ئه‌ڤرۆنیوز:
حوكمه‌تا هه‌رێما كوردستانێ ئه‌ڤرۆ پێنجشه‌مبى 28/2/2019 رۆهنكرنه‌ك ل دۆر راده‌ستكرنا په‌ترۆلا هه‌رێما كوردستانێ ب كۆمپانیا سۆمۆ یا عیراقى به‌لاڤكر.
سه‌باره‌ت به‌لاڤبوونا چه‌ند ده‌نگوباس وراپۆرتێن رۆژنامه‌ڤانى ل دۆر كۆمبوونا دوهى چارشه‌مبى 27/2/2019 یا جڤاتا هه‌رێمێ بۆ په‌ترۆلێ وغازێ، سه‌فین دزه‌یى په‌یڤدارێ فه‌رمیێ حوكمه‌تا هه‌رێما كوردستانێ رۆهنكرنه‌ك به‌لاڤكر وراگه‌هاند چو راستى بۆ وان ده‌نگوباس وراپۆرتێن رۆژنامه‌ڤانى نینه یێن به‌حسێ راده‌ست نه‌كرنا په‌ترۆلا كوردستانێ ب كۆمپانیا سۆمۆ دكه‌ن.
گۆت ژى”كۆمبوونا دوهى یا جڤاتا هه‌رێمێ بۆ په‌ترۆلێ وغازێ كۆمبوونه‌كا ئاسایى بوو وهه‌ر تشته‌كێ ل دۆر هاتیه به‌لاڤكرن چو راستى بۆ نینه. حوكمه‌تا هه‌رێما كوردستانێ وه‌كو به‌رده‌وام دووپاتكرى كو یا به‌رهه‌ڤه ودخوازیت كێشه وگرفتان ل گه‌ل حوكمه‌تا فیدرالى یا عیراقێ ب رێیا دانوستاندنێ چاره بكه‌ت”.
دهێته زانین چه‌ند ده‌زگه‌هێن راگه‌هاندنێ ل هه‌رێما كوردستانێ وعیراقێ به‌لاڤ كربوو كو هه‌ولێر یا به‌رهه‌ڤ نینه رۆژانه 250 هزار به‌رمیلێن پترۆلا هه‌رێما كوردستانێ وه‌كو دقانوونا بودجا عیراقی دا هاتى، راده‌ستى كۆمپانیا سۆمۆ یا عیراقى بكه‌ت،
ئه‌ڤرۆنیوز:
ئه‌ندامه‌كێ سه‌ركردایه‌تیا پارتى دیموكراتى كوردستان ئه‌ڤرۆ پێنجشه‌مبى 28/2/2019 ره‌تكر پارتى داخوازا ئاشتبوونێ ل گه‌ل به‌رهه‌م سالح كربیت وراگه‌هاند، به‌رهه‌م سالح نوونه‌رێ كوردان نینه.
پشتى هنده‌ك ده‌زگه‌هێن راگه‌هاندنا ئێكه‌تى نیشتمانى كوردستان وبه‌رهه‌م سالح ده‌نگوباسه‌ك به‌لاڤكرى كو هشیار زێبارى داخوازا ئاساییكرنا په‌یوه‌ندیان ل گه‌ل به‌رهه‌م سالح كریه، عه‌لى عه‌ونى ئه‌ندامێ سه‌ركردایه‌تیا پارتى راگه‌هاند، ئه‌و ده‌نگوباسه یێ بێ بنه‌مایه وچو راستى بۆ نینه.
عه‌لى عه‌ونى زێده‌تر بۆ باسنیوز دیاركر كو ئێك ژ داخوازیێن ئێكه‌تیێ بۆ دانوستاندنێ ل گه‌ل پارتى ئه‌و بوو كو سه‌رۆك بارزانى پێشوازیێ ل به‌رهه‌م سالح بكه‌ت، به‌لێ سه‌رۆك بارزانى ئه‌و چه‌نده ره‌تكریه.
دیاركر ژى”به‌رى به‌رهه‌م سالح هه‌ڤالێن خوه ل هه‌ڤپه‌یمانیێ بجه بهێلیت وبزڤریت بۆ ناڤ ئێكه‌تیێ، هاته گازیكرن وسه‌رۆك بارزانى گۆتێ هه‌كه ته دڤێت خوه بۆ پۆستێ سه‌رۆك كۆمارى به‌ربژار بكه‌ى، ئه‌م دێ پشته‌ڤانیا ته كه‌ین ول گه‌ل ئێكه‌تیێ ژى دێ وێ ده‌لیڤێ په‌یداكه‌ین، به‌لێ به‌رهه‌م گۆت من نه‌ڤێت”.
عه‌لى عه‌ونى خویاكر”به‌رهه‌م سالح دحیسابا مه دا نینه وپارتى پێشوازیێ لێ ناكه‌ت، ب دیتنا مه ب وێ میكانیزما ئێكه‌تیێ به‌رهه‌م پێ داناى، غه‌دره‌كا مه‌زن ل كورد وكوردستانێ هاتیه كرن، چونكى ئه‌و بریار ب ده‌ستێ كوردان بوو، وان دا ده‌ست عه‌ره‌بان، ئانكو ئه‌و ب ده‌نگێ خه‌لكه‌كێ دى بوویه سه‌رۆك كۆمار وب ده‌نگێ كوردان نه‌بوو، له‌وما نوونه‌راتیا مه ناكه‌ت وچو په‌یوه‌ندى ب مه نینه”.
ئه‌ڤرۆنیوز:
رێڤه‌به‌ریا گشتى یا كه‌شناسیێ ل هه‌رێما كوردستانێ پێشبینیێن سه‌قایێ سوباهى ل پارێزگه‌هێن هه‌رێما كوردستانێ به‌لاڤكر.
رێڤه‌به‌ریا ناڤبرى ل دۆر ره‌وشا سوباهى ئه‌ینیێ 1/3/2019 یا سه‌قاى ل پارێزگه‌ها دهۆكێ به‌لاڤكر كو دێ ئه‌ورێ تمام بیت ل گه‌ل بارینا بارانێ وپاشى دێ بیته نیمچه ئه‌ور.
دیاركر ژى كو ئه‌گه‌رێ به‌فر بارینێ ل ده‌ڤه‌رێن چیایى ل پارێزگه‌ها دهۆكێ یا هه‌ى.
ل دۆر پلا گه‌رمێ یا سوباهى ل پارێزگه‌ها دهۆكێ، كه‌شناسیا هه‌رێمێ دیاركر كو دێ 12 پله بیت.
ئه‌ڤرۆنیوز:
سه‌رۆكێ فراكسیۆنا پارتى دیموكراتى كوردستان ل په‌رله‌مانێ كوردستانێ ئاشكرا دكه‌ت كو قانوونا سه‌رۆكاتیا هه‌رێما كوردستانێ دێ هێته راستڤه‌كرن وسه‌رۆكێ هه‌رێما كوردستانێ دێ هه‌لبژێرین هه‌كه ئێكه‌تى ژى پشكداریێ دكۆمبوونان دا نه‌كه‌ت.
ئومێد خۆشناو، سه‌رۆكێ فراكسیۆنا پارتى ل په‌رله‌مانێ كوردستانێ ئه‌ڤرۆ پێنجشه‌مبى 28/2/2019 ددیداره‌كا رۆژنامه‌ڤانى دا راگه‌هاند”رێككه‌فتن دناڤبه‌را بزاڤا گۆران وپارتى یا هه‌ى ول گه‌ل ئێكه‌تیێ ژى جۆره‌كێ لێكتێگه‌هشتنێ یێ هه‌ى ل سه‌ر سه‌رۆكێ هه‌رێمێ ورێككه‌فتن یا كه‌سایه‌تى نینه به‌لكو حزبی یه، ئه‌م وه‌كو فراكسیۆنا پارتى دپابه‌ندین، د ئه‌زموونا ئێكێ دا كو هه‌لبژارتنا ده‌سته‌یا سه‌رۆكاتیا په‌رله‌مانى بوو، گۆران ئه‌زموونه‌كا سه‌ركه‌فتى نیشاندا وپێگیر بوو ب وێ رێككه‌فتنا هه‌ى ژبلى وێ چه‌ندێ كو چو به‌ربژاره‌ك نه‌بوو بۆ وان پۆستان، هه‌موو په‌رله‌مانتارێن وان ده‌نگ ب به‌ربژارێن ده‌سته‌یا سه‌رۆكاتیا په‌رله‌مانى دا”.
خۆشناو، ل دووڤ مالپه‌رێ كوردستان تى ڤى، گۆت ژى”بۆ قۆناغا داهاتى یا باوه‌رى پێدانێ ب سه‌رۆكێ هه‌رێمێ وسه‌رۆكێ حوكمه‌تێ ووه‌زیران، هیڤى خوازین هه‌ڤشێوێ ئه‌زموونا ئێكێ بیت وچاڤه‌رێیا مه ئه‌وه ودپشت راستین ژى كو دێ وه‌سا بیت. چونكى رێككه‌فتنا سیاسى دناڤبه‌را سه‌ركردایه‌تیا پارتى وبزاڤا گۆران ب پشت راستى ڤه ب وى جۆرى یه كو دڤێت هه‌موو په‌رله‌مانتار پێگیر بن ب ده‌نگدانێ ب به‌ربژارێن پۆستان”.
ئاشكراكر ژى” هێڤیدارین رۆژا شه‌مبیا داهاتى هه‌ردو مه‌كته‌بێن سیاسى یێن پارتى وئێكه‌تیێ بگه‌هنه رێككه‌فتنێ ودگه‌شبینین ژى، به‌لێ هه‌كه نه‌گه‌هینه رێككه‌فتنێ، كارێن په‌رله‌مانى ناهێنه راوه‌ستاندن ودێ پێنگاڤان هاڤێژین، قانوونا سه‌رۆكاتیا هه‌رێمێ دێ راستڤه‌كه‌ین وسه‌رۆكێ هه‌رێمێ دێ هه‌لبژێرین وچاڤه‌رێ نابین، چونكى ئه‌و بابه‌تێن نیشتمانى نه”.
ئاماژه كر” دقانوونا سه‌رۆكاتیا هه‌رێما كوردستانێ، ب تنێ ئێك برگه دقانوونا سه‌رۆكاتیا هه‌رێمێ دا دێ هێته راستڤه‌كرن كو ئه‌وژى شێوازێ ده‌نگدانێ یه ب سه‌رۆكێ هه‌رێمێ دناڤ خه‌لكى دا بۆ په‌رله‌مانى وهه‌موو ده‌ستهه‌لاتێن وى ژى دێ وه‌كو خوه مینن تا ده‌مێ دستووره‌ك بۆ هه‌رێما كوردستانێ دهێته دانان، دیاره شێوازێ دانانا سه‌رۆكێ هه‌رێمێ دانوستاندنێ زۆر یێن هه‌ین دناڤبه‌را لایه‌نێن سیاسى دا، دیتنا مه ئه‌وه كو مافێ خه‌لكى یه، به‌لێ دڤێ خۆلێ دا ب وى جۆرى دێ بیت كو ل په‌رله‌مانى بهێته هه‌لبژارتن تاكو دانانا دستووره‌كى بۆ هه‌رێما كوردستانێ”.
ئەڤرۆ نیوز:
وەزارەتا دارایی یا حوکمەتا ھەرێما کوردستانێ راگەھاند ئەو دێ ل حەفتیا بھێت دەست ب بەلاڤکرنا مووچێ ھەیڤا ١٢ یێ سالا ٢٠١٨ کەن و بریارە بەری نەوروزێ ھەموو وەزارەت مووچێن خوە وەرگرن.
دیوانا وەزارەتا دارایی ئەو چەندە ژی راگەھاند ل حەفتیا بھێت ل رۆژا سێشەمبی ٥-٣-٢٠١٩ دێ دەست ب بەلاڤکرنا مووچێن ھەیڤا ١٢ یێن سالا ٢٠١٨ کەن، لێ ژ بەرکو ئەو رۆژە بھێنڤەدانا فەرمی یە ئەگەر وەزارەتێ بریارەک دەرکر کو وێ رۆژێ مووچا بەلاڤکەن بەروڤاژی ئەگەر نە دێ ل رۆژا چارشەمبی ٦-٣-٢٠١٩ دێ مووچە ھێنە بەلاڤ کرن ل سەر فەرمانبەران.
دیوانا دارایی ئەو چەندە ژی دیارکر ل دەسپێکێ وەزارەتا پێشمەرگەی و لیوایێن سەر ب وێ ڤە دێ مووچێن خوە وەرگرن و ھەر د ھەمان حەفتیا بھێن دێ وەزارەتا پەروەردێ ژی مووچێ خوە یێ ھەیڤا ١٢ وەرگرن، بریارە بەری جەژنا نەوروزێ ھەموو فەرمانبەرێن ھەرێمێ مووچێن خوە وەرگرن.
ئه‌ڤرۆنیوز:
جێگرێ دویێ یێ سه‌رۆكێ په‌رله‌مانێ عیراقێ، به‌شیر حه‌داد د سمیناره‌كێ دا ل هه‌ولێرێ به‌حسێ هه‌لویسته‌كێ سه‌رۆك وه‌زیرێن عیراقێ عادل عه‌بدولمه‌هدى ل به‌رامبه‌ر كوردان دكه‌ت.
به‌شیر حه‌داد، جێگرێ سه‌رۆكێ په‌رله‌مانێ عیراقێ گۆت” عادل عه‌بدولمه‌هدى سه‌رۆك وه‌زیرێن عیراقێ ددیداره‌كێ دا پێ راگه‌هاند كو ئه‌و زێده‌تر ژ كوردان دێ به‌رگریێ ژ مافێن هه‌رێما كوردستانێ كه‌ت”.
حه‌داد ئاماژه كر كو عادل عه‌بدولمه‌هدى زێده‌تر ژ چار سالان ل چیایێن هه‌رێما كوردستانێ ل گه‌ل هێزێن پێشمه‌رگه‌ى دژى رژێما دكتاتۆرى یا به‌عس خه‌بات كریه، ئه‌ڤ چه‌نده ژى ب ده‌لیڤه هژمارت وب پێدڤى زانى هه‌رێما كوردستانێ بۆ به‌رژه‌وه‌ندیا خوه بزانیت”.
ئه‌ڤرۆنیوز:
هێمن هه‌ورامی جێگرێ ئێكێ یێ سه‌رۆكێ په‌رله‌مانێ كوردستانێ، چاكسازی دناڤ په‌رله‌مانێ كوردستانێ دا راگه‌هاند وئاماژه ب چه‌ند خالان دكه‌ت كو به‌رۆڤاژی خۆلێن بۆری یێن په‌رله‌مانی نه.
هێمن هه‌ورامی، جێگرێ سه‌رۆكێ په‌رله‌مانێ كوردستانێ دبه‌یاننامه‌كێ دا به‌لاڤكر” پشتی كو ل روونشتنا رۆژا 18 شوباتێ وه‌كو ده‌سته‌یا سه‌رۆكاتیا په‌رله‌مانێ كوردستانێ، ژلایێ پتریا په‌رله‌مانتارێن كوردستانێ باوه‌ری پێ هاته دان، ل گه‌ل سه‌رۆك وسكرتێرێ په‌رله‌مانێ كوردستانێ مه ده‌ست وه‌رگرتنا پێرابوونێن كارگێری یێن پێدڤی بۆ شه‌فافیه‌تا زێده‌تر یا كارێ په‌رله‌مانی وهه‌ر چ زێده‌تر باشتر رێكخستنا كاروبارێن كارگێری یێن په‌رله‌مانی وچه‌سپاندنا دادپه‌روه‌ریێ وشه‌فافیه‌تا زێده‌تر ونه‌هێلانا ب هه‌ده‌ردانا سامانێ گشتی ورێكخستنا خه‌رجیان”.
هه‌ورامی دیاركر ژی” وه‌كو ده‌سته‌یا سه‌رۆكاتیا نوكه یا په‌رله‌مانی، مه ژ خوه ده‌ستپێكر وئه‌و ده‌ست ڤه‌بوونا دده‌ستهه‌لاتا مه‌زاختنا دارایی وهاریكاریان كو ده‌سته‌یا سه‌رۆكاتیا په‌رله‌مانی هه‌بوو، مه نه‌هێلا ول رۆژێن بۆری ل گه‌ل هه‌موو شیره‌تكار ورێڤه‌به‌رێن دناڤ په‌رله‌مانی دا كۆمبووین وئه‌و سیاسه‌ت وشێوێ كارێ مه بۆ هاته رۆهنكرن ومه راگه‌هاند كو بلندكرنا پلێ ب میزاج ونه قانوونی ب تمامی ره‌ت دكه‌ین ویاردا واسته وواسته‌كاریێ وب هه‌رده‌ردانا بودجه ومیزاجیه‌ت دهاریكاریان وئیمتیازاتان ب تمامی ره‌ت دكه‌ین”.
خویاكر” دكۆمبوونا رۆژا 27/2/2019 ل گه‌ل هه‌موو سه‌رۆك فراكسیۆنێن په‌رله‌مانێ كوردستانێ، مه ئاگه‌هداركرن كو بێ چو جوداهیه‌كێ، بۆ كارێ په‌رله‌مانتاری پره‌نسیبێ دادپه‌روه‌ری به‌رامبه‌ر هه‌موو په‌رله‌مانتاران دێ ئه‌نجام ده‌ین ومه بۆ دیاركر كو به‌رۆڤاژی خۆلێن بۆری رێ ناده‌ین ژ بودجا گشتی هاریكاریێن بێ بنه‌ما ب هێجه‌تێن جۆراروجۆر بۆ په‌رله‌مانتاران بهێنه مه‌زاختن، رێ ناده‌ین ژ سامانێ گشتی بابه‌تێ كرینا ترومبێلان روو بده‌ت ول شووونا وێ چه‌ندێ، مه بۆ پێشنیازكر كو ب شه‌فافانه، هه‌یڤانه رێژا 2% ژ مووچێن وان بچیته دسندووقه‌كێ دا وپه‌رله‌مانێ كوردستانێ ژی ب هه‌مان رێژه هاریكار بیت د وێ سندووقێ دا بۆ حاله‌تێن ساخله‌میێ وحاله‌تێن پێدڤی، ئه‌ڤ چه‌نده ژی بۆ بنبركرنا ب هه‌ده‌ردانێ وبریارێن میزاجی”.
جێگرێ سه‌رۆكێ په‌رله‌مانێ كوردستانێ گۆت ژی” بۆ كاروبارێن ڤه‌گوهاستنێ وكارێ رۆژانه یێ په‌رله‌مانتاران وهاتنوچوونا باژێر وباژێركان وسه‌ره‌دانا وه‌لاتیان، مه ئاگه‌هداركرن كو چاڤه‌رێ وێ چه‌ندێ نه‌بن ژ بودجا په‌رله‌مانی ترومبێل بهێنه دابینكرن ول شوونا وێ چه‌ندێ پێشنیازه‌ك بۆ هاته كرن كو ب قیستێ هه‌یڤانه ژ مووچێن خوه، ب گرونتیا په‌رله‌مانی، ترومبێلان بۆ خوه دابین بكه‌ن”.
هێمن هه‌ورامی ل دووماهیا به‌یااناما خوه دا دیاركر” شێوازێ كارێ مه ب شه‌فافانه یێ به‌رده‌وامه بۆ وێ چه‌ندێ په‌رله‌مانه‌كێ ب هێز مه هه‌بیت وپرس وراوێژكرن ب فراكسیۆنان بۆ كاروبارێن په‌رله‌مانی وئیداره‌كرنێ نه‌هجێ مه‌یه”.
ئه‌ڤرۆنیوز:
رێڤه‌به‌ریا گشتی یا كه‌شناسیێ ل هه‌رێما كوردستانێ د هوشداریه‌كێ دا كو ئه‌ڤرۆ چارشه‌مبی 27/2/2019 به‌لاڤكری دیاركر كو ئاستێ ئاڤا بارانان ل چه‌ندین ده‌ڤه‌رێن هه‌رێمێ دێ بلند بیت ژوان سێ ده‌ڤه‌ر ل پارێزگه‌ها دهۆكێ نه.
رێڤه‌به‌ریا ناڤبری ئاماژه‌كر كو پێشبینی دهێته كرن ئاستێ باران بارینێن ڤان رۆژانل سه‌نته‌رێ پارێزگه‌هان بلند ببیت دسه‌ر 30 ملم ول ده‌ڤه‌رێن چیایی بۆ دسه‌ر 60 ملم وشه‌ڤا ئه‌ینیێ ئه‌ڤ پێلا بارانێ دێ ب دووماهی هێت.
به‌لاڤكر ژی كو ئه‌و ده‌ڤه‌رێن مه‌ترسیا بلندبوونا ئاستێ زۆر یێ ئاڤێ لێ هه‌ی ده‌ڤه‌رێن، چۆمان وسۆران وقه‌لادزێ وحاجی ئۆمه‌ران ورانیا وئامێدیێ وكانی ماسێ وزاخۆ.
ئه‌ڤرۆنیوز:
ئه‌ندامه‌كێ مه‌كته‌با سیاسی یا پارتی دیموكراتی كوردستان ئه‌ڤرۆ چارشه‌مبی 27/2/2019 راگه‌هاند، ده‌مێ وێ چه‌ندێ یێ هاتی شاندێ ئێكه‌تی نیشتمانی كوردستان سه‌ره‌دانا مه بكه‌ت.
رۆژ نوری شاوه‌یس، ئه‌ندامێ مه‌كته‌با سیاسی یا پارتی بۆ رۆژنامه‌ڤانان گرت” پارتی یا رژده ل سه‌ر دروستكرنا كابینا نوو یا حوكمه‌تا هه‌رێما كوردستانێ ودڤێت هه‌ر لایه‌نه‌كێ پشكدار پێگیری به‌رنامێ حوكمه‌تێ بیت.
سه‌باره‌ت دانوستاندنێن دناڤبه‌را پارتی وئێكه‌تیێ ل دۆر پێكئینانا كابینا نوو یا حوكمه‌تا هه‌رێما كوردستانێ، گۆت” مه وه‌كو پارتی دیموكراتی كوردستان چه‌ندین جاران سه‌ره‌دانا سلێمانیێ كریه بۆ لایێ ئێكه‌تیێ وبراده‌رێن گۆران ولایه‌نێن دی ونوكه ژی ده‌مێ وێ چه‌ندێ یێ هاتی شاندێ ئێكه‌تیێ سه‌ره‌دانا مه بكه‌ت”.
نيشاندان