ئەڤرۆ نیوز، نەوزاد ھلۆری:
ژ ئەگەرێ بارینا بارانێن زۆر و بەردەوام، ژ سێ رویان ڤە کارتێکرن ل گەنمێ جوتیارێن سنوورێ ناحیا شێلادزێ ھاتیەکرن، جوتیار ژی دیادکەن کو گەنمێ ئەڤ سالە بێ بەرھەمە و زێدەتر دێ وەکو ئالیک بو ئاژەلی ھێتە بکارئینان.
عومەر رێکانی، جوتیارەکێ دەڤەرێ یە بۆ ئەڤرۆ نیوز گۆت: (سالانە بەشەک ژ خەلکێ شێلادزێ گەنمی دچینن و بەرھەمەکێ باش دەستخوڤە دئینن، بەلێ ئەڤ سالە گەنم گەلەکێ بێ بەرھەمە و ھوسا بچیت تنێ دێ وەکو ئالیک بو ئاژەلی ھێتە بکارئینان).
زێدەتر گۆت: (ئەگەرێ سەرەکی یێ پیچ بوونا گەنمێ دەڤەرێ دزڤریت بو بارینا بارانێن زور و بەردەوام، بارانان پرانیا گەنمێ دەڤەرێ ژەنگی کریە، بەشەکێ زور ژ گەنمێ دەڤەرێ شین نەبویە و وەکو خوە بەژن کورتی مایە، ھەر دیسان ھەر ژ ئەگەرێ بارانان گەنمێ دەڤەرێ ھەموو دێ پلە و جورێ نەباش ھێتە ھژمارتن چونکی کارتێکرنا بارانێ بویە ئەگەر دەنکا وێ رەش و بچوک بیت، ئێک ژ ئەگەرێن دی یێن بارانێ حەشەراتێن بچوک دناڤ گەنمی دا زور بوینە و ئەگەر نەھێتە ژناڤبرن دێ کارتێکرنێن نەرێنی لسەر بەرھەمی کەن).
ناڤبری دیارکر ژی کو زێدەباری کو بارانان کارتێکرن ل گەنمی کریە، ھەڤدەم لایەنێن شولەژێ وەکو پێدڤی ھاریکاریا جوتیاران نەکریە د دابینکرنا دەرمانان و زێدەتر گۆت: (پرانیا خەلکێ دەڤەرێ ئەڤێن گەنم چاندی ب مەرەما خودانکرنا تەرش و کەوالی بویە، بەلێ ل گەل ڤێ یەکێ ژی بەشەک ژ جوتیاران بۆ مەرەما فرۆتنا بەرھەمی گەنم چاندیە).
نيشاندان
