ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ ره‌وشا سه‌قاى ل پارێزگه‌هين هه‌رێما كوردستانێ وكه‌ركووكێ ل ئه‌ڤرۆ وسوباهى راگه‌هاند.
ل دۆر ره‌وشا سه‌قايێ ئه‌ڤرۆ ئه‌ينى 30/11/2018 رێڤه‌به‌ريا ناڤبرى ئاماژه‌كر كو ئه‌ڤرۆ دێ به‌رده‌وام باران بيت ل گه‌ل بارينا به‌فرى ل ده‌ڤه‌رێن چيايى.
سه‌باره‌ت سه‌قايێ سوباهى شه‌مبيێ 1/12/2018 ل پارێزگه‌ها دهۆكێ، دياركر” ئه‌گه‌رێ بارانه‌كا ب هێز ل گه‌ل بريسيان يا هه‌ى، هه‌روه‌سا به‌فر ژى دێ ل ده‌ڤه‌رێن چيايى باريت”.
ئەڤرۆنيوز ، زنار تۆڤی:
بریارە ل رۆژا ئێكشەمبیا بهێت 2/12/ 2018 دكتۆر بەشیر حەداد جێگرێ دويێ يێ سەرۆكێ پەرلەمانێ عیراقێ سەرەدانا پارێزگەها دهۆكێ بكەت و د وێ سەرەدانێ دا دێ ل گەل پارێزگارێ دهۆكێ و كاربدەستێن ڤێ پارێزگه‌هێ كۆم بیت و دێ كۆمەكا بابەتان د وێ كۆمبوونێ دا هێنە بەحسكرن.
دكتۆر دیار تەیب، ئەندامێ پەرلەمانێ عیراقێ ژ فراكسیۆنا پارتی دیموكراتی كوردستان بۆ ئەڤرۆنيوز دیاركر” ل ئێكشەمبیا بهێت جێگرێ سەرۆكێ پەرلەمانێ عیراقێ دكتۆر بەشیر حەداد ل گەل شانده‌كێ پەرلەمانتارێن عیراقێ یێن پارێزگەها دهۆكێ و دبیت هندەك پەرلەمانتارێن عەرەب یێن پارێزگەها نه‌ينه‌وا ژی بەرهەڤ ببن و دێ ل گەل كارگێریا پارێزگارێ دهۆكێ كۆم بن و دوێ كۆمبوونێ دا دێ كۆمەكا بابەتان هێنە بەحسكرن”.
ديارى گۆت ژى” بابەتێ ئێكێ د وێ كۆمبوونێ دا دێ بەحسێ بۆمبەبارانكرنا فرۆكە و تۆپخانێن له‌شكرێ توركی بۆ سەر دەڤەرێن سنۆری یێن پارێزگەها دهۆكێ هێتە بەحسكرن، ژ بۆ وێ چه‌ندێ ميكانيزمه‌كێ ببینین كو گیانێ وەلاتیان بهێتە پاراستن ژ تۆپبارانكرنا فرۆكان و دیسا دێ بەحسێ قەرەبۆكرنا وەلاتیێن زیان ڤێ كەفتیێن ژ ئەگەرێ بۆمبەبارانكرنا فرۆكان هێتە بەحسكرن، هەروەسا د وێ سەرەدانێ دا دێ بەحسێ رەوشا وان ئاوارێن ل پارێزگەها دهۆكێ دژین هێتە كرن، كو دڤێت ب رێیا بوودجێ عیراقێ هاریكاریا ئاوارێن دهۆكێ بهێتە كرن، تاكو بشێن ڤەگەرنە سەر جه و وارێن خوە و دیسا دێ ب چو رێ شێین خزمەتا وان كەین، هەروەسا د وێ كۆمبوونێ دا دێ دانوستاندن ل سەر بابەتێ خواندنا قوتابیێن زانكۆیا مۆسل ل زانكۆیێن پارێزگه‌ها دهۆكێ هێتە گەنگەشەكرن، ژ پێخەمەت زانكۆیێن پارێزگەها دهۆكێ قوتابیێن پارێزگەها منه‌ينه‌وا ڤەحەوینن و قوتابیێن وان ل دهۆكێ بخوینن، ئەڤ چەندە دێ هێتە كرن بۆ هندێ كو حوكمەتا فیدرالی هندەك چارەسەریێن گۆنجای ببینیت بۆ ڤان بابەتان ب رێیا پەرلەمانی، ب تایبەتی ژی وان بابەتێن مەزاختنێ یێن پارێزگەها دهۆكێ ل وان ئاواران دكەت یێن كو ل پارێزگەها دهۆكێ دژین، چونكی پتريا وان مەزاختنان كارگێریا پارێزگەها دهۆكێ لێ دكەت، لەوما ئەم دێ بزاڤێ كەین، كو حوكمەتا عیراقێ وان مەزاختنان بكەت، هەر چەندە حوكمەتا عیراقێ دكەت ژی، لێ وەكو پێدڤی ناكەت و دڤێت حوكمەتا فیدرالی وان مەزاختنان ب ستوویێ خوە ڤە بگریت.
ئه‌ڤرۆنيوز:
شيره‌تكارێ جڤاتا ئاسايشا هه‌رێما كوردستانێ مه‌سرور بارزانى پێشوازى ل ژيل دى كاركۆڤا رێكخه‌رێ كاروبارێن دژه تيرۆرێ ل ئێكه‌تيا ئه‌ورۆپى ورامۆن بليكوا باليۆزێ ئێكه‌تيا ئورۆپى ل عيراقێ كر.
د وێ ديدارێ دا، مه‌سرور بارزانى به‌حسێ شه‌رێ داعشێ ودووباره په‌يدابوون وزێده‌بوونا لڤينێن داعشێ وئه‌گه‌رێن وێ چه‌ندێ كر وراگه‌هاند، سيسته‌مێ سياسى يێ كارپێكرى وگه‌نده‌لى ودابين نه‌كرنا خزمه‌تگوزاريێن بنه‌ره‌تى ئه‌گه‌رن وئاماژه ب به‌رپرسياره‌تيا جڤاكێ نێڤده‌وله‌تى كر بۆ رێ گرتنێ ل تيرۆرستان.
هه‌ر د وێ ديدارێ دا هه‌ماهه‌نگى وهاريكارى دناڤبه‌را هه‌رێما كوردستانێ وئێكه‌تيا ئورۆپى ب تايبه‌تى ل شه‌رێ تيرۆرستان دووپاتى ل سه‌ر هاته كرن ژ وێ چه‌ندێ كو شه‌رێ دژى داعشێ شه‌ره‌كێ جيهانى يه وتنێ گرێداى ده‌ڤه‌ره‌كێ يان لايه‌نه‌كى نينه.
مه‌سرور بارزانى به‌حسێ وان كه‌نال وسوشيال ميديانه كر كو داعش بۆ كاريگه‌ريێ ل سه‌ر خه‌لكى مفاى ژێ دبينيت.
هه‌ر دوێ ديدارێ دا باليۆزێ ئێكه‌تيا ئورۆپى ل عيراقێ رۆناهى خسته سه‌ر دانوستاندنێن به‌رفره‌هكرنا هاريكاريێن ئێكه‌تيا ئورۆپى بۆ هه‌رێما كوردستانێ دبوارێ رێكخستن وچاكسازيكرنێ دناڤ هێزێن ئه‌منى دا، په‌يوه‌نديێن دناڤبه‌را هه‌رێما كوردستانێ وحوكمه‌تا عيراقى يا نوو ته‌وه‌ره‌كێ دى يێ ديدارێ بوو.
بەرواری بالا ، زنار تۆڤی:
هەر چەندە ئەڤ سالە وەرزێ سەرمایێ دەست پێکریە و هێشتا حوکمەتێ گازا سپی ل سەر قوتابخانێن سنۆرێ ناحیا کانی ماسێ به‌لاڤ نەکریه، لەوما قوتابخانێن ڤێ دەڤەرێ پێدڤی ب گازێ يا هه‌ى، وەلاتیەک ژى گازێ بۆ هەموو قوتابخانێن ڤێ دەڤەرێ دابین دکەت.
سەربەست سەبری، رێڤەبەرێ ناحیا کانی ماسێ بۆ ئەڤرۆنيوز دیارکر” وەلاتیەکى ب ناڤێ” حەسەن مستەفا بناڤی” کو خودانێ بانزینخانا بناڤی یە ل دهۆکێ10هزار لیترێن گازا نەفتا سپی وەکو هاریکاری و بێی بەرامبەر بۆ هەموو قوتابخانێن سنۆرێ ناحیا کانی ماسێ دابینکرینە، کو هژمارا وان دبنە 25 قوتابخانە و ئەڤرۆ چارشەمبی هەر قوتابخانەکێ 400 لیترێن گازێ وەرگرتن و هەتا رادەکێ باش ئەڤ هاریکاریە دێ مفایەکێ گەهینیتە قوتابیێن ڤێ دەڤەرێ و دێ بۆ ده‌مه‌كێ درێژ وان ژ سەرما زڤستانێ پارێزیت”.
گۆت ژی” ئەم دخوازین کەسێن وه‌كو مستەفای زێدە ببن و بشێن ب ڤی رەنگی هاریکاریا قوتابیێن سنۆرێ ناحیا کانی ماسێ بکەن، چونکی کارێن ژ ڤی رەنگی دێ خزمەتا باش بۆ قوتابیان و پرۆسا پەروەردێ ل ڤێ دەڤەرێ کەت”.
ئه‌ڤرۆنيوز:
جێگرێ سه‌رۆك وه‌زيرێن عيراقێ بۆ كاروبارێن ئابوورى ووه‌زيرێ دارايى، فوئاد حسێن ئه‌ڤرۆ چارشه‌مبى 28/11/2018 ل گه‌ل تاكيشى ئۆكۆماتۆ رێڤه‌به‌رێ گشتى يێ كۆمپانيا سۆميتۆمۆ بۆريشن يا يابانى كر.
د كۆمبوونه‌كێ دا شاندێ مێهڤان كورتيه‌ك ل دۆر سروشتێ كارێ كۆمپانيا خوه پێشكێش كر كو ل سالا 1960 ده‌ست ب كارێ خوه كريه وچه‌ندين به‌رهه‌مێن گرنگ خستيه دناڤ بازارێ عيراقێ دا ب تايبه‌تى ژ روويێ به‌رهه‌مێ كانزايى وئه‌گه‌رێن ڤه‌گوهاستنێ وژيرخانه وكه‌لوپه‌ل وئاميرێن وزێ، ژبلى پشته‌ڤانيكرنا كه‌رتێن ساخله‌ميێ وژينگه‌هێ وفێركرنێ.
ئۆكۆماتۆ رۆناهى خسته سه‌ر خواستا كۆمپانيا خوه بۆ به‌رفره‌هكرنا كارێن خوه ل عيراقێ ب رێيا دابينكرنا هۆكارێن ڤه‌گوهاستنێ ب هه‌موو جۆرێن خوه وب كواليتيا بلند كو ل گه‌ل ژينگه‌هێ وره‌وشا عيراقێ بگونجيت وئه‌و ئاميرێن بۆ دوباره ئاڤاكرن وبه‌رهه‌مئينانێ مفا هه‌بيت، خوه‌شحاليا خوه ژى ب ب وێ چه‌ندێ دياركر كو به‌رهه‌مێن يابانى به‌رده‌وام ژلايێ وه‌لاتيێن عيراقى ڤه جهێ باوه‌ريێ نه.
دووپاتكر ژى كو وان هيڤيا وێ دخوازن ده‌ليڤا كارى بۆ وه‌لاتيێن عيراقێ دابين بكه‌ن ب رێيا ڤه‌كرنا لقێ كۆمپانيا خوه وبنگه‌هێ تواناسازيێ بۆ كۆمپانيێن تۆيۆتا و هينۆ وكۆمپانيێن دى ل هه‌موو ده‌ڤه‌رين عيراقێ.
ژلايێ خوه‌ڤه فوئاد حسێن خوه‌شحاليا خوه ب پێشنيازێن شاندێ مێهڤان نيشان دا ودووپات كر ژى وه‌لاتيێن عيراقێ به‌رده‌وام باوه‌رى يا ب به‌رهه‌مێن يابانى هه‌ى ب تايبه‌تى دبوارێ دروستكرنا تررومبێلان دا.
دياركر ژى كو حوكمه‌ت دێ بزاڤا ڤه‌خواندنا ئۆڤه‌رێن ڤێ كۆمپانيێ كه‌ت وكارى بۆ ره‌خشاندنا هاريكاريێ كه‌ت دناڤبه‌را وێ كۆمپانيێ وهه‌موو وه‌زاره‌تێن عيراقێ.
ئەڤرۆ نیوز ، زنار تۆڤی:
ئەڤرۆ چار شەمبی 28/11/2018 رێباز حەملان، وەزیرێ دارایی و ئابووری یێ حوکمەتا هەرێما كوردستانێ پێشوازى ل بارونیس نیلكسون، هنارتیێ تایبەت یێ سەرۆك وەزیرێن بریتانیا و جۆن ویلكس و بالیۆزی بریتانیا ل عێراقێ و مارتن وار، كونسولێ گشتی یێ بریتانیا ل هەرێما كوردستانێ و شاندەکێ ل گەل دا كر.
د دیدارێ دا هنارتیێ تایبەت یێ سەرۆك وەزیرێن بریتانیا بەحسێ سەركەفتنا هەرێما كوردستانێ كر، ل سەر وێ ره‌وشا د ده‌مێ بوری دا دروست بووی، هەروەسا دده‌ستخوه‌شى ل وەزارەتا دارایی و ئابووری كر، ب تایبەتی وان چاكسازیێن بەرچاڤ و مەزن ئەنجامداین د ده‌مێ سالەکێ دا، هەروەسا ئەو ئاسانكاریێن هاتینە كرن بۆ كۆمپانیێن بریتانی.
رێباز حەملان، وەزیرێ دارایی و ئابووری ئاماژە ب پەیوەندیێن ئابووری و دارایی یێن هەرێما كوردستانێ و كۆمپانیێن بریتانی كر و سوپاسيا پشتیەڤانیا حوکمەتا بریتانیا كر، هەروەسا بەحسێ چاكسازیێن وەزارەتا دارایی و ئابووری كر ل بانك و ده‌رگه‌هێن سنورى و فرۆكخانا و گومرگ و باجا کو کرینه ئەلەكترۆنی. هەروەسا پەیوەندیێن دناڤبەرا و هەولێر و بەغدا تەوەرەکێ دیتر یا وێ كۆمبوونێ بوو ب تایبەتی نەهێلانا خالێن گومرگی یێن دناڤبەرا هەرێمێ و بەغدا و پشكا كوردستانێ د پڕۆژە قانوونا بودجێ 2019 یێ عیراقێ و ئێكخستنا پێناسا گومرگی دناڤبەرا هەردو لایان دا.
ئەڤرۆ نیۆز:
سەرۆک بارزانی راگەهاند کو ئارمانجا سەرەدانا من یا بۆ بەغدا بۆ چارەکرنا ئاریشێن د ناڤبەرا هەرێما کوردستانێ و بەغدا بوویە و داخواز ژ من هاتیە کرن کو بۆ ئاشتیا نیشتمانی دەسپێشخەریێ بکەم و گۆت: (ئەم ژی دێ دووڤچوونا بابەتی کەین و هەکە ئەز بزانم دێ ئەنجامێ خوە یێ باش هەبن یا پێدڤی دێ کەین لێ هەکە زەمینە بۆ هندێ گونجای نەبیت جارێ چو پێنگاڤ ناهێنە هاڤێتن).
سەرۆک بارزانی هەروەسا دیار کر کو د سەرەدانا خوە دا ئەز ل گەل هەموو ئالیان بێی جودا کۆمبووم و ئەم ل دۆر هەموو ئاریشان ئاخڤتین و ئەز ب باوەرم دێ گوهۆرینێن باش دروست ببن و گۆت: (ئەز باوەر ناکەم کو عادل عەبدولمەهدی وەکو سەرکردێن بەرێ یێن عیراقێ بخوازیت گەلێ کوردستانێ سزا بدەت، هەکە تشتەک وەسا هەبا من سەرەدانا بەغدا نەدکر و نها مە دڤێت ب کریاری پێنگاڤ بهێنە هاڤێتن).
سەرۆک بارزانی هەروەسا ئەو یەک ژی دیار کر کو ب چو رەنگەکێ هەلویستێ مە ل سەر حسابێ ئارمانجێن ستراتیژی یێن گەلێ کوردستانێ نەبوویە و نابیت و ل دۆر کەرکووکێ ژی دیار کر کو کەرکووک باژێرێ پێکڤەژیانێ یە لێ دێ ناسناما وێ هەر یا کوردستانی بیت.
ئەڤرۆ نیوز،بارزان مزووری:
ل شەڤا بوری دەمژمێر ١١ شەڤ ٢٧/١١ ژنەک بناڤێ”ب،س،خ” د ژیێ ٢٠ سالی دا ل گوندێ بوزا سەر ب ناحیا ئەلقوش ڤە ژ ئەگەرێ خارنا گەلەک جورێن حەبا گیانێ خوە ژ دەست دا.
نوژدارەک ل نەخوشخانا شێخان کو نەڤیا ناڤێ وی دیار بیت بو ئەڤرۆ نیوز دیار کر کو درەنگی شەڤێ ژنەک بناڤێ”ب،س” ژلایێ کەسوکارێن وێ ڤە گەھاندیە نەخوشخانا تەنگاڤیا ل شێخان لدووڤ راپورتا پزیشکی ھژمارەکا زور یا حەبێن جوراو جور خاربون بوو ئەگەر مەعیدێ وێ تێکبچیت و گیانێ خوە ژ دەست بدەت دووڤ دا بۆ نوشداریا داد ل پارێزگەھا دھوک ھاتە رەوانەکرن.
ل دۆر ڤێ بویەرێ رێوان ھەڤژینێ وێ ژنێ بۆ ئەڤرۆ نیوز دیار کر کو مەغرەب دگەل خێزانا خو بووم و چو کێشە نەبون و مە بەرھەڤی بۆ شەھیانەکێ دکر دیسان پشتی ژ مال دەرکەفتیم ل دەمژمێر ١١ شەڤ ھاتمە ئاگەھدارکرن ل دۆر ڤێ روودانێ کو رەوشا وێ یا خرابە بو نەخوشخانا شێخان ڤەگوھاستیە ھەتا گەھشتیم ھەڤژینا من گیانێ خوە ژ دەست دابوو.
ناڤھاتی خویاکر کو وان چ ئاریشە دگەل ئێک نەبوون من ب حەژێکرن ئینایە ماوێ دوو سال ئەڤیندارێن ئێک بوین بەری ب خازم ژبەرکو کچ ماما من بو پەیوەندیێن ئەڤینیا مە باش بوینە دەیکا دوو زاروکایە زارویەکێ من ژیێ وی ٥ سالە.
ل دۆر ڤێ روودانێ عەقید عارف میرخان رێڤەبەرێ پولیسێن ناحیا ئەلقوش بۆ ئەڤرۆ نیوز ئاشکرا کر کو ڤەکولین نوکە د ڤێ روودانێ دا یا بەردەوامە و ھێشتا چو کەس ژی نە ھاتینە دەستەسەر کرن.
نيشاندان