بەرپرسێ پشكا هەلبژارتن یا پارتی دیموكراتی كوردستان راگەهاند: د حوكمەتا داهاتییا ئیراقێدا، بێی كورد سەرۆك وەیزران ناهێتە دانان، حوكمەت ژی بێی كوردان سەركەفتی نابیت.
هەلبژارتنێن ئیراقێ ب سەر 18 بازنەیاندا هاتینە بەلاڤكرن، جەعفەر ئێمینكی، بەرپرسێ پشكا هەلبژارتن یا پارتی دیموكراتی كوردستان گوت» ل دەستپێكی وەسا هاتە دانان كو هەموو ئێك بازنە بیت، دەنگێن زێدەتر بنەمایێ كورسیێن زێدەتر بوو، بەلێ ترسەك دروست بوو كورد پشكدارییەكا كارا د هەلبژارتناندا بكەن، پشكدارییا عەرەبا ژی یا كێم بیت و كورد ببنە زۆرینە».
جەعفەر ئێمینیكی ئەو چەندە ب «تێگەهشتنەكا شاش» هەژمارت و دیاركر» سیستەم ل ئیراقێ ل دەستپێكێ ل سەر بنەمایێ ژیرانە و بەرژەوەندییا ئیراقێ هاتە دانان، بەلێ پاشی دەستكاری هاتە كرن بۆ بەرژەوەندییا پێكهاتەیەكی».
بەرپرسێ پشكا هەلبژارتن یا پارتی دیموكراتی كوردستان ئەوژی دیاركر» شاشییەكا مەزن هاتە كرن و كورسی هاتنە بەلاڤكرن ل سەر چەند بازنەیان، چونكە نابیت بێی سەرژمێری كورسی و بازنە بۆ پارێزگەهان بهێنە دانان، سەرژمێری بۆ وێ چەندێ دهێتە كرن دادپەروەرانە كورسییان بەلاڤ بكەی نەك قانوونێ بۆ مەبەستەكێ راستڤەكەی».
هەرێما كوردستانێ ل هەلبژارتنێن پەرلەمانێ كوردستانێ 2024 ل سەر چار بازنەیێن هەلبژارتنان هاتبوو بەلاڤكرن، جەعفەر ئێمینكی وێ ژی ب كێماسی د دانیت بۆ هەرێما كوردستانێ و دبێژیت» ل هەرێما كوردستانێ ژی ئەو كێماسییە هەیە».
ئێمینكی نموونێ ب وەلاتێ رواندا ل ئەفریقیا دئینیت و دبێژیت» ژ شەڕێ ناڤخوە بۆ وەلاتەكێ چاڤێ وەبەرهێنانا جیهانێ ل سەرە، سیستەمەك دانا هەموو پەرلەمانێ وەلاتی 80 كورسی بن و 53 كورسی بۆ ئێك بازنەی هاتە دانان و باشترە ل ئیراقێ ژی ئێك بازنە بیت بۆ وێ چەندێ دەنگ ببیتە بنەمایێ نوونەرایەتیێ ل پەرلەمانی».
بەرپرسێ پشكا هەلبژارتن یا پارتی دیموكراتی كوردستان دانانا كۆتا بۆ ژنان ل جڤاتا نوونەران ب ڤی شێوەیێ نوكە ب سڤكاتی بۆ ژنان د هەژمێریت و گوت» دڤێت ئەو هەڤڕكێن زەلامان بن بۆ گەهشتن ب زەلامان نەك چەند كورسی بۆ بهێنە دانان».
سەبارەت رۆلێ كوردان د حوكمەتا داهاتی یا ئیراقێدا، جەعفەر ئێمینكی گوت» كورد بەرهەڤن بۆ گوهۆڕینان، ل قووناغا داهاتی، بێی كورد سەرۆك وەزیران ناهێتە دانان، كابینەیا داهاتی ژی یا حوكمەتا ئیراقێ هەكە كورد تێدا نەبن سەركەفتی نابیت، هەروەسا سیاسەتا ئیراقێ ژی بۆ دەڤەرێ بێی كوردان بڕێڤەناچیت».
ب باوەرییا جەعفەر ئێمینكی، هێشتا گوهۆڕینێن دەڤەرێ بەردەوامن و ئەنجامێ وێ گوهۆڕینێ دیارنەبووینە، لەوما چارەسەر وەك ئێمینكی دبێژیت» دڤێت ئیراقێ بزڤرینینە وێ خالا ببیتە دەولەتا دەزگەهان، بلا كورسیێن مە 50 كورسی بن، بەلێ گرنگ ئەوە وەلاتەكێ دەزگەهان هەبیت».
پارتی دیموكراتی كوردستان ل هەلبژارتنێن خولا شەشێ یا جڤاتا نوونەرێن ئیراقێ 175 بەربژار هەنە، ل حەفت پارێزگەهان بەربژار هەنە و ل بەغدایێ ژی پشتەڤانییا بەربژارەكێ كوردێ فەیلی دكەت.

هەولێر، قائید میرۆ

سیاسەتمەدارەكێ كورد ئاماژە ب وێ چەندێ دكەت، هەلبژارتنێن ڤێجارێ د گرنگن و مینا شەڕەكێ مەزنە بۆ هەرێما كوردستانێ، هەروەسا گوت ژی، پێدڤییە كورد د ئەڤان هەلبژارتناندا ب سەركەڤن و تنێ من باوەری هەیە سەرۆك بارزانی دشێت ب ئیرادەیا خوە یا مەزن بەرگریێ ژ خەلكێ كوردستانێ كەت.
ئازاد جوندیانی، سیاسەتمەدارێ كورد بۆ رۆژنامەیا (ئەڤرۆ) گوت» هەر چار سالان جارەكێ هەلبژارتن وەك شەڕییە دڤێت ئەم خوە بۆ بەرهەڤ بكەین، هەلبژارتنێن ڤێجارێ د دەمەكیدانە بەغدا ب هەموو شیانێن خوە یا كار دكەت هەرێما كوردستانێ بچووك بكەت، هەتا هەرێما كوردستانێ نەمینیت، لەوڕا داخواز دكەم ل رۆژا دەنگدانێ هەموو خەلكێ كوردستانێ بچیتە سەر سندووقێن دەنگدانێ و پشكداریێ د پرۆسەیا هەلبژارتنان دا بكەن، هەلبژارتنێن ڤێجارێ گەلەك د گرنگن و ئەركێ هەموو كوردەكییە پشكداریێ تێدا بكەت، مە پێدڤی ب ئیرادەیەكا مەزن هەیە و ئەو ئیرادە ژی ل دەف سەرۆك بارزانی هەیە، چونكە سەرۆك بارزانی ئەزموونەكا دەولەمەند هەیە و سەرۆك بارزانی د هەموو كاودانان بەرگری ژ مافێن خەلكێ كوردستانێ كریە، ل دەمێ بەرهەڤكرنا دەستوورێ ئیراقێ سەرۆكێ ئەمریكا پەیوەندی ب سەرۆك بارزانی كر ل دۆر ناڤێ پێشمەرگەی، سەرۆك بارزانی رازینەبوو وگوتە سەرۆكێ ئەمریكا ئەز رازینابم پێشمەرگە بهێتە هەلوەشاندن و بلا شەرمزاری تەبم نەك شەرمزاری مللەتێ خوە بم».
ئازاد جوندیانی گوت ژی» ئەز ڤان هەلبژارتنان وەك مافەكێ دەستووری و قانوونی نابینم، بەرۆڤاژی ئەڤە ئەركەكە و هەلبژارتنەكا چارەنڤیسسازە بۆ هەرێما كوردستانێ، نەبێژن ئەڤە ئەركە دێ چین دەنگێ خوە دەین، بەلكو سەركەفتنا كوردان د هەلبژارتناندا وەك سەركەفتنێیە د شەڕەكێ مەزندا».
رۆهنكر ژی» ئەزدەمەكێ درێژ ئێكەتی بووم و من ئەزموونەكا مەزن یا ل گەل هەردو ئالییان (ئێكەتی و پارتی) هەی وەك دو هێزێن مەزن، بەلێ ئەو شەڕێ ل پێش مە هەی پێدڤی ب كەسێن خودان باوەر و ئیرادە و دیتنەكا رۆهن هەی ئەوژی تنێ سەرۆك بارزانی یە، چونكە ئەو دشێت ئەڤی كاروانی بڕێڤەببەت و سەركێشییا ئەڤێ پرۆسەیێ بكەت، لەوڕا پێدڤییە ئەم هەموو پێكڤە بچینە سەر سندووقێن دەنگدانێ و دەنگی بدەین بۆ سەركەفتنێ و بەرهنگاربوونا وان پیلانێن دژی هەرێما كوردستانێ دهێنە گێڕان».

سەرۆكێ لیستا پارتی دیموكراتی كوردستان ل بازنەیێ هەولێرێ دوپاتی ل وێ چەندێ كر، هەكە حوكمەتا داهاتییا ئیراقێ سۆزا چارەسەركرنا كێشەیا مووچەیێ فەرمانبەرێن هەرێما كوردستانێ نەدەت، پارتی پشكداریێ د وێ حوكمەتێدا ناكەت.
رێبوار هادی، سەرۆكێ لیستا پارتی ل بازنەیا هەولێرێ بۆ هەلبژارتنێن جڤاتا نوونەرێن ئیراقێ، و ئەندامێ خولا نوكە یا جڤاتا نوونەران ژ فراكسیۆنا پارتی گوت» پێدڤییە د كارنامەیا حوكمەتا داهاتییا ئیراقێدا چارەسەرییەكا بنەڕەتی بۆ مووچەی و بودجەی بهێتە كرن، بودجەیا وەبەرهێنانێ و گەشەپێدانا هەرێمان بۆ هەرێما كوردستانێ بهێتە هنارتن».
هەڤدەم ئاماژە ب وێ چەندێ كر» هەكە حوكمەتا داهاتییا ئیراقێ سۆزا چارەسەركرنا كێشەیا مووچەیێ فەرمانبەرێن هەرێما كوردستانێ نەدەت، پارتی پشكداریێ د وێ حوكمەتێدا ناكەت».
باس ل وێ چەندێ ژی كر» پێشتر بزاڤێن جدی هاتبوونە كرن بۆ چارەسەركرنا كێشەیا مووچەی، بەلێ ژ ئەگەرێ هەبوونا ئەجیندایێن سیاسی ل پشت ڤی بابەتی، ئەو بزاڤ د سەركەفتی نەبوون».
دوپاتكر ژی» ئەركێ سەرەكیێ پەرلەمانتاران بەرگریكرنە ژ مافێن خەلكی و مووچە ژی ئێك ژ مافێن سەرەكی یێن وەلاتییانە».
رۆهنكر ژی» درووشمێ لیستا پارتی دیموكراتی كوردستان بۆ هەلبژارتنێن جڤاتا نوونەرێن ئیراقێ پێك دهێت ژ (هەڤپشكی، هەڤسەنگی و لهەڤكرن) بێی پشكدارییا پارتی، حوكمەت ل ئیراقێ ناهێتە پێكئینان».

دوهی دوشەمبی 3/11/2025، ل پیرمام سەرۆك بارزانی پێشوازی ل شێخ و ماقویلێن عەرەب ل قەزا مەخموورێ كر.
بارەگەهێ بارزانی د بەیاننامەیەكێددا بەلاڤكر» سەرۆك بارزانی خوەشحالییا خوە ب وێ دیدارێ دەبڕی سوپاسییا شێخ و ماقویلێن عەرەبێن سنوورێ قەزا مەخموورێ و دەوروبەرێن وێ كر ژ بەر وی رۆلێ ئەرێنیێ وان بۆ پاراستنا دەڤەرێن خوە و پشتەڤانییا وان بۆ پێكڤەژیانێ و پێگیرییا وان ب ڤی كەلتووری و برایەتیێ د ناڤبەرا كورد و عەرەب و پێكهاتەیێن دی یێن وان دەڤەران».
ل دۆر هەلبژارتنێن داهاتی یێن جڤاتا نوونەرێن ئیراقێ، سەرۆك بارزانی رۆلێ شێخ و ماقویلێن وێ دەڤەرێ ب گرنگ هەژمارت و ئاماژە ب وێ چەندێ كر» گرنگە خەلكێ وان دەڤەران ب گەرمی پشكداریێ د هەلبژارتناندا بكەن و دەنگی ب وی ئالی بدەن كو رۆل هەبوویە د پاراستنا دەڤەرێن واندا، ژ پێخەمەت ئاساییكرنا رەوشا وان دەڤەران و بجهئینانا مادەیا 140 ژ دەستوورێ ئیراقێ».
هەر د وێ كۆمبوونێدا، سەرۆك بارزانی گوهۆرین و ئاستەنگێن پێشبەری پرۆسەیا سیاسییا ئیراقێ و دەڤەرێ و پێشهات و گوهۆرین ب گشتی بۆ شاندێ مێهڤان بەرچاڤكرن.

دوهی دوشەمبی 3/11/2025، مەسرور بارزانی، سەرۆكێ حوكمەتا هەرێما كوردستانێ، پڕۆژەیێ ستراتیژیێ دوسایدیێ حاجی ئۆمەران ڤەكر، د چارچۆڤەیێ رێوڕەسمیدا، سەرۆكێ حوكمەتا هەرێمێ پەیڤەك پێشكێشكر و تێدا دوپاتی ل سەر گرنگییا پڕۆژەی و خزمەتكرنا وەلاتیێن دەڤەرێ كر.
سەرۆكێ حوكمەتا هەرێمێ ئاماژە ب وێ چەندێ ژی كر كو خەلكێ دەڤەرا بالەكایەتی و حاجی ئۆمەران هەژی خزمەتا زێدەترن .
دەقێ پەیڤا سەرۆكێ حوكمەتا هەرێما كوردستانێ:
گەلەك خوەشحالم كو سەرەدانا حاجی ئۆمەران دكەم، كو دەمەكی پایتەختێ شۆڕشا ئیلۆنێ بوو، شوونوارێ بارزانیێ نەمرە، جهێ وان پێشمەرگەیێن قەهرەمانە كو نوكە ئەم بەرهەمێ دەستێن وان دبینین كو ب زەحمەت و وەستیانا وان پێشمەرگەیێن قەهرەمان نوكە مە كوردستانەكا ئازاد هەیە.
جهێ دلخوەشیێیە كو ئەڤرۆ ل ڤێرێ نە بۆ ڤەكرنا پشكەك ژ وێ رێیا كو ب شێوەیەكێ سەردەمیانە و رێكوپێك هاتیە دروستكرن و كەفتییە د خزمەتا وەلاتییاندا. بێگومان خەلكێ ڤێ دەڤەرێ هەژی خزمەتەكا ئێكجار زێدەتر ژ وێ. ئەوا ژ دەستێ حوكمەتا هەرێمێ ژی بهێت ب گۆڕەی شیانان دێ د خزمەتا هەوەدا بین و دێ وەلاتێ خوە زێدەتر پێشئێخین.
ڤێرێ جهەكێ گرنگە، چونكە دەروازەیە ژی ل گەل وەلاتێ مە یێ جیران ئەوژی كۆمارا ئیسلامییا ئیرانییە، كو پێدڤییە بۆمە گرنگیێ ب وان هەڤبەندییان بدەین و ئاسانكاریێ ژی بۆ هاتنوچوونا وەلاتییان بكەین و ژ روویێ بازرگانی ڤە بۆمە گرنگە لڤینا بازرگانی ل گەل وەلاتێن جیران پێشڤەببەین. هیڤیدارم ئەڤ رێیە و هەموو كار و خزمەتگوزاریێن حوكمەتا هەرێما كوردستانێ جارەكادی بكەڤنە خزمەتا وەلاتییان و رەوشا ژیارا خەلكێ كوردستانێ و سەلامەتی و سەربلندییا هەوە ئەركە بۆمە و هیڤییا مەیە.

دیدار/ دلۆڤان ئاكرەیی

بەرپرسێ لقێ پارتی ل مووسل، دیاركر: ل گۆرەی پێشبینیێن مە، نە دوورە پارتی ببیتە لیستا ئێكێ ل پارێزگەها نەینەوا و ژ هەموو ئالییان پتر كورسییان بینیت، ئەڤ چەندە ژی ژ بەر وێ چەندێیە كو بۆ ڤان هەلبژارتنان هەر پارێزگەهەك كریە بازنەیەك و دێ دەنگێن ئالییان بەلاڤ بن. ژبلی هندێ، ل مووسل 20 لیستێن جودا هەنە كو ب سەر 37 ئالیێن سیاسی ڤە بەلاڤ بووینە، هزار و 46 بەربژار ژی هەنە، چ ئالییەك نەشێت دەنگێن خوە یێن بەرێ بیننەڤە، لەوما ئەم دێ شێین ڕێژەیەكا باش یا كورسییان بدەستڤە ئینین.
خەسرۆ گۆران، بەرپرسێ لقێ 14 یێ پارتی دیموكراتی كوردستان ل مووسلێ بۆ رۆژنامەیا (ئەڤرۆ) گوت» كڕینا دەنگان ب شێوەیەكێ بەرفرەهـ ل بەغدا و بەسرا و باژێرێن دی هەیە، و نێزیكە بگەهیتە هەموو دەڤەران، بەربژار هەنە 100 ملیۆن دینار داینە دا دەنگان بكڕیت، لێ پارتی ئەڤ چەندە نینە، بەربژارێن مە پێگیری بڕیارێن لژنەیا هەلبژارتنانە، ئەڤە بۆ پارتی یا ب زەحمەتە كو خەلكێ دی پارەی بۆ كڕینا دەنگان بكاربینیت، لێ ئەم ب هەبوونا دۆزا خۆ دێ دەنگان بدەستڤە دئینین».
بەرپرسێ لقێ 14 یێ پارتی ئەوچەندە ژی گوت»ل وان جهێن میلیشیا لێ هەین، هاتنوچوونا لایەنگرێن مە سنۆردار كرینە، ئەم دێ وێ سنۆرداریێ شكێنین و مە ل مووسلێ كەرنەڤالەكا مەزن گێرا و پتر ژ چار هزار كەسان بەرهەڤ بوون».
گوت ژی»فشارەكا مەزن ل سەر مە هەیە، پشكەك ژ وی خەلكێ كو دەنگدەرێن مەنە، د كەڤنە بن دەستهەلاتا وان كەسێن دژایەتییا وان دكەن و بانگەشەیێ ل بەر وان بچووك دكەن، لێ پێشبینی دهێتە كرن دەنگێن مە ژ یێن هەموو ئالیێن دی پتر بن».
رۆهنكر ژی»ئەم سۆزێ د دەین خزمەتگوزارییان بۆ خەلكێ وان دەڤەران ببەین و مە سۆز دایە وان كو ب رێیا بەربژارێن د هەلبژارتناندا ب سەركەڤن، دێ هەموو داخوازییێن وان دەڤەران بجهـ ئینین».

حەفت ئالیێن سیاسی یێن توركمانی پشتەڤانییا خوە بۆ لیستا 275 یا پارتی دیموكراتی كوردستان بۆ هەلبژارتنێن جڤاتا نوونەرێن ئیراقێ راگەهاند.
د بەیاننامەیەكا هەڤپشكدا حەفت ئالیێن سیاسی یێن توركمانی پشتەڤانییا خوە بۆ لیستا 275 یا پارتی دیموكراتی كوردستان د هەلبژارتنێن داهاتی یێن جڤاتا نوونەرێن ئیراقێدا راگەهاند كو بڕیارە ل 11/11/2025 بهێنە ئەنجامدان.
ئالیێن توركمانی د بەیاننامەیا خوە دا، كو ب ناڤونیشانێ ( بەیاننامەیا ئالیێن توركمانی سەبارەت هەلبژارتنێن ئیراقێ) دەرچووی، دوپاتی ل سەر هەڤبەندیێن دیرۆكی یێن ب هێز د ناڤبەرا گەلێ كوردستانێ و توركماناندا كر، كو هەردەم د چارچۆڤەیێ برایەتیێ و تەبایێدا بوویە.
حەفت ئالیێن توركمانی هەرێما كوردستانێ ب نموونەیا پێكڤەژیانا ئاشتییانە د ناڤبەرا نەتەوە و ئایینێن جودا جودا دا هەژمارت و رۆلێ سەرۆك مەسعود بارزانی بلند هەلسەنگاند د پشتەڤانیكرنا بەردەوەام یا ماف و داخوازیێن توركماناندا.
ئەو حەفت ئالیێن توركمانی كو ئیمزا ل سەر بەیاننامەیێ كری پێك دهێن ژ پارتا گەشەپێدانا توركمانی، پارتا دیموكراتی توركمانی، بزاڤا دیموكراتییا توركمانی، پارتا رزگارییا نەتەوەییا توركمانی، كۆمەلا رەوەشنبیرییا توركمانی، كۆمەلا لێبرالییا توركمانی، پارتا گەزەنگ یا توركمانی كەركووك.
هەر حەفت ئالیێن توركمانی داخوازا ژ هەموو دەنگدەرێن توركمان كر كو دەنگێن خوە بدەنە لیستا 275 یا پارتی دیموكراتی كوردستان، ب وێ هیڤیێ نوونەرێن پراتی ل بەغدایێ بشێن بەرگرییەكا ب هێز ژ ماف و داخوازیێن هەموو پێكهاتەیان بكەن و بەرژەوەندیێن بلند یێن خەلكێ كوردستانێ و قەوارەیێ هەرێما كوردستانێ بپارێزن.

دیدار، هۆشەنگ تاجر:

مامۆستایەکێ زانکۆیێ دیار دکەت، پارتی دیموکراتی کوردستان ب رێیا درووشمێ خوە یێ ڤێجارێ کو ژ سێ پەیڤان پێک دهێت دڤێت ناڤەرۆکەکا نوو بدەتە سیستەمێ فیدرالی ل ئیراقێ و بێگومان تنێ پارتی دشێت شەڕی بۆ مافێن کوردان ل بەغدا بکەت.

د. رێبین سەلام مامۆستایێ زانکۆیێ د دیدارەکا تایبەت دا بۆ رۆژنامەیا ئەڤرۆ دیار کر، بەری هەموو تشتەکێ ئاشکرایە کو ئەڤ هەلبژارتنە ژ بۆ هەموو ئیراقێ گرنگیا خوە هەیە و ب تایبەتی ژی ژ بۆ کوردان، چونکی ئیراق نها د گەلەک ئاریشەیان دایە و سیستەمێ فیدرالی ل ئیراقێ ژی د قەیرانەکا گەلەک مەزن دایە، فیدرالی وەکو خوە ناهێتە بجهئینان و ژ بەر ڤێ یەکێ ژی پارتی ب رێیا درووشمێ خوە یێ هەلبژارتنان دڤێت پەیامەکا ئاشکرا بدەتە ئیراقێ و گۆت: (پارتی دڤێت ب سێ پەیڤێن هەڤسەنگی، هەڤپشکی و لهەڤهاتن ناڤەرۆکەکا نوو بدەتە سیستەمێ فیدرالی ل ئیراقێ، چونکی دەمێ دستوورێ ئیراقێ هاتە دانان دا سیستەمێ ئیراقێ فیدرالی بیت و دستوور ببیتە ژێدەرێ چارەسەریا هەموو پرسێن ل ئیراقێ، مخابن ئەم دبینین رۆژ ب رۆژێ ئیراق ژ سیستەمێ فیدرالی دوور دکەڤیت و بەر ب سیستەمەکێ ناڤەندی ڤە دچیت و بێگومان ئەو یەک دێ بیتە ئەگەرێ مەترسیەکا گەلەک مەزن بۆ ئیراقێ و ب تایبەتی ژی بۆ هەرێما کوردستانێ و پارتی دڤێت رێگریێ ل مەترسیەکا وەسا بکەت).
مامۆستایێ زانکۆیێ ئەو یەک ژی دیار کر، ل ئیراقێ سێ پێکهاتەیێن سەرەکی هەنە، کورد، سوننە و شیعە و دابەشکرنا پۆستێن سەرەکی ئانکو سەرۆک کۆمار، سەرۆکێ حوکمەتێ و سەرۆکێ پەرلەمانی ژی ل سەر بنەمایێ هەر سێ پێکهاتەیان بوویە، لێ مخابن ئەم دبینین کو ئالیێ شیعە یێ رۆژ ب رۆژێ کار دکەن دا ب زۆرینە گەلەک قانوونان دەربخینن و رۆلێ کوردان و سوننەیان کێم بکەن، بێگومان سەرۆک بارزانی هەر زوو هەست ب پیلانا مەترسیا یا ئالیێن شیعە کر و هەلوەستەک توند ژی نیشا دا، چونکی سەرۆک بارزانی گەلەک جاران گۆتیە هەکە فیدرالی وەکو خوە ل ئیراقێ نەهێتە بجئینان دێ ئیراق تووشی گەلەک قەیرانێن مەزن بیت.
د. رێبین سەلام ئەو یەک ژی دیار کر، هەتا نها چو ئالیێن سەرکەفتی ل ئیراقێ نەشیایە کابینا نوو یا حوکمەتێ پێک بینیت، نموونەیا دووماهیێ ژی سەدر بوو، ئانکو رێگری لێ هاتیە کرن و ئالیێن دی ب رێککەفتنەکێ حوکمەت ئاڤا کرن و گەلەک سۆز دانە کوردان و سوننەیان و سۆزێن خوە ژی بجه نەئینان و گۆت: (پارتی دیموکراتی کوردستان دڤێت ڤێجارێ حوکمەتا نوو ب بەرنامە بهێتە ئاڤاکرن، ئانکو بەری حوکمەت بهێتە ئاڤاکرن هزر د چاوانیا بجهئینانا سیستەمێ فیدرالی بکەت و ژ بەر ڤێ یەکێ ژی پارتی درووشمێ هەڤسەنگی، هەڤپشکی و لهەڤهاتن هەلبژارتیە دا کو کورد د کابینا نوو یا حوکمەتا ئیراقێ دا هەڤپشک بن و خوەدان بریار بن).
ناڤهاتی د دووماهیا ئاخڤتنا خوە دا ئەو یەک ژی دیار کر، پارتی شیایە هەتا نها گەلەک پیلانێن ل دژی هەرێما کوردستانێ ژ ئالیێ هندەک هێزێن ل بەغدا ڤە ژناڤ ببەت، ژ بەر ڤێ یەکێ ژی دەنگدەرێن هەرێما کوردستانێ باش دزانن کا پارتی تا چ رادە شیایە مەترسیێن هەی ژناڤ ببەت و گۆت: (کورد دزانن بهێزبوونا پارتی ل بەغدا ئانکو بهێزبوونا ئیرادەیا گەلێ کوردستانێ، ژ بەر ڤێ یەکێ ژی ب سەرکەفتنا پارتی و بهێزبوونا پێگەهێ کوردان ل بەغدا دێ کاروانێ خزمەتێ و ئاڤەدانیێ بەردەوام بیت).

دوهی ئێكشەمبی 2/11/2025، ب بەرهەڤبوونا نێچیرڤان بارزانی، جێگرێ سەرۆكێ پارتی دیموكراتی كوردستان، ئاهەنگا بانگەشەیا لیستا 275 یا پارتی ل سلێمانیێ بڕێڤەچوو.
نێچیرڤان بارزانی د پەیڤەكێدا د وێ ئاهەنگا بانگەشەیێدا گوت» ژ سلێمانیێ سلاڤان بۆ بۆ جەماوەرێ پارتی ل سلێمانیێ و هەلەبجە دهنێرم، هوون پشكەكا گرنگن ژ دیرۆكا پارتی دیموكراتی كوردستان، پارتی ب هەوە یا سەربلندە و ب هەوە دێ سەربلند مینیت».
جێگرێ سەرۆكێ پارتی دیموكراتی كوردستان ئاماژەكر» پارتی خودانا هەوەیە، هوون ژی خودانێن پارتی نە، خودانێن رێبازا بارزانی نە، پارتی سلێمانییە، سلێمانی ژی هەر پارتی یە».
نێچیرڤان بارزانی گوتە جەماوەرێ پارتی ل سنوورێ سلێمانیێ و هەلەبجە» هوون پشكەكا گرنگن ژ كەمپینەیا زێدەتر ژ ملیۆن دەنگان بۆ لیستا 275 یا پارتی دیموكراتی كوردستان، چاڤەڕێنە هەژمارا دەنگێن هەوە ل ئاستێ خەبات و دیرۆكا پارتی بیت ل ڤی باژێری، ل ڤێ دەڤەرێ، ئێك ملیۆن دەنگ بێی هەوە تام تێدا نینە، دڤێت ئێك ملیۆن دەنگ بن».
جێگرێ سەرۆكێ پارتی گوت ژی» من پەیاما ئێك ملیۆن بۆ هەوە ئینابوو، بەلێ دەمێ هەوە دبینم پەیاما من ژ ئێك ملیۆن زێدەتربوو، ئەم ژی بەرهەڤین بۆ وان تەحەدیێن ل ئیراقێ بەرامبەر مە دهێتە كرن، پتشڕاست بن دلخوەشییا هەوە دلخوەشییا مەیە و خەما هەوە ژی خەما مەیە، داخوازیێن هەوە ئەركێن سەر ملێ مەیە، بلا راستییەكێ بێژم ل ڤێ دەڤەرێ نوونەرایەتییا پارتی یا كێمە، بەلێ پشتڕاست بن ژ وێ چەندێ بەرنامەیێ پارتی بۆ ڤێ دەڤەرێ یێ مەزنە».
نێچیرڤان بارزانی دوپاتكر ژی» ب دیتنا مە هەرێما كوردستانێ بێی ڤێ دەڤەرێ یا تمام نینە، پارتی بێی ڤیچ دەڤەرێ یا تمام نینە، ژ بەر وێ چەندێ خەما هەوە خەما مەیە، ئەم ل پارتی نا سەحكەینە كێماسیێن هەردو پارێزگەهێن سلێمانیێ و هەلەبجە و ئیدارەیێن سەربخوە یێن گەرمیان و راپەرین، هەروەسا كێماسی جهێ دلخوەشیێ نینن بۆ پارتی، بەلكو خەمەكا مەزنن بۆ پارتی دیموكراتی كوردستان».
نێچیرڤان بارزانی باس ل وێ چەندێ ژی كر» ئەم وەك پشكەكا خوەشتڤییا كوردستانێ دنێرینە ڤێ دەڤەرێ، پارتی حزبا سەرانسەری كوردستانێیە، پارتی ناوچەرگەری ژ بیركریە، ناوچەگەری ل هزرا پارتی جه نەمایە و نامینیت» .
جێگرێ سەرۆكێ پارتی دیموكراتی كوردستان ئاماژە ب وێ چەندێ ژی كر» پارتی بوو جارا ئێكێ شۆڕش ل سەرانسەری كوردستانێ كر، ژ بەر وێ چەندێ هیچ پارتییەك ب جوداهی نانێریتە هیچ جهەكێ كوردستانێ، دەمێ جادەیەك ل هەلەبجە، یان ل زاخۆ دهێتە دروستكرن ئەم پێ دلخوەش دبین».
راگەهاند ژی» ئەسمانێ سلێمانیێ پشكەكا جوانێ كوردستانێیە، هەكە گەشتێن ئەسمانێ سلێمانیێ د كێم بن، ئانكو گەشتێن ئەسمانی ل كوردستانێ كێم دبن, ئەسمان و ئاخا مە ئێك ناڤ هەیە ئەوژی كوردستانە».
نێچیرڤان بارزانی دیاركر ژی» نابیت زۆنا كەسك و زەر هەبن، دڤێت ئێك زۆن هەبیت ئەوژی زۆنا كوردستانێیە، راستە كێماسی هەنە، رژێما بەعس پترییا جهان وێرانكرن، شەڕێ داعشێ كاروانێ ئاڤەدانكرنێ و پێشئێخستنا كوردستانێ سست كر، هێرش كرە سەر پێشمەرگەی، بەلێ پرسیار نەكر خوونا كیش هەوە یا كەسكە و خوونا كێش هەوە یا زەرە، هەروەسا پێشمەرگەیێن قەهرەمان هەموویان پێكڤە بەرگری ژ كوردستانێ كر و ئاڤەدانییەكا مەزن ل كوردستانێ دروست بوو، بەلێ هێشتا ب دلێ مە نینە و دڤێت ب لەزتر و زێدەتر و باشتر بكەین».
جێگرێ سەرۆكێ پارتی دیموكراتی كوردستان دوپاتكر ژی» خەلكێ كوردستانێ دیدەڤانن، ل هەر جهەكێ پارتی هەبوون هەبیت، ئاڤەدانی و خزمەتگوزاریێن زێدەتر دێ هەبن، پارتی ئەڤە ب كریار سەلماندیە ـ پارتی باوەرنامەیا ئاڤەدانیێ ژ خەلكێ كوردستانێ وەرگرتیە».
نێچیرڤان بارزانی گوت ژی» دەمێ وێ چەندێ هاتیە سلێمانیێ وەك جاران بزڤریت و پێشەنگا زانست و مەعریفە و دەستپێشخەریێن سیاسی و رەوشەنبیری بیت. سلێمانیێ ل چەرخێ 20 باژێرەكێ پێشەنگ بوو، رۆلێن وێ پشكداربوون د دامەزراندن و دیاربوونا قوتابخانە و فێربوونێ. دەزگەهێ لەشكری، دادگەها دەولەتێ، ئێكەمین زانكۆ، ئێكەمین بزاڤا رەوشەنبیری، لڤینا سیاسی و ئەدەبی و هونەری، دژی ستەماكاران بوون».

مەسرور بارزانی، جێگرێ سەرۆكێ پارتی دیموكراتی كوردستان ل ئاهەنگا بانگەشەیا لیستا 275 یا پارتی دیموكراتی كوردستان ل شەقلاوە گوت: دیرۆكا پارتی یا دیارە، چیایێ سەفین دیدەڤانێ داستانێن پارتییە، كوردستان ل پشتا مە بیت، دێ هەردەم بەردەوام بین د داخوازكرنا مافێن خەلكێ كوردستانێ و هیچ هێزەك نەشێت مە ب چەمینیت، ئەڤ باژێرە باژێرێ پێكڤەژیانێ یە، بیر و باوەرێن ئایینی یێن جودا تێدا هەنە، شانازیێ دكەین كوردستان وەلاتێ پێكڤەژیانێیە، رێزگرتن ل هەموو ئایین و نەتەوەیان جهێ شانازیێیە و حەقێ هەوەیە ژی شانازیێ ب وی رەوشتێ خوە بكەن.
مەسرور بارزانی باس ل وێ چەندێ ژی كر» گەلەك گرنگە پشكداریێ د ڤان هەلبژارتناندا بكەین، پارتی ل سەر ئاستێ كوردستانێ هیچ هەڤڕكەك نەمایە، دڤێت ڤێجارێ بچینە بەغدا هەڤڕكیێ بكەین، ئالیێن نەحەز هەردەم بزاڤا راوەستاندنا پارتی كریە، بزاڤا وێ چەندێ كریە پارتی سەركەفتی نبەیت و نەگەهیتە ئارمانجێن خوە، ل ڤێرێ هەر چ ژ دەستێ وان هاتی كر، بەلێ نەشیان مە ب راوەستینن، ئەڤجا پەنا برە بەر بەغدا، پەنا برە بەر دروستكرنا هەڤپەیمانیێ ل گەل وان ئالیێن كو هزرا شۆڤینییەتی د سەرێ واندا مایە، بۆ وێ چەندێ پارتی بشكێنن وئامادەبوون كوردستانێ بشكێنن، ڤێجارێ ژی دڤێت ئەم بچین رێگریێ لێ بكەین و نەهێلین هیچ هێزەك ل هیچ جهەكێ ڤی وەلاتی ببیتە بەربەست و رێگر د سەركەفتنا پارتی دا».
جێگرێ سەرۆكێ پارتی دیموكراتی كوردستان ئاماژە ب وێ چەندێ ژی كر» ل سەر ئاستێ ناڤخوە، گەلەك ئالییان گەلەك بزاڤ كرن چاڤ ل پارتی دیموكراتی كوردستان بكەن، بەلێ نەشیان، وان خواست پارتی بشكێنن، چونكە ب دیتنا وان سەركەفتنا پارتی نەمان وان تێدایە، پارتی چو جاران بۆ خوە كار نەكریە، پارتی ئامانج بوویە، بەلكو ئامانجا خەلكێ كوردستانێ و ئاخا كوردستانێ یە، پارتی هەردەم بەرهەڤ بوویە خوە پێخەمەت سەرئێخستنا كوردستانێ بەخت بكەت».
مەسرور بارزانی زێدەتر گوت» پارتی ب كریار نیشا خەلكێ كوردستانێ دایە كو دشێت چ بكەت، بەلێ ئالیێن دی ژ بلی ئاخڤتنان چو دەستكەفت بۆ خەلكێ كوردستانێ نەبوون، هەكە جارەكێ شانازیێ ب دەستكەفتەكی بكەن ل بن سیبەرا ئالایێ پارتی دا پشكدار بووینە د ڤی دەستكەفتی دا».
جێگرێ سەرۆكێ پارتی دیموكراتی كوردستان ئەوژی راگەهاند» نەچارم هندەك رۆهنكرنان بدەم، گەلەك دژی مە ئاخڤتن دهێنە كرن و بوختان دژی مە دهێنە كرن، كو پارتی دیموكراتی كوردستان جوداهیێ دكەت ل سەر ئاستێ كوردستانێ، بەلێ پارتی خوە ب خودانا هەموو كوردستانێ دزانیت، بهوست بهوست ئاخا كوردستانێ ئاخا پارتییە، لەوما پارتی خوە ب بیانی نزانیت و بلا هیچ كەسەك وەسا هزر نەكەت خودانێ پشكەكا كوردستانێیە و پارتی بیانییە، بەلكو پارتی خودانا هەموو كوردستانێیە».
ئاماژە ب وێ چەندێ ژی كر» ئەو ئالیێ دبێژیت مە نەهێلایە حوكمەت بهێتە پێكئینان، داخوازا پۆست و ئیمتیازاتان بۆ خوە كریە».
ئەوژی گوت» حوكمڕانی ب دز و گەندەل و مافیا ناهێتە كرن، حوكمڕانی ب خەلكێ دلسۆز دهێتە كرن».
راگەهاند ژی» ئازادی ئەوە تو بۆ مافێ نەتەوەیەكی خەباتێ بكەی، ئازادی ئەوە بۆ ئازادییا ئاخێ خەباتێ بكەی، ئازادی ئەو نینە ب تۆپ و تانكا بچیە سەر هۆتێلەكێ یان بچیە سەر ئۆپۆزسیۆنا خوە. ئەوێن باسێ ئازادیێ دكەن، دڤێت ئەو ب خوە ژی د ئازاد بن، ئەوێن باسێ ئازادیێ دكەن دڤێت خودان ئاخڤتن بن وكرێگرتی نەبن».