ئه‌ڤرۆنيوز:

وه‌زاره‌تا ئه‌وقافێ وكاروبارێن ئاينى ل هه‌رێما كوردستانێ رۆهنكرنه‌ك ل دۆر رۆژا ژدايكبوونا حه‌زره‌تێ عيسايێ مه‌سيح به‌لاڤكر.

وه‌زاره‌تا ئه‌وقافێ درۆهنكرنا خوه‌ دا دبێژيت” دده‌مه‌كێ دا كو پتريا وه‌لاتێن جيهانێ هلكه‌فتا ژدايكبوونا پێفه‌مبه‌ر عيسا ( سلاڤێن خودێ ل سه‌ر بن) ساخ دكه‌ن، جيهان ژى ب گشتى يا خوه‌ به‌رهه‌ڤ دكه‌ت بۆ پێشوازيێ ل هاتنا ساله‌كا نوو يا زاينى، وه‌كو به‌رده‌وام سالانه‌ ل ڤێرێ ول وێراهه‌ چه‌ند ده‌نگه‌كێن نه‌شاز بلند دبن كو ل شوونا به‌حسێ پێكڤه‌ژيانێ ورێزگرتنێ ل په‌يره‌وكارێن ئاينێ مه‌سيحى وقه‌بوولكرنا يێ به‌رامبه‌ر، ده‌ست ب هێرشان ل سه‌ر هلكه‌فتێن وه‌لاتيێن مه‌سيحى دكه‌ن ب چه‌ندين ده‌سته‌واژه‌ وپه‌يڤێن بريندار كو به‌رى هه‌ر تشته‌كى به‌رۆڤاژى روح وناڤه‌رۆكا ئاينێ پيرۆزێ ئيسلامێ نه‌”.

وه‌زاره‌تا ئه‌وقافێ زێده‌تر دياركر” دووماهى ئه‌و ده‌نگێن نه‌شاز، ئاخڤتنێن مه‌هدى ئه‌لسومه‌يدعى موفتيێ وه‌لاتێ عيراقێ بوو، كو داخۆيانيه‌كا دژى خوه‌شى ده‌ربرين ب هلكه‌فتا ژدايكبوونا عيسايێ پێغه‌مبه‌ر (سلاڤێن خودێ ل سه‌ر بن) ودژى ئاهه‌نگێن سه‌رێ سالي زاينى داين، كو دهه‌مان ده‌م دا ئاخڤتنين وى دژى بنه‌مايێن عه‌قلى ولێبۆرينا ئاينى بوون”.

درۆهنكرنا وه‌زاره‌تا ئه‌وقافێ دا هاتيه‌ ژى”ئه‌م ل وه‌زاره‌تا ئه‌وقافێ وكاروبارێن ئاينى ل هه‌رێما كوردستانێ، ژ روانگا باوه‌ريا مه‌ يا ب هێز ب ئازاديێن ئاينى وبنه‌مايێن پێكڤه‌ژيانا ئاشتيانه‌ يا ئاينداران وپارێزگاريكرن ژ ئاسايسا جڤاكى وپاراستا مافێن پێكهاتێن ئيتنى وئايينى، ب پشت به‌ستن ب ئه‌زموونا دێرين يا سه‌ركه‌فتى يا پێكڤه‌ژيانا ئاشتيانه‌ يا ئاينان ل هه‌رێما كوردستانێ وئه‌و قانوون ورێنمايێن كارى پێ دكه‌ين ل دۆر ڤێ چه‌ندێ، ب توندى دژى داخۆيانيێن ناڤبرى نه‌ وئه‌ڤ جۆره‌ بۆچوونێن شاش ب تمامى وه‌كو بۆچوونێن گرۆپا دره‌نده‌ يا داعشێ نه‌، له‌وما داخوازێ دكه‌ين پێرابوونێن قانوونى ل به‌رامبه‌ر بهێنه‌ وه‌رگرتن تاكو ئێدى ئه‌ڤ جۆره‌ كه‌سانه‌ وئه‌ڤ جۆره‌ فه‌توايێن نه‌زانستى شيرازێن جڤاكى ل به‌ر هه‌ڤ نه‌ هه‌لوه‌شينن وهلكه‌فتێن هه‌ر پێكهاته‌كێ ژ ده‌ربرينا خوه‌شيێ نه‌گوهۆرن بۆ په‌يداكرنا شه‌رێ تائيفى وفه‌وزايا ئاينى”.

دياركر ژى” ده‌ستخوه‌شيێ ل وان داموده‌زگه‌ وده‌سته‌يێن فه‌رمى يێن ئايينى ل عيراقێ دكه‌ين كو ب له‌ز هاتنه‌ سه‌ر خه‌ت وبه‌رائىتا خوه‌ ژئاخڤتنێن ناڤبرى نيشان دا ورۆهنكر كو ئاخڤتنێن ناڤبرى تنێ ده‌ربرينێ ژ تاكێ وى دكه‌ن نه‌كو پێكهاتێ وى يێ ئاينى ومه‌زهه‌بى”.

ئەڤرۆ نیۆز، قائید میرۆ

بەری دو رۆژان شەش بەرپرسێن بزاڤا ئیسلامی ل کوردستانێ دەست ژکارێ خۆ بەردان و داخوازکر، رێبەرێ حزبا وان دەست ژکارێ خۆ بەردەت، چونکە بەری ھەلبژارتنان سۆزدایە ھەگەر بزاڤا ئیسلامی سێ کۆرسیێن پەرلەمانی بدەستڤە نەئینیت دێ دەست ژکارێ خۆ بەردەت.

بزاڤا ئیسلامی ل سالێن ھەشتیا یا چەرخێ بۆری ھاتیە دامەزراندن و ب دایکا لایەنێن ئیسلامی دھێتە نیاسین، بەلێ پشتی سەرھەلدانێ تووشی ئاریشەیێن نافخۆ بویە و چەندین حزبێن وەک بزاڤا ئێکبوون و کۆمەلا ئیسلامی ل ھناڤێن بزاڤا ئیسلامی پەیدابووینە.

 دکتۆر عەبدولا وەرتی، کارگێڕێ مەکتەبا سیاسیا بزاڤا ئیسلامی  بۆ ئەڤرۆ نیۆز دیارکر” پشتی کو ئەنجامێن ھەلبژارتنێن پەرلەمانێ کوردستانێ ھاتینە راگەھاندن و دەنگێن بزاڤا ئیسلامی داکەتی، ئەم حاشا لڤێ راستیێ ناکەین کو ئەم نەشیاینە دەنگێن پێدڤی بدەستڤە بینین، لەوڕا مە بڕیار دایە سالانوودا کۆنفڕانسێ بزاڤا ئیسلامی بھێتە ئەنجامدان و تێدا بڕیار لسەر گۆھۆڕینان بھێتەدان دناڤا بزاڤا ئیسلامی دا، ھەروەسا خالێن لاواز و بووینە ئەگەرێ کێمبوونا دەنگێن بزاڤا ئیسلامی دێ ھێنە دیارکرن و چارەسەرکرن.

لدۆر داخوازا شەش بەرپرسێن بزاڤا ئیسلامی بۆ دەست ژکار کێشانا رێبەرێ گشتیێ بزاڤێ ئەڤی سەرکردەیێ بزاڤا ئیسلامی گۆت” ئەف برایێن مە راستە دەست کارێ خۆ بەردایە بەری دو رۆژان، بەلێ تنێ دەست پۆستێن خۆ بەرداینە و ھەر دناڤا رێزێن حزبێ ماینە، بۆ لادان یان دەست ژکارکێشانا ھەر کەسەکی ئەڤە ب داخویانیا راگەھاندنێ نابیت، بەلکۆ دڤێت حزب کۆمببیت و سەرکردەیێن بزاڤا ئیسلامی بڕیار بدەن کی بمینیت و کی بھێتە دۆرخستن ل پۆستێ وی.

دکتۆر عەبدولا وەرتی زێدەتر دبێژیت” کەس یێ زێدە نینە ناڤا بزاڤا ئیسلامی دا، لەوڕا ژی پشتی دەست ژکارکێشانا ئەڤان برایێن مە بڕیار بۆ پێداچوونێ ھاتیەکرن و کۆنفڕانسێ حزبێ دێ ھێتە گرێدان و ڤێرێ دێ بڕیار ھێنەدان.

ئەڤرۆ نیۆز، ئەمیر ئەترووشی:

سەرۆکێ بەروەخت یێ پەرلەمانێ کوردستانێ راگەھاند، ھەتا نوکە سێ ئەندامێن نوو دەرچووین بۆ پەرلەمانێ کوردستانێ پەیوەندی ب پەرلەمانی نەکریە و راوێژکارێ قانوونی یێ پەرلەمانێ کوردستانێ ژی راگەھاند کو ھەر دەمێ ٩٠ رۆژ ل سەر روونشتنا ئێکێ دەربازبوون وان سێ ئەندام پەرلەمانان مافێ ئەندامەتیێ نامینیت.

رێڤینک ھروری، سەرۆکێ بەروەخت یێ پەرلەمانێ کوردستانێ بۆ ئەڤرۆ نیۆز دیار کر، ل روونشتنا ئێکێ یا پەرلەمانێ کوردستانێ ل دەمێ خواندنا سووندا قانوونی، سێ ئەندامێن پەرلەمانێ کوردستانێ ب ناڤێ (قوباد تالەبانی، شاسوار عەبدولواحد، شەعبان عەلی شەعبان) ئامادەنەبوون و سووندا قانوونی نەخواندن و ھەتا نوکە ژی ب چو رەنگان پەیوەندی ب پەرلەمانێ کوردستانێ نەکریە و گۆت: ھەتا نوکە ڤان ھەرسێ پەرلەمانتاران ئەگەرێن نە ئامادەبوونا خوە ل پەرلەمانی دیار نەکریە.

د. وەعدی مزوری، راوێژکارێ قانوونی یێ پەرلەمانێ کوردستانێ بۆ ئەڤرۆ نیۆز دیار کر، ل گۆرەی پەیرەوێ ناڤخۆ یێ پەرلەمانێ کوردستانێ یێ نوو، ئەگەر پەرلەمانتارەک بۆ ماوێ ٣٠ رۆژان پەیوەندیێ ب پەرلەمانی نەکەت، مافێ ئەندامەتیێ نامینیت، بەلێ ژ بەر کو د روونشتنا ئێکێ یا پەرلەمانێ کوردستانێ دا روونشتن ڤەکری مایە، لەوما نھا دێ ل گۆرەی پەیرەوێ ناڤخۆ یێ کەڤن سەرەدەری ل گەل وان ھەر سێ ئەندام پەرلەمانێن نە ئامادەبووی ھێتە کرن، ئەو ژی ٩٠ رۆژن و ئەگەر ٩٠ رۆژ بوورین و بەرھەڤ نەبوون، بێگومان وان ھەر سێ پەرلەمانتاران مافێ ئەندامەتیێ نامینیت.