ئەڤرۆ نیوز، رەمەزان ھەرنی:
تەحینا ئاشێ ئاڤێ ل دەڤەرا ئاکرێ خواستا کرین و فرۆتنێ زێدەتر ھەیە ژ تەحینا ب ئاشێ کارەبێ دھێتە دروستکرن و تەحینا خۆمالیا دەڤەرێ دچیتە ژ دەرڤەی ھەرێما کوردستانێ ژی.
سلێمان عەبدولرەحمان خودانێ ئاشێ تەحینا خۆمالی ل دەڤەرا ئاکرێ بۆ ئەڤرۆ نیوز دیار کر کو تەحینا ئاشێ ئاڤێ ل باکرمان ب کۆنجیا دھێتە دروست کرن و چو کەرەستێن دی ل گەل ناھێتە تێکەلکرن وەکو گویز و باھیڤ، لەوڕا خواستەکا مەزن ل سەر ھەیە ل دەڤەرا بەھدینا ب گشتی و ھەتا دچیتە پارێزگەھێن ھەولێر و سلێمانیێ ژی وان کریار ھەنە و گۆت: “ھەکە بەرھەمێ خاف ل بەر دەست بیت دەمێ شەڤ و رۆژەکا ٣٠٠ کیلۆیێن تەحینێ بەرھەم دئینین تەحینا خوماڵی کیلویێ ب ٩٠٠٠ ھزارا دیناران د فرۆشن و دکاندار ب ١٠ ھزاران د فروشن”.
ناڤھاتی ئاماژە دا وێ چەندێ کو وەلاتیێن دەڤەرێ کۆنجیان بۆ ئاشی دئینن و د سرایێ دا دمینن، دو سرا ھەنە ئێک بۆ وەلاتیان و ئێک بۆ خودان مارکێتا و گۆت: “سالانە داخۆازی بۆ تەحینا باکرمان ل دەڤەرا ئاکرێ ژ دەرڤەی ھەرێما کوردستانێ ژی دھێن”.

ئەڤرۆ نیوز، رەمەزان ھەرنی:
بەرپرسێ بنگەھێ چاڤدێرییا بازرگانی ل ئاکرێ بۆ ئەڤرۆ نیوز دیار کر کو وان 34 تەنێن کەرەستێن دەم ب سەرڤەچووی د ڤێ ھەیڤێ دا ژ ناڤبرینە و گۆت: “د ئەڤ سالە دا ژی 110 تەنێن کەرەستێن دەم ب سەرڤەچووی ل ئاکرێ ھاتینە ژناڤبرن”.
شەھاب یاسین، بەرپرسێ بنگەھێ چاڤدێرییا بازرگانی ل ئاکرێ دیار کر کو ژ وان 34 تەنێن کەرەستێن دەم ب سەرڤەچووی یێن د ڤێ ھەیڤێ دا ھاتینە ژناڤبرن 30 تەن کەرەستێن خوارنێ و ڤەخوارنێ بوون و چار تەنێن دەرمانان بوون.
ناڤھاتی ئاماژە دا وێ چەندێ کو ژ دەستپێکا سالا 2018ێ و ھەتا نوکە 110 تەنێن کەرەستێن دەم ب سەرڤەچووی ل ئاکرێ ھاتینە ژناڤبرن ژ وان 96 تەنێن کەرەستێن خوارنێ و ڤەخوارنێ و جوانکاریێ بوون و 14 تەنێن دەرمانان بوون.

ئەڤرۆ نیوز، ئەمیر ئەترووشی:
رێڤەبەرێ سەخبێری و پاراستنا رێک و پرا ل پارێزگەھا دھۆکێ راگەھاند کو د چەند سالێن بۆری دا گەلەک زیان ژ ئەگەرێ بارانێن زۆر ب وەلاتیێن دھۆکێ کەفتیە و ئەڤ سالە ژی باران زوو بارینە و ب رێژەیێن مەزن دھێن، لەوما وان بەرھەڤی کرینە بۆ دووبارەنەبوونا زیانێن لەھیان.
دێوالی حەمێ بریندار، رێڤەبەرێ سەخبێری و پاراستنا رێک و پرا ل پارێزگەھا دھۆکێ، بۆ ئەڤرۆ نیوز دیار کر کو وان بەرھەڤی و ئامادەکاریێن باش بۆ وەرزێ زڤستانا ئەڤ سالە کرینە بۆ ھندێ ئەو زیانێن ل چەند سالێن بۆری ژ ئەنجامێ پەیدابوونا لەھیان ب وەلاتیان کەفتین دوووبار نەبنەڤە و گۆت: “زێدەباری ھندێ ژی مە حەفت تیمێن تەنگاڤیان پێکئیناینە کو ل دەمێ داخستنا رێێن سەرەکی ب بەفرێ و بارانێ خەلکی ب پارێزن و نەھێلن چو رێ بھێنە داخستن”.
ئیسماعیل مستەفا، بەرپرسێ راگەھاندنا سەرۆکاتیا باژێرڤانیا دھۆکێ بۆ ئەڤرۆ نیوز دیار کر ل دوو جھێن رووبارێ ھشکەرۆ یێ دھۆکێ ئاریشە ھەنە کو ل وان جھێن مەترسیا پەنگینا ئاڤێ ھەیە و ئەو ھەر دو جە دبنە ئەگەر مەترسیێن پەیدابوونا لەھیان پەیدا ببن، لەوما مە دوو پرۆژە ل وان جھان بجھئیناینە، چونکو ئاستێ ئاڤێ ل وان ھەر دو جھان یێ نزمە و ئەڤ ھەر دو پرۆژە دبنە ئەگەر کو مەترسیێن دووبارەبوونا لەھیان کێمتر لێ بھێن.
ناڤھاتی ئاماژە دا وێ چەندێ کو ئێک ژ وان پرۆژەیان نێزیکی ٤٠٠ مەترانە ب درێژی و ٤ مەترا یێ بلندە و دیورەکێ پالپشت ھاتیە چێکرن و ل نێزیکی یانا دھۆک یا وەرزشی ژی پرۆژەیەکێ بچووک ل سەر ھشکەرۆی ھاتیە بجھئینان و ئەڤ ھەردوو پرۆژە ب کۆژمێ ٢٥٠ ملیۆن دیناران ھاتینە بجھئینان