌ڤه‌رێن كوردستانى يێن كێشه‌ ل سه‌ر ژ ئه‌گه‌رێ نه‌بوونا پێشمه‌رگه‌ى ل ده‌ڤه‌رێن گه‌ف ل سه‌ر”.

ئه‌ڤرۆنیوز:

كۆنسۆلێ ئیرانێ ل هه‌ولێرێ راگه‌هاند، وه‌لاتێ وى بریار دایه‌ ژنوكه‌ وپێڤه‌ ڤیزا ئه‌لكترۆنى ب وه‌لاتیێن هه‌رێما كوردستانێ بده‌ت، دیاركر ژى كو ئه‌و بزاڤێ دكه‌ن ئه‌و بریار به‌رى جه‌ژنا نه‌ورۆزێ بهێته‌ بجهئینان.

مورته‌زا عه‌بادى، كونسۆلێ ئیرانێ ل هه‌ولێرێ بۆ ئاژانسا (میهر) یا ده‌نگوباسان یا ئیرانى دیاركر كو ئه‌و دێ ده‌ستبه‌ردارى ڤیزا كاخه‌زى بن وژنوكه‌ وپێڤه‌ دێ پشت به‌ستنێ ب ڤیزا ئه‌لكترۆنى كه‌ن.

كونسۆلێ ئیرانى ب گرنگى زانى كو وه‌لاتیێن هه‌ردولا بشێن ب شێوه‌كێ ب ساناهى ڤیزا وه‌لاتێ دى ب ده‌ستڤه‌بینن وپێرابوونێن گه‌شتكرنا وان ب ساناهیتر ببیت.

ل دووڤ داخۆیانیا كونسۆلێ ئیرانێ ل هه‌ولێرێ، ژنوكه‌ وپێڤه‌ وه‌لاتیێن هه‌رێما كوردستانێ دشێن ب ڤیزا ئه‌لكترۆنى سه‌ره‌دانا ئیرانێ بكه‌ن.

ئه‌ڤرۆنیوز:

سه‌رۆك مه‌سعود بارزانى، ئه‌ڤرۆ سێشه‌مبى 5/3/2019 ب هه‌لكه‌فتا 28 سالیا سه‌رهلدانا گه‌لێ كوردستانێ دژى رژێما به‌عس وبیره‌وه‌ریێن ئادارێ په‌یامه‌ك به‌لاڤكر.

سه‌رۆك بارزانى دپه‌یاما خوه‌ دا گۆت” ئادار هه‌یڤا سه‌ركه‌فتن ونه‌هامه‌تیێن گه‌لێ كوردستانێ یه‌، پشكا مه‌زن یا سه‌ركه‌فتن ووه‌رچه‌رخانێن دیرۆكا گه‌لێ كوردستانێ دهه‌یڤا ئادارێ دا رووداینه‌، ئادار هه‌یڤا سه‌رهلدان وقوربانیدانێ ونووبوونا هیڤیانه‌ بۆ خه‌لكێ كوردستانێ، د ئادارێ دا گه‌لی كوردستانێ دژى سته‌مكاریێ وداگیركاریێ راوه‌ستا وقۆناغه‌كا نوو دژیانا سیاسى یا بزاڤا رزگاریخوازا كوردستانێ هاته‌ هه‌بوونێ، كو دسه‌رهلدانا مه‌زن یا ئادارا 1991 دیاربوو”.

سه‌رۆك بارزانى گۆت ژى”سه‌رهلدان په‌یاما رۆهن یا كوردستانیان بوو بۆ هه‌موو جیهانێ، كو بن ده‌ستیێ قبوول ناكه‌ت وهه‌كه‌ كوردستان ئێكده‌نگ بیت، هه‌میشه‌ سه‌ركه‌فتن ب سه‌ر سته‌مێ وداگیركاریێ دا دێ مسوگه‌ر بیت”.

دیاركر ژى” خۆراگریا خه‌لكىوشوره‌شێ، رژێما عیراقى نه‌چاركر كو ل 11 ئادارا 1970 بۆ جارا ئێكێ دانپێدانێ ب پشكه‌كا مافێن گه‌لێ بكه‌ت، به‌یانناما 11 ئادارێ به‌لگه‌یه‌كا رۆهنه‌ ل سه‌ر سه‌ركه‌فتنا شوره‌شا ره‌وا یا گه‌لێ كوردستانێ به‌رابنه‌ر بزاڤا حه‌لاندنا گه‌لی مه‌ ژلایێ داگیركه‌ران ڤه‌، ل 11 ئادارێ ول شه‌روه‌شا مه‌زن یا ئه‌یلوولێ دوژمن هاته‌ نه‌چاركرن ده‌ستبه‌ردارى لۆژیكا هێزێ بیت ورێیا دانوستاندنێ بگریته‌به‌ر”.

دبه‌رده‌وامیا په‌یاما خوه‌دا، سه‌رۆك بارزانى گۆت” هه‌ر ل هه‌یڤا ئادارێ هه‌لكه‌فتا شه‌هیدێن هه‌له‌بجه‌ دكه‌ین، هه‌له‌بجه‌ برینه‌كا كووره‌ دله‌شێ ملله‌تێ مه‌ دا ونیشانا درونده‌یى وبێ ویژدانیا دوژمنانه‌ هه‌له‌بجه‌ ده‌نگێ مه‌زلومیه‌تا گه‌لێ كوردستانێ یه‌ دچه‌رخێ بۆرى دا وهه‌موو مرۆڤایه‌تى به‌رپرسه‌ ل ئاستێ وێ تاوانا مه‌زن ئه‌وا دژى گه‌لێ كوردستانێ هاتیه‌ ئه‌نجامدان”.

دیاركر ژى” ل هه‌یڤا ئادارێ هه‌لكه‌فتا نه‌ورۆزێ دهێته‌ ساخكرن، كو بۆگه‌لی كوردستانێ سیمبوولا سه‌ركه‌فتنا ژیانێ وئازادیێ یه‌ ل سه‌ر سته‌م وتاریێ دا، نه‌ورۆز مزگینیا نووبوونێ یه‌ وده‌ستپێكه‌كا نوویه‌ بۆ وه‌لاتیێن كوردستانێ”.

ل دووماهیا په‌یاما خوه‌ دا، سه‌رۆك بارزانى گۆت” ب هه‌لكه‌فتا سه‌رهلدانێ وبیره‌وه‌ریێن ئادارێ، سلاڤان بۆ شه‌هیدێن سه‌رهلدانێ وشه‌هیدێن هه‌له‌بجه‌ وهه‌موو شه‌هیدێن كورد وكوردستانێ دهنێرین، ده‌ستكه‌فتێن نوكه‌ یێن گه‌لێ مه‌ وپێشكه‌فتن وئاڤه‌دانى وپێگه‌ها دیار یا هه‌رێما كوردستانێ، هه‌موو به‌رهه‌مێ خوینا شه‌هیدێن مه‌ یێن سه‌ربلندن، ب وان هه‌لكه‌فتان دا سلاڤ وسوپاس بۆ هه‌موو وه‌لاتیێن كوردستانێ كو ل قۆناغێن دژوار دا دخۆراگر بوون وچو جاران سته‌م وبن ده‌ستى قبوول نه‌كریه‌، سلاڤ بۆ قاره‌مانیا پێشمه‌رگه‌ى كو بۆ گیانفیداییێ وجوامێریێ وان ب خوه‌ دیرۆك بۆ گه‌لێ خوه‌ تۆماركر”.

ئەڤرۆ نیوز:

سەلاحەدین دەمیرتاش هەڤسەرۆکێ بەرێ یێ هەدەپێ کو ئەڤ دو سالن ل زیندانێ دایە داخواز ژ سەرۆک بارزانی دکەت کو ل سەر بزاڤێن خوە بۆ ئێکەتیا نەتەوی بەردەوام بیت، دەمیرتاش دیار دکەت کو تنێ سەرۆک بارزانی دشێت ئێکەتیا کوردان دروست بکەت و سەرۆک بارزانی هەتا نها گەلەک بزاڤ بۆ هندێ کرینە و هێڤیدارە کو سەرۆک بارزانی بشێت هەموو هێز و ئالیێن سیاسی یێن کوردستانێ ل دۆر بەرژەوەندیێن نەتەوی کۆم بکەت و ئێکەتیا کوردان دروست بکەت.

هەڤسەرۆکێ بەرێ یێ هەدەپێ سلاڤێن خوە بۆ وەلاتیێن کورد ل هەرێما کوردستانێ فرێ دکەت و دیار دکەت کو ئێدی سەردەمێ هندێ چوویە کو دوژمن ب زیندانکرنا سەرکردێن کورد بشێن بزاڤا ژناڤبرنا کوردان بکەن و دبێژیت: ئەڤ سەردەمە سەردەمێ کوردانە و کورد دێ هەر گەهنە ئازادیا خوە.