ئەڤرۆ نیوز، لەزگین جوقی:

سەرۆکێ جڤاتا قەزا شنگالێ دیار کر کو ئیدارا شەرعی یا شنگالێ چو بەغدا بۆ ئەنجامدانا چەندین کۆمبوونان دگەل پەرلەمان و حوکمەتا عیراقێ.

وەیس نایف ، سەرۆکێ جڤاتا قەزا شنگالێ بۆ ئەڤرۆ نیوز دیارکرکو ئەو دێ دگەل لیژنا هەماهەنگیێ یا پارێزگەھان ل پەرلەمانێ عیراقێ کۆمبن و دێ داخوازێ ژی کەن ئیدارا نەشەرعی بھێـتە ھەلوەشاندن و رێ بھێـتە دان ئیدارا شەرعی بزڤریتە شنگالێ، ھەروەسا ژی دێ کێشێن شنگالێ دەینە سەرۆکاتیا پەرلەمانێ عیراقێ و پیدڤیە حوکمەتا عیراقێ خوە ل شنگالێ بکەنە خودان ونەھێلن ئیدارێن نەشەرعی ل شنگالێ کاربکەن و ئەو کەس و لایەن ژی بھێنە سزادان یێن سەرپێچی ل سەر قانوون و دستوورێ عیراقێ ل شنگالێ دکەن.

ناڤھاتی ئەو ژی دیار کر کو ب ھیچ شێوەیەکی ئەو ل سەر رەفتارێن وان کەس و لایەنان بێدەنگ نابن یێن جڤاتەکا نەشەرعی ل شنگالێ دروستکرین و گۆت: “ئەم د رژدین ل سەر ھەلوەشاندن و نەمانا جڤاتا نەشەرعی یا شنگالێ ھاتیە دانان”.

ئەڤرۆ نیوز، قائید میرۆ:

ھژمارەک گوندێن کوردان ل قەزا دوبزا سەر ب کەرکووکێ ژبەر مەترسیێن داعش و چەکدارێن نەنیاس ھاتنە چۆلکرن و بەرپرسەکێ پارتی ژی ئاشکراکر، چەندە رۆژەکە ھەوەکا پشکنینا مالێن کوردان ل سنورێ قەزا دوبز ھاتیە دەستپێکرن.

لوقمان عەلی، بەرپرسێ لیژنا ناوچا سەرگەڕان بۆ ئەڤرۆ نیوز راگەھاند” چەند رۆژەکە ھێزێن پۆلیسێن فیدڕال ل سنورێ ناحیا سەرگەڕان یا سەر ب قەزا دوبز دەست ب پشکنینا مالێن دەڤەرێ کریە، بتایبەتی مالێن کوردان و مەرەم ژڤێ ھەوا پشکنینێ دەست بسەرداگرتنا چەکێ وەلاتیێن کوردە و ھەر وەلاتیەکێ کورد چەک ھەبیت ژبلی دێ چەکێ وی ھێتە گرتن سۆزنامەکژی دێ لێھێتە وەرگرتن ئیدی نابیت چەک ھەبیت.
ئەڤی بەرپرسێ پارتی زێدەتر گۆت” ئەڤە چەند رۆژەکە ل گوندێن سەر ب ناحیا سەرگەڕان مالێن کوردان تێنە پشکنین و دوھی رۆژا دوشەمبی ھەوا لێگەڕیانێ ل سەنتەرێ ناحیا سەرگەڕانژی بەردەوامی ھەبوویە.
لوقمان عەلی ئاماژەکر” ھەر ل سنورێ قەزا دوبز ڤێ دوماھیێ لڤینێن چەکدارێن داعش و چەکدارێن نەنیاس زێدەکریە و وەلاتیێن کورد یێن نێزیکی پازدە گوندێن دەڤەرێ مال و حالێن خۆ بجە ھێلاینە و ژبەر مەترسیا داعش و عەرەبێن شۆڤێنی نەشێن ڤەگەڕن.