ئەڤرۆ نیوز، مەحمود نھێلی:

بەری دەمەکێ کێم فرۆکەیێن تورکیا چیایێ ھنداڤی گوھەرزێ یێ سەر ب ناحیا دێرەلۆک ڤە بوردومانکرن.

ژێدەرەکێ ژ گوندێ گوھەرزێ بۆ ئەڤرۆ نیوز دیار کر کو ئەڤ شەڤ ٣\١٢\٢٠١٨ ل دەمژمێر پێنج و چل خولەک فروکەیێن تورکیا چیایێ ھنداڤا گوندێ وان بوردومانکرن و گۆت : ئەڤ بوردومانە گەلەک یا نێزیکی گوندی بوویە و پەنجەرێن خانیان ل دێرەلۆکی و گوندێن دەوروبەران ھەژیانە و بوویە ئەگەرێ ترسێ ل جەم ھاولاتیان تایبەتی ئاکنجیێن گوندێن دەوروبەران. تا نوکە زیانێن ڤێ بوردومانێ نەھاتینە زانین.

ئەڤرۆ نیۆز، ئەمیر ئەترووشی:

پەرلەمانێ عیراقێ بریار دایە کۆژمەکێ مەزن یێ پارەی ژ بۆدجەیا سالا ٢٠١٩ بوو ئاوارەیێن ل پارێزگەھا دھۆکێ دژین دەستنیشان بکەن و ب ڤێ چەندێ فشارا ئاوارەیان ل سەر دھۆکێ کێمتر لێ بھێت.

بەشیر حەداد، جێگرێ سەرۆکێ پەرلەمانێ عیراقێ د سەرەدانا خوە دا بۆ پارێزگارێ دھۆکێ دیار کر، ئەم ب رژدی یێ کاردکەین بۆ ھندێ ھاریکاریێن دارایی پێشکێشی وان ئاوارەیێن ل سنوورێ پارێزگەھا دھۆکێ دا دژین تەرخان بکەین و بۆدجەیا سالا ٢٠١٩ مە بزاڤ کریە بەشەکێ پارەی بۆ ڤێ یەکێ تەرخان بکەین و ئەڤ یەکە ژی دێ فشارا ئاوارەیان ل سەر دھۆکێ کێمتر لێ کەت.

ئاشکرا ژی کریە کو ل نێزیکی دێ ڤی پرۆژەی ل گەل وەزارەتا کۆچ و کۆچبەرێن عیراقێ گەنگەشەکەین و ب رژدی کارکەین بۆ بجھئینانا ڤێ بریارێ.

ئەڤرۆ نیۆز، ئەمیر ئەترووشی:

رێڤەبەرێ گشتیێ کارەبا پارێزگەھا دھۆکێ راگەھاند، حۆکمەتا ھەرێما کوردستانێ دێ ٤٠ ملیۆن لیترێن دی یێن گازوایلێ بۆ وێستگەھا کواشێ ھنێریت و یەکەیەکا نوو یا کارەبێ دێ کەڤیتە کاری و ٢٠٠ مێگاواتێن دی دەتە پارێزگەھا دھۆکێ.

ئەندازیار محەمەد سالح، رێڤەبەرێ گشتیێ کارەبا پارێزگەھا دھۆکێ بۆ ئەڤرۆ نیۆز دیار کر، ئەڤرۆ رۆژا دووشەمبی ٣/١٢/٢٠١٨، وەزارەتا سامانێن سرۆشتی یا حۆکمەتا ھەرێما کوردستانێ رازەمەندیا خکوە دەربریە بۆ ھنارتنا ٤٠ ملیۆن لیترێن گازوایلێ بۆ وێستگەھا کواشێ یا بەرھەمئینانا کارەبێ و ب ڤێ گازوایلێ دێ وێستگەھەکا دی یا کارەبێ کەڤیتە کاری و ٢٠٠ مێگاواتێن دی یێن کارەبێ ھێنە بەرھەمئینان و ل سەر کارەبا پارێزگەھا دھۆکێ زێدەتر لێ ھێت و دەمژمێرێن کارەبێ ژی دێ زێدەتر لێ ھێن.
ئەو یەک ژی دیار کر کو ئەم نەدشیاین بەھرا خوە یا درۆست یا زڤستانێ بۆ پارێزگەھا دھۆکێ کو رێژا ٢٦% ژ تۆرا کارەبا گشتی یا ھەرێمێ وەربگرین و بەری نھا ب تنێ ٥٠ میگاواتێن کارەبێ ژ کواشێ بۆ پارێزگەھا دھۆکێ دھاتن، بەلێ نھا ئەو کارەبە دێ زێدەتر بۆ دھۆکێ ھێت و گەھیتە ٢٠٠ ھەتا ٢٢٠ مێگاواتێن کارەبێ کو تایبەت دێ بۆ دھۆکێ بن و دێ شێین رێژا خوە یا پێدڤی ژ تۆرا گشتیا کارەبا ھەرێمێ وەربگرین.
ئەندازیار محەمەد سالح، رێڤەبەرێ گشتیێ کارەبا پارێزگەھا دھۆکێ ئەو یەک ژی نە ڤەشارت کو د ماوێ ڤان دوو رۆژان دا ئەڤ رێژەیا گازوایلێ دێ گەھیتە پارێزگەھا دھۆکێ و دێ وێستگەھەکا نوو یا کارەبێ ل کواشێ کەڤیتە کاری و گۆت: بۆ ھەر یەکەکا کارەبێ ل کواشێ نێزیکی ٨٦٣ ھزار لیتر پێدڤی نە بۆ بەرھەمئینانا کارەبێ.