ئه‌ڤرۆنيوز:
به‌رى ده‌مه‌كێ كێم ياريا يانا به‌رشه‌لونا ومێهڤانا وێ يانا ريال بيتيس دچارچۆڤێ خۆلا ئيسپانى يا ته‌پا پێ ب دووراندنا وێ ب ئه‌نجامێ 3-4 ب دووماهى هات.
گۆلێن ريال بيتيس ل خۆله‌كێن 20 و34 و71 و83 هاتن تۆماركرن وگۆلێن به‌رشه‌لونا ل خۆله‌كێن 68 و79 و92 هاتن تۆماركرن.
ب ڤى ئه‌نجامى يانا به‌رشه‌لونا هه‌ر ل رێزا ئيكێ دمينيت ب 24 خالان ژ 12 ياريان ويانا ئه‌تله‌تيكۆ مه‌دريد ب 23 خالان ل رێزا دويێ دهێت، يانا ريال بيتيس ژى خالين خوه گه‌هاندنه 16 خالان ول رێزا 12 دهێت.
ئەڤرۆ نیوز ، سەباح زوھێر:
ئەڤرۆ ل رێکەفتی ١١/١١/٢٠١٨ل ھولا کونفرانسا ل قەزا ئاکرێ ل ژێر دروشمێ( زانستەکێ بھێز کوردستانەکا بھێز ئاڤا دکەت) ئاھەنگا دەرچوونا قوتابیێن پەیمانگەھا تەکنیکی یا تایبەت ب رەواندز لقا ئاکرێ ڤە ھاتە گێران و تێدا ١٥٢ قوتابیان باوەرنامە وەرگرتن.
رەمەزان ئەحمەد رەشید جێگرێ راگرێ پەیمانگەھا تەکنیکی تایبەت رەواندز ل ئاکرێ بۆ روژناما ئەڤرۆ دا دیارکرن کو گەرا دووێ یا دەرچوونا قوتابیێن سالا(٢٠١٧ــ٢٠١٨)ێ پەیمانگەھێ ھاتە گێران کو ژ سێ پشکێن زانستی پێک دھێت ئەو ژی پشکێن( ئینگلیزی و ژمێریاری و کارگێری یاسانە) کو سەرجەمێ قوتابیێن دەرچووی دڤێ گەرێ دا دبنە ١٥٢ قوتابی ل ھەرسێ پشکێن زانستی.
زێدەتر گۆت کو ئەڤ قوتابیێن دەرچووی مینا ھەر قوتابیەکێ دی دشێن دەلیڤێن کاری ب دەستخۆڤە بینن ل جھێن تایبەت و گشتی دا و خوشبەختانە کو ھژمارەکا قوتابیێن دەرچووی ل سالێن چووی ھاتینە دامەزراندن و خودان کارن ل دام و دەزگەھێن حکومەتێ و داخازا مە ئەوە ئەڤ ھەمی قوتابیە ژی ببنە خودان کار چ ل جھێن حکومی یان تایبەتی بن.
ئه‌ڤرۆنيوز:
رۆژنامه‌كا بريتانى به‌لاڤكر كو ناڤێن هه‌رسێ ياريكه‌رێن هه‌ڤركيێ ل سه‌ر ناسناڤێ ته‌پا زێرى وباشترين ياريكه‌رێ جيهانێ ل سالا 2018 كو برياره ل 3/12/2018 بهێته راگه‌هاندن، هاتينه ئاشكراكرن.
رۆژناما (زا سه‌ن) يا بريتانى دياكر كو ناڤێ هه‌ردو ياريكه‌ران كريستيانۆ رونالدۆ وليونێل ميسى دناڤ وان هه‌رسێ ناڤان دا نينه.
دياركر ژى كو رۆژنامه‌ڤانێ فه‌ره‌نسى (ئيريك مامروس) سێ ناڤێن هه‌ڤرك ديتينه ئه‌وژى ياريكه‌رێ هه‌لبژارتيێ كرواتيا ويانا ريال مه‌دريد لوكا مودريتش و ياريكه‌رێ هه‌لبژارتيێ فه‌ره‌نسا ويانا ريال مه‌دريد رافائيل فاران وياريكه‌رێ هه‌لبژارتيێ فه‌ره‌نسا ويانا باريس سان جيرمان كيليا مبابى.
ئه‌ڤرۆنيوز:
جڤاتا وه‌زيرێن عيراقێ لايه‌نين په‌يوه‌نديدار راسپاردن بۆ دانانا لژنه‌كێ ب سه‌رۆكاتيا وه‌زيرێ دارايى بۆ پێداچوونێ ب پرۆژێ قانوونا بودجا گشتى يا عيراقێ بۆ سالا 2019 وتێبينيێن هه‌رێما كوردستانێ ژى ل به‌رچاڤ دێ هێنه وه‌رگرتن.
جڤاتا وه‌زيرێن عيراقێ ئه‌ندامێن لژنا پێداچوونێ ب پرۆژێ قانوونا بودجا گشتى بۆ سالا 2019 دياركرن وفوئاد حسێن وه‌زيرێ دارايى وه‌كو سه‌رۆكێ وێ لژنێ دياركر وبرياره بۆ وێ مه‌ره‌مێ ژى هه‌ماهه‌نگى ل گه‌ل هه‌رێما كوردستانێ بهێته كرن.
ئه‌مينداريا گشتى يا جڤاتا وه‌زيرێن عيراقێ دبه‌ياننامه‌كێ دا كو ئه‌ڤرۆ ئێكشه‌مبى 11/11/2018 ده‌ركرى راگه‌هاند” جڤاتا وه‌زيرێن عيراقێ بريار دايه ب پێكئينانا لژنه‌كێ ب سه‌رۆكاتيا فوئاد حسێن وه‌زيرێ دارايى وبريكارێ وه‌زيرێ دارايى ب وه‌كاله‌ت وبريكارێ وه‌زاره‌تا پلاندانانێ وبريكارێ وه‌زاره‌تا ساخله‌ميێ وشيره‌تكارێ ئابوورى وسه‌رۆكێ ده‌سته‌يا بلند يا هه‌ماهه‌نگيێ دناڤبه‌را پارێزگه‌هان بۆ پێداچوونێ ب پرۆژێ قانوونا بودجا عيراقێ بۆ سالا 2019″.
ئاماژه كر ژى كو ب سه‌رپه‌رشتيا فوئاد حسێن وه‌زيرێ دارايى وب هه‌ماهه‌نگى ل گه‌ل نوونه‌رايه‌تيا حوكمه‌تا هه‌رێما كوردستانێ ونوونه‌رێن پاريزگه‌هان، ئه‌ركێ كاران دێ بخوه‌ڤه گريت بۆ پێشكێشكرنا تێبينيێن خوه ل سه‌ر پرۆژێ قانوونێ وهه‌ماهه‌نگى ل گه‌ل لژنا ناڤبرى بۆ يه‌كخستنا تێبينيێن وان.
جڤاتا وه‌زيرێن عيراقێ دياركريه ژى كو وێ لژنێ ده‌ستهه‌لاتا پێداچوون وراستڤه‌كرنا به‌ندێن پرۆژێ قانوونا بودجا گشتى يا عيراقێ بۆ سالا 2019 دێ هه‌بيت وپاشى دێ بلندكه‌ت بۆ جڤاتا وه‌زيران.
ئه‌ڤرۆنيوز:
ده‌زگه‌هێ ڤه‌كۆلينێ د تاوانێن فيدرالى دا ل ئه‌لمانيا پيلانا كوده‌تايه‌كا له‌شكرى ل وى وه‌لاتى ئاشكراكر.
ده‌زگه‌هێن راگه‌هاندنێ يێن ئه‌لمانى ئه‌ڤرۆ ئێكشه‌مبى 11/11/2018 به‌لاڤكر كو پيلانا كوده‌تايا له‌شكرى ژلايێ هژماره‌كا فه‌رماندێن له‌شكرێ ئه‌لمانى به‌رنامه بۆ هاتبوو دارێتن ول به‌ربوون هژماره‌كا سه‌ركردێن سياسى يێن ئه‌لمانى تيرۆر بكه‌ن.
پيلانا ناڤبرى ژلايێ ده‌زگه‌هێ ڤه‌كۆلينێ دتاوانێن فيدرال دا ل ئه‌لمانيا هاته ئاشكراكرن كو ژبلى هژماره‌كا فه‌رمانده وئه‌فسه‌رێن له‌شكرێ ئه‌لمانى، چه‌ند فه‌رمانده وئه‌فسه‌رێن هێزێن تايبه‌ت ژى پشكدارى ددارێتنا پيلانێ دا كربوو.
ده‌زگه‌هێن راگه‌هاندنێ يێن ئه‌لمانى ديار دكه‌ن كو وان فه‌رماندێن له‌شكرى ل به‌ربوو رۆژه‌كێ دياربكه‌ن بۆ ده‌سته‌سه‌ركرنا هژماره‌كا سه‌ركردێن سياسى ب تايبه‌ت ديمتار بارتج سه‌رۆكێ چه‌پره‌وێن ئه‌لمانيا دئێك ده‌مدا وپاشى هه‌موويان پێكڤه ب كوژن.
ل دووڤ وێ گرۆپا له‌شكرى، ئه‌لمانيا ژ ناڤچوونێ يا نێزيك بووى وپێدڤيه تيمه‌ك هه‌بيت بۆ ب رێڤه‌برنا وه‌لاتى پشتى نه‌مانا سياسه‌تمه‌دارێن نوكه وبۆ وێ مه‌ره‌مێ ژى، چه‌ك وسوته‌مه‌نيا پێدڤى ل چه‌ندين جهان عومبار كربوو.
ئه‌ڤرۆنيوز:
سه‌رۆكێ جڤاتا سه‌ركردايه‌تيا پارتى ديموكراتى كوردستان ل سلێمانيێ – هه‌له‌بجه راگه‌هاند، ل هه‌فتيا داهاتى شاندێ بلند يێ پارتى وئيكه‌تى دێ ل گه‌ل لايه‌نين سياسى يێن هه‌رێما كوردستانێ كۆمبن ودياركر كو ل دووڤ كورسيان دێ مامه‌له ل گه‌ل لايه‌نان هێته كرن.
عارف ته‌يفوور، سه‌رۆكێ جڤاتا سه‌ركردايه‌تيا پارتى ل سلێمانيێ – هه‌له‌بجه گۆت” ب مه‌ره‌ما پێكئينانا كابينا نوو يا حوكمه‌تا هه‌رێما كوردستانێ، پارتى ديموكراتى كوردستان شانده‌كێ پێنج كه‌سى ب سه‌رۆكاتيا جه‌عفه‌ر ئيبراهيم پێكئينايه ول هه‌فتيا داهاتى شاندێ پارتى دێ ل گه‌ل لايه‌نين سياسى كۆمبيت”.
عارف ته‌يفوور دداخۆيانيه‌كا رۆژنامه‌ڤانى دا گۆت ژى” نێچيرڤان بارزانى به‌ربژاره بۆ كابينا نوو يا حوكمه‌تا هه‌رێما كوردستانێ، به‌لێ هه‌تا نوكه چو دانوستاندنه‌ك ل دۆر گورانكاريان دپۆستان دا نه‌هاتيه كرن”.
گۆت ژى”هه‌رچه‌نده به‌حسێ وێ چه‌ندێ دهێته كرن كو ڤێجارێ سه‌رۆك وه‌زيرێن هه‌رێما كوردستانێ دێ دو جێگر هه‌بن، به‌لێ ئه‌و بۆچوونه ودێ ل گه‌ل ئێكه‌تيێ دانوستاندنێ ل دۆر وێ چه‌ندێ كه‌ين”.
دياركر”هه‌رچه‌نده به‌حس ل وێ چه‌ندێ ژى دهێته كرن كو ڤێجارێ حوكمه‌تا بنكه‌فراوان نامينيت، به‌لێ پارتى ل دووڤ رێژا كورسيان دێ مامه‌لێ ل گه‌ل ئێكه‌تيێ ولايه‌نين سياسى يێن دى دێ كه‌ت، له‌وما هيڤيا وێ چه‌ندێ دخوازين چار سالێن داهاتى يێن حوكمه‌تا هه‌رێما كوردستانێ، چار سالێن ئاراميێ وخوه‌شگوزه‌رانيێ بن بۆ وه‌لاتيێن هه‌رێما كوردستانێ”.
ئه‌ڤرۆنيوز:
وه‌زيرێ په‌ترۆلا سعوديێ دديداره‌كێ دا ل گه‌ل وه‌زيرێ په‌ترۆلا عيراقى، شيايه حوكمه‌تا عيراقێ ب وێ چه‌ندێ رازى بكه‌ت كو بهايێ په‌ترۆلا خام ئه‌رزانتر لێ بكه‌ت.
عاسم جيهاد، په‌يڤدارێ وه‌زاره‌تا په‌ترۆلا عيراقێ ل دووڤ يورۆ نيوز راگه‌هاند، دكۆمبوونا رۆژا دوهى شه‌مبيێ دناڤبه‌را خالد فالح وه‌زيرێ په‌ترۆلا سعوديێ وسامر غه‌زبان وه‌زيرێ په‌ترۆلا عيراقێ، هه‌ردو وه‌لات گه‌هشتنه رێككه‌فتنه‌كێ كو ب مه‌ره‌ما سه‌قامگيركرنا بازارێ جيهانيێ په‌ترۆلێ ورێگريێ ل زێده‌بوونا بهايێ په‌ترۆلێ ئه‌گه‌رێ سزايێن ل سه‌ر فرۆتنا په‌ترۆلا ئيرانێ، پێكڤه هه‌ڤكاريا نێزيك هه‌بيت وعيراق ژى بهايێ په‌ترۆلا خوه ئه‌رزانتر لێ بكه‌ت.
ژبلى وێ چه‌ندێ ژى به‌رپرسێن هه‌ردو وه‌لاتان دوێ ديدارێ دا به‌حسێ هنارتنا كاره‌با سعوديێ بۆ عيراقێ كر كو دبيت ئه‌ڤه ژى وه‌كو جهگرتنا كاره‌با ئيرانێ بيت كو رۆژانه سزايێن زێده‌تر ل سه‌ر ئيرانێ دهێنه سه‌پاندن.
ئه‌ڤرۆنيوز:
هژمارا قوربانيێن ئاگرێ باكوور وباشوورێ ويلايه‌تا كاليفۆرنيا ل ئه‌مريكا به‌ر ب زێده‌بوونێ يه وهه‌تا نوكه 250 هزار كه‌سان خانيێن خوه بجه هێلاينه.
ئاژانسا ئەسۆشیەتد پرێس يا ده‌نگوباسان به‌لاڤكر، تنێ ل باژێرێ پارادايس 23 كه‌س سوتن و24 كه‌سێن دى بريندار بوون وسپێده‌يا ئه‌ڤرۆ ئێكشه‌مبى 11/11/2018 د ته‌رمێن دى ل ده‌ڤه‌را ماليبۆ يا گه‌شتيارى هاتن ديتن وهژماره‌كا زۆر ژى دبێ سه‌ر وشوينن.
باژێركێ ماليبۆ ده‌ڤه‌ره‌كا گه‌شتيارى يه ومالا چه‌ندين ئه‌كته‌رێن مه‌زن يێن هۆلييودێ وكه‌سايه‌تيێن ناڤدار وه‌كو ويل سمز، له‌يدى گاگا، ئه‌ليسا ميلانۆ، كيم كارداشيان، رۆزانا ئاركێتى، كاتيلن جێنه‌ر وراين ويلسونى يێن تێدا، به‌لێ گه‌له‌ك ژوان مالێن وان ب تمامى يێن هاتينه سوتن.
دۆنالد ترامپ، سه‌رۆكێ ئه‌مريكا ئه‌گه‌رێ به‌رفره‌هبوونا وى ئاگرى بۆ لاوازيا رێڤه‌به‌رێن ئۆپه‌راسيۆنا ئاگر ڤه‌مراندنێ زڤراند وبارى نه‌ئاسايى ل ويلايه‌تا كاليفۆرنيا ژى راگه‌هاند.
ئه‌ڤرۆنيوز:
ل دووڤ وێ نڤيسارا وه‌زاره‌تا ناڤخوه ل هه‌رێما كوردستانێ ئاراسته‌ى وه‌زاره‌ت ورێڤه‌به‌ريان كرى، ب چه‌ند مه‌رجان فرۆتنا ترومبێلێن حكومى ب شێوه‌كێ فه‌رمى ده‌ستپێكر.
ل دووڤ وێ نڤيسارێ، ب چه‌ند برگه وماده‌يان شێوازێ فرۆتنا ترومبێلێن حكومى هاتيه دياركرن.
هه‌ر دوێ نڤيسارێ دا كو ژلايێ ديوانا وه‌زاره‌تا ناڤخوه ده‌رچووى ب ئيمزايا كه‌ريم شنگالى وه‌زيرێ ناڤخوه، هه‌موو رێنما تێدانه كا كيش ترومبێلا حكومى دێ هێته فرۆتن ورێڤه‌به‌رى ژى دشێن ده‌ستبه‌رداى كيشى ترومبێلان بن.
ئه‌و چه‌نده ژى هاتيه دياركرن كو حوكمه‌ت ب چو شێوه‌كى ترومبێلێن موديل 2014 و سه‌ردا نا فرۆشيت وئه‌و رێنما وبريار ژى ژ رۆژا به‌لاڤبوونێ د رۆژناما (وه‌قائيع كوردستان) دێ كار پێ هێته كرن.
هه‌روه‌سا ب فه‌رمانا وه‌زارى لژنه‌ك هاتيه پێكئينان بۆ فرۆتنا وان ترومبێلان كو سامى جه‌لال رێڤه‌به‌رێ گشتيێ ديوانا وه‌زاره‌تا ناڤخوه سه‌رۆكاتيا وێ لژنێ دكه‌ت وژ پێنج كه‌سان پێكهاتيه كو ئيك ژوان ئه‌ندازيارێ ميكانيكى يه.
نيشاندان