ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ رێژێن باران بارينێ دده‌مێ 24 ده‌مژمێرێن بۆرى دا ل هه‌رێما كوردستانێ به‌لاڤكرن.
رێڤه‌به‌ريا ناڤبرى رێژێن بارانێ ل چه‌ند ده‌ڤه‌رێن پارێزگه‌ها دهۆكێ به‌لاڤكرن كو ب ڤى شێوه‌ى بوون:
بامه‌رنێ 18.8 ملم
مانگێش 14.2 ملم
زاخۆ 11.6 ملم
دهۆك 8.9 ملم
ئاكرێ 8.6 ملم
كانيماسێ 7.4 ملم
ئامێديێ 6.8 ملم
ئه‌ڤرۆنيوز:
راگه‌هاندنا به‌شێ هاتنوچوونا قه‌زا دهۆكێ بۆ ئه‌ڤرۆنيوز دياركر كو ئه‌ڤرۆ ئه‌ينيێ 8/2/2019 ل سه‌ر رێيا دهۆك – زاويته ترومبێله‌ك وه‌رگريا و دئه‌نجامدا چار كه‌س برينداربوون.
سالح جه‌ميل ژ راگه‌هاندنا به‌شێ هاتنوچوونا قه‌زا دهۆكێ/ بنگه‌هێ هاتنوچوونا زاويته بۆ ئه‌ڤرۆنيوز گۆت” هه‌ر چار بريندار بۆ نه‌خوه‌شخانا ته‌نگاڤيان ل دهۆكێ هاتن هنارتن”.
گۆت ژى” ئه‌گه‌رێ روودانێ دزڤريت بۆ بكارئينانا له‌زاتيێ”.
ئه‌ڤرۆنيوز:
هێزه‌كا ب سه‌ر ميليشيێن حه‌شدا شه‌عبى يا عيراقى ئه‌ڤرۆ ئه‌ينيێ 8/2/2019 ب رێيا سێ مووشه‌كان هێرش كره سه‌ر بنگه‌هه‌كێ له‌شكرى يێ ئه‌مريكى ل پارێزگه‌ها ئه‌نبار ل رۆژئاڤايێ عيراقێ.
ده‌زگه‌هێن راگه‌هاندنێ يێن عيراقى به‌لاڤكر كو ئه‌و هێرش ژلايێ ميليشيا حزبولا يا عيراقى هاتيه ئه‌نجامدان وسێ مووچه‌ك ئاراسته‌ى بنگه‌هه‌كێ له‌شكرى يێ ئه‌مريكى ل رۆژئاڤايێ پارێزگه‌ها ئه‌نبار كرن.
ل دۆر وێ هێرشێ، هه‌تا نوكه له‌شكرێ ئه‌مريكى چو رۆهنكرن به‌لاڤ نه‌كرينه.
ده‌زگه‌هێن راگه‌هاندنێ يێن عيراقى دياركر كو ئه‌و بنگه‌هێ له‌شكرى يێ ئه‌مريكى ئه‌وێ تووشى هێرشا حه‌شدا شه‌عبى بووى دكه‌ڤيته نێزيكى باژێرێ قائيم ل رۆژئاڤايێ پارێزگه‌ها ئه‌نبار.
ئه‌ڤ هێرشه دده‌مه‌كى دايه كو دونالد ترامپ سه‌رۆكێ ئه‌مريكا ل رۆژا ئێكشه‌مبيا بۆرى راگه‌هاندبوو كو هێزێن ئه‌مريكى دێ ل ناڤ ئاخا عيراقێ چاڤدێريا ره‌وشا ئيرانێ كه‌ن، ژبه‌ر وێ داخۆيانيا ترامپى شيعه‌يێن عيراقێ ب توندى نه‌رازيبوونا خوه دياركر وداخوازا چوونا ده‌رڤه يا هێزێن ئه‌مريكى ژ ئاخا عيراقێ كرن.
ئەڤرۆ نیوز:
یاریێن گەرا ١٥ ژ خولا ھەرێما کوردستانێ یا تەپا پێ ئەڤرۆ ب دووماھی ھاتن دەمێ ل یاریگەھا خوە زێرەڤانی دھۆک تووشی خوسارەتیا دویێ کری و بھێز ھاتیە د ھەڤرکیێ دا.
د کەش و ھەوایەکێ سار و باران دا ئەڤرۆ ئێڤاری یاریا دێربیا پارێزگەھێ ناڤبەرا یانا زێرەڤانی و دھۆک دا ھاتە کرن و د ڤێ یاریێ دا زێرەڤانی شیا ب ئاست و ئەنجام سەرکەفتنێ ل سەر یانا دھۆک توماربکەت ب دو گۆلان بێ بەرامبەر، گۆلێن یانا زێرەڤانی ژ لایێ یاریزانێن وێ دودو لیما و غیاس شوکر ڤە د نیڤا دویێ یا یاریێ دا ھاتنە تومارکرن.
ب ڤی خوسارەتیێ دھۆک پاشڤە زڤری رێزا چارێ ب ٢٣ خالان و زێرەڤانی پێشڤە ھاتە رێزا پێنجێ ب ٢٢ خالان.
ژ ھەمان گەر نوونەرا دویێ یا پارێزگەھێ یانا ئاکرێ تووشی خوسارەتیێ بوو ل سەر دەستێ یانا ئارارات ب دو گۆلان بەرامبەر گۆلەکێ و ئاکرێ نوکە ل رێزا دووماھیا خولێ دھێت ب ١١ خالان و مەترسیا داکەفتنێ ل سەرە.
ئەڤرۆ نیوز:
بالیۆزێ روسیا ل شامێ ئەلیکساندر ییفیمۆڤ بۆ دەزگەهێن راگەهاندنێ دیار کر کو مە نەڤێت ئێدی ل سەر ئاخا سووریێ شەر بەردەوام بیت و هەروەسا ئەم ل گەل ڤێ یەکێ ژی نینین کو هێزێن بیانی ئێدی ل سووریێ بمینن و دڤێت ژ ئاخا سووریێ دەرکەڤن.
ل دۆر دانوستاندنێن د ناڤبەرا کوردان و شامێ ژی بالیۆزێ روسیا راگەهاند کو ئەم پشتەڤانیێ ل دانوستاندنێن کوردان و شامێ دکەین و هێڤیدارین هەر دو ئالی بگەهنە رێککەفتنەکێ، چونکو مە نەڤێت سووریا بەر ب شەرەکێ دی یێ ناڤخوەیی ڤە بچیت.
ئەڤرۆ نیوز:
کاروان محەمەد پەیڤدارێ رێڤەبەریا هاتنوچوونا سلێمانی بۆ دەزگەهێن راگەهاندنێ دیار کر کو ئەڤرۆکە دەمژمێر ئێکێ نیڤرۆ ل سەر رێیا سلێمانی و عەربەت ژ بەر روودانەکا هاتنوچوونێ د ناڤبەرا دو ترۆمبێلان دا ٤ کەسان جانێ خوە ژ دەست داینە و سێ کەس ژی بریندار بووینە.
ناڤهاتی راگەهاندیە کو هێزێن هەوارهاتنێ هەر زوو گەهشتینە جهێ روودانێ و بریندار بۆ نەخوەشخانێ هاتینە رەوانە کرن و نها ڤەکۆلین ل دۆر روودانێ بەردەوامە.
ئەڤرۆ نیوز:
بەرپرسەکێ وەزارەتا دەرڤە یا ئەمریکا بۆ ئاژانسا رویترز دیار کریە کو هەتا سێ مەهێن دی ئەمریکا دێ هێزێن خوە ژ سووریێ ڤەکێشیت لێ ئەو یەک رامانا هندێ نادەت کو دێ شەرێ ل دژی داعشێ ب دووماهی هێت.
هەمان بەرپرسێ ئەمریکا دیار کریە ژی کو ئەو دێ هێزێن کوردی کو شەرێ داعشێ کرینە پارێزن و رێ نادەن چو ئالیەک هێرشی کوردان بکەت.
هەتا نها د ڤێ دەربارێ دا بەرپرسێن ئیدارا خوەسەر یا رۆژئاڤایێ کوردستانێ ب فەرمی چو داخۆیانی بەلاڤ نەکرینە.
ئەڤرۆ نیوز:
ل گۆر چەندین دەزگەهێن راگەهاندنێ پشتی هێرشێن بەردەوام یێن ئیسرائیلێ ل رەخ شامێ و فرۆکەخانا نێڤدەولەتی یا شامێ ل سەر بنگەهێن سەربازی یێن ئیرانێ کو هەتا نها د ئەنجام دا ب دەهان سەرباز و ئەفسەرێن ئیرانێ هاتینە کوشتن و گەلەک چەکێن گران یێن ئیرانێ ژی هاتینە ژناڤبرن، د دووماهیێ دا ئیرانێ بریار دایە چەندین بنگەهێن خوە ل شامێ چۆل بکەت.
بەری نها ژی چەندین جاران بەرپرسێن سەربازی یێن ئیرانێ دیار کربوون کو ئەو ل هەمبەر هێرشێن ئیرانێ یێن ل سووریێ ل سەر هێزێن خوە بێدەنگ نامینن، لێ سەرۆک وەزیرێن ئیسرائیلێ ژی دیار کر کو هەتا نها مە پتر ژ هزار جاران هێرشی هێزێن ئیرانێ کریە و ئیرانێ ئەو شیان نینن بەرسڤا مە بدەت.
ئەڤرۆ نیوز، هۆشەنگ تاجر:
ئەحمەد چالیشکان چاڤدێرێ سیاسی ل باکورێ کوردستانێ بۆ ئەڤرۆ نیوز دیار کر کو دادگەها بلندا تورکیا ب بەهانا ناڤێ کوردستانێ داخوازا داخستنا پارتا ئازادی یا کوردستانێ ل باکور کریە و دبێژن نابیت چو پارتەکا سیاسی ل تورکیا ب ناڤێ کوردستانێ کارێ سیاسی بکەت.
بەرپرسەکێ پارتا ئازادی ژی بۆ ئەڤرۆ نیوز دیار کر کو د دەمەکێ نێزیک دا پارتا مە دێ ب فەرمی هەلویستێ خوە د ڤێ دەربارێ دا ئاشکرا بکەت و داخستنا پارتا مە ب بەهانا کو پارتەکا کوردستانی یە نیشا ددەت کو تورکیا بەر ب دکتاتوریەتێ ڤە دچیت و ئەو یەک ب چو رەنگەکێ ناهێتە قەبوول کرن.
نيشاندان