ئەڤرۆ نیوز:

وەزارەتا دەرڤە یا ئەلمانیا راگەهاند کو ئەو ب چو رەنگەکێ قەبوول ناکەن تورکیا هێرشی رۆژئاڤایێ کوردستانێ بکەت، چونکو ئەو یەک دێ بیتە ئەگەرێ روودانا شەرەکێ دی ل سووریێ و ب هزاران کەس دێ پەنابەر بن و ژ بەر هندێ ژی دڤێت تورکیا خوە ژ هێرشەکێ وەسا دوور بکەت.

وەزارەتا دەرڤە یا ئەلمانیا ئاماژە ب هندێ ژی دکەت کو دڤێت تورکیا رێزێ ل قانوونێن نێڤدەولەتی بگریت و هێرشی سووریێ نەکەت، چونکو تورکیا مافێ هندێ نینە ئاخا وەلاتەکێ دی داگیر بکەت و پێدڤیە خەلکێ سووریێ ب خوە بریارێ ل دۆر پاشەرۆژا خوە بدەن و ئاریشێن خوە ژی چارەسەر بکەن.

ئەڤرۆ نیوز:

جان لودریان وەزیرێ دەرڤە یێ فرەنسا ئەڤرۆکە راگەهاند کو هێزێن مە ل گەل هێزێن ئەمریکا و چەندین وەلاتێن دی ژ بەر شەرێ ل سووریێ و ژ بۆ ئارامیا وەلاتیان ل وێرێ نە، هەتا کو قەیرانا ل سووریێ ژی بەردەوام بیت ئەم نەچارین ل وێرێ بین و گۆت: (دەمێ قەیرانا سووریێ ب دووماهی هات و ئاشتی ل وی وەلاتی بنەجه بوو ئێدی پێدڤی ب مانا هێزێن مە ل سووریێ ناکەت و دێ هەموو هێزێن خوە ڤەکێشین).

ل دۆر ڤەکێشانا هێزێن ئەمریکا ژی ناڤهاتی راگەهاند کو جارێ دیار نینە کا دێ کەنگێ ئەمریکا هێزێن خوە ڤەکێشیت و دڤێت هەمانگیەکا تەمام د ڤێ دەربارێ دا بهێتە کرن.

ئەڤرۆ نیوز:

نوری مەحمود پەیڤدارێ یەپەگێ جارەکا دی راگەهاند کو ئەو ب هەموو رەنگەکێ ل دژی پارچەکرنا ئاخا سووریێ نە و گۆت: (مە دڤێت هەموو گەلێن ل سووریێ پێکڤە ئاریشێن خوە چارەسەر بکەن و نەهێلن سووریا بهێتە پارچەکرن و ئەم بۆ هندێ کار دکەین).

ناڤهاتی راگەهاند کو دڤێت هەموو هێزێن سووریێ ل دژی هێرشێن تورکیا ئێکەتیا خوە دروست بکەن و سووریێ بپارێزن و گۆت: (خالەکا دی یا گرنگ ژی ئاریشێن ناڤخوەیی یێن سووریێ نە، دڤێت ئەم نەهێلین هێزێن دەرەکی دەستێوەردانێ د کاروبارێن ناڤخوەیی یێن سووریێ بکەن، دڤێت هەموو هێزێن سووریێ پێکڤە ئاریشێن خوە چارە بکەن و نەهێلن سووریا بهێتە پارچەکرن).